📜

චතුචත්තාලීසතිම පරිච්ඡෙද

තිරාජකො

1.

අච්චයෙ ¶ හත්ථදාඨස්ස, අග්ගබොධිකුමාරකො;

කණිට්ඨො රාජිනො ආසි, සිරිසඞ්ඝාදි බොධිකො.

2.

ධම්මරාජා අයං ආසි, සම්මා දස්සනසඤ්ඤුතො;

තස්මා සො පුඤ්ඤකම්මානි, අප්පමෙය්යානි වත්තයි.

3.

නිකායත්තයවාසීනං, භත්තග්ගමවලොකයි;

මහාපාළිඤ්ච වඩ්ඪෙසි, මාඝාතඤ්චෙව කාරයි.

4.

ඨානන්තරඤ්ච දාපෙසි, යථාරහ මනාලයො;

සිපගොත්තාදියොග්ගෙහි, සංගතෙහි ච සංගහි.

5.

යත්ථ කත්ථචි දිස්වාපි, භික්ඛවො සො මහාමති;

සක්කත්වා සොභණාපෙසි, පරිත්තං සාසනොගධං.

6.

ථෙරං සො උපසඞ්කම්ම, නාගසාලනිවාසිනං;

දාඨාසිවං මහාපඤ්ඤං, සීලවන්තං බහුස්සුතං.

7.

සක්කච්ච නං තතො සුත්වා, සම්මාසම්බුද්ධසාසනං;

ධම්මෙ’තීවපසීදිත්වා, සබ්බසන්තිකරො ඉති.

8.

සුත්වා ථෙරියවාදානං, පුබ්බඤාතීනමත්තනො;

පාපානං දුට්ඨචිත්තානං, අපකාරෙ කතෙ බහූ.

9.

විහාරෙ පරිවෙණෙ ච, ජිණ්ණෙපාකතිකෙ අකා;

භොගගාමෙ ච දාපෙසි, තත්ථ තත්ථ බහූදයෙ.

10.

විච්ඡින්නපච්චයෙ චාකා, තදාත්යං කුරිතෙ විය;

දාසකෙපි ච සඞ්ඝස්ස, යථාඨානෙ ඨපාපයි.

11.

පධානඝර මෙතස්ස, ථෙරස්ස’කාසනාමකං;

පටිග්ගහෙත්වා තං සො’පි, සඞ්ඝස්සා’දා මහාමතී.

12.

භොගගාමෙ ච තස්සා’දා, භරත්තාලං කිහිම්බිලං;

කතකඤ්ච තුලාධාරං, අන්ධකාරකමෙව ච.

13.

අන්ධකාරං ¶ අන්තුරෙළිං, බාලවං ද්වාරනායකං;

මහානිකඩ්ඪිකඤ්චෙව, පෙළහාළං තථාපරං.

14.

එතෙ අඤ්ඤෙ ච සො දත්වා, භොගගාමෙ නරිස්සරො;

දාසි ආරාමිකෙ චෙව, අත්තනො කිර ඤාතකෙ.

15.

තථා ද්වින්නං නිකායානං, විහාරෙ මන්දපච්චයෙ;

දිස්වාපි ච සුත්වා වා, භොගගාමෙ බහූ අදා.

16.

බහුනා කින්තුවුත්තෙන, නිකායෙසු’පි තීසු’පි;

අදා ගාමසහස්සං සො, බහුප්පාදං නිරාකුලං.

17.

අනුස්සරන්තො සො තිණ්ණං, රතනානං ගුණෙ වරෙ;

එකාවලිං ගහෙත්වාන, අක්ඛමාල මකා කිර.

18.

එවං සබ්බප්පයොගෙහි, සො’හු ධම්මපරායනො;

සබ්බෙ තමනුසික්ඛන්තා, හෙසු ධම්මකරා නරා.

19.

දමිළො පොත්ථකුට්ඨවො, තස්ස කම්මකරො තදා;

මාටම්බියව්හං කාරෙසි, පධානඝරමබ්භුතං.

20.

බූකකල්ලෙ අම්බවාපිං, තන්තවායිකචාටිකං;

ගාමං නිට්ඨිලවෙට්ඨිඤ්ච, තස්සා’දා සො සදා සකං.

21.

කප්පූරපරිවෙණෙ ච, කුරුන්දපිල්ලකෙ තථා;

මහාරාජඝරෙ චෙව, පාසාදෙ සො’ව කාරයි.

22.

අඤ්ඤත්ථා’දා තයො ගාමෙ, විහාරෙසු මහාධනො;

පොත්ථසාතව්හයො පඤ්ඤො, විහාරෙ ජෙතනාමකෙ.

23.

සෙනාපතිරාජනාමං, පරිවෙණං සමාපයි;

මහාකන්දො ච දමිළො, පරිවෙණං සනාමකං.

24.

චුල්ලපන්ථං තථා එකො, සෙහාලඋපරාජකං;

උපරාජා සකාරෙසි, සඞ්ඝතිස්සො’පි රාජිනො.

25.

අඤ්ඤෙසු බහවො ආසුං, විහාරෙ එවමාදිකෙ;

භස්ස රඤ්ඤො’ නුවත්තන්තා, එවං ධම්මීහි පාණිනො.

26.

පාපං වාපි හි පුඤ්ඤං වා,

පධානොයං කරොති යො;

ලො කො තං තං කරොතෙව,

තං විජනෙය්ය පණ්ඩිතො.

27.

ජෙට්ඨනාමා ¶ මහාපුඤ්ඤා, මහෙසී තස්ස රාජිනො;

ජෙට්ඨාරාමඤ්ච කාරෙසි, භික්ඛූනීනමුපස්සයං.

28.

තස්සා’දාසි ච ද්වෙ ගාමෙ, පක්කපාසාණභූමියං;

තම්බුද්ධං භෙලගාමඤ්ච, ආරාමිකසතං තථා.

29.

අකා මලයරාජාපි, ධාතුගෙහං මහාරහං;

මණ්ඩලගිරිවිහාරම්හි, චෙතියස්ස මහාධනො.

30.

ලොහපාසාදකෙ සො’ව, ඡාදෙසි මජ්ඣකූටකං;

බොධිතිස්සවිහාරඤ්ච, බොධිතස්සො මහායසො.

31.

දීපෙ මණ්ඩලිකා සබ්බෙ, තත්ථ තත්ථ යථාබලං;

විහාරෙ පරිවෙණෙ ච, කාරයිංසු අනප්පකෙ.

32.

තස්ස කාලො නරින්දස්ස, පුඤ්ඤකම්මමයො ඉධ;

අතිවිත්ථාරභීතෙන, සබ්බසො න විචාරිතං.

33.

පුබ්බකොපි කථාමග්ගො, ආකුලො විය භාතිමෙ;

යථාපධානං කථිතං, හෙතූනං උපලක්ඛණං.

34.

අථාපරෙන කාලෙන, පුලත්ථිනගරං ගතො;

වාසං තත්ථෙව කප්පෙසි, කරොන්තො පුඤ්ඤසඤ්චයං.

35.

අතෙකිච්ඡියරොගෙන, සම්ඵුට්ඨො කාලමත්තනො;

මරණස්ස විදිත්වාන, තමාහුයමහාජනං.

36.

ඔවදිත්වාන ධම්මෙන, මරණං සො උපාගමි;

මහාජනො මතෙ තස්මිං, බාළ්හසොකො පරොදිය.

37.

කත්වා ආළහණෙ තස්ස, කිච්චං සබ්බමසෙසතො;

තස්සාළාහණභස්මම්පි, කත්වා භෙසජ්ජමත්තනො.

38.

රාජා භණ්ඩඤ්ච තං සබ්බං, සබ්බඤ්ච බලවාහනං;

සම්මා ආදාය ගොපෙත්වා, නගරං සමුපාගමි.

39.

එවං සොළසමෙ වස්සෙ, රාජා ආසි දිවඞ්ගතො;

පොත්ථකුට්ඨොපි දමිළො, රජ්ජං තස්ස විචාරයි.

40.

උපරාජං ගහෙත්වාන, දාඨාසිවං ඛිපාපයි;

චාරකො විහිතුං සම්මා, රක්ඛාවරණ මාදිසි.

41.

විනා රඤ්ඤා න සක්කාති, මෙදිනිං පරිභුඤ්ජිතුං;

ආනෙත්වා දත්තනාමකං, ධනපිට්ඨප්පධානකං.

42.

උප්පන්නං ¶ රාජවංසම්හි, රජ්ජෙ තං අභිසිඤ්චිය;

තස්ස නාමං ඨපෙත්වාන, සයං සබ්බං විචාරයි.

43.

දන්තො සො ධනපිට්ඨිම්හි, විහාරං සකනාමකං;

කාරයිත්වාන පුඤ්ඤානි, අඤ්ඤානිපි සමාචිනි.

44.

සමකන්තු සො ඨත්වා’ව, වස්සද්වය මහුමතො;

පොත්ථකුට්ඨො මතෙතස්මිං, පුන අඤ්ඤම්පි මාණවං.

45.

හත්ථදාඨං සමාහූය, උණ්හා නගරසම්භවං;

තම්පි රජ්ජෙ භිසිඤ්චිත්වා, යථා පුබ්බං සයංවසී.

46.

කාළදීඝාවිකං කත්වා, පධානඝරකං තථා;

පුඤ්ඤමඤ්ඤං ඡමාසෙහි, සො’පි මච්චුවසං ගතො.

47.

එවං විදිත්වා බහුපද්දවානි;

ධනානි ධඤ්ඤානි ච වාහනානි;

විහාය රජ්ජෙසු රතිංසප්පඤ්ඤා;

මනුඤ්ඤපුඤ්ඤාභිරතා භවෙය්යුං.

සුජනප්පසාදසංවෙගත්ථාය කතෙ මහාවංසෙ

තිරාජකො නාම

චතුචත්තාලීසතිමො පරිච්ඡෙදො.