📜
2. දුතියො පරිච්ඡෙදො
ඛන්ධත්තයසඞ්ඛෙපො
වෙදනානුභවො තෙධා, සුඛදුක්ඛමුපෙක්ඛයා;
ඉට්ඨානිට්ඨානුභවනමජ්ඣානුභවලක්ඛණා.
කායිකං මානසං දුක්ඛං, සුඛොපෙක්ඛා ච වෙදනා;
එකං මානසමෙවෙති, පඤ්චධින්ද්රියභෙදතො.
යථා තථා වා සඤ්ඤාණං, සඤ්ඤා සතිනිබන්ධනං;
ඡධා ඡද්වාරසම්භූතඵස්සජානං වසෙන සා.
සඞ්ඛාරා චෙතනා ඵස්සො,
මනක්කාරායු සණ්ඨිති;
තක්කො චාරො ච වායාමො,
පීති ඡන්දොධිමොක්ඛකො.
සද්ධා සති හිරොත්තප්පං, චාගො මෙත්තා මති පුන;
මජ්ඣත්තතා ච පස්සද්ධී, කායචිත්තවසා දුවෙ.
ලහුතා මුදුකම්මඤ්ඤපාගුඤ්ඤමුජුතා තථා;
දයා මුදා මිච්ඡාවාචා, කම්මන්තාජීවසංවරො.
ලොභො දොසො ච මොහො ච, දිට්ඨි උද්ධච්චමෙව ච;
අහිරීකං අනොත්තප්පං, විචිකිච්ඡිතමෙව ච.
මානො ¶ ¶ ඉස්සා ච මච්ඡෙරං, කුක්කුච්චං ථිනමිද්ධකං;
ඉති එතෙව පඤ්ඤාස, සඞ්ඛාරක්ඛන්ධසඤ්ඤිතා.
බ්යාපාරො චෙතනා ඵස්සො, ඵුසනං සරණං තහිං;
මනක්කාරො පාලනායු, සමාධි අවිසාරතා.
ආරොපනානුමජ්ජට්ඨා, තක්කචාරා පනීහනා;
වීරියං පීනනා පීති, ඡන්දො තු කත්තුකාමතා.
අධිමොක්ඛො නිච්ඡයො සද්ධා,
පසාදො සරණං සති;
හිරී පාපජිගුච්ඡා හි,
ඔත්තප්පං තස්ස භීරුතා.
අලග්ගො ච අචණ්ඩික්කං, චාගො මෙත්තා මති පන;
යාථාවබොධො මජ්ඣත්තං, සමවාහිතලක්ඛණං.
ඡ යුගානි කායචිත්තදරගාරවථද්ධතා-
අකම්මඤ්ඤත්තගෙලඤ්ඤකුටිලානං විනොදනා.
තානුද්ධතාදිථිනාදිදිට්ඨාදීනං යථාක්කමං;
සෙසකාදිඅසද්ධාදිමායාදීනං විපක්ඛිනො.
දුක්ඛාපනයනකාමා, දයා මොදා පමොදනා;
වචීදුච්චරිතාදීනං, විරාමො විරතිත්තයං.
ලොභො දොසො ච මොහො ච,
ගෙධචණ්ඩමනන්ධනා;
කමෙන දිට්ඨි දුග්ගාහො,
උද්ධච්චං භන්තතං මතං.
අහිරීකමලජ්ජත්තං, අනොත්තප්පමතාසතා;
සංසයො විචිකිච්ඡා හි, මානො උන්නතිලක්ඛණො.
උසූයා ච නිගූහනා;
ඉස්සාමච්ඡෙරකා තාපො,
කතාකතස්ස සොචනා.
ථිනං චිත්තස්ස සඞ්කොචො, අකම්මඤ්ඤත්තතා පන;
මිද්ධමිච්චෙවමෙතෙසං, ලක්ඛණඤ්ච නයෙ බුධො.
වෙදනාදිසමාධන්තා, සත්ත සබ්බගසඤ්ඤිතා;
තක්කාදිඅධිමොක්ඛන්තා, ඡ පකිණ්ණකනාමකා.
සද්ධාදයො විරමන්තා, අරණා පඤ්චවීසති;
ලොභාදිමිද්ධකන්තානි, සරණානි චතුද්දස.
ඉස්සාමච්ඡෙරකුක්කුච්චදොසා කාමෙ දයා මුදා;
කාමෙ රූපෙ ච සෙසා ඡ-චත්තාලීස තිධාතුජා.
ඡන්දනිච්ඡයමජ්ඣත්තමනක්කාරා සඋද්ධවා;
දයාදී පඤ්ච මානාදී, ඡ යෙවාපන සොළස.
ඡන්දාදී පඤ්ච නියතා, තත්ථෙකාදස නෙතරා;
අහිරීකමනොත්තප්පං, ලොකනාසනකං ද්වයං.
එතෙ ද්වෙ මොහුද්ධච්චාති, චත්තාරො පාපසබ්බගා;
ලොකපාලදුකං වුත්තං, හිරිඔත්තප්පනාමකං.
ආරම්මණූපනිජ්ඣානා, ඣානඞ්ගා තක්කචාරකා;
පීති එකග්ගතා චෙති, සත්ත විත්තිත්තයෙන වෙ.
සද්ධා සති මතෙකග්ග-ධිති ලොකවිනාසකා;
පාලකා නව චෙතානි, බලානි අවිකම්පතො.
එත්ථ සද්ධාදිපඤ්චායු, කත්වාත්ර චතුධා මතිං;
වෙදනාහි ද්විසත්තෙතෙ, ඉන්ද්රියානාධිපච්චතො.
මනරූපින්ද්රියෙහෙතෙ ¶ , සබ්බෙ ඉන්ද්රියනාමකා;
බාවීසති භවන්තායුද්වයං කත්වෙකසඞ්ගහං.
දිට්ඨීහෙකග්ගතාතක්කසතීවිරතියො ¶ පථා;
අට්ඨ නිය්යානතො ආදිචතුරො භිත්වාන ද්වාදස.
ඵස්සො ච චෙතනා චෙව,
ද්වෙවෙත්ථාහාරණත්තතො;
ආහාරා මනවොජාහි,
භවන්ති චතුරොථවා.
හෙතු මූලට්ඨතො පාපෙ,
ලොභාදිත්තයමීරිතං;
කුසලාබ්යාකතෙ චාපි,
අලොභාදිත්තයං තථා.
දිට්ඨිලොභදුසා කම්මපථාපායස්ස මග්ගතො;
තබ්බිපක්ඛා සුගතියා, තයොති ඡ පථීරිතා.
පස්සද්ධාදියුගානි ඡ, වග්ගත්තා යුගළානි තු;
උපකාරා සති ධී ච, බහූපකාරභාවතො.
ඔඝාහරණතො යොගා,
යොජනෙනාභවග්ගතො;
සවනෙනාසවා දිට්ඨි-
මොහෙජෙත්ථ දුධා ලුභො.
දළ්හග්ගාහෙන දිට්ඨෙජා, උපාදානං තිධා තහිං;
දිට්ඨි දොසෙන තෙ ගන්ථා, ගන්ථතො දිට්ඨිහ ද්විධා.
පඤ්චාවරණතො කාම-කඞ්ඛාදොසුද්ධවං තපො;
ථිනමිද්ධඤ්ච මොහෙන, ඡ වා නීවරණානිථ.
කත්වා ¶ තාපුද්ධවං එකං, ථිනමිද්ධඤ්ච වුච්චති;
කිච්චස්සාහාරතො චෙව, විපක්ඛස්ස ච ලෙසතො.
දිට්ඨෙජුද්ධවදොසන්ධ-
කඞ්ඛාථිනුණ්ණතී ¶ දස;
ලොකනාසයුගෙනෙතෙ,
කිලෙසා චිත්තක්ලෙසතො.
ලොභදොසමූහමාන-දිට්ඨිකඞ්ඛිස්සමච්ඡරා;
සංයොජනානි දිට්ඨෙජා, භිත්වා බන්ධනතො දුධා.
තානි මොහුද්ධවංමානකඞ්ඛාදොසෙජදිට්ඨියො;
දුධාදිට්ඨි තිධා ලොභං, භිත්වා සුත්තෙ දසීරිතා.
දිට්ඨිලොභමූහමානදොසකඞ්ඛා තහිං දුධා;
කත්වා ලොභමිමෙ සත්තානුසයා සමුදීරිතා.
දිට්ඨි එව පරාමාසො, ඤෙය්යො එවං සමාසතො;
අත්ථො සඞ්ඛාරක්ඛන්ධස්ස, වුත්තො වුත්තානුසාරතො.
ඉති සච්චසඞ්ඛෙපෙ ඛන්ධත්තයසඞ්ඛෙපො නාම
දුතියො පරිච්ඡෙදො.