📜
ඡචත්තාලීසතිම පරිච්ඡෙද
. . . වාසං-කත්වා සුලභපච්චයං;
දාසි ධම්මරුචිනං සො, රාජිනී දීපකම්පි ච.
කාරෙත්වාන පරිච්ඡෙදං, මහානෙත්තාදි පාදිකං;
තෙසමෙව අදා කොළු-වාතෙ සො දෙවතිස්සකං.
වහත්ථලෙ ච සො කත්වා, කදම්බගොනනාමකං;
දෙවපාළිම්හි කත්වාන, ගීරිව්හනගරං තථා.
කත්වා අන්තරසොබ්භම්හි, දෙවනාමං විහාරකං;
රාජමාතිකමාරාමං, කත්වා’දා පංසුකූලිනං.
ගොකණ්ණකවිහාරෙ’කා, පධානඝරමෙව ච;
ජිණ්ණගෙහඤ්ච කාරෙසි, වඩ්ඪමානකබොධියා.
සඞ්ඝමිත්තව්හයෙ චෙව, අඤ්ඤත්ථ ච මහායසො;
තත්ථ තත්ථ විහාරෙසු, නවකම්මමකාරයි.
ඡබ්බීසති සහස්සානි, සුවණ්ණානං සමප්පිය;
ජිණ්ණානි පටිසඞ්ඛාසි, රාජා චෙතියපබ්බතෙ.
තාලවත්ථුවිහාරඤ්ච, කාරෙත්වා පණ්ණභත්තකං;
විහාරස්ස මහාසෙන-නරින්දව්හස්ස දාපයි.
ගොණ්ඩිගාමිකවාපිඤ්ච, ඡින්නං බන්ධි යථා පුරා;
දානභණ්ඩඤ්ච සො සබ්බං, සබ්බෙසං දාසි පාණිනං.
උපොසථං ¶ උපවසති, සද්ධිං දීපජනෙහි සො;
ධම්මඤ්ච තෙසං දෙසෙති, දාතුං ලොකුත්තරං සුඛං.
කම්මං සොවග්ගියං තස්ස, රජ්ජෙ සබ්බො සමාචරි;
යං කරොති මහීපාලො, තං තස්ස කුරුතෙ ජනො.
තස්මා රාජා මහාපඤ්ඤො, ධම්මමෙව සමාචරෙ;
සො නිවුත්ථනිවුත්ථම්හි, ඨානෙ හොති මහායසො.
සම්පත්තපරිවාරො ච, අන්තෙ ගච්ඡති නිබ්බුතිං;
අත්තත්ථඤ්ච පරත්ථඤ්ච, තස්මා පස්සෙය්ය බුද්ධිමා.
අත්තනා යදි එකෙන, විනිතෙන මහාජනා;
විනයං යන්ති සබ්බෙපි, කොතං නාසෙය්ය පණ්ඩිතො.
පයොගො යො හි සත්තානං, ලොහද්වය හිතාවහො;
සො තෙන අකතො නත්ථි, රත්තන්දිවමතන්දිනා.
අත්තනො සො නිවත්ථානි, වත්ථානි සුඛුමානි ච;
පංසූකූලිකභික්ඛූනං, චීවරත්ථාය දාපයි.
අට්ඨානවිනියොගොපි, සඞ්ගහො වා විරූපකො;
සාවජ්ජො පරිභොගො වා, තස්ස නාහොසි සබ්බසො.
යෙ යෙ සත්තා යදා හාරා, තෙසං තං තං සදාපයි;
යෙ යෙන සුඛී හොන්ති, තෙ තෙ තෙන සුඛාපයී.
එවං පුඤ්ඤානි කත්වාන, ඡබ්බස්සානි නරාධිපො;
අගමා දෙවරාජස්ස, සන්තිකං සන්තියාවහො.
අථ තස්ස නුජො රාජා, කස්සපො හොති ඛත්තියො;
සමත්ථො රජ්ජභාරස්ස, වහිතුං පුබ්බවුත්තිනො.
පිතා විය නියං පුත්තං, සො සඞ්ගණ්හි මහාජනං;
දානෙන පෙය්යවජ්ජෙන, අත්ථස්ස චරියාය ච.
ඨානන්තරඤ්ච දාපෙසි, තස්ස තස්ස යථාරහං;
සයං භුඤ්ජිත්ථ භොගෙපි, සබ්බදුක්ඛවිවජ්ජිතො.
ගීහිනඤ්චෙව භික්ඛූනං, බ්රහ්මණානඤ්ච ඛත්තියො;
වත්තාපයි සකාවාරෙ, මාඝාතඤ්චෙව කාරයි.
මච්ඡතිත්ථෙ දුවෙ චෙව, ආවාසං හෙළිගාමකං;
වණිජ්ජගාමමාරාමං, කස්සපාදීගිරිං තථා.
තථා ¶ අම්බතනව්හඤ්ච, පධානඝර මුත්තමං; භොගගාමඤ්ච. . .
[එත්ථකස්සපස්ස රජ්ජපටිබද්ධාය කථාය ඌනතා දිස්සති.]
තෙසං සබ්බකනිට්ඨොපි, මහින්දො නාම ඛත්තියො;
සම්පත්තරජ්ජො නාහොසි, රාජා රජ්ජ ධුරන්ධරො.
තස්සපි කිර නිලව්හො, සහායො චීරසත්ථුතො;
මතො පුබ්බෙව තස්මා, සො සරන්තො තං න ඉච්ඡිතං.
අහොරජ්ජම්පි දීපම්හි, න මඤ්ඤිත්ථ සුඛාවහං;
අභාවෙන සහායස්ස, සහායා’තීව දුල්ලභා.
තෙනෙව වුත්තං මුනිනා, ධම්මා යෙකෙචි ලොකියා;
තථා ලොකුත්තරා චෙව, ධම්මා නිබ්බානගාමිනො.
කල්යාණමිත්තං ආගම්ම, සබ්බෙ තෙ හොන්ති පාණිනං;
තස්මා කල්යාණමිත්තෙසු, කත්තබ්බො’ති සදා දරො.
ආදිපාදොව සො තස්මා, හුත්වා රජ්ජං විචාරයි;
පාලෙතුංයෙව දීපම්හි, ජිවන්තො විය පාණිනො.
කස්සපස්ස සභාතුස්ස, පුත්තං සො අග්ගබොධිකං;
ඨපෙත්වා ඔපරජ්ජම්හි, දත්වා භොගමනප්පකං.
දෙසං දත්වාන පාචිනං, වසිතුං තත්ථ පෙසිය;
දෙසං දක්ඛිණමාදාසි, රාජ පුත්තස්ස අත්තනො.
මහාපාළිම්හි දානඤ්ච, දාපෙසි දසවාහණං;
සබ්බෙ භොගෙ සමෙ’කාසි, යාචනානං සහ’ත්තනා.
අදත්වා යාචකානං සො, නු කිඤ්චි පරිභුඤ්ජති;
භුත්තං වා සතියා දෙති, ද්වි ගුණං අත්තභුත්තතො.
සකනාමං සකාරෙසි, භික්ඛුනී න මුපස්සයං;
පාදානගරගල්ලඤ්ච, ආරාම මරියාදකං.
මහින්දතටමාරාමං, සම්පත්ත චතුපච්චයං;
අඤ්ඤම්පි බහුධා කාසි, පුඤ්ඤං පුඤ්ඤගුණෙරතො.
තිණී වස්සානි කාරෙත්වා, රජ්ජමෙව මහාමති;
ගවෙසන්තො සහායං’ව, දෙවලොකමුපාගමි.
වසන්තො ¶ දක්ඛිණෙ දෙසෙ, අග්ගබොධි කුමාරකො;
කෙනාපි කරණීයෙන, නගරං ආගතො අහු.
තස්මිං තත්ථ වසන්තම්හි, ආදිපාදො මහින්දකො;
මතො ආසි තතො තස්ස, රජ්ජං හත්ථගතං අහු.
සො තං හත්ථගතං කත්වා, සණ්ඨපෙත්වාන සාසනං;
පාචින දෙසපතිනො, අග්ගබොධිස්ස පෙසයි.
ස ආගන්ත්වා අහු රාජා, සිලාමෙඝොති සඤ්ඤිතො;
ඔපරජ්ජෙ කුමාරඤ්ච, අභිසිඤ්චිත්ථ භූපති.
සො රාජා නං නියොජෙත්වා, චින්තා භාරං විමුඤ්චිය;
භොගෙ භුඤ්ජථ තුම්හෙති, සයං රජ්ජං විචාරයි.
යථායොගං ජනස්සෙස-කාසි නිග්ගහසංගහෙ;
දෙසෙ උබ්බිනයං සබ්බං, මග්ගං පාපෙසි චක්ඛුමා.
එවං තෙසු වසන්තෙසු, ඔතාරං පාපකම්මිනො;
න ලභන්තා විචින්තෙසුං, භින්දිතබ්බා ඉමෙ ඉති.
රාජානමුපසඞ්කම්ම, අවොචුං පිසුනං රහො;
තුවං රාජාසි නාමෙන, රාජා අඤ්ඤො සභාවහො.
උපරාජා අයං රජ්ජං, ගණ්හිස්සති මහාජනං;
සඞ්ගය්හ න චිරෙනෙව, හොති රාජා න සංසයො.
තං සුත්වාන මහීපාලො, පරිභිජ්ජි කුමාරකෙ;
කුමාරොපි විධිත්වා තං, චොරො හුත්වාන රාජින්දො.
පලායිත්වා සකං දෙසං, සඞ්ගණ්හිත්වා තහිං ජනෙ;
මහන්තං බලමාදාය, කාතුං සඞ්ගාම මාරභි.
කදල්යාදිනිවාතම්හි, සඞ්ගාමො භිංසනො අහු;
ගතො තත්ථ පරාජිත්වා, කුමාරො මලයං වසො.
තතො රාජා කතඤ්ඤූ සො, උපකාරං සභාතුනො;
චින්තෙත්වා රජ්ජදානාදිං, පරිදෙවිත්ථ පාකටං.
කුමාරොපි ච තං සුත්වා, අහොසි මුදුචිත්තකො;
එවං තෙ අඤ්ඤමඤ්ඤස්ස, සිනිද්ධන්තං පකාසයුං.
රාජා ගන්ත්වා සයංයෙව, මලයං එකකො වංසො;
කුමාරං තං සමාදාය, ආගමිත්ථ සකං පුරං.
හොති ¶ නිස්සංසයං [එවංපි චිත්තො] අතීව සො;
විවාහං තෙන කාරෙසි, ධීතරං සඞ්ඝනාමිකං.
තාය සද්ධිං වසන්තො සො, විස්සත්ථො තෙන රාජිනා;
පහාරං තාය පාදාසි, දුට්ඨො දොසම්හි කිස්මිංචි.
පිතරං සා උපාගම්ම, කරුණං රොදිතම්පති;
අකාරණෙ මං මාරෙති, දින්නො වො සාමිකො ඉති.
සොපි තං සුතමත්තෙව, දුක්කතං වත මෙ ඉති;
පබ්බාජෙසි ලහුං ගන්ත්වා, භික්ඛූනී න මුපස්සයං.
අග්ගබොධිසනාමොථ, තස්සා මාතුල පුත්තකො;
සුචිරෙනෙව කාලෙන, තස්සං සා රත්තමානසො.
කාලො’යන්ති විදිත්වාන, තමාදාය පලායිතුං;
අඤ්ඤතො තං ගහෙත්වාන, ගතො එකොව රොහණං.
අග්ගබොධිං නරින්දො සො, අග්ගබොධි නමාදිය;
අග්ගබොධිං නිහන්තුං තං, රොහණං තමුපාවීසි.
අග්ගබොධි නිසෙධෙත්වා, අග්ගබොධිං සභාතරං;
අපරෙ පබ්බතෙ හන්තු-මග්ගබොධිං සයං ගතො.
කසිණං රොහණං හත්ථ-ගතං කත්වා මහා බලො;
යුජ්ඣිත්වා තෙන තං ගණ්හි, භරියං සඞ්ඝමත්තනො.
තතො පට්ඨාය සුඛිතා, සමග්ගා තෙ තයො ජනා;
විස්සට්ඨා අඤ්ඤමඤ්ඤෙසු, විහරිංසු යථාරුචිං.
වාපාරනිං අකාරාමං, තථා මාණග්ගබොධිකං;
සභත්තුද්දෙසභොගඤ්ච, විහාරෙ අතියුත්තරෙ.
හත්ථි කුච්ඡිවිහාරෙ ච, විහාරෙ පුන පිට්ඨිකෙ;
මහාදීපරිවෙණෙ ච, පාසාදෙ වාහදීපකෙ.
ථූපාරාමම්හි ගෙහස්ස, ද්වාරෙ ච පරිජිණ්ණකෙ;
කාසි පාකතිකං තත්ථ, ථම්භෙ ච පරිවත්තයි.
එවං කත්වාන පුඤ්ඤානි, පුඤ්ඤානි ච යථාබලං;
චත්තාලීසතිමෙ වස්සෙ, යථාකම්ම මුපාගමි.
අථොපරාජා රාජා’සි, අග්ගබොධි සිරීධරො;
තනයො සො මහින්දස්ස, ආදිපාදස්ස ධීමතො.
සාසනම්පි ¶ ච ලොකඤ්ච, සඞ්ගණිත්ථ යථාරහං;
ඔපරජ්ජෙ’භිසිඤ්චත්ථ, මහින්දං පුත්තමත්තනො.
මහාබොධිස්ස කාරෙසි, ඝරං ජිණ්ණං නවං ථිරං;
ආරාමෙ ද්වෙ ච කාරෙසි, කළන්දං මල්ලවාතකං.
ධම්මකම්මෙහි සක්කච්චං, සොධෙසි ජිනසාසනං;
විනිච්ඡනන්තො ධම්මෙන, ඡින්දි කූටට්ටකාරකෙ.
භෙසජ්ජඤ්ච ගිලානානං, මඞ්ගලං චාවමඞ්ගලං;
ලඞ්කාදීපම්හි සකලෙ, සයමෙව විචාරයී.
සලාකභත්තං දාපෙසි, නිකායත්තය වාසිනං;
භොජනං පංසුකූලීනං, අත්තයොග්ගං මහාරහං.
එවමාදීනි කත්වාන, පුඤ්ඤානි සසයං වසී;
චුතො’සි ඡහි වස්සෙහි, පුලත්ථිනගරෙ වසං.
තතො පුබ්බෙව තස්සාසි, පුත්තො සො යුවරාජකො;
මතො කිර තතො රජ්ජං, අපුත්තං තං තදා අහු.
පුත්තො මහින්දො නාමා’සි, සිලා මෙඝස්ස රාජිනො;
රජ්ජයොග්ගො මහාපුඤ්ඤො, ලොකසඞ්ගණ්හ නක්ඛමො.
තස්ස ජාතදිනෙයෙව, රාජා නක්ඛත්තපාඨකෙ;
පුච්ඡිත්වා රජ්ජයොග්ගොති, සුත්වා තෙහි වියාකතං.
දත්වා තෙසං ධනං සාධු, පවත්තිං තං නිගූහයි;
අථ නං සො වයප්පත්තං, කත්වා සෙනාපතිංසකං.
රජ්ජං වස්සෙව කත්වාන, සබ්බං හත්ථෙ සයංවසී;
සො ධම්මෙන විචාරෙසි, රාජ කිච්චං මහාමති.
මතෙපි තස්මිං තස්මා සො, අග්ගබොධාභිධානිනො;
සෙනාපච්චං න ගණ්හිත්ථ, නයඤ්ඤූ තස්ස හත්ථකො.
තදා කෙනචි ගන්ත්වා සො, කරණීයෙන රාජිනො;
සමුද්දතීරෙ වසති, මහාතිත්ථම්හි පට්ටනෙ.
සුත්වා සො චූළපිතුනො, මරණං වෙගසා’ගමා;
චොරා රජ්ජං ගහෙත්වාන, නාසෙය්යුං නගරං ඉති.
තතො උත්තරදෙසම්හි, මණ්ඩලීකා සරට්ඨියා;
අච්ඡින්දිත්වාන තං දෙසං, ඡින්නරාජකරං කරුං.
සො ¶ තං සුත්වා මහාසෙනො, ගන්ත්වා උත්තරදෙසකං;
සබ්බෙ නිම්මථයිත්වාන, මණ්ඩලී කෙසරට්ඨියෙ.
ගන්ත්වා රඤ්ඤො මතඨානං, දිස්වා දෙවිං පරොදිය;
අස්සාසෙත්වා යථාකාලං, ඉදං වචනමබ්රවි.
මාචින්තෙසි මහාදෙවී, මතො මෙ සාමිකො ඉති;
රක්ඛිස්සාමි අහං දීපං, තුම්හෙ රජ්ජං කරිස්සථ.
තුණ්හිභූතා’ධිවාසෙත්වා, පියසා පාපබුද්ධිකා;
රහො යොජයී තං හන්තුං, වත්ථුකාමා යථාරුචිං.
සෙනාපති තං ඤත්වාන, තස්සා’රක්ඛං විධාය සො;
තං පක්ඛියෙහි යුජ්ඣිත්වා, පලාපෙසි මහාජනං.
තතො දෙවිං සබන්ධෙත්වා, පක්ඛිපිත්වාන යානකෙ;
ආදාය තං පුරං ගන්ත්වා, රජ්ජං ගණ්හි සසාධනං.
අත්ථි දප්පුළ නාමො’පි,
සිලා මෙඝස්ස රාජිනො;
භාගිනෙය්යො මහාසෙනො,
ආදිපාදො මහා ධනො.
සො සෙනං සන්නිපාතෙත්වා, වසන්තො කාළවාපියං;
කාතුං සඞ්ගාම මාගඤ්ඡි, සඞ්ගගාමප්පදෙසකං.
සෙනාපති පවත්තිං තං, සුත්වා සම්පන්නවාහනො;
දෙවිඤ්ච තං සමාදාය, අගමා තත්ථ සජ්ජුකං.
තෙසං තත්ථසි සඞ්ගාමො, උභින්නං ලොමහංසනො;
ආදිපාදො තදාසෙනං, ඔහීයන්තං සමෙක්ඛිය.
පලායිත්වා ආරුහිත්ථ, අච්ඡසෙලං සවාහනො;
පලාපෙත්වාන තං තත්ථ, සෙනාපති සුඛං වසි.
සුඤ්ඤංති නගරං සුත්වා, මණ්ඩලීකාපි උත්තරෙ;
දෙසෙ සබ්බෙ සමාගම්ම, අග්ගහෙසුං පුරං තදා.
සො හි තෙ පටිබාහෙසි, සූරො ධීරපරක්කමො;
අථාගම්ම පුරං රජ්ජං, විචාරෙසි යථානයං.
භික්ඛුසඞ්ඝස්ස ලොකස්ස, මච්ඡානං මිගපක්ඛිනං;
ඤාතීනං බලකායස්ස, කත්තබ්බං සබ්බමාචරි.
පච්ඡා ¶ අනු බලප්පත්තො, දප්පුලො මලයං ගතො;
භාගිනෙය්යො දුවෙ චෙව, පක්කොසිත්වාන රොහණා.
රට්ඨෙ ජනපදෙ සබ්බෙ, ආදාය බහුවාහනො;
රත්තියං පුරමාගම්ම, සමුද්දො විය ඔත්ථරි.
බලකායො පුරං රුන්ධි, උග්ඝොසෙන්තො සමන්තතො;
හෙසිතෙන තුරඞ්ගානං, කොඤ්චනාදෙ නදන්තිනං.
තාළාවචර සද්දානං, කාහළානං රවෙන ච;
ගජ්ජිතෙන භටානඤ්ච, ආකාසං න තදා ඵලි.
තදා සෙනාපති දිස්වා, මහාසෙනං පමොදිය;
ආරොචෙසි අවත්තිං තං, බලකායස්ස අත්තනො.
රාජපුත්තා තයො එතෙ, මහන්තං බලමාදිය;
නගරං නො’පරුන්ධිංසු, කින්තු කත්තබ්බ මෙත්ථ වො.
එවං වුත්තා තමාහංසු, සූරා තස්ස රණත්ථිනො;
දෙවාසෙවා දිනෙයෙව, සෙවකානං න ජීවිතං.
එවං භූතෙ සචෙ කාලෙ, ඔහීනා ජීවිභත්ථිනො;
පොසෙසි සාමි කිං කාල-මෙත්තකං නො යථා සුඛං.
වුත්තෙ එවං සඋස්සාහො, බලං සජ්ජිය රත්තියං;
උග්ගතෙ අරුණෙ හත්ථි-මාරුය්හ කතකම්මකං.
ද්වාරෙනෙ’කෙන නික්ඛම්ම, පතන්තො අසනී විය;
සද්ධිං යො ධසහස්සෙහි, සඞ්ගාමං කාසි දුස්සහං.
බලං තං ආදිපාදස්ස, නිප්ඵොටෙත්වා තතො තතො;
සන්නිපාතිය එකජ්ඣං, නියත්තිං සම්පවෙදයි.
හතාවසෙසෙ ආදාය, ආදිපාදොපි දප්පුළො;
පුබ්බණ්හෙව පරාජිත්වා, පලායිත්වා’ග රොහණං.
රාජපුත්තෙ දුවෙ චෙව, රොහණම්හා තදා ගතෙ;
ජීවග්ගාහං සගාහෙත්වා, තෙ ආදාය පුරං ගතො.
එවං පත්තජයො සූරො, දීපෙ ජාතෙ නිරාකුලෙ;
පාචිනදෙසං සාධෙතුං, පෙසයිත්ථ සවාහනෙ.
තෙපි ගන්ත්වාන දෙසං තං, උත්තරං දෙසමෙව ච;
සාධයිත්වා’චිරෙනෙව, සඞ්ගහෙසුං මහාබලං.
රාජාපි ¶ තං මහාදෙවිං, භරියං කාසි අත්තනො;
පරිච්චත්තුඤ්ච මාරෙතුං, න සක්කායන්ති චින්තිය.
තෙසං සංවාසමන්වාය, ගබ්භො ආසි පතිට්ඨිතො;
පුත්තං විජායි සාධඤ්ඤ-පුඤ්ඤලක්ඛණසඤ්ඤුත්තං.
රඤ්ඤො සා’තිපියා ආසි, තතො පට්ඨාය සොපි ඛො;
පුත්තස්ස තස්ස පාදාසි, ඔපරජ්ජං සභොගියං.
ඨිතා පාචිනදෙසම්හි, ආදිපාදා නිසම්මතං;
විනා සො’යන්ති අම්හාකං, උභො හුත්වාන එකතො.
ද්වීසු පස්සෙසු සෙනඤ්ච, සමාදාය මහාධනං;
සන්ධිංභාතරමාහූය, කත්වාරොහණ දෙසතො.
ගඞ්ගාතීරම්හි වාසං තෙ, කප්පයිංසු මහබ්බලා;
රාජා සබ්බං නිසම්මෙ’තං, මණ්ඩලීකෙ තහිං තහිං.
ආරාධෙත්වා ගහෙත්වාන, දුට්ඨෙ මාරිය කෙචන;
රක්ඛං දත්වාන නගරෙ, කත්තබ්බං සාධුයොජිය.
මහාසෙනඞ්ගමාදාය, මහෙසිඤ්ච තමාදිය;
ඛන්ධාවාරං නිවෙසෙති, මහුම්මාරම්හි ගාමකෙ.
තස්සාගමනමඤ්ඤාය, ආදිපාදාපි තෙ තයො;
කොවිළාරව්හයෙ ගාමෙ, මහායුද්ධං පවත්තයුං.
අථ රාජා මහාසෙනො, සමුග්ඝාතෙසි තං බලං;
දප්පුළො සො පලායිත්ථ, ආදි පාදා දුවෙ හතා.
තත්ථාපි ලද්ධවිජයො, පුරමාගම්මභූමිපො;
රාජකිච්චං විචාරෙසි, මහාදානං පවත්තයි.
මහාබොධි දුමින්දස්ස, මහාචෙතිත්තයස්ස ච;
ධාතූනම්පි ච සක්කච්චං, මහාපූජාමකාරයී.
රොහණං සමුපාගම්ම, දප්පුළො සො තමාගතො;
බලං සම්පටිපාදෙසි, යුජ්ඣිතුං පුන රාජිනා.
රාජා සො පුත්තනත්තානං, දෙසං කාතුං නිරාකුලං;
ථූපාරාමම්හි සබ්බෙපි, සන්නිපාතිය භික්ඛවො.
අඤ්ඤෙපි ච මහාපඤ්ඤෙ, යුත්තා යුත්තිවිසාරදෙ;
රාජධම්මෙසු සබ්බෙසු, නිපුණො නයකොවිදො.
ආරොචෙත්වා ¶ පවත්තිං තං, තෙහි සම්මා පකාසිතො;
චතුරඞ්ගමහාසෙනො, සබ්බූපකරණානුගො.
දීපෙ සබ්බත්ථ යොජෙත්වා, කත්තබ්බං නගරෙපි ච;
නික්ඛන්තො න චිරෙනෙව, අගමා මාරපබ්බතං.
සම්මද්දිත්වාන තං දෙසං, ඛිප්පං පබ්බතමාරුහී;
තං දිස්වා රොහණෙ සබ්බෙ, භීතා තං වසමාගමුං.
තතො සන්ධිං කරිත්වාන, දප්පුළෙන සදප්පකො;
හත්ථී අස්සෙ ච මණයො, ගහෙත්වා තස්ස හත්ථතො.
ගාළ්හගඞ්ගඤ්ච කත්වාන, සීමං රොහණභොගිනං;
ඔරගඞ්ගං සමාදාය, රාජභොගමකාරයි.
දීපමෙවං මහාතෙජො, කත්වා විගතකණ්ටකං;
එකාතපත්තො ආගම්ම, පුරං වසි යථාසුඛං.
පරිවෙණං සකාරෙසි, රාජා දාමවිහාරකං;
තථා සන්නිරතිත්ථඤ්ච, පුලත්ථිනගරෙ විභූ.
මහාලෙඛඤ්ච කාරෙසි, පරිවෙණමභයා චලෙ;
තථා රතනපාසාදං, තථෙව සුමනොහරං.
අනෙකභූමං කාරෙත්වා, වෙජයන්තමිවාපරං;
තථා සතසහස්සෙහි, තීහි චෙව මහාධනො.
ජම්බොනදතුවණ්ණස්ස, සහස්සෙහි ච සට්ඨිහි;
බිම්බං සත්ථුස්ස කාරෙත්වා, නග්ඝං චූළාමණියුතං.
පූජං සබ්බොපහාරෙන, කාරෙත්වාන මහාරහං;
පාසාදමහනෙ සබ්බං, රජ්ජං ඔස්සජ්ජි අත්තනො.
බොධිසත්තඤ්ච කාරෙත්වා, රාජානං සුමනොහරං;
සණ්ඨපිත්ථසිලා මෙඝෙ, චාරුං භික්ඛූනුපස්සයෙ.
ථූපාරාමම්හි ථුපස්ස, කාසි සොවණ්ණකඤ්චුකං;
පට්ටං කත්වා විචිතත්ථං, රජතං අන්තරන්තරා.
තස්මිංයෙව ච පාසාදං, පරිජිණ්ණං සකාරයි;
අභිධම්මං කථාපෙසි, කාරාපෙත්වා මහාමහං.
මහාථෙරෙන සතිමා, හෙමසාලිනිවාසිනා;
තත්ථ පොක්ඛරණිඤ්චස්ස, පරිභොගාය කාරයි.
ජිණ්ණෙ ¶ දෙවකූලෙ කත්වා, බහුකෙ තත්ථ තත්ථ සො;
දෙවානං පටිමායො ච, කාරයිත්ථ මහාරහා.
බ්රාහ්මණානඤ්ච දත්වාන, පච්චග්ඝං රාජභොජනං;
පායෙසි ඛීරං සොවණ්ණ-තට්ටකෙහි සසක්ඛරං.
උසභෙ පඞ්ගුලානඤ්ච, ජීවිකඤ්ච සදාපයී;
දමිළානන්තු පාදාසි, අස්සෙ ගොණෙ අගණ්හතං.
අනාථා යෙ සලජ්ජා ච, තෙ ච සඞ්ගණ්හි සො රහො;
අසංගහිතො දීපම්හි, නත්ථි තෙන යථාරහං.
දාතබ්බොති කථං ගුන්න-මහාරො සො විචින්තිය;
සස්සෙ ඛීරගතෙ’දාසි, තෙසං ඛෙත්තසහස්සකෙ.
කාළවාපිම්හි සො වාරි-සම්පාතං කාරයි ථිරං;
පුඤ්ඤමෙවං විධං තස්ස, අප්පමෙය්යං බහුං කිර.
තස්ස පුත්තො තදා ආසි, යුවරාජා දිවඞ්ගතො;
ජාතො සෙනාපති කාලෙ, අපරො අත්ථි දාරකො.
තං රාජා රාජපුත්තෙහි, භීතො රාජාරහො ඉති;
මාරෙතුං තං න සක්කොන්ති, වඩ්ඪපෙසි යථා තථා.
අරීහි නගරෙ රුද්ධෙ, පිතරං සො කිරෙකදා;
උපසඞ්කම්ම යාචිත්ථ, සඞ්ගමාවචරං ගජං.
සො දාපෙසි මහානාගං, ඝොරං මාරකරූපමං;
කතහත්ථං බලඤ්චෙව, සබ්බායුධ විසාරදං.
කාලොයමීති මන්ත්වා සො, බන්ධිත්වා ඡුරිකං තදා;
කුඤ්ජරං වරමාරුය්හ, නික්ඛම්ම නගරා බහි.
විද්ධංසෙත්වා බලං සබ්බං, දුජ්ජයං ජයමග්ගහී;
රාජා දිස්වා පසන්නො තං, සෙනාපච්චඤ්ච තස්ස’දා.
එසොව කිර ගන්ත්වාන, සබලො දෙසමුත්තරං;
පලාපෙසි සසෙනං තං, ආදිපාදඤ්ච දප්පුලං.
බද්ධවෙරො තතො’හොසි, දප්පුළො තම්හි සාධුකං;
මහාඋම්මාරයුද්ධම්හි, දිස්වා තමතීකොධවා.
සීඝං පෙසෙසි තං හන්තුං, හත්ථිමාරුළ්හමත්තනා;
ඔවිජ්ඣිය පලාපෙසි, තමෙස සකදන්තීනා.
දිස්වා ¶ තමතිසන්තුට්ඨො, අඤ්ඤෙසඤ්ච අභාවතො;
රජ්ජයොගෙ අදා තස්ස, උපරාජත්තමත්තනො.
එවං වීසති වස්සානි, දීපමෙතං සුභුඤ්ජිය;
විපාකං පුඤ්ඤකම්මස්ස, භුඤ්ජිතුඤ්ච දිවඞ්ගතො.
එවං අනෙකෙහි නයෙහි ථද්ධා;
ජනස්ස දුක්ඛෙහි විරූපකෙහි;
භොගා විනස්සන්ති ඛණෙ න සබ්බෙ;
අහො තහිංයෙව රමන්ති බාලා.
සුජනප්පසාදසංවෙගත්ථාය කතෙ මහාවංසෙ
ඡ රාජකො නාම
ඡචත්තාලීසතිමො පරිච්ඡෙදො.