📜
ද්විචත්තාලීසතිම පරිච්ඡෙද
ඡ රාජකො
සඞ්ඝතිස්සො ¶ තතො ආසි, අසිග්ගාහො මහීපති;
සාසනස්ස ච රට්ඨස්ස, වුද්ධිකාමො නයෙ රතො.
ඨානන්තරං යථාරහං, දත්වා සඞ්ගණ්හිසො ජනං;
තදා ඛුද්දකරාජස්ස, මොග්ගල්ලානො චමූපති.
වසන්තො රොහණෙ සුත්වා, සඞ්ඝතිස්සස්ස රාජතං;
ඛන්ධවාරං සයුද්ධත්ථං, මහාගල්ලෙ නිවෙසයි.
සඞ්ඝතිස්සො ච සුත්වා තං, බලකායමපෙසයි;
යුජ්ඣිතුං තෙන තජ්ජෙසි, මොග්ගල්ලානො මහබ්බලො.
තතො හත්ථස්සමාදාය, ගන්ත්වා රත්තිවිහාරකං;
බලං සො සන්නිපාතෙන්තො, වාසං තත්ථෙව කප්පයි.
රාජා සුත්වා පුනා’ගන්ත්වා, කදල්ලාදීනිවාතකෙ;
යුජ්ඣිත්වා තං පලාපෙත්වා, පෙසෙත්වා බලමත්තනො.
සයං පුරමුපාගඤ්ඡි, සොපි නට්ඨං සවාහිනිං;
පුන පාකතිකං කත්වා, කරෙහෙරමුපාගමි.
රඤ්ඤො සෙනාපති පුත්තං, පෙසෙත්වා චොරසන්තිකං;
යෙන කෙනචි ලෙසෙන, සයං දුක්ඛිව දුම්මනො.
ආතුරො විය බාළ්හං සො, හොසි මඤ්චපරායනො;
රාජා සුත්වා පවත්තිතං, උපසඞ්කම්ම තඞ්ඛණෙ.
මා ත්වං සොචි කුමාරස්ස, සම්මානෙත්වානුසාසිය;
හන්ද ත්වං නගරං රක්ඛ, නතෙ සක්කා මයා සහ.
යුද්ධමණ්ඩලමාගන්තුං, ගිලානත්තාති යොජයි;
උබ්බාසිතෙ ජනෙ සබ්බෙ, විච්ඡින්නෙ රාජභොජනෙ.
මහාපාළිම්හි සම්පක්කං, රඤ්ඤො භොජනමාහරුං;
රාජා ද්විස්වා’ති නිබින්නො, යාව මන්දො න හෙස්සති.
එක්කො ¶ පීති විචින්තෙත්වා, යුද්ධාය සමාසා’ගමා;
සද්ධිං පුත්තෙන ආරුය්හ, හත්ථිංසන්නද්ධවාහනො.
ථොකෙනෙව බලෙනාගා, පාචිනතිස්සපබ්බතං;
එවං උභයතො චූළ-සඞ්ගාමෙ පච්චුපට්ඨිතෙ.
සෙනාපතිසමිත්තද්දු, යුද්ධමාරභි පච්ඡතො;
පුත්තො දිස්වා නරින්දස්ස, ඝාතෙස්සාමි ඉමං ඉති.
ආහ රාජා නිවාරෙසි, මා තෙ රුච්චි බලං ඉදං;
නෙව සක්කා’ධිවාසෙතුං, අතිමන්දං හනිස්සති.
දුවින්නං බලකායානං, රාජාමජ්ඣගතො අහු;
තතො සෙනා ද්විධා’හොසි, චොරසෙනාපතීපති.
රඤ්ඤො නාගො මධුකව්හ රුක්ඛච්ඡායං සමාවිසි;
තදා ඡත්තං පතිතස්ස, සාඛමාහච්ච භූමියං.
චොරස්ස සෙනා තං දිත්වා, හරිත්වා සාමිනො අදා;
සො තං උස්සාපයිඡත්තං, ඨත්වාපබ්බතමුද්ධනි.
තදා රාජබලං රාජා, නුනමෙසොති චින්තිය;
ගන්ත්වා තං පරිවාරෙසි, රාජා ආසි තදෙකකො.
හත්ථික්ඛන්ධා තදොරුය්හ-පුත්තං’මච්චඤ්ච සොහදං;
උපාවිසි සමීපම්හි, මෙරුමජ්ජරකානනං.
මොග්ගල්ලානො තතො ලද්ධ-ජයො වාහනමාදිය;
සෙනාපතිංච මිත්තද්දුං, තස්ස පුත්තඤ්ච පාපිනං.
උපාගම්ම පුරං රාජා, ආසී ලඞ්කා තලාධිපො;
තතො චින්තෙසි ජීවන්තෙ, සත්තුම්හි න සුඛං ඉති.
සො සුත්වා පුබ්බරාජස්ස, පුත්තො එත්ථාති කුජ්ඣිය;
ආණාපෙසි ච තස්සා’සු, හත්ථපාදානි ඡින්දිතුං.
උපක්කමි තදා රඤ්ඤා, ආණත්තො පුරිසො ඛණෙ;
ඡින්දිතුං හත්ථපාදං සො, කුමාරො රොදි දුම්මනො.
පූවඛාදකහත්ථං මෙ, ඡින්දෙය්යං චෙ තදා අහං;
ඛාදිසං තෙන පූවෙති, හං සුත්වා රාජකම්මිකො.
රොදිත්වා පරිදෙවිත්වා, රාජාණාය දුඛද්දිතො;
වාමං හත්ථඤ්ච පාදඤ්ච, තස්ස ඡින්දි නරාධමො.
ජෙට්ඨතිස්සො ¶ පලායිත්වා, රඤ්ඤො පුත්තො’පරො අගා;
අඤ්ඤතො මලයං දෙසං, මෙරුකන්දරනාමකං.
රාජා’ථ සසුතා’මච්චො, ගන්ත්වා වෙළුවනං රහො;
චොදිතො තත්ථ භික්ඛූහි, කාසාවානි සමාදියි.
භික්ඛුවෙසං ගහෙත්වාන, රොහණං ගන්තුමානසො;
මණිහීරං සමාගඤ්ඡි, තත්රඨා රාජසෙවකා.
සඤ්ජානිත්වා තයොපෙතෙ, තෙසං පාදෙවරුජ්ඣිය;
සාසනං තස්ස පෙසෙසුං, රාජා සුත්වා විසෙසතො.
තුට්ඨො ආණාපයි ගන්ත්වා, සීඝමාදාය තෙජනෙ;
තතො සීහගිරිංනෙත්වා, තිස්සඞ්කං නිරුපද්දවං.
සීසං ගණ්හථ තත්ථෙව, රඤ්ඤො ච තනයස්ස ච;
අමච්චං පන ජීවන්ත-මානෙය්යාථ මම’න්තිකං.
මනුස්සා එවමාණත්තා, තෙ ගහෙත්වා තයොජනෙ;
නෙත්වා සීහගිරිංකාතුං, යථාවුත්තමුපක්කමුං.
තතො රාජසුතො ආහ, පුරිසෙ කම්මකාරකෙ;
සීසං මෙ පඨමං ඡෙත්වා, දෙථ මය්හං සුඛං ඉති.
රාජපොසා තථා’කාසුං, පච්ඡාඡින්දිංසු රාජිනො;
සීසං පස්සථ බාලානං, කම්මං කම්මවිදූජනා.
එවං අනිච්චා භොගාහි, අධුවා අසයංවසී;
තත්ථ ලග්ගා කථං නිච්චං, සුඛං භො න ගවෙසථ.
රඤ්ඤො සාසනමාහංසු, අමච්චස්ස හිතෙසිනො;
තං සුත්වාන හසිත්වාන, ඉදං වචනමබ්රවි.
ඡින්නසීසො මයා දිට්ඨො, මයි ජීවති සාමිකො;
ඨපෙත්වා හම්පි සෙවාමි, අහො අඤ්ඤඤ්හි සාමිකං.
ඉධ තං මාරයිත්වාන, ඡායං තස්ස හරිස්සථ;
අහො අඤ්ඤාණකා තුම්හෙ, මඤ්ඤෙ උම්මත්තකා ඉති.
ඉති වත්වාන සො පාදෙ, ගහෙත්වා සාමිනො සයි;
තස්ස තෙ හරණොපායං, අපස්සන්තා යථා තථා.
තස්සාපි සීසං ඡෙත්වාන, මච්චා ආදාය තීණි’පි;
රඤ්ඤො දස්සෙතුමාහච්ච, රාජා තුසිත්ථ නිබ්භයො.
දුට්ඨසෙනා ¶ පතිස්සා’දා, තතො මලයරාජතං;
අසිග්ගාහකඨානම්හි, තස්ස පුත්තං ඨපෙසි ච.
ථූපත්තයම්පි ඡාදෙසි, වත්ථෙහි අහතෙහි සො;
තථා ලඞ්කාතලෙ සබ්බෙ, ථූපෙකාසි මහුස්සවං.
කෙසධාතුඤ්ච නාථස්ස, දාඨාධාතුං තථෙව ච;
මහාබොධිං සසක්කච්චං, මහාපූජාය සක්කරි.
සබ්බං වෙසාඛපූජාදිං, චාරිත්තංනුගතං අකා;
ධම්මකම්මෙන සොධෙසි, සබ්බං සුගතසාසනං.
පිටකානඤ්ච සජ්ඣායං, මහාපූජාය කාරයි;
ලාභං දත්වා තිරෙකෙන, පූජයිත්ථ බහුස්සුතෙ.
භික්ඛූනං දීපවාසීනං, සබ්බෙසං චීවරං අගා;
ආවාසෙසු ච සබ්බෙසු, කථිනං අත්ථරාපයි.
පටිමායො ච කාරෙසි, ජිණ්ණඤ්ච පටිසඞ්ඛරි;
ලොණක්ඛෙත්තඤ්ච පාදාසි, සඞ්ඝස්ස තිසතාධිකං.
කාරපිට්ඨිම්හි කාරෙසි, මොග්ගල්ලාන විහාරකං;
විහාරා පිට්ඨිගාමඤ්ච, සගාමං වටගාමකං.
තථා චෙතියගෙහඤ්ච’-කාසි රක්ඛවිහාරකෙ;
විහාරං නං බහුන්නං සො, භොගගාමෙ බහූ අදා.
එවං පුඤ්ඤානී සො’කාසි, අප්පමෙය්යානි භූමිපො;
සම්පත්තීනමනිචත්තං, සරන්තො පුබ්බරාජිනො.
තදා කෙනචි දොසෙන, කුද්ධොමලයරාජිනො;
සරිත්වා පුබ්බරාජස්ස, කතං තෙන විරූපකං.
උපායෙන ගහෙත්වාන, හත්ථපාදඤ්ච ඡෙදයි;
තං සුත්වා සො අසිග්ගාහො, සපුත්තො රොහණංගතො.
වසන්තො තත්ථ සො කත්වා, හත්ථෙ ජනපදං ලහුං;
ජෙට්ඨසිස්සමුපගඤ්ඡි, නිලීනං මලයෙ ඨිතං.
සද්ධිං තෙනසඝාතෙන්තො, රට්ඨං ජනපදං ඛණෙ;
දොළපබ්බතමාගම්ම, ඛන්ධාවාරං නිවෙසයි.
රාජා සුත්වාන තං සබ්බං, සන්නද්ධබලවාහනො;
ඛන්ධාවාරං නිවෙසෙසි, ගන්ත්වා තස්සෙව සන්තිකං.
තදා ¶ පජ්ජරරොගෙන, මනුස්සාරාජිනො බහූ;
උපද්දුතා මතා ආසුං, තං සුත්වා සො අසිග්ගහො.
යුද්ධමාරභිවෙගෙන, රඤ්ඤො සෙනාතිදුබ්බලා;
පභිජ්ජිත්වා පලායිත්ථ, රාජාපච්ඡා පලායි සො.
දිස්වා එකාකිනං යන්තං, සීහපබ්බතසන්තිකෙ;
අසිග්ගාහො මහාරාජං, මාරයිත්ථ සපරිසං.
ඔහීනං පච්ඡතො ජෙට්ඨ-තිස්සම්පි පන මාරිතුං;
සාසනං තස්ස පෙසෙසි, එහි රාජා භවාහීති.
සො තඤ්ඤත්වා පලායිත්වා, නිවත්තො මලයං අගා;
කථඤ්හි ලද්ධං කිච්ඡෙන, රජ්ජංසො දෙති මෙ ඉති.
එවං ඛො දල්ලනාමං සො, මොග්ගල්ලානං නරිස්සරං;
මාරෙත්වා ඡහි වස්සෙහි, සම්පත්තබලවාහනො.
අථා’ගන්ත්වා අසිග්ගාහො, අනුරාධපුරං වරං;
රාජා හුත්වා පවත්තෙසි, ආණාචක්කං මහීතලෙ.
ස සිලාමෙඝවණ්ණව්හො, සඞ්ඝං බොධිඤ්ච වන්දිය;
ථූපත්තයඤ්ච සක්කාසි, මහාපාළිඤ්ච වඩ්ඪයි.
පායාසං’දාසි සඞ්ඝස්ස, සප්පිඵාණිතසඞ්ඛතං;
ඡාතකෙ අතිකිච්ඡම්හි, පරිස්සාවනමෙව ච.
සබ්බදානෙන සඞ්ගණ්හී, කපණද්ධිවණිබ්බකෙ;
පූවමූලධනංචා’දා, කුමාරානං මහාදයො.
විහාරෙ අභයෙ බුද්ධං, පූජයිත්ථ සීලාමයං;
ජිණ්ණඤ්ච ගෙහං තස්සා’කා, නානාරතනචිත්තිකං.
කොලවාපිඤ්ච දත්වාන, ආරක්ඛත්ථං ජිනස්ස සො;
පූජං සබ්බොපහාරෙහි, සබ්බකාලං පවත්තයි.
එවං තස්මිං මහීපාලෙ, වසන්තෙ පුඤ්ඤභාජනෙ;
නායකො සිරිනාගව්හො, ජෙට්ඨතිස්සස්ස මාතුලො.
ගන්ත්වාන පරතීරං සො, ආදාය දමිළෙ බහූ;
ආගන්ත්වා උත්තරං දෙසං, ගණ්හිතුං තමුපක්කමි.
රාජාපි සුත්වා තං ගන්ත්වා, යුජ්ඣිත්වා රාජමිත්තකෙ;
ගාමෙ හන්ත්වාන තං තෙන, දමිළෙ සද්ධිමාගතෙ.
හතසෙසෙ ¶ ගහෙත්වාන, කත්වා පරිභවං බහුං;
අදාසි දාසෙ කත්වාන, විහාරෙසු තහිං තහිං.
එවංසම්පත්තවිජයෙ, පුරමාගම්මභූමිපෙ;
සබ්බං රට්ඨං විසොධෙත්වා, වසන්තෙ අකුතො භයෙ.
භික්ඛුබොධී සනාමො’ථ, විහාරෙ අභයුත්තරෙ;
දුස්සීලෙ බහුලෙ දිස්වා, පබ්බජ්ජාය නවොපි සො.
රාජානමුපසඞ්කම්ම, ධම්මකම්මමයාචථ;
රාජා තෙ නෙව කාරෙසි, ධම්මකම්මං විහාරකෙ.
දුස්සීලා නිහටා තෙන, සබ්බෙ මන්තිය එකතො;
රහො තං මාරයිත්වාන, තං කම්මං පටිබාහය්යුං.
රාජා සුත්වා තදා කුද්ධො, සබ්බෙගණ්හිය එකතො;
අකා පොක්ඛරණී පාලෙ, ඡින්නහත්ථෙ සබන්ධනෙ.
අඤ්ඤෙ තත්ථ සතං භික්ඛූ, ජම්බුදීපෙ ඛිපාපයි;
සරන්තො තස්ස උස්සාහං, පරිසොධෙසි සාසනං.
භික්ඛූ ථෙරියවාදෙ සො, කාතුං තෙහි උපොසථං;
ආරාධෙත්වා පටික්ඛිත්තො, පකුප්පිත්වා අනාදරො.
අක්කොසිත්වා ච භාසිත්වා, වාචාහි ඵරුසාහි සො;
භික්ඛූ තෙ අක්ඛමාපෙත්වා, දක්ඛිණං දෙසමජ්ඣගා.
තස්ස සො මහතා ඵුට්ඨො, රොගෙන මරිසජ්ජුකං;
එවං නවහි වස්සෙහි, පරිච්චජි මහීතලං.
තස්ස පුත්තො තතො අග්ග-බොධි නාමො කුමාරකො;
ආසි රාජාසිරිසඞ්ඝ-බොධිනාමෙන විසුතො.
කණිට්ඨං භාතරං මාණං, ඔපරජ්ජෙ’භිසඤ්චිය;
තස්සා’දා දක්ඛිණං දෙසං, සයොග්ගබලවාහනං.
රාජා සො පුබ්බරාජූනං, පවත්තං න විනාසිය;
රට්ඨං ධම්මෙන පාලෙසි, සඞ්ඝඤ්ච බහුමානයි.
ජෙට්ඨතිස්සො’ථ තං සබ්බං, සුණිත්වා මලයෙ ඨිතො;
අරිට්ඨං ගිරිමාගම්ම, සඞ්ගහෙසි මහාජනං.
කත්වා හත්ථගතෙ පුබ්බ-දක්ඛිණෙ සුසමානසෙ;
කමෙන පුරමාගන්තු-මාරභිත්ථ මහාබලො.
දාඨාසිව ¶ මමච්චඤ්ච, ගහෙතුං පච්ඡිමං දිසං;
පෙසයිත්වා සයං ගාමෙ, වසිත්ථ සිරිපිට්ඨිකෙ.
රාජා නිසම්ම තංසබ්බං, උපරාජං විසජ්ජයි;
සබලං පච්ඡිමං දෙසං, සො ගන්ත්වා තං පලාපයි.
පොතකංව කුලාවම්හි, සක්කා හන්තුන්ති දාරකං;
මායෙත්තං ආගතං රාජා, කුමාරා’මච්ච මග්ගහී.
ජෙට්ඨතිස්සංපි එතංව, ගණ්හිස්සාමීති චින්තිය;
ථොකෙනෙව බලෙනාගා, නිරාසඞ්කොතිවික්කමො.
ජෙට්ඨසිස්සොපි තං සුත්වා, සන්නද්ධබලවාහනො;
සාගරො භින්නවෙලොව, රාජසෙනං සමොත්ථරි.
රාජසෙනා පභිජ්ජිත්ථ, රාජා ආරුය්හ කුඤ්ජරං;
එකො අඤ්ඤාතවෙසෙන, පලායිත්වා ඛණෙන සො.
ඡට්ඨෙ මාසම්හි රජ්ජම්හා, නාවමාරුය්හ සජ්ජුකං;
ජම්බුදීපමගාහිත්වා, ධනං දෙසඤ්ච ඤාතකෙ.
ජෙට්ඨතිස්සො තතො හුත්වා, පුරෙ රාජායථා පුරෙ;
සබ්බං කිච්චං පවත්තෙසි, පරිපාලෙසි සාසනං.
මහාදාරගිරිං සො’දා, විහාරෙ අභයුත්තරෙ;
මහාවිහාරස්සා’දාසි, මහාමෙත්තව්හබොධිකං.
ගොණ්ඩිගාමඤ්ච පාදාසි, රාජා ජෙතවනස්ස සො;
මාතුලඞ්ගණකඤ්චෙව, ගාමඤ්චො දුම්බරඞ්ගණං.
මහානාගස්ස පාදාසි, පධානඝරකස්ස සො;
කස්සපස්ස ගිරිස්සාපි, ආහාරං අම්බිලාපිකං.
ගාමං කක්ඛලවිත්ථිඤ්ච, අදාවෙළුවනස්ස සො;
ගඞ්ගාමාති විහාරස්ස, කෙහෙතං ගාමකං අදා.
අන්තරාගඞ්ගසව්හස්ස, චුල්ලමාතිකගාමකං;
මයෙත්තිකස්සපාවාසෙ, සහන්න නගරං අදා.
කාළවාපි විහාරස්ස, උදව්හං ගාමමාදිසි;
එතෙ චඤ්ඤෙච සො භොග-ගාමෙහි පරිපූරයි.
ජිණ්ණං සතසහස්සෙහි, තීහි සො පටිසඞ්ඛරි;
භික්ඛූනං දීපවාසීනං, තිචීවරමදාසි ච.
ජම්බුදීපගතස්සා’සුං ¶ , රඤ්ඤො සොදරියා නරා;
තත්ථ තත්ථ නිලීනා තෙ, දෙසං හන්තුමුපක්කමුං.
සුත්වා තං ජෙට්ඨතිස්සො’ථ, කාළවාපිංඋපච්ච සො;
යුජ්ඣන්තො තෙහි තත්ථෙව, වාසං’කාසි සවාහනො.
පරතීරං ගතො රාජා, ගහෙත්වා දමිළං බලං;
කාළවාපිමුපාගම්ම, කාතුං යුද්ධමුපක්කමි.
ජෙට්ඨතිස්සොපි සන්නද්ධ බලකායො ධනායුධො;
ජම්බුදීපං ගමාපෙත්වා, අමච්චං දාඨසිවකං.
වම්මිතං ගජමාරුය්හ, යුජ්ඣන්තො අත්තනො බලං;
ඔහීයමානං දිස්වාන, ආරුළ්හං අත්තනා සහ.
මහාමච්චවචො වෙදං, සන්දෙසං මෙ මහෙසියා;
ආරොචෙහි යථාකාමං, පච්ඡා තව කරිස්සති.
පබ්බජිත්වා මහාදෙවී, සජ්ඣායිත්වා ච ආගමං;
අභිධම්මං කථෙත්වාන, පත්තිං දෙහීති රාජිනො.
ඉච්චෙතං සාසනං දත්වා, දමිළෙ ආගතාගතෙ;
යාව යුද්ධං නිහන්ත්වාන, ආයුම්හි ඛයමාගතෙ.
වෙළුප්පදමිළං නාම, දිස්වා යුජ්ඣිතුමාගතං;
තම්බුලත්ථවියං හත්ථෙ, රක්ඛන්තො ඡුරිකං තදා.
තතො නික්කරණිං සම්මා, ගහෙත්වා සීසමත්තනො;
ඡෙත්වා හත්ථිම්හි අප්පෙත්වා, ඡුරිකං කොසියං ඛිපි.
උග්ඝොසයි මහාසෙනා, මහාමච්චොපි සො තදා;
ගන්ත්වා’භියොගං වත්වාන, සීසච්ඡෙදම්හි රාජිනො.
සන්දෙසං දෙවියා වත්වා, තාය පබ්බජ්ජසාසනෙ;
සමාපිතො භිධම්මම්හි, සද්ධිමට්ඨකථාය හි.
ධම්මාසනා සමොරුය්හ, නිසීදිය මහීතලෙ;
එහි රඤ්ඤො මහාකාරං, දස්සෙහී’ති නියොජිතො.
නිසජ්ජ පුරතො තස්සා, ඡින්දිත්වා සීසමත්තනො;
ඛිපිත්වා ඡුරිකං ආහ, එවං දෙවො මතො ඉති.
සා තං දිස්වා-තිසොකෙන, ඵාලෙත්වා හදයං මතා;
එවං පඤ්චහි මාසෙහි, රාජා සො තිදිවං ගතො.
එවං ¶ විජිතසඞ්ගාමො, සත්තවො අභිමද්දිය;
රජ්ජං පාකතිකං කත්වා, විහරන්තො පුරෙ වරෙ.
උපරාජස්ස නාමෙන, කාරිතස්ස පන’ත්තනා;
මහල්ලරාජා සව්හස්ස, පධානඝරකස්ස සො.
අද්ධා ගාමද්වයං රාජා, හඞ්කාරං සාමුගාමකං;
කෙහෙල්ලරාජභාගඤ්ච, සබ්බෙපි පරිචාරකෙ.
තථා ජෙතවනස්ස’දා, මහාමණිකගාමකං;
මයෙත්තිකස්සපාවාසං, සාලගාමෙන පූජයි.
අම්බිල්ලපදරං චා’දා, චෙතියස්ස ගිරිස්ස සො;
පුලත්ථිනගරෙ කාසි, මහාපානාදි දීපකං.
අමච්චා තස්ස මාරෙසුං, මාණව්හං යුවරාජකං;
අන්තොපුරෙ’පරජ්ඣිත්වා, දත්වාපි සමමෙත්තිකං.
තතො කස්සපනාමං සො, කණිට්ඨං සකභාතරං;
පාලෙන්තො සන්තතිං රාජා, ඔපරජ්ජෙ’භිසෙචයි.
මාණස්ස මරණං සුත්වා, ගහෙත්වා දමිළෙ ලහුං;
දාඨාසිවො සමාගඤ්ඡි, ගාමං තින්තිණී නාමකං.
තස්සාගමනමඤ්ඤාම, නික්ඛමිත්වා සවාහනො;
යුජ්ඣන්තො ද්වාරසෙ වස්සෙ, ජම්බුදීපං පලාතවා.
පහාය සබ්බං ගච්ඡන්තො, සඤ්ඤාණත්ථාය අත්තනො;
එකාවලිං ගහෙත්වාව, එකාකී සො හි නික්ඛමි.
එකාවලිං විනාචෙව, රාජා හුත්වා යථාවිධිං;
අහු දාඨොපතිස්සොති, විසුතො ධරණී තලෙ.
ඉතරො ලද්ධඔකාසො, රජ්ජමග්ගහි යුජ්ඣිය;
අඤ්ඤමඤ්ඤං පලාපෙසුං, එවං තෙ අන්තරන්තරා.
එවං උභින්නං රාජූනං, සඞ්ගාමෙනා’භිපීළිතො;
ලොකො උපද්දුතො-සබ්බො විහීනධනධඤ්ඤවා.
දාඨොපතිස්සො නාසෙසි, සබ්බං පුබ්බකරාජූනං;
ගණ්හී තීසු නිකායෙසු, සාරං ධාතුඝරෙසු ච.
සුවණ්ණපටිමායො සො, සුවණ්ණං ගණ්හි භින්දිය;
සොණ්ණමාලාදිකං සබ්බං, පූජාභණ්ඩං නිරාකරි.
ථූපාරාමෙ ¶ තථාගණ්හි, සොවණ්ණං ථුපිකං ඝරෙ;
මහග්ඝරතනාකිණ්ණං, ඡත්තං භින්දිත්ථ චෙතියෙ.
මහාපාළිම්හි නාවායො, දමිළානං සදාපයි;
රාජගෙහා නිඣාපෙසුං, සද්ධිං ධාතුඝරෙන තෙ.
පච්ඡා විප්පටිසාරී සො, දෙසෙතුං, පාපමත්තනො;
කාරෙසි සහ භොගෙන, සාකවත්ථුවිහාරකං.
භාගිනෙය්යොපි රතන-දාඨො ඉති ජනෙ සුතො;
මහාදීපාදො හුත්වාන, සභොගො තමුපට්ඨහි.
අග්ගබොධිම්හි සම්පත්තෙ, රජ්ජං යුද්ධබලෙන ච;
කස්සපො යුවරාජා සො, සෙනං රක්ඛිතුමත්තනො.
දුප්පඤ්ඤො සහසා භෙත්වා, ථූපාරාමම්හි චෙතියං;
දෙවානංපියතිස්සෙන, ඛුද්දරාජෙන චෙව හි.
පුබ්බකෙහිච රාජූහි, පූජිතංධනසාරකං;
අග්ගහෙසි දුන්නිතීහි, පාපකෙහි පුරක්ඛතො.
දක්ඛිණස්ස විහාරස්ස, චෙතියං පරිභින්දිය;
අග්ගහෙසි ධනං සාරං, එවමඤ්ඤෙපි භින්දයි.
එවං කරොන්තං තං රාජා, දුන්නිතිකපුරක්ඛතං;
නාසක්ඛි කිර වාරෙතුං, අහො පාපා නිවාරියා.
තං වාරෙතු මසක්කොන්තො, ථූපාරාමම්හි චෙතියං;
භින්නං තෙන සකාරෙසි, සහස්සෙන සමඞ්ගලං.
තදා දාඨොපතිස්සෙන, අග්ගබොධි නරිස්සරො;
ජිතො රොහණමෙවා’ගා, සජ්ජෙතුං බලවාහනං.
තත්ර ඨිතො සොළසමෙ, වස්සෙ බ්යාධිහතො මතො;
තදා තස්ස කණිට්ඨො සො, යුවරාජාපි කස්සපො.
දාඨොපතිස්ස රාජානං, ජම්බුදීපං පලාපිය;
එකරජ්ජමකාදෙසං, මකුටන්තු න ධාරයි.
සාධූනං සඞ්ගමෙනෙ’ස, හුත්වා විප්පටිසාරකො;
නාසං පාපස්ස කම්මස්ස, කරිස්සාමීති චින්තිය.
පුප්ඵාරාමෙ ඵලාරාමෙ, වාපියො’පි ච කාරයි;
මහාචෙතිත්තයඤ්චාපි, මහාපූජාහි සක්කරි.
ථූපාරාමඤ්ච ¶ පූජෙත්වා, එකංගාමඤ්ච තස්සදා;
සබ්බාගමියභික්ඛූහි, ධම්මංදෙසාපයිත්ථ ච.
කත්වා මරිචවට්ටිම්හි, පාසාදං සුත්ථිරං තහිං;
වාසයිත්ථ මහාථෙරං, නාගසාල නිවාසිතං.
තත්රට්ඨං තමුපට්ඨාය, පච්චයෙති චතූහි’පි;
අභිධම්මං කථාපෙසි, සද්ධිමට්ඨකථාය සො.
නාගසාලකමාවාසං, කත්වා තස්සෙව’දාසි සො;
මහානිට්ඨිලගාමඤ්ච, පච්චයත්ථාය තස්ස’දා.
අථ දාථොපතිස්සො සො, ජම්බුදීපා ඉධාගතො;
මහන්තං බලමාදාය, කරොන්තො තෙන ආහවං.
කස්සපෙන සුසන්නද්ධ-වාහනෙන තතො මරි;
ද්වාදසාසුං කිරෙතස්ස, රාජභූතස්ස හායනා.
තස්ස දාඨොපතිස්සස්ස, භාගිනෙය්යො සනාමකො;
ජම්බුදීපං පලායිත්ථ, භීතො තම්හා මහාරණෙ.
එවං අනිච්චා වත සබ්බභොගා,
සුදුල්ලභා චෙව ඛණෙව සොභා;
තස්මාහි එතෙසු රතිං විහාය,
භවෙය්ය ධම්මාභිමුඛො හිතෙසී.
සුජනප්පසාදසංවෙගත්ථාය කතෙ මහාවංසෙ
ඡ රාජකො නාම
ද්විචත්තාලීසතිමො පරිච්ඡෙදො.