📜

ඡපඤ්ඤාසතිම පරිච්ඡෙද

අනුරාධපුරාභිගමනො

1.

යුවරාජපදෙ ¶ තස්ස, ඨිතස්සා’ථ නයඤ්ඤුනො;

අහූ විජයබාහූති, නාමං සබ්බත්ථ පාකටං.

2.

මහාඤ්ඤණො නිජාණාය, තත්ථ භෙරිං චරාවිය;

ඨපෙන්තො සචිවෙ’නෙකෙ, පතිරූපෙ පදන්තරෙ.

3.

චොළානං මද්දනත්ථාය, රාජරට්ඨාධිවාසිනං;

චතුරො චතුරොපායෙ, යො ජයං තත්ථ සො වසී.

4.

චොළරාජා සුණිත්වා තං, පුළත්ථිනගරෙ ඨිතං;

සෙනාපතිම පෙසෙසි, දත්වාන බලවාහනං.

5.

සෙනින්දං කාජරග්ගාම-සමීපං සමුපාගතං;

දුප්පසය්හං විදිත්වාන, ගිරිදුග්ගමගා තතො.

6.

සෙනින්දො කාජරග්ගාමං, විලුම්පිත්වාන වෙගසා;

තත්ථ වත්ථුමසක්කොන්තො, සදෙසං පුන රාගමි.

7.

තතො මහාදිපාදො’පි, ආගම්ම මලයා ලහුං;

මහතා බලකායෙන, සිප්පත්ථලකමාවසි.

8.

රාජා රාමඤ්ඤවිසයෙ, රාජිනො සන්තිකං ජනෙ;

පෙසෙසි බහුකෙසාරං, ධනජාතඤ්ච’නප්පකං.

9.

විචිත්තවත්ථකප්පූර-චන්දනාදීහි වත්ථූහි;

පරිපුණ්ණා ච නාවායො, නෙකාතිත්ථෙ සමොසටා.

10.

ධනජා තෙහි නෙකෙහි, කරොන්තො භටසඞ්ගහං;

තතො තම්බලගාමම්හි, නිවසිත්ථ මහබ්බලො.

11.

අඤ්ඤමඤ්ඤවිරුද්ධත්තා, රාජාරට්ඨාධිවාසිනො;

උපග්ගම්ම ජනා සබ්බෙ, කරං නො දෙන්ති සබ්බසො.

12.

විපක්ඛාචොළරාජස්ස, භින්දන්තා’ණං මදුද්ධතා;

ආයුත්තකෙ විහිංසෙන්තො, යථාකාමං චරන්ති ච.

13.

තං ¶ සුත්වා චොළභූපාලො, සම්පකොපවසීකතො;

සෙනං මහන්තිං දත්වාන, පෙසෙසි සචිවං නිජං.

14.

මහාතිත්ථෙ’වහිණ්ණො සො, තත්ථ තත්ථ බහූජනෙ;

ඝාතෙන්තො සවසෙ කත්වා, රාජාරට්ඨාධිවාසිනො.

15.

අනුක්කමෙන ගන්ත්වාන, ඛරාණො රොහණං තදා;

අජ්ඣොත්ථරි සසෙනො ස, භින්නො වෙලොවසාගරො.

16.

රඤ්ඤො පච්චත්ථිකා හුත්වා, රවිදෙවචලව්හයා;

උභො දමිළසෙනින්ද-වසං යාතා මහබ්බලා.

17.

මහාපක්ඛබලොපෙතෙ, තෙ පස්සිය චමූපති;

රොහණං සකලං ඛිප්පං, මඤ්ඤිත්ථ සකහත්ථගං.

18.

එකාදසම්හි සො වස්සෙ, රාජා චොළාභිභූතියා;

පලුට්ඨපබ්බතෙ දුග්ගං, පවිධාය තහිං වසී.

19.

චොළසෙනා තදාසෙලං, සමන්තා සම්පරික්ඛිපි;

තත්ථො’භයෙසං සෙනාන-මහූ භිංසනකං රණං.

20.

රඤ්ඤො භටා විනාසෙත්වා, සබ්බං තං දමිළං බලං;

පලායන්තං මහාචොළ-සාමන්තඤ්චානුබන්ධිය.

21.

ගහෙත්වාන සිරං තස්ස, ගාමස්මිං තම්බවිට්ඨිකෙ

සද්ධිං වාහනයානෙහි, සාරභූතධනෙහි ච.

22.

තහිං තං සකලං භණ්ඩං, නෙත්වා රඤ්ඤො පදස්සිය;

පුළත්ථිනගරං ගන්තුං, කාලො ඉති සමබ්රවුං.

23.

මහීපාලොපි තං සුත්වා, සචිවානං වචො තදා;

මහතා බලකායෙන, පුලත්ථිනගරං ගතො.

24.

පවත්තිමෙතං සකලං, සුත්වා චොළනරිස්සරො;

තිබ්බකොපවසංයාතො, භූපාලගහණත්ථිකො.

25.

සාමං ඛිප්පං සමාගම්ම, වීරො සාගරපට්ටනං;

භිය්යොපි මහතිං සෙනං, ලංකාදීපමපෙසයී.

26.

තං විජානිය භූමින්දො, සෙනින්දං පෙසයී සකං;

බලං මහන්තං දත්වාන, චොළසෙනාය යුජ්ඣිතුං.

27.

ගච්ඡමානො චමූනාථො, සො’නුරාධපුරන්තිකෙ;

සද්ධිං දමිළසෙනාය, වත්තෙසි තුමුලං රණං.

28.

පතිංසු ¶ තස්මිං සඞ්ගාමෙ, භූපාලස්ස නරා බහූ;

භිය්යොපි දමිළායත්තා, ජාතා තං රට්ඨවාසිනො.

29.

විහාය ධරණීපාලො, පුලත්ථිනගරං තදා;

විල්ලිකාබාණකං රට්ඨං, සම්පාපුණිය වෙගසා.

30.

නිහච්චාමච්චයුගලං, තං රට්ඨාධිට්ඨිතං තදා;

තහිං වාසමකප්පෙසි, සභටෙ සන්නිපාතයං.

31.

අත්තානමනුබන්ධන්තං, සුත්වා චොළචමූපතිං;

ගන්ත්වා වාතගිරිං නාම, සමයඤ්ඤූ සිලුච්චයං.

32.

උපච්චකාය සෙලස්ස, තත්ථ දුග්ගං නිවෙසිය;

රණං කරොන්තො තෙමාසං, දමිළෙ පටිබාහයි.

33.

කෙසධාතුකනාථස්ස, මාරිතස්ස පුරාරණෙ;

භාතා කණිට්ඨො සම්පත්ත, මහාපක්ඛබලො තදා.

34.

මාරණං සකභාතුස්ස, සරන්තො රුට්ඨමානසො;

සකලං පරිවත්තෙසි, ගුත්තහාලකමණ්ඩලං.

35.

අථො ලංකිස්සරො තත්ථ, ඛිප්පං ගන්ත්වා මහබ්බලො;

ඨානෙ මච්චුත්ථලෙ නාම, ඛන්ධාවාරං නිබන්ධිය.

36.

ඛදිරඞ්ගණිදුග්ගම්හා, පලාපෙත්වාන තං රණෙ;

ඨානා කුබුලගල්ලා ච, යුජ්ඣන්තො තං පලාපයි.

37.

විහාය පුත්තදාරාදි-සබ්බං නෙකධනං බලං;

පලායමානො සො රට්ඨං, චොළායත්ත මගාලහුං.

38.

තදා නරිස්සරො තත, තස්ස සබ්බං සමාදිය;

ගන්ත්වා තම්බලගාමම්හි, නවං දුග්ගං නිවෙසිය.

39.

අනුක්කමෙන ගන්ත්වාන, මහානාගහුලව්හයෙ;

පුරෙවසී සුසජ්ජෙන්තො, බලං චොළෙහි යුජ්ඣිතුං.

40.

තතො රාජා සමව්හාය, සචීවෙ ද්වෙ මහබ්බලෙ;

පෙසෙසි දික්ඛිණං පස්සං, වසං නෙතුං තහිං ජනෙ.

41.

සම්පෙසෙසි මහාමච්ච-යුගලං කක්ඛලං විභූ;

චොළදප්පවිනාසාය, තතො වෙලා මහාපථෙ.

42.

පෙසිතා දක්ඛිණං පස්සං, අමච්චා’මෙ මහබ්බලා;

මුහුන්නරුග්ගමදුග්ගං, බදළත්ථලමෙව ච.

43.

වාපීනගරදුග්ගඤ්ච ¶ , බුද්ධගාමකමෙව ච;

තිලගුල්ලං මහාගල්ලං, මණ්ඩගල්ලකමෙව ච.

44.

අනුරාධපුරඤ්චාති, ගහෙත්වාන කමෙන තෙ;

වත්තෙන්තා සවසෙ රට්ඨං, මහාතිත්ථමුපාගතා.

45.

පෙසිතා සචිවාද්වෙතු, තතො වෙලා මහාපථෙ;

විලුම්පන්තා ඡගාමාදි-ඛන්ධාවාරෙ තහිං තහිං.

46.

පුලත්ථිනගරාසන්නං, කමෙනා’ගම්ම පෙසයුං;

දූතෙ රාජන්තිකඛිප්ප-මාගන්තුං වට්ටතීතිහ.

47.

දිසාසා ද්වීසු යානෙහි, සචිවෙහි පවත්තිතං;

වික්කමාති සයං සුත්වා, කාලඤ්ඤූ සො මහීපහි.

48.

සීඝං සන්නය්හ සෙනඞ්ගං, සමග්ගං විදිකොවිදො;

උම්මූලනායචොළානං, පුරාතම්හා’භිනික්ඛමි.

49.

ගච්ඡං ගඞ්ගාය මහිය-ඞ්ගණථූපන්තිකෙ විභූ;

සෙනානිවෙසං කාරෙත්වා කඤ්චිකාලං තහිං වසී.

50.

කමෙනාගම්ම ඨානඤ්ඤූ, පුළත්ථිනගරන්තිකෙ;

බන්ධාපෙසි මහාවීරො, ඛන්ධාවාරං ථිරං වරං.

51.

තත්ථ තත්ථ ඨිතා සූරා, චොළා යෙ කක්ඛලා’ඛිලා;

පුලත්ථිනගරෙ යුද්ධං, කාතුං සන්නිපතිංසු තෙ.

52.

නික්ඛම්ම නගරා ගන්ත්වා, චොළා බහි මහාරණං;

කත්වා පරාජිතා භීතා, පවිස්ස නගරං සකං.

53.

ගුත්තා සෙසපුරද්වාරා, ගොපුරට්ටාලනිස්සිතා;

මහාහවං බහුස්සාහා, පවත්තෙසුං භයාවහං.

54.

දියඩ්ඪමාසං යුජ්ඣන්ති, නගරං තමුපරුන්ධිය;

සාධෙතුං නෙවසා’සක්ඛි, භූපාලස්ස මහාචමූ.

55.

මහාරඤ්ඤො මහාවීරා, මහාසූරා මහබ්බලා;

මහාභටා මහාමානා, රවිදෙවචලාදයො.

56.

උල්ලඞ්ඝිත්වාන පාකාරං, පවිස්ස සහසා පුරං;

ඛණෙන දමිළෙ සබ්බෙ, මූලඝච්චමඝාතයුං.

57.

එවං ලද්ධජයො රාජා, තදා විජයබාහුසො;

චරාපෙසි නිජාණාය, භෙරිං භූරිමතිපුරෙ.

58.

තං ¶ සුත්වා සකසෙනාය, විනාසං චොළභූපති;

සීහළා බලවන්තොති, භිය්යො සෙනං න පාහිණි.

59.

වීරො අසෙසනිහතුද්ධට චොළසෙට්ඨො;

විඤ්ඤූ සුසාධුට්ඨපිතාඛිලරාජරට්ඨො;

ඉට්ඨන්නුරාධපුරසෙට්ඨමතීව හට්ඨො;

වස්සම්හි පඤ්චදසමෙ ගමි රාජසෙට්ඨො.

සුජනප්පසාදසංවෙගත්ථාය කතෙ මහාවංසෙ

අනුරාධපුරාභිගමනො නාම

ඡප්පඤ්ඤාසතිමො පරිච්ඡෙදො