📜

නමො තස්ස භගවතො අරහතො සම්මාසම්බුද්ධස්ස

සද්දනීතිප්පකරණං (පදමාලා)

ගන්ථාරම්භකථා

ධීරෙහි ¶ මග්ගනායෙන, යෙන බුද්ධෙන දෙසිතං;

සිතං ධම්මමිධඤ්ඤාය, ඤායතෙ අමතං පදං.

තං නමිත්වා මහාවීරං, සබ්බඤ්ඤුං ලොකනායකං;

මහාකාරුණිකං සෙට්ඨං, විසුද්ධං සුද්ධිදායකං.

සද්ධම්මඤ්චස්ස පූජෙත්වා, සුද්ධං සන්තමසඞ්ඛතං;

අතක්කාවචරං සුට්ඨු, විභත්තං මධුරං සිවං.

සඞ්ඝස්ස ච’ඤ්ජලිං කත්වා, පුඤ්ඤක්ඛෙත්තස්ස තාදිනො;

සීලසමාධිපඤ්ඤාදි-විසුද්ධගුණජොතිනො.

නමස්සනාදිපුඤ්ඤස්ස, කතස්ස රතනත්තයෙ;

තෙජසාහං පහන්ත්වාන, අන්තරායෙ අසෙසතො.

ලොකනීතිවියත්තස්ස, සත්ථු සද්ධම්මනීතිනො;

සාසනත්ථං පවක්ඛාමි, සද්දනීතිමනාකුලං.

ආසවක්ඛයලාභෙන, හොති සාසනසම්පදා;

ආසවක්ඛයලාභො ච, සච්චාධිගමහෙතුකො.

සච්චාධිගමනං ¶ තඤ්ච, පටිපත්තිස්සිතං මතං;

පටිපත්ති ච සා කාමං, පරියත්තිපරායණා.

පරියත්තාභියුත්තානං, විදිත්වා සද්දලක්ඛණං;

යස්මා න හොති සම්මොහො, අක්ඛරෙසු පදෙසු ච.

යස්මා චාමොහභාවෙන, අක්ඛරෙසු පදෙසු ච;

පාළියත්ථං විජානන්ති, විඤ්ඤූ සුගතසාසනෙ.

පාළියත්ථාවබොධෙන, යොනිසො සත්ථුසාසනෙ;

සප්පඤ්ඤා පටිපජ්ජන්ති, පටිපත්තිමතන්දිකා.

යොනිසො පටිපජ්ජිත්වා, ධම්මං ලොකුත්තරං වරං;

පාපුණන්ති විසුද්ධාය, සීලාදිපටිපත්තියා.

තස්මා තදත්ථිකා සුද්ධං, නයං නිස්සාය විඤ්ඤුනං;

භඤ්ඤමානං මයා සද්ද-නීතිං ගණ්හන්තු සාධුකං.

ධාතු ධාතූහි නිප්ඵන්න-රූපානි ච සලක්ඛණො;

සන්ධිනාමාදිභෙදො ච, පදානං තු විභත්ති ච.

පාළිනයාදයොච්චෙව-මෙත්ථ නානප්පකාරතො;

සාසනස්සොපකාරාය, භවිස්සති විභාවනා.