📜
එකූනපඤ්ඤාසතිම පරිච්ඡෙද
රාජද්වයදීපනො
එවං තස්මිං මතෙ තස්ස, කාතබ්බං සාධුකාරිය;
මහාදීපාදො සෙනව්හො, ආදාය බලවාහනං.
ආගම්ම නගරං රාජා, අහොසි ධරණී තලෙ;
ආදිකප්පම්හි රාජූනං, දස්සන්තො චරියං පිය.
සද්ධො මහාධනො සූරො, මුත්තචාගී නිරාලයො;
යාචයොගො මහාභොගො, සම්පන්නබලවාහනො.
කිත්තියා’මලභූතාය, තථා තෙජො ගුණෙන ච;
සන්නිපාතංව සො චන්ද-සූරියානං නිදස්සයි.
අසඞ්කිණ්ණ ගුණාකිණ්ණො, සුවිචිණ්ණ ගුණාගුණො;
නිත්ථිණ්ණපාපො නිබ්බිණ්ණ-සංසාරො සාරදස්සනො.
භරියා තස්ස යා ආසි, සඞ්ඝාතං සො භිසෙචයි;
මහෙසීභාවෙ දත්වාන, පරිහාරං යථාභතං.
මහින්දං නාම සප්පඤ්ඤං, කණිට්ඨං භාතරං සකං;
දත්වා දක්ඛිණභාගං සො, ඔපරජ්ජෙ’භිසෙචයි.
අන්තෙපුරෙ’පරජ්ඣිත්වා, සො රඤ්ඤා අවධාරිතෙ;
සපුත්තදාරො වුට්ඨාය, අඤ්ඤාතො මලයං අගා.
උප්පජ්ජිත්ථ ¶ තදා පුත්තො, රඤ්ඤො සඞ්ඝාය දෙවියා;
දස්සෙන්තො’ව පනාදස්ස, කුමාර රූපමත්තනො.
රාජා තං ජාතමත්තං’ව, දිස්වා සන්ථුට්ඨමානුසො;
සිද්ධත්ථං ලුම්බිනීජාතං, රාජා සුද්ධොදනො විය.
ධඤ්ඤපුඤ්ඤගුණූපෙතො, ඨපෙත්වා දීපමෙකකං;
ජම්බුදීපෙ’පි කසිණෙ, රජ්ජයොග්ගොති මෙ සුතො.
නාමදාන දිනෙයෙව, පරිහාරෙන සබ්බසො;
ඔපරජ්ජෙ භිසිඤ්චිත්වා, දක්ඛිණං දෙසමස්ස’දා.
යුවරාජාපි මලයෙ, වසන්තො’ව මහීපතිං;
ආරාධෙත්වා උපායෙන, අනුඤ්ඤතො සභාතරා.
නිකායත්තය වා සීහි, සද්ධිං භික්ඛූහි ආගතො;
දිස්වා රාජානමෙත්ථෙව, සන්ධීං’කාසි අකුප්පියං.
යා තස්ස යුවරාජස්ස, භරියා තිස්සා නාමිකා;
රාජිනී සා විජායිත්ථ, ධීතරං සඞ්ඝනාමිකං.
කිත්තිනාමා’පරායා ච, භරියා සාපි ඛො පන;
විජායි පුත්තෙ චත්තාරො, තථා එකඤ්ච ධීතරං.
තදා රාජාපි චින්තෙත්වා, එවං සති කණිට්ඨකො;
නිස්සඞ්කො මයි හොතීති, සම්මා මන්තීහි මන්තිය.
ධීතරං යුවරාජස්ස, සුරූපිං රූපනාමිකං;
කස්සපස්ස’ත්ත පුත්තස්ස, විවාහං කාරයි බුධො.
දක්ඛිණං දෙසමස්සෙව, කණිට්ඨස්ස සදාපයි;
රාජපුත්තස්ස පාදාපි, පච්චෙකං භොගමත්තනො.
රජ්ජම්හි සබ්බං තස්සෙව, පරිභොගාය දාපයි;
කෙවලන්තු විචාරෙසි, දීපං දීප හිතාවහො.
තෙසං සංවාසමන්වාය, උභින්නං පුඤ්ඤකම්මිනං;
ධඤ්ඤපුඤ්ඤගුණූපෙතා, විජාතා පුත්තධීතරො.
කත්වා සබ්බොපහාරෙන, දාඨාධාතු මහාමහං;
ආරුය්හ වරපාසාදං, රතනව්හං මහීපති.
තදා සොවණ්ණයස්සාපි, සම්බුද්ධස්ස පුරා ඨිතං;
සුඤ්ඤං පිට්ඨං සයං දිස්වා, කස්මා එවන්ති සංවදි.
තතො ¶ අමච්චා ආහංසු, නාජානාසි මහීපති;
මහාපිතුනරින්දස්ස, කාලෙ තව නරිස්සරං.
පණ්ඩුරාජා ඉධාගම්ම, දීපමෙතං විනාසිය;
සබ්බං සාරගතං දීපෙ, සමාදාය ගතො ඉති.
තං සුත්වා ලජ්ජිතො රාජා, සයං විය පරාජිතො;
තදහෙව නියොජෙසි, අමච්චෙ බලසඞ්ගහෙ.
තදා’ව කිර ආගඤ්ඡි, පණ්ඩුරාජකුමාරකො;
පරිභූතො සරාජෙන, රජ්ජත්ථං කත නිච්ඡයො.
රාජා දිස්වා’ති සන්තුට්ඨො, කත්තබ්බං තස්ස කාරිය;
මහාතිත්ථ මුපාගම්ම, පට්ටනං සෙමත්රසො.
මහන්තං බලකායඤ්ච, තස්සොපකරණානි ච;
අනුනං පටියාදෙත්වා, දෙවසෙනංව සජ්ජිතං.
පණ්ඩුරාජකුමාරෙන, සද්ධිං සෙනාපති සකං;
ගන්ත්වා තං පණ්ඩුරාජානං, හන්ත්වානිකමිතො පුරා.
රතනං සබ්බමාදාය, දත්වා රජ්ජං ඉමස්ස ච;
න චිරෙනෙව එහීතී, උය්යොජෙසි මහායසො.
සොපි එවං කරොමීති, පටිස්සුත්වා මහීපතිං;
වින්දිත්වා බලමාදාය, නාමමාරුය්හ තං ඛණෙ.
පරතීරං තතො ගන්ත්වා, සංවුළහ බලවාහනො;
විනාසයන්තො පච්චන්තං, වාරෙසි මධුරං පුරං.
ද්වාරානි පිදහිත්වාන, පච්ඡින්දිත්ථ ගතාගතං;
තතො අග්ගිං ඛිපාපෙසි, ගොපුරට්ටාල කොට්ඨකෙ.
එවං සීහළසෙනාය, පවිට්ඨාය සකං පුරං;
සබ්බං විලුම්පමානාය, සෙනඞ්ගං ඝාතයන්තියා.
පණ්ඩුරාජා නිසම්මෙතං, සමාදාය සකං බලං;
වෙගසා තං සමාගම්ම, යුද්ධං කාතුං සමාරභි.
අසම්පුණ්ණ බලත්තා සො, විද්ධො සල්ලෙන භූපති;
හත්ථික්ඛන්ධගතොයෙව, විහාය පුරමත්තනො.
පලායිත්වා ගතඨානෙ, ජීවිතං නිජමෙස්සජි;
භරියාව’ස්ස තෙනාසි, සම්පත්තා ජීවිතක්ඛයං.
තතො ¶ සීහළසෙනාසා, පවිට්ඨා නිබ්භයා පුරං;
තත්ථ සබ්බං විලුම්පිත්ථ, දෙවා’සිරපුරං යථා.
සෙනාපති තතො රාජ-ගෙහෙ භත්තං සමෙක්ඛිය;
දීපානිතමිමම්හා ච, තත්රට්ඨඤ්ච මහාරහං.
සාරං සබ්බංසමාදාය, දෙසෙ ච නගරෙ ඨිතං;
කත්වා ඉස්සරියං තත්ථ, වසෙවත්තිය අත්තනො.
පණ්ඩුරාජ කුමාරං තු, තත්ථ රජ්ජෙ’භි සිඤ්චිය;
කාරෙත්වා පරිහාරඤ්ච, දෙසං තස්ස සමප්පිය.
යථාරුචිං ගහෙත්වාන, හත්ථිඅස්සෙ නරෙ’පි ච;
තත්ථ තත්ථ යථා කාමං, වසන්තො අකුතො භයො.
සමුද්ද තටමාගම්ම, ඨත්වා තත්ථ යථාසුඛං;
කීළන්තො විය නාවං සො, සමාරුය්හ විසාරදො.
මහාතිත්ථ මුපාගම්ම, වන්දිත්වා ධරණී පතිං;
තං සාසනං නිවෙදෙත්වා, සාරං දස්සෙසි ආහටං.
රාජා සාධූති වත්වාන, කාරෙත්වා තස්ස සඞ්ගහං;
සද්ධිං සෙනාය ආගන්ත්වා, පකට්ඨාය සකං පුරං.
ජයපානං පිවිත්වාන, කත්වා විජයමඞ්ගලං;
මහාධාගං පවත්තෙත්වා, යාචකානං යථා රුචිං.
සබ්බං පාකතිකං කාසි, සාරං දීපෙ නිරාලයො;
සොවණ්ණ පටිමායො ච, යථාඨානෙ ඨපාපයි.
සුඤ්ඤං රතනපාසාදෙ, පිට්ඨං පූරෙසි සත්ථුනො;
කාසි රක්ඛපිධානෙන, නිබ්භයං ධරණීතලං.
තතො පට්ඨාය දීපංසො, අරීනං දුප්පධංසියං;
කත්වා වඩ්ඪෙසි භොගෙහි, උත්තරාදිකුරුං පිය.
ඛින්නා පුබ්බස්ස රාජස්ස, කාලෙ දීපම්හි පාණිනො;
නිබ්බුතා තං සමාගම්ම, ඝම්මා විය වලාහකා.
තස්ස වීසතිමෙ වස්සෙ, විහාරෙ අභයුත්තරෙ;
නික්ඛමිත්වා ගතා හෙසුං, පංසුකූලික භික්ඛවො.
යුවරාජා මහින්දො සො, ධුමරාජස්ස සත්ථුනො;
කාරාපයි ඝරං රම්මං, දස්සනෙය්යං මනොරමං.
බොධිගෙහං ¶ කරොන්තො තං, දිස්වා වඩ්ඪකීනො තදා;
වංසෙන සාඛං ආහච්ච, භිජ්ජන්තං වරබොධියා.
කින්තු කාතබ්බමෙත්ථාති, යුවරාජං නිවෙදයුං;
සො තං තං මුපසංකම්ම, මහාපූජාය පූජිය.
සචෙ සත්ථා, හිතත්ථාය, සම්භූතො සබ්බපාණිනං;
ලද්ධුං පුඤ්ඤස්ස’නග්ඝස්ස, ඝරස්ස කරණෙති’ධ.
සාඛා ගච්ඡං තු උද්ධංව, කාතුං සක්කා යථාඝරං;
එවමාරාධයිත්වාන, වන්දිත්වා සඞ්ඝරං ගතො.
තදා සාඛා දුමින්දස්ස, රත්තියං උද්ධමුග්ගමි;
තතො කම්මකරා සබ්බං, ආරොචෙසුං සසාමිනො.
යුවරාජා’ති සන්තුට්ඨො, භාතුරඤ්ඤො නිවෙදිය;
මහාපූජාය පූජෙසි, විස්සජ්ජිය බහුධනං.
තථා මහින්දසෙනව්හං, පරිවෙණඤ්ච කාරිය;
සඞ්ඝස්සා’දා සභොගං සො, පුඤ්ඤා පුඤ්ඤානිචාචීනි.
අදා සපරිසං භත්තං, වත්ථං ඡත්තමුපාහනං;
තථා ගමියභත්තඤ්ච, නහානඤ්ච සභත්තකං.
එවං ඛුද්දානු ඛුද්දානි, කත්වා පුඤ්ඤානි සො විභූ;
රඤ්ඤො තෙත්තිංසවස්සම්හි, යථාකම්මමුපාගමි.
අථ රාජා මතෙතස්මිං, කණිට්ඨමුදයං සකං;
තස්ස ඨානෙ ඨපෙත්වාන, සබ්බං තස්සෙව තස්සදා.
තුලාභාරස්ස දානෙන, දීනානාථෙ සතප්පයි;
ධම්මකම්මෙන සොධෙසි, නිකායත්තයමෙකතො.
සොණ්ණථාලීසහස්සං සො, මුත්තාහි පරිපූරිය;
ඨපෙත්වා මණිමෙකෙකං, තස්සොපරි මහාරහං.
බ්රාහ්මණානං සහස්සස්ස, සුද්ධෙ රතනභාජනෙ;
භොජෙත්වා ඛීරපායාසං, දාපෙත්වා හෙමසුත්තකං.
තථා නවෙහි වත්ථෙහි, අච්ඡාදෙත්වා යථාරුචිං;
සන්තප්පෙසි මහන්තෙන, පරිහාරෙන පුඤ්ඤවා.
භික්ඛූනං දීපවාසීනං, අදාසි ච තිචීවරං;
අදා සබ්බාසමිත්ථීනං, වත්ථඤ්ච සුමනොහරං.
කාරෙත්වා ¶ ලොහපාසාදං, වෙජයන්තසරික්ඛකං;
වඩ්ඪෙසි පටිමං තත්ථ, සුවණ්ණඝටකොට්ටිමං.
සුත්වා උපොසථාගාර-භාවං සබ්බ මහෙසීනං;
තුච්ඡො යං නෙව හොතූති, වාසං සඞ්ඝස්ස තං අකා.
භොගගාමෙ ච තස්සදා, රක්ඛකෙ ච නියොජයි;
භික්ඛූ ද්වත්තිංසමත්තාහි, වසන්තූති නියාමයි.
ගඞ්ගාය මරියාදං සො, කාරෙසි මණිමෙඛලං;
තොයනිද්ධමනඤ්චාකා, මණිහීරකවාපියා.
කට්ඨුන්තනගරෙ චෙව, කාණවාපිංච බන්ධයි;
වෙජ්ජසාලඤ්ච කාරෙසි, චෙතියම්හි ගිරිම්හි සො.
බුද්ධගාමවිහාරඤ්ච, විහාරං මහියඞ්ගණං;
කූටතිස්ස විහාරඤ්ච, භොගගාමෙ න වඩ්ඪයි.
මණ්ඩලස්ස ගිරිස්සා’දා, විහාරස්ස සගාමකෙ;
උත්තරාළ්හෙ ච කාරෙසි, පාසාදං පරිවෙණකෙ.
මහාසෙනස්ස බුද්ධස්ස, ගාමං දත්වාන රක්ඛකෙ;
දාසි සොබ්භවිහාරෙ ච, කාරෙසි පටිමාඝරං.
බොධිසත්තෙ ච වඩ්ඪෙසි, පාසාදෙ මණිමෙඛලෙ;
සීලාමයමුනින්දස්ස, ජිණ්ණගෙහම්පි කාරයි.
රාජ තං බොධිසත්තඤ්ච, සඝරං තත්ථ සන්නහි;
ආලවාලං දුමින්දස්ස, ගන්ධිත්වා කා මහාමහං.
ලිඛිත්වා හෙමපට්ටම්හි, සබ්බරතනසුත්තකං;
මහාපූජමකා තස්ස, අභිධම්මං කථාපයි.
ආනන්දපටිමං නෙත්වා, පුරං කත්වා පදක්ඛිණං;
පරිත්තං භික්ඛුසඞ්ඝෙන, භණාපෙත්වා යථාවිධිං.
පරිත්තොදකසෙකෙන, ජනං කත්වා නිරාතුරං;
රාජා රොගභයං පෙවං, නීහරිත්ථ සදෙසතො.
අභිසෙකං ගහෙත්වාන, හෙමවාලුක චෙතියෙ;
අනුසංවච්ඡරං කාතුං, තං චාරිත්තං ලිඛාපයි.
අදා මාසස්ස චතූසු, උපොසථදිනෙසු සො;
චතුන්නඤ්ච සහස්සානං, වත්ථදානං සභත්තකං.
වෙසාඛකීළං ¶ කීළිත්ථ, සද්ධිං දුග්ගතකෙහි සො;
අන්නං පානඤ්ච වත්ථඤ්ච, තෙසං දත්වා යථාරුචිං.
භික්ඛුසඞ්ඝස්ස දීපම්හි, නිච්චදානං පවත්තයි;
සන්තප්පෙසි ච දානෙන, කපණද්ධිකවණිබ්බකෙ.
තස්ස රඤ්ඤො මහෙසී ච, සඞ්ඝනාමා අකාරයි;
පබ්බතං සඞ්ඝසෙනව්හං, සභොගමභයුත්තරෙ.
නීලචූළාමණිඤ්චාකා, සිලාමය මහෙසිනො;
පූජං සබ්බොපහාරෙහි, කාසි සත්ථුස්ස සබ්බදා.
තස්ස සෙනාපතිචා’කා, සෙනසෙනාපතිව්හයං;
පරිවෙණං මහාභොගං, සූරො තුට්ඨකනාමකො.
එවං සපරිසො කත්වා, සපුඤ්ඤානි මහායසො;
පඤ්චතිංසතිමෙ වස්සෙ, දෙවලොකමුපාගමි.
තතො තස්සා’නුජො ආසි, උදයො නාම ඛත්තියො;
රාජා සබ්බප්පයොගෙහි, හිතෙසී දීපවාසීනං.
හුත්වා සො සයං රාජා, කණිට්ඨං සකභාතරං;
මහාදීපාදඨානම්හි, ඨපි කස්සපනාමකං.
රාජා චින්තිය ඤාතීනං, කාතබ්බො සඞ්ගහො ඉති;
එවං කස්සපනාමස්ස, භාතුපුත්තස්ස ධීතරං.
යුවරාජස්ස තස්සා’කා, භරියං සෙනනාමිකං;
ධාරෙසිච සයං රාජා, අපරං තිස්සසව්හයං.
මහින්දස්සුපරාජස්ස, රාජධීතාය කිත්තියා;
පුත්තො කිත්තග්ගබොධීති, ආදිපාදො විබුද්ධිකො.
චොරො හුත්වා මහාරඤ්ඤො, නික්ඛමිත්වාන රත්තියං;
එකො අඤ්ඤාතවෙසෙන, සමුපාගම්මරොහණං.
ජනං හත්තගතං කත්වා, දෙසං සබ්බං විනාසිය;
ඝාතාපයිත්ථ තත්රට්ඨං, සො තං මාතුලමත්තනො.
තං සුත්වා ධරණීපාලො, තස්මිං’තීව පකුප්පිය;
ආනෙතුං තමුපායං සො, ගවෙසන්තො තථා තථා.
භාතුපුත්තං තමාහුය, යුවරාජං සකස්සපං;
ආමන්තෙසි මහාපුඤ්ඤ, සහායො හොති මෙ ඉති.
කිං ¶ මෙ කත්තබ්බ’මිච්චාහ, පච්චාහ ධරණීපති;
පුත්තො තව මහින්දො සො, වුද්ධිප්පත්තො මහාබලො.
ලාභී රොහණදෙසස්ස, මාතිතො පිතිතො’පි ච;
සූරො සබ්බසහො වීරො, කුසලො කතූපාසනො.
සඞ්ගාමයොග්ගො මතිමා, නිපුණො නයකොවිදො;
තං පෙසෙත්වා නයිස්සාම, පාපං මාතුලඝාතකං.
තං සුත්වා වචනං රඤ්ඤො, කස්සපො භාසි සාදරො;
දෙව දෙවෙන වුත්තො’හං, ගච්ඡෙය්යං කින්තු මෙ සුතො.
වංසො මෙ පාලිතො හොති, පසාදො ච තවාධිප;
තස්මා කාලමහාපෙත්වා, යං ඉච්ඡසි තථා කුරු.
සුත්වා අතීවසන්තුට්ඨො, නරින්දො තස්ස තං වචො;
මහන්ථං බලකායං සො, සබ්බසො පටියාදිය.
මහතා පරිහාරෙන, මහින්දං රාජපොතකං;
රක්ඛිතුං තං නියොජෙත්වා, වජිරග්ගඤ්ච නායකං.
තුච්ඡං විය පුරං කත්වා, සබ්බඤ්ච බලවාහනං;
සබ්බොපකරණඤ්චෙව, අනූනං තස්ස දාපිය.
සයං තමනුගච්ඡන්තො, පදසා’ව නරිස්සරො;
උය්යොජෙසි මහාපුඤ්ඤ, ගච්ඡ රුක්ඛාති මෙදිනිං.
මහින්දො සො මහින්දො’ව, දෙවසෙනා පුරක්ඛතො;
ගච්ඡන්තො සුවීරොචිත්ථ, දෙවාසුරමහාහවං.
තතො ගන්ත්වා න චිරෙන, ගුත්තසාලමුපාගමි;
තතො ජානපදා සබ්බෙ, මණ්ඩලිකා ච රට්ඨියා.
තෙන මාතුලඝාතෙන, පාපකෙන උපද්දුතා;
ගන්ත්වා තං පරිවාරෙසුං, ලද්ධො නො සාමිකො ඉති.
පතන්තො සොපි ඛො චොරො, ඨිතොව ගිරිමණ්ඩලෙ;
සබ්බං හත්ථගතං කත්වා, රාජභණ්ඩං මහග්ඝියං.
හත්ථී අස්සෙච ආදාය, ගන්ත්වා මලයමාරුහි;
මහින්දසෙනා ඝාතෙන්තී, තස්ස සෙනං තහිං තහිං.
පදානුපදමස්සෙ’ව, ගච්ඡන්ති හත්ථිඅස්සකෙ;
දිස්වා මලයපාදම්හි, ගහෙත්වා එත්ථ සො ඉති.
තත්ථ ¶ පාවිසිමද්දන්තී, සබ්බං මලයකානනං;
නදීයො පල්ලලෙ චෙව, කරොන්ති මග්ගසාදිසෙ.
බාලකොව ජනං දිස්වා, සබ්බං රතනමත්තනො;
කොධාභිභූතො ඡඩ්ඩෙසි, නදී සොබ්භතටාදීසු.
එකකොව නිලීයිත්ථ, වනෙ පබ්බතකන්දරෙ;
ගවෙසන්තො ජනො දිස්වා, තමග්ගහි නරාධම්මං.
තමාදාය’ති තුට්ඨො සො, ජනො ආගම්ම සජ්ජුකං;
මහින්දමුපදස්සෙසි, නිසින්නං ගුත්තසාලකෙ.
සො තං දිස්වා හසිත්වාන,
භුත්තො කිං රොහණො’’ඉති;
නායකස්ස නිය්යාතෙත්වා,
වජිරග්ගස්ස රාජිනො.
සයං සෙනං සමාදාය, මහාගාමමුපාගතො;
රොහණා ධිපති හුත්වා, කරොන්තො ලොකසඞ්ගහං.
ජනං පාකතිකං කත්වා, බාලකෙන විබාධිතං;
සාසනඤ්ච යථාඨානෙ, ඨපෙත්වා තෙන නාසිතං.
පුප්ඵාරාමෙ ඵලාරාමෙ, කාරයිත්වා තහිං තහිං;
වාපියො’පි ච ගණ්හිත්වා, බන්ධාපෙත්වා මහානදිං.
සබ්බත්ථ සුලභං කත්වා, සඞ්ඝස්ස චතුපච්චයං;
දුට්ඨෙ ච පටිබාහෙත්වා, මණ්ඩලීකෙ ච රට්ඨියෙ.
චොරෙ ච පරිසොධෙත්වා, කත්වා විගතකණ්ටකං;
තොසයන්තො’ඛිලං ලොකං, චාගභොගසමප්පිතො.
උපාසනියො විඤ්ඤූහි, සෙවනීයො ධනත්ථීහි;
කප්පරුක්ඛූපමො සබ්බ-යාචකානං හිතාවහො.
හිත්වා දුබ්බිනයං දෙසෙ, පුබ්බකෙහි පවත්තිතං;
සමාචරන්තො ධම්මඤ්ච, වාසං තත්ථෙව කප්පයි.
ආදිපාදං ගහෙත්වාන, වජිරග්ගො විනායකො;
අනුරාධමුපාගම්ම, රාජානමභිදස්සයි.
රාජාපි දිස්වා තං කුද්ධො, ඛිප්පං පක්ඛිප්ප චාරකෙ;
රක්ඛාවරණමස්සාදා, විහෙඨෙසි ච සබ්බාසො.
අදාසි ¶ ච තුලාභාරං, තික්ඛත්තුං සො මහායසො;
ථූපාරාමම්හි ථූපඤ්ච, හෙමපට්ටෙන ඡාදයි.
කත්වා තත්ථෙව පාසාදං, භික්ඛුසඞ්ඝං නිවාසිය;
විහාරෙ නගරෙ චෙව, පටිසඞ්ඛාසි ජිණ්ණකං.
කදම්බනදීයා’කාසි, නිජ්ඣරං ථිරබන්ධනං;
මරියාදං පවඩ්ඪෙසි, වාපියං සො මයෙත්තියං.
තත්ථ නිද්ධමනංචා’කා, අනුවස්සම්පි භූමිපො;
චීවරත්ථං සුවත්ථානි, සුසණ්හානි ච දාපයි.
දුබ්භික්ඛෙ දානසාලායො, කාරෙත්වා සබ්බපාණිනං;
මහාදානං පවත්තෙසි, මහාපාළිඤ්ච වඩ්ඪයි.
දධිභත්තඤ්ච දාපෙසි, නිකායත්තයවාසිනං;
නිච්චං දුග්ගතභත්තඤ්ච, යාගුඤ්චෙව සඛජ්ජකං.
එවමාදීනි පුඤ්ඤානි, කත්වා සොවග්ගියානි සො;
එකාදසහි වස්සෙහි, ගතො දෙවසහබ්යතං.
තස්සෙකාදසවස්සෙසු, විස්සට්ඨං සොණ්ණමෙව තු;
අහු සතසහස්සානං, තයො දසහි සම්මිතං.
සුදුජ්ජයං පණ්ඩුනරාධිරාජ,
මෙකොපරො රොහණමුග්ගදුග්ගං;
කත්වා’පි එතෙ සවසෙ නරින්දා,
සයං වසං මච්චුමුපාගමිංසු.
සුජනප්පසාද සංවෙගත්ථාය කතෙ මහාවංසෙ
රාජද්වයදීපනො නාම
එකූනපඤ්ඤාසතිමො පරිච්ඡෙදො.