📜
නවම පරිච්ඡෙද
අභයාභිසෙකො
මහෙසී ජනයී පුත්තෙ, දස එකඤ්ච ධීතරං;
සබ්බජෙට්ඨො’භයො නාම, චිත්තානාම කනිට්ඨිකා.
පස්සිත්වා තං වියාකංසු, බ්රාහ්මණා මන්තපාරගා;
‘‘රජ්ජහෙතු සුතො අස්සා, ඝාතයිස්සති මාතුලෙ’’.
ඝාතෙස්සාමි කනිට්ඨින්ති, නිච්ඡිතෙ භාතරා’භයො;
වාරෙසි කාලෙ වාසෙසුං, ගෙහං තං එකථුණිකෙ.
රඤ්ඤො ච සිරිගබ්භෙන, තස්ස ද්වාරමකාරයුං;
අන්තො ඨපෙසුං එකඤ්ච, දාසිං නරසතං බහි.
රූපෙනු’ම්මාදයී නරෙ, දිට්ඨමත්තාව සායතො;
තතො උම්මාදචිත්තා’ති, නාමං සොපපදං ලභි.
සුත්වාන ලංකාගමනං, භද්දකච්චානදෙවියා;
මාතරා චොදිතා පුත්තා, ඨපෙත්වෙ’කඤ්ච ආගමුං.
දිස්වාන තෙ පණ්ඩුවාසු-දෙවං ලඞ්කින්දමාගතා;
දිස්වාන තං කනිට්ඨිඤ්ච, රොදිත්වා සහ තාය ච.
රඤ්ඤා සුකතසක්කාරා, රඤ්ඤො’නුඤ්ඤාය චාරිකං;
චරිංසු ලංකාදීපම්හි, නිවසුඤ්ච යථාරුචිං.
රාමෙන ¶ වුසිතඨානං, රාමගොණන්ති වුච්චති;
උරුවෙලා’නුරාධානං, නිවාසා ච තථා තථා.
තථා විජිතදීඝායු-රොහණානං නිවාසකා;
විජිතගාමො දීඝායු-රොහණන්ති ච වුච්චති.
කාරෙසි අනුරාධො සො, වාපිං දක්ඛිණතො තතො;
කාරාපෙත්වා රාජගෙහං, තත්ථ වාසමකප්පයී.
මහාරාජා පණ්ඩුවාසු-දෙවො ජට්ඨසුතං සකං;
අභයං උපරජ්ජම්හි, කාලෙ සමභිසෙචයි.
දීඝායුස්ස කුමාරස්ස, තනයො දීඝගාමණි;
සුත්වා උම්මාදචිත්තං තං, තස්සං ජාතකුතූහලො.
ගහෙත්වා’පතිස්ස ගාමං, තං අපස්සි මනුජාධිපං;
අදා සහොපරාජෙන, රාජුපට්ඨානමස්සසො.
ගවක්ඛාභිමුඛට්ඨානෙ, තං උපෙච්ච ඨිතං තුසා;
දිස්වාන ගාමිණිං චිත්තා, රත්තචිත්තා’හ දාසිකං.
‘‘කො එසො’’ති තතො සුත්වා,
මාතුලස්ස සුතොඉති;
දාසිං තත්ථ නියොජෙසි,
සද්ධිංකත්වාන සො තතො.
ගවක්ඛම්හි ඩසාපෙත්වා, රත්තිං කක්කටයන්තකං;
ආරුය්හ ඡින්දයිත්වාන, කවාටං තෙන පාවිසි.
තාය සද්ධිං වසිත්වාන, පච්චූසෙයෙව නික්ඛමි;
එවං නිච්චං වසී තත්ථ, ඡිද්දාභාවා අපාකටො.
සා තෙන අග්ගහී ගබ්භං, ගබ්භෙ පරිණතෙ තතො;
මාතු ආරොචයී දාසී, මාතා පුච්ඡිය ධීතරං.
රඤ්ඤො ආරොචයී රාජා, අමන්තෙත්වා සුතෙ’බ්රහ්මා;
පොසියොසො’පි අම්හෙහි, දෙව තස්සෙව තං ඉති.
පුත්තො චෙ මාරයිස්සාම, ත’න්ති තස්ස අදංසු තං;
සා සූතිකාලසම්පත්තෙ, සූති ගෙහඤ්ච පාවිසිං.
සඞ්කිත්වා ¶ ගොපකං චිත්තං, කාලවෙලඤ්ච දාසකං;
තස්මිං කම්මෙ නිස්සායා’ති, ගාමණි පරිචාරකෙ.
තෙ පටිඤ්ඤං අදෙන්තෙ තෙ, රාජපුත්තා අඝාතයුං;
යක්ඛා හුත්වාන රක්ඛිංසු, උභො ගබ්භෙ කුමාරකං.
අඤ්ඤං උපවිජඤ්ඤං සා, සල්ලක්ඛා පෙසි දාසියා;
චිත්තා සා ජනයී පුත්තං, සා ඉත්ථි පන ධීතරං.
චිත්තං සහස්සං දාපෙත්වා, තස්සා පුත්තං සකම්පි ච;
ආණාපෙත්වා ධීතරං තං, නිපජ්ජාපෙසි සන්තිකෙ.
ධීතා ලද්ධා’ති සුත්වාන, තුට්ඨා රාජසුතා අහුං;
මාතා ච මාතුමාතා ච, උභො පන කුමාරකං.
මාතාමහස්ස නාමඤ්ච, ජෙට්ඨස්ස මාතුලස්ස ච;
එකං කත්වා තමකරුං, පණ්ඩුකාභයනාමකං.
ලංකා පාලො පණ්ඩුවාසු-දෙවො රජ්ජමකාරයි;
තිංස වස්සම්හි ජාතම්හි, මතො සො පණ්ඩුකාභයෙ.
තස්මිං මතස්මිං මනුජාධිපස්මිං,
සබ්බෙ සමාගම්ම නරින්දපුත්තා;
තස්සාභයස්සාභයදස්ස භාතු,
රාජාභිසෙකං අකරුං උළාරාති.
සුජනප්පසාද සංවෙගත්ථාය කතෙ මහාවංසෙ
අභයාභිසෙකො නාම
නවමො පරිච්ඡෙදො.