📜
සත්තතිංසතිම පරිච්ඡෙද
පඤ්චරාජකො
ජෙට්ඨතිස්සච්චයෙ තස්ස, මහාසෙනො කනිට්ඨකො;
සත්තවීසතිවස්සානි, රාජා රජ්ජමකාරයි.
තස්ස රජ්ජාභිසෙකං තං,
කාරෙතුං පරතීරතො;
සො සඞ්ඝමිත්තත්ථෙරො තු,
කාලං ඤත්වා ඉධාගතො.
තස්සාභිසෙකං කාරෙත්වා, අඤ්ඤං කිච්චඤ්චනෙකධා;
මහාවිහාර විද්ධංසං, කාතුකාමො අසඤ්ඤතො.
අවිනයවාදිනො එතෙ, මහාවිහාරවාසිනො;
විනයවාදී මයං රාජ, ඉති ගාහිය භූපභිං.
මහාවිහාරවාසිස්ස ¶ , ආහාරං දෙති භික්ඛුනො;
යො සො සතං දණ්ඩියො’ති, රඤ්ඤා දණ්ඩං ඨපාපයි.
උපද්දුතා තෙහි භික්ඛූ, මහාවිහාරවාසිනො;
මහාවිහාරං ඡඩ්ඩෙත්වා, මලයං රොහණං අගුං.
තෙන මහාවිහාරො’යං, නවවස්සානි ඡඩ්ඩිතො;
මහාවිහාරවාසීහි, භික්ඛූහි ආසි සුඤ්ඤකො.
‘‘හොති අස්සාමිකං වත්ථු, පුතුවිසාමිනො’’ඉති;
රාජානං සඤ්ඤාපෙත්වා සො, ථෙරො දුම්මති දුම්මතිං.
මහාවිහාරං නාසෙතුං, ලද්ධානුමති රාජතො;
තථා කාතුං මනුස්සෙ සො, යොජෙසි දුට්ඨමානසො.
සඞ්ඝමිත්තස්ස ථෙරස්ස, සෙවකො රාජවල්ලභො;
සොණාමච්චො දාරණො ච, භික්ඛවො ච අලජ්ජිනො.
භින්දිත්වා ලොහපාසාදං, සත්තභූමක මුත්තමං;
ඝරෙ නානප්පකාරෙ ච, ඉතො’භයගිරිං නයුං.
මහාවිහාරා නීතෙහි, පාසාදෙහි බහූහි ච;
අභයගිරිවිහාරොයං, බහුපාසාදකො අහු.
සඞ්ඝමිත්තං පාපමිත්තං, ථෙරං සොණඤ්ච සෙවකං;
ආගම්ම සුබහුං පාපං, අකාසි සො මහීපති.
මහාසිලාපටිමං සො, පාචිනතිස්සපබ්බතා;
ආනෙත්වා’භයගිරිම්හි, පතිට්ඨාපෙසි භූපති.
පටිමාඝරං බොධිඝරං, ධාතුසාලං මනොරමං;
චතුසාලඤ්ච කාරෙසී, සඞ්ඛරී කුක්කුටව්හයං.
සඞ්ඝමිත්තෙන ථෙරෙන, තෙන දාරුණකම්මුනා;
විහාරො සො’භයගිරි, දස්සනෙය්යො අහු තදා.
මෙඝවණ්ණාභයො නාම, රඤ්ඤො සබ්බත්ථ සාඛකො;
සඛා අමච්චො කුජ්ඣිත්වා, මහාවිහාරනාසනෙ.
චොරො හුත්වාන මලයං, ගන්ත්වා ලද්ධමහබ්බලො;
ඛන්ධාවාරං නිවෙසෙසි, දුරතිස්සකවාපියං.
තත්රා’ගතං ¶ තං සුත්වා, සහායං සො මහීපති;
යුද්ධාහ පච්චුග්ගන්ත්වාන, ඛන්ධාවාරං නිවෙසයි.
සාධුං පානඤ්ච මංසඤ්ච, ලභිත්වා මලයාගතං;
‘‘න සෙවිස්සං සහායෙන, විනා රඤ්ඤා’’ති චින්තිය.
ආදාය තං සයංයෙව, රත්තිං නික්ඛම්ම එකකො;
රඤ්ඤො සන්තිකමාගම්ම, තමත්ථං පටිවෙදයි.
තෙනා’භතං තෙන සහ, විස්සත්ථො පරිභුඤ්ජිය;
‘‘කස්මා චොරො අහු මෙ ත්වං, ‘‘ඉති රාජා අපුච්ඡිතං.
‘‘තයා මහාවිහාරස්ස, නාසිතත්තා’’ති අබ්රුවි;
‘‘විහාරං වාසයිස්සාමි, ඛෙමමෙතං මමච්චයං.
ඉච්ඡෙව මබ්රවී රාජා, රාජානං සො ඛමාපයි;
තෙන සඤ්ඤාපිතො රාජා, නගරංයෙව ආගමි.
රාජානං සඤ්ඤපෙත්වා සො, මෙඝවණ්ණාභයො පන;
රඤ්ඤා සහ න ආගඤ්ඡි, දබ්බසම්භාරකාරණා.
වලභා භරියා රඤ්ඤො, එකං ලෙඛකධීතිකා;
මහාවිහාරනාසම්හි, දුක්ඛිතං තං විනාසකං.
ථෙරං මාරාපයි කුද්ධා, සංගහෙත්වාන වඩ්ඪකිං;
ථූපාරාමං විනාසෙතුං, ආගතං දුට්ඨමානසං.
මාරාපෙත්වා සඞ්ඝමිත්ත-ත්ථෙරං දාරුණකාරකං;
සොණාමච්චදාරණඤ්ච, ඝාතයිංසු අසඤ්ඤකා.
ආනෙත්වා දබ්බසම්භාරං, මෙඝවණ්ණාභයො තු සො;
මහාවිහාරෙනෙකානි, පරිවෙණානි කාරයි.
අභයෙනභයො තස්මිං, වූපසන්තෙ තු භික්ඛවො;
මහාවිහාරං වාසෙසුං, ආගන්ත්වාන තතො තතො.
රාජා මහාබොධිඝරෙ, පච්ඡිමාය දිසාය තු;
කාරෙත්වා ලොහරූපානි, ඨපාපෙසි දුවෙ තු සො.
දක්ඛිණාරාමවාසිම්හි, කුහකෙ ජිම්හමානසෙ;
පසීදිත්වා පාපමිත්තෙ, තිස්සත්ථෙරෙ අසඤ්ඤතෙ.
මහාවිහාරසීමන්තෙ ¶ , උය්යානෙ ජොතිනාමකෙ;
ජෙතවනවිහාරං සො, වාරයන්තොපි කාරයි.
තතො සීමං සමුග්ඝාතුං, භික්ඛුසඞ්ඝමයාචිසො;
අදාතුකාමා තං භික්ඛූ, විහාරම්හා අපක්කමුං.
ඉධ සීමාසමුග්ඝාතං, පරෙහි කරියමානකං;
කොපෙතුං භික්ඛවො කෙචි, නිලීයිංසු තහිං තහිං.
මහාවිහාරො නවමාසෙ, එවං භික්ඛූහි වජ්ජිතො;
‘‘සමුග්ඝාතං කරිම්හා’’ති-පරෙ භික්ඛූ අමඤ්ඤිසුං.
තතො සීමාසමුග්ඝාතෙ, බ්යාපාරෙ පරිනිට්ඨිතෙ;
මහාවිහාරං වාසෙසුං, ඉධාගන්ත්වාන භික්ඛවො.
තස්ස විහාරගාහිස්ස, තිස්සත්ථෙරස්ස චොදනා;
අන්තිමවත්ථුනා ආසි, භූතත්ථං සඞ්ඝමජ්ඣගා.
විනිච්ඡිය මහාමච්චො, තථා ධම්මිකසම්මතො;
උප්පබ්බාජෙසි ධම්මෙන, තං අනිච්ඡාය රාජිනො.
සොයෙව රාජා කාරෙසි, විහාරං මණිහීරකං;
තයො විහාරෙ කාරෙසි, දෙවාලයං විනාසිය.
ගොකණ්ණං එරකාපිල්ලං, කලන්දබ්රාහ්මණගාමකෙ;
මිගගාමවිහාරඤ්ච, ගඞ්ගසෙනකපබ්බතං.
පච්ඡිමාය දිසායාථ, ධාතුසෙනඤ්ච පබ්බතං;
රාජා මහාවිහාරඤ්ච, කොකවාතම්හි කාරයි.
රූපාරම්මවිහාරඤ්ච, චූළවිට්ටඤ්ච කාරයි;
උත්තරාභයසව්හෙ ච, දුවෙ භික්ඛූනුපස්සයෙ.
කාලවෙළකයක්ඛස්ස, ඨානෙ ථූපඤ්ච කාරයි;
දීපම්හි ජිණ්ණකාවාසෙ, බහූ ච පටිසඞ්ඛරි.
සඞ්ඝත්ථෙරසහස්සස්ස, සහස්සග්ඝමදාසි සො;
ථෙරදානඤ්ච සබ්බෙසං, අනුවස්සඤ්ච චීවරං.
අන්නපානාදිදානස්ස, පරිච්ඡෙදො න විජ්ජති;
සුභික්ඛත්ථාය කාරෙසි, සො’ව සොළස වාපියො.
මණිහීරමහාවාපිං ¶ , ජල්ලුරං ඛාණුනාමකං;
මහාමණිං කොකවාතං, මොරකපරකවාපිකං.
කුබ්බාහකං වාහකඤ්ච, රත්තමාලකණ්ඩකම්පි ච;
තිස්සවඩ්ඪමානකඤ්ච, වෙළඞ්ගවිට්ඨිකම්පි ච.
මහාගල්ලචීරවාපිං, මහාදාරගල්ලකම්පි ච;
කාළපාසාණවාපිඤ්ච, ඉමා සොළස වාපියො.
ගඞ්ගාය පබ්බවව්හංසො, මහාමාතිඤ්ච කාරයි;
එවං පුඤ්ඤමපුඤ්ඤඤ්ච, සුබහුං සො උපාචිනීති.
අසාධුසඞ්ගමෙනෙවං, යාවජීවං සුභාසුභං;
කත්වා ගතො යථාකම්මං, සො මහාසෙනභූපති.
තස්මා අසාධුසංසග්ගං, ආරකා පරිවජ්ජිය;
අහිං වා’සි විසං ඛිප්පං, කරෙය්ය’ත්ථහිතං බුධො.
අහු රාජා සිරිමෙඝ-වණ්ණො තස්ස සුතො තතො;
වන්ධාතා විය ලොකස්ස, සබ්බසම්පත්තිදායකො.
මහාසෙනෙන පාපානං, වසගෙන විනාසිතෙ;
මහාවිහාරෙ සබ්බෙපි, සන්නිපාතිය භික්ඛවො.
උපසඞ්කම්ම වන්දිත්වා, නිසින්නො පුච්ඡි සාදරො;
‘‘පිතරා සඞ්ඝමිත්තස්ස, සහායෙන විනාසිතං.
කිං කිමෙවා’’ති ආහංසු, භික්ඛවො තං නරිස්සරං;
‘‘සීමායුග්ඝාටනං කාතුං, වායමිත්වාපි තෙ පිතා.
නාසක්ඛි අන්තොසීමායං, භික්ඛූනං විජ්ජමානතො;
භූමිගබ්භනිලීනාහි, සත්තාසුං එත්ථ භික්ඛවො.
අමච්චො සොණාමච්චො ච, සඞ්ඝමිත්තො ච පාපියො;
රාජානං සඤ්ඤාපෙත්වාන, අපුඤ්ඤං තෙන කාරයුං.
භින්දිත්වා ලොහපාසාදං, සත්තභූමකමුත්තමං;
ඝරෙ නානප්පකාරෙ ච, ඉතො’භයගිරිං නයුං.
මාසකෙ චතුබුද්ධෙහි, නිවුත්ථෙ චෙතියඞ්ගණෙ;
වපාපෙසුඤ්ච දුප්පඤ්ඤා, පස්ස බාලසමාගමං’’.
තං ¶ සුත්වා පිතුකම්මං සො, නිබ්බින්නො බාලසඞ්ගමෙ;
පිතරා නාසිතං තත්ථ, සබ්බං පාකතිකං අකා.
ලොහපාසාදමගදො’ව, කාසි පාසාදමුත්තමං;
රඤ්ඤො මහාපනාදස්ස, දස්සෙන්තො විය භූතලෙ.
පරිවෙණානි සබ්බානි, නාසිතානි නිවෙසයි;
භොගෙ ආරාමිකානඤ්ච, යථාඨානෙ ඨපෙසි සො.
පිතරා පච්චයානඤ්ච, පච්ඡින්නත්තා විබුද්ධිනා;
ඡිද්දාවාසං ඝනාවාසං, විහාරං’කාසි බුද්ධිමා.
කාරිතෙ පිතරා ජොති වනෙචෙ’සො විහාරකෙ;
කම්මං විප්පකතං සබ්බං, නිට්ඨාපෙසි නරිස්සරො.
ථෙරස්සා’ථ මහින්දස්ස, සමණින්දස්ස සුනුනො;
සුත්වාන මනුජින්දො සො, පවත්තිං සබ්බමාදිතො.
පසීදිත්වා ගුණෙ තස්ස, රාජා දිප්පපසාදකෙ;
‘‘ඉස්සරො වත දීපස්ස, ථෙරො’’ ඉති විචින්තිය.
පටිබිම්බං සුවණ්ණස්ස, කත්වා තම්මාණ නිස්සිතං;
පුබ්බකත්තිකමාසස්ස, පබ්බපක්ඛෙ තු සත්තමෙ.
දිනෙ නෙත්වා චෙතියම්බ-ථලෙ ථෙරම්බසඤ්ඤිතෙ;
තත්රට්ඨමෙ නිවාසෙත්වා, තතො තු නවමෙ පන.
මහාසෙනං ගහෙත්වා සො, දෙවසෙනා සමූපමං;
ඔරොධෙ නගරෙ චෙව, ගෙහරක්ඛණකෙ විනා.
ලංකාදීපෙ ච සකලෙ, සබ්බෙ ආදාය භික්ඛවො;
විස්සජ්ජෙත්වා මනුස්සෙ ච, නගරෙ චාරකට්ඨිතෙ.
පට්ඨපෙත්වා මහාදානං, අයඤ්චාඛිලපාණිනං;
පූජං සබ්බොපහාරෙහි, කරොන්තො ච අනූපමං.
පච්චුග්ගමනමෙතස්ස, දීපසත්ථුස්ස සත්ථුනො;
වරපුත්තස්ස සො කත්වා, දෙවරාජා’ව සත්ථුනො.
චෙතියම්බථලා යාව, නගරං සාධුසජ්ජයි;
මග්ගං වෙසාලිතො යාව, සාවත්ථිනගරං යථා.
විස්සජ්ජෙත්වා ¶ තහිං භොගං, සබ්බං ථෙරස්ස සො පිතා;
රාජා මොග්ගලිපුත්තස්ස, ථෙරස්සා’ගමනෙ විය.
දත්වා තත්ථ මහාදානං, කපණද්ධිවනිබ්බකෙ;
භික්ඛවොපි ච තොසෙත්වා, පච්චයෙහි චතූහි’පි.
ථෙරස්සා’ගමනෙ එවං, පස්සතූති මහාජනෙ;
ගහෙත්වා තංමහන්තෙන, සක්කාරෙන මහායසො.
තම්හා ඔරුය්හ සො මහා, සයං හුත්වා පුරෙචරො;
භික්ඛවො චාපි කත්වාන, පරිවාරෙ සමන්තතො.
ථෙරස්ස බිම්බං සොවණ්ණං, ඛිරසාගරමජ්ඣගො;
සඤ්ඣා ඝනපරික්ඛිත්තො, හෙමමෙරු’ව සොභථ.
වෙසාලිනගරං සුත්තං, දෙසෙතුං ලොකනායකො;
අගමා එවමෙවාති, දස්සෙසි ච මහාජනං.
එවං කරොන්තො සක්කාර-සම්මානං සො නරාසභො;
නගරස්ස’ස්ස පාචින-ද්වාරපස්සෙ සයංකතං.
උපසඞ්කම්ම සායණ්හෙ, විහාරං සොත්ථියා කරං;
තීහං තත්ථාපි වාසෙසි, බිම්බං තං ජිනසුනුනො.
නගරං සාධුසජ්ජෙත්වා, තතො ද්වාදසමෙ දිනෙ;
සත්ථුස්සා’දිප්පවෙසම්හි, පුරං රාජගහං යථා.
පටිමං නීහරිත්වා තං, විහාරං සොත්ථියා කරං;
නගරෙ සාගරාකාරෙ, වත්තමානෙ මහාමහෙ.
මහාවිහාරං නෙත්වාන, තෙමාසං බොධියඞ්ගණෙ;
නිවාසෙත්වා පවෙසෙත්වා, තෙනෙව විධිනා පුරං.
රාජගෙහසමීපම්හි, පුබ්බදක්ඛිණකොණකෙ;
පටිබිම්බස්ස කාරෙසි, තස්ස සාධුනිවෙසනං.
කාරෙත්වා ඉද්ධියාදීනං, පටිමායො විසාරදො;
ථෙරෙන සහ තත්ථෙ’ව, නිවෙසෙසි මහාපති.
ආරක්ඛං පට්ඨපෙත්වා, පූජාය ච පරිබ්බයං;
අනුසංවච්ඡරං කාතුං, එවමෙව නියොජයි.
තස්සාණමනුරක්ඛන්තා ¶ , රාජා තබ්බංසිකා ඉධ;
යාව’ජ්ජපරිරක්ඛන්ති, තං විධිං න විනාසිය.
පවාරණාදිනෙ නෙත්වා, විහාරං නගරා තතො;
කාතුං තෙරසියං පූජං, අනුවස්සං නියොජයි.
විහාරෙ අභයෙ තිස්ස-වසභෙ බොධිපාදපෙ;
සිලාවෙදිඤ්ච කාරෙසි, පාකාරඤ්ච මනොහරං.
නවමෙ තස්ස වස්සම්හි, දාඨාධාතුං මහෙසිනො;
බ්රාහ්මණීකාචි ආදිය, කාලිඞ්ගම්හා ඉධානයි.
දාඨාධාතුස්ස වංසම්හි, වුත්තෙන විධසනං;
ගහෙත්වා බහුමානෙන, කත්වා සම්මා න මුත්තමං.
පක්ඛිපිත්වා කරණ්ඩම්හි, විසුද්ධඵලිකුම්භව්හෙ;
දෙවානංපියතිස්සෙන, රාජවත්ථුම්හි කාරිතෙ.
ධම්මචක්කව්හයෙ ගෙහෙ, වඩ්ඪයිත්ථ මහීපති;
තතො පට්ඨාය තං ගෙහං, දාඨාධාතුඝරං අහු.
රාජා සතසහස්සානං, නවකං පුණ්ණමානසො;
විස්සජ්ජෙත්වා තතො’කාසි, දාඨාධාතු මහාමහං.
අනුසංවච්ඡරං නෙත්වා, විහාරමභයුත්තරං;
තස්ස පූජාවිධිං කාතු, මෙව රූපං නියොජයි.
අට්ඨාරස විහාරෙ ච, කාරාපෙසි මහීපති;
අනුකම්පාය පාණීනං, වාපියො ච ථිරොදිකා.
බොධි පූජාදි පුඤ්ඤානි, අප්පමෙය්යානි කාරිය;
අට්ඨවීසතිමෙ වස්සෙ, ගභො සො තස්ස යා ගති.
කුමාරො ජෙට්ඨතිසො’ථ, භාතා තස්ස කනිට්ඨකො;
ඡත්තං ලඞ්ඝෙසි සංකායං, දන්තසිප්පම්හි කොවිදො.
කත්වා කම්මානි චත්රානි, දුක්කරානි මහීපති;
සිප්පායතන මෙතං සො, තික්ඛාපෙසි බහූජනෙ.
අණත්තො පිතුනා’කාසි, ඉද්ධිහි විය නිම්මිතං;
බොධිසත්ත සරූපඤ්ච, රූපං සාධු මනොහරං.
අපසයඤ්ච ¶ පල්ලඞ්කං, ඡත්තං රතනමණ්ඩපං;
චිත්රදන්තමයං කිඤ්චි, තස්ස කම්මං තහිං තහිං.
කත්වා සො නවවස්සානි, ලංකාදීපානුසාසනං;
අනෙකානි ච පුඤ්ඤානි, යථාකම්මමුපාගමි.
බුද්ධදාසො තතො තස්ස, පුත්තො ආසි මහීපති;
ගුණානං ආකරො සබ්බ-රතනානං’ව සාගරො.
සුඛං සබ්බපයොගෙහි, කරොන්තො දීපවාසිනං;
රක්ඛමාලකමන්දං’ව, පුරං වස්සවණො ධනී.
පඤ්ඤා පුඤ්ඤගුණූපෙතො, විසුද්ධකරුණාලයො;
තථා දසහි රාජූනං, ධම්මෙහි සමුගාගතො.
චතස්සො අගති හිත්වා, කාරයන්තො විනිච්ඡයං;
ජනං සඞ්ගහවත්ථූහි, සඞ්ගහෙසි චතූහිපි.
චරියං බොධිසත්තානං, දස්සෙන්තො සක්ඛිපාණිනං;
පිතා’ව පුත්තෙ සො සත්තෙ, අනුකම්පිත්ථ භූපති.
දළිද්දෙ ධනදානෙනා-කාසි පුණ්ණමනොරථෙ;
සුඛිතෙ සබ්බභොගානං, ජීවිතස්ස ච ගුත්තියා.
සාධවො සඞ්ගහෙනා’ථ, නිග්ගහෙන අසාධවො;
ගිලානෙ වෙජ්ජකම්මෙන, සඞ්ගහෙසි මහාපති.
අථෙක දිවසං රාජා, හත්ථික්ඛන්ධවරං ගතො;
තිස්සවාපිං නහානත්තං, ගච්ඡමානො මහාපථෙ.
අද්දසෙ’කං මහානාගං, කුච්ඡිරොග සමප්පිතං;
පුත්තභාග විහාරස්ස, පස්සෙ වම්මිකමත්ථකෙ.
උත්තාන මුදරෙ රොගං, දස්සෙතුං ගණ්ඩසඤ්ඤිතං;
නිපන්නංසො’ථ චින්තෙසි, තතො රොගීති නිච්ඡයං.
අථො’රුය්හ මහානාගං, මහානාග සමීපගො;
එවමාහ මහානාගො, මහානාගමනාගවා.
‘‘කාරණං තෙ මහානාග, ඤාතමාගමනෙ මයා;
කුම්හෙ ඛලු මහාතෙජා, ඛිප්පං කුප්පිතසීලිනො.
තස්මා ඵුසිත්වා තං කම්මං, කාතුං සක්කා න තෙ මයා;
අඵුසිත්වාපි නො සක්කා, කින්නුකාතබ්බමෙත්ථී’ති.
එවං ¶ පුත්තෙ ඵණින්දො සො, කෙවලං ඵණමත්තනො;
බිලස්ස’න්තො පවෙසෙත්වා, නිප්පජ්ජිත්ථ සමාහිතො.
අථෙ’න මුපසඞ්කම්ම, උච්ඡඞ්ගගතමත්තනො
සත්ථං ගහෙත්වා ඵාලෙත්වා, උදරං තස්ස භොගිනො.
නීහරිත්වා තතො දොසං, කත්වා භෙසජ්ජ මුත්තමං;
සප්පං තං තඞ්ඛණෙනෙව, අකාසි සුඛිතං තදා.
අත්තාන මෙවං ථොමෙසි, ‘‘මහාකාරුඤ්ඤතං මම;
තිරච්ඡානාපි ජානිංසු, සාධු රජ්ජන්ති මෙ කතං.
දිස්වා සුඛිතමත්තානං, පන්නගොසො මහීපතිං;
පූජෙතුං තස්ස පාදාසි, මහග්ඝං මණිමත්තනො.
සිලාමයාය සම්බුද්ධ-පටිමාය අකාරයි;
මිණිං තං නයනං රාජා, විහාරෙ අභයුත්තරෙ.
එකොපි භික්ඛු භික්ඛන්තො, ගාමම්හි ථුසවිත්ථිකෙ;
සුක්ඛං භික්ඛං ලභිත්වාන, ඛීරභික්ඛාය සඤ්චරං.
ඛීරං සප්පාණකං ලද්ධා, පරිභුඤ්ජිත්ථ කුච්ඡියං;
පාණකා බලවො හුත්වා, උදරං තස්ස ඛාදිසුං.
තතො සො උපසඞ්කම්ම, තං නිවෙදෙසි රාජිනො;
රාහ ‘‘ජාතො සුලො’යං, කදා හාරෙසි කීදිසං.
සො ආහ’’ ථුසවිත්ථිම්හි, ගාමෙ ඛීරෙන භොජනෙ;
භුත්තෙ’ති රාජා අඤ්ඤාසි, ඛීරං සප්පාණකං’’ඉති.
තදෙව අස්සො එකොපි, සිරාවෙධ තිකිච්ඡියො;
රාජා තස්ස සිරාවෙධං, කත්වා ආදාය ලොහිතං.
පායෙත්වා සමණං ආහ, මුහුත්තං වීතිනාමය;
‘‘අස්සලොහිතමණ’’න්ති, තං සුත්වා සමණොවමි.
පාණකා ලොහිතෙනෙව, නික්ඛමිංභු සුඛී අහු;
භික්ඛුං රාජා නිවෙදෙසි, කුච්ඡිමෙවං පනත්තනො.
‘‘එකසත්ථපහාරෙන ¶ , පාණකා සමණො හයො;
කතා අරොගා සම්මමෙ, වෙජ්ජකම්ම මහො’’ඉති.
පිවන්තො තොයමෙකො හි,
දෙඩ්ඩුභණ්ඩං මජානිය;
අජ්ඣොහරිතදා ආසි,
තතො ජාතො’ති දෙඩ්ඩුභො.
අන්තො තු දිත්ථතුණ්ඩෙන, තෙන දුක්ඛෙන පීළිතො;
රාජානං මගමා රාජා, නිදානං තස්ස පුච්ඡිය.
අන්තො තු දිත්ථතුණ්ඩෙන, තෙන දුක්ඛෙන පීළිතො;
රාජානං මගමා රාජා, නිදානං තස්ස පුච්ඡිය.
අඑන්තා සප්පො’ති විඤ්ඤාය, සත්තාහමුපවාසිය;
සුන්හාතසු විලිත්තඤ්ච, සයනෙ සාධු සන්ථතෙ.
සයාපෙසි තතො සො’ති, නිද්දාය මුඛමත්තනො;
විවරිත්වා තදා සුත්තො, තතො තස්ස මුඛන්තිකෙ.
මංසපෙසිං ඨපාපෙසි, සරජ්ජුං තස්ස නිග්ගතො;
ගන්ධෙන තං ඩංසිත්වාන, අන්තො විසිතුමාරභි.
රජ්ජුයා’ථ ගහෙත්වාන, සමාකඩ්ඪික පාණියං;
උදකෙ පාතයිත්වාන, ඉදං වචනමබ්රවි.
‘‘වෙජ්ජො අහොසි සම්මාස-ම්බුද්ධස්ස කිර ජීවකො;
කම්මං විජ්ජති ලොකස්ස, කතං කිංතෙන දුක්කරං.
ඊදිසං කසිරාසො’පි, කම්මං නත්ථෙ’ත්ථ සංසයො;
සබ්බාදරෙන කුබ්බන්තො, අහො පුඤ්ඤො දයො මම.
තථා හෙල්ලොලිගාමම්හි, චණ්ඩාලි මුළ්හගබ්භිනිං;
ජාතං සත්තසු වාරෙසු, සගබ්භං සුඛිතං අකා.
වාතබොධෙන එකො’පි, භික්ඛු උට්ඨාපිතො අහු;
ගොපානසී ගතෙතම්හි, දුක්ඛාමොචෙසි බුද්ධිමා.
පිවන්තස්සාපි මණ්ඩූක, ජීබයුත්තං ජලං ලහුං;
නාසිකා බිලතො ගන්ත්වා, බීජමාරුය්හ මත්ථකං.
භිජ්ජිත්වා ආසි මණ්ඩූකො, සො වුද්ධො තත්ථ ගච්ඡති;
මෙඝස්සා’ගමනෙ තෙන, සො’නිබ්බජ්ජති මාණවො.
ඵාලෙත්වා ¶ මත්ථකං රාජා, මණ්ඩූකමපනීය සො;
කපාලානි ඝටෙත්වාන-කාසි පාකතිකං ඛණෙ.
හිතත්ථං දීපාවාසිනං, ගාමෙ ගාමෙ මහීපති;
කාරෙත්වා වෙජ්ජසාලායො, වජ්ජෙ තත්ථ නියොජයි.
සබ්බෙසං වජ්ජසත්ථානං, කත්වා සාරත්ථසඞ්ගහං;
ඨපෙසි වෙජ්ජෙ දීපස්ස, තිකිච්ඡත්ථමනාගතෙ;
යොජෙසි වෙජ්ජ මෙකෙකං, රාජා ගාම ද්විපඤ්චකෙ.
අදා විසද්ධ ඛෙත්තානං, වෙජ්ජානමුපජීවනං;
වෙජ්ජෙහත්ථීනමස්සානං, බලස්ස ච නියොජයි.
පිට්ඨසප්පිනමන්වානං, සාලායො ච තහිං තහිං;
කාරෙසි සහ භොගෙන, සාලායො ච මහාපථෙ.
නිච්චමස්සොසි සද්ධම්මං, සක්කත්වා ධම්මභාණකෙ;
ධම්මභාණකවට්ටඤ්ච, පට්ඨපෙසි තහිං තහිං.
සාටකන්තරතො කත්වා, සත්ථ වට්ටිං මහාදයො;
දිට්ඨෙ දිට්ඨෙ පමොචෙසි, දුක්ඛම්හා දුක්ඛිතෙ ජනෙ.
අථෙක දිවසං රාජා, රාජාභරණ මණ්ඩිතො;
සද්ධිං ගච්ඡති සෙනාය, දෙවෙහි විය වාසවො.
තං දිස්වා සිරිසොභග්ග-මග්ගං පත්තං මහී පතිං;
රාජිද්ධිහි විරාජන්තං, බද්ධවෙරො භවන්තරෙ.
කුට්ඨි එකො පකුප්පිත්වා, හට්ඨෙනාහනියා’වතිං;
පොථෙන්තො තඤ්ච පොථෙන්තො, භූමිං කත්තරයට්ඨියා.
අක්කොසෙසි අනෙකෙහි, අක්කොසවචනෙහි ච;
විප්පකාරංමිමං දිස්වා, දූරතො’ව මහීපති.
‘‘නාහං සරාමි සත්තස්ස, කස්සා’පි කතමප්පියං;
පුබ්බවෙරී අයං ජාතු, නිබ්බාපෙස්සාමිතං’’ ඉති.
අණාපෙසි සමීපට්ඨං, පුරිසං ‘‘ගච්ඡ කුට්ඨිනො;
අමුකස්සා’භිජානාහි, චිත්තාචාර’’න්ති සො තතො.
සහායො ¶ විය කුට්ඨිස්ස, සමීපම්හි නිසීදිය;
‘‘රුට්ඨො කිමත්ථං භො ත්ව’’න්ති, පුච්ඡි සබ්බමවොච සො.
‘‘දාසො මෙ බුද්ධදාසො’යං, රාජාහු පුඤ්ඤකම්මුනා;
අවමඤ්ඤාය මං මය්හං, පරතො තො යාති හත්ථිනා.
ජානාපෙස්සාමි අත්තානං, කතිපාහෙන සොයදි;
හත්ථං මෙ එති කාරෙත්වා, සබ්බං දාසාන නිග්ගහං.
නො චෙ හත්ථං මමා’යාති, මාරෙත්වා ගලලොහිතං;
පිවිස්සාමි න සන්දෙහො, න චිරෙනෙව පස්සසි’’.
සො ගන්ත්වා නරපාලස්ස, පවත්තිං තං නිවෙදයි;
‘‘පුබ්බවෙරි මමායන්ති, නිච්ඡිනිත්වා මහාමති.
විනො දෙතුමුපායෙන, පුත්තංවෙරන්ති වෙරිනො;
‘‘සාධු සඞ්ගණුතං ත්ව’’න්ති, පුරිසං තං නියෙජයි.
සො කුට්ඨිමුපසඞ්කම්ම, සහායො පිය ආහතං;
‘‘රාජානං තං විනාසෙතුං, චෙතෙත්වා කාලමෙත්තකං.
අලභන්තො සහායං මෙ, නාසක්ඛි තස්ස ඝාතනෙ;
ලද්ධාතුම්හෙ නයිස්සාමි, මත්ථකං මෙ මනොරථං.
එථ ගෙහෙ වසිත්වා මෙ, හොථ මෙ අනුවත්තකා;
අහමෙව’ස්ස නාසෙමි, කතිපාහෙන ජීවිතං.
ඉති වත්වාන තං කුට්ඨං, නෙත්වා සො ඝරමත්තනො;
සුන්හාත සුවිලිත්තඤ්ච, නිවත්ථසුඛුමම්බරං.
සුභුත්තමධුරාහාරං, යොබ්බනිත්ථිකථාදරං;
සයාපෙසි මනුඤ්ඤම්හි, සයනෙ සාධු සන්ථතෙ.
එතෙ නෙව නියාමෙන, කතිපාහං නීවාසිය;
ඤත්වා තං ජාතවිස්සාසං, සුඛිතං පිණිතින්ද්රියං.
‘‘රඤ්ඤො දින්න’’න්ති වත්වාන, ඛජ්ජභොජ්ජාදිකං අදා;
ද්වත්තික්ඛත්තුං නිසෙධෙත්වා, තෙන’ජ්ඣිට්ඨො නමග්ගහි.
භූපාලෙන කමෙනා’සි, විස්සත්ථො’තිව භූමිපො;
මතොති සුත්වා තස්සා-සි හදයං ඵලිතං ද්විධා.
එවං ¶ රොගෙ තිකිච්ඡෙසි, රාජා සාරීරමානසෙ;
ඨපෙසි වෙජ්ජෙ දීපස්ස, තිකච්ඡත්ථ මනාගතෙ.
පඤ්චවීසතිහත්ථෙන, පාසාදෙ නොපසොභිතං;
මහාවිහාරෙමොරව්හ-පරිවෙණමකාරයි.
සමණං ගොළපානුඤ්ච, අදා ගාමද්වයං තහිං;
ධම්මඝාසක භික්ඛූනං, භොගෙ කප්පියකාරකෙ.
විහාරෙ පරිවෙණෙ ච, සම්පන්න චතුපච්චයෙ;
වාපියො දානසාලායො, පටිමායොච කාරයි.
තස්සෙව රඤ්ඤො රජ්ජම්හි, මහාධම්මකථීයති;
සුත්තානි පරිවත්තෙසි, සීහළායනිරුත්තියා.
අභීති පුත්තා තස්සා’සුං, සූරාවිරඞ්ගරූපිනො;
අසීතියා සාවකානං, නාමකායිපදස්සනා.
සාරිපුත්තාදිනාමෙහි, පුත්තෙහි පරිවාරිතො;
බුද්ධදාසො සසම්බුද්ධ-රාජාවිය විරොචථ.
එවං කත්වා හිතංදීප-වීසීනං තිදිවං ගතො;
වස්සෙ එකූනතිංසම්හි, බුද්ධදාසො නරාධිපො.
තතො ජෙට්ඨසුතො තස්ස, උපතිස්සො’සි භූපති;
සබ්බරාජගුණොපෙසො, නිච්චසීලො මහාදයො.
දසාපුඤ්ඤක්රියාහිත්වා, දසපුඤ්ඤක්රියා’දීයි;
රාජධම්මෙච පූරෙසි, රාජපාරමිතා දස.
ගණ්හි සඞ්ගහවත්ථූහි, චථූහි ච චතුද්දිසං;
මහාපාළිම්හි දාපෙසි, රාජාරාජානුභොජනං.
උත්තරම්හි දිසාභාගෙ, චෙතියම්හා තු මඞ්ගලා;
ථූපඤ්ච පටිමාගෙහං, පටිමඤ්චා’පි කාරයි.
කරොන්තො තඤ්ච සො රාජා, මාඛිජ්ජන්තු ජනා ඉති;
කාරාපෙසි කුමාරෙහි, දාපෙත්වා ගුළකණ්ඩුලං.
රාජුප්පලව්හයං ¶ ගිජ්ඣ-කූටං පොක්ඛරපාසයං;
වාලාහස්සඤ්ච අම්බුට්ඨිං, ගොණ්ඩිගොමම්හි වාපිකං.
විහාරං ඛණ්ඩරාජිඤ්ච, වාපියො ච ථිරොදිකා;
අප්පමාණානි පුඤ්ඤානි, කාරාපෙසි තහිං තහිං.
වස්සාමානෙපි සො වස්සෙ, සයනෙ සන්නිසින්නකො;
කෙවලං පරිණාමෙසි, රත්තිං ‘‘ඛෙදො ජනස්සී’’ති.
ඤත්වා අමච්චො තං නෙත්වා, උය්යානං ජාදයීඝරං;
එවං පටිච්ච අත්තානං, දුක්ඛං නාකාසි පාණිනං.
කාලෙ තස්සා’සී දුක්ඛිත්ත-රොගදුක්ඛෙහි පීළිතො;
දීපො දීපො පමොපාප-තමසො සො සුමානසො.
භික්ඛූ පුච්ඡිත්ථ’’කිංභන්තෙ, දුබ්භික්ඛාදිභයද්දිතෙ;
ලොකෙ ලොකහිතං නත්ථි, කතං කිඤ්චි මහෙසීනා.
ගහ්ඝාරොහණසුත්තස්ස, උප්පත්තිංතස්ස නිද්දිසුං;
සුත්වා තං සබ්බසොවණ්ණං, බිම්බං සම්බුද්ධධාතුනො.
කත්වා සත්ථුසිලාපත්තං, සොදකං පාණිසම්පුටෙ;
ඨපෙත්වා තස්ස තෙ රූප-මාරොපෙත්වා මහාරථං.
සයං සීලං සමාදාය, සමාදෙත්වා මහාජනං;
මහාදානං පවත්තෙත්වා, අභයං තම්බපාණිනං.
අලඞ්කත්වා ච නගරං, දෙවලොකමනොහරං;
දීපවාසීහි සබ්බෙහි, භික්ඛූහි පරිවාරිතො.
ඔතරිත්ථ මහාවීථිං, භික්ඛූ තත්ථ සමාගතා;
භණන්තා රතනං සුත්තං, සිඤ්චමානා ජලං තථා.
රාජගෙහන්තිකෙ වීති-මග්ගෙ පාකාරසන්තිකෙ;
විචරිංසු තියාමන්තෙ, කුරුමානා පදක්ඛිණං.
භිජ්ජමානෙ’රුණෙ වස්සි, මහාමෙඝො මහීතලෙ;
රොගාතුරාච සබ්බෙපි, සුඛිතාකංසු උස්සවං.
‘‘යදා දුබ්භික්ඛරොගාදි-භයං දීපම්හි හෙස්සති;
එවමෙව කරොන්තූ’’ති, නියොජෙසි නරාධිපො.
ආරුළ්හො ¶ චෙතියං කුන්ත-කිපිල්ලාදිමවෙක්ඛිය;
පුච්ඡිත්වා මොරපිඤ්චෙන, ‘‘සණිකං යන්තුවනංති ච.
සඞ්ඛං සොදකමාදාය, චරතා’සනධොවනෙ;
දක්ඛිණපරිතොණම්හි, කාරෙත්වා රාජගෙහතො.
උපොසථඝරං බුද්ධ-පටිමාගෙහ මෙව ච;
පාකාරෙන පරික්ඛිත්තං, උය්යානඤ්ච මනොරමං.
චාතුද්දසිංපඤ්චදසිං, යා ච පක්ඛස්ස අට්ඨමී;
පාටිහාරියපක්ඛඤ්ච, අට්ඨඞ්ගසමුපාගතං.
උපොසථංසමාදාය, සාපදානං තහං වසී;
යාවජීවඤ්ච සො භුඤ්ජි, මහාපාළිම්හි භොජනං.
චරන්තොචකලන්දාන මුය්යානෙ භත්තමත්තනො;
කත්වා නිවාපං දාපෙසි, තදජ්ජාපි ච වත්තති.
චොරං වජ්ජමුපනීතං, දිස්වා සංවිග්ගමානසො;
ඡවං සුසානං ආනෙත්වා, ඛිපිත්වා ලොහකුම්භියං.
දත්වා ධමං පලාපෙත්වා, චොරං රත්තියමුග්ගතෙ;
සූරියෙ කුජ්ඣිතො චොරං-වියඣාපයි තං ඡවං.
අකා දීපම්හි සබ්බෙසං, චෙතියානං මහාමහං;
ථූපාරාමෙ ච ථූපස්ස, හෙමචුම්බටකඤ්චුකං.
ද්වාචත්තාලීසවස්සානි, කත්වා වඤ්චුංඛණම්පිසො;
කත්වා පුඤ්ඤමුපාගඤ්ඡි, දෙවරාජසහබ්යතං.
රඤ්ඤො තස්ස කනිට්ඨෙන, මහානාමෙන වල්ලභා;
දෙවී සත්ථං නිපාතෙත්වා, තමඨානම්හි මාරයි.
පබ්බජිත්කා කනිට්ඨො සො, ජීවමානම්හි භාතරි;
හතෙ රාජිනි භීතාය, ආවත්තිත්වා’සි භූපති.
මහෙසිංඅත්තනො’කාසි, මහෙසිං භාතුඝාතිනිං;
ගිලානසාලා කාරෙසි, මහාපාළිඤ්ච වඩ්ඪයි.
ලොහද්වාර ¶ රලග්ගාම-කොටිපස්සවනව්හයෙ;
තයො විහාරෙ කත්වා’දා, භික්ඛූනමභයුත්තරෙ.
විහාරං කාරයිත්වාන, ධුමරක්ඛම්හි පබ්බතෙ;
මහෙසියා නයෙනා’දා, භික්ඛූනං ථෙරවාදීනං.
නවකම්මඤ්ච ජිණ්ණෙසු, විහාරෙසු සකාරයි;
දානසීලරතො වත්ථු-පූජකො ච අහු සදා.
බොධිමණ්ඩසමීපම්හි, ජාතො බ්රොහ්මණමාණවො;
විජ්ජාසිප්පකලාවෙදී, තීසු වෙදෙසු පාරගො.
සම්මාවිඤ්ඤාතසමයො, සබ්බවාදවිසාරදො;
වාදත්ථි ජම්බුදීපම්හි, ආහිණ්ඩන්තො පවාදිකො.
විහාරමෙකං ආගම්ම, රත්තිං පාතඤ්ජලං මතං;
පරිවත්තෙසි සම්පුණ්ණ-පදං සුපරිමණ්ඩලං.
තත්ථෙකො රෙවතොනාම, මහාථෙරො විජානිය;
‘‘මහාපඤ්ඤො අයං සත්ථො, දමෙතුං වට්ටතී’’ති සො.
‘‘කො නු ගද්රභරාවෙන, විරවන්තො’’ති අබ්රවි;
‘‘ගද්රභානං රවෙ අත්ථං, කිං ජානාසී’’ති ආහතං.
‘‘අහං ජානෙ’’ති වුත්තොසො, ඔතාරෙසි සකං මතං;
වුත්තං වුත්තං වියාකාසි, විරොධම්පි ච දස්සයි.
‘‘තෙනහි ත්වං සකවාද-මොතාරෙහී’’ති චොදිතො;
පාළිමාහා’භිධම්මස්ස, අත්ථමස්ස න සො’මිගා.
ආහ කස්සෙ’සමන්තො’ති, බුද්ධමන්තො’ති සොබ්රවි;
‘‘දෙහි මෙ ත’’න්ති වුත්තෙහි, ‘‘ගණ්හු පබ්බජ්ජතං’’ඉති.
මන්තත්ථී පබ්බජිත්වාසො, උග්ගණ්හි පිටකත්තයං;
‘‘එකායනො අයං මග්ගො’’, ඉති පච්ඡා තමග්ගහි.
බුද්ධස්ස විය ගම්භීර-ඝොසත්තාතං වියාකරුං;
‘‘බුද්ධඝොසො’’ති ඝොසොහි, බුද්ධො විය මහීතලෙ.
තත්ථ ඤාණොදයං නාම, කත්වා මකරණං තදා;
ධම්මසඞ්ගණීයා’කාසි, කච්ඡං සො අට්ඨසාලිනිං.
පතිත්තට්ඨකථඤ්චෙව ¶ , කාරාමාරභිබුද්ධිමා;
තං දිස්වා රෙවතො ථෙරො, ඉදං වචනමබ්රුවි.
පාළිමත්තඉධානිතං, නත්ථි අට්ඨකථා ඉධ;
තථාචරියවාදා ච, භින්නරූපා න විජ්ජරෙ.
සීහළාට්ඨකථා සුද්ධා, මහින්දෙන මතීමතා;
සංගීතිත්තයමාරුළං, සම්මාසම්බුද්ධදෙසිතං.
සාරිපුත්තාදිගීතඤ්ච, කථාමග්ගං සමෙක්ඛිය;
එකා සීහළභාසාය, සීහළෙසු පවත්තති.
තං තත්ථ ගන්ත්වා සුත්වා තං, මාගධානං නිරුත්තියා;
පරිවත්තෙසි සා හොති, සබ්බලොකහිතා වහා.
එවං වුත්තො පසන්නො සො, නික්ඛමිත්වා තතොඉමං;
දීපමාගා ඉමස්සෙව, රඤ්ඤොකාලෙ මහාමති.
මහාවිහාරං සම්පත්තො, විහාරං සබ්බසාධූනං;
මහාපධානඝරං ගන්ත්වා, සඞ්ඝපාලස්ස සන්තිකා.
සීහළට්ඨකථා සුද්ධා, ථෙරවාදඤ්ච සබ්බසො;
‘‘ධම්මසාමිස්ස එසොව, අධිප්පායො’’ති නිච්ඡිය.
තත්ථ සඞ්ඝං සමානෙත්වා, ‘‘කාතුමට්ඨකථාමම;
පොත්ථකෙ දෙථ සබ්බෙ’’ති, ආහ වීමංසිතුං සතං.
සඞ්ඝො ගාථාද්වයං තස්සා-දාසි ‘‘සාමත්තියං තව;
එත්ථ දස්සෙහි තං දිස්වා, සබ්බෙ දෙමා’’ති පොත්ථකෙ.
පිටකත්තයමෙත්ථෙව, සද්ධිමට්ඨකථාය සො;
විසුද්ධිමග්ග නාමාකා, සඞ්ගහෙත්වා සමාසතො.
තතො සඞ්ඝං සමුහෙත්වා, සම්බුද්ධමතකොවිදං;
මහාබොධිසමීපම්හි, සො තං වාචෙතුමාරභි.
දෙවතා තස්ස නෙපුඤ්ඤං, පකාසෙතුං මහාජනෙ;
ඡාදෙසුං පොත්ථකංසො’යි, ද්වත්තික්ඛත්තුම්පි තං අකා.
වාචෙතුං තතියෙ වාරෙ, පොත්ථකෙ සමුදාහටෙ;
පොත්ථකද්වයමඤ්ඤම්පි, සණ්ඨාපෙසුං තහිං මරූ.
වාචයිංසු ¶ තදාභික්ඛූ, පොත්ථකත්තය මෙකතො;
ගන්ථතො අත්ථතො චාපි, පුබ්බාපරවසෙන වා.
ථෙරවාදෙහි පාළිහි, පදෙහි බ්යඤ්ජනෙහි ච;
අඤ්ඤත්ථත්තමහූනෙව, පොත්ථත්ථකෙසුපි තීසුපි.
අථ උග්ඝොසයි සඞ්ඝො, තුට්ඨහට්ඨො තිසෙසතො;
‘‘නිස්සංසයා’යං මෙත්තෙය්යො’’, ඉති වත්වා පුනප්පුනං.
සද්ධිමට්ඨකථායා’දා, පොත්ථකෙ පිටකත්තයෙ;
ගන්ථකාරෙ වසන්තො සො, විහාරෙ දුරසඞ්කරෙ.
පරිවත්තෙසි සබ්බාපි, සීහළට්ඨකථා තදා;
සබ්බෙසං මූලභාසාය, මාගධාය නිරුත්තියා.
‘‘සත්තානං සබ්බභාසානං, සා අහොසි හිතාවහා;
ථෙරියා චරියාසබ්බෙ, පාළිංවිය තමග්ගය්හං.
අථ කත්තබ්බකිච්චෙසු, ගහෙතු පරිනිට්ඨිතිං;
වන්දිතුං සො මහාබොධිං, ජම්බුදීපමුපාගමි.
සුත්වා ද්වාවීසවස්සානි, මහානාමො මහාමහිං;
කත්වා පුඤ්ඤානි චිත්රානි, යථා කම්මමුගාගමි.
සබ්බෙ’පෙ තෙ ධරණීපතයො මච්චුමච්චෙතුමන්තෙ,
නො සක්ඛිං සූපචිතසුඛබලාසාධු සම්පන්නභොගො;
එවං සබ්බෙ නිධනවසගා හොන්ති සත්තා’ති නිච්චං,
රාගං සම්මා විනයතුධනෙ ජීවිතෙ චාපි ධීමා.
සුජනප්පසාදසංවෙගත්ථාය කතෙ මහාවංසෙ
පඤ්චරාජකො නාම
සත්තතිංසතිමො පරිච්ඡෙදො.