📜
9. නවමො පරිච්ඡෙදො
දසානුස්සතිවිභාගො
සද්ධාපබ්බජිතො ¶ යොගී, භාවෙන්තොනුස්සතිං පන;
දසානුස්සතිභෙදෙසු, භාවෙය්යඤ්ඤතරං කථං.
අරහං සුගතො ලොකෙ, භගවා ලොකපාරගූ;
විජ්ජාචරණසම්පන්නො, විමුත්තිපරිනායකො.
ජෙට්ඨො සම්මාභිසම්බුද්ධො, සෙට්ඨො පුරිසසාරථී;
සත්ථා දෙවමනුස්සානං, බුද්ධො අප්පටිපුග්ගලො.
සබ්බලොකහිතො බන්ධු, සමත්තරතනාලයො;
සත්තානමනුකම්පාය, ජාතො නාථො සිවංකරො.
චක්ඛුමා තිත්ථකුසලො, ධම්මස්සාමී තථාගතො;
මච්චුධෙය්යවිමොක්ඛාය, පටිපාදයි පාණිනො.
සත්ථවාහො මහායොග්ගො, මග්ගාමග්ගයුධන්ධරො;
සිරිසත්ථමධිග්ගය්හ, විචරිත්ථ මහාපථං,
අනොමො අසමො ධීරො,
ලොකහීතපරක්කමො;
සබ්බාකාරවරොපෙතො ¶ ,
අච්ඡෙරබ්භුතපුග්ගලො.
අත්ථභූතො ධම්මභූතො,
බ්රහ්මභූතො මහායසො;
ඤාණාලොකපරිච්ඡින්න-
ඤෙය්යාසෙසපරිග්ගහො.
ආනුභාවවසිප්පත්තො, ආසභණ්ඩානනිච්චලො;
මහන්තමරියාදොයමනන්තගතිගොචරො.
සබ්බා භිඤ්ඤාබලප්පත්තො, වෙසාරජ්ජවිසාරදො;
සබ්බසම්පත්තිනිට්ඨානො, ගුණපාරමිපූරකො.
අප්පමෙය්යො ¶ මහානාගො, මහාවීරො මහාමුනි;
මහෙසී මහිතාචාරො, මහාමහො මහිද්ධිකො.
සබ්බත්ථසිද්ධිසඤ්චාරො, මහෙසීගණපූජිතො;
රාජාධිරාජමහිතො, දෙවබ්රහ්මාභිවන්දිතො.
අභිභූය තයො ලොකෙ, ආදිච්චොව නභන්තරෙ;
විරොචති මහාතෙජො, අන්ධකාරෙ පභඞ්කරො.
බ්යාමප්පභාපරික්ඛිත්තො, කෙතුමාලාහලඞ්කතො;
ද්වත්තිංසලක්ඛණාසීතිඅනුබ්යඤ්ජනසොභිතො.
ඡබ්බණ්ණරංසිලලිතො, රතනග්ඝියසන්නිභො;
සමිද්ධිරූපසොභග්ගො, දස්සනෙය්යංව පිණ්ඩිතං.
ඵුල්ලං පදුමසණ්ඩංව, කප්පරුක්ඛොවලඞ්කතො;
නභංව තාරකාකිණ්ණං, උත්තමො පටිදිස්සති.
සත්ථුකප්පමහාවීරපුත්තෙහි පරිවාරිතො;
සබ්බලොකමහිද්ධාය, ධම්මරාජා සයංවසී.
නිද්ධොතමලචන්දොව ¶ , නක්ඛත්තපරිවාරිතො;
ඛත්තසඞ්ඝපරිබ්යුළ්හො, චක්කවත්තීව සොභති.
ඉච්චානන්තගුණාකිණ්ණමසෙසමලනිස්සටං;
සබ්බසම්පත්තිදාතාරං, විපත්තිවිනිබන්ධකං.
දයාපරමහොරත්තං, භගවන්තමනුස්සරං;
භාවෙති පඤ්ඤවා යොගී, බුද්ධානුස්සතිභාවනං.
ස්වාඛාතො තෙන සද්ධම්මො, සම්බුද්ධෙන සතීමතා;
පච්චත්තපටිවෙධෙන, පස්සිතබ්බො යථාරහං.
තණ්හාදලිද්දනාසාය, මනොරථසමිද්ධියා;
කාලන්තරමනාගම්ම, පච්චක්ඛඵලදායකො.
උපනිස්සයවන්තානං, ‘‘එහි පස්සා’’ති දස්සියො;
පච්චත්තමෙව විඤ්ඤූහි, වෙදිතබ්බො සභාවතො.
සබ්බාසවසමුග්ඝාතී ¶ , සුද්ධො සොවත්ථිකො සිවො;
පිහිතාපායකුම්මග්ගො, මග්ගො නිබ්බානපත්තියා.
ක්ලෙසසංකටදුග්ගම්හා, දුක්ඛක්ඛන්ධමහබ්භයා;
ඛෙමන්තභූමිං නිය්යාති, අච්චන්තමනුපද්දවං.
පුඤ්ඤතිත්ථමිදං නාම, මඞ්ගලඤ්ච සිවඞ්කරං;
හිතොදයසුඛාධාන-මමතාහාරමුත්තමං.
අවිජ්ජාපටලුද්ධාරවිජ්ජානෙත්තොසධං වරං;
පඤ්ඤාධාරමිදං සත්ථං, ක්ලෙසගණ්ඩප්පභෙදකං.
චතුරොඝනිමුග්ගානං, සෙතුබන්ධො සමුග්ගතො;
භවචාරකරුද්ධානං, මහාද්වාරො අපාරුතො.
සොකොපායාසවිද්ධානං, පරිදෙවසමඞ්ගිනං;
සල්ලනීහරණොපායො, අච්චන්තසුඛමීරිතො.
බ්යසනොපද්දවාපෙතො ¶ , සංක්ලෙසමලනිස්සටො;
උජුසම්මත්තනියතො, පටිපත්තිවිසුද්ධියා.
සුද්ධසීලපරික්ඛාරො, සමාධිමයපඤ්ජරො;
සම්මාසඞ්කප්පචක්කඞ්ගො, සම්මාවායාමවාහනො.
සතිසාරථිසංයුත්තො, සම්මාදිට්ඨිපුරෙජවො;
එස ධම්මරථො යාති, යොගක්ඛෙමස්ස පත්තියා.
විපත්තිපටිබාහාය, සබ්බසම්පත්තිසිද්ධියා;
සබ්බඛන්ධවිමොක්ඛාය, ධම්මං දෙසෙසි චක්ඛුමා.
හිතෙසී සබ්බපාණීනං, දයාපන්නො මහාමුනි;
ධම්මාලොකං පකාසෙසි, චක්ඛුමන්තානමුත්තමො.
යං ධම්මං සම්මදඤ්ඤාය, ඛෙමමග්ගප්පතිට්ඨිතා;
පාපකාපගතා ධීරා, පස්සද්ධිදරථාසයා.
භවයොගා විනිමුත්තා, පහීනභයභෙරවා;
අච්චන්තසුඛමෙධෙන්ති, සොත්ථිපත්තා මහෙසයො.
තමෙවමුත්තමං ¶ ධම්මං, චින්තෙන්තො පන පණ්ඩිතො;
භාවෙතීති පකාසෙන්ති, ධම්මානුස්සතිභාවනං.
චත්තාරො ච පටිපන්නා, චත්තාරො ච ඵලෙ ඨිතා;
එස සඞ්ඝො උජුභූතො, පඤ්ඤාසීලසමාහිතො.
පලාපාපගතො සුද්ධො, පටිපත්තිපතිට්ඨිතො;
පරිග්ගහිතසද්ධම්මො, සමිද්ධිගුණසොභිතො.
පහීනාපායගමනො, පාපක්ලෙසවිනිස්සටො;
පරිපන්ථසමුච්ඡෙදී, භවචාරකභෙදකො.
උත්තමදමථප්පත්තො, සුවිනීතො මහෙසිනා;
විජ්ජාවිමුත්තිවොදාතො, ආජානීයපථෙ ඨිතො.
සුගතොරසි ¶ සම්භූතො, සුචිධම්මසිරින්ධරො;
පටිපාදිතසම්පත්තො, ධම්මසාසනසෙවිතො.
භයභෙරවනිස්සඞ්ගො, ජිනතෙජානුපාලිතො;
මොනෙය්යපථසඤ්චාරො, සුගතොවාදභාජනො.
අප්පමාදපරිත්තාණො, සීලාලඞ්කාරභූසිතො;
චෙතොසමාධිසන්නද්ධො, පඤ්ඤායුධසමුජ්ජලො.
උජුමග්ගමධිට්ඨාය, මාරකායප්පදාලනො;
අපරාජිතසඞ්ගාමො, ලලිතොදාතවික්කමො.
මච්චුධෙය්යමතික්කන්තො, බොධිධම්මප්පතිට්ඨිතො;
ඡළාභිඤ්ඤාබලප්පත්තො, සමාරාධිතසාසනො.
අනුබොධිමනුප්පත්තො, පභින්නපටිසම්භිදො;
සාමඤ්ඤපාරමිප්පත්තො, තොසෙති ජිනමානසං.
නෙකාකාරවරූපෙතො, නානාසම්පත්තිඵුල්ලිතො;
විපත්තිපථනිත්තිණ්ණො, අභිබුද්ධිපරායණො.
ආහුනෙය්යො ¶ පාහුනෙය්යො,
දක්ඛිණෙය්යො සුදුල්ලභො;
සදෙවකස්ස ලොකස්ස,
පුඤ්ඤක්ඛෙත්තමනුත්තරං.
යත්ථ සුද්ධිම්හි නිද්දොසෙ, සද්ධාබීජං පතිට්ඨිතං;
අච්චන්තං පරිපාචෙති, සම්පත්තිඵලමුත්තමං.
යං ඵලං පරිභුඤ්ජන්තා, විමුත්තිරසසෙවනං;
අච්චන්තසුඛිතා ධීරා, භවන්ති අජරාමරා.
තං ඵලං පත්ථයන්තෙන, සඞ්ඝානුස්සතිභාවනා;
භාවෙතබ්බා පනිච්චෙවමිති භාසන්ති පණ්ඩිතා.
පඤ්චසීලං ¶ දසසීලං, පාතිමොක්ඛමුපොසථං;
චාතුපාරිසුද්ධිසීලං, ධුතඞ්ගපරිවාරිතං.
එවමෙතෙසු යං කිඤ්චි, සමාදාය රහොගතො;
තමානිසංසං ගුණතො, ඵලතො ච විචින්තයෙ.
ආදි චෙතං පතිට්ඨා ච, මුඛං පමුඛමුත්තමං;
මූලං කුසලධම්මානං, පභවං පටිපත්තියා.
සාසනොතරණද්වාරං, තිත්ථං සද්ධම්මවාපියා;
පාරිසුද්ධිපදට්ඨානං, මග්ගො ඛෙමන්තපාපකො.
සාධු සික්ඛාසමාදානං, බාහුසච්චවිභූසනං;
අරියාචාරචාරිත්ත-මවණ්ණමලවජ්ජනං.
කුලපුත්තඅලඞ්කාරො, පාපජල්ලපවාහනං;
අනපායි සුගන්ධඤ්ච, මහාපුරිසසෙවිතං.
පච්ඡානුතාපහරණං, පීතිපාමොජ්ජවඩ්ඪනං;
නෙක්ඛම්මභාවනොපෙතං, පබ්බජ්ජාවෙසසොභනං.
සොපානං සග්ගලොකස්ස, දළ්හාපායවිධානකං;
අනුපද්දවසම්පත්ති, සමත්ථගුණසූදනී.
ක්ලෙසපඤ්ජරවිච්ඡෙදි ¶ , විපත්තිපථවාරණං;
සොත්ථිකම්මසමුට්ඨානං, අසාධාරණමඞ්ගලං.
‘‘සුලද්ධා වත මෙ ලද්ධා, සද්ධා සුගතසාසනෙ;
සීලං මෙ යස්ස කල්යාණං, පරිසුද්ධමඛණ්ඩිතං.
‘‘දුල්ලභො වත මෙ ලද්ධො,
මහාලාභො අනප්පකො;
යොහමක්ඛලිතාචාරො,
උපඝාතවිවජ්ජිතො.
‘‘ධම්මඞ්කුරිතසන්තානො ¶ , මූලජාතොස්මි සාසනෙ;
උජුමග්ගං සමාරුළ්හො, පිහිතා සභයා දිසා.
‘‘අවඤ්චා වත මෙ ජාති, ආරද්ධා ඛණසම්පදා;
පතිට්ඨිතොම්හි සද්ධම්මෙ, සඵලං මම ජීවිතං’’.
ඉත්ථං නානප්පකාරෙන, චින්තෙන්තො ගුණමත්තනො;
සීලක්ඛන්ධස්ස භාවෙති, සීලානුස්සතිභාවනං.
සද්ධාය සීලවන්තෙසු, දත්වා දානං යථාරහං;
නිද්ධොතමලමච්ඡෙරො, විවිත්තො තමනුස්සරෙ.
දානං නිධානමනුගං, අසාධාරණමුත්තමං;
අවිනාසසුඛාධානං, අච්චන්තං සබ්බකාමදං.
කොපදාහොපසමනං, මච්ඡෙරමලසොධනං;
පමාදනිද්දාවුට්ඨානං, ලොභපාසවිමොචනං.
චෙතොවිකාරදමනං, මිච්ඡාමග්ගනිවාරණං;
විත්තිලාභසුඛස්සාදො, විභවොදයමඞ්ගලං.
සද්ධාදිගුණවොදානං, අජ්ඣාසයවිකාසනං;
සතාචාරපරික්ඛාරො, තනුචෙතොවිභූසනං.
අප්පමඤ්ඤාපදට්ඨානං, අප්පමෙය්යෙන වණ්ණිතං;
මහාපුරිසචාරිත්තං, සපදානං මහෙසිනා.
ධම්මාධිගතභොගානං ¶ , සාරාදානමනුත්තරං;
මහත්තාධිගමූපායං, ලොකසන්තතිකාරණං.
අත්ථකාරී ච සම්මාහං, පරිච්චාගසමායුතො;
අත්තනො ච පරෙසඤ්ච, හිතාය පටිපන්නකා.
උජුමද්දවචිත්තොස්මි, කාලුස්සියවිනිස්සටො;
පාපසංක්ලෙසවිමුඛො, පාණභූතානුකම්පකො.
සීලවන්තපතිට්ඨොස්මි ¶ , කපණානං පරායණො;
බුද්ධසාසනුපට්ඨාකො, ඤාතිමිත්තොපජීවිකො.
දානවොස්සග්ගසම්මුඛො,
සංවිභාගරතො සුඛී;
කප්පරුක්ඛොව ඵලිතො,
ජාතො ලොකාභිවඩ්ඪියා.
පිහිතාපායමග්ගොස්මි, මග්ගද්වාරමපාරුතං;
සම්පත්තා සබ්බසම්පත්ති, දලිද්දස්ස මනාපිකං.
‘‘සංසාරද්ධානපාථෙය්යං, සබ්බදුක්ඛවිනොදනං;
සුබන්ධං මම සබ්බත්ථ, ගහිතො ච කටග්ගහො’’.
එවං දානගුණං නානප්පකාරෙන විචින්තයං;
භාවෙති දායකොයොගී, චාගානුස්සතිභාවනං.
සද්ධං සීලං සුතං චාගං, පඤ්ඤං පණ්ඩිතජාතිකො;
සම්පාදයිත්වා සද්ධම්මෙ, දෙවතායො අනුස්සරෙ.
චාතුමහාරාජිකා ච, තාවතිංසා ච යාමකා;
තුසිතා චෙව නිම්මානරතිනො වසවත්තිනො.
තදුත්තරිඤ්ච යෙ දෙවා, දිබ්බකායමධිට්ඨිතා;
තෙපි සද්ධාදිධම්මෙසු, චිරකාලං පතිට්ඨිතා.
සුසමාහිතසඞ්කප්පා, දානසීලධුරන්ධරා;
ධම්මමග්ගමධිට්ඨාය, හිරොත්තප්පපුරක්ඛතා.
තං ¶ ලොකමුපපන්නාසෙ, සස්සිරීකං පරායණං;
ඉද්ධිමන්තො ජුතිමන්තො, වණ්ණවන්තො යසස්සිනො.
දිබ්බසම්පත්තිසම්පත්තා, නානාභොගසමප්පිතා;
පාලෙන්තො දීඝමද්ධානං, අනුභොන්ති මහාසුඛං.
තෙ ¶ සබ්බෙපි ච මය්හම්පි, විජ්ජන්ති අනුපායිනො;
සද්ධාදිකුසලා ධම්මා, දෙවධම්මාති විස්සුතා.
සද්ධම්මගුණසම්පත්ති-දාතා මඞ්ගලනායිකා;
දුල්ලභාපි ච මෙ ලද්ධා, සද්ධා සුගතසාසනෙ.
වජ්ජොපවාදරහිතො, පාපකම්මපරම්මුඛො;
පරිසුද්ධසමාචාරො, පසන්නාමලචෙතනො.
නිච්චමොහිතසොතොස්මි,
තථාගතසුභාසිතෙ;
සුතභාජනභූතො ච,
සතිමා සුසමාහිතො.
මච්ඡෙරමලනිත්තිණ්ණො, ලොභක්ඛන්ධවිමුච්චිතො;
ඔපානභූතො ලොකස්මිං, විස්සට්ඨසුඛයාචනො.
වත්ථුත්තයමහත්තෙ ච, හිතාහිතවිනිච්ඡයෙ;
පඤ්ඤා වත්ථුසභාවෙ ච, තිඛිණා මම වත්තති.
සමාරාධිතසද්ධම්මො, කතපුඤ්ඤමහුස්සවො;
දෙවධම්මසමිද්ධොස්මි, කල්යාණචරිතාකරො.
දෙවතාහි සමානොහං, ගුණාලඞ්කාරභූසිතො;
හත්ථපත්තා ච දෙවිද්ධි, නිප්ඵන්නා දිබ්බසම්පදා.
දෙවසාමඤ්ඤමිච්චෙවං, චින්තෙන්තො ගුණමත්තනො;
භාවෙති ගුණසම්පන්නො, දෙවතානුස්සතිං පරං.
ජාතිධම්මා ජරාබ්යාධිසොකොපායාසභඤ්ජිතෙ;
අනිච්චෙ දුක්ඛෙනත්තෙ ච, නිබ්බින්නොපධිසම්භවෙ.
විරාගො ¶ ච නිරොධො ච, චාගො මුත්ති අනාලයො;
යොයමාදානනිස්සග්ගො, නිබ්බානමිති වුච්චති.
උපසන්තමිදං ¶ ඨානමිති චින්තෙති පණ්ඩිතො;
අනුපාදානසංක්ලිට්ඨමසඞ්ඛාරමනාසවං.
අප්පමාණං පණීතඤ්ච, සිවං පරමමච්චුතං;
අනන්තගුණමච්චන්ත-මවිකාරමනාමයං.
ඛෙමං තං පාරිමතීර-මහායනකරං පරං;
තාණං ලෙණඤ්ච දීපඤ්ච, පතිට්ඨානං පරායණං.
වට්ටානුබන්ධවිච්ඡෙදො, භවතණ්හාවිසොසනං;
සබ්බූපධිසමුග්ඝාතො, දුක්ඛනිබ්බාපනං සුඛං.
සබ්බපාපවිනාසොයං, සබ්බක්ලෙසවිසොධනං;
සොකොපායාසසන්තාපභයභෙරවමොචනං.
පලිබොධසමුච්ඡෙදො, පපඤ්චවිනිවෙඨනං;
සබ්බසඞ්ඛාරසමථො, සබ්බලොකවිනිස්සටො.
පාරිසුද්ධිකරා ධාතු, භවනිස්සරණං පදං;
උත්තමාරියසම්පත්ති, අනොමමමතං පදං.
සබ්බථා භද්දමතුලං, නිබ්බානමිති පස්සතො;
උපසමානුස්සතීති, භාවනායං පවුච්චති.
සත්තානුස්සතිමිච්චෙවං, භාවෙන්තො පන පණ්ඩිතො;
පාමොජ්ජබහුලො හොති, පසන්නො බුද්ධසාසනෙ.
පටිපස්සද්ධදරථ-මුපචාරසමාධිනා;
සමාධියති චිත්තඤ්ච, පරිසුද්ධමනාමයං.
භාවනාමයමෙතඤ්ච, කත්වා පුඤ්ඤමනප්පකං;
වාසනාගතිසම්පත්ති-භොගභාගීති වුච්චති.
උපනිස්සයසම්පන්නො, පත්වා නිබ්බෙධමුත්තමං;
දිට්ඨෙව ධම්මෙ දුක්ඛග්ගිං, නිබ්බාපෙති අනාසවො.
ලොකප්පවත්ති ¶ ¶ චින්තෙත්වා, මරණානුස්සතිං පන;
භාවෙය්ය සකමච්චන්තං, චින්තෙන්තො මරණං කථං.
අනිමිත්තමනඤ්ඤාතං, මච්චානමිධ ජීවිතං;
කසිරඤ්ච පරිත්තඤ්ච, තඤ්ච දුක්ඛෙන සංයුතං.
අප්පොදකම්හි මච්ඡෙව, බන්ධමානෙ රුදම්මුඛෙ;
මච්චු ගච්ඡති ආදාය, පෙක්ඛමානෙ මහාජනෙ.
පුරක්ඛත්වාව මරණං, ජායන්ති පටිසන්ධියං;
ජාතා පුන මරිස්සන්ති, එවංධම්මා හි පාණිනො.
යමෙකරත්තිං පඨමං, ගබ්භෙ වසති මානවො;
අබ්භුට්ඨිතොව සො යාති, ස ගච්ඡං න නිවත්තති.
සත්තා මරන්ති ගබ්භෙපි, ජායමානා ච දාරකා;
කුමාරා යොබ්බනප්පත්තා, බලප්පත්තා මහත්තරා.
අථාවස්සං මරන්තෙව, ජිණ්ණා දණ්ඩපරායණා;
සූරා පුඤ්ඤබලත්ථාමා, නානාබ්යාධිනිපීළිතා.
අජ්ජ සුවෙති මරණං, පරියෙසති පාණිනො;
සෙනා යුද්ධපයාතාව, සබ්බෙ මච්චුභයාකුලා.
සත්තාරතනලඞ්කාරා, චතුරිද්ධිසමුග්ගතා;
චක්කවත්තී මහාතෙජා, රාජමණ්ඩලසොභිනො.
කප්පුට්ඨානමහාවාතා, පාතිතාව මහාසිලා;
පතන්ති මච්චුවික්ඛිත්තා, පරො චෙතාන මානවා.
යෙපි දීඝායුකා දෙවා, වණ්ණවන්තා මහිද්ධිකා;
ආනුභාවබලප්පත්තා, මහාභොගසුඛෙධිනො.
තෙපි මච්චුසමුද්ධත්තා, භවන්ති භයසංකුලා;
වෙරම්භක්ඛිත්තපක්ඛීව, මාදිසෙසු කථාව කා.
අච්චන්තරායබහුලො ¶ , මරණාහිතසම්භවො;
නිච්චං චක්කසමාරුළ්හො, ලොකොයං පරිවත්තති.
එත්ථන්තරෙ ¶ මරණස්ස, වෙමජ්ඣෙ මම වත්තතො;
අස්සාසෙපි අවිස්සට්ඨෙ, ජීවිකා චෙ කථාව කා.
අච්ඡෙරං වත ලොකස්මිං, ඛණමත්තම්පි ජීවිතං;
නිස්සිතොපද්දවට්ඨානෙ, මහාබ්යසනපීළිතෙ.
අද්ධුවං ජීවිතං නිච්ච-මච්චන්තං මරණං මම;
සභාවො මරණන්තෙව, විසෙසො පන ජීවිතං.
අත්ථමාරබ්භ ගච්ඡන්තො, ආදිච්චොව නභන්තරෙ;
මරණායාභිධාවන්තො, විහායාමි සුවෙ සුවෙ.
වජ්ඣප්පත්තො මහාචොරො,
නිය්යාතාඝාතනං යථා;
මරණාය පයාතොහං,
තථෙවමනිවත්තියො.
අම්බුජොව වඞ්කඝස්තො, තාණලෙණවිවජ්ජිතො;
නිච්චං මච්චුවසං යන්තො, විස්සට්ඨො කිමහං චරෙ.
කො මෙ හාසො කිමානන්දො,
කිමහං මොහපාරුතො;
මදප්පමාදවික්ඛිත්තො,
විචරාමි නිරඞ්කුසො?
හන්දාහමාරභිස්සාමි, සම්මාසම්බුද්ධසාසනෙ;
ආතාපී පහිතත්තො ච, හිරොත්තප්පසමාහිතො.
පටිපත්තිපරො හුත්වා, පාපධම්මනිරඞ්කතො;
නිබ්බාපයාමි අච්චන්තං, සබ්බදුක්ඛහුතාවහං.
ඉත්ථං ¶ පනත්තනො යොගී, මරණං පටිචින්තයං;
මරණානුස්සතිං නාම, භාවෙතීති පවුච්චති.
තදෙතං ¶ පන භාවෙත්වා, උපචාරසමාහිතො;
නිබ්බෙදබහුලො හොති, අප්පමාදධුරන්ධරො.
මිච්ඡාධම්මං විරාජෙත්වා, නන්දිරාගනිරාලයො;
සබ්බාසවපරික්ඛීණො, පප්පොති අමතං පදං.
ගහෙත්වා පන මෙධාවී, ද්වත්තිංසාකාරභාවනං;
කරෙය්ය තාව පච්ඡා වෙ, අනුපුබ්බමභිණ්හසො.
කෙසා ලොමා නඛා දන්තා, තචො මංසං නහාරු ච;
අට්ඨි ච මිඤ්ජ වක්කං ච, හදයං යකනං තථා.
කිලොමං පිහක පප්ඵාසං, අන්තං ගුණමුදරියං;
මත්ථලුඞ්ගං කරීසඤ්ච, පිත්තං සෙම්හමථාපරං.
පුබ්බො ච ලොහිතං සෙදො,
මෙදො අස්සු වසාථ වා;
ඛෙළො සිඞ්ඝාණිකා චෙව,
ලසිකා මුත්තමිච්චපි.
ඝනබන්ධසුභාකාර-විපල්ලාසානුසාරිනං;
යථාභූතාවබොධාය, විභත්තාව මහෙසිනා.
කායෙ බාත්තිංස කොට්ඨාසා,
කුණපාව සමුස්සිතා;
සාරගය්හූපගාපෙතා,
ධික්කතා ධීරහීළිතා.
අසුභාව පටික්කූලා, ජෙගුච්ඡා සුචිවජ්ජිතා;
නින්දිතා චක්ඛුමන්තෙහි, අන්ධබාලොපලාළිතා.
විචිත්තඡවිසඤ්ඡන්නා ¶ , තචභත්තසමොහිතා;
පරිස්සවපරික්ලිට්ඨා, කුථිතා පූතිගන්ධිතා.
ධොවියන්තාපි ¶ සතතං, අජහන්තා මලස්සවං;
සුගන්ධානුවිලිත්තාපි, දුග්ගන්ධපරිණාමිනො.
අහංකාරමමත්තෙන, විස්සට්ඨසුඛසඞ්ගහා;
සඞ්ඝාටඝනසම්බද්ධා, සම්මොහෙන්ති මහාජනං.
ඡන්දරාගසමූපෙතා, යත්ථ මුළ්හා පුථුජ්ජනා;
සෙවන්ති විසමං ඝොරං, චතුරාපායභාගිනො.
තත්ථ චිත්තං විරාජෙතුං, පටිපන්නො යථාක්කමං;
චෙතොවිභාවනත්ථාය, කොට්ඨාසෙසු විචක්ඛණො.
වචසා මනසා චෙව, යථාවුත්තානුසාරතො;
අනුලොමපටිලොමං, සජ්ඣායිත්වා තතො පරං.
වණ්ණසණ්ඨානදිසතො, වවත්ථපෙය්ය පණ්ඩිතො;
තතොකාසපරිච්ඡෙදා, පච්චෙකං තු යථාක්කමං.
වණ්ණසණ්ඨානගන්ධා ච,
ආසයොකාසතො තතො;
විභාවෙය්යාසුභාකාර-
මෙකෙකස්මිං තු පඤ්චධා.
දසධාභොගමිච්චෙවං, කත්වා භාවයතො පන;
සන්තිභූතා පකාසෙන්ති, රථචක්කාරසාදිසා.
හිත්වා අප්පගුණෙ තත්ථ, ගණ්හං සුප්පගුණං බුධො;
අප්පනං පටිභාගඤ්ච, පප්පොතෙකෙකවත්ථුසු.
අසුභාකාරමාරබ්භ, භාවනා චෙ පවත්තති;
කම්මට්ඨානං පටික්කූලං, පඨමජ්ඣානිකං සියා.
නීලාදිවණ්ණමාරබ්භ, පටිභාගො යදා තදා;
නීලාදිකසිණං හුත්වා, පඤ්චකජ්ඣානිකං භවෙ.
ලක්ඛණාකාරමාරබ්භ ¶ , චින්තනා චෙ පවත්තති;
විපස්සනාකම්මට්ඨාන-මිති භාසන්ති පණ්ඩිතා.
තිධා ¶ පභෙදමිච්චෙවං, භාවෙන්තො පුන බුද්ධිමා;
කායගතාසතිං නාම, භාවෙතීති පවුච්චති.
සොයමජ්ඣත්තං නිබ්බින්නො, බහිද්ධා ච නිරාලයො;
උබ්බෙගබහුලො යොගී, පමාදමතිවත්තති.
කාමබන්ධවිනිමුත්තො, පාපා මෙධාවි නිස්සටො;
සච්ඡිකත්වාන සාමඤ්ඤං, අමතං පරිභුඤ්ජති.
ආනාපානස්සතිං නාම, සම්මාසම්බුද්ධවණ්ණිතං;
කම්මට්ඨානාධිරාජානං, භාවෙන්තො පන පණ්ඩිතො.
අප්පනඤ්චොපචාරඤ්ච, සමථඤ්ච විපස්සනං;
ලොකුත්තරං ලොකියඤ්ච, සුඛෙනෙවාධිගච්ඡති.
සුඛුමා නිපුණා තික්ඛා, පරිපක්කා බලෙ ඨිතා;
බොධිපක්ඛියධම්මා ච, වොදායන්ති විසෙසතො.
කම්මට්ඨානෙ තථා හෙත්ථ, ගණනා අනුබන්ධනා;
ඵුසනා ඨපනා චෙව, සල්ලක්ඛණවිවට්ටනා.
පාරිසුද්ධි තතො පච්ඡා, තෙසඤ්ච පටිපස්සනා;
ඉච්චෙවමට්ඨධා භෙදා, මාතිකායං පකාසිතා.
විභත්තා සතිපට්ඨාන-වසා සොළසධා තතො;
ආනාපානප්පභෙදෙන, භින්නා ද්වත්තිංසධා පුන.
තමෙව පරියාදාය, සමථඤ්ච විපස්සනං;
මහත්තවෙපුල්ලගතං, භාවෙය්ය සතිමා කථං.
ආනාපානං පරිග්ගය්හ, පවිවිත්තො රහොගතො;
ගණෙය්ය පඨමං තාව, නිසින්නො සුඛමාසනෙ.
පඤ්චන්නං ¶ න ඨපෙතබ්බං, හෙට්ඨා න දසතොපරි;
නෙතබ්බමනුපුබ්බෙන, ගණෙතබ්බමඛණ්ඩිතං.
අන්තො ¶ බහි ච වික්ඛෙප-මකත්වාන පුනප්පුනං;
ඵුට්ඨට්ඨානම්හි සතිමා, අනුබන්ධෙය්ය මානසං.
නාසිකග්ගොත්තරොට්ඨෙ ච, කත්වාභොගං තතොපරං;
සතතස්සාසසම්ඵස්සං, ආවජ්ජන්තස්ස යොගිනො.
පුථුලං වාථ දීඝං වා, මණ්ඩලං වාථ විත්ථතං;
තාරකාදිසමාකාරං, නිමිත්තං තත්ථ ජායති.
චිත්තං සමාහිතං හොති, උපචාරසමාධිනා;
උපක්ලෙසා පහිය්යන්ති, පටිභාගෙ සමුට්ඨිතෙ.
නිමිත්තෙ ඨපයං චිත්තං, තතො පාපෙති අප්පනං;
පඤ්චජ්ඣානවසෙනායං, සමථෙ භාවනානයො.
ආරභිත්වාභිනිවෙස-මානාපානෙ පුනාපරො;
අජ්ඣත්තඤ්ච බහිද්ධා ච, තතො තදනුසාරතො.
භූමිධම්මෙ යථාභූතං, විපස්සිත්වා විසාරදො;
අප්පෙතානුත්තරජ්ඣාන-මයං සුද්ධිවිපස්සනා.
ආනාපානසමාපත්තිං, කත්වා පාදකමුත්තරං;
භාවෙන්තස්ස වසෙනාහු, නයං සොළසධා කථං.
දීඝමස්සාසපස්සාසා, රස්සං වාථ තථා ද්වයං;
සතිමා මතිසම්පන්නො, පඨමං පරිගණ්හති.
ආදිමජ්ඣාවසානං තු, කරොන්තො විදිතං තථා;
සමාහිතො සබ්බකාය-පටිසංවෙදි සික්ඛති.
තතො තෙ එව සඞ්ඛාරෙ, පස්සම්භෙන්තොපරූපරි;
වුත්තො පස්සම්භයං කායසඞ්ඛාරං සික්ඛතීති ච.
ආනාපානසතිච්චෙවං ¶ , කායසඞ්ඛාරනිස්සිතා;
කායානුපස්සනා නාම, චතුධාපි ච භාසිතා.
සම්පයුත්තෙන ¶ ඤාණෙන, පීතිමාලම්බණෙන ච;
විපස්සනාය සමථෙ, කුබ්බන්තො පාකටං සුඛං.
වෙදනාසඤ්ඤාසඞ්ඛාතෙ, චිත්තසඞ්ඛාරකෙ තථා;
පීතාදිපටිසංවෙදී, සික්ඛතීති පවුච්චති.
ථූලෙ තෙ එව සඞ්ඛාරෙ, සමෙතුං පරිභාවයං;
වුත්තො ‘‘පස්සම්භයං චිත්තං, සඞ්ඛාරං සික්ඛතී’’ති ච.
තස්සා තංතංමුඛෙනෙත්ථ, සම්පජ්ජනවිසෙසතො;
වෙදනානුපස්සනාය, චතුධා සමුදීරිතා.
අප්පෙන්තො පච්චවෙක්ඛන්තො, බුජ්ඣන්තො ච පකාසිතං;
කරොන්තො මානසං චිත්ත-පටිසංවෙදි සික්ඛති.
තමෙවාභිප්පමොදෙන්තො, සප්පීතිකසමාධිනා;
‘‘අභිප්පමොදයං චිත්තං, සික්ඛතී’’ති පවුච්චති.
අප්පනායොපචාරෙන, තමෙවාථ සමාදහං;
යොගී ‘‘සමාදහං චිත්තං, සික්ඛතී’’ති පකාසිතො.
පච්චනීකෙහි වික්ඛම්භ-සමුච්ඡෙදෙහි මොචයං;
තථා ‘‘විමොචයං චිත්තං, සික්ඛතී’’තිපි භාසිතො.
ආනාපානං පභෙදාය, කම්මට්ඨානං යථාරහං;
චිත්තානුපස්සනා නාම, පවත්තායං චතුබ්බිධා.
විපස්සනායනිච්චානු-ගතත්තා හි විසෙසතො;
විපස්සන්තො අනිච්චානු-පස්සී සික්ඛති පණ්ඩිතො.
තතො විරාගානුපස්සී, නිබ්බින්දිත්වා විරාජයං;
තථා නිරොධානුපස්සී, භූමිධම්මෙ නිරොධයං.
පක්ඛන්දනපරිච්චාගපටිනිස්සග්ගතො ¶ පන;
පටිනිස්සග්ගානුපස්සී, සික්ඛතීති පවුච්චති.
ආනාපානමුඛෙනෙව ¶ , භූමිධම්මවිපස්සනා;
ධම්මානුපස්සනා නාම, භාසිතෙවං චතුබ්බිධා.
ඉති සොළසධාකාරං, සික්ඛත්තයපතිට්ඨිතං;
චතුබ්බිධම්පි පූරෙති, සතිපට්ඨානභාවනං.
පරිග්ගය්හ සතිඤ්චෙව-මුස්සාහන්තො විපස්සනං;
ද්වත්තිංසාකාරභෙදෙහි, සතොකාරීති වුච්චති.
ඉත්ථඤ්ච ගණනාදීහි, භාවෙත්වා සමථං තතො;
විපස්සනාධිවචනං, කත්වා සල්ලක්ඛණං පුන.
පත්වා විවට්ටනාමග්ගං, පාරිසුද්ධිඵලෙ ඨිතො;
පච්චවෙක්ඛණසඞ්ඛාතං, පප්පොති සතිපස්සනං.
ආනාපානසතිච්චෙවමසෙසං පරිපූරිතා;
සාකාරං සප්පභෙදඤ්ච, භාවිතාති පවුච්චති.
ආනාපානසමාධිමෙතමතුලං බුද්ධාපදානුත්තමං,
පාපක්ලෙසරජොහරං සුඛමුඛං දුක්ඛග්ගිනිබ්බාපනං;
භාවෙත්වා සතිසම්පජඤ්ඤවිපුලා වික්ඛෙපවිද්ධංසකා,
පප්පොන්තුත්තරමුත්තමාමතපදං බොධිත්තයබ්යාපකං.
බුද්ධං ධම්මඤ්ච සඞ්ඝං පුථුනනමහිතං සුද්ධසීලං සුදානං,
ධම්මට්ඨා දෙවතායොපසමථ මරණං කායමානඤ්චපානං;
පඤ්ඤත්තාරබ්භයායං සතිසමවහිතා බොධිමග්ගොදයාය,
සායං සද්ධම්මනෙත්තී සහිතසිවගුණා සෙවිතබ්බාදරෙන.
ඉති නාමරූපපරිච්ඡෙදෙ දසානුස්සතිවිභාගො නාම
නවමො පරිච්ඡෙදො.