📜
11. එකාදසමො පරිච්ඡෙදො
නිබ්බානනිද්දෙසවණ්ණනා
769. භවාභවං ¶ විනනතොති ඛුද්දකං, මහන්තං භවං සිබ්බනතො. සබ්බූපධිපටිනිස්සග්ගොති සබ්බෙහි සඞ්ඛාරූපධිකිලෙසූපධිඛන්ධූපධීහි පටිනිස්සජ්ජනං. අච්චුතිරසං අචුතිසම්පත්තිකං. නිබ්බානං පුට්ඨෙනාති සුගතෙන නිබ්බානං පුට්ඨෙන සාරිපුත්තත්ථෙරෙන. උභින්නං සුත්තානන්ති ධම්මසෙනාපතිවුත්තානං ¶ ද්වින්නං සුත්තානන්ති අත්ථො. ඛයස්ස උපනිස්සයත්තාති ඛයස්ස බලවකාරණත්තා. පුථූනං ධම්මානං අප්පමත්තක්ඛණෙ රාගාදික්ඛයමත්තං නිබ්බානං භවෙය්ය. සබ්බෙ බාලපුථුජ්ජනා සමධිගතනිබ්බානා සච්ඡිකතනිරොධා භවෙය්යුං. කිඤ්ච භිය්යො කිං උත්තරි කාරණඤ්ච අත්ථීති අත්ථො. රාගාදීනං සඞ්ඛතත්තා තෙසං සඞ්ඛතානං නිබ්බානං සඞ්ඛතලක්ඛණං භවෙය්ය. කිං පනෙත්ථාති එතෙසු ඛණෙසු කිං පන ඛණෙ ත්වං වදෙසි. ඛීණෙස්වෙවාති භවාදීසු ඛීණෙසු එව. නිරුත්තරොති නිප්ඵන්නහාරො.
771. අස්සද්ධොති බාහිරසද්ධාය විරහිතො. වන්තාසොති වන්තා වමිතා ආසා තණ්හා යෙනාති වන්තාසො.
නිස්සරණියාති නිස්සරණෙ නියුත්තා. යදිදං නෙක්ඛම්මං යං ඉදං කාමානං එතං නිස්සරණං නිරොධො, තස්ස කිඤ්චිභූතස්ස සඞ්ඛතස්ස පටිච්චසමුප්පන්නධම්මජාතස්ස නිරොධො නිස්සරණන්ති, එවං ඉමිනා පකාරෙන වුත්තස්ස තස්ස නිස්සරණනාමකස්ස අභාවප්පත්තිදොසතො නිස්සරණනාමකානං පඨමජ්ඣානආකාසානඤ්චායතනානම්පි අභාවො භවෙය්ය. අත්ථි නිස්සරණන්ති අත්ථි නිබ්බානං. උප්පාදාදීනන්ති උප්පාදට්ඨිතිභඞ්ගානං. පපඤ්චාභාවතොති තණ්හාමානදිට්ඨීනං අභාවතො.
774. අබ්යාපජ්ඣන්ති නිදුක්ඛං. අක්ඛරන්ති අඛරං.
777. සද්ධාබුද්ධිකරං ¶ තථාගතමතෙ ජිනවචනෙ සම්මොහවිද්ධංසනං පඤ්ඤාසම්භවං පඤ්ඤාකාරණං සම්පසාදනකරං. අත්ථබ්යඤ්ජනසාලිනන්ති අත්ථබ්යඤ්ජනසාරවන්තං සුමධුරං සාරඤ්ඤු ජිනසාසනසාරඤ්ඤූ විම්හාපනං අච්ඡෙරකරං ඉමං එවං වුත්තප්පකාරං අභිධම්මාවතාරං යො ජානාති, සො ජනො ගම්භීරෙ නිපුණෙ නිපුණඤාණගොචරෙ අභිධම්මපිටකෙ පදං නිට්ඨං උත්තමසන්නිට්ඨානං යාති පාපුණාති.
ඉති අභිධම්මාවතාරටීකාය
නිබ්බානනිද්දෙසවණ්ණනා නිට්ඨිතා.
එකාදසමො පරිච්ඡෙදො.