📜
පඤ්චතිංසතිමපරිච්ඡෙද
ද්වාදසරාජකො
ආමණ්ඩගාමණ්යභයො, මහාදාඨිකඅච්චයෙ;
නවවස්සනට්ඨමාසෙ, රජ්ජං කාරෙසි තං සුතො.
ඡත්තාති ඡත්තං කාරෙසි, මහාථූපෙ මනොරමෙ;
තථෙව පාදවෙදිඤ්ච, මුද්ධවෙදිඤ්ච කාරයි.
තථෙව ලොහපාසාද, ථූපව්හෙ පොසථව්හයෙ;
කාරෙසි කුච්ඡිආජිරං, කුච්ඡිආළින්දමෙව ච.
උභයත්ථාපි ¶ කාරෙසි, චාරුං රතනපණ්ඩපං;
රජතලෙණ විහාරඤ්ච, කාරාපෙසි නරාධිපෙ.
මහාගාමෙණ්ඩවාපිංසො, පස්සෙ කාරිය දක්ඛිණෙ;
දක්ඛිණස්ස විහාරස්ස, අදාසි පුඤ්ඤදක්ඛිණො.
මාඝාතං සකලෙ දීපෙ, කාරෙසි මනුජාධිපො;
වල්ලිඵලානි සබ්බානි, රොපාපෙත්වා තහිං තහිං.
මං සකුභණ්ඩකං නාම, ආමණ්ඩිය මහීපති;
පත්තං පූරාපයිත්වාන, කාරෙත්වා වත්ථචුම්බටං.
දාපෙසි සබ්බසඞ්ඝස්ස, විප්පසන්නෙන චෙතසා;
පත්තෙ පූරාපයිත්වා සො, ආමණ්ඩ ගාමණිවිදූ.
තඞ්කනිට්ඨොකණිරාජා-තිස්සො ඝාතිය තාතරං;
තීණි වස්සානි නගරෙ, රජ්ජං කාරෙසි ඛත්තියො.
උපොසථඝරට්ටං එසා, නිච්ඡිනි චෙකියව්හයෙ;
රාජාපරාධකම්මම්හි, පුත්තෙ සට්ඨිතු භික්ඛවො.
සහොඩ්ඩෙ ගාහයිත්වාන, රාජා චෙතිය පබ්බතෙ;
ඛිපාපෙසි කණිරව්හෙ, පබ්භාරම්හි අසීලකෙ.
කණිරාජා අච්චයෙන, ආමණ්ඩගාමණි සුතො;
චූළාභයො වස්සමෙකං, රජ්ජං කාරෙසි ඛත්තියො.
සො ගොණකනදීතීරෙ, පුරපස්සම්හි දක්ඛිණෙ;
කාරාපෙසි මහීපාලො, විහාරෙ චූළගල්ලකං.
චූළාභයස්ස’ච්ච යෙන, සීවලි තං කනිට්ඨිකා;
ආමණ්ඩධීතා චතුරො, මාසෙ රජ්ජමකාරයි.
ආමණ්ඩ භාගිනෙය්යා තු, සීවලිං අපනීයතං;
ඉළනාගොති නාමෙන, ඡත්තං උස්සාපයි පුරෙ.
තිස්සවාපිං ගතෙ තස්මිං, ආදිවස්සෙ නරාධිපෙ;
තං හිත්වා පුරමාගඤ්ඡුං, බහවොලම්බකණ්ණකා.
තහිං අදිස්වා තෙ රාජා, කුද්ධො තෙහි අකාරයි;
මද්දයං වාපියා පස්සෙ, මහාථූපඤ්ජසංසයං.
තෙසං ¶ විචාරකෙ කත්වා, චණ්ඩාලෙ ච ඨපාපයි;
තෙන කුද්ධාලම්බකණ්ණා, සබ්බෙ හුත්වාන එකතො.
රාජානං තං ගහෙත්වාන, රුන්ධිත්වාන සකෙ ඝරෙ;
සයං රජ්ජං විචාරෙසුං, රඤ්ඤො දෙවී තදා සකං.
පුත්තං චන්දමුඛසිවං, මණ්ඩයිත්වා කුමාරකං;
දත්වාන හත්ථෙ ධාතීනං, මඞ්ගලහත්ථි සන්තිකෙ.
පෙසෙසි වත්වා සන්දෙසං, නෙත්වා තං ධාතියො තහිං;
වදිංසු දෙවිසන්දෙසං, සබ්බං මඞ්ගල හත්ථිනො.
‘‘අයං තෙ සාධිනො පුත්තො,
සාමිකො චාරකෙ ඨිතො;
අරිහි ඝාතතො සෙසො,
තයා ඝාතො ඉමස්ස තු.
ත්වමෙනං කිර ඝාතෙහි, ඉදං දෙවිවචො’’ඉති;
වත්වා තු සයාපෙසුං, පාදමූලම්හි හත්ථිනො.
දුක්ඛිතො සො රුදිත්වාන, නාගො භෙත්වාන ආළකං;
පවිසිත්වා මහාවත්ථුං, ද්වාරං පාතිය ථාමසා.
රඤ්ඤො නිසින්නඞ්ගණම්හි, උග්ඝාටෙත්වා කවාටකං;
නිසීදාපිය තං ඛන්ධෙ, මහාතිත්ථමුපාගමි.
නාවං ආරො පයිත්වාන, රාජානං තත්ථ කුඤ්ජරො;
පච්ඡිමො දධිතීරෙන, සයං මලය මාරුහී.
පරතීරෙ වසිත්වා සො, තීණිවස්සානි ඛත්තියො;
බලකායං ගහෙත්වාන, ආගා නාවාති රොහණං.
තිත්ථෙ සක්ඛරසොබ්භම්හි, ඔතරිත්වාන භූපති;
අකාසි රොහණෙ තත්ථ, මහන්තං බලසඞ්ගහං.
රඤ්ඤො මඞ්ගලහත්ථිසො, දක්ඛිණං මලයං තතො;
රොහණංයෙ’වුපාගඤ්ඡි, තස්ස කම්මානි කාතවෙ.
මහාපදුමනාමස්ස, තත්ථ ජාතකභාණිනො;
තුලාධාරව්හවාසිස්ස, මහාථෙරස්ස සන්තිකෙ.
කපිජාතකං ¶ සුත්වාන, බොධිසත්තෙ පසාදවා;
නාගමහාවිහාරං සො, ජියාමුත්තධනුස්සතං.
කත්වා කාරෙසි ථූපඤ්ච, වඩ්ඪාපෙසි යථාඨිතං;
තිස්සවාපිඤ්ච කාරෙසි, තථා දුරව්හවාපිකං.
සො ගහෙත්වා බලං රාජා, යුද්ධාය අභිනික්ඛමි;
තං සුත්වා ලම්බකණ්ණා ච, යුද්ධාය අභිසංයුතා.
පපල්ලක්ඛන්ධද්වාරම්හි, ඛෙත්තෙ හිඞ්කරවාපිකෙ;
යුද්ධං උභින්නං වත්තිත්ථ, අඤ්ඤමඤ්ඤවිහෙසනං.
නාවාකිලන්තදෙහත්තා, පොසා සීදන්ති රාජිනො;
රාජා නාමං සාවයිත්වා, සයං පාවිසි තෙන සො.
තෙන භීතාලම්බකණ්ණා, සයිංසු උදරෙන සො;
තෙසං සීසානි ඡින්දිත්වා, රතනාභිසමංකරි.
තික්ඛත්තුමෙවන්තුකතෙ, කරුණාය මහීපති;
‘‘අමාරෙත්වා’ව ගණ්හාථ, ජීවග්ගාහ’න්ති අබ්රුවි.
තතො විජිතසඞ්ගාමො, පුරං ආගම්ම භූපති;
ඡත්තං උස්සාපයිත්වාන තිස්සවාපි ඡණං අගා.
ජලකීළාය උග්ගන්ත්වා, සුමණ්ඩිතපසාධිතො;
අත්තනො සිරිසම්පත්තිං, දිස්වා තස්සන්තරායිකෙ.
ලම්බකණ්ණෙ සරිත්වාන, කුද්ධො සො යොජයීරථෙ;
යුගපරම්පරා තෙසං, පුරතො පාවිසී පුරං.
මහාවත්ථුස්ස උම්මාරෙ, ඨත්වා රාජාණපෙසි සො;
‘‘ඉමෙසං සීසමුම්මාරෙ, අස්මිං ඡින්දථ භො’’ඉති.
ගොණා එතෙරථෙ යුත්තා, තව හොන්ති රථෙසභ;
සිඞ්ගංඛුරඤ්ච එතෙසං, ඡෙදාපයත භො’’ඉති.
මාතුයා අථ සඤ්ඤත්තො, සීසච්ඡෙදං නිවාරිය;
නාසඤ්ච පාදඞ්ගුට්ඨඤ්ච, තෙසං රාජා අඡෙදයි.
හත්ථිවුත්ථං ජනපදං, අදා හත්ථිස්ස ඛත්තියො;
හත්ථිභොගො ජනපදො, ඉති තෙනාසි නාමතො.
එවං අනුරාධපුරෙ, ඉළානාගො මහීපති;
ඡබ්බස්සානි අනුනානි, රජ්ජං කාරෙසි ඛත්තියො.
ඉළනාගච්චයෙ ¶ තස්ස, පුත්තො චන්දමුඛොසිවො;
අට්ඨවස්සං සත්තමාසං, රාජා රජ්ජමකාරයි.
මණිකාරගාමෙ වාපි, කාරාපෙත්වා මහීපති;
ඉස්සරසමණව්හස්ස, විහාරස්ස අදාසි සො.
තස්ස රඤ්ඤො මහෙසී ච, සඞ්ගාමෙ පත්තිමත්තනො;
තස්සෙවා’දා විහාරස්ස, දමිළදෙවීති විස්සුතා.
තං තිස්සවාපී කීළාය, හන්ත්වා චන්දමුඛං සිවං;
යසළාලකතිස්සො’ති, විස්සුතො තඞ්කනිට්ඨකො.
අනුරාධපුරෙ රම්මෙ, ලඞ්කාභුවදනෙ සුභෙ;
සත්තවස්සානට්ඨමාසෙ, රාජා රජ්ජමකාරයි.
දොවිරිකස්ස දත්තස්ස, පුත්ථො දොවාරිකො සයං;
රඤ්ඤො සදිසරූපෙන, අහොසි සුභනාමවා.
සුභං බලත්ථං තං රාජා, රාජභූසාය භූසිය;
නිසිදාපිය පල්ලඞ්කෙ, හාසත්ථං යසළාලකො.
සීසචොළං බලත්ථස්ස, සසීසෙ පටිමුඤ්චිය;
යට්ඨිං ගහෙත්වා හත්ථෙන, ද්වාරමූලෙ ඨිතො සයං.
වන්දන්තෙසු අමච්චෙසු, නිසින්නං ආසනම්හි තං;
රාජා හසති එවං සො, කුරුතෙ අන්තරන්තරා.
‘‘බලත්ථො එකදිවසං, රාජානං හසමානකං;
අයං බලත්ථො කස්මා මෙ, සම්මුඛාහසතී’’ති සො.
මාරාපයිත්වා රාජානං, බලත්ථො සො සුභො ඉධ;
රජ්ජං කාරෙසි ඡබ්බස්සං, සුභරාජාති විස්සුතො.
ද්විසු මහාවිහාරෙසු, සුභරාජා මනොරමං;
පරිවෙණපන්තිං සුභ-නාමකංයෙව කාරයි.
උරුවෙලසමීපම්හි, තථා වෙල්ලිවිහාරකං;
පුරත්ථිමෙ එකද්වාරං, ගඞ්ගන්තෙ නන්දිගාමකං.
ලම්බකණ්ණසුතො ¶ එකො, උත්තරපස්සවාසිකො;
සෙනාපතිමුපට්ඨාසි, වසභො නාම මාතුලං.
හෙස්සති වසභො නාම, රාජා’ති සුතියාසදා;
ඝාතෙති රාජාදීපම්හි, සබ්බෙ වසභනාමකෙ.
‘‘රඤ්ඤො දස්සාම වසතං, ඉම’’න්ති භරියාය සො;
සෙනාපතිමන්තයිත්වා, පාතො රාජකුලං අගා.
ගච්ඡතො තෙන සහසා, තම්බුලං චුණ්ණවජ්ජිතං;
හත්ථම්හි වසභස්සා’දා, තං සාධු පරිරක්ඛිතුං.
රාජගෙහස්ස ද්වාරම්හි, තම්බුලං චුණ්ණවජ්ජිතං;
සෙනාපති උදික්ඛිත්වා, තං චුණ්ණත්ථං විසජ්ජයි.
සෙනාපතිස්ස භරියා, චුණ්ණත්ථං වසභං ගතං;
වත්වා රහස්සං දත්වා ච, සහස්සං තං පලාපයි.
මහාවිහාරඨානං සො, ගන්ත්වාන වසභො පන;
තත්ථ ථෙරෙහි ඛිරන්න-වත්ථෙහි කතසඞ්ගහො.
තතො පරං කුට්ඨිනො ච, රාජභාවාය නිච්ඡිතං;
සුත්වාන වචනංහට්ඨො, ‘‘චොරො හෙස්ස’’න්ති නිච්ඡිතො.
ලද්ධසමත්ථපුරිසෙ, ගාමඝාතං තතො පරං;
කරොන්තො රොහණං ගන්ත්වා, කපල්ලපුවොපදෙසතො.
කමෙන රට්ඨං කණ්හන්ථො, සම්පත්තබලවාහනො;
සො රාජා ද්වීහි වස්සෙහි, ආගම්ම පුරසන්තිකං.
සුභරාජං රණෙ හන්ත්වා, වසභො සො මහබ්බලො;
උස්සාපයි පුරෙභත්තං, මාතුලො’පි රණෙ පති.
තං මාතුලස්ස සරිරං, පුබ්බභූතොපකාරිකං;
අකාසි වසභො රාජා, මහෙසිං මෙත්තනාමිකං.
සොහොරපාඨකං පුච්ඡි, ආයුප්පමාණමත්තනො;
‘‘ආහ ද්වාදසවස්සානි’’, රහොයෙවස්ස සොපි ච.
රහස්සං රක්ඛණත්ථාය, සහස්සං තස්සා දාපිය;
සඞ්ඝං සො සන්නිපාතෙත්වා, වන්දිත්වා පුච්ඡි භූපති.
‘‘සියානු ¶ භන්තෙ ආයුස්ස, වඩ්ඪනකාරණං’’ඉති;
‘‘අත්ථී’’ති සඞ්ඝො ආචික්ඛි, අන්තරායවිමොචනං.
පරිස්සාවනදානඤ්ච, ආවාසදාන මෙව ච;
ගිලානවත්තදානඤ්ච, දාතබ්බං මනුජාධිප.
‘‘කාතබ්බං ජිණ්ණකාවාස-පටිසඞ්ඛරණං තථා;
පඤ්චසීලසමාදානං, කත්වා තං සාධුරක්ඛියං.
උපොසථූපවාසො ච, කත්තබ්බො’ පොසථෙ’’ඉති;
රාජා සාධූති ගන්ත්වාන, තථා සබ්බං මකාසි සො.
තිණ්ණං තිණ්ණඤ්ච වස්සානං, අච්චයෙන මහීපති;
දීපම්හි සබ්බසඞ්ඝස්ස, තිචීවරමදාපයි.
අනාගතානං ථෙරානං, පෙසයිත්වාන දාපයි;
ද්වත්තිංසායහි ඨානෙසු, දාපෙසි මධුපායසං.
චතුසට්ඨියා ච ඨානෙසු, මහාදානංතු මිස්සකං;
සහස්සවට්ටි චතුසු, ඨානෙසු ච ජලාපයි.
චෙතියපබ්බතෙ චෙව, ථූපාරාමෙ ච චෙතියෙ;
මහාථූපෙ මහාබොධි-ඝරෙ ඉති ඉමෙසු හි.
චිත්තලකූටෙ කාරෙසි, දසථූපෙ මනොරමෙ;
දීපෙ’ඛිලම්හි ආවාසෙ, ජිණ්ණෙ ච පටිසඞ්ඛරි.
වල්ලියෙරවිහාරෙ ච, ථෙරස්ස සො පසීදිය;
මහාවල්ලිගොත්තං නාම, විහාරඤ්ච අකාරයි.
කාරෙසි අනුරාරාමං, මහාගාමස්ස සන්තිකෙ;
හෙළිගාමට්ඨකරිස, සහස්සං තස්ස දාපයි.
මුචෙලවිහාරං කාරෙත්වා, සො තිස්සවඩ්ඪමානකෙ;
ආළිසාරොදකභාගං, විහාරස්ස අදාපයි.
කලම්බතිත්ථෙ ථූපම්හි, කාරෙසිට්ඨිකකඤ්චුකං;
කාරෙසුපොසථා ගාරං, වට්ටිතෙලත්ථ මස්සතු.
සහස්සකරීසවාපිංසො ¶ , කාරාපෙත්වා අදාසි ච;
කාරෙසුපොසථාගාරං, විහාරෙ කුම්භිගල්ලකෙ.
සොයෙ’වු පොසථාගාරං, ඉස්සරසමණකෙ ඉධ;
ථූපාරාමෙථූපඝරං, කාරාපෙසි මහීපති.
මහාවිහාරෙ පරිවෙණ, පන්තිං පච්ඡිමපෙක්ඛිනිං;
කාරෙසි ච චතුසාලඤ්ච, ජිණ්ණකං පටිසඞ්ඛරි.
චතුබුද්ධපටිමාරම්මං, පටිමානංඝරංතථා;
මහාබොධිඞ්ගණෙ රම්මෙ, රාජා සොයෙව කාරයි.
තස්ස රඤ්ඤො මහෙසී සා, වුත්තනාමා මනොරමං;
ථූපං ථූපඝරඤ්චෙව, රම්මං තථෙව කාරයි.
ථූපාරාමෙ ථූපඝරං, නිට්ඨාපෙත්වා මහීපති;
තස්ස නිට්ඨාපිතමහෙ, මහාදානමදාසි ච.
යුත්තානං බුද්ධවචනෙ, භික්ඛූනං පච්චයම්පි ච;
භික්ඛූනං ධම්මකථිකානං, සප්පිඵාණිතමෙව ච.
නගරස්ස චතුද්වාරෙ, කපණවට්ටඤ්ච දාපයි;
ගිලානානඤ්ච භික්ඛූනං, ගිලානවට්ටමෙව ච.
මයෙත්තිං රාජුප්පලවාපිං, වහකොලම්බගාමකං;
මහානික විත්තවාපිං, මහාරාමොත්ති මෙව ච.
කෙහාලං කාළිවාපිඤ්ච, චම්බුට්ඨිං වාතමඞ්ගනං;
අභිවඩ්ඪමානකඤ්ච, ඉච්චෙකාදස වාපියො.
ද්වාදස මාතිකා චෙව, සුභික්ඛත්ථමකාරයි;
ගුත්තත්ථ පුරපාකාරං, චෙව මුච්චමකාරයි.
ගොපුරඤ්ච චතුද්වාරෙ, මහාවත්ථුඤ්ච කාරයි;
සරං කාරෙසි උය්යානෙ, හංසෙතත්ථවිසජ්ජයි.
පුරෙ බහූ පොක්ඛරණී, කාරාපෙත්වා තහිං තහිං;
උම්මග්ගෙන ජලං තත්ථ, පවෙසෙසි මහීපති.
එවං ¶ නානාවිධං පුඤ්ඤං, කත්වා වසභභූපති;
හතන්තරායො සො හුත්වා, පුඤ්ඤකම්මෙ සදාදරො.
චතුත්තාසීසවස්සානි, පුරෙ රජ්ජමකාරයි;
චතුත්තාලීසවෙසාඛ, පූජා යො ච අකාරයි.
සුභරාජා ධරන්තො සො, අත්තනො එකධීතරං;
වසභෙන භයාසංකී, අප්පෙසි’ඨික වඩ්ඪකිං.
අත්තනො කම්බලඤ්චෙව, රාජා භණ්ඩානි ච’ප්පයි;
වසභෙන හතෙ තස්මිං, තමාදාසිට්ඨවඩ්ඪකී.
ධීතිඨානෙ ඨපෙත්වාන, වඩ්ඪෙති අත්තනො ඝරෙ;
සකම්මං කරතො තස්ස, භත්තං ආහරි දාරිකා.
සා නිරොධසමාපන්නං, තදම්බපුප්ඵ ගුම්බකෙ;
සත්තමෙ දිවසෙ දිස්වා, භත්තං මෙධාවීනී අදා.
පුන භත්තං රන්ධයිත්වා, පිතුනො භත්තමාහරි;
පපඤ්චකාරණං පුට්ඨා, තමත්ථං පිතුනො වදි.
තුට්ඨො පුනප්පුනඤ්චෙ’සො, භත්තං ථෙරස්ස දාපයි;
විස්සත්ථො’නාගතං දිස්වා, ථෙරො ආහ කුමාරිකං.
‘‘තවඉස්සරියෙජාතෙ, ඉමං ඨානං කුමාරිකෙ;
සරෙය්යාසී’ති ථෙරො තු, තදා ච පරිනිබ්බුතො.
සකෙ සො වසභො රාජා, වයප්පත්තම්හි පුත්තකෙ;
වඞ්කනාසිකතිස්සම්හි, කඤ්ඤංතස්සානුරූපිකං.
ගවෙසාපෙසි පුරිසා, තං දිස්වාන කුමාරිකං;
ඉට්ඨකවඩ්ඪකීගාමෙ, ඉත්ථිලක්ඛණ කොවිදා.
රඤ්ඤො නිවෙදයුං රාජා, තමාණාපෙතුමාරභි;
තස්සාහ රාජධීතත්තං, ඉට්ඨකවඩ්ඪකී තදා.
සුභරඤ්ඤො තු ධීතත්තං, කම්බලාදීහි ඤාපයි;
රාජා තුට්ඨො සුතස්සා’දා, තං සාධු කතමඞ්ගලං.
වසභස්සච්චයෙ පුත්තො, වඞ්කනාසික තිස්සකො;
අනුරාධපුරෙ රජ්ජං, තීණි වස්සානි කාරයි.
සො ¶ ගොණනදියා තීරෙ, මහාමඞ්ගලනාමකං;
විහාරං කාරයි රාජා, වඞ්කනාසිකතිස්සකො.
මහාමත්තා තු දෙවී සා, සරන්තී ථෙරභාසිතං;
විහාරකාරණත්ථාය, අකාසි ධනසඤ්චයං.
වඞ්කනාසිකතිස්සස්ස, අච්චයෙ කාරයී සුතො;
රජ්ජං බාවීසවස්සානි, ගජ්ජබාහුකගාමණි.
සුත්වා සො මාතුවචනං, මාතුදත්ථාය කාරයි;
කදම්බපුප්ඵඨානම්හි, රාජමාතුවිහාරකං.
මාතා සතසහස්සං සා, භූමිඅත්ථොය පණ්ඩිතා;
අදා මහාවිහාරස්ස, විහාරඤ්ච අකාර යි.
සයමෙව අකාරෙසි, තත්ථ ථූපං සිලාමයං;
සඞ්ඝභොගඤ්ච පාදාසි, කිණිත්වාන තතො තතො.
අභයුත්තර මහාථූපං, වඩ්ඪාපෙත්වා චිතාපයි;
චතුද්වාරෙ ච තත්ථෙව, ආදිමුඛමකාරයි.
ගාමණිතිස්සවාපිං සො, කාරාපෙත්වා මහීපති;
අභයගිරි විහාරස්ස, පාකවට්ටාය’දාසි ච.
මරිචවට්ටිකථූපම්හි, කඤ්චුකඤ්ච අකාරයි;
කිණිත්වා සතසහස්සෙන, සඞ්ඝභොගමදාසි ච.
කාරෙසි පච්ඡිමෙ වස්සෙ, විහාරං රාමකව්හයං;
මහෙජසනසාලඤ්ච, නගරම්හි අකාරයි.
ගජබාහුස්සච්චයෙන, සසුරො තස්ස රාජිනො;
රජ්ජං මහල්ලකො නාගො, ඡබ්බස්සානි අකාරයි.
පුරත්ථිමෙ පෙජලකං, දක්ඛිණෙ කොටි පබ්බතං;
පච්ඡිමෙ දකපාසාණෙ, නාගදීපෙ සාලිපබ්බතං.
බීජගාමෙ තනවෙළිං, රොහණෙ ජනපදෙ පන;
තොබ්බලනාගපබ්බතඤ්ච, අන්තොට්ඨෙ ගිරිහාලිකං.
එතෙ ¶ සත්ත විහාරෙ සො, මහල්ලනාගභූපති;
පරිත්තෙනපි කාලෙන, කාරාපෙසි මහාමතී.
එවං අසාරෙහි ධනෙහි සාරං,
පුඤ්ඤානි කත්වාන බහූනි පඤ්ඤා;
ආදෙන්ති බාලා පන කාම හෙතු,
බහූනි පාපානි කරොන්තා මොහා’ති.
සුජනප්පසාදසංවෙගත්ථාය කතෙ මහාවංසෙ
ද්වාදස රාජකො නාම
පඤ්චතිංසතිමො පරිච්ඡෙදො.