📜
15. පන්නරසමො පරිච්ඡෙදො
අරූපාවචරසමාධිභාවනානිද්දෙසවණ්ණනා
982-3. රූපෙ ¶ ඛො විජ්ජමානස්මින්ති රූපකායෙ විජ්ජමානෙ දණ්ඩාදානාදයො දණ්ඩග්ගහණාදයො. ඉති රූපෙ රූපකායෙ ආදීනවං දිස්වා.
984. සූකරාභිහතොව සාති සූකරං අනුබන්ධිතො සා සුනඛො විය.
988-990. ඵුට්ඨොකාසඤ්ච තෙන තන්ති තෙන චිත්තෙන ඵුට්ඨං තමොකාසං ‘‘අනන්තො ආකාසො’’ඉති ච මනසා කරොන්තො එව උග්ඝාටෙති. ඉති වචනං වුච්චතෙ, අයමඤ්ඤො නයො, ‘‘ආකාසො’’ ඉති මනසා කරොන්තො තං කසිණං න සංවෙල්ලෙති.
998. රූපාවචරජ්ඣානමෙව පච්චත්ථිකං රූපාවචරජ්ඣානපච්චත්ථිකං.
1004. ආකාසඵුටවිඤ්ඤාණෙති ¶ ඵුටමෙව විඤ්ඤාණං ඵුටවිඤ්ඤාණං, තස්මිං ආකාසාරම්මණෙ ඵුටවිඤ්ඤාණෙ.
1005-6. අයං ආකාසො අනන්තො ඉති එවං තං ආකාසමෙව ඵරිත්වා පවත්තං විඤ්ඤාණං විඤ්ඤාණඤ්ච ඉති වචනං වුච්චතෙ. විඤ්ඤාණං අනන්තං නාම න හොති, අනන්තාරම්මණත්තා ‘‘විඤ්ඤාණං අනන්ත’’න්ති වුච්චතෙ, තං විඤ්ඤාණං මනක්කාරවසෙන අපි අනන්තං පරිදීපිතං.
1010. පඨමාරුප්පවිඤ්ඤාණස්ස අභාවො තස්ස එව පඨමාරුප්පස්ස සුඤ්ඤතො සුඤ්ඤභාවතො.
1013. සති ¶ තිට්ඨති භිය්යො බලවා සති තිට්ඨති.
1017-8. දුතියාරුප්පචක්ඛුනාති චක්ඛුනා දුතියාරුප්පං ‘‘නත්ථි නත්ථී’’තිආදිනා ආකාරෙන පරිකම්මවසෙන මනක්කාරෙ. තස්සාපගමමත්තඤ්ච තස්ස පඨමාරුප්පස්ස අපගමමත්තඤ්ච.
1029. යා නාම අයං සමාපත්ති අභාවමත්තම්පි ගොචරං කත්වා ඨස්සති, අයං සමාපත්ති වත එකන්තෙන අහො සන්තාති පදිස්සති.
1033. යාය සඤ්ඤාය නෙවසඤ්ඤී, නාසඤ්ඤී ච හොති, කෙවලං එකන්තෙන අථ ඛො සා සඤ්ඤා එදිසී න හොති.
1035-7. පටුසඤ්ඤාය කිච්චස්ස නෙව කරණතො අයං සමාපත්ති ‘‘නෙවසඤ්ඤා’’ති නිද්දිට්ඨාති චතුත්ථආරුප්පතො සම්භවා පවත්තා තෙජොධාතු සුඛොදකෙ දහනකිච්චං කාතුං න සක්කොති යථා, සා සඞ්ඛාරධම්මානං අවසෙසත්තා.
1040. පාසාදතලඤ්ච ¶ සාටිකා ච.
1041. යො පන භික්ඛු ඉමං රූපාරූපජ්ඣානසමාපත්තිවිධානං සාරතරං ජානාති, සො රූපාරූපජ්ඣානසමාපත්තිපුරෙක්ඛො සෙක්ඛො භවං කාමභවං අභිභුය්ය අභිභවිත්වා රූපාරූපං යාති පාපුණාති.
ඉති අභිධම්මාවතාරටීකාය
අරූපාවචරසමාධිභාවනානිද්දෙසවණ්ණනා නිට්ඨිතා.
පන්නරසමො පරිච්ඡෙදො.