📜

නමො තස්ස භගවතො අරහතො සම්මාසම්බුද්ධස්ස

වුත්තොදයං

1. සඤ්ඤාපරිභාසානිද්දෙස-පඨමපරිච්ඡෙද

රතනත්තයප්පණාම

1.

නම’ත්ථු ජන සන්තාන, තම සන්තාන භෙදිනො;

ධම්මු’ජ්ජලන්ත රුචිනො, මුනින්දො’දාත රොචිනො.

නිමිත්ත

2.

පිඞ්ගලා’චරියාදීහි, ඡන්දං ය මුදිතං පුරා;

සුද්ධමාගධිකානං තං, න සාධෙති යථිච්ඡිතං [ය’දිච්ඡිතං යති’ච්ඡිතං (ක.)].

ගන්ථපරිමාණ

3.

තතො මාගධභාසාය, මත්තා,වණ්ණ,විභෙදනං;

ලක්ඛ්ය ලක්ඛණ සංයුත්තං, පසන්න’ත්ථ,පද,ක්කමං.

අභිධානාදි

4.

ඉදං වුත්තොදයං නාම, ලොකිය’ච්ඡන්දනිස්සිතං;

ආරභිස්ස’මහං දානි, තෙසං සුඛවිබුද්ධියා.

ගණසඞ්කෙතසඤ්ඤා

5.

සබ්බග්ලා ම්නා,’දිගලහූ, භ්යා’,මජ්ඣ’න්ත ගරූ ජසා;

මජ්ඣ’න්තලා ර,තෙ’තෙ’ට්ඨ, ගණා ගො ගරු,ලො ලහු.

ගණනියම

6.

භ,ජ,සා ¶ සබ්බග,ලහූ, පඤ්චි’මෙ සණ්ඨිතා ගණා;

අරියාදිම්හි විඤ්ඤෙය්යා, ගණො ඉධ චතු’ක්කලො.

ගරු,ලහුසරූප

7.

සංයොගා’දි ච, දීඝො ච, නිග්ගහීතපරො ච, යො;

ගරු, වඞ්කො, පාදන්තො,වා, රස්සො’ඤ්ඤො මත්තිකො ලු’ජු.

8.

පරෙ පාදාදිසංයොගෙ, යො පුබ්බො ගරුක’ක්ඛරො;

ලහු ස ක්වචි විඤ්ඤෙය්යො, තදුදාහරණං යථා.

9.

දස්සනරසා’නුභාවනෙ, නිබද්ධගෙධා ජිනස්ස’යං ජනතා;

විම්හයජනනී සඤ්ඤත, ක්රියා නු කං නා’නුරඤ්ජයති.

10.

විඤ්ඤෙය්යා ලොකතො සඤ්ඤා, සමුද්දො,සු,රසාදිනං;

පාදොඤෙය්යො චතුත්ථං’සො, පදච්ඡෙදො යතී භවෙ.

11.

සම,මඩ්ඪසමං, වුත්තං, විසමං චා’පරං තිධා;

සමා ලක්ඛණතො පාදා, චත්තාරො යස්ස තං සමං.

12.

යස්ස’න්තිමෙන දුතියො, තතියෙනා’දිමො සමො;

ත’දඩ්ඪසම, මඤ්ඤං තු, භින්න ලක්ඛණ පාදිකං.

13.

පාද’මෙකක්ඛරා’රබ්භ, යාව ඡබ්බීසත’ක්ඛරා;

භවෙ පාදෙහි තං ඡන්දං, නානානාමො’දිතං තතො.

14.

දණ්ඩකා චණ්ඩවුට්ඨ්යා’දි, පාදෙහි ඡහි, තීහි තු;

‘ගාථා’ති ච පරත්ථෙ’වං, ඡන්දො සඤ්ඤා පකාසිතා.

15.

අනන්තරො’දිතං ච’ඤ්ඤ, මෙතං සාමඤ්ඤ නාමතො;

‘ගාථා’ඉච්චෙව නිද්දිට්ඨං, මුනින්දවචනෙ පන.

16.

විසෙසනාමතො කිඤ්චි, ගහෙත්වා සබ්බථො’චිතං;

දස්සයිස්සාම’හං තෙ’ත්ථ, නාමානා’වි භවිස්සරෙ.

ඉති වුත්තොදයෙ ඡන්දසි සඤ්ඤාපරිභාසා නිද්දෙසො නාම

පඨමො පරිච්ඡෙදො.