📜

පඤ්චම පරිච්ඡෙද

තතියධම්මසංගීති

1.

යා මහාකස්සපාදීහි ¶ , මහාථෙරෙහි ආදිතො;

කතා සද්ධම්ම සංගීති, ථෙරියා’ති පවුච්චති.

2.

එකො’ව ථෙරවාදො සො, ආදිවස්සසතෙ අහු;

අඤ්ඤාචරියවාදාතු, තතො ඔරං අජායිසුං.

3.

තෙහි සංගීතිකාරෙහි, ථෙරෙහි දුතියෙහි තෙ;

නිග්ගහිතා පාපභික්ඛූ, සබ්බෙ දසසහස්සකා.

4.

අකංසා’චරියවාදං තෙ, මහාසංගීතිනාමකා;

තතො ගොකුලිකා ජාතා, එකබ්බොහාරිකාපි ච.

5.

ගොකුලිකෙහි පණ්ණත්ති-වාදා බාහුලිකාපි ච;

චෙතියවාදා තෙස්වෙව, සමතාසඞ්ඝිකා ඡ තෙ.

6.

පුනාපි ථෙරවාදෙහි, මහිංසාසකභික්ඛවො;

වජ්ජීපුත්තකභික්ඛූ ච, දුවෙ ජාතා ඉමෙ ඛලු.

7.

ජාතා’ථ ධම්මුත්තරියා, භද්රයානිකභික්ඛවො;

ඡන්නාගාරා සම්මිතියා, වජ්ජීපුත්තියභික්ඛූති.

8.

මහිංසාසකභික්ඛූහි, භික්ඛූ සබ්බත්ථ වාදිනො;

ධම්මගුත්තියභික්ඛූ ච, ජාතා ඛලු ඉමෙ දුවෙ.

9.

ජාතා සබ්බත්ථිවාදීහි, කස්සපියා තතො පන;

ජාතා සඞ්කන්තිකා භික්ඛූ, සුත්තවාදා තතො පන.

10.

ථෙරවාදෙන සහ තෙ, හොන්ති ද්වාදසි’මෙපි ච;

පුබ්බෙ වුත්තඡවාදා ච, ඉති අට්ඨාරසා ඛිලා.

11.

සත්තරසාපි දුතියෙ, ජාතා වසස්සතෙ ඉති;

අඤ්ඤාචරියවාදා තු, තතො ඔරමජායිසුං.

12.

හෙමතා ¶ රාජගිරියා, තථා සිද්ධත්ථිකාපි ච;

පුබ්බසෙලියභික්ඛූ ච, තථා අපරසෙලියා.

13.

වාජිරියා ඡ එතෙහි, ජම්බුදීපම්හි භින්නකා;

ධම්මරුචි ච සාගලියා, ලංකාදීපම්හි භින්නකා.

ආචරියකුලවාදකථා නිට්ඨිතා.

ධම්මාසොකාභිසෙක

14.

කාළාසොකස්ස පුත්තා තු, අහෙසුං දසභාතිකා;

බාවීසතිං තෙ වස්සානි, රජ්ජං සමනුසාසිසුං.

15.

නව නන්දා තතො ආසුං, කමෙනෙව නරාධිපා;

තෙ’පි බාවීසවස්සානි, රජ්ජං සමනුසාසිසුං.

16.

මොරියානං ඛත්තියානං, වංසෙ ජාතං සිරිධරං;

චන්දගුත්තොති පඤ්ඤාතං, චාණක්කො බ්රාහ්මණො තතො.

17.

නවමං ධනනන්දං තං, ඝාතෙත්වා චණ්ඩකොධසා;

සකලෙ ජම්බුදීපස්මිං, රජ්ජෙ සමභිසිඤ්චී සො.

18.

සො චතුවීසවස්සානිං, රාජා රජ්ජමකාරයි;

තස්ස පුත්තො බින්දුසාරො, අට්ඨවීසති කාරයි.

19.

බින්දුසාරසුතා ආසුං, සතං එකො ච විස්සුතා;

අසොකො ආසි තෙසං තු, පුඤ්ඤතෙජොබලිද්ධිකො.

20.

වෙමාතිකෙ භාතරො සො, හන්ත්වා එකූනකං සතං;

සකලෙ ජම්බුදීපස්මිං, එකරජ්ජමපාපුණි.

21.

ජිනනිබ්බානතො පච්ඡා, පුරෙ තස්සාභිසෙකතො;

සාට්ඨාරසං වස්සසත-ද්වයමෙවං විජානිය.

22.

පත්වා චතූහි වස්සෙහි, එකරජ්ජං මහායසො;

පුරෙ පාටලිපුත්තස්මිං, අත්තානමභිසෙචයි.

23.

තස්සා’භිසෙකෙන ¶ සමං, ආකාසෙ භූමියං තථා;

යොජනෙ යොජනෙ ආණා, නිච්චං පවත්තිතා අහු.

24.

අනොතත්තො දකාකාජෙ, අට්ඨනෙසුං දිනෙ දිනෙ;

දෙවා දෙවො අකා තෙහි, සංවිභාගං ජනස්සච.

25.

නාගලතාදන්තකට්ඨං, ආනෙසුං හිමවන්තතො;

අනෙකෙසං සහස්සානං, දෙවා එව පහොනකං.

26.

අගදා’මලකඤ්චෙව, තථාගද හරිතකං;

තතො’ව අමපක්කඤ්ච, වණ්ණගන්ධරසුත්තමං.

27.

පඤ්චවණ්ණානි වත්ථානි, තත්ථපුඤ්ජනපට්ටකං;

පීතඤ්ච දිබ්බපානඤ්ච, ඡද්දන්තදහතො මරු.

28.

මරන්තා නගරෙ තස්මිං, මිගසූකරපක්ඛිනො;

ආගන්ත්වාන මහානසං, සයමෙව මරන්ති ච.

29.

ගාවො තත්ථ චරාපෙත්වා, වජමානෙන්ති දීපිනො;

ඛෙත්ත වත්ථුතළාකාදිං, පාලෙන්ති මිගසූකරා.

30.

සුමනං පුප්ඵපටකං, අභුත්තං දිබ්බමුප්පලං;

විලෙපනං අඤ්ජනඤ්ච, නාගානාගාවිමානතො.

31.

සාලිවාහසහස්සානි, නවුතිං තු සුවා පන;

ඡද්දන්තදහතොයෙව, ආහරිංසු දිනෙ දිනෙ.

32.

තෙ සාලිනිත්ථුසකණෙ, අඛණ්ඩෙත්වාන තණ්ඩුලෙ;

අකංසු මූසිකා තෙහි, භත්තං රාජකුලෙ අහු.

33.

අකංසු සස්සතං තස්ස, මධූනි මධුමක්ඛිකා;

තථා කම්මාරසාලාසු, අච්ඡාකූටානි පාතයුං.

34.

කරවිකා සකුණිකා, මනුඤ්ඤමධුරස්සරා;

අකංසු තස්සා’ගන්ත්වාන, රඤ්ඤො මධුරවස්සිතං.

35.

රාජා’භිසිත්තො සො’සොකො,

කුමාරං තිස්සසව්හයං;

කණිට්ඨං සංසොදරියං, උපරජ්ජෙ’භිසෙචයි.

ධම්මාසොකාභිසෙකො නිට්ඨිතො

නිග්රොධසාමණෙර දස්සන

36.

පිතා ¶ සට්ඨිසහස්සානි, බ්රාහ්මණෙ බ්රහ්මපක්ඛිකෙ;

භොජෙසි සොපි තෙයෙව, තීණි වස්සානි භොජයි.

37.

දිස්වා’නුපසමං තෙසං, අසොකො පරිවෙසනෙ;

විචෙය්ය දානං දස්සන්ති, අමච්චෙ සන්නියොජිය.

38.

ආණාපයිත්වා මතිමා, නානාපාසණ්ඩිකෙ විසුං;

වීමංසිත්වා නිසජ්ජාය, භොජාපෙත්වා විසජ්ජයි.

39.

කාලෙ වාතායනගතො, සන්තං රච්ඡාගතං යතිං;

නිග්රොධසාමණෙරං සො, දිස්වා චිත්තං පසාදයි.

40.

බින්දුසාරස්ස පුත්තානං, සබ්බෙසං ජෙට්ඨභාතුනො;

සුමනස්ස කුමාරස්ස, පුත්තො සො හි කුමාරකො.

41.

අසොකො පිතරා දින්නං, රජ්ජමුජ්ජෙනියඤ්හි සො;

හිත්වා’ගතො පුප්ඵපුරං, බින්දුසාරෙ ගිලානකෙ.

42.

කත්වා පුරං සකායත්තං, මතෙ පිතරි භාතරං;

ඝාතෙත්වා ජෙට්ඨකං රජ්ජං, අග්ගහෙසි පුරෙ වරෙ.

43.

සුමනස්ස කුමාරස්ස, දෙවී තන්නාමිකා තතො;

ගබ්භිනී නික්ඛමිත්වාන, පාචිනද්වාරතො බහි.

44.

චණ්ඩාලගාම මගමා, තත්ථ නිග්රොධදෙවතා;

තමාලපියනාමෙන, මා පත්වා ඝරකං අදා.

45.

තදහෙ’ව වරං පුත්තං, විජායිත්වා සුතස්ස සා;

නිග්රොධොති අකා නාමං, දෙවතා නුග්ගහානුගා.

46.

දිස්වා තං ජෙට්ඨචණ්ඩාලො, අත්තනො සාමිනිං විය;

මඤ්ඤන්තො තං උපට්ඨාසි, සත්තවස්සානි සාධුකං.

47.

තං මහාවරුණො ථෙරො, තදා දිස්වා කුමාරකං;

උපනිස්සය සම්පන්නං, අරහා පුච්ඡි මාතරං.

48.

පබ්බාජෙසි ඛුරග්ගෙ සො, අරහත්තමපාපුණි;

දස්සනායො’ප ගච්ඡන්තො, සො තතො මාතුදෙවියා.

49.

දක්ඛිණෙන ච ද්වාරෙන, පවිසිත්වා පුරුත්තමං;

තං ගාමගාමිමග්ගෙන, යාති රාජඞ්ගණෙ තදා.

50.

සන්තාය ¶ ඉරියා යස්මිං, පසීදි සමහීපති;

පුබ්බෙ’ව සන්නිවාසෙන, පෙමං තස්මිං අජායථ.

51.

පුබ්බෙ කිර තයො ආසුං, භාතරො මධු වාණිජා;

එකො මධුං වික්කිණාති, ආහරන්ති මධුං දුවෙ.

52.

එකො පච්චෙකසම්බුද්ධො, වණරොගාතුරො අහු;

අඤ්ඤො පච්චෙකසම්බුද්ධො, තදත්ථං මධුවත්ථිකො.

53.

පිණ්ඩචාරිකවත්තෙන, නගරං පාවිසී තදා;

තිත්ථං ජලත්ථං ගච්ඡන්ති, එකා චෙටී තමද්දස.

54.

පුච්ඡිත්වා මධුකාමත්තං, ඤත්වා හත්ථෙන ආදිසි;

එසො මධ්වාපණො භන්තෙ, තත්ථ ගච්ඡා’ති අබ්රවි.

55.

තත්ථ පත්තස්ස බුද්ධස්ස, වාණිජො සො පසාදවා;

විස්සන්දයන්තො මුඛතො, පත්තපුරං මධුං අදා.

56.

පුණ්ණඤ්ච උප්පතන්තඤ්ච, පතිතඤ්ච මහීතලෙ;

දිස්වා මධුං පසන්නො සො, එවං පණිදහී තදා.

57.

ජම්බුදීපෙ එකරජ්ජං, දානෙනා’නෙන හොතු මෙ;

ආකාසෙ යොජනෙ ආණා, භූමියං යොජනෙති ච.

58.

භාතරෙ ආගතෙ ආහ, එදිසස්ස මධුං අදං;

අනුමොදථ තුම්හෙ තං, තුම්හාකඤ්ච යතො මධු.

59.

ජෙට්ඨො ආහ අතුට්ඨො සො,

චණ්ඩාලො නූන සොසියං;

නිවාසෙන්තීති චණ්ඩාලා,

කාසායානි සදා ඉති.

60.

මජ්ඣො පච්චෙකබුද්ධං තං, ඛිපපාරණ්ණවෙ ඉති;

පත්තිදානවචො තස්ස, සුත්වා තෙ චානුමොදිසුං.

61.

ආපණා දෙසිකං යාතු, දෙවිත්තං තස්ස පත්ථයි;

ආදිස්සමානසන්ධි ච, රූපං අතිමනොරමං.

62.

අසොකො මධුදො’සන්ධි-මිත්තාදෙවී තු චෙටිකා;

චණ්ඩාලවාදී නිග්රොධො, තිස්සො සො පාරවාදිකො.

63.

චණ්ඩාලවාදී චණ්ඩාල-ගාමෙ ආසි යතො තු සො;

පත්ථෙසි මොක්ඛං මොක්ඛඤ්ච, සත්ත වස්සොව පාපුණි.

64.

නිවිට්ඨපෙමො ¶ තස්මිං සො, රාජා’ති තුරිතො තතො;

පක්කොසාපෙසි තං සො තු, සන්තවුත්තී උපාගමි.

65.

නිසිද තාතා’නුරූපෙ, ආසනෙ තා’හ භූපති;

අදිස්වා භික්ඛුමඤ්ඤං සො, සීහාසනමුපාගමි.

66.

තස්මිං පල්ලඞ්කමායාතෙ, රාජාඉති විචින්තයි;

අජ්ජා’යං සාමණෙරො මෙ, ඝරෙ හෙස්සති සාමිකො.

67.

ආලම්බිත්වා කරං රඤ්ඤො, සො පල්ලඞ්කෙ සමාරුහි;

නිසීදි රාජපල්ලඞ්කෙ, සෙතච්ඡත්තස්ස හෙට්ඨතො.

68.

දිස්වා තථා නිසින්නං තං, අසොකො සො මහීපති;

සම්භාවෙත්වාන ගුණතො, තුට්ඨො’තීව තදා අහු.

69.

අත්තනො පටියත්තෙන, ඛජ්ජභොජ්ජෙන තප්පිය;

සම්බුද්ධදෙසිතං ධම්මං, සාමණෙරමපුච්ඡිතං.

70.

තස්ස’ප්පමාදවග්ගං සො, සාමණෙරො අභාසථ;

තං සුත්වා භූමිපාලො සො, පසන්නො ජිනසාසනෙ.

71.

අට්ඨ තෙ නිච්චභත්තානි, දම්මි තාතා’ති ආහ තං;

උපජ්ඣායස්ස මෙ රාජ, තානි දම්මීති ආහ සො.

72.

පුන අට්ඨසු දින්නෙසු, තාන’දා චරියස්ස සො;

පුන අට්ඨසු දින්නෙසු, භික්ඛුසඞ්ඝස්ස තාන’දා.

73.

පුන අට්ඨසු දින්නෙසු, අධිවාසෙසි බුද්ධිමා;

ද්වත්තිංසභික්ඛූ ආදාය, දුතියදිවසෙ ගතො.

74.

සහත්ථා තප්පිතො රඤ්ඤා, ධම්මං දෙසිය භූපතිං;

සරණෙසු ච සීලෙසු, ඨපෙසි සමහාජනං.

නිග්රොධසාමණෙරදස්සනං

සාසනප්පවෙස

75.

තතො රාජා පසන්නො සො, දිගුණෙන දිනෙ දිනෙ;

භික්ඛූ සට්ඨිසහස්සානි, අනුපුබ්බෙනු’පඨහි.

76.

තත්ථියානං සහස්සානි, නිකඩ්ඪිත්වාන සට්ඨිසො;

සට්ඨිභික්ඛුසහස්සානි, ඝරෙ නිච්චමභොජයි.

77.

සට්ඨිභික්ඛුසහස්සානි ¶ , භොජෙතුං තුරිතො හි සො;

පටියාදාපයිත්වාන, ඛජ්ජභොජ්ජං මහාරහං.

78.

භූසාපෙත්වාන නගරං, ගන්ත්වා සඞ්ඝං නිමන්තිය;

ඝරං නෙත්වාන භොජෙත්වා, දත්වා සාමණකං බහුං.

79.

සත්ථාරා දෙසිතො ධම්මො, කිත්තකොති අපුච්ඡථ;

බ්යාකාසි මොග්ගලිපුත්තො, තිස්සත්ථෙරො තදස්සතං.

80.

සුත්වාන චතුරාසීති, ධම්මක්ඛන්ධා’ති සො’බ්රවි;

පූජෙමි තෙ’හං පච්චෙකං, විහාරෙනා’ති භූපති.

81.

දත්වා තදා ඡන්නවුති-ධනකොටිං මහීපති;

පුරෙසු චතුරාසීති-සහස්සෙසු මහීතලෙ.

82.

තත්ථ තත්ථෙ’ව රාජූහි, විහාරෙ ආරභාපයි;

සයං අසොකාරාමං තු, කාරාපෙතුං සමාරභි.

83.

රතනත්තයනිග්රොධ-ගිලානානන්ති සාසනෙ;

පච්චෙකං සතසහස්සං, සො දාපෙසි දිනෙ දිනෙ.

84.

ධනෙන බුද්ධදින්නෙන, ථූපපූජා අනෙකධා;

අනෙකෙසු විහාරෙසු, අනෙකෙ අකරුං සදා.

85.

ධනෙන ධම්මදින්නෙන, පච්චයෙ චතුරො වරෙ;

ධම්මධරානං භික්ඛූනං, උපනෙතුං සදා නරා.

86.

අනොතත්තොදකාජෙසු, සඞ්ඝස්ස චතුරො අදා;

තෙ පිටකානං ථෙරානං, සට්ඨියෙ’කං දිනෙ දිනෙ.

87.

එකං අසන්ධිමිත්තාය, දෙවියා තු අදාපයි;

සයං පන දුවෙයෙව, පරිභුඤ්ජි මහීපති.

88.

සට්ඨිභික්ඛුසහස්සානං, දන්තකට්ඨං දිනෙ දිනෙ;

සොළසිත්ථිසහස්සානං, අදා නාගලතාව්හයං.

89.

අථෙකදිවසං රාජා, චතුසම්බුද්ධදස්සිනං;

කප්පායුකං මහාකාළං, නාගරාජං මහිද්ධිකං.

90.

සුණිත්වා තමානෙතුං, සොණ්ඩසඞ්ඛලිබන්ධනං;

පෙසයිත්වා තමානෙත්වා, සෙතච්ඡත්තස්ස හෙට්ඨතො.

91.

පල්ලඞ්කම්හි නිසීදෙත්වා, නානාපුප්ඵෙහි පූජිය;

සොළසිත්ථිසහස්සෙහි, පරිවාරිය අබ්රවි.

92.

සද්ධම්මචක්කවත්තිස්ස ¶ , සම්බුද්ධස්ස මහෙසිනො;

රූපං අනන්තඤාණස්ස, දස්සෙහි මම භො ඉති.

93.

ද්වත්තිංසලක්ඛණූපෙතං, අසීතිබ්යඤ්ජනුජ්ජලං;

බ්යාමප්පභාපරික්ඛිත්තං, කෙතුමාලාහි සොභිතං.

94.

නිම්මාසි නාගරාජා සො, බුද්ධරූපං මනොහරං;

තං දිස්වා’ති පසාදස්ස, විම්හයස්ස ච පූරිතො.

95.

එතෙන නිම්මිතං රූපං, ඊදිසං කීදිසං නුඛො;

තථාගතස්ස රූපන්ති, ආසි පිතුන්නතුන්නතො.

96.

අක්ඛිපූජන්ති සඤ්ඤාතං, තං සත්තාහං නිරන්තරං;

මහාමහං මහාරාජ, කාරාපෙසි මහිද්ධිකො.

97.

එවං මහානුභාවො ච, සද්ධො චාපි මහීපති;

ථෙරො ච මොග්ගලිපුත්තො, දිට්ඨා පුබ්බෙ වසීහි තෙ.

සාසනප්පවෙසො නිට්ඨිතො.

මොග්ගලිපුත්තතිස්සථෙරාදයො

98.

දුතියෙ සඞ්ගහෙ ථෙරා, පෙක්ඛන්තා’නාගතෙහි තෙ;

සාසනොපද්දවං තස්ස, රඤ්ඤො කාලම්හි අද්දසුං.

99.

පෙක්ඛාන්තා සකලෙ ලොකෙ, තදුපද්දවඝාතකං;

තිස්සබ්රහ්මානමද්දක්ඛුං, අචිරට්ඨායි ජීවිතං.

100.

තෙසං සමුපසඞ්කම්ම, ආයාචිංසු මහාපතිං;

මනුස්සෙසු’පපජ්ජිත්වා, තදුපද්දවඝාතනං.

101.

අදා පටිඤ්ඤං තෙසං සො, සාසනුජ්ජොතනත්ථිකො;

සිග්ගවං චණ්ඩවජ්ජිඤ්ච අවොචුං දහරෙ යති.

102.

අට්ඨාරසාදිකා වස්ස-සතා උපරි හෙස්සති;

උපද්දවො සාසනස්ස, න සම්භොස්සාම තං මයං.

103.

ඉමං තුම්හා’ධිකරණං, නොපගඤ්ඡිත්ථ භික්ඛවො;

දණ්ඩකම්මාරහා තස්මා, දණ්ඩකම්මපදඤ්හි වො.

104.

සාසනුජ්ජොතනත්ථාය, තිස්සබ්රහ්මා මහාපති;

මොග්ගලිබ්රාහ්මණඝරෙ, පටිසන්ධිං ගහෙස්සති.

105.

කාලෙ ¶ තුම්හෙසු එකො තං, පබ්බාජෙතු කුමාරකං;

එකො තං බුද්ධවචනං, උග්ගණ්හාපෙතු සාධුකං.

106.

අහු උපාලිථෙරස්ස,

ථෙරො සද්ධිවිහාරිකො;

දාසකො සොණකො තස්ස,

ද්වෙ ථෙරා සොණකස්සිමෙ.

107.

අහු වෙසාලියං පුබ්බෙ-දාසකො නාම සොත්ථියො;

තිසිස්සසතජෙට්ඨො සො, වසං ආචරියන්තිකෙ.

108.

ද්වාදසවස්සිකොයෙව, වෙදපාරගතො චරං;

සසිස්සො වාලිකාරාමෙ, වසන්තං කතසඞ්ගහං.

109.

උපාලිථෙරං පස්සිත්වා, නිසීදිත්වා තදන්තිකෙ;

වෙදෙසු ගණ්ඨිඨානානි, පුච්ඡි සො තානි බ්යාකරි.

110.

සබ්බධම්මානුපතිතො, එකධම්මො හි මාණව;

සබ්බෙ ධම්මා ඔසරන්ති, එකධම්මො හි කො නු සො.

111.

ඉච්චාහ නාමං සන්ධාය, ථෙරො මාණවකො තු සො;

නා’ඤ්ඤාසි පුච්ඡිතො මන්තො, බුද්ධමන්තොති භාසිතො.

112.

දෙහීති ආහ සො ආහ, දෙම නො වෙසධාරිනො;

ගුරුං ආපුච්ඡි මන්තත්ථං, මාතරං පිතරං තථා.

113.

මාණවානං සතෙහෙ’ස, තීහි ථෙරස්ස සන්තිකෙ;

පබ්බජිත්වාන කාලෙන, උපසම්පජ්ජි මාණවො.

114.

ඛීණාසවසහස්සං සො, දාසකත්ථෙරජෙට්ඨකං;

උපාලිථෙරො වාචෙසි, සකලං පිටකත්තයං.

115.

ගණනා වීතිවත්තා තෙ, සෙසා’රිය පුථුජ්ජනා;

පිටකානුග්ගහිතානි, යෙහි ථෙරස්ස සන්තිකෙ.

116.

කාසීසු කොසලො නාම, සත්ථවාහසුතො අහු;

ගිරිබ්බජං වණිජ්ජාය, ගතො මාතාපිතූහි සො.

117.

අගා වෙළුවනං පඤ්ච-දසවසො කුමාරකො;

මාණවං පඤ්චපඤ්ඤාස, පරිවාරිය තං ගතා.

118.

සගණං දාසකං ථෙරං, තත්ථ දිස්වා පසීදිය;

පබ්බජ්ජං යාචි සො ආහ, තවා’පුච්ඡ ගුරුං ඉති.

119.

භත්තත්තයමභුඤ්ජිත්වා ¶ , සොණකො සො කුමාරකො;

මාතාපිතූහි කාරෙත්වා, පබ්බජ්ජානුඤ්ඤමාගතො.

120.

සද්ධිං තෙහි කුමාරෙහි, දාසකත්ථෙරසන්තිකෙ;

පබ්බජ්ජං උපසම්පජ්ජ, උග්ගණ්හි පිටකත්තයං.

121.

ඛීණාසවසහස්සස්ස, ථෙරසිස්ස ගණස්ස සො;

අහොසි පිටකඤ්ඤුස්ස, ජෙට්ඨකො සොණකො යති.

122.

අහොසි සිග්ගවො නාම, පුරෙ පාටලිනාමකො;

පඤ්ඤවා’මච්චතනයො, අට්ඨාරසසමො තු සො.

123.

පාසාදෙසු වසං තීසු, ඡළඩ්ඪඋතුසාධුසු;

අමච්චපුත්තං ආදාය, චණ්ඩවජ්ජිං සහායකං.

124.

පුරිසානං දසද්ධෙහි, සතෙහි පරිවාරිතො;

ගන්ත්වාන කුක්කුටාරාමං, සොණකත්ථෙරමද්දස.

125.

සමාපත්තිසමාපන්නං, නිසින්නං සංවුතින්ද්රියං;

වන්දි තෙනාලපන්තං තං, ඤත්වා සඞ්ඝමපුච්ඡිතං.

126.

සමාපත්තිසමාපන්නා, නාලපන්තී’ති ආහු තෙ;

කථන්නු වුට්ඨහන්තීති, වුත්තා ආහංසු භික්ඛවො.

127.

පක්කොසනාය සත්ථුස්ස, සඞ්ඝපක්කොසනාය ච;

යථා කාලපරිච්ඡෙදා, ආයුක්ඛයවසෙන ච.

128.

වුට්ඨහන්තීති වත්වාන, තෙසං දිස්වො’පනිස්සයං;

පාහෙසුං සඞ්ඝවචනං, වුට්ඨාය ස තහිං අගා.

129.

කුමාරො පුච්ඡි කිං භන්තෙ, නාලපිත්ථාති ආහ සො;

භුඤ්ජිම්හ භුඤ්ජිතබ්බන්ති, ආහ භොජෙථ නො අපි.

130.

ආහ අම්හාදිසෙ ජාහෙ, සක්කා භොජයිතුං ඉති;

මාතාපිතු අනුඤ්ඤාය, සො කුමාරොථ සිග්ගවො.

131.

චණ්ඩවජ්ජී ච තෙපඤ්ච-සතානි පුරිසාපි ච;

පබ්බජ්ජිත්වො’පසම්පජ්ජුං, සොණත්ථෙරස්ස සන්තිකෙ.

132.

උපජ්ඣායන්තිකෙයෙව, තෙ දුවෙ පිටකත්තයං;

උග්ගහෙසුඤ්ච කාලෙන, ඡළභිඤ්ඤං ලභිංසු ච.

133.

ඤත්වා ¶ තිස්ස පටිසන්ධිං, තතො පභුති සිග්ගවො;

ථෙරො සො සත්තවස්සානි, තං ඝරං උපසඞ්කමි.

134.

ගච්ඡාති වාචාමත්තම්පි, සත්තවස්සානි නාලභි;

අලත්ථ අට්ඨමෙ වස්සෙ, ගච්ඡාති වචනං තහිං.

135.

තං නික්ඛමන්තං පවිසන්තො, දිස්වා මොග්ගලිබ්රාහ්මණො;

කිඤ්චි ලද්ධං ඝරෙ නොති, පුච්ඡි ආමාති සො’බ්රවි.

136.

ඝරං ගන්ත්වාන පුච්ඡිත්වා, දුතියෙ දිවසෙ තතො;

මුසාවාදෙන නිග්ගණ්හි, ථෙරං ඝරමුපාගතං.

137.

ථෙරස්ස වචනං සුත්වා, සො පසන්නමනො ද්විජො;

අත්තනො පකතෙන’ස්ස, නිච්චං භික්ඛං පවත්තයි.

138.

කමෙන’ස්ස පසීදිංසු, සබ්බෙ’පි ඝරමානුසා;

භොජාපෙසි දිජො නිච්චං, නිසීදාපිය තං ඝරෙ.

139.

එවං කමෙන ගච්ඡන්තො, කාලෙ සොළසවස්සිකො;

අහු තිස්සකුමාරො සො, තිවෙදොදධිපාරගො.

140.

ථෙරො කථාසමුට්ඨානං, හෙස්සතෙ’ව ඝරෙ ඉති;

ආසනානි න දස්සෙසි, ඨපෙත්වා මාණවාසනං.

141.

බ්රහ්මලොකගතත්තාව, සුචිකාමො අහොසි සො;

තස්මා සො තස්ස පල්ලඞ්කො, වාසයිත්වා ලගීයති.

142.

අඤ්ඤාසනං අපස්සන්තො, ඨිතෙ ථෙරෙ සසම්භමො;

තස්ස තං ආසනං තස්ස, පඤ්ඤපෙසි ඝරෙ ජනො.

143.

දිස්වා තත්ථ නිසින්නං තං, ආගම්මා’චරියන්තිකා;

කුජ්ඣිත්වා මාණවො වාචං, අමනාපං උදීරයි.

144.

ථෙරො මාණව කිං මන්තං, ජානාසීති තමබ්රවි;

තමෙව පුච්ඡං ථෙරස්ස, පච්ඡා රොචෙසි මාණවො.

145.

ජානාමීති පටිඤ්ඤාය, ථෙරෙ ථෙරං අපුච්ඡිසො;

ගණ්ඨිඨානානි වෙදෙසු, තස්ස ථෙරො’ථ බ්යාකරි.

146.

ගහට්ඨොයෙව ¶ ථෙරො සො,

වෙදපාරගතො අහු;

න බ්යාකරෙය්ය කිං තස්ස,

පභින්නපටිසම්භිදො.

යස්ස චිත්තං උප්පජ්ජති න නිරුජ්ඣති,

තස්ස චිත්තං නිරුජ්ඣිස්සති; න උප්පජ්ජිස්සති,

යස්ස වා පන චිත්තං නිරුජ්ඣිසති න උප්පජ්ජිස්සති;

තස්ස චිත්තං උප්පජ්ජති, න නිරුජ්ඣතීති.

147.

තං චිත්තයමකෙ පඤ්හං, පුච්ඡි ථෙරො විසාරදො;

අන්ධකාරො විය අහු, තස්ස සො තමවොච සො.

148.

භික්ඛුකො නාම මන්තොති, බුද්ධ මන්තොති සො බ්රවි;

දෙහීති වුත්තෙ නොවෙස-ධාරිනො දම්මි තං ඉති.

149.

මාතාපිතූහි’නුඤ්ඤාතො, මන්තත්ථාය ස පබ්බජ්ජි;

කම්මට්ඨානමදා ථෙරො, පබ්බාජෙත්වා යථාරහං.

150.

භාවනං අනුයුඤ්ජන්තො, අචිරෙන මහාමතී;

සොතාඵත්තිඵලං පත්තො, ථෙරො ඤත්වාන තං තථා.

151.

පෙසෙසි චණ්ඩවජ්ජිස්ස, ථෙරස්සන්තිකමුග්ගහං;

කාතුං සුත්තාභිධම්මානං, සොතත්ථා’කාතදුග්ගහං.

152.

තතො සො තිස්සදහරො, ආරභිත්වා විපස්සනං;

ඡළභිඤ්ඤො අහු කාලෙ, ථෙරභාවඤ්ච පාපුණි.

153.

අතීව පාකටො ආසි, චන්දො’ව සූරියො’වසො;

ලොකො තස්ස වචො’මඤ්ඤී, සම්බුද්ධස්ස වචොපිය.

මොග්ගලිපුත්තතිස්සථෙරොදයො නිට්ඨීතො.

154.

එකාහං ¶ උපරාජා සො, අදක්ඛි මිගවං ගතො;

කීළමානෙ මිගෙ’රඤ්ඤෙ, දිස්වා එතං විචින්තයි.

155.

මිගාපි එවං කිළන්ති, අරඤ්ඤෙ තිණගොචරා;

න කිළිස්සන්ති කිං භික්ඛූ, සුඛාහාරවිහාරිනො.

156.

අත්තනො චින්තිතං රඤ්ඤො, ආරොචෙසි ඝරං ගතො;

සඤ්ඤාපෙතුං තු සත්තාහං, රජ්ජං තස්ස අදාසි සො.

157.

අනුභොහි ඉමෙ රජ්ජං, සත්තාහං ත්වං කුමාරක;

තතො තං ඝාතයිස්සාමි, ඉච්ච’වොච මහීපති.

158.

ආහා’ති තම්හි සත්තාහෙ,

ත්වං කෙනා’සි කිසො ඉති;

මරණස්ස භයෙනාති,

වුත්තෙ රාජා’හ තං පුන.

159.

සත්තාහා’හං මරිස්සංති, ත්වං න කීළි ඉමෙ කථං;

කීළිස්සන්ති යති තාත, සදා මරණසඤ්ඤිනො.

160.

ඉච්චෙවං භාකරා වුත්තො, සාසනස්මිං පසීදි සො;

කාලෙන මිගවං ගන්ත්වා, ථෙරමදක්ඛි සඤ්ඤතං.

161.

නිසින්නං රුක්ඛමූලස්මිං, සො මහාධම්මරක්ඛිතං;

සාලසාඛාය නාගෙන, බීජයන්ත මනාසවං.

162.

අයං ථෙරො වියා’හම්පි, පබ්බජ්ජ ජින සාසනෙ;

විහරිස්සං කදා රඤ්ඤෙ, ඉති චින්තයි පඤ්ඤවා.

163.

ථෙරො තස්ස පසාදත්ථං,

උපතිත්වා විහායසා;

ගන්ත්වා අසොකාරාමස්ස,

පොක්ඛරඤ්ඤො ජලෙ ඨිතො.

164.

ආකාසෙ ඨපයිත්වාන, චීවරානි වරානි සො;

ඔගාහිත්වා පොක්ඛරණී, ගත්තානි පරිසිඤ්චථ.

165.

තං ¶ ඉද්ධිං උපරාජා සො, දිස්වා’තීව පසීදිය;

අජ්ජෙව පබ්බජිස්සංති, බුද්ධිංචා’කාසි බුද්ධිමා.

166.

උපසඞ්කම්ම රාජානං, පබ්බජ්ජං යාචි සාදරො;

නිවාරෙතුමසක්කොන්තො, තමාදාය මහීපති.

167.

මහතා පරිවාරෙන, විහාරමගමා සයං;

පබ්බජි සො මහාධම්ම-රක්ඛිතත්ථෙරසන්තිකෙ.

168.

සද්ධිං තෙන චතුසත-සහස්සානි නරාපි ච;

අනුපබ්බජිතානන්තු, ගණනා ච න වජ්ජති.

169.

භාගිනෙය්යො නරින්දස්ස, අග්ගි බ්රහ්මාති විස්සුතො;

අහොසි රඤ්ඤො ධීතාය, සඞ්ඝමිත්තාය සාමිකො.

170.

තස්සා තස්ස සුතො චාපි,

සුමනො නාම නාමසො;

යාචිත්වා සො’පි රාජානං,

උපරාජෙන පබ්බජි.

171.

උපරාජස්ස පබ්බජ්ජා, තස්සා’සොකස්ස රාජිනො;

චතුත්ථෙ ආසිවස්සෙසා, මහාජනහිතොදයා.

172.

තත්ථෙව උපසම්පන්නො, සම්පන්නඋපනිස්සයො;

ඝටෙන්තො උපරාජා සො, ඡළ’භිඤ්ඤො’රහා අහු.

173.

විහාරෙ තෙසමාරද්ධෙ, සබ්බෙ සබ්බපුරෙසුපි;

සාධුකං තීහි වස්සෙහි, නිට්ඨාපෙසුං මනොරමෙ.

174.

ථෙරස්ස ඉන්දගුත්තස්ස, කම්මාදිට්ඨායකස්ස තු;

ඉද්ධියා චා’සු නිට්ඨාසි, අසොකාරාමසව්හයො.

175.

ජනෙන පරිභුත්තෙසු, ඨානෙසු ච තහිං තහිං;

චෙතියානි අකාරෙසි, රමණීයානි භූපති.

176.

පුරෙහි චතුරාසීති-සහස්සෙහි සමන්තතො;

ලෙඛෙ එකාහමානෙසුං, විහාරා නිට්ඨිතා ඉති.

177.

ලෙඛෙ සුත්වා මහාරාජා, මහාතෙජිද්ධි වික්කමො;

කාතුකාමො සකිංයෙව, සබ්බාරාම මහාමහං.

178.

පුරෙ භෙරිං චරාපෙසි, සත්තමෙ දිවසෙ ඉතො;

සබ්බාරාමමහො හොතු, සබ්බදෙසෙසු එකදා.

179.

යොජනෙ ¶ යොජනෙ දෙන්තු, මහාදානං මහීතලෙ;

කරොන්තු ගාමාරාමානං, මග්ගානඤ්ච විභූසනං.

180.

විහාරෙසු ච සබ්බෙසු, භික්ඛුසඞ්ඝස්ස සබ්බථා;

මහාදානානි වත්තෙන්තු, යථාකාලං යථාබලං.

181.

දීපමාලා පුම්ඵමාලා-ලඞ්කාරෙහි තහිං තහිං;

තූරියෙහි ච සබ්බෙහි, උපහාරං අනෙකධා.

182.

උපොසථඞ්ගානා’දාය, සබ්බෙ ධම්මං සුණන්තු ච;

පූජාවිසෙසෙන’නෙකෙ ච, කරොන්තු තදහෙපි ච.

183.

සබ්බෙ සබ්බත්ථ සබ්බථා, යථාණත්තාධිකාපි ච;

පූජා සම්පටියාදෙසුං, දෙවලොකමනොරමා.

184.

තස්මිං දිනෙ මහාරාජා, සබ්බාලඞ්කාර භූසිතො;

සහොරොධො සහාමච්චො, බලොඝ පරිවාරිතො.

185.

අගමාසි සකාරාමං, භින්දන්තො විය මෙදිනිං;

සඞ්ඝමජ්ඣම්හි අට්ඨාසි, වන්දිත්වා සඞ්ඝමුත්තමං.

186.

තස්මිං සමාගමෙ ආසුං, අසීති භික්ඛුකොටි යො;

අහෙසුං සතසහස්සං, තෙසු ඛීණාසවා යති.

187.

නවුති භික්ඛුසහස්සානි, අහූ භික්ඛුනියො තහිං;

ඛිණාසවා භික්ඛුනියො, සහස්සං ආසු තාසු තු.

188.

ලොකවිවරණං නාම, පාටිහීරං අකංසු තෙ;

ඛීණාසවා පසාදත්ථං, ධම්මාසොකස්ස රාජිනො.

189.

චණ්ඩාසොකොති ඤායිත්ථ, පුබ්බෙ පාපෙන කම්මුනා;

ධම්මාසොකොති ඤායිත්ථ, පච්ඡා පුඤ්ඤෙන කම්මුනා.

190.

සමුද්දපරියන්තං සො, ජම්බුදීපං සමන්තතො;

පස්සි සබ්බෙ විහාරෙ ච, නානාපූජා විභූසිතෙ.

191.

අතීව තුට්ඨො තෙ දිස්වා, සඞ්ඝං පුච්ඡි නිසීදිය;

කස්ස භන්තෙ පරිච්චාගො, මහාසුගත සාසනෙ.

192.

ථෙරො සො මොග්ගලිපුත්තො, රඤ්ඤො පඤ්හං වියාකරි;

ධරමානෙ’පි සුගතෙ, නත්ථි චාගී තයාසමො.

193.

තං සුත්වා වචනං භිය්යො, තුට්ඨො රාජා අපුච්ඡි තං;

බුද්ධසාසන දායාදො, හොති ඛො මාදිසො ඉති.

194.

ථෙරො ¶ තු රාජපුත්තස්ස, මහින්දස්සූ’පනිස්සයං;

තථෙව රාජධීතාය, සඞ්ඝමිත්තාය පෙක්ඛිය.

195.

සාසනස්සා’භි වුද්ධිඤ්ච, තං හෙතුකම වෙක්ඛිය;

පච්චාභාසථ රාජානං, සො සාසනධුරන්ධරො.

196.

තාදිසො’පි මහාචාගී, දායාදො සාසනස්ස න;

පච්චයදායකො’ච්චෙව, වුච්චතෙ මනුජාධීප.

197.

යො තු පුත්තං ධීතරං වා,

පබ්බජ්ජාපෙති සාසනෙ;

සො සාසනස්ස දායාදො,

හොති නො දායකො අපි.

198.

අථ සාසන දායාද-භාවමිච්ඡං මහීපති;

මහින්දං සඞ්ඝමිත්තඤ්ච, ඨිතෙ තත්ර අපුච්ඡථ.

199.

පබ්බජිස්සථ කිං තාතා, පබ්බජ්ජා මහතී මතා;

පිතුනො වචනං සුත්වා, පිතරං තෙ අභාසිසුං.

200.

අජ්ජෙව පබ්බජිස්සාම, සචෙ ත්වං දෙව ඉච්ඡසි;

අම්හඤ්ච ලාභො තුම්හඤ්ච, පබ්බජ්ජාය භවිස්සති.

201.

උපරාජස්ස පබ්බජ්ජ-කාලභො පභුතීහි සො;

සා චාපි අග්ගිබ්රහ්මස්ස, පබ්බජ්ජා කතනිච්ඡයා.

202.

උපරජ්ජං මහීන්දස්ස, දාතුකාමො’පි භූපති;

තතො’පි අධිකාසා’ති, පබ්බජ්ජංයෙව රොචයි.

203.

පියං පුත්තං මහින්දඤ්ච, බුද්ධිරූපබලොදිතං;

පබ්බජ්ජා පෙසි සමහං, සඞ්ඝ මිත්තඤ්ච ධීතරං.

204.

තදා වීසතිවස්සො සො, මහින්දො රාජනන්දනො;

සඞ්ඝමිත්තා රාජධීතා, අට්ඨාරසසමා තදා.

205.

තදහෙව අහු තස්ස, පබ්බජ්ජා උපසම්පදා;

පබ්බජ්ජා සික්ඛාදානඤ්ච, තස්සා ච තදහු අහු.

206.

උපජ්ඣායො කුමාරස්ස, අහු මොග්ගලිසව්හයො;

පබ්බාජෙසි මහාදෙව-ත්ථෙරො මජ්ඣන්තිකො පන.

207.

කම්මවාචං අකා තස්මිං, සො’පසම්පදමණ්ඩලෙ;

අරහත්තං මහින්දො සො, පත්තො සපටිසම්භිදං.

208.

සඞ්ඝමිත්තා’හු’පජ්ඣායා ¶ , ධම්මපාලාති විස්සුතා;

ආචරියා ආයුපාලි, කාලෙ සා’සි අනාසවා.

209.

උභො සාසනපජ්ජොතා, ලංකාදීපොපකාරිනො;

ඡට්ඨෙ වස්සෙ පබ්බජිංසු, ධම්මාසොකස්ස රාජිනො.

210.

මහාමහින්දො වස්සෙහි, තීහි දීපප්පසාදකො;

පිටකත්තයං මුග්ගණ්හි, උපජ්ඣායස්ස සන්තිකෙ.

211.

සා භික්ඛුනී චන්දලෙඛා, මහින්දො භික්ඛූ සූරියො;

සම්බුද්ධ සාසනාකාසං, තෙ සදා සොභයුං තදා.

212.

වනෙ පාටලිපුත්තම්හා, වනෙ වනචරො චරං;

කුන්තකින්නරියා සද්ධිං, සංවාසං කප්පයී කිර.

213.

තෙන සංවාසමන්වාය,

සා පුත්තෙ ජනයී දුවෙ;

තිස්සො ජෙට්ඨො කණිට්ඨො තු,

සුමිත්තො නාම නාමතො.

214.

මහාවරුණත්ථෙරස්ස, කාලෙ පබ්බජ්ජ සන්තිකෙ;

අරහත්තං පාපුණිංසු, ඡළභිඤ්ඤං ගුණං උභො.

215.

පාදෙ කීටවිසෙනා’සි, ඵුට්ඨො ජෙට්ඨො සවෙදනො;

ආහ පුට්ඨො කණිට්ඨෙන, භෙසජ්ජං පසතං ඝටං.

216.

රඤ්ඤො නිවෙදනං ථෙරො, ගිලානවත්තතො’පි සො;

සප්පිසත්ථඤ්ච චරණං, පච්ඡාභත්තං පටික්ඛිපි.

217.

පිණ්ඩාය චෙ චරං සප්පිං, ලභසෙ ත්වං තමාහර;

ඉච්ඡාහ තිස්සථෙරො සො, සුමිත්තං ථෙරමුත්තමං.

218.

පිණ්ඩාය චරතා තෙන, න ලද්ධං පසතං ඝතං;

සප්පිකුම්භසතෙනාපි, බ්යාධිජාතො අසාධියො.

219.

තෙනෙව බ්යාධිනා ථෙරො, පත්තො ආයුක්ඛයන්තිකං;

ඔවදිත්වාප්පමාදෙන, නිබ්බාතුං මානසං අකා.

220.

ආකාසම්හි නිසීදිත්වා, තෙජොධාතුවසෙන සො;

යථාරුචි අධිට්ඨාය, සරීරං පරිනිබ්බුතො.

221.

ජාලාසරීරා නික්ඛම්ම, නිම්මංසඡාරිකං ඩහි;

ථෙරස්ස සකලං කායං, අට්ඨිකානිතුනො ඩහි.

222.

සුත්වා ¶ නිබ්බූතිමෙතස්ස, තිස්සථෙරස්ස භූපති;

අගමාසි සකාරාමං, ජනොඝ පරිවාරිතො.

223.

හත්තික්ඛන්ධගතො රාජා, තානට්ඨින’වරොපිය;

කාරෙත්වා ධාතුසක්කාරං, සඞ්ඝං බ්යාධිමපුච්ඡිතං.

224.

තං සුත්වා ජාතසංවෙගො, පුරද්වාරෙසු කාරිය;

සුධාචිතා පොක්ඛරණී, භෙසජ්ජානඤ්ච පූරිය.

225.

පාපෙසි භික්ඛුසඞ්ඝස්ස, භෙසජ්ජානි දිනෙ දිනෙ;

මා හොතු භික්ඛුසඞ්ඝස්ස, භෙසජ්ජං දුල්ලභං ඉති.

226.

සුමිත්තථෙරො නිබ්බායි, චඞ්කමන්තො’ව චඞ්කමෙ;

පසීදි සාසනෙ’තීව, තෙනාපි ච මහාජනො.

227.

කුන්තිපුත්තා දුවෙ ථෙරා,

තෙ ලොකහිතකාරිනො;

නිබ්බායිංසු අසොකස්ස,

රඤ්ඤො වස්සම්හි අට්ඨමෙ.

228.

තතො පභුති සඞ්ඝස්ස, ලාභො’තීව මහා අහු;

පච්ඡා පසන්නා ච ජනා, යස්මා ලාභං පවත්තයුං.

229.

පහීනලාභසක්කාරා, තිත්ථියා ලාභකාරණා;

සයං කාසායමාදාය, වසිංසු සහ භික්ඛූහි.

230.

යථාසකඤ්ච තෙ වාදං, බුද්ධවාදො’ති දීපයුං;

යථාසකඤ්ච කිරියා, අකරිංසු යථාරුචි.

231.

තතො මොග්ගලිපුත්තො සො,

ථෙරො ථිර ගුණොදයො;

සාසනබ්බුදමුප්පන්නං,

දිස්වා තමතිකක්ඛලං.

232.

තස්සො’පසමනෙ කාලං, දීඝදස්සී අවෙක්ඛිය;

දත්වා මහින්දථෙරස්ස, මහාභික්ඛුගණං සකං.

233.

උද්ධං ගඞ්ගාය එකො’ව, අහොගඞ්ගම්හි පබ්බතෙ;

විහාසි සත්තවස්සානි, විවෙක මනුබ්රූහයං.

234.

තිත්ථියානං බහුචත්තා ච, දුබ්බච්චත්තා ච භික්ඛවො;

තෙසං කාතුං න සක්ඛිංසු, ධම්මෙන පටිසෙධනං.

235.

තෙනෙව ¶ ජම්බුදීපම්හි, සබ්බාරාමෙසු භික්ඛවො;

සත්තවස්සානි නාකංසු, උපොසථ පවාරණං.

236.

තං සුත්වා මහාරාජා, ධම්මාසොකො මහායසො;

එකං අමච්චං පෙසෙසි, අසොකාරාම මුත්තමං.

237.

ගන්ත්වා’ධිකරණං එතං, වුපසම්ම උපොසථං;

කාරෙහි භික්ඛුසඞ්ඝෙන, පමා’රාමෙ තුවං ඉති.

238.

ගන්ත්වාන සන්නිපාතෙත්වා, භික්ඛුසඞ්ඝං සදුම්මති;

උපොසථං කරොථාති, සාවෙසි රාජසාසනං.

239.

උපොසථං තිත්තියෙහි, න කරොම මයං ඉති;

අවො ච භික්ඛුසඞ්ඝො තං, අමච්චං මූළ්හමානසං.

240.

සො’මච්චො කතිපයානං, ථෙරානං පටිපාටියා;

අච්ඡින්දි අසිනා සීසං, කාරෙමීති උපොසථං.

241.

රාජභාතා තිස්සත්ථෙරො, තං දිස්වා කිරියං ලහුං;

ගන්ත්වාන තස්ස ආසන්නෙ, සාසනම්හි නිසිදි සො.

242.

ථෙරං දිස්වා අමච්චො සො, ගන්ත්වා රඤ්ඤො නිවෙදයි;

සබ්බං පවත්තිං තං සුත්වා, ජාතදාහො මහීපති.

243.

සීඝං ගන්ත්වා භික්ඛුසඞ්ඝං, පුච්ඡි උබ්බිග්ගමානසො;

එවං කතෙන කම්මෙන, කස්ස පාපං සියා ඉති.

244.

තෙසං අපණ්ඩිතා කෙචි, පාපං තුය්හන්ති කෙචි තු;

උභින්නංචා’ති ආහංසු, නත්ථි තුය්හන්ති පණ්ඩිතා.

245.

තං සුත්වා’හ මහාරාජා, සමත්ථො අත්ථි භික්ඛුන;

විමතිං මෙ විනොදෙත්වා, කාතුං සාසනපග්ගහං.

246.

අත්ථි මොග්ගලිපුත්තො සො,

තිස්සත්ථෙරො රථෙසභ;

ඉච්ඡාහ සඞ්ඝො රාජානං,

රාජ තත්ථා’සි සාදරො.

247.

විසුං භික්ඛුසහස්සෙන, චතුරො පරිවාරිතෙ;

ථෙරො නරසහස්සෙන, අමච්චෙ චතුරො තථා.

248.

තදහෙයෙව පෙසෙසි, අත්තනො වචනෙන සො;

ථෙරං ආනෙතු මෙ තෙහි, තථා වුත්තෙ සනාගමි.

249.

තං ¶ සුත්වා පුන අට්ඨ’ත්ථ, ථෙරෙ’මච්චෙ ච පෙසයි;

විසුං සහස්සපුරිසෙ, පුබ්බෙ විය සනාගමි.

250.

රාජා පුච්ඡි කථං ථෙරො, ආගච්ඡෙය්ය නු ඛො ඉති;

භික්ඛූ ආහංසු ථෙරස්ස, තස්ස’ගමනකාරණං.

251.

හොති භන්තෙ උපත්ථම්භො, කාතුං සාසනපග්ගහං;

ඉති වුත්තෙ මහාරාජ, ථෙරො එස්සති සො ඉති.

252.

පුනාපි ථෙරො’මච්චෙ ච, රාජා සොළස සොළස;

විසුං සහස්ස පුරිසෙ, තථා වත්වාන පෙසයි.

253.

ථෙරො මහල්ලත්තෙ’පි, නාරොහිස්සති යානකං;

ථෙරං ගඞ්ගාය නාවාය, ආනෙථා’ති ච අබ්රවි.

254.

ගන්ත්වා තෙ තං තථා’වොචුං,

සො තං සුත්වා’ව උට්ඨහි;

නාවාය ථෙරං ආනෙසුං,

රාජා පච්චුග්ගමී තහිං.

255.

ජාණුමත්තං ජලං රාජො’ගහෙත්වා දක්ඛිණං කරං;

නාවාය ඔතරන්තස්ස, ථෙරස්සා’දාසි ගාරවො.

256.

දක්ඛිණං දක්ඛිණෙය්යො සො, කරං රඤ්ඤො’නුකම්පකො;

ආලම්බිත්වා’නුකම්පාය, ථෙරො නාවාය ඔතරි.

257.

රාජා ථෙරං නයිත්වාන, උය්යානං රතිවඩ්ඪනං;

ථෙරස්ස පාදෙ ධොවිත්වා, මක්ඛෙත්වා ච නිසීදිය.

258.

සමත්ථභාවං ථෙරස්ස, වීමංසන්තො මහීපති;

දට්ඨුකාමො අහං භන්තෙ, පාටිහීරන්ති අබ්රවි.

259.

කන්ති වුත්තෙ මහීකම්පං, ආහ තං පුන රාහසො;

සකලායෙ’ක දෙසාය, කතරං දට්ඨුමිච්ඡසි.

260.

කො දුක්කරොති පුච්ඡිත්වා, එක දෙසාය කම්පනං;

දුක්කරන්ති සුණිත්වාන, තං දුට්ඨුකාමතං බ්රවී.

261.

රථං අස්සං මනුස්සඤ්ච, පාතිඤ්චොදක පූරිතං;

ථෙරො යොජන සීමාය, අන්තරම්හි චතුද්දිසෙ.

262.

ඨපාපෙත්වා ¶ තදඩ්ඪෙහි, සහ තං යොජනං මහිං;

චාලෙසි ඉද්ධියා තත්ර, නිසින්නස්ස ච දස්සයි.

263.

තෙනා’මච්චෙන භික්ඛූනං, මරණෙන’ත්තනොපි ච;

පාපස්ස’ත්ථිත්ත නත්ථිත්තං, ථෙරං පුච්ඡි මහීපති.

264.

පටිච්ච කම්මං නත්ථීති, කිලිට්ඨං චෙතනං විනා;

ථෙරො බොධෙසි රාජානං, වත්වා තිත්තිරජාතකං.

265.

වසන්තො තත්ථ සත්තාහං, රාජුය්යානෙ මනොරමෙ;

සික්ඛාපෙසි මහීපාලං, සම්බුද්ධසමයං සුභං.

266.

තස්මිංයෙව ච සත්තා හෙ, දුවෙ යක්ඛෙ මහීපති;

පෙසෙත්වා මහියං භික්ඛූ, අසෙසෙ සන්නිපාතයි.

267.

සත්තමෙ දිවසෙ ගන්ත්වා, සකාරාමං මනොරමං;

කාරෙසි භික්ඛුසඞ්ඝස්ස, සන්නිපාතමසෙසතො.

268.

ථෙරෙන සහ එකන්තෙ, නිසින්නො සාණිඅන්තරෙ;

එකෙකලද්ධිකෙ භික්ඛු, පක්කොසිත්වාන සන්තිකං.

269.

කිංවාදී සුගතො භන්තෙ, ඉති පුච්ඡි මහීපති;

තෙ සස්සතාදිකං දිට්ඨිං, බ්යාකරිංසු යථාසකං.

270.

තෙ මිච්ඡාදිට්ඨිකෙ සබ්බෙ, රාජා උප්පබ්බාජාපයී;

සබ්බෙ සට්ඨිසහස්සානි, ආසුං උප්පබ්බජාපිතා.

271.

අපුච්ඡි ධම්මිකෙ භික්ඛූ, කිංවාදී සුගතො ඉති;

විභජ්ජවාදී තාහංසු, තං ථෙරං පුච්ඡි භූපති.

272.

විභජ්ජවාදී සම්බුද්ධො,

හොති භන්තෙ’ති ආහ සො;

ථෙරො’ ආමා’ති තං සුත්වා,

රාජා තුට්ඨමනො තදා.

273.

සඞ්ඝො පිසොධිතො යස්මා,

තස්මා සඞ්ඝො උපොසථං;

කරොතු භන්තෙ ඉච්චෙවං,

වත්වා ථෙරස්ස භූපති.

274.

සඞ්ඝස්ස රක්ඛං දත්වාන, නගරං පාවිසී සුභං;

සඞ්ඝො සමග්ගො හුත්වාන, තදා’කාසි උපොසථං.

275.

ථෙරො ¶ අනෙක සඞ්ඛම්හා, භික්ඛුසඞ්ඝා විසාරදෙ;

ඡළභිඤ්ඤෙ තෙපිටකෙ, පභින්නපටිසම්භිදෙ.

276.

භික්ඛුසහස්සං උච්චිනි, කාතුං සද්ධම්මං සඞ්ගහං;

තෙහි අසොකාරාමම්හි, අකා සද්ධම්ම සඞ්ගහං.

277.

මහාකස්සපත්ථෙරො ච, යසත්ථෙරො ච කාරයුං;

යථා තෙ ධම්ම සංගීතිං, තිස්සත්ථෙරොපි තං තථා.

278.

තථාවත්ථුප්පකරණං, පරවාදප්පමද්දනං;

අභාසි තිස්සත්ථෙරො ච, තස්මිං සංගීති මණ්ඩලෙ.

279.

එවං භික්ඛුසහස්සෙන, රක්ඛාය’සොක රාජිනො;

අයං නවහි මාසෙහි, ධම්ම සංගීති නිට්ඨිතා.

280.

රඤ්ඤො සත්තරසෙ වස්සෙ, ද්වාසත්තතිසමො ඉසි;

මහාපවාරණාය’සො, සංගීති තං සමාපයි.

281.

සාධුකාරං දදන්තීව, සාසනට්ඨිති කාරණං;

සංගීති පරියොසානෙ, අකම්මිත්ථ මහාමහී.

282.

හිත්වා සෙට්ඨං බ්රහ්මවිමානම්පි මනුඤ්ඤං;

ජෙගුච්ඡං සො සාසනහෙතුනරලොකං;

ආගම්මා’කා සාසනකිච්චං කතකිච්චො;

කොනාම’ඤ්ඤො සාසනකිච්චම්හි පමජ්ජෙති.

සුජනප්පසාදසංවෙගත්ථාය කතෙ මහාවංසෙ

තතියධම්මසංගීති නාම

පඤ්චමො පරිච්ඡෙදො.