📜
ඡත්තිංසතිම පරිච්ඡෙද
තයොදස රාජකො
මහල්ලනාගච්චයෙන ¶ , පුත්තො භාතිකතිස්සකො;
චතුවීසතිවස්සානි, ලංකාරජ්ජමකාරයි.
මහාවිහාරෙ පාකාරං, කාරාපෙසි සමන්තතො;
ගවරතිස්සවිහාරං, සො කාරයිත්වා මහීපති.
මහාගාමණිකං වාපිං, විහාරස්ස’ස්ස’දාසි ච;
විහාරඤ්ච අකාරෙසි, භාතියතිස්ස නාමකං.
කාරෙසුපොසථාගාරං, ථූපාරාමෙ මනොරමෙ;
රන්ධකණ්ඩකවාපිඤ්ච, කාරාපෙසි මහීපති.
සත්තෙසු මුදුචිත්තොසො, සඞ්ඝම්හි තිබ්බගාරවො;
උභතොසඞ්ඝෙ මහීපාලො, මහාදානං පවත්තයි.
භාතිකතිස්සච්චයෙන, තස්ස කනිට්ඨතිස්සකො;
අට්ඨවීසසමාරජ්ජං, ලංකාදීපෙ අකාරයි.
භූතාරාම ¶ මහානාග, ථෙරස්මිං සො පසීදිය;
කාරෙසි රතනපාසාදං, අභයගිරිම්හි සාධුකං.
අභයගිරිම්හි පාකාරං, මහාපරිවෙණමෙව ච;
කාරෙසි මණිසොමව්හෙ, මහාපරිවෙණමෙව ච.
තත්ථෙව චෙතියඝරං, අම්බත්ථලෙ තථෙව ච;
කාරෙසි පටිසඞ්ඛාරං, නාගදීපෙ ඝරෙ පන.
මහාවිහාරසීමංසො, මද්දිත්වා තත්ථ කාරයි;
කුක්කුටගිරි පරිවෙණ, පන්තිං සක්කච්ච භූපති.
මහාවිහාරෙ කාරෙසි, ද්වාදස මනුජාධිපො;
මහාචතුරස්සපාසාදෙ, දස්සනෙය්යෙමනොරමෙ.
දක්ඛිණවිහාර ථූපම්හි, කඤ්චුකඤ්ච අකාරයි;
භත්තසාලං මහාමෙඝ, වනාසිමඤ්ච මද්දිය.
මහාවිහාරපාකාරං, පස්සතො අපනීයසො;
මග්ගං දක්ඛිණවිහාර, ගාමිඤ්චාපි අකාරයි.
භූතාරාම විහාරඤ්ච, රාමගොණකමෙව ච;
තථෙව නන්දතිස්සස්ස, ආරාමඤ්ච අකාරයි.
පාචිනතො අනුළාතිස්ස, පබ්බතං ගඞ්ගරාජියං;
නියෙලතිස්සාරාමඤ්ච, පිළ පිට්ඨි විහාරකං.
රාජමහාවිහාරඤ්ච, කාරෙසි මනුජාධිපො;
සොයෙව තීසු ඨානෙසු, කාරෙසු’පොසථාලයං.
කල්යාණීක විහාරෙ ච, මණ්ඩලගිරිකෙ තථා;
දුබ්බලවාපිතිස්සව්හෙ, විහාරෙසු ඉමෙසු හි.
කනිට්ඨතිස්සච්චයෙන, තස්ස පුත්තො අකාරයි;
රජ්ජං ද්වෙයෙව වස්සානි, චූළනාගොති විස්සුතො.
චූළනාගකනිට්ඨොතු, රාජාඝාතිය භාතිකං;
එකවස්සං කුඩ්ඩනාගො, රජ්ජං ලංකාය කාරයි.
මහාපෙළඤ්ච වඩ්ඪෙසි, එකනාළිකඡාතකෙ;
භික්ඛුසතානං පඤ්චන්නං, අබ්භොච්ඡින්නං මහීපති.
කුඩ්ඩනාගස්ස ¶ රඤ්ඤො තු, දෙවීයා භාතුකො තදා;
සෙනාපති සිරිනාගො, චොරො හුත්වාන රාජිනො.
බලවාහන සම්පන්නො, ආගම්ම නගරන්තිකං;
රාජබලෙන යුජ්ඣන්තො, කුඩ්ඩනාගං මහීපතිං.
පලාපෙත්වා ලද්ධජයො, අනුරාධ පුරෙ වරෙ;
ලංකාරජ්ජමකාරෙසි, වස්සානෙකූනවීසති.
මහාථූපවරෙ ඡත්තං, කාරාපෙත්වාන භූපති;
සුවණ්ණකම්මං කාරෙසි, දස්සනෙය්යං මනොරමං.
කාරෙසි ලොහපාසාදං, සංඛිත්තං පඤ්චභූමකං;
මහාබොධි චතුද්වාරෙ, සොපානං පුනකාරයි.
කාරෙත්වා ඡත්තපාසාදං, මහෙ පූජමකාරයි;
කුලම්බණඤ්ච දීපස්මිං, විස්සජ්ජෙසි දයාපරො.
සිරිනාගච්චයෙ තස්ස, පුත්තො තිස්සො අකාරයි;
රජ්ජං ද්වාවීසවස්සානි, ධම්මවොහාර කොවිදො.
ඨපෙසි සො හි වොහාරං, හිංසා මුත්තං යතොඉධ;
වොහාරක තිස්සරාජා, ඉති නාමං තතො අහු.
කම්බුගාමකවාසිස්ස, දෙවත්ථෙරස්ස සන්තිකෙ;
ධම්මං සුත්වා පටිකම්මං, පඤ්චාවාසෙ අකාරයි.
මහාතිස්සස්ස ථෙරස්ස, අනුරා රාමවාසිනො;
පසන්නො මුචෙලපට්ටනෙ, දාන වට්ටමකාරයි.
තිස්සරාජ මණ්ඩපඤ්ච, මහාවිහාරද්වයෙපි සො;
මහාබොධිඝරෙ පාචි, ලොහරූපද්ධයම්පි ච.
සත්තපණ්ණිකපාසාදං, කාරෙත්වා සුඛවාසකං;
මාසෙ මාසෙ සහස්සං සො, මහාවිහාරස්ස දාපයි.
අභයගිරිවිහාරෙ, දක්ඛිණමූලසව්හයෙ;
මරිචවට්ටි විහාරම්හි, කුලාලිතිස්සසව්හයෙ.
මහියඞ්ගණ විහාරම්හි, මහාගාමකසව්හයෙ;
මහානාගතිස්සව්හම්හි, තථා කල්යාණීකව්හයෙ.
ඉති ¶ අට්ඨසු ථූපෙසු, ඡත්තකම්මමකාරයි;
මූකනාගසෙනාපති, විහාරෙ දක්ඛිණෙ තථා.
මරිච වට්ටි විහාරම්හි, පුත්තභාගව්හයෙ තථා;
ඉස්සරසමණව්හම්හි, තිස්සව්හෙ නාගදීපකෙ.
ඉති ඡසු විහාරෙසු, පාකාරඤ්ච අකාරයි;
කාරෙසු’ පොසථාගාරං, අනුරාරාමසව්හයෙ.
අරියවංසකථාඨානෙ, ලංකාදීපෙඛිලෙපි ච;
දාන වට්ටං ඨපාපෙසි, සද්ධම්මෙ ගාරවෙන සො.
තිණී සතසහස්සානි, දත්වාන මනුජාධිපො;
ඉණතො සයිකෙ භික්ඛූ, මොචෙසි සාසනප්පියො.
මහා වෙසාඛ පූජං සො, කාරෙත්වා දීපවාසිනං;
සබ්බෙ සංයෙව භික්ඛූනං, තිචීවරමදාපයි.
වෙතුල්ලවාදං මද්දිත්වා, කාරෙත්වා පාපනිග්ගහං;
කපිලෙන අමච්චෙන, සාසනං ජොතයීච සො.
විස්සුතො’භයනාගො’ති, කනිට්ඨො තස්සරාජිනො;
දෙවියා තස්ස සංසට්ඨො, ඤාතො භීතො සභාතරා.
පලායිත්වා හල්ලතිත්ථං, ගන්ත්වාන සහසෙවකො;
කුද්ධො විය මාතුලස්ස, හත්ථපාදඤ්ච ඡෙදයි.
රාජිනො රට්ඨතෙදත්ථං, ඨපෙත්වාන ඉධෙව තං;
සුනඛොපමං දස්සයිත්වා, ගහෙත්වා’ති සිනිද්ධකෙ.
තත්ථෙව නාවං ආරුය්හ, පරතීරමගාසයං;
සුභවො මාතුලො තු, උපගම්ම මහීපති.
සුහදො විය හුත්වාන, තස්මිං රට්ඨමභින්දිසො;
අභයො තං ජානනත්ථං, දූතං ඉධ විසජ්ජයි.
තං දිස්වා පූගරුක්ඛං සො, සමන්තා කුන්තනාළියා;
පරිබ්භමන්තො මද්දිත්වා, කත්වා දුබ්බලමූලකං.
බාහුනායෙව පාතෙත්වා, තජ්ජෙත්වා තං පලාපයි;
දූතො ගන්ත්වා අභයස්ස, තං පවත්තිං පවෙදයි.
ඤත්වා’භයො ¶ තං දමිළෙ, ආදාය බසුකෙ තතො;
නගරන්තිකමාගඤ්ඡි, භාතරා සහ යුජ්ඣිතුං.
තං ඤත්වාන පලායිත්වා, අස්සමාරුය්හදෙවියා;
මලයං ආගමා රාජා, තංකනිට්ඨො’නු බන්ධිය.
රාජානං මලයෙ හන්ත්වා, දෙවීමාදාය ආගතො;
කාරෙසි නගරෙ රජ්ජං, අට්ඨවස්සානි භූපති.
පාසාණවෙදිං කාරෙසි, මහාබොධිසමන්තතො;
ලොහපාසාදඞ්ගණම්හි, රාජා මණ්ඩපමෙව ච.
ද්විහි සතසහස්සෙහි, නෙකවත්ථානි භාගිය;
දීපම්හි භික්ඛුසඞ්ඝස්ස, වත්ථදානමදාසි සො.
අභයස්ස’ච්චයෙ භාතු, තස්සස්ස තස්ස අත්රජො;
ද්වෙවස්සානි සිරිනාගො, ලංකාරජ්ජ මකාරයි.
පටිසඞ්ඛරිය පාකාරං, මහාබොධිසමන්තතො;
මහාබොධිඝරස්සෙව, සොයෙව වාලිකාතලෙ.
මූචෙලරුක්ඛපරතො, හංසවට්ටං මනොරමං;
මහන්තං මණ්ඩපඤ්චෙව, කාරාපෙසි මහීපති.
විජයකුමාරකො නාම, සිරිනාගස්ස අත්රජො;
පිතුනො අච්චයෙ රජ්ජං, එකවස්සමකාරයි.
ලම්බකණ්ණා තයො ආසුං, සහාතා මහියඞ්ගණෙ;
සඞ්ඝතිස්සො සඞ්ඝබොධි, තතියො ගොට්ඨකාභයො.
තෙ තිස්සවාපිමරියාද-ගතො අන්ධො විචක්ඛණො;
රාජුපට්ඨානමායන්තෙ, පදසද්දෙන අබ්රවි.
‘‘පථවීසාමිනො එතෙ, තයො වහතිභූ’ඉති;
තං සුත්වා අභයො පච්ඡා, යන්තො පුච්ඡි පුනාහසො.
තස්ස වංසො ඨස්සතීති,
පුන පුච්ඡිතමෙව සො;
‘‘පච්ඡිමස්සා’’ති සො ආහ,
තං සුත්වා ද්වීහිසොඅගා.
තෙ ¶ පුරං පවිසිත්වාන, තයො රඤ්ඤො’ති වල්ලභො;
රාජකිච්චානි සාධෙන්තා, වසන්තා රාජසන්තිකෙ.
හන්ත්වා විජයරාජානං, රාජගෙහම්හි එකතො;
සෙනාපතිංසඞ්ඝතිස්සං, දුවෙරජ්ජෙ’භිසෙචයුං.
එවං සො අභිසිත්තොව, අනුරාධපුරුත්තමෙ;
රජ්ජං චත්තාරි වස්සානි, සඞ්ඝතිස්සො අකාරයි.
මහාථූපම්හි ඡත්තඤ්ච, හෙමකම්මඤ්ච කාරයි;
විසුං සතසහස්සග්ඝෙ, චතුරො ච මහාමණි.
මජ්ඣෙ චතුන්නං සූරියානං, ඨපාපෙසි මහීපති;
ථූපස්ස මුද්ධනි තථා-නග්ඝවජිරචුම්බටං.
සො ඡත්තමහපූජාය, සඞ්ඝස්ස මනුජාධිපො;
චත්තාලීසසහස්සස්ස, ඡ චීවරමදාපයි.
තං මහාදෙවථෙරෙන, දාමගල්ලක වාසිනො;
දෙසිතං ඛන්ධකෙ සුත්තං, යාගානිසංස දීපනං.
සුත්වා පසන්නො සඞ්ඝස්ස, යාගුදානමදාපයි;
නගරස්ස චතුද්වාරෙ, සක්කච්චඤ්චෙව සාධු ච.
සො අන්තරන්තරෙ රාජා, ජම්බුපක්කානි ඛාදිතුං;
සහොරොධො සහාමච්චො, අගාපාචින දීපකං.
උපද්දුතං’ස්ස ගමනෙ, මනුස්සා පාචි වාසිනො;
විසං ඵලෙසු යො ජෙසුං, රාජභොජ්ජාය ජම්බුයා.
ඛාදිත්වා ජම්බුපක්කානි, තානි තත්ථෙව සො මතො;
සෙනාපති සඞ්ඝධබාධීං-භයො රජ්ජෙ’භිසෙචයි.
රාජාසිරි සඞ්ඝ බොධි, විස්සුතො පඤ්චසීලවා;
අනුරාධපුරෙ රජ්ජං, දුවෙ වස්සානි කාරයි.
මහාවිහාරෙ කාරෙසි, සලාකග්ගං මනොරමං;
තදාදීපෙ මනුස්සෙසො, ඤත්වා දුබ්බුට්ඨුපද්දුතෙ.
කරුණාය කම්පිතමනො, මහාථූපඞ්ගණෙ සයං;
නිපජ්ජි භූමියං රාජා, කත්වාන ඉති නිච්ඡයං.
‘‘පවස්සිත්වාන ¶ දෙවෙන, ජලෙනුපලාවිතෙ මයි;
නහෙව වුට්ඨහිස්සාමි, මරමානොපහං ඉධ’’.
එවං නිපන්නෙ භූමින්දෙ, දෙවො පාවස්සි තාවදෙ;
ලංකාදීපම්හි සකලෙ, පිණයන්තො මහාමහිං.
තථාපි නුට්ඨහතිසො, අපිලාපනතො ජලෙ;
ආවරිංසු තතො’මච්චා, ජලනිග්ගමනාළියො.
තතො ජලම්හි පිලවං, රාජා වුට්ඨාසි ධම්මිකො;
කරුණායනුදි එවං, දීපෙ දුබ්බුට්ඨිකාභයං.
චොරාතහිං තහිං ජාතා, ඉති සුත්වාන භූපති;
චොරෙ ආණාපයිත්වාන, රහස්සෙන පලාපීය.
ආණාපෙත්වා රහස්සෙන, මතානං සො කලෙවරං;
අග්ගීහි උත්තාසෙත්වාන, හනිතං චොරුපද්දවං.
එකො යක්ඛො ඉධාගම්ම, රත්තක්ඛො ඉති විස්සුතො;
කරොති රත්තාන’ක්ඛීති, මනුස්සානං තහිං තහිං.
අඤ්ඤමඤ්ඤමපෙක්ඛිත්වා, භායිත්වා රත්තනෙත්තතං;
නරාමරන්ති තෙ යක්ඛො, සොභක්ඛෙසි අසඞ්කිතො.
රාජා උපද්දවං තෙසං, සුත්වා සන්තත්තමානසො;
එකො’පවාස ගබ්භම්හි, හුත්වා අට්ඨඞ්ගුපොසථි.
‘‘අපස්සිත්වාන තං යක්ඛං, න චුට්ඨාමී’’ති සො සයි;
තස්ස සො ධම්මතෙජෙන, අගා යක්ඛො තදන්තිකං.
තෙන ‘‘කොසී’’ති පුට්ඨො ච, සො ‘‘අහ’’න්ති පවෙදයි;
‘‘කස්මා පජං මෙ භක්ඛෙසි, මා ඛාද’’ඉති සොබ්රවි.
‘‘එකස්මිං මෙ ජනපදෙ, නරෙ දෙහී’’ති සොබ්රවි;
‘‘න සක්කා ඉති වුත්තෙ සො, කමෙනෙකංති අබ්රවි.
‘‘අඤ්ඤං න සක්කා දාතුං මෙ, මං ඛාද’’ ඉති සොබ්රවි;
‘‘න සක්කා’’ඉති තං යාචි, ගාමෙ ගාමෙ බලිඤ්ච සො.
සාධූති වත්වා භූමින්දො, දිපම්පි සකලෙපි ච;
ගාමවරෙ නිවෙසෙත්වා, බලිංතස්ස අදාපයි.
මහාසත්තෙන ¶ තෙනෙව, සබ්බභූතානුකම්පිනා;
මහාරොගභයං ජාතං, දීපදීපෙන නාසිතං.
සො භණ්ඩාගාරිකො රඤ්ඤො,
අමච්චො ගොට්ඨතාභයො;
චෙරො හුත්වා උත්තරතො,
නගරං සමුපාගමි.
පරිස්සාවනමාදාය, රාජා දක්ඛිණද්වාරතො;
පරහිංසමරොචෙන්තො, එකකොව පලායි සො.
පුටභත්තං ගහෙත්වාන, ගච්ඡන්තො පුරිතො පථි;
භත්තභොගායරාජානං, නිබන්ධිත්ථ පුනප්පුනං.
ජලං පරිස්සාවයිත්වා, භුඤ්ජිත්වාන දයාලුකො;
තස්සෙවං’නුග්ගහං කාතුං, ඉදං වචනමබ්රුවි.
‘‘සඞ්ඝබොධි අහං රාජා, ගහෙත්වා මමභො සීරං;
ගොට්ඨාභයස්ස දස්සෙහි, බහුං දස්සති තෙ ධනං.
න ඉච්ඡිතො තථාකාතුං, තස්සත්ථාය මහීපති;
නිසින්නොයෙව අමරි, සො සීසං තස්ස ආදිය.
ගොට්ඨාභයස්ස දස්සෙසි, සොතු විම්හිතමානසො;
දත්වා තස්ස ධනං රඤ්ඤො, සක්කාරං සාධුකාරයි.
එවං ගොට්ඨාභයො එසො, මෙඝවණ්ණාභයො’ති ච;
විස්සුතො තෙරස සමා, ලංකාරජ්ජමකාරයි.
මහාවත්ථුං කාරයිත්වා, වත්ථුද්වාරම්හි මණ්ඩපං;
කාරයිත්වා මණ්ඩයිත්වා, සො භික්ඛු තත්ථ සඞ්ඝතො.
අට්ඨුත්තරසහස්සානි, නිසීදෙත්වා දිනෙ දිනෙ;
යාගුඛජ්ජක භොජ්ජෙහි, සාදූහි විවිධෙහි ච.
සචීවරෙහි කප්පෙත්වා, මහාදානං පවත්තයි;
එකවීසදිනා නෙවං, නිබද්ධඤ්චස්ස කාරයි.
මහාවිහාරෙ කාරෙසි, සිලාමණ්ඩප මුත්තමං;
ලොහපාසාදථම්භෙ ච, පරිවත්තිය ඨාපයි.
මහාබොධි ¶ සිලාවෙදිං, උත්තරද්වාරතොරණං;
පතිට්ඨාපෙසි ථම්භෙ ච, චකුකණ්ණෙ සචක්කකෙ.
තිස්සො සීලාපටිමායො, තීසු ද්වාරෙසු කාරයි;
ඨපාපෙසි ච පල්ලඞ්කං, දක්ඛිණම්හි සිලාමයං.
පධානභූමිං කාරෙසි, මහාවිහාරපච්ඡතො;
දීපම්හි ජිණ්ණකාවාසං, සබ්බඤ්ච පටිසඞ්ඛරි.
ථූපාරාමෙ ථූපඝරං, ථෙරම්බත්ථලකෙ තථා;
ආරාමෙ මණිසොමව්හෙ, පටිසඞ්ඛාරයි ච සො.
ථූපාරාමෙ මණිසොමා-රාමෙ මරිචවට්ටකෙ;
දක්ඛිණව්හ විහාරෙ ච, උපොසථඝරානි ච.
මෙඝවණ්ණාභයව්හඤ්ච, නවවිහාරමකාරයි;
විහාරමහපූජායං, පිණ්ඩෙත්වා දීපවාසීනං.
තිංසභික්ඛුසහස්සානං, ඡචීවරමදාසි ච;
මහාවෙසාඛපූජඤ්ච, තදා එවං අකාරයි.
අනුවස්සඤ්ච සඞ්ඝස්ස, ඡචීවරමදාමයි;
පාපකානං නිග්ගහෙන, සොධෙන්තො සාසනං තු සො.
වෙතුල්ලවාදිනො භික්ඛූ, අභයගිරිනිවාසිනො;
ගාහයිත්වාසට්ඨිමත්තෙ, ජිනසාසනකණ්ටකෙ.
කත්වාන නිග්ගහං තෙසං, පරතිරෙ ඛිපාපයි;
තත්ථ ඛිත්තස්ස ථෙරස්ස, නිස්සිතො භික්ඛුචොළිකො.
සඞ්ඝමිත්තො’තිනාමෙන, භූතිවිජ්ජාදිකොවිදො;
මහාවිහාරෙ භික්ඛුනං, කුජ්ඣිත්වාන ඉධගමා.
ථූපාරාමෙ සන්නිපාතං, පවිසිත්වා අසඤ්ඤතො;
සඞ්ඝපාලස්ස පරිවෙණ, වාසිත්ථෙරස්ස තත්ථ සො.
ගොට්ඨාසයස්ස ථෙරස්ස, මාතුලස්ස’ස්ස රාජිනො;
රඤ්ඤො නාමෙනා‘‘ලපන්තො, වචනං පටිබාහිය.
රඤ්ඤො කුලූපගො ආසි, රාජා තස්මිං පසීදිය;
ජෙට්ඨපුත්තං ජෙට්ඨතිස්සං, මහාසෙනං කනිට්ඨකං.
අප්පෙසි ¶ තස්ස භික්ඛුස්ස, සො සඞ්ගණ්හි දුතියකං;
උපනන්ධි තස්මිං භික්ඛුස්මිං, ජෙට්ඨතිස්සො කුමාරකො.
පිතුනො අච්චයෙ ජෙට්ඨ, සිස්සො රාජාඅහොසිසො;
පිතු සාරීර සක්කාරෙ, නිග්ගන්තුං නිච්ඡමානකෙ.
දුට්ඨාමච්චෙ නිග්ගහෙතුං, සයං නික්ඛම්ම භූපති;
කනිට්ඨං පුරතො කත්වා, පිතුකායං අනන්තරං.
තතො අමච්චෙ කත්වාන, සයං හුත්වාන පච්ඡතො;
කනිට්ඨෙ පිතුකායෙ ච, නික්ඛන්තෙ තදනන්තරං.
ද්වාරං සංවරයිත්වාන, දුට්ඨමච්චෙ නිඝාතිය;
සූලෙ අප්පෙසි පිතුනො, චිතකායසමන්තතො.
තෙන’ස්ස කම්මුනා නාමං, කක්ඛලොපපදංඅහු;
සඞ්ඝමිත්තොතු සො භික්ඛු, භීතො තස්මිං නරාධිපා.
තස්සාභිසෙකසමකාලං, මහාසෙනෙන මන්තිය;
තස්සාභිසෙකං පෙක්ඛන්තො, පරතීරං ගතො ඉතො.
පිතරා සො විප්පකතං, ලොහපාසාද මුත්තමං;
කොටිධනං අග්ඝනකං, කාරෙසි සත්තභූමකං.
සට්ඨිසතසහස්සග්ඝං, පූජයිත්වා මණිංතහිං;
කාරෙසි ජෙට්ඨතිස්සොතං, මණිපාසාදනාමකං.
මණි දුවෙ මහග්ඝෙ ච, මහාථූපෙ අපූජයි;
මහාබොධිඝරෙ තීණි, තොරණානි ච කාරයි.
කාරයිත්වා විහාරං සො, පාචිනතිස්ස පබ්බතං;
පඤ්චවාසෙසු සඞ්ඝස්ස, අදාසි පුථුවී පති.
දෙවානංපියතිස්සෙන, සො පතිට්ඨාපිතං පුරා;
ථූපාරාමෙ උරුසිලා, පටිමං චාරුදස්සනං.
නෙත්වාන ථූපාරාමව්හං, ජෙට්ඨතිස්සො මහීපහි;
පතිට්ඨාපෙසි ආරාමෙ, පාචිනතිස්ස පබ්බතෙ.
කාළමත්තිකවාපිංසො, අදාචෙතිය පබ්බතෙ;
විහාර පාසාද මහං, මහාවෙසාඛමෙව ච.
කත්වා ¶ තිංස සහස්සස්ස, සඞ්ඝස්ස’දා ඡචීවරං;
ආළම්බගාමවාපිංසො, ජෙට්ඨතිස්සො අකාරයි.
එවං සො විවිධං පුඤ්ඤං, පාසාදකරණාදිකං;
කාරෙන්තො දසවස්සානි, රාජා රජ්ජමකාරයි.
ඉති බහුවිධ පුඤ්ඤ හෙතු භූතා,
නරපතිතා බහුපාපහෙතු චාති;
මධුරමිව විසෙනමිස්සමන්නං,
සුජනමනො භජතෙ න තං කදාපි.
සුජනප්පසාද සංවෙගත්ථාය කතෙ මහාවංසෙ
තයොදසරාජකොනාම
ඡත්තිංසතිමො පරිච්ඡෙදො.