📜
6. ඡට්ඨො පරිච්ඡෙදො
රූපවිභාගො
ඉති පඤ්චපරිච්ඡෙද-පරිච්ඡින්නත්ථසඞ්ගහං;
නාමධම්මමසෙසෙන, විභාවෙත්වා සභාවතො.
සප්පභෙදං පවක්ඛාමි, රූපධම්මමිතො පරං;
භූතොපාදායභෙදෙන, දුවිධම්පි පකාසිතං.
උද්දෙසලක්ඛණාදීහි, විභාගජනකා තථා;
කලාපුප්පත්තිතො චාපි, යථානුක්කමතො කථං?
රුප්පතීති ¶ භවෙ රූපවිකාරප්පච්චයෙසති;
රූපරූපං තථා රූපපරියාපන්නතොපරං.
භූතරූපං තු පථවී, ආපො තෙජො තථාපරො;
වායො ච භවතූපාදාරූපමෙත්ථාති භාසිතං.
භූතරූපමුපාදාය ¶ , පවත්තති න චඤ්ඤථා;
ඉච්චුපාදායරූපන්ති, රූපං සෙසමුදීරිතං.
චක්ඛු සොතඤ්ච ඝානඤ්ච, ජිව්හා කායොති පඤ්චධා;
පසාදරූපමක්ඛාතං, නොපසාදං පනෙතරං.
රූපසද්දගන්ධරසා, ඵොට්ඨබ්බමිති පඤ්චධා;
රූපං පසාදවිසයං, පසාදො ගොචරංපරං.
ඉත්ථත්තං පුරිසත්තඤ්ච, භාවරූපමුදීරිතං;
ජීවිතින්ද්රියරූපන්ති, උපාදින්නපවත්තිකං.
වත්ථුරූපං තු හදයං, යං ධාතුද්වයනිස්සයං;
කබළීකාරමාහාරරූපමිච්චාහු පණ්ඩිතා.
රූපධම්මසභාවත්තා, රූපන්ති පරිදීපිතං;
ඉච්චෙවමට්ඨාරසධා, රූපරූපමුදීරිතං.
අනිප්ඵන්නසභාවත්තා, රූපාකාරොපලක්ඛිතං;
අනිප්ඵන්නං නාම රූපං, දසධා පරිදීපිතං.
රූපප්පරිච්ඡෙදං රූපමිච්චාකාසො පකාසිතො;
කායබ්බචීවිඤ්ඤත්තිකං, ද්වයං විඤ්ඤත්තිරූපකං.
ලහුතා මුදුතා කම්ම-ඤ්ඤතා විඤ්ඤත්තියා සහ;
විකාරරූපමිච්චාහු, පඤ්චධා ච විභාවිනො.
උපචයො සන්තති ච, ජරතානිච්චතාති ච;
චතුධා ලක්ඛණරූපං, රූපකණ්ඩෙ විභාවිතං.
ඉච්චෙවමට්ඨවීසතිවිධානිපි ¶ විචක්ඛණො;
රූපානි ලක්ඛණාදීහි, විභාවෙය්ය යථාක්කමං.
ඛරතා පථවීධාතු, සායං කක්ඛළලක්ඛණා;
කලාපාධිට්ඨානරසා, පටිග්ගාහොති ගය්හති.
ආබන්ධනමාපොධාතු, සා පග්ඝරණලක්ඛණා;
කලාපාබන්ධනරසා, සඞ්ගහත්තෙන ගය්හති.
තෙජනත්තං ¶ තෙජොධාතු, සායමුණ්හත්තලක්ඛණා;
පාචනරසා මද්දවා-නුප්පාදනන්ති ගය්හති.
වායොධාතු වායනත්තං, සා විත්ථම්භනලක්ඛණා;
සමීරණරසාභිනි-හාරභාවෙන ගය්හති.
සබ්බත්ථාවිනිභුත්තාපි, අසම්මිස්සිතලක්ඛණා;
තංතංභාවසමුස්සන්නසම්භාරෙසුපලක්ඛිතා.
අඤ්ඤමඤ්ඤෙනුපත්ථද්ධා, සෙසරූපස්ස නිස්සයා;
චතුද්ධෙවං කලාපෙසු, මහාභූතා පවත්තරෙ.
චක්ඛු සම්භාරචක්ඛුම්හි, සත්තක්ඛිපටලොචිතෙ;
කණ්හමණ්ඩලමජ්ඣම්හි, පසාදොති පවුච්චති.
යෙන චක්ඛුපසාදෙන, රූපානි අනුපස්සති;
පරිත්තං සුඛුමං චෙතං, ඌකාසිරසමූපමං.
සොතං සොතබිලස්සන්තො,
තම්බලොමාචිතෙ තථා;
අඞ්ගුලිවෙධනාකාරෙ,
පසාදොති පවුච්චති.
අන්තො අජපදට්ඨානෙ, ඝානං ඝානබිලෙ ඨිතං;
ජිව්හා ජිව්හාය මජ්ඣම්හි, උප්පලාකාරසන්නිභෙ.
ඉච්චෙවං ¶ පන චත්තාරො, තංතංදෙසවවත්ථිතා;
කායප්පසාදො කායම්හි, උපාදින්නෙති පඤ්චධා.
කප්පාසපටලස්නෙහ-සන්නිභා භූතනිස්සිතා;
පසාදා ජීවිතාරක්ඛා, රූපාදිපරිවාරිතා.
ධීතා රාජකුමාරාව, කලාපන්තරවුත්තිනො;
ද්වාරභූතාව පච්චෙකං, පඤ්චවිඤ්ඤාණවීථියා.
රූපාදාභිඝාතාරහභූතානං වා යථාක්කමං;
දට්ඨුකාමනිදානාදිකම්මභූතානමෙව වා.
පසාදලක්ඛණා ¶ රූපා-දාවිඤ්ජනරසා තථා;
පඤ්චවිඤ්ඤාණයුගළං, ද්වාරභාවෙන ගය්හරෙ.
රූපං නිභාසො භූතානං, සද්දො නිග්ඝොසනං තථා;
ගන්ධොව ගන්ධනං තත්ථ, රසො ච රසනීයතා.
ඉච්චෙවං පන චත්තාරො, ගොචරා භූතනිස්සිතා;
භූතත්තයඤ්ච ඵොට්ඨබ්බමාපොධාතුවිවජ්ජිතං.
සද්දො අනියතො තත්ථ, තදඤ්ඤො සහවුත්තිනො;
තංතංසභාවභෙදෙන, තංතංද්වාරොපලක්ඛිතො.
පඤ්චෙව පඤ්චවිඤ්ඤාණවීථියා විසයා මතා;
චක්ඛාදිපටිහනනලක්ඛණාව යථාක්කමං.
පඤ්චවිඤ්ඤාණයුගළාලම්බභාවරසා තථා;
පඤ්චවිඤ්ඤාණයුගළං, ගොචරත්තෙන ගය්හරෙ.
ඉත්ථින්ද්රියං පනිත්ථත්තමිත්ථිභාවොති භාසිතො;
පුරිසත්තං තථා භාවො, පුරිසින්ද්රියනාමකො.
තං ද්වයං පනුපාදින්නකායෙ සබ්බත්ථ ලබ්භති;
කලාපන්තරභින්නඤ්ච, භින්නසන්තානවුත්ති ච.
වසෙ ¶ වත්තෙති ලිඞ්ගාන-මිත්ථිපුම්භාවලක්ඛණං;
ඉත්ථීති ච පුරිසොති, පකාසනරසං තථා.
ඉත්ථීනං පුරිසානඤ්ච, ලිඞ්ගස්ස ච යථාක්කමං;
නිමිත්තකුත්තාකප්පානං, කාරණත්තෙන ගය්හති.
සත්තා මරන්ති නාසෙන, යස්ස පාණන්ති වුත්තියා;
සජීවමතකායානං, භෙදො යෙනොපලක්ඛිතො.
තදෙතං කම්මජාතාන-මනුපාලනලක්ඛණං;
ජීවිතං ජීවනරසං, ආයුබද්ධොති ගය්හති.
මනොධාතුයා ච තථා, මනොවිඤ්ඤාණධාතුයා;
නිස්සයලක්ඛණං වත්ථු-රූපං හදයසම්මතං.
සමාධානරසං ¶ තාස-මුබ්බාහත්තෙන ගය්හති;
යස්මිං කුප්පිතකාලම්හි, වික්ඛිත්තා හොන්ති පාණිනො.
කායො යස්සානුසාරෙන, චිත්තක්ඛෙපෙන ඛිජ්ජති;
යස්මිං නිරුද්ධෙ විඤ්ඤාණ-සොතොපි ච නිරුජ්ඣති.
යං නිස්සාය පතිට්ඨාති, පටිසන්ධි භවන්තරෙ;
තදෙතං කම්මසම්භූතං, පඤ්චවොකාරභූමියං.
මජ්ඣෙ හදයකොසම්හි, අඩ්ඪපසතලොහිතෙ;
භූතරූපමුපාදාය, චක්ඛාදි විය වත්තති.
කබළීකාරො ආහාරො, රූපාහරණලක්ඛණො;
කායානුයාපනරසො, උපත්ථම්භොති ගය්හති.
ඔජාය යාය යාපෙන්ති, ආහාරස්නෙහසත්තියා;
පාණිනො කාමලොකම්හි, සායමෙවං පවුච්චති.
ආකාසධාතු රූපානං, පරියොසානලක්ඛණා;
පරිච්ඡෙදරසා රූපමරියාදොති ගය්හති.
සලක්ඛණපරිච්ඡින්නරූපධම්මපරිග්ගහෙ ¶ ;
යොගීනමුපකාරාය, යං දෙසෙසි දයාපරො.
පරිච්ඡින්නසභාවානං, කලාපානං යථාරහං;
පරියන්තානමෙවෙස, තදාකාරො පවුච්චති.
ගමනාදිවචීඝොසපවත්තම්හි යථාක්කමං;
වායොපථවිධාතූනං, යො විකාරො සමත්ථතා.
සහජොපාදින්නකානං, ක්රියාවාචාපවත්තියා;
විප්ඵන්දඝට්ටනාහෙතු, චිත්තානුපරිවත්තකො.
ස විකාරවිසෙසොයං, විඤ්ඤත්තීති පකාසිතො;
විඤ්ඤාපෙතීති කායෙන, වාචාය ච විචින්තිතං.
වායොපථවාධිකානං, භූතානමිති කෙචන;
පවුත්තා තාදිනා කාය-පරිග්ගහසුඛාය යා.
කායො ¶ යස්සානුභාවෙන,
සහාභොගොව ඛායති;
යං නිරොධා පරාභූතො,
සෙති නිච්චෙතනො යථා.
ලොකෙ පපඤ්චා වත්තන්ති, බහුධා යාය නිම්මිතා;
කප්පෙන්ති කායමත්තානං, බාලා යාය ච වඤ්චිතා.
සායං කායවචීකම්ම-ද්වාරභාවෙන ලක්ඛිතා;
බ්යාපාරඝට්ටනාහෙතු-විකාරාකාරලක්ඛණා.
කායවාචාඅධිප්පාය-පකාසනරසා තථා;
කායවිප්ඵන්දඝට්ටන-හෙතුභාවෙන ගය්හති.
ලහුතා පන රූපානං, අදන්ධාකාරලක්ඛණා;
අවිත්ථානරසා සල්ල-හුකවුත්තීති ගය්හති.
මුදුතාපි ¶ ච රූපානං, කක්ඛළාභාවලක්ඛණා;
කිච්චාවිරුජ්ඣනරසා, අනුකුල්යන්ති ගය්හති.
කම්මඤ්ඤතා ච රූපානං, අලංකිච්චස්ස ලක්ඛණා;
පවත්තිසම්පත්තිරසා, යොග්ගභාවොති ගය්හති.
සප්පායමුතුමාහාරං, ලද්ධා චිත්තමනාමයං;
ලහූ මුදු ච කම්මඤ්ඤං, යදා රූපං පවත්තති.
තථා පවත්තරූපස්ස, පවත්තාකාරභෙදිතං;
ලහුතාදිත්තයම්පෙතං, සහවුත්ති තදා භවෙ.
සප්පායපටිවෙධාය, පටිපත්තුපකාරිකා;
සාකාරා රූපසම්පත්ති, පඤ්ඤත්තෙවං මහෙසිනා.
රූපස්සොපචයො නාම, රූපස්සාචයලක්ඛණො;
රූපුම්මුජ්ජාපනරසො, පාරිපූරීති ගය්හති.
පවත්තිලක්ඛණා රූප-සන්තතීති පකාසිතා;
අනුප්පබන්ධනරසා, අවිච්ඡෙදොති ගය්හති.
රූපමාචයරූපෙන ¶ , ජායතිච්චුපරූපරි;
පෙක්ඛතොපචායාකාරා, ජාති ගය්හති යොගිනා.
අනුප්පබන්ධාකාරෙන, ජායතීති සමෙක්ඛතො;
තදායං සන්තතාකාරා, සමුපට්ඨාසි චෙතසි.
එවමාභොගභෙදෙන, ජාතිරූපං ද්විධා කතං;
අත්ථූපලද්ධිභාවෙන, ජායන්තං වාථ කෙවලං.
රූපවිවිත්තමොකාසං, පුරක්ඛත්තෙන චීයති;
අභාවා පන භාවාය, පවත්තමිති සන්තති.
එවමාකාරභෙදාපි, සබ්බාකාරවරාකරො;
ජාතිරූපං ද්විධාකාසි, ජාතිරූපවිරොචනො.
ජරතා ¶ කාලහරණං, රූපානං පාකලක්ඛණා;
නවතාපායනරසා, පුරාණත්තන්ති ගය්හති.
අන්තිමක්ඛණසම්පත්ති, පරිභිජ්ජනලක්ඛණා;
අනිච්චතා හරණරසා, ඛයභාවෙන ගය්හති.
ඉති ලක්ඛණරූපං තු, තිවිධං භින්නකාලිකං;
සභාවරූපධම්මෙසු, තංතංකාලොපලක්ඛිතං.
යෙන ලක්ඛීයති රූපං, භින්නාකාරං ඛණෙ ඛණෙ;
විපස්සනානයත්ථාය, තමිච්චාහ තථාගතො.
ඉච්චෙවං සපරිච්ඡෙදා, සවිකාරා සලක්ඛණා;
අකිච්ඡා පටිවෙධාය, දයාපන්නෙන තාදිනා.
රූපධම්මා සභාවෙන, විජ්ජමානාති භාසිතා;
අජ්ඣත්තිකාදිභෙදෙන, බහුධා භිජ්ජරෙ කථං;
ද්වාරභූතා පවත්තෙන්ති, චිත්තමත්තාති කප්පිතං;
රූපමජ්ඣත්තිකං තස්මා, පසාදා බාහිරංපරං.
වණ්ණො ¶ ගන්ධො රසොජා ච, භූතරූපඤ්ච භාසිතං;
අවිනිබ්භොගරූපං තු, විනිබ්භොගං පනෙතරං.
සත්තවිඤ්ඤාණධාතූනං, නිස්සයත්තා යථාරහං;
පසාදා හදයඤ්චෙව, වත්ථුනා වත්ථු දෙසිතං.
පඤ්චවිඤ්ඤාණුපාදින්න-ලිඞ්ගාදි ච පවත්තිතො;
පසාදා ජීවිතං භාවා, චෙන්ද්රියං නෙන්ද්රියංපරං.
පඤ්චවිඤ්ඤාණකම්මානං, පවත්තිමුඛභාවතො;
ද්වාරං පසාදවිඤ්ඤත්ති-පරමද්වාරමීරිතං.
පටිහඤ්ඤන්තඤ්ඤමඤ්ඤං, පසාදවිසයා පන;
තස්මා සප්පටිඝං නාම, රූපමප්පටිඝංපරං.
ද්වාරාලම්බණභාවෙන ¶ , සභාවෙනෙව පාකටා;
තෙ එවොළාරිකං තස්මා, සෙසං සුඛුමමීරිතං.
ඔළාරිකසභාවෙන, පරිග්ගහසුඛා තහිං;
තෙ එව සන්තිකෙරූපං, දූරෙරූපං පනෙතරං.
තණ්හාදිට්ඨීහුපෙතෙන, කම්මුනාදින්නභාවතො;
කම්මජාතමුපාදින්නං, අනුපාදින්නකංපරං.
චක්ඛුනා දිස්සමානත්තා, සනිදස්සනනාමකං;
රූපමෙව තතො සෙස-මනිදස්සනමබ්රවුං.
සනිදස්සනරූපඤ්ච, රූපං සප්පටිඝං තථා;
අනිදස්සනමඤ්ඤං තු, ථූලං සප්පටිඝං මතං.
අනිදස්සනරූපඤ්ච, සෙසං අප්පටිඝං තථා;
රූපං තිවිධමිච්චෙවං, විභජන්ති විචක්ඛණා.
අප්පත්තගොචරග්ගාහිරූපං චක්ඛාදිකං ද්වයං;
සම්පත්තග්ගාහි ඝානාදි-ත්තයමග්ගාහිකං රූපං.
දිට්ඨං රූපං සුතං සද්දො, මුතං ගන්ධාදිකත්තයං;
විඤ්ඤාණෙනෙව ඤෙය්යත්තා, විඤ්ඤාතමපරං භවෙ.
හදයං ¶ වත්ථුමෙවෙත්ථ, ද්වාරං විඤ්ඤත්තිකද්වයං;
පසාදා වත්ථු ච ද්වාරං, අඤ්ඤං තුභයවජ්ජිතං.
භෙදිත්වා රූපමිච්චෙවං, තස්සෙව පුන පණ්ඩිතො;
සමුට්ඨානජනකෙහි, විභාවෙය්ය යථාරහං.
කුසලාකුසලං කම්ම-මතීතං කාමිකං තථා;
රූපාවචරමිච්චෙවං, පඤ්චවීසතිධා ඨිතං.
පටිසන්ධිමුපාදාය, සඤ්ජනෙති ඛණෙ ඛණෙ;
කාමරූපෙසු රූපානි, කම්මජානි යථාරහං.
ජායන්තං ¶ පඤ්චවිඤ්ඤාණ-පාකාරුප්පවිවජ්ජිතං;
භවඞ්ගාදිමුපාදාය, සමුප්පාදෙති මානසං.
සීතුණ්හොතුසමඤ්ඤාතා,
තෙජොධාතු ඨිතික්ඛණෙ;
තථෙවජ්ඣොහටාහාරො,
කාමෙ කායප්පතිට්ඨිතො.
අජ්ඣත්තං පන චත්තාරො, බාහිරො තුපලබ්භති;
සබ්බෙ කාමභවෙ රූපෙ, ආහාරො න සමීරිතො.
පවත්තෙ හොන්ති චත්තාරො, කම්මමෙවොපපත්තියං;
ජීවමානස්ස සබ්බෙපි, මතස්සොතු සියා න වා.
කම්මං චිත්තොතුමාහාර-මිච්චෙවං පන පණ්ඩිතා;
රූපානං ජනකත්තෙන, පච්චයාති පකාසයුං.
හදයින්ද්රියරූපානි, කම්මජානෙව චිත්තජං;
විඤ්ඤත්තිද්වයමීරෙන්ති, සද්දො චිත්තොතුජො මතො.
චිත්තොතුකබළීකාර-සම්භූතා ලහුතාදයො;
කම්මචිත්තොතුකාහාර-ජානි සෙසානි දීපයෙ.
ජායමානාදිරූපානං, සභාවත්තා හි කෙවලං;
ලක්ඛණානි න ජායන්ති, කෙහිචීති පකාසිතං.
යදිජාතාදයො ¶ තෙස-මවස්සං තංසභාවතා;
තෙසඤ්ච ලක්ඛණානන්ති, අනවත්ථා භවිස්සති.
අට්ඨාරස පන්නරස, තෙරස ද්වාදසාති ච;
කම්මචිත්තොතුකාහාර-ජානි හොන්ති යථාක්කමං.
කලාපානි යථායොගං, තානි සඞ්ගය්හ පණ්ඩිතා;
නව ඡ චතුරො ද්වෙති, එකවීසති භාවයුං.
ජීවිතඤ්චාවිනිබ්භොග-රූපඤ්ච ¶ , සහවුත්තිතො;
සඞ්ගය්හ චක්ඛුදසකං, චක්ඛුමාදාය භාසිතං.
තථා සොතඤ්ච ඝානඤ්ච, ජිව්හං කායං යථාක්කමං;
ඉත්ථිභාවඤ්ච පුම්භාවං, වත්ථුමාදාය දීපයෙ.
අවිනිබ්භොගරූපෙන, ජීවිතනවකං භවෙ;
ඉච්චෙවං කම්මජා නාම, කලාපා නවධා ඨිතා.
අවිනිබ්භොගරූපඤ්ච, සුද්ධට්ඨකමුදීරිතං;
කායවිඤ්ඤත්තියා සද්ධිං, නවකන්ති පවුච්චති.
වචීවිඤ්ඤත්තිසද්දෙහි, දසකං භාසිතං තථා;
ලහුතාදෙකාදසකං, ලහුතාදීහි තීහිපි.
කායවිඤ්ඤත්තිලහුතා-දීහි ද්වාදසකං මතං;
වචීවිඤ්ඤත්තිලහුතා-දීහි තෙරසකං තථා.
ගහෙත්වාකාරභෙදඤ්ච, තංතංකාලොපලක්ඛිතං;
ඉති චිත්තසමුට්ඨානා, ඡ කලාපාති භාසිතා.
සුද්ධට්ඨකං තු පඨමං, සද්දෙන නවකං මතං;
ලහුතාදෙකාදසකං, ලහුතාදිසමායුතං.
සද්දෙන ලහුතාදීහි, තථා ද්වාදසකං භවෙ;
කලාපා උතුසම්භූතා, චතුද්ධෙවං පකාසිතා.
සුද්ධට්ඨකඤ්ච ලහුතා-දෙකාදසකමිච්චපි;
කලාපාහාරසම්භූතා, දුවිධාව විභාවිතා.
කලාපානං ¶ පරිච්ඡෙද-ලක්ඛණත්තා විචක්ඛණා;
න කලාපඞ්ගමිච්චාහු, ආකාසං ලක්ඛණානි ච.
ඉච්චෙවං චතුසම්භූතා, කලාපා එකවීසති;
සබ්බෙ ලබ්භන්ති අජ්ඣත්තං, බාහිරොතුසමුට්ඨිතා.
අට්ඨකං ¶ සද්දනවක-මිති ද්වෙධාව භාසිතා;
මතකායෙපි තෙ එව, සියුමිච්චාහු පණ්ඩිතා.
කාමෙ සබ්බෙපි ලබ්භන්ති, සභාවානං යථාරහං;
සම්පුණ්ණායතනානං තු, පවත්තෙ චතුසම්භවා.
දසකානෙව සබ්බානි, කම්මජානෙව ජාතියං;
චක්ඛුසොතඝානභාව-දසකානි න වා සියුං.
වත්ථුකායදසකානි, සභාවදසකානි වා;
ගබ්භසෙය්යකසත්තානං, තතො සෙසානි සම්භවා.
කම්මං රූපං ජනෙතෙවං,
මානසං සන්ධිතො පරං;
තෙජොධාතු ඨිතිප්පත්තා,
ආහාරජ්ඣොහටො තථා.
ඉච්චෙවං චතුසම්භූතා, රූපසන්තති කාමිනං;
දීපජාලාව සම්බන්ධා, යාවජීවං පවත්තති.
ආයුනො වාථ කම්මස්ස, ඛයෙනොභින්නමෙව වා;
අඤ්ඤෙන වා මරන්තාන-මුපච්ඡෙදකකම්මුනා.
සත්තරසචිත්තක්ඛණමායු රූපානමීරිතං;
සත්තරසමචිත්තස්ස, චුතිචිත්තොපරී තතො.
ඨිතිකාලමුපාදාය, කම්මජං න පරං භවෙ;
තතො භිජ්ජතුපාදින්නං, චිත්තජාහාරජං තතො.
ඉච්චෙවං මතසත්තානං, පුනදෙව භවන්තරෙ;
පටිසන්ධිමුපාදාය, තථා රූපං පවත්තති.
ඝානජිව්හාකායභාවදසකාහාරජං ¶ පන;
රූපං රූපභවෙ නත්ථි, පටිසන්ධිපවත්තියං.
තත්ථ ¶ ගන්ධරසොජා ච, න ලබ්භන්තීති කෙචන;
කලාපා ච ගණෙතබ්බා, තත්ථෙතං රූපවජ්ජිතා.
ඨිතික්ඛණඤ්ච චිත්තස්ස, තෙ එව පටිසෙධයුං;
චිත්තභඞ්ගක්ඛණෙ රූප-සමුප්පත්තිඤ්ච වාරයුං.
චක්ඛුසොතවත්ථුසද්දචිත්තජම්පි අසඤ්ඤිසු;
අරූපෙ පන රූපානි, සබ්බථාපි න ලබ්භරෙ.
ඉත්ථං පනෙත්ථ විමලෙන විභාවනත්ථං,
ධම්මං සුධම්මමුපගම්ම සුරාධිවාසං;
රූපං අරූපසවිභාගසලක්ඛණං තං,
වුත්තං පවුත්තමභිධම්මනයෙ මයාපි.
රූපවිභාගමිමං සුවිභත්තං, රූපයතො පන චෙතසි නිච්චං;
රූපසමිද්ධජිනෙරිතධම්මෙ, රූපවතී අභිවඩ්ඪති පඤ්ඤා.
ඉති නාමරූපපරිච්ඡෙදෙ රූපවිභාගො නාම
ඡට්ඨො පරිච්ඡෙදො.