📜

එකසට්ඨිම පරිච්ඡෙද

සඞ්ඛත්ථලිපුරාභිගමනො

1.

සුත්වා ද්වෙ භාතරො අඤ්ඤෙ, ජෙට්ඨස්සො පරතිංසදා;

ඛිප්පං සරට්ඨා ආගම්ම, කාරෙසුං අන්තිමං විධිං.

2.

අථ කිත්තිසිරිමෙඝො, රට්ඨං ජෙට්ඨස්ස භාතුනො;

අත්තාධීනං කරිත්වාන, ආමන්තිය කණිට්ඨකං.

3.

දත්වා රට්ඨද්වයං අඤ්ඤං, වත්ථුං තත්ථෙව ආදිසි;

සො’පි ජෙට්ඨස්ස භාතුස්ස, වචනං සම්පටිච්ඡිය.

4.

සමාදාය කුමාරඤ්ච, දෙවිඤ්ච රතනාවලිං;

ධීතරො ද්වෙ ච ගන්තාන, මහා නාමහුලං පුරං.

5.

සමග්ගා නිවසං තත්ථ, කුමාරස්ස සිඛාමහං;

කාරෙත්වා පරිහාරෙන, වඩ්ඪෙසි මහතා සදා.

6.

තතො සො දෙවියා ජෙට්ඨං-ධීතරං මිත්තනාමිකං;

දාතුකාමො සපුත්තස්ස, සහාමච්චෙහි මන්තයි.

7.

කාලිඞ්ගන්වයසම්භූතා, පායෙනඛලු භූමිපා;

සාමිභාවං ගතා අස්මිං, ලඞ්කාදීපම්හී භූයසො.

8.

කාලිඞ්ගගොත්ත සම්භූත, ගජබාහුස්ස දාතවෙ;

ගූළරූපෙන දෙවී’යං, යදි පෙසෙය්ය ධීතරං.

9.

භිය්යො ¶ විවාහසම්බද්ධො, බලවා සො භවිස්සති;

මය්හං එසො නිරාලම්බො, පුත්තො හෙහීති සබ්බථා.

10.

තස්මා මෙ සුනූනො එසා, දාතුං යුත්තා කුමාරිකා;

එවං සති වතම්හාකං, වඩ්ඪියෙ’ව සියා ‘‘ඉති’’.

11.

දෙවීපි සුත්වා තං සබ්බ-මාදිච්චන්වය මණ්ඩනා;

සබ්බථා තමනිච්ඡන්ති, ඉදමාහ මහීපතිං.

12.

ඝාතෙත්වා සකලෙ යක්ඛෙ, කුමාරො විජයව්හයො;

ලංකාදීපමිමං’කාසි, මනුස්සාවාසකං සදා.

13.

තතො පභුති අම්හාකං, ඝටෙසුං විජයන්වයං;

කාලිඞ්ගවංසජෙහෙව, සම්බන්ධං කත්ව පුබ්බකං.

14.

අඤ්ඤභූපාල සම්බන්ධො, සුතපුබ්බො පිනත්ථිනො;

සොමවංස සමුම්භූතෙ, ඨපෙත්වා ධරණිස්සරෙ.

15.

තුය්හං ජාතොති අම්හාකං, සම්බන්ධො සො කථං සියා;

අරියන්වය සම්භූත, කුමාරෙන සහාමුනා.

16.

එවං සො දෙවියා තාය, නෙකසො වාරයන්තියා;

පසය්හසක පුත්ථස්ස, තං කුමාරිමදාපයි.

17.

සො අනෙකගුණොදාර- භරියානුගතො තතො;

රඤ්ජයන්තො ජනෙ සබ්බෙ, ජනකසන්තිකෙ වසි.

18.

එකවීසතිං වස්සානි, රජ්ජං වික්කම බාහුසො;

අනුභොත්වා යථාකම්මං, කායභෙදා ගතො පරං.

19.

තතො ගජභුජො ඨිතං, සම්පන්නබලවාහනං;

රජ්ජං හත්ථගතං කත්වා, පුලත්තිනගරෙ වසී.

20.

තතො කිත්තිසිරීමෙඝ, සිරීවල්ලභ භූමිපා;

වුත්තන්ත මෙතං විඤ්ඤාය, එවං සමනුචින්තයුං.

21.

තස්ස වික්කම බාහුස්ස, වුද්ධභාවෙන නෙකධා;

මූලරජ්ජාධිපච්චං තං, අම්මං නින්දාකරං න හි.

22.

තදත්ථජස්ස බාලස්ස, මූලරජ්ජං පසාසනො;

උපෙක්ඛණං පනම්හාකං, නෙවානුච්ඡවිකං වත.

23.

තෙ සොයාව සරජ්ජම්හි, බද්ධමූලො භවිස්සති;

පසය්හ තාව තං රජ්ජං, වට්ටති ගණ්හිතුං ඉති.

24.

වෙලක්කාර ¶ බලං සබ්බං, භින්දිංසු ධන දානතො;

ඨපෙත්වා සෙවකෙ කෙචි, තස්සබ්භන්තරිකෙ තදා.

25.

ගජබාහු මහීපාලෙ, විරත්තා රට්ඨවාසිනො;

උභින්නං රාජූනං දූතෙ, පෙසයුං නෙකසො තතො.

26.

රජ්ජං සාධෙත්වා දස්සාම, එකීභූතා මයං පන;

උපත්ථම්භකභාවො’ව, කාතබ්බො කෙවලං ඉති.

27.

තතො ද්වෙ භාතුකා සෙනං, සකං සන්නය්හ වෙගසා;

උභතො මුඛතො තස්ස, රට්ඨමජ්ඣමුපාගමුං.

28.

පහිණිංසු ච තෙ දූතෙ, තතො ගජබොහුව්හයො;

භූමිපාලො නිජාමච්චෙ, සන්නිපාතිය මන්තයි.

29.

වෙළක්කාරබලං සබ්බ-මුජුපච්චත්තිකං අහු;

රාජානො ද්වෙ ච නො රට්ඨං, සඞ්ගාමත්ථමුපාගතා.

30.

පඨමං තෙසු පක්ඛස්ස, එකස්ස බලිනො භුසං;

මුඛභඞ්ගෙ කතෙ ඛිප්පං, තතො අඤ්ඤෙ සුසාධියා.

31.

ඉති නිච්ඡිය සෙනඞ්ගං, සබ්බමාදාය අත්තනො;

සිරිවල්ලභරාජාභි-මුඛං යුද්ධා’යුපාගමි.

32.

සිරිවල්ලභරාජාපි, සඞ්ගාම මහිභිංසනං;

පාතො පට්ඨාය සායන්හ-කාලං යාව පවත්තයං.

33.

අසක්කුණන්තො’භිභවං, විධාතුං තස්ස කඤ්චිපි;

තතොව සො නිවත්තිත්වා, සකං රට්ඨං ගතො ලහුං.

34.

ගජබාහුස්සගොකණ්ණ-සචිවෙන පරාජිතො;

අගා රට්ඨං සකං කිත්ති-සිරිමෙඝො’පි භූපති.

35.

ගජබාහුනරින්දොපි, සඞ්ගාමෙ තම්හි කිඤ්චිපි;

පරිහානිමසම්පත්තො, පුනා’ගම්ම පුරන්තිකං.

36.

බලනාථෙ විනිග්ගය්හ, සාපරාධෙ බහූ බලී;

රට්ඨං වූපසමෙත්වාන, පාවෙක්ඛි නගරං සකං.

37.

රට්ඨෙ සකෙ සකෙයෙව, තතො පභූති භූමිපා;

අඤ්ඤොඤ්ඤමිත්තෙ සම්බන්ධං, විධාය විහරිංසු තෙ.

38.

තතො පරක්කමභුජො, ධරණී පාලනන්දනො;

මෙධාවීනෙකසිප්පෙසු, සික්ඛමානො සුසාධුකං.

39.

විචාරක්ඛමපඤ්ඤත්තා ¶ , කිච්චා කිච්චෙසු නෙකසො;

අච්චුළාරාසයත්තා ච, මහාභාගත්තනෙන ච.

40.

අත්තනො මාතුභගිනී, සහවාස සුඛම්හි ච;

අලග්ගමානසොනෙක, බලාකීළාරසෙසු ච.

41.

සූරභාවාදිසංයුත්තා, රාජපුත්තා තු මාදිසා;

පච්චන්තෙ ඊදිසෙ දෙසෙ, කථං නාම වසිස්සරෙ.

42.

ජාතදෙසඤ්ච මෙ දානි, යුවරාජපභොගියං;

ගමිස්සාමීති නිග්ගඤ්ඡි, තම්හා පරිජනත්ථිතො.

43.

කමෙන සන්තිකං සඞ්ඛ-නායකත්ථලිසඤ්ඤිනො;

ගාමස්සාගා අහිං කිත්ති-සිරිමෙඝො නිසම්ම තං.

44.

අභාවා රජ්ජ දායාද-සමානස්ස’ත්රජස්ස මෙ;

එකාකී’හන්ති යො චිත්ත-සන්තාපො සන්තතං ගතො.

45.

ජෙට්ඨංව භාතරං මය්හං, තං දෙහපටිබිම්බකං;

දට්ඨුං මෙ සත්තතං පුඤ්ඤං, මහන්තමුදිතංතිච.

46.

පාමුජ්ජවෙගවසගො, නගරං තං මනොහරං;

අලඞ්කාරා පයිත්වාන, තොරණාදීහි නෙකධා.

47.

ගන්ත්වා පටිපථංයෙව, බලොඝපරිවාරිතො;

නරින්දො තිථිනක්ඛත්ත-විසෙසෙ සුභසම්මතෙ.

48.

අනඤ්ඤසාධාරණතං, සම්පත්තෙහි ගුණෙහි ච;

ලක්ඛණෙහි ච සබ්බෙහි, කල්යාණෙයි සුසංයුතං.

49.

දිස්වා කුමාරං සන්තුට්ඨො, ආලිඞ්ගිත්වාන පෙමතො;

උරෙ කත්වාන චුම්බිත්වා, මත්ථකම්හි පුනප්පුනං.

50.

ජනස්ස බලතො තස්ස, පස්සතො ලොචනෙහි සො;

සන්තොස අස්සුධාරායො, වස්සාපෙන්තො නිරන්තරං.

51.

මනුඤ්ඤමෙක මාරුය්හ, වාහනං සහ සූනුනා;

භෙරිනි දෙන පූරෙන්තො, දිසා දස සමන්තතො.

52.

පවිසිත්වා පුරං තත්ථ, අලඞ්කාරෙ මනොරමෙ;

දස්සයන්තො සපුත්තස්ස, පාවිසි රාජමන්දිරං.

53.

ලද්ධා ¶ තතො කඤ්චුකී-සුපකාර,

වගාදිනෙකෙ පරිචාරකෙ සො;

නානාගුණා රාධිතමානසස්ස,

වසීසකාසෙ පිතුනො සුඛෙන.

සුජනප්පසාදසංවෙගත්ථාය කතෙ මහාවංසෙ

සඞ්ඛත්ථලිපුරාභිගමනො නාම

එකසට්ඨිමො පරිච්ඡෙදො.