මූල > අභිධම්මපිටක > කථාවත්ථුපාළි

307. අත්ථි ¶ අරහතො අසුචි සුක්කවිස්සට්ඨීති? ආමන්තා. අත්ථි ¶ අරහතො රාගො කාමරාගො කාමරාගපරියුට්ඨානං කාමරාගසංයොජනං කාමොඝො කාමයොගො කාමච්ඡන්දනීවරණන්ති? න හෙවං වත්තබ්බෙ…පෙ….

නත්ථි ¶ අරහතො රාගො කාමරාගො කාමරාගපරියුට්ඨානං කාමරාගසංයොජනං කාමොඝො කාමයොගො කාමච්ඡන්දනීවරණන්ති? ආමන්තා. හඤ්චි නත්ථි අරහතො රාගො කාමරාගො කාමරාගපරියුට්ඨානං කාමරාගසංයොජනං කාමොඝො කාමයොගො කාමච්ඡන්දනීවරණං, නො ච වත රෙ වත්තබ්බෙ – ‘‘අත්ථි අරහතො අසුචි සුක්කවිස්සට්ඨී’’ති.

අත්ථි පුථුජ්ජනස්ස අසුචි සුක්කවිස්සට්ඨි, අත්ථි තස්ස රාගො කාමරාගො කාමරාගපරියුට්ඨානං කාමරාගසංයොජනං කාමොඝො කාමයොගො කාමච්ඡන්දනීවරණන්ති? ආමන්තා. අත්ථි අරහතො අසුචි සුක්කවිස්සට්ඨි, අත්ථි තස්ස රාගො කාමරාගො කාමරාගපරියුට්ඨානං…පෙ… කාමච්ඡන්දනීවරණන්ති? න හෙවං වත්තබ්බෙ…පෙ….

අත්ථි අරහතො අසුචි සුක්කවිස්සට්ඨි, නත්ථි තස්ස රාගො කාමරාගො කාමරාගපරියුට්ඨානං…පෙ… කාමච්ඡන්දනීවරණන්ති? ආමන්තා. අත්ථි පුථුජ්ජනස්ස අසුචි සුක්කවිස්සට්ඨි, නත්ථි තස්ස රාගො කාමරාගො කාමරාගපරියුට්ඨානං…පෙ… කාමච්ඡන්දනීවරණන්ති? න හෙවං වත්තබ්බෙ…පෙ….

අත්ථි ¶ ¶ අරහතො අසුචි සුක්කවිස්සට්ඨීති? ආමන්තා. කෙනට්ඨෙනාති? හන්ද හි මාරකායිකා දෙවතා අරහතො අසුචිං සුක්කවිස්සට්ඨිං උපසංහරන්තීති.

මාරකායිකා දෙවතා අරහතො අසුචිං සුක්කවිස්සට්ඨිං උපසංහරන්තීති? ආමන්තා. අත්ථි මාරකායිකානං දෙවතානං අසුචි සුක්කවිස්සට්ඨීති? න ¶ හෙවං වත්තබ්බෙ…පෙ….

නත්ථි මාරකායිකානං දෙවතානං අසුචි සුක්කවිස්සට්ඨීති? ආමන්තා. හඤ්චි නත්ථි මාරකායිකානං දෙවතානං අසුචි සුක්කවිස්සට්ඨි, නො ච වත රෙ වත්තබ්බෙ – ‘‘මාරකායිකා දෙවතා අරහතො අසුචිං සුක්කවිස්සට්ඨිං උපසංහරන්තී’’ති.

මාරකායිකා දෙවතා අරහතො අසුචිං සුක්කවිස්සට්ඨිං උපසංහරන්තීති? ආමන්තා. මාරකායිකා දෙවතා අත්තනො අසුචිං සුක්කවිස්සට්ඨිං උපසංහරන්ති, අඤ්ඤෙසං අසුචිං සුක්කවිස්සට්ඨිං ¶ උපසංහරන්ති, තස්ස අසුචිං සුක්කවිස්සට්ඨිං උපසංහරන්තීති? න හෙවං වත්තබ්බෙ…පෙ….

මාරකායිකා දෙවතා නෙව අත්තනො න අඤ්ඤෙසං න තස්ස අසුචිං සුක්කවිස්සට්ඨිං උපසංහරන්තීති? ආමන්තා. හඤ්චි මාරකායිකා දෙවතා නෙව අත්තනො න අඤ්ඤෙසං න තස්ස අසුචිං සුක්කවිස්සට්ඨිං උපසංහරන්ති, නො ච වත රෙ වත්තබ්බෙ – ‘‘මාරකායිකා දෙවතා අරහතො අසුචිං සුක්කවිස්සට්ඨිං උපසංහරන්තී’’ති.

මාරකායිකා දෙවතා අරහතො අසුචිං සුක්කවිස්සට්ඨිං උපසංහරන්තීති ¶ ? ආමන්තා. ලොමකූපෙහි උපසංහරන්තීති? න හෙවං වත්තබ්බෙ…පෙ….

308. මාරකායිකා දෙවතා අරහතො අසුචිං සුක්කවිස්සට්ඨිං උපසංහරන්තීති? ආමන්තා. කිං කාරණාති? හන්ද හි විමතිං ගාහයිස්සාමාති. අත්ථි අරහතො විමතීති? න හෙවං වත්තබ්බෙ…පෙ….

අත්ථි අරහතො විමතීති? ආමන්තා. අත්ථි අරහතො සත්ථරි විමති, ධම්මෙ විමති, සඞ්ඝෙ විමති, සික්ඛාය විමති, පුබ්බන්තෙ විමති, අපරන්තෙ විමති, පුබ්බන්තාපරන්තෙ විමති, ඉදප්පච්චයතාපටිච්චසමුප්පන්නෙසු ධම්මෙසු විමතීති? න හෙවං වත්තබ්බෙ…පෙ….

නත්ථි ¶ අරහතො සත්ථරි විමති, ධම්මෙ විමති, සඞ්ඝෙ විමති, සික්ඛාය විමති, පුබ්බන්තෙ විමති, අපරන්තෙ විමති ¶ , පුබ්බන්තාපරන්තෙ විමති, ඉදප්පච්චයතාපටිච්චසමුප්පන්නෙසු ධම්මෙසු විමතීති? ආමන්තා. හඤ්චි නත්ථි අරහතො සත්ථරි විමති…පෙ… ඉදප්පච්චයතාපටිච්චසමුප්පන්නෙසු ධම්මෙසු විමති, නො ච වත රෙ වත්තබ්බෙ – ‘‘අත්ථි අරහතො විමතී’’ති.

අත්ථි පුථුජ්ජනස්ස විමති, අත්ථි තස්ස සත්ථරි විමති…පෙ… ඉදප්පච්චයතාපටිච්චසමුප්පන්නෙසු ධම්මෙසු විමතීති? ආමන්තා. අත්ථි අරහතො විමති, අත්ථි තස්ස ¶ සත්ථරි විමති…පෙ… ඉදප්පච්චයතාපටිච්චසමුප්පන්නෙසු ධම්මෙසු විමතීති? න හෙවං වත්තබ්බෙ…පෙ….

අත්ථි අරහතො විමති, නත්ථි තස්ස සත්ථරි විමති…පෙ… ඉදප්පච්චයතාපටිච්චසමුප්පන්නෙසු ¶ ධම්මෙසු විමතීති? ආමන්තා. අත්ථි පුථුජ්ජනස්ස විමති, නත්ථි තස්ස සත්ථරි විමති…පෙ… ඉදප්පච්චයතාපටිච්චසමුප්පන්නෙසු ධම්මෙසු විමතීති? න හෙවං වත්තබ්බෙ…පෙ….

අත්ථි අරහතො අසුචි සුක්කවිස්සට්ඨීති? ආමන්තා. අරහතො අසුචි සුක්කවිස්සට්ඨි කිස්ස නිස්සන්දොති? අසිතපීතඛායිතසායිතස්ස නිස්සන්දොති. අරහතො අසුචි සුක්කවිස්සට්ඨි අසිතපීතඛායිතසායිතස්ස නිස්සන්දොති? ආමන්තා. යෙ කෙචි අසන්ති පිවන්ති ඛාදන්ති සායන්ති, සබ්බෙසංයෙව අත්ථි අසුචි සුක්කවිස්සට්ඨීති? න ¶ හෙවං වත්තබ්බෙ…පෙ….

යෙ කෙචි අසන්ති පිවන්ති ඛාදන්ති සායන්ති, සබ්බෙසංයෙව අත්ථි අසුචි සුක්කවිස්සට්ඨීති? ආමන්තා. දාරකා අසන්ති පිවන්ති ඛාදන්ති සායන්ති, අත්ථි දාරකානං අසුචි සුක්කවිස්සට්ඨීති? න හෙවං වත්තබ්බෙ.

පණ්ඩකා අසන්ති පිවන්ති ඛාදන්ති සායන්ති, අත්ථි පණ්ඩකානං අසුචි සුක්කවිස්සට්ඨීති? න හෙවං වත්තබ්බෙ…පෙ….

දෙවා අසන්ති පිවන්ති ඛාදන්ති සායන්ති, අත්ථි දෙවතානං අසුචි සුක්කවිස්සට්ඨීති? න හෙවං වත්තබ්බෙ…පෙ….

309. අරහතො අසුචි සුක්කවිස්සට්ඨි අසිතපීතඛායිතසායිතස්ස නිස්සන්දොති? ආමන්තා. අත්ථි තස්ස ආසයොති? න හෙවං වත්තබ්බෙ…පෙ….

අරහතො ¶ උච්චාරපස්සාවො අසිතපීතඛායිතසායිතස්ස නිස්සන්දො, අත්ථි තස්ස ආසයොති ¶ ? ආමන්තා. අරහතො අසුචි සුක්කවිස්සට්ඨි අසිතපීතඛායිතසායිතස්ස ¶ නිස්සන්දො, අත්ථි තස්ස ආසයොති? න හෙවං වත්තබ්බෙ…පෙ….

අරහතො අසුචි සුක්කවිස්සට්ඨි අසිතපීතඛායිතසායිතස්ස නිස්සන්දො, නත්ථි තස්ස ආසයොති? ආමන්තා. අරහතො උච්චාරපස්සාවො අසිතපීතඛායිතසායිතස්ස නිස්සන්දො, නත්ථි තස්ස ආසයොති? න හෙවං වත්තබ්බෙ…පෙ….

310. අත්ථි අරහතො අසුචි සුක්කවිස්සට්ඨීති? ආමන්තා. අරහා මෙථුනං ධම්මං පටිසෙවෙය්ය, මෙථුනං උප්පාදෙය්ය [මෙථුනං ධම්මං උප්පාදෙය්ය (සී. ස්යා.)], පුත්තසම්බාධසයනං අජ්ඣාවසෙය්ය, කාසිකචන්දනං පච්චනුභවෙය්ය, මාලාගන්ධවිලෙපනං ධාරෙය්ය, ජාතරූපරජතං සාදියෙය්යාති? න ¶ හෙවං වත්තබ්බෙ.

අත්ථි පුථුජ්ජනස්ස අසුචි සුක්කවිස්සට්ඨි, පුථුජ්ජනො මෙථුනං ධම්මං පටිසෙවෙය්ය, මෙථුනං උප්පාදෙය්ය, පුත්තසම්බාධසයනං අජ්ඣාවසෙය්ය, කාසිකචන්දනං පච්චනුභවෙය්ය, මාලාගන්ධවිලෙපනං ධාරෙය්ය, ජාතරූපරජතං සාදියෙය්යාති? ආමන්තා. අත්ථි අරහතො අසුචි සුක්කවිස්සට්ඨි, අරහා මෙථුනං ධම්මං පටිසෙවෙය්ය, මෙථුනං උප්පාදෙය්ය, පුත්තසම්බාධසයනං අජ්ඣාවසෙය්ය, කාසිකචන්දනං පච්චනුභවෙය්ය, මාලාගන්ධවිලෙපනං ධාරෙය්ය, ජාතරූපරජතං සාදියෙය්යාති? න හෙවං වත්තබ්බෙ…පෙ….

අත්ථි අරහතො අසුචි සුක්කවිස්සට්ඨි, න ච අරහා මෙථුනං ධම්මං පටිසෙවෙය්ය, මෙථුනං උප්පාදෙය්ය, පුත්තසම්බාධසයනං අජ්ඣාවසෙය්ය, කාසිකචන්දනං පච්චනුභවෙය්ය, මාලාගන්ධවිලෙපනං ධාරෙය්ය, ජාතරූපරජතං සාදියෙය්යාති? ආමන්තා. අත්ථි පුථුජ්ජනස්ස අසුචි සුක්කවිස්සට්ඨි, න ච පුථුජ්ජනො මෙථුනං ධම්මං පටිසෙවෙය්ය, මෙථුනං උප්පාදෙය්ය ¶ , පුත්තසම්බාධසයනං අජ්ඣාවසෙය්ය, කාසිකචන්දනං පච්චනුභවෙය්ය, මාලාගන්ධවිලෙපනං ධාරෙය්ය, ජාතරූපරජතං සාදියෙය්යාති? න හෙවං වත්තබ්බෙ.

අත්ථි අරහතො අසුචි සුක්කවිස්සට්ඨීති? ආමන්තා. නනු අරහතො රාගො පහීනො උච්ඡින්නමූලො තාලාවත්ථුකතො අනභාවඞ්කතො ආයතිං ¶ අනුප්පාදධම්මොති? ආමන්තා. හඤ්චි අරහතො ¶ රාගො පහීනො උච්ඡින්නමූලො තාලාවත්ථුකතො අනභාවඞ්කතො ආයතිං අනුප්පාදධම්මො, නො ච වත රෙ වත්තබ්බෙ – ‘‘අත්ථි අරහතො අසුචි සුක්කවිස්සට්ඨී’’ති.

අත්ථි අරහතො අසුචි සුක්කවිස්සට්ඨීති? ආමන්තා. නනු අරහතො දොසො පහීනො…පෙ… මොහො පහීනො… මානො පහීනො… දිට්ඨි පහීනා… විචිකිච්ඡා පහීනා… ථිනං පහීනං… උද්ධච්චං පහීනං… අහිරිකං පහීනං…පෙ… අනොත්තප්පං පහීනං උච්ඡින්නමූලං තාලාවත්ථුකතං අනභාවඞ්කතං ආයතිං අනුප්පාදධම්මන්ති? ආමන්තා. හඤ්චි අරහතො අනොත්තප්පං පහීනං උච්ඡින්නමූලං තාලාවත්ථුකතං අනභාවඞ්කතං ආයතිං අනුප්පාදධම්මං, නො ච වත රෙ වත්තබ්බෙ – ‘‘අත්ථි අරහතො අසුචි සුක්කවිස්සට්ඨී’’ති.

311. අත්ථි ¶ අරහතො අසුචි සුක්කවිස්සට්ඨීති? ආමන්තා. නනු අරහතො රාගප්පහානාය මග්ගො භාවිතොති? ආමන්තා. හඤ්චි අරහතො රාගප්පහානාය මග්ගො භාවිතො, නො ච වත රෙ වත්තබ්බෙ – ‘‘අත්ථි අරහතො අසුචි සුක්කවිස්සට්ඨී’’ති.

අත්ථි ¶ අරහතො අසුචි සුක්කවිස්සට්ඨීති? ආමන්තා. නනු අරහතො රාගප්පහානාය සතිපට්ඨානා භාවිතා…පෙ… සම්මප්පධානා භාවිතා… ඉද්ධිපාදා භාවිතා… ඉන්ද්රියා භාවිතා… බලා භාවිතා…පෙ… බොජ්ඣඞ්ගා භාවිතාති? ආමන්තා. හඤ්චි අරහතො රාගප්පහානාය බොජ්ඣඞ්ගා භාවිතා, නො ච වත රෙ වත්තබ්බෙ – ‘‘අත්ථි අරහතො අසුචි සුක්කවිස්සට්ඨී’’ති.

අත්ථි අරහතො අසුචි සුක්කවිස්සට්ඨීති? ආමන්තා. නනු අරහතො දොසප්පහානාය…පෙ… මොහප්පහානාය…පෙ… අනොත්තප්පපහානාය මග්ගො භාවිතො…පෙ… බොජ්ඣඞ්ගා භාවිතාති? ආමන්තා. හඤ්චි අරහතො අනොත්තප්පපහානාය බොජ්ඣඞ්ගා භාවිතා, නො ච වත රෙ වත්තබ්බෙ – ‘‘අත්ථි අරහතො අසුචි සුක්කවිස්සට්ඨී’’ති.

අත්ථි අරහතො අසුචි සුක්කවිස්සට්ඨීති? ආමන්තා. නනු අරහා වීතරාගො වීතදොසො වීතමොහො කතකරණීයො ඔහිතභාරො අනුප්පත්තසදත්ථො පරික්ඛීණභවසංයොජනො සම්මදඤ්ඤාවිමුත්තො උක්ඛිත්තපලිඝො සඞ්කිණ්ණපරිඛො අබ්බූළ්හෙසිකො නිරග්ගළො අරියො පන්නද්ධජො ¶ ¶ පන්නභාරො විසඤ්ඤුත්තො සුවිජිතවිජයො, දුක්ඛං තස්ස පරිඤ්ඤාතං, සමුදයො පහීනො, නිරොධො සච්ඡිකතො, මග්ගො භාවිතො, අභිඤ්ඤෙය්යං අභිඤ්ඤාතං, පරිඤ්ඤෙය්යං පරිඤ්ඤාතං, පහාතබ්බං ¶ පහීනං, භාවෙතබ්බං භාවිතං, සච්ඡිකාතබ්බං සච්ඡිකතන්ති? ආමන්තා. හඤ්චි අරහා වීතරාගො වීතදොසො වීතමොහො කතකරණීයො…පෙ… සච්ඡිකාතබ්බං සච්ඡිකතං ¶ , නො ච වත රෙ වත්තබ්බෙ – ‘‘අත්ථි අරහතො අසුචි සුක්කවිස්සට්ඨී’’ති.

312. අත්ථි අරහතො අසුචි සුක්කවිස්සට්ඨීති? සධම්මකුසලස්ස අරහතො අත්ථි අසුචි සුක්කවිස්සට්ඨි, පරධම්මකුසලස්ස අරහතො නත්ථි අසුචි සුක්කවිස්සට්ඨීති. සධම්මකුසලස්ස අරහතො අත්ථි අසුචි සුක්කවිස්සට්ඨීති? ආමන්තා. පරධම්මකුසලස්ස අරහතො අත්ථි අසුචි සුක්කවිස්සට්ඨීති? න හෙවං වත්තබ්බෙ…පෙ….

පරධම්මකුසලස්ස අරහතො නත්ථි අසුචි සුක්කවිස්සට්ඨීති? ආමන්තා. සධම්මකුසලස්ස අරහතො නත්ථි අසුචි සුක්කවිස්සට්ඨීති? න හෙවං වත්තබ්බෙ…පෙ….

සධම්මකුසලස්ස අරහතො රාගො පහීනො, අත්ථි තස්ස අසුචි සුක්කවිස්සට්ඨීති? ආමන්තා. පරධම්මකුසලස්ස අරහතො රාගො පහීනො, අත්ථි තස්ස අසුචි සුක්කවිස්සට්ඨීති? න හෙවං වත්තබ්බෙ…පෙ….

සධම්මකුසලස්ස අරහතො දොසො පහීනො…පෙ… මොහො පහීනො…පෙ… අනොත්තප්පං පහීනං, අත්ථි තස්ස අසුචි සුක්කවිස්සට්ඨීති? ආමන්තා. පරධම්මකුසලස්ස අරහතො අනොත්තප්පං පහීනං, අත්ථි තස්ස අසුචි සුක්කවිස්සට්ඨීති? න හෙවං වත්තබ්බෙ…පෙ….

සධම්මකුසලස්ස අරහතො රාගප්පහානාය මග්ගො භාවිතො…පෙ… බොජ්ඣඞ්ගා භාවිතා…පෙ… දොසප්පහානාය…පෙ… මොහප්පහානාය…පෙ… අනොත්තප්පපහානාය මග්ගො භාවිතො…පෙ… බොජ්ඣඞ්ගා භාවිතා, අත්ථි තස්ස අසුචි සුක්කවිස්සට්ඨීති? ආමන්තා ¶ . පරධම්මකුසලස්ස ¶ අරහතො අනොත්තප්පපහානාය බොජ්ඣඞ්ගා භාවිතා, අත්ථි තස්ස අසුචි සුක්කවිස්සට්ඨීති? න හෙවං වත්තබ්බෙ…පෙ….

සධම්මකුසලො ¶ අරහා වීතරාගො වීතදොසො වීතමොහො…පෙ… සච්ඡිකාතබ්බං සච්ඡිකතං, අත්ථි තස්ස අසුචි සුක්කවිස්සට්ඨීති? ආමන්තා. පරධම්මකුසලො ¶ අරහා වීතරාගො වීතදොසො වීතමොහො…පෙ… සච්ඡිකාතබ්බං සච්ඡිකතං, අත්ථි තස්ස අසුචි සුක්කවිස්සට්ඨීති? න හෙවං වත්තබ්බෙ…පෙ….

පරධම්මකුසලස්ස අරහතො රාගො පහීනො, නත්ථි තස්ස අසුචි සුක්කවිස්සට්ඨීති? ආමන්තා. සධම්මකුසලස්ස අරහතො රාගො පහීනො, නත්ථි තස්ස අසුචි සුක්කවිස්සට්ඨීති? න හෙවං වත්තබ්බෙ…පෙ….

පරධම්මකුසලස්ස අරහතො දොසො පහීනො…පෙ… මොහො පහීනො…පෙ… අනොත්තප්පං පහීනං, නත්ථි තස්ස අසුචි සුක්කවිස්සට්ඨීති? ආමන්තා. සධම්මකුසලස්ස අරහතො අනොත්තප්පං පහීනං, නත්ථි තස්ස අසුචි සුක්කවිස්සට්ඨීති? න හෙවං වත්තබ්බෙ…පෙ….

පරධම්මකුසලස්ස අරහතො රාගප්පහානාය මග්ගො භාවිතො…පෙ… බොජ්ඣඞ්ගා භාවිතා…පෙ… දොසප්පහානාය…පෙ… මොහප්පහානාය…පෙ… අනොත්තප්පපහානාය මග්ගො භාවිතො…පෙ… බොජ්ඣඞ්ගා භාවිතා, නත්ථි තස්ස අසුචි සුක්කවිස්සට්ඨීති? ආමන්තා. සධම්මකුසලස්ස අරහතො අනොත්තප්පපහානාය බොජ්ඣඞ්ගා භාවිතා, නත්ථි තස්ස අසුචි සුක්කවිස්සට්ඨීති? න හෙවං වත්තබ්බෙ…පෙ….

පරධම්මකුසලො අරහා වීතරාගො වීතදොසො වීතමොහො…පෙ… සච්ඡිකාතබ්බං ¶ සච්ඡිකතං, නත්ථි තස්ස අසුචි සුක්කවිස්සට්ඨීති? ආමන්තා. සධම්මකුසලො ¶ අරහා වීතරාගො වීතදොසො වීතමොහො…පෙ… සච්ඡිකාතබ්බං සච්ඡිකතං, නත්ථි තස්ස අසුචි සුක්කවිස්සට්ඨීති? න හෙවං වත්තබ්බෙ…පෙ….

313. අත්ථි අරහතො අසුචි සුක්කවිස්සට්ඨීති? ආමන්තා. නනු වුත්තං භගවතා – ‘‘යෙ තෙ [යෙ කෙචි (සී.)], භික්ඛවෙ, භික්ඛූ පුථුජ්ජනා සීලසම්පන්නා සතා සම්පජානා නිද්දං ඔක්කමන්ති, තෙසං අසුචි න මුච්චති. යෙපි තෙ, භික්ඛවෙ, බාහිරකා ඉසයො කාමෙසු වීතරාගා, තෙසම්පි අසුචි න මුච්චති. අට්ඨානමෙතං, භික්ඛවෙ, අනවකාසො යං අරහතො අසුචි මුච්චෙය්යා’’ති [මහාව. 353 අත්ථතො සමානං; අ. නි. 5.210 පස්සිතබ්බං]. අත්ථෙව ¶ සුත්තන්තොති? ආමන්තා. තෙන හි න වත්තබ්බං – ‘‘අත්ථි අරහතො අසුචි සුක්කවිස්සට්ඨී’’ති.

න ¶ වත්තබ්බං – ‘‘අත්ථි අරහතො පරූපහාරො’’ති? ආමන්තා. නනු අරහතො චීවරපිණ්ඩපාතසෙනාසනගිලානපච්චයභෙසජ්ජපරික්ඛාරං පරෙ උපසංහරෙය්යුන්ති? ආමන්තා. හඤ්චි අරහතො චීවරපිණ්ඩපාතසෙනාසනගිලානපච්චයභෙසජ්ජපරික්ඛාරං පරෙ උපසංහරෙය්යුං, තෙන වත රෙ වත්තබ්බෙ – ‘‘අත්ථි අරහතො පරූපහාරො’’ති.

අරහතො චීවරපිණ්ඩපාතසෙනාසනගිලානපච්චයභෙසජ්ජපරික්ඛාරං පරෙ උපසංහරෙය්යුන්ති, අත්ථි අරහතො පරූපහාරොති? ආමන්තා. අරහතො සොතාපත්තිඵලං වා සකදාගාමිඵලං වා අනාගාමිඵලං වා අරහත්තං වා පරෙ උපසංහරෙය්යුන්ති? න හෙවං වත්තබ්බෙ…පෙ….

314. අත්ථි ¶ ¶ අරහතො අඤ්ඤාණන්ති? ආමන්තා. අත්ථි අරහතො අවිජ්ජා අවිජ්ජොඝො අවිජ්ජායොගො අවිජ්ජානුසයො අවිජ්ජාපරියුට්ඨානං අවිජ්ජාසංයොජනං අවිජ්ජානීවරණන්ති? න හෙවං වත්තබ්බෙ. නත්ථි අරහතො අවිජ්ජා අවිජ්ජොඝො අවිජ්ජායොගො අවිජ්ජානුසයො අවිජ්ජාපරියුට්ඨානං අවිජ්ජාසංයොජනං අවිජ්ජානීවරණන්ති? ආමන්තා. හඤ්චි නත්ථි අරහතො අවිජ්ජා අවිජ්ජොඝො අවිජ්ජායොගො අවිජ්ජානුසයො අවිජ්ජාපරියුට්ඨානං අවිජ්ජාසංයොජනං අවිජ්ජානීවරණං, නො ච වත රෙ වත්තබ්බෙ – ‘‘අත්ථි අරහතො අඤ්ඤාණ’’න්ති.

අත්ථි ¶ පුථුජ්ජනස්ස අඤ්ඤාණං, අත්ථි තස්ස අවිජ්ජා අවිජ්ජොඝො අවිජ්ජායොගො අවිජ්ජානුසයො අවිජ්ජාපරියුට්ඨානං අවිජ්ජාසංයොජනං අවිජ්ජානීවරණන්ති? ආමන්තා. අත්ථි අරහතො අඤ්ඤාණං, අත්ථි තස්ස අවිජ්ජා අවිජ්ජොඝො අවිජ්ජායොගො අවිජ්ජානුසයො අවිජ්ජාපරියුට්ඨානං අවිජ්ජාසංයොජනං අවිජ්ජානීවරණන්ති? න හෙවං වත්තබ්බෙ.

අත්ථි අරහතො අඤ්ඤාණං, නත්ථි තස්ස අවිජ්ජා අවිජ්ජොඝො අවිජ්ජායොගො අවිජ්ජානුසයො අවිජ්ජාපරියුට්ඨානං අවිජ්ජාසංයොජනං අවිජ්ජානීවරණන්ති ¶ ? ආමන්තා. අත්ථි පුථුජ්ජනස්ස අඤ්ඤාණං ¶ , නත්ථි තස්ස අවිජ්ජා අවිජ්ජොඝො අවිජ්ජායොගො අවිජ්ජානුසයො අවිජ්ජාපරියුට්ඨානං අවිජ්ජාසංයොජනං අවිජ්ජානීවරණන්ති? න හෙවං වත්තබ්බෙ.

අත්ථි අරහතො අඤ්ඤාණන්ති? ආමන්තා. අරහා අඤ්ඤාණපකතො පාණං හනෙය්ය, අදින්නං ආදියෙය්ය, මුසා භණෙය්ය, පිසුණං භණෙය්ය, ඵරුසං භණෙය්ය, සම්ඵං පලපෙය්ය, සන්ධිං ඡින්දෙය්ය, නිල්ලොපං හරෙය්ය, එකාගාරියං කරෙය්ය, පරිපන්ථෙ තිට්ඨෙය්ය, පරදාරං ගච්ඡෙය්ය, ගාමඝාතං කරෙය්ය, නිගමඝාතං කරෙය්යාති? න හෙවං වත්තබ්බෙ.

අත්ථි පුථුජ්ජනස්ස අඤ්ඤාණං, පුථුජ්ජනො අඤ්ඤාණපකතො පාණං ¶ හනෙය්ය, අදින්නං ආදියෙය්ය, මුසා භණෙය්ය…පෙ… ගාමඝාතං කරෙය්ය, නිගමඝාතං කරෙය්යාති? ආමන්තා. අත්ථි අරහතො අඤ්ඤාණං, අරහා අඤ්ඤාණපකතො පාණං හනෙය්ය, අදින්නං ආදියෙය්ය…පෙ… ගාමඝාතං කරෙය්ය, නිගමඝාතං කරෙය්යාති? න හෙවං වත්තබ්බෙ.

අත්ථි අරහතො අඤ්ඤාණං, න ච අරහා අඤ්ඤාණපකතො පාණං හනෙය්ය, අදින්නං ආදියෙය්ය…පෙ… ගාමඝාතං කරෙය්ය, නිගමඝාතං කරෙය්යාති? ආමන්තා. අත්ථි පුථුජ්ජනස්ස අඤ්ඤාණං, න ච පුථුජ්ජනො අඤ්ඤාණපකතො පාණං හනෙය්ය, අදින්නං ආදියෙය්ය…පෙ… ගාමඝාතං කරෙය්ය, නිගමඝාතං කරෙය්යාති? න හෙවං වත්තබ්බෙ.

අත්ථි ¶ අරහතො අඤ්ඤාණන්ති? ආමන්තා. අත්ථි අරහතො සත්ථරි අඤ්ඤාණං, ධම්මෙ අඤ්ඤාණං, සඞ්ඝෙ අඤ්ඤාණං, සික්ඛාය අඤ්ඤාණං, පුබ්බන්තෙ අඤ්ඤාණං, අපරන්තෙ අඤ්ඤාණං, පුබ්බන්තාපරන්තෙ අඤ්ඤාණං, ඉදප්පච්චයතාපටිච්චසමුප්පන්නෙසු ධම්මෙසු අඤ්ඤාණන්ති? න හෙවං වත්තබ්බෙ.

නත්ථි ¶ අරහතො සත්ථරි අඤ්ඤාණං, ධම්මෙ අඤ්ඤාණං, සඞ්ඝෙ අඤ්ඤාණං, සික්ඛාය අඤ්ඤාණං, පුබ්බන්තෙ අඤ්ඤාණං, අපරන්තෙ අඤ්ඤාණං, පුබ්බන්තාපරන්තෙ අඤ්ඤාණං, ඉදප්පච්චයතාපටිච්චසමුප්පන්නෙසු ධම්මෙසු අඤ්ඤාණන්ති? ආමන්තා. හඤ්චි නත්ථි අරහතො සත්ථරි අඤ්ඤාණං, ධම්මෙ අඤ්ඤාණං, සඞ්ඝෙ අඤ්ඤාණං…පෙ… ඉදප්පච්චයතාපටිච්චසමුප්පන්නෙසු ධම්මෙසු අඤ්ඤාණං, නො ච වත රෙ වත්තබ්බෙ – ‘‘අත්ථි අරහතො අඤ්ඤාණ’’න්ති.

අත්ථි පුථුජ්ජනස්ස අඤ්ඤාණං, අත්ථි තස්ස සත්ථරි අඤ්ඤාණං, ධම්මෙ අඤ්ඤාණං, සඞ්ඝෙ අඤ්ඤාණං…පෙ… ඉදප්පච්චයතාපටිච්චසමුප්පන්නෙසු ධම්මෙසු අඤ්ඤාණන්ති ¶ ? ආමන්තා. අත්ථි අරහතො අඤ්ඤාණං, අත්ථි තස්ස සත්ථරි අඤ්ඤාණං, ධම්මෙ අඤ්ඤාණං, සඞ්ඝෙ අඤ්ඤාණං…පෙ… ඉදප්පච්චයතාපටිච්චසමුප්පන්නෙසු ධම්මෙසු අඤ්ඤාණන්ති? න ¶ හෙවං වත්තබ්බෙ.

අත්ථි අරහතො අඤ්ඤාණං, නත්ථි තස්ස සත්ථරි අඤ්ඤාණං, ධම්මෙ අඤ්ඤාණං, සඞ්ඝෙ අඤ්ඤාණං…පෙ… ඉදප්පච්චයතාපටිච්චසමුප්පන්නෙසු ¶ ධම්මෙසු අඤ්ඤාණන්ති? ආමන්තා. අත්ථි පුථුජ්ජනස්ස අඤ්ඤාණං, නත්ථි තස්ස සත්ථරි අඤ්ඤාණං, ධම්මෙ අඤ්ඤාණං, සඞ්ඝෙ අඤ්ඤාණං…පෙ… ඉදප්පච්චයතාපටිච්චසමුප්පන්නෙසු ධම්මෙසු අඤ්ඤාණන්ති? න හෙවං වත්තබ්බෙ.

315. අත්ථි අරහතො අඤ්ඤාණන්ති? ආමන්තා. නනු අරහතො රාගො පහීනො උච්ඡින්නමූලො තාලාවත්ථුකතො අනභාවඞ්කතො ආයතිං අනුප්පාදධම්මොති? ආමන්තා. හඤ්චි අරහතො රාගො පහීනො උච්ඡින්නමූලො තාලාවත්ථුකතො අනභාවඞ්කතො ආයතිං අනුප්පාදධම්මො, නො ච වත රෙ වත්තබ්බෙ – ‘‘අත්ථි අරහතො අඤ්ඤාණ’’න්ති.

අත්ථි අරහතො අඤ්ඤාණන්ති? ආමන්තා. නනු අරහතො දොසො පහීනො…පෙ… මොහො පහීනො…පෙ… අනොත්තප්පං පහීනං උච්ඡින්නමූලං තාලාවත්ථුකතං අනභාවඞ්කතං ආයතිං අනුප්පාදධම්මන්ති? ආමන්තා. හඤ්චි අරහතො අනොත්තප්පං පහීනං උච්ඡින්නමූලං තාලාවත්ථුකතං අනභාවඞ්කතං ආයතිං අනුප්පාදධම්මං, නො ච වත රෙ වත්තබ්බෙ – ‘‘අත්ථි අරහතො අඤ්ඤාණ’’න්ති.

අත්ථි අරහතො අඤ්ඤාණන්ති? ආමන්තා. නනු අරහතො රාගප්පහානාය මග්ගො භාවිතො…පෙ… බොජ්ඣඞ්ගා භාවිතාති? ආමන්තා. හඤ්චි අරහතො රාගප්පහානාය බොජ්ඣඞ්ගා භාවිතා, නො ච වත රෙ වත්තබ්බෙ – ‘‘අත්ථි අරහතො අඤ්ඤාණ’’න්ති.

අත්ථි අරහතො අඤ්ඤාණන්ති? ආමන්තා. නනු අරහතො දොසප්පහානාය…පෙ… මොහප්පහානාය…පෙ… අනොත්තප්පපහානාය මග්ගො භාවිතො ¶ …පෙ… බොජ්ඣඞ්ගා ¶ භාවිතාති? ආමන්තා ¶ . හඤ්චි අරහතො අනොත්තප්පපහානාය බොජ්ඣඞ්ගා භාවිතා, නො ච වත රෙ වත්තබ්බෙ – ‘‘අත්ථි අරහතො අඤ්ඤාණ’’න්ති.

අත්ථි ¶ අරහතො අඤ්ඤාණන්ති? ආමන්තා. නනු අරහා වීතරාගො වීතදොසො වීතමොහො…පෙ… සච්ඡිකාතබ්බං සච්ඡිකතන්ති? ආමන්තා. හඤ්චි අරහා වීතරාගො…පෙ… සච්ඡිකාතබ්බං සච්ඡිකතං, නො ච වත රෙ වත්තබ්බෙ – ‘‘අත්ථි අරහතො අඤ්ඤාණ’’න්ති.

316. අත්ථි අරහතො අඤ්ඤාණන්ති? සධම්මකුසලස්ස අරහතො අත්ථි අඤ්ඤාණං, පරධම්මකුසලස්ස අරහතො නත්ථි අඤ්ඤාණන්ති. සධම්මකුසලස්ස අරහතො අත්ථි අඤ්ඤාණන්ති? ආමන්තා. පරධම්මකුසලස්ස අරහතො අත්ථි අඤ්ඤාණන්ති? න හෙවං වත්තබ්බෙ…පෙ….

පරධම්මකුසලස්ස අරහතො නත්ථි අඤ්ඤාණන්ති? ආමන්තා. සධම්මකුසලස්ස අරහතො නත්ථි අඤ්ඤාණන්ති? න හෙවං වත්තබ්බෙ…පෙ….

සධම්මකුසලස්ස අරහතො රාගො පහීනො, අත්ථි තස්ස අඤ්ඤාණන්ති? ආමන්තා. පරධම්මකුසලස්ස අරහතො රාගො පහීනො, අත්ථි තස්ස අඤ්ඤාණන්ති? න හෙවං වත්තබ්බෙ…පෙ….

සධම්මකුසලස්ස අරහතො දොසො පහීනො…පෙ… මොහො පහීනො…පෙ… අනොත්තප්පං පහීනං, අත්ථි තස්ස අඤ්ඤාණන්ති? ආමන්තා. පරධම්මකුසලස්ස අරහතො අනොත්තප්පං පහීනං, අත්ථි තස්ස අඤ්ඤාණන්ති? න හෙවං වත්තබ්බෙ…පෙ….

සධම්මකුසලස්ස ¶ අරහතො රාගප්පහානාය මග්ගො භාවිතො…පෙ… බොජ්ඣඞ්ගා භාවිතා, අත්ථි ¶ තස්ස අඤ්ඤාණන්ති? ආමන්තා. පරධම්මකුසලස්ස අරහතො රාගප්පහානාය බොජ්ඣඞ්ගා භාවිතා, අත්ථි තස්ස අඤ්ඤාණන්ති? න ¶ හෙවං වත්තබ්බෙ…පෙ….

සධම්මකුසලස්ස අරහතො දොසප්පහානාය…පෙ… මොහප්පහානාය…පෙ… අනොත්තප්පපහානාය මග්ගො භාවිතො…පෙ… බොජ්ඣඞ්ගා භාවිතා, අත්ථි තස්ස අඤ්ඤාණන්ති? ආමන්තා. පරධම්මකුසලස්ස අරහතො අනොත්තප්පපහානාය බොජ්ඣඞ්ගා භාවිතා, අත්ථි තස්ස අඤ්ඤාණන්ති? න හෙවං වත්තබ්බෙ…පෙ….

සධම්මකුසලො අරහා වීතරාගො වීතදොසො වීතමොහො…පෙ… සච්ඡිකාතබ්බං සච්ඡිකතං, අත්ථි තස්ස අඤ්ඤාණන්ති? ආමන්තා. පරධම්මකුසලො අරහා වීතරාගො වීතදොසො වීතමොහො…පෙ… සච්ඡිකාතබ්බං සච්ඡිකතං, අත්ථි තස්ස අඤ්ඤාණන්ති? න හෙවං වත්තබ්බෙ…පෙ….

පරධම්මකුසලස්ස ¶ අරහතො රාගො පහීනො, නත්ථි තස්ස අඤ්ඤාණන්ති? ආමන්තා. සධම්මකුසලස්ස අරහතො රාගො පහීනො, නත්ථි තස්ස අඤ්ඤාණන්ති? න හෙවං වත්තබ්බෙ…පෙ….

පරධම්මකුසලස්ස අරහතො දොසො පහීනො…පෙ… මොහො පහීනො…පෙ… අනොත්තප්පං පහීනං, නත්ථි තස්ස අඤ්ඤාණන්ති? ආමන්තා. සධම්මකුසලස්ස අරහතො අනොත්තප්පං පහීනං, නත්ථි තස්ස අඤ්ඤාණන්ති? න හෙවං වත්තබ්බෙ…පෙ….

පරධම්මකුසලස්ස අරහතො රාගප්පහානාය මග්ගො භාවිතො…පෙ… බොජ්ඣඞ්ගා ¶ භාවිතා…පෙ… දොසප්පහානාය මොහප්පහානාය…පෙ… අනොත්තප්පපහානාය මග්ගො භාවිතො…පෙ… බොජ්ඣඞ්ගා භාවිතා, නත්ථි තස්ස අඤ්ඤාණන්ති? ආමන්තා. සධම්මකුසලස්ස අරහතො අනොත්තප්පපහානාය බොජ්ඣඞ්ගා භාවිතා, නත්ථි තස්ස අඤ්ඤාණන්ති? න හෙවං වත්තබ්බෙ…පෙ….

පරධම්මකුසලො අරහා වීතරාගො වීතදොසො වීතමොහො…පෙ… සච්ඡිකාතබ්බං සච්ඡිකතං, නත්ථි තස්ස අඤ්ඤාණන්ති? ආමන්තා ¶ . සධම්මකුසලො අරහා වීතරාගො වීතදොසො වීතමොහො ¶ …පෙ… සච්ඡිකාතබ්බං සච්ඡිකතං, නත්ථි තස්ස අඤ්ඤාණන්ති? න හෙවං වත්තබ්බෙ…පෙ….

317. අත්ථි අරහතො අඤ්ඤාණන්ති? ආමන්තා. නනු වුත්තං භගවතා – ‘‘ජානතොහං [ජානතාහං (සී.), ජානත්වාහං (ස්යා. පී. ක.)], භික්ඛවෙ, පස්සතො ආසවානං ඛයං වදාමි, නො අජානතො නො අපස්සතො. කිඤ්ච, භික්ඛවෙ, ජානතො කිං පස්සතො ආසවානං ඛයො හොති? ‘ඉති රූපං, ඉති රූපස්ස සමුදයො, ඉති රූපස්ස අත්ථඞ්ගමො, ඉති වෙදනා…පෙ… ඉති සඤ්ඤා… ඉති සඞ්ඛාරා… ඉති විඤ්ඤාණං, ඉති විඤ්ඤාණස්ස සමුදයො, ඉති විඤ්ඤාණස්ස අත්ථඞ්ගමො’ති – එවං ඛො, භික්ඛවෙ, ජානතො එවං පස්සතො ආසවානං ඛයො හොතී’’ති [සං. නි. 3.101; ඉතිවු. 102; සං. නි. 5.1095]. අත්ථෙව සුත්තන්තොති? ආමන්තා. තෙන හි න වත්තබ්බං – ‘‘අත්ථි අරහතො අඤ්ඤාණ’’න්ති.

අත්ථි අරහතො අඤ්ඤාණන්ති? ආමන්තා. නනු වුත්තං භගවතා – ‘‘ජානතොහං, භික්ඛවෙ, පස්සතො ආසවානං ඛයං වදාමි, නො අජානතො ¶ නො අපස්සතො. කිඤ්ච, භික්ඛවෙ, ජානතො කිං පස්සතො ආසවානං ඛයො ¶ හොති? ‘ඉදං දුක්ඛ’න්ති – භික්ඛවෙ, ජානතො පස්සතො ආසවානං ඛයො හොති, ‘අයං දුක්ඛසමුදයො’ති – ජානතො පස්සතො ආසවානං ඛයො හොති, ‘අයං දුක්ඛනිරොධො’ති – ජානතො පස්සතො ආසවානං ඛයො හොති, ‘අයං දුක්ඛනිරොධගාමිනී පටිපදා’ති – ජානතො පස්සතො ආසවානං ඛයො හොති. එවං ඛො, භික්ඛවෙ, ජානතො එවං පස්සතො ආසවානං ඛයො හොතී’’ති [සං. නි. 5.1095]. අත්ථෙව සුත්තන්තොති? ආමන්තා. තෙන හි න වත්තබ්බං – ‘‘අත්ථි අරහතො අඤ්ඤාණ’’න්ති.

අත්ථි අරහතො අඤ්ඤාණන්ති? ආමන්තා. නනු වුත්තං භගවතා – ‘‘සබ්බං, භික්ඛවෙ, අනභිජානං අපරිජානං අවිරාජයං අප්පජහං අභබ්බො දුක්ඛක්ඛයාය, සබ්බඤ්ච ඛො, භික්ඛවෙ, අභිජානං පරිජානං ¶ විරාජයං පජහං භබ්බො දුක්ඛක්ඛයායා’’ති [සං. නි. 4.26; ඉතිවු. 7 ඉතිවුත්තකෙපි]! අත්ථෙව සුත්තන්තොති? ආමන්තා. තෙන හි න වත්තබ්බං – ‘‘අත්ථි අරහතො අඤ්ඤාණ’’න්ති.

අත්ථි අරහතො අඤ්ඤාණන්ති? ආමන්තා. නනු වුත්තං භගවතා –

සක්කායදිට්ඨී විචිකිච්ඡිතඤ්ච,

ඡච්චාභිඨානානි අභබ්බ කාතු’’න්ති.

අත්ථෙව ¶ සුත්තන්තොති? ආමන්තා. තෙන හි න වත්තබ්බං – ‘‘අත්ථි අරහතො අඤ්ඤාණ’’න්ති.

අත්ථි අරහතො අඤ්ඤාණන්ති? ආමන්තා. නනු වුත්තං භගවතා – ‘‘යස්මිං, භික්ඛවෙ, සමයෙ අරියසාවකස්ස විරජං වීතමලං ධම්මචක්ඛුං උදපාදි – ‘යං කිඤ්චි සමුදයධම්මං සබ්බං තං නිරොධධම්ම’න්ති, සහ දස්සනුප්පාදා, භික්ඛවෙ, අරියසාවකස්ස තීණි සංයොජනානි පහීයන්ති – සක්කායදිට්ඨි, විචිකිච්ඡා, සීලබ්බතපරාමාසො’’ති. අත්ථෙව සුත්තන්තොති? ආමන්තා. තෙන හි න වත්තබ්බං – ‘‘අත්ථි අරහතො අඤ්ඤාණ’’න්ති.

න ¶ වත්තබ්බං – ‘‘අත්ථි අරහතො අඤ්ඤාණ’’න්ති? ආමන්තා. නනු අරහා ඉත්ථිපුරිසානං නාමගොත්තං න ජානෙය්ය, මග්ගාමග්ගං න ජානෙය්ය, තිණකට්ඨවනප්පතීනං නාමං න ජානෙය්යාති? ආමන්තා. හඤ්චි අරහා ඉත්ථිපුරිසානං නාමගොත්තං න ජානෙය්ය, මග්ගාමග්ගං ¶ න ජානෙය්ය, තිණකට්ඨවනප්පතීනං නාමං න ජානෙය්ය, තෙන වත රෙ වත්තබ්බෙ – ‘‘අත්ථි අරහතො අඤ්ඤාණ’’න්ති.

අරහා ඉත්ථිපුරිසානං නාමගොත්තං න ජානෙය්ය, මග්ගාමග්ගං න ජානෙය්ය, තිණකට්ඨවනප්පතීනං නාමං න ජානෙය්යාති, අත්ථි අරහතො අඤ්ඤාණන්ති? ආමන්තා. අරහා සොතාපත්තිඵලං වා සකදාගාමිඵලං වා අනාගාමිඵලං වා අරහත්තං වා න ජානෙය්යාති? න හෙවං වත්තබ්බෙ…පෙ….

318. අත්ථි ¶ ¶ අරහතො කඞ්ඛාති? ආමන්තා. අත්ථි අරහතො විචිකිච්ඡා විචිකිච්ඡාපරියුට්ඨානං විචිකිච්ඡාසංයොජනං විචිකිච්ඡානීවරණන්ති? න හෙවං වත්තබ්බෙ…පෙ….

නත්ථි අරහතො විචිකිච්ඡා විචිකිච්ඡාපරියුට්ඨානං විචිකිච්ඡාසංයොජනං විචිකිච්ඡානීවරණන්ති? ආමන්තා. හඤ්චි නත්ථි අරහතො විචිකිච්ඡා විචිකිච්ඡාපරියුට්ඨානං විචිකිච්ඡාසංයොජනං විචිකිච්ඡානීවරණං, නො ච වත රෙ වත්තබ්බෙ – ‘‘අත්ථි අරහතො කඞ්ඛා’’ති.

අත්ථි පුථුජ්ජනස්ස කඞ්ඛා, අත්ථි තස්ස විචිකිච්ඡා විචිකිච්ඡාපරියුට්ඨානං විචිකිච්ඡාසංයොජනං විචිකිච්ඡානීවරණන්ති? ආමන්තා. අත්ථි අරහතො කඞ්ඛා, අත්ථි තස්ස විචිකිච්ඡා විචිකිච්ඡාපරියුට්ඨානං විචිකිච්ඡාසංයොජනං විචිකිච්ඡානීවරණන්ති? න හෙවං වත්තබ්බෙ…පෙ….

අත්ථි අරහතො කඞ්ඛා, නත්ථි තස්ස විචිකිච්ඡා විචිකිච්ඡාපරියුට්ඨානං විචිකිච්ඡාසංයොජනං විචිකිච්ඡානීවරණන්ති? ආමන්තා ¶ . අත්ථි පුථුජ්ජනස්ස කඞ්ඛා, නත්ථි ¶ තස්ස විචිකිච්ඡා විචිකිච්ඡාපරියුට්ඨානං විචිකිච්ඡාසංයොජනං විචිකිච්ඡානීවරණන්ති? න හෙවං වත්තබ්බෙ…පෙ….

අත්ථි අරහතො කඞ්ඛාති? ආමන්තා. අත්ථි අරහතො සත්ථරි කඞ්ඛා, ධම්මෙ කඞ්ඛා, සඞ්ඝෙ කඞ්ඛා, සික්ඛාය කඞ්ඛා, පුබ්බන්තෙ කඞ්ඛා, අපරන්තෙ කඞ්ඛා, පුබ්බන්තාපරන්තෙ කඞ්ඛා, ඉදප්පච්චයතාපටිච්චසමුප්පන්නෙසු ධම්මෙසු කඞ්ඛාති? න හෙවං වත්තබ්බෙ.

නත්ථි ¶ අරහතො සත්ථරි කඞ්ඛා, ධම්මෙ කඞ්ඛා…පෙ… ඉදප්පච්චයතාපටිච්චසමුප්පන්නෙසු ධම්මෙසු කඞ්ඛාති ¶ ? ආමන්තා. හඤ්චි නත්ථි අරහතො සත්ථරි කඞ්ඛා, ධම්මෙ කඞ්ඛා…පෙ… ඉදප්පච්චයතාපටිච්චසමුප්පන්නෙසු ධම්මෙසු කඞ්ඛා, නො ච වත රෙ වත්තබ්බෙ – ‘‘අත්ථි අරහතො කඞ්ඛා’’ති.

අත්ථි පුථුජ්ජනස්ස කඞ්ඛා, අත්ථි තස්ස සත්ථරි කඞ්ඛා, ධම්මෙ කඞ්ඛා…පෙ… ඉදප්පච්චයතාපටිච්චසමුප්පන්නෙසු ධම්මෙසු කඞ්ඛාති? ආමන්තා. අත්ථි අරහතො කඞ්ඛා, අත්ථි තස්ස සත්ථරි කඞ්ඛා, ධම්මෙ කඞ්ඛා…පෙ… ඉදප්පච්චයතාපටිච්චසමුප්පන්නෙසු ධම්මෙසු කඞ්ඛාති? න හෙවං වත්තබ්බෙ.

අත්ථි අරහතො කඞ්ඛා, නත්ථි තස්ස සත්ථරි කඞ්ඛා, ධම්මෙ කඞ්ඛා…පෙ… ඉදප්පච්චයතාපටිච්චසමුප්පන්නෙසු ධම්මෙසු කඞ්ඛාති? ආමන්තා. අත්ථි පුථුජ්ජනස්ස කඞ්ඛා, නත්ථි තස්ස සත්ථරි කඞ්ඛා, ධම්මෙ කඞ්ඛා…පෙ… ඉදප්පච්චයතාපටිච්චසමුප්පන්නෙසු ධම්මෙසු කඞ්ඛාති? න හෙවං වත්තබ්බෙ.

319. අත්ථි අරහතො කඞ්ඛාති? ආමන්තා ¶ . නනු අරහතො රාගො පහීනො උච්ඡින්නමූලො තාලාවත්ථුකතො අනභාවඞ්කතො ආයතිං අනුප්පාදධම්මොති? ආමන්තා. හඤ්චි අරහතො රාගො පහීනො උච්ඡින්නමූලො තාලාවත්ථුකතො අනභාවඞ්කතො ආයතිං අනුප්පාදධම්මො, නො ච වත රෙ වත්තබ්බෙ – ‘‘අත්ථි අරහතො කඞ්ඛා’’ති.

අත්ථි ¶ අරහතො කඞ්ඛාති? ආමන්තා. නනු අරහතො දොසො පහීනො…පෙ… මොහො පහීනො…පෙ… අනොත්තප්පං පහීනං…පෙ… රාගප්පහානාය මග්ගො භාවිතො…පෙ… බොජ්ඣඞ්ගා භාවිතා…පෙ… දොසප්පහානාය…පෙ… අනොත්තප්පපහානාය මග්ගො භාවිතො…පෙ… බොජ්ඣඞ්ගා භාවිතා; නනු අරහා වීතරාගො වීතදොසො වීතමොහො…පෙ… සච්ඡිකාතබ්බං සච්ඡිකතන්ති? ආමන්තා. හඤ්චි අරහා වීතරාගො වීතදොසො වීතමොහො…පෙ… සච්ඡිකාතබ්බං සච්ඡිකතං, නො ච වත රෙ වත්තබ්බෙ – ‘‘අත්ථි අරහතො කඞ්ඛා’’ති.

320. අත්ථි ¶ අරහතො කඞ්ඛාති? සධම්මකුසලස්ස අරහතො ¶ අත්ථි කඞ්ඛා, පරධම්මකුසලස්ස ¶ අරහතො නත්ථි කඞ්ඛාති. සධම්මකුසලස්ස අරහතො අත්ථි කඞ්ඛාති? ආමන්තා. පරධම්මකුසලස්ස අරහතො අත්ථි කඞ්ඛාති? න හෙවං වත්තබ්බෙ…පෙ….

පරධම්මකුසලස්ස අරහතො නත්ථි කඞ්ඛාති? ආමන්තා. සධම්මකුසලස්ස අරහතො නත්ථි කඞ්ඛාති? න හෙවං වත්තබ්බෙ…පෙ….

සධම්මකුසලස්ස අරහතො රාගො පහීනො, අත්ථි තස්ස කඞ්ඛාති? ආමන්තා. පරධම්මකුසලස්ස අරහතො රාගො පහීනො, අත්ථි තස්ස කඞ්ඛාති? න හෙවං වත්තබ්බෙ…පෙ….

සධම්මකුසලස්ස අරහතො දොසො පහීනො…පෙ… මොහො පහීනො…පෙ… අනොත්තප්පං පහීනං…පෙ… රාගප්පහානාය මග්ගො භාවිතො…පෙ… බොජ්ඣඞ්ගා භාවිතා…පෙ… දොසප්පහානාය…පෙ… මොහප්පහානාය…පෙ… අනොත්තප්පපහානාය ¶ මග්ගො භාවිතො…පෙ… බොජ්ඣඞ්ගා භාවිතා…පෙ… සධම්මකුසලො අරහා වීතරාගො වීතදොසො වීතමොහො ¶ …පෙ… සච්ඡිකාතබ්බං සච්ඡිකතං, අත්ථි තස්ස කඞ්ඛාති? ආමන්තා. පරධම්මකුසලො අරහා වීතරාගො වීතදොසො වීතමොහො…පෙ… සච්ඡිකාතබ්බං සච්ඡිකතං, අත්ථි තස්ස කඞ්ඛාති? න හෙවං වත්තබ්බෙ…පෙ… පරධම්මකුසලස්ස අරහතො රාගො පහීනො, නත්ථි තස්ස කඞ්ඛාති? ආමන්තා. සධම්මකුසලස්ස අරහතො රාගො පහීනො, නත්ථි තස්ස කඞ්ඛාති? න හෙවං වත්තබ්බෙ…පෙ….

පරධම්මකුසලස්ස අරහතො දොසො පහීනො…පෙ… මොහො පහීනො…පෙ… අනොත්තප්පං පහීනං…පෙ… රාගප්පහානාය මග්ගො භාවිතො…පෙ… බොජ්ඣඞ්ගා භාවිතා…පෙ… දොසප්පහානාය…පෙ… මොහප්පහානාය…පෙ… අනොත්තප්පපහානාය මග්ගො භාවිතො…පෙ… බොජ්ඣඞ්ගා භාවිතා…පෙ… පරධම්මකුසලො අරහා වීතරාගො වීතදොසො වීතමොහො…පෙ… සච්ඡිකාතබ්බං සච්ඡිකතං, නත්ථි තස්ස කඞ්ඛාති? ආමන්තා. සධම්මකුසලො අරහා වීතරාගො වීතදොසො වීතමොහො…පෙ… සච්ඡිකාතබ්බං සච්ඡිකතං, නත්ථි තස්ස කඞ්ඛාති? න හෙවං වත්තබ්බෙ…පෙ….

321. අත්ථි අරහතො කඞ්ඛාති? ආමන්තා. නනු වුත්තං භගවතා – ‘‘ජානතොහං, භික්ඛවෙ, පස්සතො ආසවානං ඛයං වදාමි, නො අජානතො නො ¶ අපස්සතො! කිඤ්ච, භික්ඛවෙ ¶ , ජානතො කිං පස්සතො ආසවානං ඛයො හොති ¶ ? ‘ඉති රූපං’…පෙ… ‘ඉති විඤ්ඤාණස්ස අත්ථඞ්ගමො’ති – එවං ඛො, භික්ඛවෙ, ජානතො එවං පස්සතො ආසවානං ඛයො හොතී’’ති. අත්ථෙව සුත්තන්තොති? ආමන්තා. තෙන හි න වත්තබ්බං – ‘‘අත්ථි අරහතො කඞ්ඛා’’ති.

අත්ථි අරහතො කඞ්ඛාති? ආමන්තා. නනු වුත්තං භගවතා – ‘‘ජානතොහං, භික්ඛවෙ, පස්සතො ආසවානං ඛයං වදාමි, නො අජානතො නො අපස්සතො! කිඤ්ච, භික්ඛවෙ, ජානතො කිං පස්සතො ආසවානං ඛයො හොති? ‘ඉදං දුක්ඛ’න්ති, භික්ඛවෙ…පෙ… ‘අයං දුක්ඛනිරොධගාමිනී පටිපදා’ති ජානතො පස්සතො ආසවානං ඛයො හොති. එවං ඛො ¶ , භික්ඛවෙ, ජානතො එවං පස්සතො ආසවානං ඛයො හොතී’’ති. අත්ථෙව සුත්තන්තොති? ආමන්තා. තෙන හි න වත්තබ්බං – ‘‘අත්ථි අරහතො කඞ්ඛා’’ති.

අත්ථි අරහතො කඞ්ඛාති? ආමන්තා. නනු වුත්තං භගවතා – ‘‘සබ්බං, භික්ඛවෙ, අනභිජානං අපරිජානං අවිරාජයං අප්පජහං අභබ්බො දුක්ඛක්ඛයාය; සබ්බඤ්ච ඛො, භික්ඛවෙ, අභිජානං පරිජානං විරාජයං පජහං භබ්බො දුක්ඛක්ඛයායා’’ති! අත්ථෙව සුත්තන්තොති? ආමන්තා. තෙන හි න වත්තබ්බං – ‘‘අත්ථි අරහතො කඞ්ඛා’’ති.

අත්ථි අරහතො කඞ්ඛාති? ආමන්තා. නනු වුත්තං භගවතා – ‘‘සහාවස්ස දස්සනසම්පදාය ¶ …පෙ… ඡච්චාභිඨානානි අභබ්බ කාතු’’න්ති. අත්ථෙව සුත්තන්තොති? ආමන්තා. තෙන හි න වත්තබ්බං – ‘‘අත්ථි අරහතො කඞ්ඛා’’ති.

අත්ථි අරහතො කඞ්ඛාති? ආමන්තා. නනු වුත්තං භගවතා – ‘‘යස්මිං, භික්ඛවෙ, සමයෙ අරියසාවකස්ස විරජං වීතමලං ධම්මචක්ඛුං උදපාදි ¶ – ‘යං කිඤ්චි සමුදයධම්මං සබ්බං තං නිරොධධම්ම’න්ති, සහ දස්සනුප්පාදා, භික්ඛවෙ, අරියසාවකස්ස තීණි සංයොජනානි පහීයන්ති – සක්කායදිට්ඨි, විචිකිච්ඡා, සීලබ්බතපරාමාසො’’ති! අත්ථෙව සුත්තන්තොති? ආමන්තා. තෙන හි න වත්තබ්බං – ‘‘අත්ථි අරහතො කඞ්ඛා’’ති.

අත්ථි අරහතො කඞ්ඛාති? ආමන්තා. නනු වුත්තං භගවතා –

සූරියොව [සුරියොව (සී. ස්යා. කං. පී.)] ඔභාසයමන්තලික්ඛන්ති [මහාව. 3; උදා. 3].

ඣායිනො ¶ [යෙ ඣායිනො (උදානෙ)] තා පජහන්ති සබ්බා,

ආතාපිනො ¶ බ්රහ්මචරියං චරන්තාති [උදා. 47 උදානෙපි].

‘‘යෙ කඞ්ඛාසමතික්කන්තා, කඞ්ඛාභූතෙසු පාණිසු;

අසංසයා විසංයුත්තා, තෙසු දින්නං මහප්ඵලන්ති.

නිත්ථිණ්ණඔඝං [නිතිණ්ණඔඝං (සී. ක.), නිත්තිණ්ණඔඝං (ස්යා. කං.)] විචිකිච්ඡඡින්නං,

බුද්ධං නමස්සාම ජිනං ජනින්දා’’ති [දී. නි. 2.354].

අත්ථෙව ¶ සුත්තන්තොති? ආමන්තා. තෙන හි න වත්තබ්බං – ‘‘අත්ථි අරහතො කඞ්ඛා’’ති.

න වත්තබ්බං – ‘‘අත්ථි අරහතො කඞ්ඛා’’ති? ආමන්තා. නනු අරහා ඉත්ථිපුරිසානං නාමගොත්තෙ කඞ්ඛෙය්ය, මග්ගාමග්ගෙ කඞ්ඛෙය්ය, තිණකට්ඨවනප්පතීනං නාමෙ කඞ්ඛෙය්යා’’ති? ආමන්තා. හඤ්චි අරහා ඉත්ථිපුරිසානං නාමගොත්තෙ කඞ්ඛෙය්ය, මග්ගාමග්ගෙ කඞ්ඛෙය්ය, තිණකට්ඨවනප්පතීනං නාමෙ කඞ්ඛෙය්ය; තෙන වත රෙ වත්තබ්බෙ – ‘‘අත්ථි අරහතො කඞ්ඛා’’ති.

අරහා ¶ ඉත්ථිපුරිසානං නාමගොත්තෙ කඞ්ඛෙය්ය, මග්ගාමග්ගෙ කඞ්ඛෙය්ය, තිණකට්ඨවනප්පතීනං නාමෙ කඞ්ඛෙය්යාති, අත්ථි අරහතො කඞ්ඛාති? ආමන්තා. අරහා සොතාපත්තිඵලෙ වා සකදාගාමිඵලෙ වා අනාගාමිඵලෙ වා අරහත්තෙ වා කඞ්ඛෙය්යාති? න හෙවං වත්තබ්බෙ…පෙ….

322. අත්ථි ¶ අරහතො පරවිතාරණාති? ආමන්තා ¶ . අරහා පරනෙය්යො පරපත්තියො පරපච්චයො පරපටිබද්ධභූ, න ජානාති න පස්සති සම්මූළ්හො අසම්පජානොති? න හෙවං වත්තබ්බෙ…පෙ….

නනු අරහා න පරනෙය්යො න පරපත්තියො න පරපච්චයො න පරපටිබද්ධභූ ජානාති පස්සති අසම්මූළ්හො සම්පජානොති? ආමන්තා. හඤ්චි අරහා න පරනෙය්යො න පරපත්තියො න පරපච්චයො න පරපටිබද්ධභූ, ජානාති පස්සති අසම්මූළ්හො සම්පජානො, නො ච වත රෙ වත්තබ්බෙ – ‘‘අත්ථි අරහතො පරවිතාරණා’’ති.

අත්ථි ¶ පුථුජ්ජනස්ස පරවිතාරණා, සො ච පරනෙය්යො පරපත්තියො පරපච්චයො පරපටිබද්ධභූ, න ජානාති න පස්සති සම්මූළ්හො අසම්පජානොති? ආමන්තා. අත්ථි අරහතො පරවිතාරණා, සො ච පරනෙය්යො පරපත්තියො පරපච්චයො පරපටිබද්ධභූ, න ජානාති න පස්සති සම්මූළ්හො අසම්පජානොති? න හෙවං වත්තබ්බෙ…පෙ….

අත්ථි අරහතො පරවිතාරණා, සො ච න පරනෙය්යො න පරපත්තියො න පරපච්චයො න පරපටිබද්ධභූ, ජානාති පස්සති අසම්මූළ්හො සම්පජානොති? ආමන්තා. අත්ථි පුථුජ්ජනස්ස පරවිතාරණා, සො ච න පරනෙය්යො න පරපත්තියො න පරපච්චයො න පරපටිබද්ධභූ, ජානාති පස්සති අසම්මූළ්හො සම්පජානොති? න හෙවං වත්තබ්බෙ…පෙ….

අත්ථි ¶ අරහතො පරවිතාරණාති? ආමන්තා. අත්ථි අරහතො සත්ථරි පරවිතාරණා, ධම්මෙ පරවිතාරණා, සඞ්ඝෙ පරවිතාරණා, සික්ඛාය ¶ පරවිතාරණා, පුබ්බන්තෙ පරවිතාරණා, අපරන්තෙ පරවිතාරණා, පුබ්බන්තාපරන්තෙ පරවිතාරණා, ඉදප්පච්චයතාපටිච්චසමුප්පන්නෙසු ධම්මෙසු පරවිතාරණාති? න ¶ හෙවං වත්තබ්බෙ…පෙ….

නත්ථි අරහතො සත්ථරි පරවිතාරණා, ධම්මෙ පරවිතාරණා…පෙ… ඉදපච්චයතාපටිච්චසමුප්පන්නෙසු ධම්මෙසු පරවිතාරණාති? ආමන්තා. හඤ්චි නත්ථි අරහතො සත්ථරි පරවිතාරණා, ධම්මෙ පරවිතාරණා…පෙ… ඉදප්පච්චයතාපටිච්චසමුප්පන්නෙසු ධම්මෙසු පරවිතාරණා, නො ච වත රෙ වත්තබ්බෙ – ‘‘අත්ථි අරහතො පරවිතාරණා’’ති.

අත්ථි පුථුජ්ජනස්ස පරවිතාරණා, අත්ථි තස්ස සත්ථරි පරවිතාරණා, ධම්මෙ පරවිතාරණා…පෙ… ඉදප්පච්චයතාපටිච්චසමුප්පන්නෙසු ධම්මෙසු පරවිතාරණාති? ආමන්තා. අත්ථි අරහතො පරවිතාරණා, අත්ථි තස්ස සත්ථරි පරවිතාරණා, ධම්මෙ පරවිතාරණා…පෙ… ඉදප්පච්චයතාපටිච්චසමුප්පන්නෙසු ධම්මෙසු පරවිතාරණාති? න හෙවං වත්තබ්බෙ…පෙ….

අත්ථි අරහතො පරවිතාරණා, නත්ථි තස්ස සත්ථරි පරවිතාරණා, ධම්මෙ පරවිතාරණා…පෙ… ඉදප්පච්චයතාපටිච්චසමුප්පන්නෙසු ධම්මෙසු පරවිතාරණාති? ආමන්තා. අත්ථි පුථුජ්ජනස්ස ¶ පරවිතාරණා, නත්ථි තස්ස සත්ථරි පරවිතාරණා, ධම්මෙ පරවිතාරණා…පෙ… ඉදප්පච්චයතාපටිච්චසමුප්පන්නෙසු ¶ ධම්මෙසු පරවිතාරණාති? න හෙවං වත්තබ්බෙ…පෙ….

323. අත්ථි අරහතො පරවිතාරණාති? ආමන්තා. නනු අරහතො රාගො පහීනො උච්ඡින්නමූලො තාලාවත්ථුකතො අනභාවඞ්කතො ආයතිං අනුප්පාදධම්මොති? ආමන්තා. හඤ්චි අරහතො රාගො පහීනො උච්ඡින්නමූලො තාලාවත්ථුකතො අනභාවඞ්කතො ආයතිං අනුප්පාදධම්මො, නො ච වත රෙ වත්තබ්බෙ – ‘‘අත්ථි අරහතො පරවිතාරණා’’ති.

අත්ථි අරහතො පරවිතාරණාති? ආමන්තා. නනු ¶ අරහතො දොසො පහීනො…පෙ… මොහො පහීනො…පෙ… අනොත්තප්පං පහීනං උච්ඡින්නමූලං තාලාවත්ථුකතං අනභාවඞ්කතං ආයතිං අනුප්පාදධම්මං…පෙ… රාගප්පහානාය මග්ගො භාවිතො…පෙ… බොජ්ඣඞ්ගා භාවිතා…පෙ… දොසප්පහානාය…පෙ… අනොත්තප්පපහානාය මග්ගො භාවිතො…පෙ… බොජ්ඣඞ්ගා භාවිතා…පෙ… නනු ¶ අරහා වීතරාගො වීතදොසො වීතමොහො…පෙ… සච්ඡිකාතබ්බං සච්ඡිකතන්ති? ආමන්තා. හඤ්චි අරහා වීතරාගො වීතදොසො වීතමොහො සච්ඡිකාතබ්බං සච්ඡිකතං, නො ච වත රෙ වත්තබ්බෙ – ‘‘අත්ථි අරහතො පරවිතාරණා’’ති.

324. අත්ථි අරහතො පරවිතාරණාති? සධම්මකුසලස්ස අරහතො අත්ථි පරවිතාරණා, පරධම්මකුසලස්ස අරහතො නත්ථි පරවිතාරණාති. සධම්මකුසලස්ස අරහතො අත්ථි පරවිතාරණාති? ආමන්තා. පරධම්මකුසලස්ස අරහතො අත්ථි පරවිතාරණාති? න හෙවං වත්තබ්බෙ…පෙ….

පරධම්මකුසලස්ස අරහතො නත්ථි පරවිතාරණාති? ආමන්තා ¶ . සධම්මකුසලස්ස අරහතො නත්ථි පරවිතාරණාති? න හෙවං ¶ වත්තබ්බෙ…පෙ….

සධම්මකුසලස්ස අරහතො රාගො පහීනො, අත්ථි තස්ස පරවිතාරණාති? ආමන්තා. පරධම්මකුසලස්ස අරහතො රාගො පහීනො, අත්ථි තස්ස පරවිතාරණාති? න හෙවං වත්තබ්බෙ.

සධම්මකුසලස්ස අරහතො දොසො පහීනො…පෙ… මොහො පහීනො…පෙ… අනොත්තප්පං පහීනං ¶ …පෙ… රාගප්පහානාය මග්ගො භාවිතො…පෙ… බොජ්ඣඞ්ගා භාවිතා…පෙ… දොසප්පහානාය…පෙ… අනොත්තප්පපහානාය මග්ගො භාවිතො…පෙ… බොජ්ඣඞ්ගා භාවිතා…පෙ… සධම්මකුසලො අරහා වීතරාගො වීතදොසො වීතමොහො…පෙ… සච්ඡිකාතබ්බං සච්ඡිකතං, අත්ථි තස්ස පරවිතාරණාති? ආමන්තා. පරධම්මකුසලො අරහා වීතරාගො වීතදොසො වීතමොහො…පෙ… සච්ඡිකාතබ්බං සච්ඡිකතං, අත්ථි තස්ස පරවිතාරණාති? න හෙවං වත්තබ්බෙ…පෙ….

පරධම්මකුසලස්ස ¶ අරහතො රාගො පහීනො, නත්ථි තස්ස පරවිතාරණාති? ආමන්තා. සධම්මකුසලස්ස අරහතො රාගො පහීනො, නත්ථි තස්ස පරවිතාරණාති? න හෙවං වත්තබ්බෙ.

පරධම්මකුසලස්ස අරහතො දොසො පහීනො, මොහො පහීනො…පෙ… අනොත්තප්පං පහීනං…පෙ… රාගප්පහානාය මග්ගො භාවිතො…පෙ… බොජ්ඣඞ්ගා භාවිතා…පෙ… දොසප්පහානාය…පෙ… අනොත්තප්පපහානාය ¶ මග්ගො භාවිතො…පෙ… බොජ්ඣඞ්ගා භාවිතා…පෙ… පරධම්මකුසලො අරහා වීතරාගො ¶ වීතදොසො වීතමොහො…පෙ… සච්ඡිකාතබ්බං සච්ඡිකතං, නත්ථි තස්ස පරවිතාරණාති? ආමන්තා. සධම්මකුසලො අරහා වීතරාගො වීතදොසො වීතමොහො…පෙ… සච්ඡිකාතබ්බං සච්ඡිකතං, නත්ථි තස්ස පරවිතාරණාති? න හෙවං වත්තබ්බෙ…පෙ….

325. අත්ථි අරහතො පරවිතාරණාති? ආමන්තා. නනු වුත්තං භගවතා – ‘‘ජානතොහං, භික්ඛවෙ, පස්සතො ආසවානං ඛයං වදාමි, නො අජානතො නො අපස්සතො! කිඤ්ච, භික්ඛවෙ, ජානතො කිං පස්සතො ආසවානං ඛයො හොති? ‘ඉති රූපං’…පෙ… ‘ඉති විඤ්ඤාණස්ස අත්ථඞ්ගමො’ති – එවං ඛො, භික්ඛවෙ, ජානතො එවං පස්සතො ආසවානං ඛයො හොතී’’ති. අත්ථෙව සුත්තන්තොති? ආමන්තා ¶ . තෙන හි න වත්තබ්බං – ‘‘අත්ථි අරහතො පරවිතාරණා’’ති.

අත්ථි අරහතො පරවිතාරණාති? ආමන්තා. නනු වුත්තං භගවතා – ‘‘ජානතොහං, භික්ඛවෙ, පස්සතො ආසවානං ඛයං වදාමි, නො අජානතො නො අපස්සතො! කිඤ්ච, භික්ඛවෙ, ජානතො කිං පස්සතො ආසවානං ඛයො හොති? ‘ඉදං දුක්ඛ’න්ති – භික්ඛවෙ, ජානතො පස්සතො ආසවානං ඛයො ¶ හොති, ‘අයං දුක්ඛසමුදයො’ති…පෙ… ‘අයං දුක්ඛනිරොධො’ති…පෙ… ‘අයං දුක්ඛනිරොධගාමිනී පටිපදා’ති – ජානතො පස්සතො ආසවානං ඛයො හොති. එවං ඛො, භික්ඛවෙ, ජානතො එවං පස්සතො ආසවානං ඛයො හොතී’’ති. අත්ථෙව සුත්තන්තොති? ආමන්තා. තෙන හි න වත්තබ්බං ¶ – ‘‘අත්ථි අරහතො පරවිතාරණා’’ති.

අත්ථි අරහතො පරවිතාරණාති? ආමන්තා. නනු වුත්තං භගවතා – ‘‘සබ්බං, භික්ඛවෙ, අනභිජානං අපරිජානං අවිරාජයං අප්පජහං අභබ්බො දුක්ඛක්ඛයාය; සබ්බඤ්ච ඛො, භික්ඛවෙ, අභිජානං පරිජානං විරාජයං පජහං භබ්බො දුක්ඛක්ඛයායා’’ති! අත්ථෙව සුත්තන්තොති? ආමන්තා. තෙන හි න වත්තබ්බං – ‘‘අත්ථි අරහතො පරවිතාරණා’’ති.

අත්ථි අරහතො පරවිතාරණාති? ආමන්තා. නනු වුත්තං භගවතා – ‘‘සහාවස්ස දස්සනසම්පදාය…පෙ… ඡච්චාභිඨානානි අභබ්බ කාතු’’න්ති. අත්ථෙව සුත්තන්තොති? ආමන්තා. තෙන ¶ හි න වත්තබ්බං – ‘‘අත්ථි අරහතො පරවිතාරණා’’ති.

අත්ථි ¶ අරහතො පරවිතාරණාති? ආමන්තා. නනු වුත්තං භගවතා – ‘‘යස්මිං, භික්ඛවෙ, සමයෙ අරියසාවකස්ස විරජං වීතමලං ධම්මචක්ඛුං උදපාදි – ‘යං කිඤ්චි සමුදයධම්මං, සබ්බං තං නිරොධධම්ම’න්ති, සහ දස්සනුප්පාදා, භික්ඛවෙ, අරියසාවකස්ස තීණි සංයොජනානි පහීයන්ති – සක්කායදිට්ඨි, විචිකිච්ඡා, සීලබ්බතපරාමාසො’’ති! අත්ථෙව සුත්තන්තොති? ආමන්තා. තෙන හි න වත්තබ්බං – ‘‘අත්ථි අරහතො පරවිතාරණා’’ති.

අත්ථි අරහතො පරවිතාරණාති? ආමන්තා. නනු වුත්තං භගවතා –

‘‘නාහං සහිස්සාමි [ගමිස්සාමි (සී. ස්යා. ක.), සමීහාමි (පී.)] පමොචනාය,

කථඞ්කථිං ධොතක කඤ්චි [කිඤ්චි (ක.)] ලොකෙ;

එවං තුවං ඔඝමිමං තරෙසී’’ති [සු. නි. 1070 සුත්තනිපාතෙ; චූළනි. 33 ධොතකමාණවපුච්ඡානිද්දෙස].

අත්ථෙව ¶ සුත්තන්තොති? ආමන්තා. තෙන හි න වත්තබ්බං – ‘‘අත්ථි අරහතො පරවිතාරණා’’ති.

න වත්තබ්බං – ‘‘අත්ථි අරහතො පරවිතාරණා’’ති? ආමන්තා. නනු අරහතො ඉත්ථිපුරිසානං නාමගොත්තං පරෙ විතාරෙය්යුං, මග්ගාමග්ගං පරෙ විතාරෙය්යුං, තිණකට්ඨවනප්පතීනං නාමං පරෙ විතාරෙය්යුන්ති? ආමන්තා. හඤ්චි අරහතො ඉත්ථිපුරිසානං නාමගොත්තං පරෙ විතාරෙය්යුං, මග්ගාමග්ගං පරෙ විතාරෙය්යුං, තිණකට්ඨවනප්පතීනං ¶ නාමං පරෙ විතාරෙය්යුං, තෙන වත රෙ වත්තබ්බෙ – ‘‘අත්ථි අරහතො පරවිතාරණා’’ති.

අරහතො ඉත්ථිපුරිසානං නාමගොත්තං පරෙ විතාරෙය්යුං, මග්ගාමග්ගං පරෙ විතාරෙය්යුං, තිණකට්ඨවනප්පතීනං නාමං පරෙ විතාරෙය්යුන්ති, අත්ථි අරහතො පරවිතාරණාති? ආමන්තා. අරහතො සොතාපත්තිඵලං වා සකදාගාමිඵලං වා අනාගාමිඵලං වා අරහත්තං වා පරෙ විතාරෙය්යුන්ති? න හෙවං වත්තබ්බෙ…පෙ….

326. සමාපන්නස්ස ¶ ¶ අත්ථි වචීභෙදොති? ආමන්තා. සබ්බත්ථ සමාපන්නානං අත්ථි වචීභෙදොති? න හෙවං වත්තබ්බෙ…පෙ….

සමාපන්නස්ස අත්ථි වචීභෙදොති? ආමන්තා. සබ්බදා සමාපන්නානං අත්ථි වචීභෙදොති? න හෙවං වත්තබ්බෙ…පෙ….

සමාපන්නස්ස ¶ අත්ථි වචීභෙදොති? ආමන්තා. සබ්බෙසං සමාපන්නානං අත්ථි වචීභෙදොති? න හෙවං වත්තබ්බෙ…පෙ….

සමාපන්නස්ස අත්ථි වචීභෙදොති? ආමන්තා. සබ්බසමාපත්තීසු අත්ථි වචීභෙදොති? න හෙවං වත්තබ්බෙ…පෙ….

සමාපන්නස්ස අත්ථි වචීභෙදොති? ආමන්තා. සමාපන්නස්ස අත්ථි කායභෙදොති? න හෙවං වත්තබ්බෙ…පෙ….

සමාපන්නස්ස ¶ නත්ථි කායභෙදොති? ආමන්තා. සමාපන්නස්ස නත්ථි වචීභෙදොති? න හෙවං වත්තබ්බෙ…පෙ….

සමාපන්නස්ස අත්ථි වාචා, අත්ථි වචීභෙදොති? ආමන්තා. සමාපන්නස්ස අත්ථි කායො, අත්ථි කායභෙදොති? න හෙවං වත්තබ්බෙ…පෙ….

සමාපන්නස්ස අත්ථි කායො, නත්ථි කායභෙදොති? ආමන්තා. සමාපන්නස්ස අත්ථි වාචා, නත්ථි වචීභෙදොති? න හෙවං වත්තබ්බෙ…පෙ….

327. දුක්ඛන්ති ¶ ජානන්තො දුක්ඛන්ති වාචං භාසතීති? ආමන්තා. සමුදයොති ජානන්තො සමුදයොති වාචං භාසතීති? න හෙවං වත්තබ්බෙ…පෙ….

දුක්ඛන්ති ජානන්තො දුක්ඛන්ති වාචං භාසතීති? ආමන්තා. නිරොධොති ජානන්තො නිරොධොති වාචං භාසතීති? න හෙවං වත්තබ්බෙ…පෙ….

දුක්ඛන්ති ජානන්තො දුක්ඛන්ති වාචං භාසතීති? ආමන්තා. මග්ගොති ජානන්තො මග්ගොති වාචං භාසතීති? න හෙවං වත්තබ්බෙ…පෙ….

සමුදයොති ¶ ¶ ජානන්තො න ච සමුදයොති වාචං භාසතීති? ආමන්තා. දුක්ඛන්ති ජානන්තො න ච දුක්ඛන්ති වාචං භාසතීති? න හෙවං වත්තබ්බෙ…පෙ….

නිරොධොති ජානන්තො න ච නිරොධොති වාචං භාසතීති? ආමන්තා. දුක්ඛන්ති ජානන්තො න ච දුක්ඛන්ති වාචං භාසතීති? න හෙවං වත්තබ්බෙ…පෙ….

මග්ගොති ජානන්තො න ච මග්ගොති වාචං භාසතීති? ආමන්තා. දුක්ඛන්ති ජානන්තො න ච දුක්ඛන්ති වාචං භාසතීති? න හෙවං වත්තබ්බෙ…පෙ….

328. සමාපන්නස්ස අත්ථි වචීභෙදොති? ආමන්තා ¶ . ඤාණං කිංගොචරන්ති? ඤාණං සච්චගොචරන්ති. සොතං සච්චගොචරන්ති? න හෙවං වත්තබ්බෙ…පෙ….

සමාපන්නස්ස අත්ථි වචීභෙදොති? ආමන්තා. සොතං කිං ගොචරන්ති? සොතං සද්දගොචරන්ති. ඤාණං සද්දගොචරන්ති? න හෙවං ¶ වත්තබ්බෙ.

සමාපන්නස්ස අත්ථි වචීභෙදො ඤාණං සච්චගොචරං, සොතං සද්දගොචරන්ති? ආමන්තා. හඤ්චි ඤාණං සච්චගොචරං, සොතං සද්දගොචරං, නො ච වත රෙ වත්තබ්බෙ – ‘‘සමාපන්නස්ස අත්ථි වචීභෙදො’’ති.

සමාපන්නස්ස අත්ථි වචීභෙදො ඤාණං සච්චගොචරං, සොතං සද්දගොචරන්ති? ආමන්තා. ද්වින්නං ඵස්සානං, ද්වින්නං වෙදනානං, ද්වින්නං සඤ්ඤානං, ද්වින්නං චෙතනානං, ද්වින්නං චිත්තානං සමොධානං හොතීති? න හෙවං වත්තබ්බෙ.

329. සමාපන්නස්ස අත්ථි වචීභෙදොති? ආමන්තා. පථවීකසිණං සමාපත්තිං සමාපන්නස්ස අත්ථි වචීභෙදොති? න හෙවං වත්තබ්බෙ.

සමාපන්නස්ස අත්ථි වචීභෙදොති? ආමන්තා. ආපොකසිණං…පෙ… තෙජොකසිණං… වායොකසිණං… නීලකසිණං… පීතකසිණං… ලොහිතකසිණං… ඔදාතකසිණං… ආකාසානඤ්චායතනං ¶ … විඤ්ඤාණඤ්චායතනං… ආකිඤ්චඤ්ඤායතනං…පෙ… නෙවසඤ්ඤානාසඤ්ඤායතනං සමාපන්නස්ස අත්ථි වචීභෙදොති? න හෙවං වත්තබ්බෙ…පෙ….

පථවීකසිණං ¶ සමාපත්තිං සමාපන්නස්ස නත්ථි වචීභෙදොති? ආමන්තා. හඤ්චි පථවීකසිණං සමාපත්තිං සමාපන්නස්ස නත්ථි වචීභෙදො, නො ච වත රෙ වත්තබ්බෙ – ‘‘සමාපන්නස්ස අත්ථි වචීභෙදො’’ති.

ආපොකසිණං ¶ … තෙජොකසිණං… වායොකසිණං… නීලකසිණං… පීතකසිණං… ලොහිතකසිණං… ඔදාතකසිණං… ආකාසානඤ්චායතනං ¶ … විඤ්ඤාණඤ්චායතනං… ආකිඤ්චඤ්ඤායතනං… නෙවසඤ්ඤානාසඤ්ඤායතනං සමාපන්නස්ස නත්ථි වචීභෙදොති? ආමන්තා. හඤ්චි නෙවසඤ්ඤානාසඤ්ඤායතනං සමාපන්නස්ස නත්ථි වචීභෙදො, නො ච වත රෙ වත්තබ්බෙ – ‘‘සමාපන්නස්ස අත්ථි වචීභෙදො’’ති.

සමාපන්නස්ස අත්ථි වචීභෙදොති? ආමන්තා. ලොකියසමාපත්තිං සමාපන්නස්ස අත්ථි වචීභෙදොති? න හෙවං වත්තබ්බෙ…පෙ….

සමාපන්නස්ස අත්ථි වචීභෙදොති? ආමන්තා. ලොකියං පඨමං ඣානං සමාපන්නස්ස අත්ථි වචීභෙදොති? න හෙවං වත්තබ්බෙ…පෙ…. සමාපන්නස්ස අත්ථි වචීභෙදොති? ආමන්තා. ලොකියං දුතියං ඣානං… තතියං ඣානං… චතුත්ථං ඣානං සමාපන්නස්ස අත්ථි වචීභෙදොති? න හෙවං වත්තබ්බෙ…පෙ….

ලොකියං සමාපත්තිං සමාපන්නස්ස නත්ථි වචීභෙදොති? ආමන්තා. හඤ්චි ලොකියං සමාපත්තිං සමාපන්නස්ස නත්ථි වචීභෙදො, නො ච වත රෙ වත්තබ්බෙ – ‘‘සමාපන්නස්ස අත්ථි වචීභෙදො’’ති.

ලොකියං පඨමං ඣානං සමාපන්නස්ස නත්ථි වචීභෙදොති? ආමන්තා ¶ . හඤ්චි ලොකියං පඨමං ඣානං සමාපන්නස්ස නත්ථි වචීභෙදො, නො ච වත රෙ වත්තබ්බෙ – ‘‘සමාපන්නස්ස අත්ථි වචීභෙදො’’ති.

ලොකියං ¶ දුතියං ඣානං… තතියං ඣානං… චතුත්ථං ඣානං සමාපන්නස්ස නත්ථි වචීභෙදොති? ආමන්තා. හඤ්චි ලොකියං චතුත්ථං ඣානං සමාපන්නස්ස නත්ථි වචීභෙදො, නො ච වත රෙ වත්තබ්බෙ – ‘‘සමාපන්නස්ස ¶ අත්ථි වචීභෙදො’’ති.

330. ලොකුත්තරං පඨමං ඣානං සමාපන්නස්ස අත්ථි වචීභෙදොති? ආමන්තා. ලොකියං පඨමං ඣානං සමාපන්නස්ස අත්ථි වචීභෙදොති? න හෙවං වත්තබ්බෙ…පෙ….

ලොකුත්තරං පඨමං ඣානං සමාපන්නස්ස අත්ථි වචීභෙදොති? ආමන්තා. ලොකියං දුතියං ඣානං… තතියං ඣානං… චතුත්ථං ඣානං සමාපන්නස්ස අත්ථි වචීභෙදොති? න හෙවං වත්තබ්බෙ…පෙ….

ලොකියං ¶ පඨමං ඣානං සමාපන්නස්ස නත්ථි වචීභෙදොති? ආමන්තා. ලොකුත්තරං පඨමං ඣානං සමාපන්නස්ස නත්ථි වචීභෙදොති? න හෙවං වත්තබ්බෙ…පෙ….

ලොකියං දුතියං ඣානං… තතියං ඣානං… චතුත්ථං ඣානං සමාපන්නස්ස නත්ථි වචීභෙදොති? ආමන්තා. ලොකුත්තරං පඨමං ඣානං සමාපන්නස්ස නත්ථි වචීභෙදොති? න හෙවං වත්තබ්බෙ…පෙ….

331. ලොකුත්තරං පඨමං ඣානං සමාපන්නස්ස අත්ථි වචීභෙදොති? ආමන්තා. ලොකුත්තරං දුතියං ඣානං සමාපන්නස්ස අත්ථි වචීභෙදොති? න ¶ හෙවං වත්තබ්බෙ…පෙ….

ලොකුත්තරං පඨමං ඣානං සමාපන්නස්ස අත්ථි වචීභෙදොති? ආමන්තා. ලොකුත්තරං තතියං ඣානං… චතුත්ථං ඣානං සමාපන්නස්ස අත්ථි වචීභෙදොති? න හෙවං වත්තබ්බෙ…පෙ….

ලොකුත්තරං දුතියං ඣානං සමාපන්නස්ස නත්ථි වචීභෙදොති? ආමන්තා ¶ . ලොකුත්තරං පඨමං ඣානං සමාපන්නස්ස නත්ථි වචීභෙදොති? න හෙවං වත්තබ්බෙ…පෙ….

ලොකුත්තරං දුතියං ඣානං… තතියං ඣානං… චතුත්ථං ඣානං සමාපන්නස්ස නත්ථි වචීභෙදොති ¶ ? ආමන්තා. ලොකුත්තරං පඨමං ඣානං සමාපන්නස්ස නත්ථි වචීභෙදොති? න හෙවං වත්තබ්බෙ…පෙ….

332. න වත්තබ්බං – ‘‘සමාපන්නස්ස අත්ථි වචීභෙදො’’ති? ආමන්තා. නනු විතක්කවිචාරා වචීසඞ්ඛාරා වුත්තා භගවතා – ‘‘පඨමං ඣානං සමාපන්නස්ස අත්ථි විතක්කවිචාරා’’ති? ආමන්තා. හඤ්චි විතක්කවිචාරා වචීසඞ්ඛාරා වුත්තා භගවතා – ‘‘පඨමං ඣානං සමාපන්නස්ස අත්ථි විතක්කවිචාරා,’’ තෙන වත රෙ වත්තබ්බෙ – ‘‘සමාපන්නස්ස අත්ථි වචීභෙදො’’ති.

විතක්කවිචාරා වචීසඞ්ඛාරා වුත්තා භගවතා – ‘‘පඨමං ඣානං සමාපන්නස්ස අත්ථි විතක්කවිචාරා’’ති [අත්ථි විතක්කවිචාරා (ස්යා.) එවමුපරිපි], අත්ථි තස්ස වචීභෙදොති? ආමන්තා. පථවීකසිණං පඨමං ඣානං සමාපන්නස්ස අත්ථි විතක්කවිචාරා, අත්ථි තස්ස වචීභෙදොති? න හෙවං වත්තබ්බෙ…පෙ….

විතක්කවිචාරා ¶ වචීසඞ්ඛාරා වුත්තා භගවතා – ‘‘පඨමං ඣානං සමාපන්නස්ස අත්ථි විතක්කවිචාරා’’ති, අත්ථි තස්ස වචීභෙදොති? ආමන්තා ¶ . ආපොකසිණං… තෙජොකසිණං… වායොකසිණං… නීලකසිණං… පීතකසිණං… ලොහිතකසිණං… ඔදාතකසිණං පඨමං ඣානං සමාපන්නස්ස අත්ථි විතක්කවිචාරා, අත්ථි තස්ස වචීභෙදොති? න හෙවං වත්තබ්බෙ…පෙ….

න ¶ වත්තබ්බං – ‘‘සමාපන්නස්ස අත්ථි වචීභෙදො’’ති? ආමන්තා. නනු විතක්කසමුට්ඨානා වාචා වුත්තා භගවතා – ‘‘පඨමං ඣානං සමාපන්නස්ස අත්ථි විතක්කවිචාරා’’ති? ආමන්තා. හඤ්චි විතක්කසමුට්ඨානා වාචා වුත්තා භගවතා – ‘‘පඨමං ඣානං සමාපන්නස්ස අත්ථි විතක්කවිචාරා,’’ තෙන වත රෙ වත්තබ්බෙ – ‘‘සමාපන්නස්ස අත්ථි වචීභෙදො’’ති.

විතක්කසමුට්ඨානා වාචා වුත්තා භගවතා – ‘‘පඨමං ඣානං සමාපන්නස්ස අත්ථි විතක්කවිචාරා’’ති, අත්ථි තස්ස වචීභෙදොති? ආමන්තා. සඤ්ඤාසමුට්ඨානා වාචා වුත්තා භගවතා – ‘‘දුතියං ඣානං සමාපන්නස්ස අත්ථි සඤ්ඤා, අත්ථි තස්ස විතක්කවිචාරා’’ති? න හෙවං වත්තබ්බෙ…පෙ….

විතක්කසමුට්ඨානා ¶ වාචා වුත්තා භගවතා – ‘‘පඨමං ඣානං සමාපන්නස්ස අත්ථි විතක්කවිචාරා’’ති, අත්ථි තස්ස වචීභෙදොති? ආමන්තා. සඤ්ඤාසමුට්ඨානා වාචා වුත්තා භගවතා – තතියං ඣානං…පෙ… චතුත්ථං ඣානං… ආකාසානඤ්චායතනං… විඤ්ඤාණඤ්චායතනං… ආකිඤ්චඤ්ඤායතනං සමාපන්නස්ස අත්ථි සඤ්ඤා, අත්ථි තස්ස විතක්කවිචාරාති? න හෙවං වත්තබ්බෙ…පෙ….

333. සමාපන්නස්ස අත්ථි වචීභෙදොති? ආමන්තා. නනු ‘‘පඨමං ඣානං සමාපන්නස්ස වාචා නිරුද්ධා හොතී’’ති [සං. නි. 4.259, 263]! අත්ථෙව සුත්තන්තොති? ආමන්තා ¶ . හඤ්චි ‘‘පඨමං ඣානං සමාපන්නස්ස වාචා නිරුද්ධා හොතී’’ති, අත්ථෙව ¶ සුත්තන්තොති, නො ච වත රෙ වත්තබ්බෙ – ‘‘සමාපන්නස්ස අත්ථි වචීභෙදො’’ති.

‘‘පඨමං ඣානං සමාපන්නස්ස වාචා නිරුද්ධා හොතී’’ති [සං. නි. 4.259, 263], අත්ථෙව සුත්තන්තොති, අත්ථි තස්ස වචීභෙදොති? ආමන්තා. ‘‘දුතියං ඣානං සමාපන්නස්ස විතක්කවිචාරා නිරුද්ධා හොන්තී’’ති [සං. නි. 4.259, 263], අත්ථෙව සුත්තන්තොති, අත්ථි තස්ස විතක්කවිචාරාති? න හෙවං වත්තබ්බෙ…පෙ….

‘‘පඨමං ඣානං සමාපන්නස්ස වාචා නිරුද්ධා හොතී’’ති [සං. නි. 4.259, 263], අත්ථෙව සුත්තන්තොති, අත්ථි තස්ස වචීභෙදොති? ආමන්තා. ‘‘තතියං ඣානං සමාපන්නස්ස ¶ පීති නිරුද්ධා හොති, චතුත්ථං ඣානං සමාපන්නස්ස අස්සාසපස්සාසා නිරුද්ධා හොන්ති, ආකාසානඤ්චායතනං සමාපන්නස්ස රූපසඤ්ඤා නිරුද්ධා හොති, විඤ්ඤාණඤ්චායතනං සමාපන්නස්ස ආකාසානඤ්චායතනසඤ්ඤා නිරුද්ධා හොති, ආකිඤ්චඤ්ඤායතනං සමාපන්නස්ස විඤ්ඤාණඤ්චායතනසඤ්ඤා නිරුද්ධා හොති, නෙවසඤ්ඤානාසඤ්ඤායතනං සමාපන්නස්ස ආකිඤ්චඤ්ඤායතනසඤ්ඤා නිරුද්ධා හොති, සඤ්ඤාවෙදයිතනිරොධං සමාපන්නස්ස සඤ්ඤා ච වෙදනා ච නිරුද්ධා හොන්තී’’ති [සං. නි. 4.259, 263; අ. නි. 9.31; දී. නි. 3.344], අත්ථෙව සුත්තන්තොති, අත්ථි තස්ස සඤ්ඤා ච වෙදනා චාති? න හෙවං වත්තබ්බෙ…පෙ….

න වත්තබ්බං – ‘‘සමාපන්නස්ස අත්ථි වචීභෙදො’’ති? ආමන්තා. නනු පඨමස්ස ඣානස්ස සද්දො කණ්ඩකො [කණ්ටකො (ස්යා.) අ. නි. 10.72] වුත්තො භගවතාති [අ. නි. 10.72 කණ්ටකසුත්තං නිස්සාය පුච්ඡති]? ආමන්තා. හඤ්චි ¶ පඨමස්ස ඣානස්ස සද්දො කණ්ටකො වුත්තො භගවතා, තෙන වත රෙ වත්තබ්බෙ – ‘‘සමාපන්නස්ස අත්ථි වචීභෙදො’’ති.

පඨමස්ස ¶ ඣානස්ස සද්දො කණ්ටකො වුත්තො භගවතාති, සමාපන්නස්ස අත්ථි වචීභෙදොති? ආමන්තා. දුතියස්ස ¶ ඣානස්ස විතක්කවිචාරා කණ්ටකො වුත්තො භගවතා… තතියස්ස ඣානස්ස පීති කණ්ටකො වුත්තො භගවතා… චතුත්ථස්ස ඣානස්ස අස්සාසපස්සාසා කණ්ටකො වුත්තො භගවතා [අ. නි. 10.72] … ආකාසානඤ්චායතනං සමාපන්නස්ස රූපසඤ්ඤා කණ්ටකො වුත්තො භගවතා… විඤ්ඤාණඤ්චායතනං සමාපන්නස්ස ආකාසානඤ්චායතනසඤ්ඤා කණ්ටකො වුත්තො භගවතා… ආකිඤ්චඤ්ඤායතනං සමාපන්නස්ස විඤ්ඤාණඤ්චායතනසඤ්ඤා කණ්ටකො වුත්තො භගවතා… නෙවසඤ්ඤානාසඤ්ඤායතනං සමාපන්නස්ස ආකිඤ්චඤ්ඤායතනසඤ්ඤා කණ්ටකො වුත්තො භගවතා… සඤ්ඤාවෙදයිතනිරොධං සමාපන්නස්ස සඤ්ඤා ච වෙදනා ච කණ්ටකො වුත්තො භගවතා [අ. නි. 10.72], අත්ථි තස්ස සඤ්ඤා ච වෙදනා චාති? න හෙවං වත්තබ්බෙ…පෙ….

න වත්තබ්බං – ‘‘සමාපන්නස්ස අත්ථි වචීභෙදො’’ති? ආමන්තා. නනු වුත්තං භගවතා – ‘‘සිඛිස්ස, ආනන්ද, භගවතො අරහතො සම්මාසම්බුද්ධස්ස අභිභූ නාම සාවකො බ්රහ්මලොකෙ ඨිතො දසසහස්සිලොකධාතුං සරෙන විඤ්ඤාපෙසි –

‘ආරබ්භථ ¶ නික්කමථ, යුඤ්ජථ බුද්ධසාසනෙ;

ධුනාථ මච්චුනො සෙනං, නළාගාරංව කුඤ්ජරො.

‘යො ¶ ඉමස්මිං ධම්මවිනයෙ, අප්පමත්තො විහස්සති [විහෙස්සති (සී. ස්යා. කං.) විහරිස්සති (ක.)];

පහාය ජාතිසංසාරං, දුක්ඛස්සන්තං කරිස්සතී’’’ති [අ. නි. 1 තිකනිපාතෙ; සං. නි. 1.285].

අත්ථෙව සුත්තන්තොති? ආමන්තා. තෙන හි සමාපන්නස්ස අත්ථි වචීභෙදොති.

334. දුක්ඛාහාරො ¶ මග්ගඞ්ගං මග්ගපරියාපන්නන්ති? ආමන්තා ¶ . යෙ කෙචි දුක්ඛන්ති වාචං භාසන්ති, සබ්බෙ තෙ මග්ගං භාවෙන්තීති? න හෙවං වත්තබ්බෙ.

යෙ කෙචි දුක්ඛන්ති වාචං භාසන්ති, සබ්බෙ තෙ මග්ගං භාවෙන්තීති? ආමන්තා. බාලපුථුජ්ජනා දුක්ඛන්ති වාචං භාසන්ති, බාලපුථුජ්ජනා මග්ගං භාවෙන්තීති? න හෙවං වත්තබ්බෙ. මාතුඝාතකො… පිතුඝාතකො… අරහන්තඝාතකො… රුහිරුප්පාදකො [ලොහිතුප්පාදකො (සී. ක.) අඤ්ඤට්ඨානෙසු පන රුහිරුප්පාදකොත්වෙව දිස්සති] … සඞ්ඝභෙදකො දුක්ඛන්ති වාචං භාසති, සඞ්ඝභෙදකො මග්ගං භාවෙතීති? න හෙවං වත්තබ්බෙ…පෙ….

335. එකං ¶ චිත්තං දිවසං තිට්ඨතීති? ආමන්තා. උපඩ්ඪදිවසො උප්පාදක්ඛණො, උපඩ්ඪදිවසො වයක්ඛණොති? න හෙවං වත්තබ්බෙ.

එකං ¶ චිත්තං ද්වෙ දිවසෙ තිට්ඨතීති? ආමන්තා. දිවසො උප්පාදක්ඛණො, දිවසො වයක්ඛණොති? න හෙවං වත්තබ්බෙ.

එකං චිත්තං චත්තාරො දිවසෙ තිට්ඨති… අට්ඨ දිවසෙ තිට්ඨති… දස දිවසෙ තිට්ඨති… වීසති දිවසෙ තිට්ඨති… මාසං තිට්ඨති… ද්වෙ මාසෙ තිට්ඨති… චත්තාරො මාසෙ තිට්ඨති… අට්ඨ මාසෙ ¶ තිට්ඨති… දස මාසෙ තිට්ඨති… සංවච්ඡරං තිට්ඨති… ද්වෙ වස්සානි තිට්ඨති… චත්තාරි වස්සානි තිට්ඨති… අට්ඨ වස්සානි තිට්ඨති… දස වස්සානි තිට්ඨති… වීසති වස්සානි තිට්ඨති… තිංස වස්සානි තිට්ඨති… චත්තාරීස වස්සානි තිට්ඨති… පඤ්ඤාස වස්සානි තිට්ඨති… වස්සසතං තිට්ඨති… ද්වෙ වස්සසතානි ¶ තිට්ඨති… චත්තාරි වස්සසතානි තිට්ඨති… පඤ්ච වස්සසතානි තිට්ඨති… වස්සසහස්සං තිට්ඨති… ද්වෙ වස්සසහස්සානි තිට්ඨති… චත්තාරි වස්සසහස්සානි තිට්ඨති… අට්ඨ වස්සසහස්සානි තිට්ඨති… සොළස වස්සසහස්සානි තිට්ඨති… කප්පං තිට්ඨති… ද්වෙ කප්පෙ තිට්ඨති… චත්තාරො කප්පෙ තිට්ඨති… අට්ඨ කප්පෙ තිට්ඨති… සොළස කප්පෙ තිට්ඨති… බාත්තිංස කප්පෙ තිට්ඨති… චතුසට්ඨි කප්පෙ තිට්ඨති… පඤ්ච කප්පසතානි තිට්ඨති… කප්පසහස්සානි තිට්ඨති… ද්වෙ කප්පසහස්සානි තිට්ඨති… චත්තාරි කප්පසහස්සානි ¶ තිට්ඨති… අට්ඨ කප්පසහස්සානි තිට්ඨති… සොළස කප්පසහස්සානි තිට්ඨති… වීසති කප්පසහස්සානි තිට්ඨති… චත්තාරීස කප්පසහස්සානි තිට්ඨති… සට්ඨි කප්පසහස්සානි තිට්ඨති… චතුරාසීති කප්පසහස්සානි තිට්ඨතීති? ආමන්තා. ද්වෙචත්තාරීස කප්පසහස්සානි උප්පාදක්ඛණො, ද්වෙචත්තාරීස කප්පසහස්සානි වයක්ඛණොති? න හෙවං වත්තබ්බෙ.

එකං චිත්තං දිවසං තිට්ඨතීති? ආමන්තා. අත්ථඤ්ඤෙ ධම්මා එකාහං බහුම්පි උප්පජ්ජිත්වා නිරුජ්ඣන්තීති? ආමන්තා. තෙ ධම්මා චිත්තෙන ලහුපරිවත්තාති? න හෙවං වත්තබ්බෙ.

තෙ ධම්මා චිත්තෙන ලහුපරිවත්තාති? ආමන්තා. නනු වුත්තං භගවතා – ‘‘නාහං, භික්ඛවෙ, අඤ්ඤං එකධම්මම්පි සමනුපස්සාමි එවං ලහුපරිවත්තං යථයිදං චිත්තං. යාවඤ්චිදං, භික්ඛවෙ, උපමාපි න සුකරා යාව ලහුපරිවත්තං චිත්ත’’න්ති [අ. නි. 1.48]. අත්ථෙව සුත්තන්තොති? ආමන්තා. තෙන හි න වත්තබ්බං – ‘‘තෙ ධම්මා චිත්තෙන ලහුපරිවත්තා’’ති.

තෙ ¶ ධම්මා චිත්තෙන ලහුපරිවත්තාති? ආමන්තා. නනු වුත්තං භගවතා – ‘‘සෙය්යථාපි, භික්ඛවෙ, මක්කටො ¶ අරඤ්ඤෙ පවනෙ චරමානො සාඛං ගණ්හති, තං මුඤ්චිත්වා අඤ්ඤං ගණ්හති, තං මුඤ්චිත්වා අඤ්ඤං ගණ්හති; එවමෙව ඛො, භික්ඛවෙ, යමිදං [යදිදං (බහූසු)] වුච්චති චිත්තං ඉතිපි මනො ඉතිපි විඤ්ඤාණං ඉතිපි තං රත්තියා ච දිවසස්ස ච අඤ්ඤදෙව උප්පජ්ජති ¶ අඤ්ඤං නිරුජ්ඣතී’’ති [සං. නි. 2.61]. අත්ථෙව සුත්තන්තොති? ආමන්තා. තෙන හි න වත්තබ්බං – ‘‘තෙ ධම්මා චිත්තෙන ලහුපරිවත්තා’’ති.

336. එකං ¶ චිත්තං දිවසං තිට්ඨතීති? ආමන්තා. චක්ඛුවිඤ්ඤාණං දිවසං තිට්ඨතීති? න හෙවං වත්තබ්බෙ. සොතවිඤ්ඤාණං…පෙ… ඝානවිඤ්ඤාණං… ජිව්හාවිඤ්ඤාණං… කායවිඤ්ඤාණං… අකුසලං චිත්තං… රාගසහගතං… දොසසහගතං… මොහසහගතං… මානසහගතං… දිට්ඨිසහගතං… විචිකිච්ඡාසහගතං… ථිනසහගතං… උද්ධච්චසහගතං… අහිරිකසහගතං… අනොත්තප්පසහගතං චිත්තං දිවසං තිට්ඨතීති? න හෙවං වත්තබ්බෙ…පෙ….

එකං චිත්තං දිවසං තිට්ඨතීති? ආමන්තා. යෙනෙව චිත්තෙන චක්ඛුනා රූපං පස්සති, තෙනෙව චිත්තෙන සොතෙන සද්දං සුණාති…පෙ… ඝානෙන ගන්ධං ඝායති… ජිව්හාය රසං සායති… කායෙන ඵොට්ඨබ්බං ඵුසති… මනසා ධම්මං විජානාති…පෙ… යෙනෙව චිත්තෙන මනසා ධම්මං විජානාති, තෙනෙව චිත්තෙන චක්ඛුනා රූපං පස්සති…පෙ… සොතෙන සද්දං සුණාති… ඝානෙන ගන්ධං ඝායති… ජිව්හාය රසං සායති…පෙ… කායෙන ඵොට්ඨබ්බං ඵුසතීති? න හෙවං වත්තබ්බෙ…පෙ….

එකං චිත්තං දිවසං තිට්ඨතීති? ආමන්තා. යෙනෙව චිත්තෙන අභික්කමති, තෙනෙව චිත්තෙන පටික්කමති; යෙනෙව චිත්තෙන පටික්කමති, තෙනෙව චිත්තෙන අභික්කමති; යෙනෙව චිත්තෙන ආලොකෙති, තෙනෙව චිත්තෙන විලොකෙති; යෙනෙව ¶ චිත්තෙන විලොකෙති, තෙනෙව චිත්තෙන ආලොකෙති; යෙනෙව චිත්තෙන සමිඤ්ජෙති, තෙනෙව චිත්තෙන පසාරෙති ¶ ; යෙනෙව චිත්තෙන පසාරෙති, තෙනෙව චිත්තෙන සමිඤ්ජෙතීති? න හෙවං වත්තබ්බෙ…පෙ….

337. ආකාසානඤ්චායතනූපගානං ¶ දෙවානං එකං චිත්තං යාවතායුකං තිට්ඨතීති? ආමන්තා. මනුස්සානං එකං චිත්තං යාවතායුකං තිට්ඨතීති? න හෙවං වත්තබ්බෙ.

ආකාසානඤ්චායතනූපගානං දෙවානං එකං චිත්තං යාවතායුකං තිට්ඨතීති? ආමන්තා. චාතුමහාරාජිකානං දෙවානං…පෙ… තාවතිංසානං දෙවානං… යාමානං දෙවානං… තුසිතානං දෙවානං… නිම්මානරතීනං දෙවානං… පරනිම්මිතවසවත්තීනං දෙවානං… බ්රහ්මපාරිසජ්ජානං දෙවානං… බ්රහ්මපුරොහිතානං දෙවානං… මහාබ්රහ්මානං දෙවානං… පරිත්තාභානං දෙවානං… අප්පමාණාභානං දෙවානං… ආභස්සරානං දෙවානං… පරිත්තසුභානං දෙවානං… අප්පමාණසුභානං දෙවානං… සුභකිණ්හානං දෙවානං ¶ … වෙහප්ඵලානං දෙවානං… අවිහානං දෙවානං… අතප්පානං දෙවානං… සුදස්සානං දෙවානං… සුදස්සීනං දෙවානං… අකනිට්ඨානං දෙවානං එකං චිත්තං යාවතායුකං තිට්ඨතීති? න හෙවං වත්තබ්බෙ.

ආකාසානඤ්චායතනූපගානං දෙවානං වීසති කප්පසහස්සානි ආයුප්පමාණං, ආකාසානඤ්චායතනූපගානං දෙවානං එකං චිත්තං වීසති කප්පසහස්සානි තිට්ඨතීති? ආමන්තා. මනුස්සානං වස්සසතං ආයුප්පමාණං, මනුස්සානං එකං චිත්තං වස්සසතං තිට්ඨතීති? න හෙවං වත්තබ්බෙ.

ආකාසානඤ්චායතනූපගානං ¶ දෙවානං වීසති කප්පසහස්සානි ආයුප්පමාණං, ආකාසානඤ්චායතනූපගානං දෙවානං එකං චිත්තං වීසති කප්පසහස්සානි තිට්ඨතීති? ආමන්තා. චාතුමහාරාජිකානං ¶ දෙවානං පඤ්ච වස්සසතානි ආයුප්පමාණං, චාතුමහාරාජිකානං දෙවානං එකං චිත්තං පඤ්ච වස්සසතානි තිට්ඨති… වස්සසහස්සං තිට්ඨති… ද්වෙ වස්සසහස්සානි තිට්ඨති… චත්තාරි වස්සසහස්සානි තිට්ඨති… අට්ඨ වස්සසහස්සානි තිට්ඨති… සොළස වස්සසහස්සානි තිට්ඨති… කප්පස්ස තතියභාගං තිට්ඨති… උපඩ්ඪකප්පං තිට්ඨති… එකං කප්පං තිට්ඨති… ද්වෙ කප්පෙ තිට්ඨති… චත්තාරො කප්පෙ තිට්ඨති… අට්ඨ කප්පෙ තිට්ඨති… සොළස කප්පෙ තිට්ඨති… බාත්තිංස කප්පෙ තිට්ඨති… චතුසට්ඨි කප්පෙ තිට්ඨති… පඤ්ච කප්පසතානි තිට්ඨති… කප්පසහස්සං තිට්ඨති… ද්වෙ කප්පසහස්සානි තිට්ඨති… චත්තාරි කප්පසහස්සානි තිට්ඨති… අට්ඨ කප්පසහස්සානි තිට්ඨති… අකනිට්ඨානං දෙවානං සොළස කප්පසහස්සානි ආයුප්පමාණං, අකනිට්ඨානං දෙවානං එකං චිත්තං සොළස කප්පසහස්සානි තිට්ඨතීති? න හෙවං වත්තබ්බෙ.

ආකාසානඤ්චායතනූපගානං ¶ දෙවානං චිත්තං මුහුත්තං මුහුත්තං උප්පජ්ජති මුහුත්තං මුහුත්තං නිරුජ්ඣතීති? ආමන්තා. ආකාසානඤ්චායතනූපගා දෙවා මුහුත්තං මුහුත්තං චවන්ති මුහුත්තං මුහුත්තං උප්පජ්ජන්තීති? න හෙවං වත්තබ්බෙ.

ආකාසානඤ්චායතනූපගානං දෙවානං එකං චිත්තං යාවතායුකං තිට්ඨතීති ¶ ? ආමන්තා. ආකාසානඤ්චායතනූපගා දෙවා යෙනෙව චිත්තෙන උප්පජ්ජන්ති, තෙනෙව චිත්තෙන චවන්තීති? න හෙවං වත්තබ්බෙ…පෙ….

338. සබ්බෙ ¶ සඞ්ඛාරා අනොධිං කත්වා කුක්කුළාති? ආමන්තා. නනු අත්ථි සුඛා වෙදනා, කායිකං සුඛං, චෙතසිකං සුඛං ¶ , දිබ්බං සුඛං, මානුසකං සුඛං, ලාභසුඛං, සක්කාරසුඛං, යානසුඛං, සයනසුඛං, ඉස්සරියසුඛං, ආධිපච්චසුඛං, ගිහිසුඛං, සාමඤ්ඤසුඛං, සාසවං සුඛං, අනාසවං සුඛං, උපධිසුඛං, නිරූපධිසුඛං, සාමිසං සුඛං, නිරාමිසං සුඛං, සප්පීතිකං සුඛං, නිප්පීතිකං සුඛං, ඣානසුඛං, විමුත්තිසුඛං, කාමසුඛං, නෙක්ඛම්මසුඛං, විවෙකසුඛං, උපසමසුඛං, සම්බොධසුඛන්ති? ආමන්තා. හඤ්චි අත්ථි සුඛා වෙදනා…පෙ… සම්බොධසුඛං, නො ච වත රෙ වත්තබ්බෙ – ‘‘සබ්බෙ සඞ්ඛාරා අනොධිං කත්වා කුක්කුළා’’ති.

සබ්බෙ සඞ්ඛාරා අනොධිං කත්වා කුක්කුළාති? ආමන්තා. සබ්බෙ සඞ්ඛාරා දුක්ඛා වෙදනා කායිකං දුක්ඛං චෙතසිකං දුක්ඛං සොකපරිදෙවදුක්ඛදොමනස්සඋපායාසාති? න හෙවං වත්තබ්බෙ.

න වත්තබ්බං – ‘‘සබ්බෙ සඞ්ඛාරා අනොධිං කත්වා කුක්කුළා’’ති? ආමන්තා. නනු වුත්තං භගවතා – ‘‘සබ්බං, භික්ඛවෙ, ආදිත්තං! කිඤ්ච, භික්ඛවෙ, සබ්බං ආදිත්තං? චක්ඛුං, භික්ඛවෙ, ආදිත්තං, රූපා ආදිත්තා, චක්ඛුවිඤ්ඤාණං ¶ ආදිත්තං, චක්ඛුසම්ඵස්සො ආදිත්තො; යමිදං [යම්පිදං (සං. නි. 4.28)] චක්ඛුසම්ඵස්සපච්චයා උප්පජ්ජති වෙදයිතං සුඛං වා දුක්ඛං වා අදුක්ඛමසුඛං වා, තම්පි ආදිත්තං. කෙන ආදිත්තං? ‘රාගග්ගිනා දොසග්ගිනා මොහග්ගිනා ආදිත්තං, ජාතියා ජරාය මරණෙන සොකෙහි පරිදෙවෙහි දුක්ඛෙහි ¶ දොමනස්සෙහි උපායාසෙහි ආදිත්ත’න්ති වදාමි. සොතං ආදිත්තං, සද්දා ආදිත්තා…පෙ… ඝානං ආදිත්තං, ගන්ධා ආදිත්තා…පෙ… ජිව්හා ආදිත්තා, රසා ආදිත්තා…පෙ… කායො ආදිත්තො, ඵොට්ඨබ්බා ආදිත්තා…පෙ… මනො ආදිත්තො, ධම්මා ආදිත්තා, මනොවිඤ්ඤාණං ආදිත්තං, මනොසම්ඵස්සො ආදිත්තො; යමිදං මනොසම්ඵස්සපච්චයා උප්පජ්ජති වෙදයිතං සුඛං වා දුක්ඛං වා අදුක්ඛමසුඛං වා, තම්පි ආදිත්තං. කෙන ආදිත්තං? ‘රාගග්ගිනා දොසග්ගිනා මොහග්ගිනා ආදිත්තං, ජාතියා ජරාය මරණෙන සොකෙහි පරිදෙවෙහි දුක්ඛෙහි දොමනස්සෙහි උපායාසෙහි ආදිත්ත’න්ති වදාමී’’ති [මහාව. 54; සං. නි. 4.28]. අත්ථෙව ¶ සුත්තන්තොති? ආමන්තා. තෙන ¶ හි වත්තබ්බං [තෙන හි (සී. ස්යා.), තෙන හි න වත්තබ්බං (ක.)] – ‘‘සබ්බෙ සඞ්ඛාරා අනොධිං කත්වා කුක්කුළා’’ති.

සබ්බෙ සඞ්ඛාරා අනොධිං කත්වා කුක්කුළාති? ආමන්තා. නනු වුත්තං භගවතා – ‘‘පඤ්චිමෙ, භික්ඛවෙ, කාමගුණා! කතමෙ පඤ්ච? චක්ඛුවිඤ්ඤෙය්යා රූපා ඉට්ඨා කන්තා මනාපා පියරූපා කාමූපසංහිතා රජනීයා, සොතවිඤ්ඤෙය්යා සද්දා…පෙ… ඝානවිඤ්ඤෙය්යා ගන්ධා… ජිව්හාවිඤ්ඤෙය්යා රසා… කායවිඤ්ඤෙය්යා ඵොට්ඨබ්බා ඉට්ඨා කන්තා ¶ මනාපා පියරූපා කාමූපසංහිතා රජනීයා. ඉමෙ ඛො, භික්ඛවෙ, පඤ්ච කාමගුණා’’ති [ම. නි. 1.166; සං. නි. 4.268]. අත්ථෙව සුත්තන්තොති? ආමන්තා. තෙන හි න වත්තබ්බං – ‘‘සබ්බෙ සඞ්ඛාරා අනොධිං කත්වා කුක්කුළා’’ති.

න වත්තබ්බං – ‘‘සබ්බෙ සඞ්ඛාරා අනොධිං කත්වා කුක්කුළා’’ති? ආමන්තා. නනු වුත්තං භගවතා – ‘‘ලාභා වො, භික්ඛවෙ, සුලද්ධං වො, භික්ඛවෙ, ඛණො වො පටිලද්ධො [පටිවිද්ධො (බහූසු)] බ්රහ්මචරියවාසාය! දිට්ඨා මයා, භික්ඛවෙ, ඡ ඵස්සායතනිකා නාම නිරයා. තත්ථ යං කිඤ්චි චක්ඛුනා රූපං පස්සති, අනිට්ඨරූපඤ්ඤෙව පස්සති නො ඉට්ඨරූපං, අකන්තරූපඤ්ඤෙව පස්සති නො කන්තරූපං, අමනාපරූපඤ්ඤෙව පස්සති නො මනාපරූපං. යං කිඤ්චි සොතෙන සද්දං සුණාති…පෙ… ඝානෙන ගන්ධං ඝායති… ජිව්හාය රසං සායති… කායෙන ඵොට්ඨබ්බං ඵුසති… මනසා ධම්මං විජානාති, අනිට්ඨරූපඤ්ඤෙව විජානාති නො ඉට්ඨරූපං, අකන්තරූපඤ්ඤෙව විජානාති නො කන්තරූපං, අමනාපරූපඤ්ඤෙව විජානාති නො මනාපරූප’’න්ති [සං. නි. 4.135]. අත්ථෙව සුත්තන්තොති? ආමන්තා. තෙන හි වත්තබ්බං [තෙන හි න වත්තබ්බං (ස්යා. ක.)] – ‘‘සබ්බෙ සඞ්ඛාරා අනොධිං කත්වා කුක්කුළා’’ති.

සබ්බෙ ¶ සඞ්ඛාරා අනොධිං කත්වා කුක්කුළාති? ආමන්තා. නනු වුත්තං භගවතා – ‘‘ලාභා වො, භික්ඛවෙ, සුලද්ධං වො, භික්ඛවෙ, ඛණො වො පටිලද්ධො බ්රහ්මචරියවාසාය! දිට්ඨා මයා, භික්ඛවෙ, ඡ ඵස්සායතනිකා ¶ නාම සග්ගා. තත්ථ යං කිඤ්චි චක්ඛුනා රූපං පස්සති, ඉට්ඨරූපඤ්ඤෙව ¶ පස්සති නො අනිට්ඨරූපං, කන්තරූපඤ්ඤෙව පස්සති නො අකන්තරූපං, මනාපරූපඤ්ඤෙව පස්සති නො අමනාපරූපං. යං කිඤ්චි සොතෙන සද්දං සුණාති…පෙ… ඝානෙන ගන්ධං ඝායති… ජිව්හාය රසං සායති… කායෙන ඵොට්ඨබ්බං ඵුසති… මනසා ධම්මං විජානාති, ඉට්ඨරූපඤ්ඤෙව විජානාති නො අනිට්ඨරූපං, කන්තරූපඤ්ඤෙව විජානාති ¶ නො අකන්තරූපං, මනාපරූපඤ්ඤෙව විජානාති නො අමනාපරූප’’න්ති [සං. නි. 4.135]. අත්ථෙව සුත්තන්තොති? ආමන්තා. තෙන හි න වත්තබ්බං – ‘‘සබ්බෙ සඞ්ඛාරා අනොධිං කත්වා කුක්කුළා’’ති.

න වත්තබ්බං – ‘‘සබ්බෙ සඞ්ඛාරා අනොධිං කත්වා කුක්කුළා’’ති? ආමන්තා. නනු ‘‘යදනිච්චං තං දුක්ඛං [සං. නි. 3.15],’’ වුත්තං භගවතා, ‘‘සබ්බෙ සඞ්ඛාරා අනිච්චා’’ති [ධ. ප. 277; ම. නි. 1.356]? ආමන්තා. හඤ්චි ‘‘යදනිච්චං තං දුක්ඛං,’’ වුත්තං භගවතා, ‘‘සබ්බෙ සඞ්ඛාරා අනිච්චා,’’ තෙන වත රෙ වත්තබ්බෙ – ‘‘සබ්බෙ සඞ්ඛාරා අනොධිං කත්වා කුක්කුළා’’ති.

සබ්බෙ සඞ්ඛාරා අනොධිං කත්වා කුක්කුළාති? ආමන්තා. දානං අනිට්ඨඵලං අකන්තඵලං අමනුඤ්ඤඵලං සෙචනකඵලං දුක්ඛුද්රයං දුක්ඛවිපාකන්ති? න හෙවං වත්තබ්බෙ.

සීලං…පෙ… උපොසථො…පෙ… භාවනා…පෙ… බ්රහ්මචරියං අනිට්ඨඵලං අකන්තඵලං අමනුඤ්ඤඵලං සෙචනකඵලං දුක්ඛුද්රයං දුක්ඛවිපාකන්ති? න හෙවං වත්තබ්බෙ.

නනු දානං ඉට්ඨඵලං කන්තඵලං මනුඤ්ඤඵලං අසෙචනකඵලං සුඛුද්රයං සුඛවිපාකන්ති ¶ ? ආමන්තා. හඤ්චි දානං ඉට්ඨඵලං කන්තඵලං මනුඤ්ඤඵලං අසෙචනකඵලං සුඛුද්රයං සුඛවිපාකං, නො ¶ ච වත රෙ වත්තබ්බෙ – ‘‘සබ්බෙ සඞ්ඛාරා අනොධිං කත්වා කුක්කුළා’’ති.

නනු සීලං… උපොසථො… භාවනා… බ්රහ්මචරියං ඉට්ඨඵලං කන්තඵලං මනුඤ්ඤඵලං අසෙචනකඵලං සුඛුද්රයං සුඛවිපාකන්ති? ආමන්තා. හඤ්චි බ්රහ්මචරියං ඉට්ඨඵලං කන්තඵලං මනුඤ්ඤඵලං අසෙචනකඵලං සුඛුද්රයං සුඛවිපාකන්ති, නො ච වත රෙ වත්තබ්බෙ – ‘‘සබ්බෙ සඞ්ඛාරා අනොධිං කත්වා කුක්කුළා’’ති.

සබ්බෙ ¶ සඞ්ඛාරා අනොධිං කත්වා කුක්කුළාති? ආමන්තා. නනු වුත්තං භගවතා –

‘‘සුඛො විවෙකො තුට්ඨස්ස, සුතධම්මස්ස පස්සතො;

අබ්යාපජ්ජං සුඛං ලොකෙ, පාණභූතෙසු සංයමො.

‘‘සුඛා ¶ විරාගතා ලොකෙ, කාමානං සමතික්කමො;

අස්මිමානස්ස යො විනයො, එතං වෙ පරමං සුඛං [මහාව. 5; උදා. 11 උදානෙ ච].

‘‘තං සුඛෙන සුඛං පත්තං, අච්චන්තසුඛමෙව තං;

තිස්සො විජ්ජා අනුප්පත්තා, එතං වෙ පරමං සුඛ’’න්ති.

අත්ථෙව සුත්තන්තොති? ආමන්තා. තෙන හි න වත්තබ්බං – ‘‘සබ්බෙ සඞ්ඛාරා අනොධිං කත්වා කුක්කුළා’’ති.

339. අනුපුබ්බාභිසමයොති ¶ ? ආමන්තා. අනුපුබ්බෙන ¶ සොතාපත්තිමග්ගං භාවෙතීති? න හෙවං වත්තබ්බෙ. අනුපුබ්බෙන සොතාපත්තිමග්ගං භාවෙතීති? ආමන්තා. අනුපුබ්බෙන සොතාපත්තිඵලං සච්ඡිකරොතීති? න හෙවං වත්තබ්බෙ.

අනුපුබ්බාභිසමයොති? ආමන්තා. අනුපුබ්බෙන සකදාගාමිමග්ගං භාවෙතීති? න හෙවං වත්තබ්බෙ. අනුපුබ්බෙන සකදාගාමිමග්ගං භාවෙතීති? ආමන්තා. අනුපුබ්බෙන සකදාගාමිඵලං සච්ඡිකරොතීති? න හෙවං වත්තබ්බෙ.

අනුපුබ්බාභිසමයොති? ආමන්තා. අනුපුබ්බෙන අනාගාමිමග්ගං භාවෙතීති? න හෙවං වත්තබ්බෙ. අනුපුබ්බෙන අනාගාමිමග්ගං භාවෙතීති? ආමන්තා. අනුපුබ්බෙන අනාගාමිඵලං සච්ඡිකරොතීති? න හෙවං වත්තබ්බෙ.

අනුපුබ්බාභිසමයොති ¶ ? ආමන්තා. අනුපුබ්බෙන අරහත්තමග්ගං භාවෙතීති? න හෙවං වත්තබ්බෙ. අනුපුබ්බෙන අරහත්තමග්ගං භාවෙතීති? ආමන්තා. අනුපුබ්බෙන අරහත්තඵලං සච්ඡිකරොතීති? න හෙවං වත්තබ්බෙ.

340. සොතාපත්තිඵලසච්ඡිකිරියාය ¶ පටිපන්නො පුග්ගලො දුක්ඛදස්සනෙන කිං ජහතීති? සක්කායදිට්ඨිං, විචිකිච්ඡං, සීලබ්බතපරාමාසං, තදෙකට්ඨෙ ච කිලෙසෙ ¶ චතුභාගං ජහතීති. චතුභාගං සොතාපන්නො, චතුභාගං න සොතාපන්නො, චතුභාගං සොතාපත්තිඵලප්පත්තො පටිලද්ධො අධිගතො සච්ඡිකතො ¶ උපසම්පජ්ජ විහරති, කායෙන ඵුසිත්වා විහරති, චතුභාගං න කායෙන ඵුසිත්වා විහරති, චතුභාගං සත්තක්ඛත්තුපරමො කොලඞ්කොලො එකබීජී බුද්ධෙ අවෙච්චප්පසාදෙන සමන්නාගතො, ධම්මෙ…පෙ… සඞ්ඝෙ…පෙ… අරියකන්තෙහි සීලෙහි සමන්නාගතො චතුභාගං න අරියකන්තෙහි සීලෙහි සමන්නාගතොති? න හෙවං වත්තබ්බෙ.

සමුදයදස්සනෙන…පෙ… නිරොධදස්සනෙන…පෙ… මග්ගදස්සනෙන කිං ජහතීති? සක්කායදිට්ඨිං, විචිකිච්ඡං, සීලබ්බතපරාමාසං, තදෙකට්ඨෙ ච කිලෙසෙ චතුභාගං ජහතීති. චතුභාගං සොතාපන්නො, චතුභාගං න සොතාපන්නො, චතුභාගං සොතාපත්තිඵලප්පත්තො පටිලද්ධො අධිගතො සච්ඡිකතො උපසම්පජ්ජ විහරති, කායෙන ඵුසිත්වා විහරති, චතුභාගං න කායෙන ඵුසිත්වා විහරති, චතුභාගං සත්තක්ඛත්තුපරමො කොලඞ්කොලො එකබීජී බුද්ධෙ අවෙච්චප්පසාදෙන සමන්නාගතො, ධම්මෙ…පෙ… සඞ්ඝෙ…පෙ… අරියකන්තෙහි සීලෙහි සමන්නාගතො, චතුභාගං න අරියකන්තෙහි සීලෙහි සමන්නාගතොති? න හෙවං වත්තබ්බෙ…පෙ….

341. සකදාගාමිඵලසච්ඡිකිරියාය පටිපන්නො පුග්ගලො දුක්ඛදස්සනෙන කිං ජහතීති? ඔළාරිකං කාමරාගං, ඔළාරිකං බ්යාපාදං, තදෙකට්ඨෙ ච කිලෙසෙ චතුභාගං ජහතීති. චතුභාගං සකදාගාමී, චතුභාගං න සකදාගාමී, චතුභාගං සකදාගාමිඵලප්පත්තො පටිලද්ධො අධිගතො සච්ඡිකතො උපසම්පජ්ජ විහරති, කායෙන ඵුසිත්වා විහරති, චතුභාගං න කායෙන ¶ ඵුසිත්වා විහරතීති? න හෙවං වත්තබ්බෙ…පෙ… සමුදයදස්සනෙන…පෙ… නිරොධදස්සනෙන…පෙ… මග්ගදස්සනෙන කිං ජහතීති? ඔළාරිකං කාමරාගං, ඔළාරිකං බ්යාපාදං, තදෙකට්ඨෙ ච කිලෙසෙ චතුභාගං ජහතීති. චතුභාගං සකදාගාමී, චතුභාගං න සකදාගාමී, චතුභාගං සකදාගාමිඵලප්පත්තො පටිලද්ධො අධිගතො සච්ඡිකතො ¶ උපසම්පජ්ජ විහරති ¶ , කායෙන ඵුසිත්වා විහරති, චතුභාගං න කායෙන ඵුසිත්වා විහරතීති? න හෙවං වත්තබ්බෙ…පෙ….

342. අනාගාමිඵලසච්ඡිකිරියාය ¶ පටිපන්නො පුග්ගලො දුක්ඛදස්සනෙන කිං ජහතීති? අණුසහගතං කාමරාගං, අණුසහගතං බ්යාපාදං, තදෙකට්ඨෙ ච කිලෙසෙ චතුභාගං ජහතීති. චතුභාගං අනාගාමී, චතුභාගං න අනාගාමී, චතුභාගං අනාගාමිඵලප්පත්තො පටිලද්ධො අධිගතො සච්ඡිකතො උපසම්පජ්ජ විහරති, කායෙන ඵුසිත්වා විහරති, චතුභාගං න කායෙන ඵුසිත්වා විහරති, චතුභාගං අන්තරාපරිනිබ්බායී…පෙ… උපහච්චපරිනිබ්බායී… අසඞ්ඛාරපරිනිබ්බායී… සසඞ්ඛාරපරිනිබ්බායී… උද්ධංසොතො අකනිට්ඨගාමී, චතුභාගං න උද්ධංසොතො න අකනිට්ඨගාමීති? න හෙවං වත්තබ්බෙ…පෙ….

සමුදයදස්සනෙන…පෙ… නිරොධදස්සනෙන…පෙ… මග්ගදස්සනෙන කිං ජහතීති? අණුසහගතං කාමරාගං, අණුසහගතං බ්යාපාදං, තදෙකට්ඨෙ ච කිලෙසෙ චතුභාගං ජහතීති. චතුභාගං අනාගාමී, චතුභාගං න අනාගාමී, චතුභාගං අනාගාමිඵලප්පත්තො පටිලද්ධො අධිගතො සච්ඡිකතො උපසම්පජ්ජ විහරති, කායෙන ¶ ඵුසිත්වා විහරති, චතුභාගං න කායෙන ඵුසිත්වා විහරති, චතුභාගං අන්තරාපරිනිබ්බායී…පෙ… උපහච්චපරිනිබ්බායී… අසඞ්ඛාරපරිනිබ්බායී… සසඞ්ඛාරපරිනිබ්බායී… උද්ධංසොතො අකනිට්ඨගාමී, චතුභාගං න උද්ධංසොතො අකනිට්ඨගාමීති? න හෙවං වත්තබ්බෙ…පෙ….

343. අරහත්තසච්ඡිකිරියාය පටිපන්නො පුග්ගලො දුක්ඛදස්සනෙන කිං ජහතීති? රූපරාගං, අරූපරාගං, මානං, උද්ධච්චං, අවිජ්ජං, තදෙකට්ඨෙ ච කිලෙසෙ චතුභාගං ජහතීති. චතුභාගං අරහා, චතුභාගං න අරහා, චතුභාගං අරහත්තප්පත්තො පටිලද්ධො අධිගතො සච්ඡිකතො උපසම්පජ්ජ විහරති, කායෙන ඵුසිත්වා විහරති, චතුභාගං න කායෙන ¶ ඵුසිත්වා විහරති, චතුභාගං වීතරාගො…පෙ… වීතදොසො… වීතමොහො…පෙ… කතකරණීයො ඔහිතභාරො අනුප්පත්තසදත්ථො පරික්ඛීණභවසංයොජනො සම්මදඤ්ඤාවිමුත්තො උක්ඛිත්තපලිඝො සඞ්කිණ්ණපරිඛො අබ්බූළ්හෙසිකො නිරග්ගළො අරියො පන්නද්ධජො පන්නභාරො විසඤ්ඤුත්තො සුවිජිතවිජයො, දුක්ඛං තස්ස පරිඤ්ඤාතං, සමුදයො පහීනො, නිරොධො සච්ඡිකතො, මග්ගො භාවිතො, අභිඤ්ඤෙය්යං අභිඤ්ඤාතං, පරිඤ්ඤෙය්යං පරිඤ්ඤාතං, පහාතබ්බං පහීනං, භාවෙතබ්බං භාවිතං…පෙ… සච්ඡිකාතබ්බං ¶ සච්ඡිකතං, චතුභාගං සච්ඡිකාතබ්බං න සච්ඡිකතන්ති? න හෙවං වත්තබ්බෙ…පෙ….

සමුදයදස්සනෙන ¶ … නිරොධදස්සනෙන… මග්ගදස්සනෙන කිං ජහතීති? රූපරාගං, අරූපරාගං, මානං, උද්ධච්චං, අවිජ්ජං, තදෙකට්ඨෙ ච කිලෙසෙ චතුභාගං ජහතීති. චතුභාගං අරහා, චතුභාගං න අරහා, චතුභාගං අරහත්තප්පත්තො ¶ පටිලද්ධො අධිගතො සච්ඡිකතො උපසම්පජ්ජ විහරති, කායෙන ඵුසිත්වා විහරති, චතුභාගං න කායෙන ඵුසිත්වා විහරති, චතුභාගං වීතරාගො… වීතදොසො… වීතමොහො… කතකරණීයො ඔහිතභාරො අනුප්පත්තසදත්ථො පරික්ඛීණභවසංයොජනො සම්මදඤ්ඤාවිමුත්තො උක්ඛිත්තපලිඝො සඞ්කිණ්ණපරිඛො අබ්බූළ්හෙසිකො නිරග්ගළො අරියො පන්නද්ධජො පන්නභාරො විසඤ්ඤුත්තො සුවිජිතවිජයො, දුක්ඛං තස්ස පරිඤ්ඤාතං, සමුදයො පහීනො, නිරොධො සච්ඡිකතො, මග්ගො භාවිතො, අභිඤ්ඤෙය්යං අභිඤ්ඤාතං, පරිඤ්ඤෙය්යං පරිඤ්ඤාතං, පහාතබ්බං පහීනං, භාවෙතබ්බං භාවිතං…පෙ… සච්ඡිකාතබ්බං සච්ඡිකතං, චතුභාගං සච්ඡිකාතබ්බං න සච්ඡිකතන්ති? න හෙවං වත්තබ්බෙ…පෙ….

344. සොතාපත්තිඵලසච්ඡිකිරියාය පටිපන්නො පුග්ගලො දුක්ඛං දක්ඛන්තො පටිපන්නකොති වත්තබ්බොති? ආමන්තා. දුක්ඛෙ දිට්ඨෙ ඵලෙ ඨිතොති වත්තබ්බොති? න හෙවං වත්තබ්බෙ. සමුදයං දක්ඛන්තො…පෙ… නිරොධං දක්ඛන්තො පටිපන්නකොති වත්තබ්බොති? ආමන්තා ¶ . නිරොධෙ දිට්ඨෙ ඵලෙ ඨිතොති වත්තබ්බොති? න හෙවං වත්තබ්බෙ.

සොතාපත්තිඵලසච්ඡිකිරියාය පටිපන්නො පුග්ගලො මග්ගං දක්ඛන්තො පටිපන්නකොති වත්තබ්බො, මග්ගෙ දිට්ඨෙ ඵලෙ ඨිතොති වත්තබ්බොති? ආමන්තා. දුක්ඛං දක්ඛන්තො පටිපන්නකොති වත්තබ්බො, දුක්ඛෙ දිට්ඨෙ ඵලෙ ඨිතොති වත්තබ්බොති? න හෙවං වත්තබ්බෙ…පෙ… මග්ගං ¶ දක්ඛන්තො පටිපන්නකොති වත්තබ්බො, මග්ගෙ දිට්ඨෙ ඵලෙ ඨිතොති වත්තබ්බොති? ආමන්තා. සමුදයං දක්ඛන්තො…පෙ… නිරොධං දක්ඛන්තො පටිපන්නකොති වත්තබ්බො, නිරොධෙ දිට්ඨෙ ඵලෙ ඨිතොති වත්තබ්බොති? න හෙවං වත්තබ්බෙ…පෙ….

සොතාපත්තිඵලසච්ඡිකිරියාය පටිපන්නො පුග්ගලො දුක්ඛං දක්ඛන්තො පටිපන්නකොති වත්තබ්බො, දුක්ඛෙ දිට්ඨෙ න වත්තබ්බං – ‘‘ඵලෙ ඨිතොති වත්තබ්බො’’ති? ආමන්තා. මග්ගං දක්ඛන්තො පටිපන්නකොති වත්තබ්බො, මග්ගෙ දිට්ඨෙ න වත්තබ්බං – ‘‘ඵලෙ ඨිතොති වත්තබ්බො’’ති? න හෙවං වත්තබ්බෙ…පෙ… සමුදයං දක්ඛන්තො… නිරොධං දක්ඛන්තො පටිපන්නකොති ¶ වත්තබ්බො, නිරොධෙ දිට්ඨෙ න වත්තබ්බං – ‘‘ඵලෙ ඨිතොති වත්තබ්බො’’ති? ආමන්තා. මග්ගං දක්ඛන්තො ‘‘පටිපන්නකො’’ති ¶ වත්තබ්බො, මග්ගෙ දිට්ඨෙ න වත්තබ්බං – ‘‘ඵලෙ ඨිතොති වත්තබ්බො’’ති? න හෙවං වත්තබ්බෙ…පෙ….

[සකවාදීපුච්ඡාලක්ඛණං] සොතාපත්තිඵලසච්ඡිකිරියාය පටිපන්නො පුග්ගලො දුක්ඛං දක්ඛන්තො පටිපන්නකොති වත්තබ්බො, දුක්ඛෙ දිට්ඨෙ න වත්තබ්බං – ‘‘ඵලෙ ඨිතොති වත්තබ්බො’’ති? ආමන්තා. නිරත්ථියං දුක්ඛදස්සනන්ති? න ¶ හෙවං වත්තබ්බෙ…පෙ… සමුදයං දක්ඛන්තො…පෙ… නිරොධං දක්ඛන්තො පටිපන්නකොති වත්තබ්බො, නිරොධෙ දිට්ඨෙ න වත්තබ්බං – ‘‘ඵලෙ ඨිතොති වත්තබ්බො’’ති? ආමන්තා. නිරත්ථියං නිරොධදස්සනන්ති? න හෙවං වත්තබ්බෙ…පෙ….

345. [පරවාදීපුච්ඡාලක්ඛණං] දුක්ඛෙ ¶ දිට්ඨෙ චත්තාරි සච්චානි දිට්ඨානි හොන්තීති? ආමන්තා. දුක්ඛසච්චං චත්තාරි සච්චානීති? න හෙවං වත්තබ්බෙ…පෙ….

[සකවාදීපුච්ඡාලක්ඛණං] රූපක්ඛන්ධෙ අනිච්චතො දිට්ඨෙ පඤ්චක්ඛන්ධා අනිච්චතො දිට්ඨා හොන්තීති? ආමන්තා. රූපක්ඛන්ධො පඤ්චක්ඛන්ධාති? න හෙවං වත්තබ්බෙ…පෙ….

[සකවාදීපුච්ඡාලක්ඛණං] චක්ඛායතනෙ අනිච්චතො දිට්ඨෙ ද්වාදසායතනානි අනිච්චතො දිට්ඨානි හොන්තීති? ආමන්තා. චක්ඛායතනං ද්වාදසායතනානීති? න හෙවං වත්තබ්බෙ…පෙ….

[සකවාදීපුච්ඡාලක්ඛණං] චක්ඛුධාතුයා අනිච්චතො දිට්ඨාය අට්ඨාරස ධාතුයො අනිච්චතො දිට්ඨා හොන්තීති? ආමන්තා. චක්ඛුධාතු අට්ඨාරස ධාතුයොති? න හෙවං වත්තබ්බෙ…පෙ….

[සකවාදීපුච්ඡාලක්ඛණං] චක්ඛුන්ද්රියෙ අනිච්චතො දිට්ඨෙ බාවීසතින්ද්රියානි අනිච්චතො දිට්ඨානි හොන්තීති? ආමන්තා. චක්ඛුන්ද්රියං බාවීසතින්ද්රියානීති? න හෙවං වත්තබ්බෙ…පෙ….

[සකවාදීපුච්ඡාලක්ඛණං] චතූහි ඤාණෙහි සොතාපත්තිඵලං සච්ඡිකරොතීති? ආමන්තා. චත්තාරි සොතාපත්තිඵලානීති? න හෙවං වත්තබ්බෙ…පෙ… අට්ඨහි ඤාණෙහි සොතාපත්තිඵලං සච්ඡිකරොතීති? ආමන්තා ¶ ¶ . අට්ඨ සොතාපත්තිඵලානීති? න හෙවං වත්තබ්බෙ…පෙ… ද්වාදසහි ඤාණෙහි සොතාපත්තිඵලං සච්ඡිකරොතීති? ආමන්තා. ද්වාදස සොතාපත්තිඵලානීති? න හෙවං වත්තබ්බෙ…පෙ… චතුචත්තාරීසාය ඤාණෙහි සොතාපත්තිඵලං සච්ඡිකරොතීති ¶ ? ආමන්තා. චතුචත්තාරීසං සොතාපත්තිඵලානීති? න හෙවං වත්තබ්බෙ…පෙ… සත්තසත්තතියා ඤාණෙහි සොතාපත්තිඵලං සච්ඡිකරොතීති? ආමන්තා. සත්තසත්තති සොතාපත්තිඵලානීති? න හෙවං වත්තබ්බෙ…පෙ….

346. න ¶ වත්තබ්බං – ‘‘අනුපුබ්බාභිසමයො’’ති? ආමන්තා. නනු වුත්තං භගවතා – ‘‘සෙය්යථාපි, භික්ඛවෙ, මහාසමුද්දො අනුපුබ්බනින්නො අනුපුබ්බපොණො අනුපුබ්බපබ්භාරො, න ආයතකෙනෙව පපාතො; එවමෙව ඛො, භික්ඛවෙ, ඉමස්මිං ධම්මවිනයෙ අනුපුබ්බසික්ඛා අනුපුබ්බකිරියා අනුපුබ්බපටිපදා, න ආයතකෙනෙව අඤ්ඤාපටිවෙධො’’ති [චූළව. 385; අ. නි. 8.20; උදා. 45 උදානෙ ච]. අත්ථෙව සුත්තන්තොති? ආමන්තා. තෙන හි අනුපුබ්බාභිසමයොති.

න වත්තබ්බං – ‘‘අනුපුබ්බාභිසමයො’’ති? ආමන්තා. නනු වුත්තං භගවතා –

‘‘අනුපුබ්බෙන මෙධාවී, ථොකං ථොකං ඛණෙ ඛණෙ;

කම්මාරො රජතස්සෙව, නිද්ධමෙ මලමත්තනො’’ති [ධ. ප. 239 ධම්මපදෙ].

අත්ථෙව සුත්තන්තොති? ආමන්තා. තෙන හි අනුපුබ්බාභිසමයොති.

අනුපුබ්බාභිසමයොති ¶ ? ආමන්තා. නන්වායස්මා ගවම්පති ථෙරො භික්ඛූ එතදවොච – ‘‘සම්මුඛා මෙතං, ආවුසො, භගවතො සුතං සම්මුඛා පටිග්ගහිතං – ‘යො, භික්ඛවෙ, දුක්ඛං පස්සති දුක්ඛසමුදයම්පි සො පස්සති, දුක්ඛනිරොධම්පි පස්සති, දුක්ඛනිරොධගාමිනිං ¶ පටිපදම්පි පස්සති; යො දුක්ඛසමුදයං පස්සති දුක්ඛම්පි සො පස්සති, දුක්ඛනිරොධම්පි පස්සති, දුක්ඛනිරොධගාමිනිං පටිපදම්පි පස්සති; යො දුක්ඛනිරොධං පස්සති දුක්ඛම්පි සො පස්සති, දුක්ඛසමුදයම්පි පස්සති, දුක්ඛනිරොධගාමිනිං පටිපදම්පි පස්සති; යො දුක්ඛනිරොධගාමිනිං පටිපදං පස්සති දුක්ඛම්පි සො පස්සති, දුක්ඛසමුදයම්පි පස්සති, දුක්ඛනිරොධම්පි පස්සතී’’’ති [සං. නි. 5.1100]! අත්ථෙව සුත්තන්තොති? ආමන්තා. තෙන හි න වත්තබ්බං – ‘‘අනුපුබ්බාභිසමයො’’ති.

අනුපුබ්බාභිසමයොති ¶ ? ආමන්තා. නනු වුත්තං භගවතා –

සක්කායදිට්ඨී විචිකිච්ඡිතඤ්ච,

ඡච්චාභිඨානානි අභබ්බ කාතු’’න්ති.

අත්ථෙව ¶ සුත්තන්තොති? ආමන්තා. තෙන හි න වත්තබ්බං – ‘‘අනුපුබ්බාභිසමයො’’ති.

අනුපුබ්බාභිසමයොති? ආමන්තා. නනු වුත්තං භගවතා – ‘‘යස්මිං, භික්ඛවෙ, සමයෙ අරියසාවකස්ස විරජං වීතමලං ධම්මචක්ඛුං උදපාදි – ‘යං කිඤ්චි සමුදයධම්මං සබ්බං තං නිරොධධම්ම’න්ති, සහ දස්සනුප්පාදා, භික්ඛවෙ, අරියසාවකස්ස තීණි සංයොජනානි පහීයන්ති – සක්කායදිට්ඨි, විචිකිච්ඡා, සීලබ්බතපරාමාසො’’ති! අත්ථෙව සුත්තන්තොති? ආමන්තා. තෙන හි න වත්තබ්බං – ‘‘අනුපුබ්බාභිසමයො’’ති.

347. බුද්ධස්ස ¶ ¶ භගවතො වොහාරො ලොකුත්තරොති? ආමන්තා. ලොකුත්තරෙ සොතෙ පටිහඤ්ඤති නො ලොකියෙ, ලොකුත්තරෙන විඤ්ඤාණෙන පටිවිජානන්ති නො ලොකියෙන, සාවකා පටිවිජානන්ති නො පුථුජ්ජනාති? න හෙවං වත්තබ්බෙ…පෙ….

නනු ¶ බුද්ධස්ස භගවතො වොහාරො ලොකියෙ සොතෙ පටිහඤ්ඤතීති? ආමන්තා. හඤ්චි බුද්ධස්ස භගවතො වොහාරො ලොකියෙ සොතෙ පටිහඤ්ඤති, නො ච වත රෙ වත්තබ්බෙ – ‘‘බුද්ධස්ස භගවතො වොහාරො ලොකුත්තරො’’ති.

නනු බුද්ධස්ස භගවතො වොහාරං ලොකියෙන විඤ්ඤාණෙන පටිවිජානන්තීති? ආමන්තා. හඤ්චි බුද්ධස්ස භගවතො වොහාරං ලොකියෙන විඤ්ඤාණෙන පටිවිජානන්ති, නො ච වත රෙ වත්තබ්බෙ – ‘‘බුද්ධස්ස භගවතො වොහාරො ලොකුත්තරො’’ති.

නනු බුද්ධස්ස භගවතො වොහාරං පුථුජ්ජනා පටිවිජානන්තීති? ආමන්තා. හඤ්චි බුද්ධස්ස භගවතො වොහාරං පුථුජ්ජනා පටිවිජානන්ති, නො ච වත රෙ වත්තබ්බෙ – ‘‘බුද්ධස්ස භගවතො වොහාරො ලොකුත්තරො’’ති.

348. බුද්ධස්ස ¶ භගවතො වොහාරො ලොකුත්තරොති? ආමන්තා. මග්ගො ඵලං නිබ්බානං, සොතාපත්තිමග්ගො සොතාපත්තිඵලං, සකදාගාමිමග්ගො සකදාගාමිඵලං, අනාගාමිමග්ගො අනාගාමිඵලං, අරහත්තමග්ගො අරහත්තඵලං, සතිපට්ඨානං ¶ සම්මප්පධානං ඉද්ධිපාදො ඉන්ද්රියං බලං බොජ්ඣඞ්ගොති? න හෙවං වත්තබ්බෙ…පෙ….

බුද්ධස්ස භගවතො වොහාරො ලොකුත්තරොති? ආමන්තා. අත්ථි කෙචි බුද්ධස්ස භගවතො වොහාරං සුණන්තීති? ආමන්තා. ලොකුත්තරො ¶ ධම්මො සොතවිඤ්ඤෙය්යො, සොතස්මිං පටිහඤ්ඤති, සොතස්ස ආපාථං ආගච්ඡතීති? න හෙවං වත්තබ්බෙ…පෙ….

නනු ලොකුත්තරො ධම්මො න සොතවිඤ්ඤෙය්යො, න සොතස්මිං පටිහඤ්ඤති, න සොතස්ස ආපාථං ආගච්ඡතීති? ආමන්තා. හඤ්චි ලොකුත්තරො ධම්මො න සොතවිඤ්ඤෙය්යො, න සොතස්මිං පටිහඤ්ඤති, න සොතස්ස ආපාථං ආගච්ඡති, නො ච වත රෙ වත්තබ්බෙ – ‘‘බුද්ධස්ස භගවතො වොහාරො ලොකුත්තරො’’ති.

349. බුද්ධස්ස භගවතො වොහාරො ලොකුත්තරොති? ආමන්තා. අත්ථි කෙචි බුද්ධස්ස භගවතො ¶ වොහාරෙ රජ්ජෙය්යුන්ති? ආමන්තා. ලොකුත්තරො ධම්මො රාගට්ඨානියො රජනීයො කමනීයො මදනීයො බන්ධනීයො මුච්ඡනීයොති? න හෙවං වත්තබ්බෙ…පෙ….

නනු ලොකුත්තරො ධම්මො න රාගට්ඨානියො න රජනීයො න කමනීයො න මදනීයො න බන්ධනීයො න මුච්ඡනීයොති? ආමන්තා. හඤ්චි ලොකුත්තරො ධම්මො න රාගට්ඨානියො න රජනීයො න කමනීයො න මදනීයො න බන්ධනීයො න මුච්ඡනීයො, නො ච වත රෙ වත්තබ්බෙ – ‘‘බුද්ධස්ස භගවතො වොහාරො ලොකුත්තරො’’ති.

බුද්ධස්ස ¶ භගවතො වොහාරො ලොකුත්තරොති? ආමන්තා. අත්ථි කෙචි බුද්ධස්ස භගවතො වොහාරෙ දුස්සෙය්යුන්ති? ආමන්තා. ලොකුත්තරො ධම්මො දොසට්ඨානියො කොපට්ඨානියො පටිඝට්ඨානියොති? න හෙවං වත්තබ්බෙ…පෙ….

නනු ලොකුත්තරො ධම්මො න දොසට්ඨානියො න කොපට්ඨානියො න පටිඝට්ඨානියොති? ආමන්තා. හඤ්චි ලොකුත්තරො ධම්මො න දොසට්ඨානියො න ¶ කොපට්ඨානියො ¶ න පටිඝට්ඨානියො, නො ච වත රෙ වත්තබ්බෙ – ‘‘බුද්ධස්ස භගවතො වොහාරො ලොකුත්තරො’’ති.

බුද්ධස්ස භගවතො වොහාරො ලොකුත්තරොති? ආමන්තා. අත්ථි කෙචි බුද්ධස්ස භගවතො වොහාරෙ මුය්හෙය්යුන්ති? ආමන්තා. ලොකුත්තරො ධම්මො මොහට්ඨානියො අඤ්ඤාණකරණො අචක්ඛුකරණො පඤ්ඤානිරොධිකො විඝාතපක්ඛිකො අනිබ්බානසංවත්තනිකොති? න හෙවං වත්තබ්බෙ…පෙ….

නනු ලොකුත්තරො ධම්මො න මොහට්ඨානියො න අඤ්ඤාණකරණො න අචක්ඛුකරණො පඤ්ඤාවුද්ධිකො අවිඝාතපක්ඛිකො නිබ්බානසංවත්තනිකොති? ආමන්තා. හඤ්චි ලොකුත්තරො ධම්මො න මොහට්ඨානියො න අඤ්ඤාණකරණො න අචක්ඛුකරණො පඤ්ඤාවුද්ධිකො අවිඝාතපක්ඛිකො නිබ්බානසංවත්තනිකො, නො ච වත රෙ වත්තබ්බෙ – ‘‘බුද්ධස්ස භගවතො වොහාරො ලොකුත්තරො’’ති.

350. බුද්ධස්ස භගවතො වොහාරො ලොකුත්තරොති? ආමන්තා. යෙ ¶ කෙචි බුද්ධස්ස භගවතො වොහාරං සුණන්ති, සබ්බෙ තෙ මග්ගං භාවෙන්තීති? න හෙවං වත්තබ්බෙ…පෙ….

යෙ ¶ කෙචි බුද්ධස්ස භගවතො වොහාරං සුණන්ති, සබ්බෙ තෙ මග්ගං භාවෙන්තීති? ආමන්තා. බාලපුථුජ්ජනා බුද්ධස්ස භගවතො වොහාරං සුණන්ති, බාලපුථුජ්ජනා මග්ගං භාවෙන්තීති? න හෙවං වත්තබ්බෙ…පෙ… මාතුඝාතකො මග්ගං භාවෙති…පෙ… පිතුඝාතකො… අරහන්තඝාතකො… රුහිරුප්පාදකො… සඞ්ඝභෙදකො බුද්ධස්ස භගවතො වොහාරං සුණාති, සඞ්ඝභෙදකො මග්ගං භාවෙතීති? න හෙවං වත්තබ්බෙ…පෙ….

351. ලබ්භා ¶ සොවණ්ණමයාය ලට්ඨියා ධඤ්ඤපුඤ්ජොපි සුවණ්ණපුඤ්ජොපි ආචික්ඛිතුන්ති? ආමන්තා. එවමෙවං භගවා ලොකුත්තරෙන වොහාරෙන ලොකියම්පි ලොකුත්තරම්පි ධම්මං වොහරතීති.

ලබ්භා එලණ්ඩියාය ලට්ඨියා ධඤ්ඤපුඤ්ජොපි සුවණ්ණපුඤ්ජොපි ආචික්ඛිතුන්ති? ආමන්තා. එවමෙවං භගවා ලොකියෙන වොහාරෙන ලොකියම්පි ලොකුත්තරම්පි ධම්මං වොහරතීති.

352. බුද්ධස්ස ¶ භගවතො වොහාරො ලොකියං වොහරන්තස්ස ලොකියො හොති, ලොකුත්තරං වොහරන්තස්ස ලොකුත්තරො හොතීති? ආමන්තා. ලොකියං වොහරන්තස්ස ලොකියෙ සොතෙ පටිහඤ්ඤති, ලොකුත්තරං වොහරන්තස්ස ලොකුත්තරෙ සොතෙ පටිහඤ්ඤති; ලොකියං වොහරන්තස්ස ලොකියෙන විඤ්ඤාණෙන පටිවිජානන්ති, ලොකුත්තරං වොහරන්තස්ස ලොකුත්තරෙන විඤ්ඤාණෙන පටිවිජානන්ති; ලොකියං වොහරන්තස්ස පුථුජ්ජනා පටිවිජානන්ති ¶ , ලොකුත්තරං වොහරන්තස්ස සාවකා පටිවිජානන්තීති? න හෙවං වත්තබ්බෙ…පෙ….

න වත්තබ්බං – ‘‘බුද්ධස්ස භගවතො වොහාරො ලොකියං වොහරන්තස්ස ලොකියො හොති, ලොකුත්තරං වොහරන්තස්ස ලොකුත්තරො හොතීති? ආමන්තා. නනු භගවා ලොකියම්පි ලොකුත්තරම්පි ධම්මං වොහරතීති? ආමන්තා. හඤ්චි භගවා ලොකියම්පි ලොකුත්තරම්පි ධම්මං වොහරති, තෙන වත රෙ වත්තබ්බෙ – ‘‘බුද්ධස්ස භගවතො වොහාරො ලොකියං වොහරන්තස්ස ලොකියො හොති, ලොකුත්තරං වොහරන්තස්ස ලොකුත්තරො හොතී’’ති.

බුද්ධස්ස භගවතො වොහාරො ලොකියං වොහරන්තස්ස ලොකියො හොති, ලොකුත්තරං වොහරන්තස්ස ලොකුත්තරො හොතීති? ආමන්තා. මග්ගං වොහරන්තස්ස මග්ගො හොති, අමග්ගං වොහරන්තස්ස ¶ අමග්ගො ¶ හොති, ඵලං වොහරන්තස්ස ඵලං හොති, අඵලං වොහරන්තස්ස අඵලං හොති, නිබ්බානං වොහරන්තස්ස නිබ්බානං හොති, අනිබ්බානං වොහරන්තස්ස අනිබ්බානං හොති, සඞ්ඛතං වොහරන්තස්ස සඞ්ඛතං හොති, අසඞ්ඛතං වොහරන්තස්ස අසඞ්ඛතං හොති, රූපං වොහරන්තස්ස රූපං හොති, අරූපං වොහරන්තස්ස අරූපං හොති, වෙදනං වොහරන්තස්ස වෙදනා හොති, අවෙදනං වොහරන්තස්ස අවෙදනා හොති, සඤ්ඤං වොහරන්තස්ස සඤ්ඤා හොති, අසඤ්ඤං වොහරන්තස්ස අසඤ්ඤා හොති, සඞ්ඛාරෙ වොහරන්තස්ස සඞ්ඛාරා හොන්ති, අසඞ්ඛාරෙ වොහරන්තස්ස අසඞ්ඛාරා හොන්ති, විඤ්ඤාණං වොහරන්තස්ස විඤ්ඤාණං හොති, අවිඤ්ඤාණං වොහරන්තස්ස අවිඤ්ඤාණං හොතීති ¶ ? න හෙවං වත්තබ්බෙ…පෙ….

353. ද්වෙ ¶ නිරොධාති? ආමන්තා. ද්වෙ දුක්ඛනිරොධාති? න හෙවං වත්තබ්බෙ…පෙ… ද්වෙ දුක්ඛනිරොධාති? ආමන්තා. ද්වෙ නිරොධසච්චානීති? න හෙවං වත්තබ්බෙ…පෙ… ද්වෙ නිරොධසච්චානීති? ආමන්තා. ද්වෙ දුක්ඛසච්චානීති? න හෙවං වත්තබ්බෙ…පෙ… ද්වෙ නිරොධසච්චානීති? ආමන්තා. ද්වෙ සමුදයසච්චානීති? න හෙවං වත්තබ්බෙ…පෙ… ද්වෙ නිරොධසච්චානීති? ආමන්තා. ද්වෙ ¶ මග්ගසච්චානීති? න හෙවං වත්තබ්බෙ…පෙ….

ද්වෙ නිරොධසච්චානීති? ආමන්තා. ද්වෙ තාණානි…පෙ… ද්වෙ ලෙණානි… ද්වෙ සරණානි… ද්වෙ පරායණානි… ද්වෙ අච්චුතානි… ද්වෙ අමතානි… ද්වෙ නිබ්බානානීති? න හෙවං වත්තබ්බෙ…පෙ….

ද්වෙ නිබ්බානානීති? ආමන්තා. අත්ථි ද්වින්නං නිබ්බානානං උච්චනීචතා හීනපණීතතා උක්කංසාවකංසො සීමා වා භෙදො වා රාජි වා අන්තරිකා වාති? න හෙවං වත්තබ්බෙ…පෙ….

ද්වෙ නිරොධාති? ආමන්තා. නනු අප්පටිසඞ්ඛානිරුද්ධෙ සඞ්ඛාරෙ පටිසඞ්ඛා නිරොධෙන්තීති? ආමන්තා. හඤ්චි අප්පටිසඞ්ඛානිරුද්ධෙ සඞ්ඛාරෙ ¶ පටිසඞ්ඛා නිරොධෙන්ති, නො ච වත රෙ වත්තබ්බෙ – ‘‘ද්වෙ නිරොධා’’ති.

න වත්තබ්බං – ‘‘ද්වෙ නිරොධා’’ති? ආමන්තා. නනු අප්පටිසඞ්ඛානිරුද්ධාපි සඞ්ඛාරා අච්චන්තභග්ගා, පටිසඞ්ඛානිරුද්ධාපි සඞ්ඛාරා අච්චන්තභග්ගාති? ආමන්තා. හඤ්චි අප්පටිසඞ්ඛානිරුද්ධාපි සඞ්ඛාරා අච්චන්තභග්ගා, පටිසඞ්ඛානිරුද්ධාපි සඞ්ඛාරා අච්චන්තභග්ගා, තෙන වත රෙ වත්තබ්බෙ – ‘‘ද්වෙ නිරොධා’’ති.

ද්වෙ ¶ නිරොධාති? ආමන්තා. පටිසඞ්ඛානිරුද්ධාපි [පටිසඞ්ඛානිරුද්ධා (?)] සඞ්ඛාරා අරියමග්ගං ආගම්ම නිරුද්ධාති? ආමන්තා. අප්පටිසඞ්ඛානිරුද්ධා ¶ සඞ්ඛාරා අරියමග්ගං ආගම්ම නිරුද්ධාති? න හෙවං වත්තබ්බෙ…පෙ….

ද්වෙ ¶ නිරොධාති? ආමන්තා. පටිසඞ්ඛානිරුද්ධා සඞ්ඛාරා න පුන උප්පජ්ජන්තීති? ආමන්තා. අප්පටිසඞ්ඛානිරුද්ධා සඞ්ඛාරා න පුන උප්පජ්ජන්තීති? න හෙවං වත්තබ්බෙ…පෙ… තෙන හි න වත්තබ්බං – ‘‘ද්වෙ නිරොධා’’ති.

පරූපහාරො අඤ්ඤාණං, කඞ්ඛා පරවිතාරණා;

වචීභෙදො දුක්ඛාහාරො, චිත්තට්ඨිති ච කුක්කුළා;

අනුපුබ්බාභිසමයො, වොහාරො ච නිරොධකොති.