📜
සත්තවීසතිමො පරිච්ඡෙදො
5. පඤ්ඤත්තිවිභාගො
27. පභෙදකථා
චිත්තං ¶ චෙතසිකං රූපං, නිබ්බානම්පි ච භාජිතං;
තස්මා දානි යථායොගං, පඤ්ඤත්තිපි පවුච්චති.
සා චායං අත්ථපඤ්ඤත්ති-නාමපඤ්ඤත්තිභෙදතො;
දුවිධා හොති පඤ්ඤත්ති, අත්ථපඤ්ඤත්ති තත්ථ ච.
සත්තසම්භාරසණ්ඨාන-සඞ්ඝාටපරිණාමතො;
විකප්පුපට්ඨානාකාරවොහාරාභිනිවෙසතො.
තථා පවත්තසඞ්කෙතසිද්ධා අත්ථා පකප්පිතා;
පඤ්ඤාපීයන්ති නාමාති, පඤ්ඤත්තීති පකිත්තිතා.
අත්ථා හි පරමත්ථත්ථා, පඤ්ඤත්තත්ථාති ච ද්විධා;
තත්ථ ච පරමත්ථත්ථා, සච්චිකට්ඨා සලක්ඛණා.
පඤ්ඤත්තත්ථා ¶ සච්චිකට්ඨසලක්ඛණසභාවතො;
අඤ්ඤථා ගහිතා තංතමුපාදාය පකප්පිතා.
තස්මා උපාදාපඤ්ඤත්ති, අත්ථපඤ්ඤත්තිනාමකා;
පඤ්ඤපෙතබ්බනාමාව, පඤ්ඤත්තත්ථාව සබ්බථා.
පරමත්ථා යථාවුත්තා, චිත්තචෙතසිකාදයො;
පඤ්ඤත්තා ඉත්ථිපුරිසමඤ්චපීඨපටාදයො.
යෙන වුච්චති තං නාමං, පඤ්ඤපෙතීති වුච්චති;
පඤ්ඤත්තීති ච සා නාමපඤ්ඤත්තීති තතො මතා.
සඞ්ඛා ¶ සමඤ්ඤා පඤ්ඤත්ති, වොහාරොති ච භාජිතා;
චතුධා පඤ්ඤපෙතබ්බපඤ්ඤත්තීති හි වණ්ණිතා.
තතො නාමං නාමකම්මං, නාමධෙය්යං අථාපරං;
නිරුත්ති බ්යඤ්ජනමභිලාපොති පන භාජිතා.
නාමපඤ්ඤත්ති නාමාති, පඤ්ඤත්ති දුවිධා කතා;
සබ්බෙව ධම්මා පඤ්ඤත්තිපථාති පන භාජිතා.
පරමත්ථපඤ්ඤත්තත්ථා, දුවිධා හොන්ති තත්ථ ච;
පඤ්ඤත්තිපථාව හොන්ති, පරමත්ථා සලක්ඛණා.
පඤ්ඤත්තත්ථා පඤ්ඤත්ති ච, පඤ්ඤපෙතබ්බමත්තතො;
පඤ්ඤත්තිපථා ච නාමපඤ්ඤත්තිපථභාවතො.
නාමම්පි පඤ්ඤාපෙතබ්බමෙව කිඤ්චාපි කෙනචි;
නාමමෙවම්පෙතං තත්ථ, පඤ්ඤත්තිච්චෙව වණ්ණිතං.
පඤ්ඤපෙතබ්බධම්මා ච, තෙසං පඤ්ඤාපිතාපි ච;
ඉච්ඡිතබ්බාපි පඤ්ඤත්තිපථා පඤ්ඤත්තිනානතා.
ඉති වුත්තානුසාරෙන, වුත්තං අට්ඨකථානයෙ;
නයං ගහෙත්වා එත්ථාපි, පඤ්ඤත්ති දුවිධා කතා.
තස්මිම්පි ¶ පරමත්ථා ච, සච්චිකට්ඨසලක්ඛණා;
අත්ථා පඤ්ඤත්තිමත්තා ච, අත්ථපඤ්ඤත්තිනාමකා.
තෙසං පඤ්ඤාපිකා චෙව, නාමපඤ්ඤත්තිනාමිකා;
ඉච්චෙවං වණ්ණනාමග්ගෙ, ඤෙය්යත්තා තිවිධා කතා.
පරමත්ථසච්චං නාම, පරමත්ථාව තත්ථ ච;
සච්චිකට්ඨසභාවත්තා, අවිසංවාදකා හි තෙ.
සම්මුතිසච්චං පඤ්ඤත්තිද්වයං වොහාරවුත්තියා;
ලොකසමඤ්ඤාධිප්පායාවිසංවාදකභාවතො.
ඉති ¶ සච්චද්වයම්පෙතං, අක්ඛාසි පුරිසුත්තමො;
තෙනාපි නාමසංවිඤ්ඤූ, වොහරෙය්යුභයම්පි වා.
ඉති පඤ්ඤත්තිවිභාගෙ පභෙදකථා නිට්ඨිතා.
සත්තවීසතිමො පරිච්ඡෙදො.