📜

10. චිනරට්ඨසාසනවංසකථාමග්ගො

10. තතො පරං පවක්ඛාමි චීනරට්ඨසාසනවංසකථාමග්ගං යථාට්ඨවිතමාතිකාවසෙන.

තතියසඞ්ගීතාවසානෙ හි මහාමොග්ගලිපුත්තතිස්සත්ථෙරො මජ්ඣිමත්ථෙරං චිනරට්ඨං පෙසෙසි,-ත්වං එතං රට්ඨං ගන්ත්වා එත්ථ සාසනං පතිට්ඨාපෙහීති.

මජ්ඣිමත්ථෙරොච කස්සපගොත්තරෙන අළකරෙවත්ථෙරෙන දුන්දභියත්ථෙරෙන මහාරෙවත්ථෙරෙනච සද්ධිං හිමවන්තප්පදෙසෙ පඤ්චචීනරට්ඨං ගන්ත්වා ධම්මචක්කප්පවත්තනසුත්තන්තකථායතං දෙසං පසාදෙත්වා අසීතිපාණකොටියො මග්ගඵලරතනානි පටිලාභෙසි. පඤ්චපිච තෙ ථෙරා පඤ්චරට්ඨානි පසාදෙසුං. එකමෙකස්ස සන්තිකෙ සහස්සමත්තා පබ්බජිංසු. එවං තෙ තත්ථ සාසනං පතිට්ඨාපෙසුං.

ගන්ත්වා මජ්ඣිමත්ථෙරො, හිමවන්තං පසාදයි;

යක්ඛසෙනං පකාසෙන්තො, ධම්මචක්කප්පවත්තනන්ති.

තත්ථ කිර මනුස්සා යෙභුය්යෙන චන්දීපරමීස්වාරානං යක්ඛානං පූජං කරොන්ති. තෙනෙව තෙ පඤ්ච ථෙරා තෙසං යක්ඛසෙනං පකාසයිත්වා ධම්මං දෙසෙසුං. කස්මීරගන්ධාරරට්ඨං පන කදාචි කදාචි චීනරට්ඨින්දස්ස විජිතං හොති, කදාචි කදාචි පන විසුං හොති. තදා පන විසුංයෙව අහොසීති දට්ඨබ්බං.

චීරනට්ඨෙ පන භගවතො සාසනං දුබ්බලංයෙව හුත්වා අට්ඨාසි, න ථිරං හුත්වා. තෙනෙව ඉදානි තත්ථ කත්ථචියෙව සාසනං ඡායාමත්තංව පඤ්ඤායති, වාතවෙගෙන විකිණ්ණඅබ්භංවිය තිට්ඨතීති.

ඉති සාසනවංසෙ චීනරට්ඨසාසනවංසකථාමග්ගො නාම

දසමො පරිච්ඡෙදො.

එවං සබ්බෙන සබ්බං සාසනවංසකථාමග්ගො නිට්ඨිතො.

එත්තාවතාච –

ලඞ්කාගතෙන සන්තෙන, චිත්රඤාණෙන භික්ඛුනා;

සරණඞ්කරනාමෙන, සද්ධම්මට්ඨිතිකාමිනා.

දූරතොයෙව දීපම්හා, සුමඞ්ගලෙන ජොතිනා;

විසුද්ධසීලිනාචෙව, දීපන්තරට්ඨභික්ඛුනා.

අඤ්ඤෙහිචාභියාචිතො, පඤ්ඤාසාමීති නාමකො;

අකාසිං සුට්ඨුකං ගන්ථං, සාසනවංසප්පදීපිකං.

ද්විසතෙච සහස්සෙච, තෙවීසාධිකෙ ගතෙ;

පුණ්ණායං මිගසීරස්ස, නිට්ඨං ගතාව සබ්බසො.

කොචි එත්ථෙව දොසො චෙ, පඤ්ඤායති සුචිත්තකා;

තං ඛමන්තු ච සුද්ධියා, ගණ්හන්තු යුත්තිකං හවෙති.