📜

දුතියො පරිච්ඡෙදො

2. පකිණ්ණකකථා

46.

කුසලානෙකවීසෙව ¶ ¶ , ද්වාදසාකුසලානි ච;

ඡත්තිංසති විපාකානි, ක්රියාචිත්තානි වීසති.

47.

කාමෙසු චතුපඤ්ඤාස, රූපෙසු දස පඤ්ච ච;

ද්වාදසාරුප්පචිත්තානි, අට්ඨානුත්තරමානසා.

48.

කාමෙ තෙවීස පාකානි, පුඤ්ඤාපුඤ්ඤානි වීසති;

එකාදස ක්රියා චෙති, චතුපඤ්ඤාස සබ්බථා.

49.

පුඤ්ඤපාකක්රියාභෙදා, තයො රූපෙසු පඤ්චකා;

ආරුප්පෙති චතුක්කානි, සත්තවීස මහග්ගතා.

50.

චතුමග්ගඵලානං තු, වසෙනට්ඨපි ඣානතො;

දසොභයම්පි මිස්සෙත්වා, තාලීසානුත්තරා සියුං.

51.

පුඤ්ඤපාකක්රියාපාපා, සන්ති කාමෙ මහග්ගතෙ;

පාපං නත්ථි ක්රියාපාපා, න විජ්ජන්ති අනුත්තරෙ.

52.

පාපාහෙතුකමුත්තානි, අනවජ්ජානි සබ්බථා;

එකූනසට්ඨි චිත්තානි, පුඤ්ඤපාකක්රියාවසා.

53.

කම්මචිත්තානි තෙත්තිංස, පුඤ්ඤාපුඤ්ඤානි සබ්බථා;

ඡත්තිංස තෙසං පාකානි, ක්රියා වීස න චොභයං.

54.

චක්ඛුවිඤ්ඤාණධාතාදි, පඤ්චවිඤ්ඤාණනාමකා;

පඤ්චද්වාරාවජ්ජනඤ්ච, දුවිධං සම්පටිච්ඡනං.

55.

මනොධාතුත්තයං නාම, ඡසත්තති තතො පරෙ;

මනොවිඤ්ඤාණධාතූති, සත්තධා ධාතුභෙදතො.

56.

මනොවිඤ්ඤාණධාතුඤ්ච ¶ , මනොධාතුත්තයං තථා;

කත්වා මනොවිඤ්ඤාණන්ති, ඡ විඤ්ඤාණා පකිත්තිතා.

57.

ආවජ්ජනං දස්සනඤ්ච, සවනං ඝායනං තථා;

සායනං ඵුසනඤ්චෙව, සම්පටිච්ඡනතීරණං.

58.

වොට්ඨබ්බනඤ්ච ¶ ජවනං, තදාරම්මණනාමකං;

භවඞ්ගං චුති සන්ධීති, චිත්තං චුද්දසධා ඨිතං.

59.

ආවජ්ජනාදයො ද්වෙ ද්වෙ, යුගා සත්ත යථාක්කමං;

තීණි තීරණචිත්තානි, එකං වොට්ඨබ්බනං මතං.

60.

කුසලාකුසලා සබ්බෙ, ඵලා චාවජ්ජනං විනා;

ක්රියා ච පඤ්චපඤ්ඤාස, ජවනන්ති පවුච්චරෙ.

61.

සන්තීරණමහාපාකා, තදාරම්මණනාමකා;

එකාදස පවත්තන්ති, ජවනාරම්මණෙ යතො.

62.

මහග්ගතමහාපාකා, උපෙක්ඛාතීරණද්වයං;

චුතිසන්ධිභවඞ්ගානි, චිත්තානෙකූනවීසති.

63.

ජවනාවජ්ජනාදීනි, වොට්ඨබ්බසුඛතීරණා;

මහග්ගතමහාපාකා, උපෙක්ඛාතීරණාති ච.

64.

අට්ඨසට්ඨි තථා ද්වෙ ච, නවට්ඨ ද්වෙ යථාක්කමං;

එකද්විතිචතුප්පඤ්චකිච්චට්ඨානානි නිද්දිසෙ.

65.

රූපපාකා මහාපාකා, මනොධාතු ච තීරණං;

රූපං ජනෙන්ති එකූනවීසති නෙතරද්වයං.

66.

අභිඤ්ඤාවජ්ජිතා සබ්බෙ, අප්පනාජවනා පන;

රූපං ජනෙන්ති ඡබ්බීස, පණාමෙන්තිරියාපථං.

67.

අභිඤ්ඤාද්වයවොට්ඨබ්බපරිත්තජවනා පන;

ද්වත්තිංස රූපවිඤ්ඤත්තිඉරියාපථසාධකා.

68.

පඤ්චවිඤ්ඤාණමාරුප්ප-විපාකා ¶ සබ්බසන්ධියො;

චුති ඛීණාසවස්සෙති, සොළසෙතෙ න කිඤ්චිපි.

69.

රූපං ජනෙන්ති චිත්තානි, සත්තසත්තති සබ්බථා;

අට්ඨපඤ්ඤාස චිත්තානි, පණාමෙන්තිරියාපථං.

70.

ද්වත්තිංස ¶ චතුවිඤ්ඤත්තිං, සමුට්ඨාපෙන්ති මානසා;

න ජනෙන්ති තස්සම්පෙකං, යථාවුත්තානි සොළස.

71.

සොමනස්සසහගතා, පරිත්තජවනා පන;

හසනම්පි ජනෙන්තීති, චතුකිච්චානි තෙරස.

72.

සබ්බම්පි පඤ්චවොකාරෙ, කිච්චමෙතං පකාසිතං;

ආරුප්පෙ පන සබ්බම්පි, රූපායත්තං න විජ්ජති.

73.

අසඤ්ඤීනං තු සබ්බානි, චිත්තානෙව න ලබ්භරෙ;

රූපක්ඛන්ධොව තෙසං තු, අත්තභාවොති වුච්චති.

74.

පාණාතිපාතථෙය්යාදිවසෙනොපචිතං පන;

උද්ධච්චරහිතාපුඤ්ඤං, චතුරාපායභූමියං.

75.

දත්වා සන්ධිං පවත්තෙ තු, පඤ්චවොකාරභූමියං;

උද්ධච්චසහිතඤ්චාපි, සත්ත පාකානි පච්චති.

76.

දානසීලාදිභෙදෙන, පවත්තං කුසලං පන;

කාමෙ මානසමුක්කට්ඨං, චතුක්කං තු තිහෙතුකං.

77.

දත්වා තිහෙතුකං සන්ධිං, කාමෙ සුගතියං පන;

සොළස පුඤ්ඤපාකානි, පවත්තෙ තු විපච්චති.

78.

තිහෙතුකොමකං පුඤ්ඤං, උක්කට්ඨඤ්ච ද්විහෙතුකං;

දත්වා ද්විහෙතුකං සන්ධිං, කාමෙ සුගතියං තථා.

79.

පවත්තෙ පන ඤාණෙන, සම්පයුත්තං විවජ්ජිය;

ද්වාදස පුඤ්ඤපාකානි, විපච්චති යථාරහං.

80.

ද්විහෙතුකොමකං ¶ පුඤ්ඤං, පටිසන්ධිමහෙතුකං;

දෙති මානුසකෙ චෙව, විනිපාතාසුරෙ තථා.

81.

අට්ඨාහෙතුකපාකානි, පවත්තෙ තු විපච්චරෙ;

චත්තාරිපි චතුක්කානි, පඤ්චවොකාරභූමියං.

82.

භාවනාමයපුඤ්ඤං ¶ තු, මහග්ගතමනුත්තරං;

යථාභූමිනියාමෙන, දෙති පාකං යථාසකං.

83.

කටත්තාරූපපාකානි, පඤ්චවොකාරභූමියං;

ආරුප්පානුත්තරෙ පාකං, තථා රූපමසඤ්ඤිසු.

84.

පුඤ්ඤාපුඤ්ඤානි කම්මානි, තෙත්තිංසාපි ච යබ්බථා;

සඤ්ජනෙන්ති යථායොගං, පටිසන්ධිපවත්තියං.

ඉති චිත්තවිභාගෙ පකිණ්ණකකථා නිට්ඨිතා.

දුතියො පරිච්ඡෙදො.