📜

සත්තරසම පරිච්ඡෙද

ධාතුආගමනො

1.

වුත්ථවස්සො පවාරෙත්වා, කත්තිකපුණ්ණමාසියං;

අවොචෙ’දං මහාරාජං, මහාථෙරො මහාමති.

2.

චිරදිට්ඨො හි සම්බුද්ධො, සත්ථා නො මනුජාධිප;

අනාථවාසං අවසිම්හ, නත්ථි නො පූජියං ඉධ.

3.

‘‘භාසිත්ථ නනු භන්තෙමෙ, සම්බුද්ධො නිබ්බුතො’’ ඉති;

ආහ ධාතූසු දිට්ඨෙසු, දිට්ඨො හොති ජිනො’’ ඉති.

4.

විදිතො ¶ වො අධිප්පායො, ථූපස්ස කාරණෙ මයා;

කාරෙස්සාමි අහං ථූපං, තුම්හෙ ජානාථ ධාතුයො.

5.

මන්තෙහි සුමනෙනාති, ථෙරො රාජානමබ්රවි;

රාජා’හ සාමණෙරං තං, කුතො ලච්ඡාම ධාතුයො.

6.

විභූසයිත්වා නගරං, මග්ගඤ්ච මනුජාධිප;

උපොසථී සපරිසො, හත්ථිං ආරුය්හ මඞ්ගලං.

7.

සෙතච්ඡත්තං ධාරයන්තො, තාලාවචරසංහිතො;

මහානාගවනුය්යානං, සායන්හසමයෙ වජ.

8.

ධාතුභෙදඤ්ඤුනො රාජ, ධාතුයො තත්ථ ලච්ඡසි;

ඉච්ඡාහ සාමණෙරො සො, සුමනො තං සුමානසං.

9.

ථෙරො’ථ රාජකුලතො, ගන්ත්වා චෙතියපබ්බතං;

ආමන්තිය සාමණෙරං, සුමනං සුමනො ගතිං.

10.

එහි ත්වං භද්ර සුමන, ගන්ත්වා පුප්ඵපුරං වරං;

අය්යකං තෙ මහාරාජං, එවං නො වචනං වද.

11.

සහායො තෙ මහාරාජ, මහාරාජා මරුප්පියො;

පසන්නො බුද්ධසමයෙ, ථූපං කාරෙතුමිච්ඡති.

12.

මුනිනො ධාතුයො දෙහි, පත්තං භුත්තඤ්ච සත්ථුනා;

සරීරධාතුයො සන්ති, බහවො හි තවන්තිකෙ.

13.

පත්තපූරා ගහෙත්වා තා, ගන්ත්වා දෙවපුරං වරං;

සක්කං දෙවානමින්දං තං, එවං නො වචනං වද.

14.

තිලොකදක්ඛිණෙය්යස්ස, දාඨාධාතු ච දක්ඛිණා;

තවන්තිකම්හි දෙවින්ද, දක්ඛිණක්ඛකධාතු ච.

15.

දාඨං ත්වමෙව පූජෙහි, අක්ඛකං දෙහි සත්ථුනො;

ලංකාදීපස්ස කිච්චෙසු, මාපමජ්ජ සුරාධිප.

16.

‘‘එවං භන්තෙ’’ති වත්වා සො, සාමණෙරො මහිද්ධිකො;

තඞ්ඛණංයෙව අගමා, ධම්මාසොකස්ස සන්තිකං.

17.

සාලමූලම්හි ඨපිතං, මහාබොධිං තහිං සුතං;

කත්තිකච්ඡණපූජාහි, පූජියං තඤ්ච අද්දස.

18.

ථෙරස්ස ¶ වචනං වත්වා, රාජතො ලද්ධධාතුයො;

පත්තපූරං ගහෙත්වාන, හිමවන්තමුපාගමි.

19.

හිමවන්තෙ ඨපෙත්වාන, සධාතුං පත්තමුත්තමං;

දෙවින්දසන්තිකං ගන්ත්වා, ථෙරස්ස වචනං භණි.

20.

චූළාමණි චෙතියම්හා, ගහෙත්වා දක්ඛිණක්ඛකං;

සාමණෙරස්ස පාදාසි, සක්කො දෙවානමිස්සරො.

21.

තං ධාතුං ධාතුපත්තඤ්ච, ආදාය සුමනො තතො;

ආගම්ම චෙතියගිරිං, ථෙරස්ස’දාසි තං යති.

22.

මහානාගවනුය්යානං, වුත්තෙනා විධිනා’ගමා;

සායන්හාසමයෙ රාජා, රාජසෙනා පුරක්ඛතො.

23.

ඨපෙසි ධාතුයො සබ්බා, ථෙරො තත්ථෙව පබ්බතෙ;

මිස්සකං පබ්බතං තස්මා, ආහු චෙතිය පබ්බතං.

24.

ඨපෙත්වා ධාතුපත්තං තං, ථෙරො චෙතියපබ්බතෙ;

ගහෙත්වා අක්ඛකං ධාතුං, සඞ්කෙතං සගණො’ගමා.

25.

සචායං මුනිනො ධාතු, ඡත්තං නමතු මෙ සයං;

ජණ්ණුකෙහි කරීධාතු, ධාතුචඞ්කොටකො අයං.

26.

සිරස්මිං මෙ පතිට්ඨාතු, ආගම්ම සහ ධාතුකො;

ඉති රාජා විචින්තෙසි, චින්තිතං තං තථා අහු.

27.

අමතෙනා’භිසිත්තොව, අහු හට්ඨො’ති භූපති;

සීසතො තං ගහෙත්වාන, හත්ථික්ඛන්ධෙ ඨපෙසිතං.

28.

හට්ඨො හත්තී කුඤ්චනාදං, අකා කම්පිත්ථ මෙදිනී;

තතො නාගො නිවත්තිත්වා, සථෙර බලවාහනො.

29.

පුරත්ථිමෙන ද්වාරෙන, පවිසිත්වා පුරං සුභං;

දක්ඛිණෙන ච ද්වාරෙන, නික්ඛමිත්වා තතො පුන.

30.

ථූපාරාමෙ චෙතියස්ස, ඨානතො පච්ඡතො කතං;

පමොජවත්ථුං ගන්ත්වාන, බොධිඨානෙ නිවත්තිය.

31.

පුරත්ථාවදනො අඨා, ථූපඨානං තදා හිතං;

කදම්බපුප්ඵආදාරි-වල්ලීහි චිතකං අහු.

32.

මනුස්සදෙවො ¶ දෙවෙහි, තං ඨානං රක්ඛිතං සුචිං;

සොධාපෙත්වා භූසයිත්වා, තඞ්ඛණංයෙව සාධුකං.

33.

ධාතුං ඔරොපනත්ථාය, ආරභී හත්ථික්ඛන්ධතො;

නාගො න ඉච්ඡිතං රාජා, ථෙරං පුච්ඡිත්ථ තං මනං.

34.

අත්තනො ඛන්ධසමකෙ, ඨානෙ ඨපනමිච්ඡති;

ධාතුඔරොපනං තෙන, න ඉට්ඨමී’ති සො බ්රවි.

35.

ආණාපෙත්වා ඛණංයෙව,

සුක්ඛාතො’භයවාපිතො;

සුක්ඛකද්දම ඛණ්ඩෙහි,

චිතා පෙත්වාන තං සමං.

36.

අලඞ්කරිත්වාන බහුධා, රාජා තං ඨානමුත්තමං;

ඔරොපෙත්වා හත්ථික්ඛන්ධා, ධාතුං තත්ථ ඨපෙසිතං.

37.

ධාතාරක්ඛං සංවිධාය, ඨපෙත්වා තත්ථ හත්ථිනං;

ධාතුථූපස්ස කරණෙ, රාජා තුරිතමානසො.

38.

බහූ මනුස්සෙ යොජෙත්වා, ඉත්ථිකාකරණෙ ලහුං;

ධාතුකිච්චං විචින්තෙන්තො, සාමච්චො පාවිසී පුරං.

39.

මහාමහින්දත්ථෙරො තු, මහා මෙඝවනං සුභං;

සගණො අභිගන්ත්වාන, තත්ථ වාසමකප්පයි.

40.

රත්තිං නාගො’නුපරියාති, තං ඨානං සො සධාතු කං;

බොධිඨානම්හි සාලාය, දිවාඨාති සධාතුකො.

41.

වත්ථුස්ස තස්සො’පරිතො, ථූපං ථෙරමතානු ගො;

ජඞ්ඝාමත්තං චිතාපෙත්වා, කතිපාහෙන භූපති.

42.

තත්ථ ධාතුපතිට්ඨානං, ඝොසාපෙත්වා උපාගමි;

තතො තතො සමන්තො ච, සමාගමි මහාජනො.

43.

තස්මිං සමාගමෙ ධාතු, හත්ථික්ඛන්ධා නගාග්ගතා;

සත්තතාලප්පමාණම්හි, දිස්සන්ති නභසිට්ඨිතා.

44.

විම්හාපයන්ති ජනතං, යමකං පාටිහාරියං;

කණ්ණම්බමූලෙ බුද්ධො’ව, අකරි ලොමහංසනං.

45.

තතො ¶ නික්ඛන්තජාලාහි, ජලධාරාහි චා’සකිං;

අයං ඔභාසිතා’සිත්තා, සබ්බාලංකාමහී මහු.

46.

පරිනිබ්බානමඤ්චම්හි, නිපන්නෙන ජිනෙන හි;

කතං මහාඅධිට්ඨාන-පඤ්චකං පඤ්චචක්ඛුනා.

47.

ගය්හමානා මහාබොධි සාඛාසොකෙන දක්ඛිණා;

ඡිජ්ජිත්වාන සයංයෙව, පතිට්ඨාතු කටාහකෙ.

48.

පතිට්ඨහිත්වා සා සාඛා, ඡබ්බණ්ණරස්මියො සුභා;

රඤ්ජයන්තී දිසා සබ්බා, ඵලපත්තෙහි මුච්චතු.

49.

සසුවණ්ණකටාහා සා, උග්ගන්ත්වාන මනොරමා;

අදිස්සමානා සත්තාහං, හිමගබ්භම්හි තිට්ඨතු.

50.

ථූපාරාමෙ පතිට්ඨන්තං, මම දක්ඛිණඅක්ඛකං;

කරොතු නභමුග්ගන්ත්වා, යමයං පාටිහාරියං.

51.

ලඞ්කා ලඞ්කාරභූතම්හි, හෙමමාලිකචෙතියෙ;

පතිට්ඨහන්තියො ධාතු, දොණමත්තා පමාණතො.

52.

බුද්ධවෙසධරා හුත්වා, උග්ගන්ත්වා නභසිට්ඨිතා;

පතිට්ඨං තු කරිත්වාන, යමකං පාටිහාරියං.

53.

අධිට්ඨානානි පඤ්චෙ’ව, අධිට්ඨාසි තථාගතො;

අකාසි තස්මා සා ධාතු, තදා තං පාටිහාරියං.

54.

ආකාසා ඔතරිත්වා සා, අට්ඨාභූපස්ස මුද්ධනි;

අතීවහට්ඨො තං රාජා, පතිට්ඨාපෙසි චෙතියෙ.

55.

පතිට්ඨිතාය තස්සා ච, ධාතුයා චෙතියෙ තදා;

අහු මහාභූමිචාලො, අබ්භුතො ලොමහංසනො.

56.

එවං අචින්තියා බුද්ධා, බුද්ධධම්මා අචින්තියා;

අචින්තියෙ පසන්නානං, විපාකො හොති අචින්තියො.

57.

තං පාටිහාරියං දිස්වා, පසීදිංසු ජනෙ ජනා;

මත්තාභයො රාජපුත්තො, කනිට්ඨො රාජිනො පන.

58.

මුනිස්සරෙ පසීදිත්වා, යාචිත්වාන නරිස්සරං;

පුරිසානං සහස්සෙන, සහ පබ්බජිසාසනෙ.

59.

චෙතාරිගාමතො ¶ චාපි, ද්වාරමණ්ඩලතොපි ච;

විහීරබීජතො චාපි, තථා ගල්ලකපිට්ඨිතො.

60.

තථො’පතිස්සගාමා ච, පඤ්ච පඤ්ච සතානි ච;

පබ්බජුං දාරකා හට්ඨා, ජාතසද්ධා තථාගතෙ.

61.

එවං පුරා බාහිරා ච, සබ්බෙ පබ්බජිතා තදා;

තිංස භික්ඛුසහස්සානි, අහෙසුං ජිනසාසනෙ.

62.

ථූපාරාමෙ ථූපවරං, නිට්ඨාපෙත්වා මහීපති;

රතනාදීහි’නෙකෙහි, සදා පූජමකාරයි.

63.

රාජොරොධා ඛත්තියා ච, අමච්චා නාගරා තථා;

සබ්බෙ ජනපදා චෙව, පුජා’කංසු විසුං විසුං.

64.

ථූපපුබ්බඞ්ගමං රාජා, විහාරං තත්ථ කාරයි;

ථූපාරාමොති තෙනෙ’ස, විහාරො විස්සුතො අහු.

65.

සකධාතුසරීරකෙන චෙ’වං,

පරිනිබ්බානගතොපි ලොකනාථො;

ජනකායහිතං සුඛඤ්ච සම්මා,

බහුධා’කාසි ඨිතෙ ජිනෙ කථාවකාති.

සුජනප්පසාදසංවෙගත්ථාය කතෙ මහාවංසෙ

ධාතුඅගමනො නාම

සත්තරසමො පරිච්ඡෙදො.