📜
8. අට්ඨමො පරිච්ඡෙදො
කසිණාසුභවිභාගො
ඉතො ¶ පරං පවක්ඛාමි, භාවනානයමුත්තමං;
නාමරූපං පරිග්ගය්හ, පටිපජ්ජිතුමීහතො.
භාවනා දුවිධා තත්ථ, සමථො ච විපස්සනා;
සමථො දුවිධො තත්ථ, පරිත්තො ච මහග්ගතො.
උපචාරමනුප්පත්තො, පරිත්තොති පවුච්චති;
මහග්ගතප්පනාපත්තො, සමථො ලොකියො මතො.
කසිණානි දසාසුභා, දසධානුස්සතී තථා;
අප්පමඤ්ඤා ච සඤ්ඤා ච, වවත්ථාරුප්පකානි ච.
කම්මට්ඨානානි තත්ථාහු, චත්තාලීස විචක්ඛණා;
යත්ථානුයොගං කුබ්බන්තා, භාවෙන්ති සමථද්වයං.
තං ¶ පයොගවිසුද්ධෙන, පත්වානොපායසම්පදං;
අජ්ඣාසයං විසොධෙත්වා, භාවෙතබ්බන්ති භාසිතං.
කථං කරොන්තො චාරිත්තං, වාරිත්තඤ්ච විවජ්ජිය;
පාතිමොක්ඛං සමාදාය, සද්ධාය පරිපූරයෙ.
පටිසඞ්ඛාය සොධෙත්වා, ඡද්වාරෙසු මලාසවං;
ඡළින්ද්රියානි මෙධාවී, සතාරක්ඛෙන ගොපයෙ.
පාපකාජීවනිස්සඞ්ගො, කුහකාචාරනිස්සටො;
ආජීවං පරිසොධෙය්ය, පහිතත්තෙට්ඨිසුද්ධියා.
ඉදමත්ථිතමාරබ්භ, පටිසඞ්ඛාය යොනිසො;
පඤ්ඤවා සම්පජඤ්ඤෙන, පරිභුඤ්ජෙය්ය පච්චයෙ.
සංවරං පාතිමොක්ඛෙ ච, සීලමින්ද්රියසංවරං;
ආජීවපාරිසුද්ධිඤ්ච, තථා පච්චයනිස්සිතං.
සමාදාය ¶ චතුද්ධෙව-මධිට්ඨෙය්ය තතො පරං;
තස්සෙව පරිවාරාය, ධුතඞ්ගානි යථාරහං.
පංසුකූලිකමඞ්ගං ති-චීවරං චීවරායුගං;
පිණ්ඩපාතිකමඞ්ගඤ්ච, සපදානිකමුත්තමං.
ඛලුපච්ඡාභත්තිකඞ්ගං, ධුතඞ්ගං පත්තපිණ්ඩිකං;
එකාසනිකමිච්චෙවං, පඤ්චධා භොජනෙ ඨිතං.
ආරඤ්ඤිකං යථාසන්ථ-
තිකඞ්ගං රුක්ඛමූලිකං;
අබ්භොකාසිකසොසානි-
කඞ්ගා නෙසජ්ජිකං තථා.
ඡ සෙනාසනමාරබ්භ, ධුතඞ්ගානීති තෙරස;
කප්පියෙපි ච ලොලුප්ප-සමාචාරවිමුත්තියා.
සාමීචිපටිපත්තීති ¶ , කත්වා සල්ලෙඛවුත්තියා;
පච්චයත්තයමාහච්ච, පඤ්ඤත්තානි මහෙසිනා.
චතුපාරිසුද්ධිසීලං, ධුතඞ්ගපරිවාරිතං;
පූරෙත්වාන විසුද්ධෙවං, පයොගපරිසුද්ධියා.
තතො පණිධිසම්පන්නො, භාවනාය විසාරදො;
උපායං පටිපාදෙය්ය, පවිවෙකරතො කථං?
ආවාසො ච කුලං ලාභො,
ගණො කම්මඤ්ච පඤ්චමං;
අද්ධානං ඤාති ආබාධො,
ගන්ථො ඉද්ධීති තෙ දස.
ඡෙත්වාන නිපකො යොගී,
පලිබොධෙ යථාරහං;
නිරාලයො නිරාරම්භො,
පපඤ්චොපසමෙ රතො.
පියං ¶ ගරුං භාවනියං, වත්තාරං වචනක්ඛමං;
කත්තාරමතිගම්භීරකථං ඨානනියොජකං.
බහුස්සුතං ගුණවන්ත-මාගම්මාචරියං බුධො;
ඛමො පදක්ඛිණග්ගාහී, නිය්යාතත්තුජු භද්රකො.
ආරාධෙත්වාන ගණ්හෙය්ය, තං කම්මට්ඨානදායකං;
කම්මට්ඨානං පරික්ඛිත්වා, චරියාරහමත්තනො.
රාගො දොසො ච මොහො ච,
චරියා තීහි පණ්ඩිතා;
සද්ධාබුද්ධිවිතක්කෙහි,
ඡබ්බිධා ච විභාවයුං.
රාගුස්සන්නස්ස ¶ සප්පායා, කොට්ඨාසාසුභභාවනා;
දොසුස්සන්නස්සප්පමඤ්ඤා, නීලාදි ච චතුබ්බිධා.
විතක්කං මොහුස්සන්නානං, ආනාපානං පකාසිතං;
ඡ සද්ධාචරිතස්සාහු, බුද්ධානුස්සතිආදයො.
මරණොපසමාසඤ්ඤාවවත්ථානානි බුද්ධිනො;
සෙසානි පන සබ්බෙසං, තත්ථාපි කසිණං බුධා.
විතක්කපකතිකස්ස, පරිත්තං මොහචාරිනො;
මහන්තමිති සප්පායං, ගහෙත්වාන තතො පරං.
මහාවාසං නවං ජිණ්ණං, පන්ථසොණ්ඩිකසන්තිකං;
පණ්ණපුප්ඵඵලාකිණ්ණං, බහුසම්මානපත්ථිතං.
සීමන්තදාරුනගර-ක්ඛෙත්තපච්චන්තනිස්සිතං;
විසභාගමසප්පායං, පට්ටනං මිත්තදුල්ලභං.
ඨානානිට්ඨාරසෙතානි, පරිවජ්ජෙය්ය පණ්ඩිතො;
සෙවෙය්ය භාවනායොග්ගං, සෙනාසනමතන්දිතො.
නාතිදූරං නාච්චාසන්නං, අප්පසද්දමනාකුලං;
ගමනාගමනසම්පන්නං, අප්පඩංසානුපද්දවං.
අකිච්ඡපච්චයුප්පාදං ¶ , ලජ්ජීභික්ඛුගණොචිතං;
විවෙකට්ඨානබහුලං, බහුස්සුතනිසෙවිතං.
අප්පභයං නිරාසඞ්කං, අප්පදොසං මහාගුණං;
විහාරමනුසෙවන්තො, තත්ථ නිස්සඞ්ගචෙතසා.
තතො කෙසනඛච්ඡෙද-රජනාදිමසෙසතො;
ඛුද්දකං පලිබොධඤ්ච, ඡින්දිත්වාන යථාරහං.
ආවාසං ගොචරං භස්සං, පුග්ගලං භොජනං තථා;
වජ්ජෙන්තොතුමසප්පායං, ඉරියාපථමත්තනො.
සෙවන්තො ¶ සත්ත සප්පායෙ, තෙ එවාති පධානවා;
භාවනූපායසම්පන්නො, වූපකට්ඨො රහොගතො.
කාමෙස්වාදීනවං දිස්වා, නෙක්ඛම්මං දට්ඨු ඛෙමතො;
පරියුට්ඨානනිබ්බින්දො, සොධෙය්යජ්ඣාසයං කථං.
අප්පස්සාදා මහාදුක්ඛා, කාමා හි කටුකප්ඵලා;
දුස්සංහාරා දුරාරක්ඛා, බහ්වාදීනවසණ්ඨිතා.
අට්ඨිකා ඛජ්ජමානාව, විඝාතාය පභිජ්ජිතා;
ගය්හන්තත්තවධායෙතෙ, මංසපෙසීව පක්ඛිභි.
පටිවාතෙ තිණුක්කාව, පරිග්ගාහකදාහිනො;
අඞ්ගාරකාසුසඞ්කාසා, සබ්බඞ්ගපරිතාසකා.
සුපිනෙ පරිභුත්තාව, නාලං කස්සචි තිත්තියා;
න තු කස්සචි අච්චන්තා, අලඞ්කාරාව යාචිතා.
ඡජ්ජන්තා ඵලරුක්ඛාව, පටිපන්නපභඤ්ජිනො;
අසිසූනූපමා නිච්ච-මධිකොට්ටෙන්ති පාණිනො.
සත්තිසූලූපමා දළ්හං, තණ්හාසල්ලානුවෙධිනො;
ඝොරානත්ථවිසාකිණ්ණා, කණ්හසප්පසිරූපමා.
සබ්බාසවපරික්ලිට්ඨා ¶ , සබ්බාසංක්ලෙසවත්ථුකා;
ගම්මා ච චපලා නීචා, පුථුජ්ජනමමායිතා.
බහුසාධාරණා චෙතෙ, සපත්තජනපත්ථිතා;
මහොපද්දවුපයට්ඨා, බහ්වායාසා භයාවහා.
මහාරම්භසමාරද්ධා, ඛිප්පාකාරවිධංසිනො;
සොකසල්ලං පවෙසෙන්තා, විගච්ඡන්ති සුවෙ සුවෙ.
නාලං කස්සචි තාණාය, නාලමස්සාසනාය ච;
අවිසාසනියාවස්සං, කිතවා මාරකිංකරා.
සත්තානමුපඝාතාය ¶ , මධුරාකාරනිම්මිතා;
රක්ඛසී විය සන්තාන-මාවිසන්ති මනොහරා.
ආවිට්ඨා යෙහි දුම්මෙධා, බ්යසනාහිතසම්භවා;
විපල්ලාසපරාභූතා, බ්යාපජ්ජන්තා විහඤ්ඤරෙ.
චෙතොසඞ්කප්පරචිතා, නන්දිරාගොපසෙවනා;
මධුලිත්තාසිධාරාව, බ්යාපාරෙනොපසෙවිතා.
මනොරමසුභාකාරා, පියරූපොපලම්භිනො;
මිත්තමුඛං සපත්තාව, වඤ්චයන්ති මහාජනං.
වඤ්චිතා යෙහි දුම්මෙධා, සබ්බසම්පත්තිධංසිතා;
ඛෙමමග්ගා පරිබ්භට්ඨා, ධාරෙන්ති වධමත්තනො.
විරූපරූපාකාරෙන, නිම්මථෙන්තා පලොභිනො;
අභාවිතානං බාලානං, මානසං නිහනන්තිමෙ.
යත්ථ රාගසල්ලවිද්ධා, සල්ලෙනෙව වනෙ මිගා;
තත්ථ තත්ථානුධාවන්තා, විප්ඵන්දන්ති නිරන්තරං.
මමංකාරෙන වුඩ්ඪන්තා, ඝොරමාසීවිසං යථා;
විස්සට්ඨා භොගධම්මෙසු, අස්සාදෙන්ති අවිද්දසු.
අනයබ්යසනායෙතෙ ¶ , වසී කුබ්බන්ති පාණිනො;
විචිත්තාකාරසණ්ඨානා, පිසාචනගරං යථා.
අනත්ථාවහිතා බාලා, වාගුරං නාවබුජ්ඣරෙ;
තත්ථෙව පටිවමන්ති, යථා හඤ්ඤන්ති මුච්ඡිතා.
සීඝවාහී මහොඝොයං, ක්ලෙසවට්ටං මහබ්භයො;
සකණ්ටකඤ්ච ගහනං, පඞ්කොව දුරතික්කමො.
චෙතොසංමොහනට්ඨානං, පමාදපටිසන්ධිතං;
ඔහාරි සිථිලං චෙතං, දුප්පමුඤ්චඤ්ච බන්ධනං.
ජාලංව ¶ විත්ථතං ලොකෙ,
මාරපාසො සමොඩ්ඩිතො;
පඤ්ජරං චාරකො චෙසො,
සත්තානමනයාවහො.
යත්ථානුරාගසම්බද්ධා, පලිගුණ්ඨිතසායිනො;
මක්කටාලෙපබද්ධාව, නිත්ථුනන්ති විඝාතිනො.
බළිසංවාමිසච්ඡන්නං, සවිසං විය භොජනං;
මිගලුද්දනිවාපොව, විනාසාය සමොඩ්ඩිතා.
මීනකා වඞ්කගිද්ධාව, යෙ ගිලිත්වා පුථුජ්ජනා;
ඝොරං මච්චුමුඛං පත්වා, සොචන්තාපායභාගිනො.
පාපක්ඛෙත්තමිදං ඨානං, මිච්ඡාලොභනිසෙවනං;
දුච්චරීතඞ්කුරාරොහං, අපායඵලපූරණං.
අජ්ඣොසිතා පනෙත්ථ ච, ලොභමුච්ඡාවිදාහිනො;
කොධූපනාහජලිතා, ඉස්සාමච්ඡෙරධූපිතා.
සාරම්භායුධසන්නද්ධා, විප්ඵුරන්තා මනොරථා;
ආබන්ධිච්ඡා මහාකච්ඡා, ඨන්ති ලොකවිපත්තියා.
අවජ්ජං ¶ නත්ථි එතෙස-මකත්තබ්බං න විජ්ජති;
සම්මුට්ඨසච්චතා තෙසු, න පතිට්ඨාති සාධුතා.
පරොපඝාතාභිරතා, දයාධම්මපරම්මුඛා;
සබ්බසත්තෙස්වවිස්සාසී, සබ්බත්ථ පරිසඞ්කිතා.
භයසන්තාසබහුලා, සබ්බානත්ථානුසාරිනො;
සාධෙන්තා චතුරාපායං, පාපකම්මපුරක්ඛකා.
මහාසඞ්කටුපබ්යුළ්හා, පලිබොධපරිප්ඵුටා;
හඤ්ඤන්ති දුක්ඛධම්මෙහි, කාමෙ බාලා භවෙපරෙ.
තතො ¶ මච්චුනිරාසඞ්කා, ඛිඩ්ඩාරතිවිමොහිතා;
කිම්පක්කමිව භක්ඛන්තා, රම්මකාරවිරොධිනො.
ගාමසූකරපොතාව, කාමාසුචිපරිප්ලුතා;
චමරීකතකම්මන්තා, අස්මිං ලොකෙ පලොභිතා.
ඛජ්ජමානා කිලෙසෙහි, කිමීහිව නිරන්තරං;
පරිහානිං පනඤ්ඤාය, පරිවාරෙන්ති මුච්ඡිතා.
තතො ජරාහි සන්තත්තං, යොබ්බනඤ්චොපමුය්හති;
කාමා ච පරිහායන්ති, ජීවිතඤ්චොපරුජ්ඣති.
පරං පමාදාභිවට්ඨා, පාපක්ලෙසමහොදකා;
තතො තණ්හානදී පූරා, පාපෙතාපායසාගරං.
ඉධලොකපරිච්චත්තා, පරලොකත්ථධංසිතා;
ගඞ්ගාකුණපකාකාව, සෙන්ති සොකපරායණා.
ඉච්චත්තත්ථං පරත්ථඤ්ච, සත්තා කාමනිබන්ධනා;
විද්ධංසෙත්වා විනස්සන්ති, ඉධ චෙව පරත්ථ ච.
ඉති සාදීනවා කාමා, ඝොරා සාලසිලූපමා;
යත්ථ බාලා විසීදන්ති, නත්ථි සඞ්ගො විජානතං.
ඉත්ථං ¶ කාමභයට්ටානං, සික්ඛත්තයමනුත්තරං;
සමාචික්ඛි විමොක්ඛාය, නෙක්ඛම්මමිති චක්ඛුමා.
සබ්බාසවවිඝාතාය, පටිපත්ති අනුත්තරා;
අන්තද්වයමනාගම්ම, මජ්ඣිමායං පකාසිතා.
සබ්බදුක්ඛසමුග්ඝාතී, විසුද්ධි පරමුත්තමා;
විජ්ජාචරණසම්පත්ති, සබ්බසම්පත්තිසාධිකා.
පුඤ්ඤක්ඛෙත්තමිදං ඨානං, තපොකම්මනිසෙවනං;
සද්ධාසීලඞ්කුරාරොහං, සම්පත්තිඵලපූරණං.
ක්ලෙසචාරකමොක්ඛාය ¶ , ද්වාරමෙතමනුත්තරං;
මහොඝුත්තරණං කුල්ලං, සොත්ථි පාරිමපාපකං.
පාපචොරවිඝාතාය, ඛෙමමග්ගො අනුත්තරො;
අකණ්ටකො අගහනො, උජු සබ්භි පවෙදිතො.
මහාබන්ධනමොක්ඛාය,
අබ්භුතො ජිනඝොසිතො;
පලිබොධපරිච්චාගො,
අබ්භොකාසො අලෙපනො.
සඞ්ගපඞ්කසමුත්තාරො, ගන්ථානං විනිවෙඨනං;
තණ්හාදාසබ්යනිත්ථාරො, සෙරිභාවො සුඛාවහො.
සබ්බයොගවිසංයොගො, සබ්බසොකනිරුන්ධනො;
සබ්බාලයවිසඞ්ඛාරො, සබ්බදුක්ඛවිනිග්ගමො.
මාරපාසසමුච්ඡෙදී, පත්තමෙතමනුත්තරං;
මොහන්ධකාරවිද්ධංසී, විජ්ජාලොකවිරොචනො.
අබ්යාපජ්ජමිදං ඨාන-මභයං නිරුපද්දවං;
තපොකම්මානමොකාසො, මාරචක්ඛුවිමොහනො.
සබ්බසන්තාපහරණමිදං සීතංව චන්දනං;
නිම්මලං ධම්මසලිලං, සංක්ලෙසමලසොධනං.
සංසාරසෙතු ¶ සුහතා, බොධිපක්ඛියපත්ථතා;
සොකසල්ලසමුද්ධාරී, යන්තං සුකතයොජිතං.
චිත්තාතඞ්කසමුද්ධංසී, පරිභොගසුඛොසධං;
ලොකාමිසානං වමනං, චෙතොදොසවිරෙචනං.
අච්චන්තතිත්තිකාරණමීරෙන්ති ධම්මභොජනං;
පිපාසහරණං පානං, විමුත්තිරසපෙසලං.
වණ්ණකිත්තිසුගන්ධාය ¶ , ගුණමාලා සුගන්ථිතා;
පාපකොපීනවසනං, හිරොත්තප්පවිචිත්තිතං.
අච්චන්තපරිසුද්ධො ච, සද්ධම්මරතනාවලි;
අරියානමලඞ්කාරො, අනුපායි සිරිඞ්කරො.
චින්තානං දුන්නිමිත්තානමිදං සන්තිකරං පරං;
විපත්තිපටිඝාතාය, පරිත්තමිදමුත්තමං.
අන්තරායවිනාසාය, මඞ්ගලං ජිනදෙසිතං;
මිච්ඡාගාහවිමොක්ඛාය, සොත්ථි සම්බුද්ධභාසිතා.
අනිවත්ති ච පච්චක්ඛමාවෙනිකමභාරියං;
අමතොසධමච්චන්තමජරාමරසාධනං.
යමෙතං සමධිට්ඨාය, සම්බොධිත්තයමුත්තමං;
පප්පොන්ති සබ්බසම්පත්තිගුණපාරමිපූරිතං.
සබ්බාකාරවරොපෙත-මෙතං නෙක්ඛම්මසම්මතං;
සීලගම්භීරපරික්ඛං, ධුතඞ්ගොදිතතොරණං.
සමාධිවීථිවිත්ථින්නං, සතිපාකාරගොපුරං;
සද්ධාසමිද්ධිසම්ඵුල්ලං, පඤ්ඤාපාසාදසොභිතං.
සම්මාජීවධජං රම්මං, හිරොත්තප්පපටිච්ඡදං;
විමුත්තාමතසම්භොගං, වෙනෙය්යජනසෙවිතං.
අභෙජ්ජං පාපවෙරීහි, පුරං සුගතමාපිතං;
අනීතිමනුපසග්ගං, පටිපන්නා මහෙසයො.
පරමස්සාසසම්පත්තා ¶ , පරිපුණ්ණමනොරථා;
සබ්බසඞ්ගමතික්කම්ම, නික්ඛන්තා අකුතො භයා.
සම්මදත්ථමභිඤ්ඤාය, මච්චුධෙය්යපහායිනො;
සබ්බදුක්ඛොඝනිත්තිණ්ණා, පාරං ගච්ඡන්ති පණ්ඩිතා.
ඉති ¶ සබ්බඞ්ගසම්පන්නං, මහෙසිගණසෙවිතං;
නෙක්ඛම්මං කාමනික්ඛන්තං, සද්ධම්මපථමුත්තමං.
විරාධෙන්ති පරාභූතා, මුච්ඡිතා යෙන දුජ්ජනා;
තං පාපසමුදාචාරං, පරියුට්ඨානමබ්රවුං.
චෙතොනීවරණං චෙතං, පඤ්ඤාචක්ඛුනිරොධනං;
සීලොපඝාතකරණං, චිත්තවික්ඛෙපසඞ්ගමො.
අයසානං පදට්ඨානං, ගුණතෙජවිනාසනං;
සබ්බසම්පත්තිදහනං, චතුරාපායසාධකං.
සබ්බාසවමලොපෙතො, සබ්බොපක්ලෙසසඤ්චයො;
පාපයක්ඛසමො චෙසො, දොසාසීවිසසඞ්ගමො.
පමාදපථමක්කන්තං, අමිත්තගණසඞ්ගමං;
මහබ්භයසමුට්ඨානං, මහාබ්යසනසඞ්කරං.
අපායදුක්ඛමාරුළ්හං, අහිතාවහිතං පදං;
සබ්බානත්ථකරං ඝොරං, සබ්බදුක්ඛවිධායකං.
ධිරත්ථු පාපධම්මානං, සබ්බකල්යාණහායිනං;
ලද්ධාපි ඛණසම්පත්ති, දුල්ලභා යෙහි නාසිතා.
තෙසං හි සමුදාචාරො, දුල්ලභං බුද්ධසාසනං;
සමුද්ධංසෙති අසනි, යථා රතනපබ්බතං.
සද්ධම්මධනචොරා තෙ, නෙක්ඛම්මපතිබන්ධකා;
පටිපත්තිං විලුම්පන්තා, පලිබුන්ධන්ති පාණිනො.
විස්සාසිවධකාපෙතෙ, විස්සට්ඨාවස්සඝාතිනො;
යෙහි බාලාහතා සෙන්ති, නිස්සයෙජිනසාසනෙ.
තෙපි ¶ වාසෙන්ති දුම්මෙධා, නිස්සඞ්කා මොහපාරුතා;
අන්තොමනසි උච්ඡඞ්කෙ, ඝොරමාසීවිසං යථා.
අත්තනො ¶ ච විනාසාය, නිස්සටං ක්ලෙසපඤ්ජරෙ;
චිනන්තා නාවබුජ්ඣන්ති, විපත්තිපථයායිනො.
හලාහලංව ඛාදන්තා, ආලිඞ්ගන්තාව පාපකං;
අවස්සමුපහඤ්ඤන්ති, පාපධම්මොපලාළිනො.
පාපචින්තා පරිබ්යුළ්හා, විතක්කමථිතා ජනා;
ලොකද්වයාපි ධංසෙන්ති, අත්ථද්වයවිනාසිනො.
කොධූපනාහි විගච්ඡා, ඉස්සාමච්ඡෙරදූසිතා;
මක්ඛී පලාසී සාරම්භී, අප්පතිස්සා අගාරවා.
මානාතිමානබහුලා, මුධාමුඛරචණ්ඩිකා;
උද්ධතා ච පමත්තා ච, දබ්බිතා කෙතුගාහිනො.
චෙතොඛිලඛිලභූතා, විනිබන්ධානුවෙඨිතා;
මහොඝො විය සස්සානි, විනාසෙන්ති තපොගුණං.
විසයස්සාදවික්ඛිත්තා, විකිණ්ණා පාකතින්ද්රියා;
මුට්ඨස්සතී කුසීතා ච, ජීවන්ති මොඝජීවිතං.
මහග්ඝසා බාහුලිකා, දුප්පඤ්ඤා කායදළ්හිකා;
ගන්ථනීවරණාබද්ධා, ඉච්ඡාලොභවසීකතා.
මලග්ගහිතසන්තානා, තිරච්ඡානකථාරතා;
විනයොපසමාපෙතා, විසමාචාරගොචරා.
දුබ්භරතා ච දුප්පොසා, සුකුමාරසුඛාලයා;
අසන්තුට්ඨා මහිච්ඡා ච, ලොලුප්පාචාරලක්ඛිතා.
දුග්ගන්ධෙනෙව සුනඛා, ආමගන්ධෙන මුච්ඡිතා;
තත්ථ තත්ථාභිධාවන්තා, න පතිට්ඨන්ති සාසනෙ.
නිල්ලජ්ජා ¶ වීතසාරජ්ජා, ලොකධම්මෙසු මුච්ඡිතා;
පාපිච්ඡා කුහනච්ඡන්නා, මිච්ඡාජීවපලොභිතා.
සඨා ¶ පගබ්භා මායාවී, අන්තොපූති අවස්සුතා;
සඞ්කස්සරසමාචාරා, කසම්බු සිථිලා ජළා.
සිඞ්ගාරචපලාචිත්තා, පූතිකායානුරාගිනො;
සීදන්තා පලිමාපන්නා, න විරුළ්හන්ති සාසනෙ.
පාපපුග්ගලසංසට්ඨා, පාපදිට්ඨිපරාගතා;
අසද්ධා ධම්මනිච්ඡින්නා, දුට්ඨා දුබ්බචනිට්ඨුරා.
සාමඤ්ඤං පරිධංසෙන්තා, දූසෙන්තා ජිනසාසනං;
අතික්කම්ම ජිනොවාදං, බාලා දුග්ගතිභාගිනො.
කාමගිද්ධා දුරාචාරා, දුස්සීලා මොහපාරුතා;
ඛජ්ජන්තා කද්දමීභූතා, ජිනසාසනකණ්ටකා.
හිතාහිතමජානන්තා, අනුරොධවිරොධිනො;
චෙතොපහතසන්තානා, විපල්ලාසපලම්භිතා.
විපන්නාකුලකම්මන්තා, පාපකාරී පරාජිතා;
සොචන්ති දීඝමද්ධානං, අපායම්හි සමප්පිතා.
ඉත්ථං හිතසමුච්ඡෙදී, කුමග්ගොයං රජාපථො;
පාපධම්මප්පවත්තීති, විදිත්වා පුන පණ්ඩිතො.
පරියුට්ඨානසංක්ලෙසං, විප්ඵරන්තං විසාරදො;
පටිසඞ්ඛාය රුන්ධෙය්ය, මන්තෙනෙව මහාවිසං.
ඛිප්පමාදිත්තචෙලොව, පාපපාවකමුට්ඨිතං;
භාවනාජලසෙකෙන, නිබ්බාපෙය්ය නිරන්තරං.
අප්පමාදෙන මෙධාවී, නගෙනෙව මහානදිං;
පාපොඝං පටිබන්ධන්තො, පිදහෙය්ය ඛණෙ ඛණෙ.
සභයං ¶ විය කන්තාරං, ඝොරමාසීවිසං යථා;
පපාතමිව ගම්භීරං, මිළ්හං විය ච පණ්ඩිතො.
පහාය ¶ පරියුට්ඨානං, නෙක්ඛම්මමධිමුච්චති;
කල්යාණමිත්තො වජ්ජෙසු, භයදස්සාවි සුබ්බතො.
කාමරාගවිසංයුත්තො, භොගධනනිරාලයො;
ඉච්ඡාලොභවිනිමුත්තො, අමමො අපරිග්ගහො.
සොරතො සඛිලො සණ්හො, මෙත්තායන්තො දයාපරො;
අනාහටමනො ධීරො, සන්තචිත්තො ඛමාපරො.
හිතෙසී සබ්බපාණීනං,
ඉස්සාමච්ඡෙරමුච්චිතො;
කොධොපනාහබ්යාපාද
විරොධොපසමෙ රතො.
අනොලීනමනො යොගී, නිච්චාරද්ධපරක්කමො;
සුසමාහිතසඞ්කප්පො, විප්පසන්නො අනාවිලො.
ඔකප්පෙන්තො විමුච්චන්තො, පඤ්ඤවා පටිපත්තියං;
පිහයන්තො මමායන්තො, සම්මාසම්බුද්ධසාසනං.
ඉති නීවරණාපෙතො, ඤාණාලොකජුතින්ධරො;
පූජෙති සම්මාසම්බුද්ධං, සද්ධම්මපටිපත්තියා.
හිරොත්තප්පගුණොපෙතො,
කල්යාණාචාරගොචරො;
මක්ඛප්පලාසරහිතො,
සප්පතිස්සො සගාරවො.
අජ්ජවාචාරචාරිත්තො, මායාසාඨෙය්යනිස්සටො;
ථම්භසාරම්භනිස්සඞ්ගො, මද්දවාචාරපෙසලො.
මානාතිමානවිමුඛො ¶ , සද්ධම්මගරුසාදරො;
පරප්පමාදනිම්මද්දී, සංවෙගබහුලො සදා.
වොදාතචිත්තසඞ්කප්පො ¶ , පාපිච්ඡාමලවජ්ජිතො;
මිච්ඡාදිට්ඨිමතික්කන්තො, සද්ධම්මෙසු පතිට්ඨිතො.
චෙතොඛිලසමුච්ඡෙදී, විනිබන්ධවිවෙඨකො;
මානසං සම්පහංසෙති, සංකිලෙසවිමුත්තියා.
පවිවිත්තො අසංසට්ඨො, සන්තො අප්පිච්ඡතාරතො;
අරියාවංසාලඞ්කාරො, සුප්පොසො සුභරො සුඛී.
සල්ලෙඛවුත්ති ධුතවා, පාපාපචයතප්පරො;
පාසාදිකසමාචාරො, පසාදබහුලො මුනි.
අනුද්ධතො අචපලො,
දන්තො ගුත්තො යතින්ද්රියො;
චෙතොසමාධිගරුකො,
සම්පජානො සතීයුතො.
උස්සාහජාතො සද්ධම්මෙ, ඡන්දජාතො නිරන්තරං;
සාතච්චකාරී ස්වාකාරො, පටිපත්තිපරායණො.
චෙතොකාළකාපගතො, භාවනාරසමුත්තමං;
රඞ්ගං නිද්ධොතවත්ථංව, සාධුකං පටිගණ්හති.
ඉති සම්පාදිතාකාරො, පරිසුද්ධමනොරථො;
නිරාදීනවසඤ්චාරො, සොත්ථිපත්තො නිරඞ්ගණො.
පාපගාහවිනිමුත්තො, රාහුමුත්තොව චන්දිමා;
ගුණරංසිපරික්ඛිත්තො, සොභෙති ජිනසාසනං.
ඉච්චාලොභමදොසඤ්ච, මොහාභාවමථාපරං;
නෙක්ඛම්මං පවිවෙකඤ්ච, තථා නිස්සරණං බුධො.
සමාරබ්භ ¶ විසොධෙන්තො, අජ්ඣාසයමසෙසතො;
ධීරො සම්පටිපාදෙති, භාවනාසුඛමුත්තමං.
තතො ¶ පණීතාධිමුත්ති, පලිබොධවිනිස්සටො;
පරිපන්ථවිනිමුත්තො, විගතාවරණාලයො.
භාවනානින්නසන්තානො, කල්ලචිත්තො විසාරදො;
කසිණාදිකමාරබ්භ, භාවෙය්ය සමථං කථං.
පථවීකසිණං තාව, විදත්ථිචතුරඞ්ගුලං;
කත්වානාරුණවණ්ණාය, මත්තිකාය සුමණ්ඩලං.
යුගමත්තෙ ඨපෙත්වාන, ඨානෙ සුඛනිසින්නකො;
පථවීති සමඤ්ඤාය, කත්වාභොගං තු භාවයෙ.
අකතෙපි ඛලාදිම්හි, අකිච්ඡෙනෙව මණ්ඩලෙ;
නිමිත්තං ජායතිච්චාහු, පුබ්බයොගවතො පන.
ආපොමණ්ඩලමුග්ගණ්හෙ, භාජනාදිගතෙ ජලෙ;
තෙජම්හි තෙජොකසිණං, පටච්ඡිද්දාදිසංගතෙ.
සස්සග්ගාදිම්හි කම්මන්තෙ, වායොකසිණමණ්ඩලං;
පටිභාගසමාචාරො, ඵුට්ඨට්ඨානෙව ජායති.
නීලාදිකසිණං වත්ථෙ, පුප්ඵෙ වා වණ්ණධාතුයං;
ආකාසමණ්ඩලං භිත්ති-ඡිද්දාදිම්හි උපට්ඨිතං.
ඡිද්දප්පවිට්ඨමාලොකං, උග්ගණ්හෙය්ය පතිට්ඨිතං;
සූරියාලොකාදිභෙදං, භූමියං වාථ භිත්තියං.
දසධා කසිණෙස්වෙවං, යත්ථ කත්ථචි යොගිනො;
පරිකම්මං කරොන්තස්ස, උග්ගහො නාම ජායති.
චිත්තස්සුපට්ඨිතෙ තස්මිං, පස්සන්තස්සෙව චක්ඛුනා;
උග්ගහම්හි නිමිත්තම්හි, පටිපාදෙය්ය භාවනං.
වික්ඛෙපං විනිවාරෙන්තො, පරිපන්ථෙ විරාජයං;
නිමිත්තාභිමුඛෙනෙව, මානසං පටිපාදයෙ.
ආසෙවන්තස්ස ¶ ¶ තස්සෙවං, චිත්තං හොති සමාහිතං;
සංක්ලෙසා සන්නිසීදන්ති, පටිභාගො ච ජායති.
තත්ථ පණ්ණත්තිසඞ්ඛාතෙ, නිමිත්තෙ භාවනාමයෙ;
තථෙව පටිභාගම්හි, තතො යුඤ්ජෙය්ය භාවනං.
තත්ථාධිමුත්තො සතිමා, නිමිත්තවිධිකොවිදො;
ඉන්ද්රියානි සමානෙන්තො, සප්පායමුපලක්ඛයං.
නිග්ගය්හ උද්ධතං චිත්තං, පග්ගය්හ ලීනමානසං;
ඌහතං සම්පහංසෙන්තො, උපෙක්ඛන්තො සමාහිතං.
රෙණුම්හි උප්පලදලෙ, සුත්තෙ නාවාය නාළියා;
යථා මධුකරාදීනං, පවත්ති සම්ම වණ්ණිතා.
චිත්තපවත්තිආකාරං, සාධුකං ලක්ඛයං බුධො;
තථා සමෙනාකාරෙන, පහිතත්තො පරක්කමෙ.
සමප්පවත්තමාකාරං, සල්ලක්ඛෙත්වා නිරන්තරං;
පදහන්තස්ස තස්සෙවං, අප්පනා නාම ජායති.
පටිභාගනිමිත්තං තු, වඩ්ඪෙය්ය කසිණං පුන;
උපචාරභූමියං වා, අප්පනායං ව කත්ථචි.
එකඞ්ගුලද්වඞ්ගුලාදි-වසෙනෙව යථාක්කමං;
ඵරන්තො මනසායෙව, නිපුණො යාවදිච්ඡකං.
තත්ථෙවං පඨමජ්ඣානං, පත්වාන පගුණං තතො;
කත්වා චිණ්ණවසීභූතා, තම්හා වුට්ඨාය පණ්ඩිතො.
විතක්කාදිකථූලඞ්ගං, පහානාය යථාක්කමං;
තථෙව පටිපජ්ජන්තො, පප්පොති දුතියාදයො.
දසධා කසිණානෙවං, භාවෙත්වා පන යොගිනො;
චතුක්කපඤ්චකජ්ඣානං, කත්වා වික්ඛෙපනිස්සටා.
සුපක්ඛාලිතුපක්ලෙසා ¶ , සන්තචිත්තා සමාහිතා;
පවිවෙකරසස්සාදං, අනුභොන්ති යථාසුඛං.
අසුභං ¶ පන භාවෙන්තො, නිමිත්තං යත්ථ කත්ථචි;
උද්ධුමාතාදිභෙදම්හි, උග්ගණ්හෙය්යාසුභෙ කථං?
එකාහාදිමතික්කන්තං, උද්ධුමාතකමීරිතං;
විගතච්ඡවි බීභච්ඡං, නීලාකාරං විනීලකං.
විකිණ්ණපුබ්බකුධිතං, පරිභින්නං විපුබ්බකං;
විච්ඡෙදිතඞ්ගපච්චඞ්ගං, විච්ඡිද්දකං කළෙවරං.
විවිධාකාරපාණෙහි, ඛජ්ජමානං විඛාදිතං;
විනාසිතඞ්ගපච්චඞ්ගං, වික්ඛිත්තන්ති පවුච්චති.
පාදාදිභඞ්ගවික්ඛිත්තං, හතවික්ඛිත්තකං මතං;
ලොහිතං ලොහිතාකිණ්ණං, පුළවං කිමිසඞ්කුලං.
අට්ඨිසඞ්ඛලිකාමත්තං, අට්ඨිකන්ති ච සබ්බථා;
සණ්ඨානාකාරභෙදෙන, දසධාසුභදෙසනා.
තත්ථෙවං දසධා භෙදෙ, නිජ්ජීවකුණපාසුභෙ;
උජ්ඣිතෙ භූමිභාගස්මිං, මතකායෙ කළෙවරෙ.
ලබ්භමානකමාකාරං, ඔලොකෙත්වා සලක්ඛණං;
උග්ගහෙත්වාන චිත්තෙන, තංතංනාමෙන භාවයෙ.
පටිකූලඤ්ච ජෙගුච්ඡං, දුග්ගන්ධඤ්ච විරූපකං;
හරායිතමජඤ්ඤඤ්ච, හීළිතං වික්ඛිතාසිවං.
ඉච්චෙවමසුභාකාරෙ,
කත්වාභොගං තු යොගිනො;
භාවෙන්තස්සුපචාරො ච,
පටිභාගො ච ජායති.
පටිභාගනිමිත්තං ¶ තු, උපචාරෙන සෙවතො;
අප්පෙති පඨමජ්ඣාන-මෙත්ථෙවං සමථෙ නයො.
විනා ¶ සද්ධම්මං පනිදං, සරීරං බාලනන්දිතං;
විපත්තිපරියොසානං, අවස්සං භෙදගාමිකං.
යථා ඉදං තථා එතං, යථා එතං තථා ඉදං;
ජීවමානඤ්ච නිජ්ජීවමෙව ධම්මපරායණං.
සභාවො සොපි දෙහස්ස,
සබ්බස්සාපි ච සබ්බථා;
විචිතබ්බා ධිරෙනාපි,
එසායං නියතා ගති.
අනිච්චං ඛයධම්මඤ්ච, දුක්ඛමෙව භයාවහං;
අනත්තා ච පරාභූතා, විබ්භිජ්ජති ඛණෙ ඛණෙ.
විනාසමානස්සාකාරං, තත්ථෙවං පන පස්සතො;
විපස්සනාභාවනාති, තමීරෙන්ති තථාගතා.
භාවනං දුවිධම්පෙතං, භාවෙන්ති පුන පණ්ඩිතා;
ජීවමානෙපි කායම්හි, තංතදාකාරසම්භවෙ.
ජීවමානොපි කායොයං,
කුණපොව සභාවතො;
තමලඞ්කාරපටිච්ඡන්නො,
බාලානං න පකාසති.
බහි මට්ඨමුපට්ඨාති, අන්තො කුණපපූරිතං;
උග්ඝරන්තං පග්ඝරන්තං, නවද්වාරමලස්සවං.
සරීරං නිච්චදුග්ගන්ධං, නානාකිමිසමාකුලං;
තචමංසපටිච්ඡන්නං, අට්ඨිපඤ්ජරසණ්ඨිතං.
වච්චකූපමිදං ¶ නාම, ද්වත්තිංසාසුචිපූරිතං;
නරානුක්කාරභූමීව, නෙකවස්සගණොචිතා.
සුසානගමනොසානං, බහුසාධාරණාසුභං;
ගණ්ඩභූතං සල්ලභූතං, බහුදුක්ඛනිබන්ධනං.
නානාබ්යාධිසමාකිණ්ණං ¶ , නානොපද්දවසංකුලං;
නානානත්ථසමොධානං, නානාසංක්ලෙසවත්ථුකං.
පොසිතම්පි චිරං කාලං, මමංකාරමමායිතං;
ලහුදුජ්ජනමිත්තොව, පීළිතං සම්පදුස්සති.
පරිහායති නිස්සාරං, ජරතාපි තං යොබ්බනං;
මච්චුභජ්ජිතමච්චන්ත-මසෙසං පරිභිජ්ජති.
තථාපි ජාලසන්තානො, බහුසම්භාරසඞ්ඛතො;
වත්ථාලඞ්කාරසඤ්ඡන්නො, මාලාගන්ධාදිසොභිතො.
සවිඤ්ඤත්තිවිකාරෙහි, විචිත්තාකාරමණ්ඩිතො;
කායො ලීළවිලාසෙහි, පලම්භෙති මහාජනං.
වඤ්චිතා යෙන දුම්මෙධා, කාමක්ලෙසමලීමයා;
පූරෙන්ති චතුරාපායං, මාරධෙය්යානුසාරිනො.
එවමාදීනවං ඤත්වා, පූතිකායෙ විචක්ඛණා;
අසුභාදිකමාකාර-මාරබ්භ ඡන්දුපට්ඨහුං.
යස්මිං පතන්ති කුණපෙ විපරීතසඤ්ඤා,
සංක්ලෙසපාපවසගා විසමං චරන්තා;
තං පස්සථෙතමසුභම්පි විනාසධම්මං,
ඉච්චෙවමාහ සුගතො දසධා විභාගං.
සත්ථාරා කසිණඤ්ච යං දසවිධං වික්ඛෙපවික්ඛම්භනං,
කාමක්ලෙසවිනාසනං දසවිධං යඤ්චාසුභං භාසිතං;
දිබ්බබ්රහ්මසුඛාවහං ¶ සමපදං විජ්ජොදයං යොගිනා,
කම්මට්ඨානමලං තමුත්තමගුණෙනාසෙවිතං සෙවිතුං.
ඉති නාමරූපපරිච්ඡෙදෙ කසිණාසුභවිභාගො නාම
අට්ඨමො පරිච්ඡෙදො.