📜
පඤ්චපඤ්ඤාසතිම පරිච්ඡෙද
රොහණාරාති විජයොනාම
ලොකනාමො චමූනාථො, මක්ඛකුද්රූසවාසිකො;
සච්චපටිඤ්ඤො ධීතිමා, චොළදප්පවිඝාතනො.
අභිභූය ජනෙ පත්වා, රජ්ජං රොහණමණ්ඩලෙ;
වසී කාජරගාමම්හි, චාරිත්තවිධිකොවිදො.
අහු තදා කිත්තිනාමො, රාජපුත්තො මහබ්බලො;
තස්ස වංසාදිසම්පත්තී, නුපුබ්බෙන පවුච්චතෙ.
සුතො කස්සපභූපස්ස, මාණනාමෙන විස්සුතො;
ආදිපාදො අහු ධීරො, සදාචාරවිභූසිතො.
තස්සා’ථ ¶ ජෙට්ඨකො භාතා, මාණවම්මො මහාමති;
ගොකණ්ණකසමීපට්ඨ-නදීතීරෙ නිසීදිය.
කතමන්තුපචාරො සො, යථාවිධිමසෙසතො;
අක්ඛමාලං ගහෙත්වාන, මන්තං ජප්පිතුමාරභි.
කුමාරො කිර භත්තග්ගෙ, පාතුරාසි සවාහනො;
සිඛණ්ඩි මුඛතුණ්ඩෙන, බලිපට්ටං විඛණ්ඩිය.
සච්ඡිද්දකෙ නාළිකෙර-කපාලෙ විච්චුනොදකෙ;
ලූඛෙ ජලමපස්සන්තො, ජපන්තස්ස මුඛංගතො.
තතො භාවිනිං සිද්ධි, මපෙක්ඛං නයනං සකං;
තස්සොපනෙසි, නිබ්භිජ්ජ, සොපි තං සහසාපිචි.
කුමාරො තස්ස සන්තුට්ඨො, කුමාරස්සාභිපත්ථිතං;
වරං පදාය නභසා, රාජමානො ගතො තතො.
භින්නෙකනයනං දිස්වා, සචිවාතං පරො දිසුං;
වරලාභං පකාසෙත්වා, සමස්සාසෙසි සො ජනෙ.
තතො සො සචිවාතස්ස, සන්තුට්ඨාරාධයිංසු තං;
අනුරාධපුරං පත්වා, භිසෙකො කාරියො ඉති.
අත්ථො කො මමරජ්ජෙන, විකලඞ්ගස්ස සම්පති;
තපොකම්මං කරිස්සාමි, පබ්බජ්ජමුපගම්මහං.
කණිට්ඨො මාණනාමො ච, ලඞ්කාරජ්ජං කමාගතං;
පාලෙතු ඉති සො රජ්ජං, සම්පත්තං සම්පටික්ඛිපි.
විඤ්ඤාතචිත්තසඤ්චාරා, සචිවා තස්ස සබ්බථා;
වත්තුමෙතං කණිට්ඨස්ස, පෙසෙසුං පුරිසෙ තදා.
සුත්වා තං සීඝමාගම්ම, පස්සිත්වා සකභාතරං;
පතිත්වා පාදමූලම්හි, බහුං කන්දිය රොදිය.
ජෙට්ඨෙන භාතරා සද්ධි-මනුරාධපුරං ගතො;
මකුටං තත්ථ ධාරෙසි, ජෙට්ඨචිත්තානුවත්තකො.
තතො’භයගිරිං ගන්ත්වා, පබ්බජ්ජං සකභාතුනො;
යත යො තත්ථ යාචිත්ථ, බහුමානපුරස්සරං.
තතො තෙ යතයො තස්ස, පබ්බජ්ජමුපසම්පදං;
අකංසු විකලඞ්ගස්ස, සික්ඛාපදනිරාදරා.
පරිවෙණමුත්තරොළ-මුළාරං ¶ තස්ස කාරිය;
කත්වා තං පරිවෙණස්ස, සාමිකං ධරණී පති.
භික්ඛූනං ඡසතං තත්ථ, විධාය තදධීනකං;
පරිහාරෙ අදා තස්ස, පෙස්සවග්ගෙ ච පඤ්ච සො.
සමප්පෙසි ච සො නානා-සිප්පකම්මවිචක්ඛණෙ;
ජනෙ චාකා තදායත්තෙ, සො දාඨාධාතුරක්ඛියෙ.
තස්සෙවාදකරා’හෙසුං, භික්ඛූ’භයගිරිම්හි තෙ;
රාජා ච ලොකං පාලෙසි, සම්මා තස්සානුසිට්ඨියා.
ජනා තබ්බංසජා කෙචි, තං රජ්ජනිරපෙක්ඛකා;
නිවසිංසු යථාකාමං, මහාසාමි පදංසිතා.
එතස්ස මාණවම්මස්ස, රඤ්ඤො ධම්මනයඤ්ඤුනො;
අග්ගබොධිකුමාරාදි-පුත්තනත්තුක්කමාගතෙ.
වංසෙ විසුද්ධෙ ජාතස්ස, භූපාලන්වයමුද්ධනි;
සමාසොළසකඞ්කායං, සම්මා රජ්ජානුසාසිනො.
මහීපස්ස මහින්දස්ස, දුවෙ මාකුලධීතරො;
දෙවලා ලොකිකා චාති, නාමතො විස්සුතා සුභා.
එතාසු ද්වීසු ධීතාසු, ලොකිකා මාතුලත්තජං;
පටිච්ච රාජතනයං, සුභං කස්සපනාමකං.
සා මොග්ගල්ලාන ලොකව්හෙ, පුත්තෙ ද්වෙ ලභි සොභනෙ;
තෙසු ජෙට්ඨසුතො ලොක-සාසනාධාරකොවිදො.
මහාසාමීති පඤ්ඤාතො, සඞ්ඝුපාසනපාලයො;
නෙකසාරගුණාවාසො, වාසං කප්පෙසි රොහණෙ.
දාඨොපතිස්ස රාජස්ස, නත්තා සුගතසාසනෙ;
පබ්බජ්ජූපගතො සද්ධො, ධුතවා සීලසංවුතො.
පහිතත්තො විචිත්තොසො, පන්තසෙනාසනෙ වසී;
ගුණං සබ්බත්ථ වණ්ණෙසුං, තස්මිං දෙවා පසීදිය.
ගුණං සුණිත්වා ලංකින්දො, තදා සබ්බත්ථ පත්ථටං;
උපසඞ්කම්ම තං නත්වා, කාතුමත්තානුසාසනං.
ආරාධයමනිච්ඡන්තං, යාචිත්වාන පුනප්පුනං;
ආනීය වාසයිත්වා තං, පාසාදෙ සාධුකාරිතෙ.
යතිස්සරස්ස ¶ වසතො, කත්ථ රාජාගුණප්පියො;
තස්සානුසිට්ඨිමග්ගට්ඨො, ලොකං ධම්මෙන පාලයි.
උද්දිස්සාරාධනං සම්මා, ලංකින්දෙන කතං තදා;
සෙලන්තරාභිනික්ඛම්ම, යතින්දො සො දයානුගො.
යතො භික්ඛූ සමූහෙත්වා, වාසං කප්පෙසි යත්ථ සො;
සෙලන්තරසමූහො’ති, වික්ඛ්යාතිං සො තතො ගතො.
තතො පට්ඨාය වාසෙත්වා, රත්තියං දෙවපල්ලියං;
දෙවතානුමතං භික්ඛුං, මූලඨානෙ ඨපෙන්ති හි.
මූලත්තමාවසන්තානං, යතීනමනුසාසනා;
ලංකිස්සරා පවත්තන්ති, පාලෙන්තා ලොකසාසනං.
තස්ස දාඨොපතිස්සස්ස, වංසජං රාජපුත්තකං;
බොධිං පටිච්ච තබ්බංසා, බුද්ධනාමා කුමාරිකා.
අලත්ථ ලොකිතං නාම, ධීතරං වරලක්ඛණං;
කාලෙන සා පදින්නා’සි, මොග්ගල්ලානස්ස ධීමතො.
සා තං පටිච්ච කිත්තිඤ්ච, මිත්තං නාම කුමාරිකං;
මහින්දං රක්ඛිතං චාපි, ලතිත්ථ චතුරො පජා.
අහු ජෙට්ඨසුතො ධීරො, වීරො තෙරසවස්සිකො;
කතහත්ථො විසෙසෙන, ධනුසිප්පම්හි සො තතො.
කථං ලඞ්කං ගහෙස්සාමි, දූරෙත්වා’රාති කණ්ටකං;
ඉති චින්තාපරොගාමෙ, මූලසාලව්හයෙ වසී.
එකො මහාබලො වීරො, බුද්ධරාජොති විස්සුතො;
විලොමවත්තී හුත්වාන, ලොකසෙනානිනො තදා.
පලාතො චුණ්ණසාලව්හං, ඛිප්පං ජනපදං තහිං;
කිත්තාදිකෙ ජනෙ නෙකෙ, වසෙ වත්තිය සබ්බථා.
සද්ධිං බන්ධූහි සඞ්ගාම-සූරෙහි බහුකෙහි සො;
මලයාචලපාදෙසු, වසී දුප්පසහො තදා.
තස්ස’න්තිකමුපාගම්ම, සංවච්ඡරිකනායකො;
සඞ්ඝො නාම කුමාරස්ස, සරූපං සාධුවං බ්රවි.
මහාසාමිස්ස තනයො, ජෙට්ඨො කිත්ති සනාමකො;
ධඤ්ඤලක්ඛණසම්පන්නො, සම්පන්නමතිවික්කමො.
ජම්බුදීපෙපි ¶ තං රජ්ජං, කත්තුමෙකාතපත්තකං;
සමත්ථොති විචින්තෙපි, ලඞ්කාදීපම්හි කා කථා.
තස්ස සො වචනං සුත්වා, සෙවිතබ්බො කුමාරකො;
ඉති නිච්ඡිය පෙසෙසි, කුමාරස්ස’න්තිකං ජනෙ.
සුණිත්වා සො වචො තෙසං, නිවත්තනභයා විභූ;
අජානහං පිතුන්නං සො, වීරො ධනුසහායකො.
ගෙහා නික්ඛම්ම පස්සන්තො, සුනිමිත්තානිනෙකධා;
අගාලහුං සරීවග්ග-පිට්ඨිගාමං මහාමති.
තහිං සො නිවසං වීරො, පෙසයිත්වා සසෙවකෙ;
විපක්ඛාධිට්ඨිතං ජෙසි, බොධිවාලව්හගාමකං.
තතො’භිමානී සෙනානී, සෙනං සො තත්ථ පෙසයි;
සා පරික්ඛිපතං ගාමං, සඞ්ගාමාය සමාරභී.
කුමාරො තෙහි යුජ්ඣන්තො, සුභටො පටුවික්කමො;
දිසාසු විකිරීසබ්බෙ, තුලං චණ්ඩොව මාළුතො.
චුණ්ණසාලං ජනපදං, ගන්ත්වා ඨානවිදූ තදා;
තහිං වසං වසෙකාසි, සබ්බං මලයමණ්ඩලං.
තදාපි සෙනං සෙනින්දො, පෙසෙත්වා අසකිං සකං;
අභිභූතිමසක්කොන්තො, කාතුං දුම්මනතං ගතො.
මක්ඛකුද්රුසවාසිස්ස, සචිපස්සාථ කිත්තිනො;
සුතො මහබ්බලො දෙව-මල්ලොති විදිතො තදා.
සහිතො බන්ධුමිත්තෙහි, බහූ රොහණවාසිනො;
සමාදායා’භිගන්ත්වාන, කුමාරං පස්සි සාදරො.
බන්ධිය ඡුරිකං ඡෙකො, සො පන්නරසවස්සිකො;
ආදිපාදපදං තත්ථ, සම්පාපුණි මහායසො.
තතො හිරඤ්ඤමලය, මුපාගම්ම මහබ්බලො;
තහිං රෙමුණසෙලම්හි, ඛන්ධාවාරං නිබන්ධයි.
තත්ථාපි සෙනං පෙසෙත්වා, සඞ්ගාමෙන්තො චමූපති;
අලද්ධවිජයො ඡන්දං, පුනයුද්ධෙ ජහිතතො.
ලොකනාමො චමූනාථො, ලොකං හිත්වා සකං තදා;
අහු වස්සම්හි ඡට්ඨෙසො, පරලොකපරායනො.
තදා ¶ කස්සපනාමෙකො, කෙසධාතුකනායකො;
ජනෙ’භිභූයවත්තෙසි, නීජාණං රොහණෙ තදා.
සුත්වා තං චොළසාමන්තො, පුළත්ථිනගරා තදා;
නික්ඛම්ම යුද්ධසනද්ධො, ගන්ත්වා කාජරගාමකං.
කෙසාධාතු තතො යුද්ධෙ, භින්දිත්වා දමිළං බලං;
රක්ඛපාසාණසීමායං, ඨපෙත්වා රක්ඛියෙ ජනෙ.
පටිලද්ධජයුද්දාමො, මහාසෙනා පුරක්ඛතො;
පුනරාගම්ම පාවෙක්ඛි, වීරො කාජරගාමකං.
තදාදිපාදො සුත්වාන, සබ්බං සුත්ථීරධාතුකො;
කෙසධාතුං නිඝාතෙතුං, බලං සන්නය්හි වෙගසා.
පවත්තිං තං සුණිත්වා සො, සාභිමානො භුසංතතො;
සමත්තං බලමාදාය, සිප්පත්ථලකමාගමා.
පඤ්චයොජනරට්ඨාදි-වාසිකෙසු බහූජනෙ;
සමාදාය සමාසන්නෙ, රාජපුත්තෙ සුදුජ්ජයෙ.
විරත්තතඤ්ච සො ඤත්වා, බහුන්නං රට්ඨවාසිනං;
දුක්කරං එත්ථ යුද්ධන්ති, ගතො සො ඛදිරඞ්ගණිං.
මහාසෙනාය භූපාල සුතො සොළසවස්සීකො;
ඛිප්පං වාපෙක්ඛි සො වීත-දරො කාජරගාමකං.
ඡම්මාසමනුභොත්වාන, රොහණං රුට්ඨමානසො;
කෙසධාතුකනාථොපි, සඞ්ගාමත්ථාය තත්ථගා.
රාජපුත්තස්ස සෙනා’ථ, වත්තෙන්ති සමරං ඛරං;
කෙසධාතුකනාථස්ස, සීසං ගණ්හි මහබ්බලා.
ආගම්ම සත්තරසවයං කුමාරො;
සබ්බත්ථ පත්ථටමහායසකිත්තිතෙජො;
සුමාදිනෙක විධියොගවිසෙසදක්ඛො;
ඛීණාරිකණ්ටකමකා’ඛිලරොහණං තං.
සුජනප්පසාදසංවෙගත්ථාය කතෙ මහාවංසෙ
රොහණාරාතිවිජයො නාම
පඤ්චපඤ්ඤාසතිමො පරිච්ඡෙදො.