📜
සඞ්ඝාදිසෙස සික්ඛාපුච්ඡා
1. සුක්කවිස්සට්ඨිසඞ්ඝාදිසෙස සික්ඛාපුච්ඡා
පුච්ඡා – යං ¶ තෙන ආවුසො භගවතා ජානතා පස්සතා අරහතා සම්මාසම්බුද්ධෙන උපක්කමිත්වා අසුචිං මොචෙන්තස්ස සඞ්ඝාදිසෙසො කත්ථ පඤ්ඤත්තො.
විස්සජ්ජනා – සාවත්ථියං භන්තෙ පඤ්ඤත්තො.
පුච්ඡා – කං ආවුසො ආරබ්භ පඤ්ඤත්තො.
විස්සජ්ජනා – ආයස්මන්තං භන්තෙ සෙය්යසකං ආරබ්භ පඤ්ඤත්තො.
පුච්ඡා – කිස්මිං ආවුසො වත්ථුස්මිං පඤ්ඤත්තො.
විස්සජ්ජනා – ආයස්මා භන්තෙ සෙය්යසකො හත්ථෙන උපක්කමිත්වා අසුචිං මොචෙසි, තස්මිං භන්තෙ වත්ථුස්මිං පඤ්ඤත්තො.
පුච්ඡා – අත්ථි ¶ ආවුසො තත්ථ පඤ්ඤත්ති අනුපඤ්ඤත්ති අනුප්පන්නපඤ්ඤත්ති.
විස්සජ්ජනා – එකා භන්තෙ පඤ්ඤත්ති, එකා අනුපඤ්ඤත්ති, අනුප්පන්නපඤ්ඤත්ති තස්මිං නත්ථි.
පුච්ඡා – කතමා ආවුසො තත්ථ මූලපඤ්ඤත්ති.
විස්සජ්ජනා – සඤ්චෙතනිකා සුක්කවිස්සට්ඨි සඞ්ඝාදිසෙසොති අයං භන්තෙ තත්ථ මූලපඤ්ඤත්ති.
පුච්ඡා – කතමා පනාවුසො තත්ථ අනුපඤ්ඤත්ති.
විස්සජ්ජනා – අඤ්ඤත්ර සුපිනන්තාති අයං භන්තෙ තත්ථ අනුපඤ්ඤත්ති.
පුච්ඡා – කතමා ¶ පනාවුසො තත්ථ පරිපුණ්ණපඤ්ඤත්ති.
විස්සජ්ජනා – සඤ්චෙතනිකා සුක්කවිස්සට්ඨි අඤ්ඤත්රසුපිනන්තා සඞ්ඝාදිසොති අයං භන්තෙ තත්ථ පරිපුණ්ණපඤ්ඤත්ති.
පුච්ඡා – සාධාරණ පඤ්ඤත්තිනුඛො ආවුසො අසාධාරණ පඤ්ඤත්තිනුඛො.
විස්සජ්ජනා – අසාධාරණපඤ්ඤත්ති භන්තෙ.
පුච්ඡා – තත්ථ ආවුසො උපක්කමිත්වා අසුචිං මොචෙන්තො කති ආපත්තියො ආපජ්ජති.
විස්සජ්ජනා – උපක්කමිත්වා භන්තෙ අසුචිං මොචෙන්තො තිස්සො ආපත්තියො ආපජ්ජති, චෙතෙති උපක්කමති මුච්චති ආපත්ති
සඞ්ඝාදිසෙසස්ස ¶ , චෙතෙති උපක්කමති න මුච්චති ආපත්ති ථුල්ලච්චයස්ස, පයොගෙ දුක්කටං.
පුච්ඡා – කෙසං ආවුසො අනාපත්ති.
විස්සජ්ජනා – ඡන්නං භන්තෙ අනාපත්ති සුපිනන්තෙන මොචෙන්තස්ස න මොචනාධිප්පායස්ස උම්මත්තකස්ස ඛිත්තචිත්තස්ස වෙදනාට්ටස්ස ආදිකම්මිකස්ස ඉමෙසං ඛො භන්තෙ ඡන්නං අනාපත්ති.
පුච්ඡා – පඤ්චන්නං ¶ ආවුසො පාතිමොක්ඛුද්දෙසානං කතමෙන උද්දෙසෙන උද්දෙසං ආගච්ඡති.
විස්සජ්ජනා – පඤ්චන්නං භන්තෙ පාතිමොක්ඛුද්දෙසානං තතියෙන උද්දෙසෙන උද්දෙසං ආගච්ඡති.
පුච්ඡා – චතුන්නං ආවුසො විපත්තීනං කතමා විපත්ති.
විස්සජ්ජනා – චතුන්නං භන්තෙ විපත්තීනං සීලවිපත්ති.
පුච්ඡා – කා ආවුසො විපත්ති.
විස්සජ්ජනා – අසංවරො භන්තෙ විපත්ති.
පුච්ඡා – කා ¶ ආවුසො සම්පත්ති.
විස්සජ්ජනා – සංවරො භන්තෙ සම්පත්ති.
පුච්ඡා – කා ආවුසො පටිපත්ති.
විස්සජ්ජනා – න එව රූපං කරිස්සාමීති යාවජීවං ආපාණකොටිකං සමාදාය සික්ඛති සික්ඛාපදෙසු අයං භන්තෙ පටිපත්ති.
පුච්ඡා – කති ආවුසො අත්ථවසෙ පටිච්ච භගවතා උපක්කමිත්වා අසුචිං මොචෙන්තස්ස සඞ්ඝාදිසෙසො පඤ්ඤත්තො.
විස්සජ්ජනා – දස ¶ භන්තෙ අත්ථවසෙ පටිච්ච භගවතා උපක්කමිත්වා අසුචිං මොචෙන්තස්ස සඞ්ඝාදිසෙසො පඤ්ඤත්තො සඞ්ඝසුට්ඨුතාය…පෙ… විනයානුග්ගහාය.
පුච්ඡා – කත්ථ ආවුසො ඨිතං.
විස්සජ්ජනා – සික්ඛාකාමෙසු භන්තෙ ඨිතං.
පුච්ඡා – කෙ ආවුසො ධාරෙන්ති.
විස්සජ්ජනා – යෙසං භන්තෙ වත්තති තෙ ධාරෙන්ති.
පුච්ඡා – කස්ස ¶ ආවුසො වචනං.
විස්සජ්ජනා – භගවතො භන්තෙ වචනං අරහතො සම්මාසම්බුද්ධස්ස.
පුච්ඡා – කෙනාවුසො ආභතං.
විස්සජ්ජනා – පරම්පරාය භන්තෙ ආභතං.
පුච්ඡා – අත්ථි නුඛො ආවුසො තත්ථ සනිදානෙ සපදභාජනීයෙ සවිනීතවත්ථුකෙ උපනෙතබ්බං වා අපනෙතබ්බං වා අක්ඛරපදපච්චාභට්ඨං වා විරද්ධපදබ්යඤ්ජනං වා.
සංගායනත්ථාය සඞ්ඝස්ස ඤාපනං
සුණාතු ¶ මෙ භන්තෙ සඞ්ඝො ආයස්මන්තං විචිත්තසාරාභිවංසං තිපිටකධර ධම්මභණ්ඩාගාරිකං පඨමස්ස සඞ්ඝාදිසෙස සික්ඛාපදස්ස නිදානම්පි පුච්ඡිං, පුග්ගලම්පි පුච්ඡිං, වත්ථුම්පි පුච්ඡිං, පඤ්ඤත්තිම්පි පුච්ඡිං, අනුපඤ්ඤත්තිම්පි පුච්ඡි, ආපත්තිම්පි පුච්ඡිං, අනාපත්තිම්පි පුච්ඡිං, අඤ්ඤානිපි එවරූපානි අනෙකානි පුච්ඡිතබ්බට්ඨානානි පුච්ඡිං, පුට්ඨො පුට්ඨො ච සො ආයස්මා විචිත්තසාරාභිවංසො විස්සජ්ජෙසි, ඉතිහිදං භන්තෙ පඨම සඞ්ඝාදිසෙස සික්ඛාපදං සපරිවාරං නිම්මලං සුපරිසුද්ධං තස්සෙව භගවතො වචනං අරහතො සම්මාසම්බුද්ධස්ස. තස්මා යථාපුරෙ මහාකස්සපාදයො මහාථෙරවරා පොරාණසංගීතිකාරා බ්රහ්මචරියස්ස චිරට්ඨිතියා බහුජනහිතාය බහුජනසුඛාය ලොකානුකම්පාය අත්ථාය හිතාය සුඛාය දෙවමනුස්සානං ¶ ධම්මවිනයං සංගායිංසුචෙව අනුසංගායිංසුච, එවමෙව මයම්පි සබ්බෙව ඡට්ඨසංගීතිමහාධම්මසභා පරියාපන්නා ඉදං පඨමං සඞ්ඝාදිසෙස සික්ඛාපදං නිදානතො පට්ඨාය එකච්චානං වචසා සජ්ඣායවසෙන එකච්චානං මනසා මනසිකරණවසෙනච එකතො ගණසජ්ඣායං කත්වා සංගායෙය්යාම.
පුච්ඡා – යං ¶ තෙන ආවුසො භගවතා…පෙ… සම්මාසම්බුද්ධෙන මාතුකාමෙන සද්ධිං කායසංසග්ගං සමාපජ්ජන්තස්ස ච, මාතුගාමං දුට්ඨුල්ලාහි වාචාහි ඔභාසන්තස්ස ච, මාතුගාමස්ස සන්තිකෙ අත්තකාම පාරිචරියාය වණ්ණං භාසන්තස්ස ච, සඤ්චරිත්තං සමාපජ්ජන්තස්ස ච සඞ්ඝාදිසෙසො කත්ථ පඤ්ඤත්තො.
විස්සජ්ජනා – සාවත්ථියං භන්තෙ පඤ්ඤත්තො.
පුච්ඡා – කං ¶ ආවුසො ආරබ්භ පඤ්ඤත්තො.
විස්සජ්ජනා – ආයස්මන්තං භන්තෙ උදායිත්ථෙරං ආරබ්භ පඤ්ඤත්තො.
පුච්ඡා – කිස්මිං ආවුසො වත්ථුස්මිං පඤ්ඤත්තො.
විස්සජ්ජනා – ආයස්මා භන්තෙ උදායිත්ථෙරො මාතුගාමෙන සද්ධිං කායසංසග්ගං සමාපජ්ජි, ආයස්මායෙව භන්තෙ උදායිත්ථෙරො මාතුගාමං දුට්ඨුල්ලාහි වාචාහි ඔභාසි, ආයස්මායෙව භන්තෙ උදායිත්ථෙරො මාතුගාමස්ස සන්තිකෙ අත්තකාම පාරිචරියාය වණ්ණං අභාසි, ආයස්මායෙව භන්තෙ උදායිත්ථෙරො සඤ්චරිත්තං සමාපජ්ජිං, තස්මිං භන්තෙ වත්ථුස්මිං පඤ්ඤත්තො.
6. කුටිකාර සඞ්ඝාදිසෙස සික්ඛාපුච්ඡා
පුච්ඡා – යං ¶ තෙන ආවුසො…පෙ… සම්මාසම්බුද්ධෙන සඤ්ඤාචිකාය කුටිං කාරාපෙන්තස්ස සඞ්ඝාදිසෙසො කත්ථ පඤ්ඤත්තො.
විස්සජ්ජනා – ආළවියං භන්තෙ පඤ්ඤත්ථො.
පුච්ඡා – කං ආවුසො ආරබ්භ පඤ්ඤත්තො.
විස්සජ්ජනා – ආළවිකෙ භන්තෙ භික්ඛූ ආරබ්භ පඤ්ඤත්තො.
පුච්ඡා – කිස්මිං ¶ ආවුසො වත්ථුස්මිං පඤ්ඤත්තො.
විස්සජ්ජනා – ආළවිකා භන්තෙ භික්ඛූ සඤ්ඤාචිකායො කුටියො කාරාපෙසුං, තස්මිං භන්තෙ වත්ථුස්මිං පඤ්ඤත්තො.
7. විහාරකාර සඞ්ඝාදිසෙස සික්ඛාපුච්ඡා
පුච්ඡා – යං තෙන ආවුසො…පෙ… සම්මාසම්බුද්ධෙන මහල්ලකං විහාරං කාරාපෙන්තස්ස සඞ්ඝාදිසෙසො කත්ථ පඤ්ඤත්තො.
විස්සජ්ජනා – කොසම්බියං භන්තෙ.
පුච්ඡා – කං ¶ ආවුසො ආරබ්භ පඤ්ඤත්තො.
විස්සජ්ජනා – ආයස්මන්තං භන්තෙ ඡන්නත්ථෙරං ආරබ්භ පඤ්ඤත්තො.
පුච්ඡා – කිස්මිං ආවුසො වත්ථුස්මිං පඤ්ඤත්තො.
විස්සජ්ජනා – ආයස්මා භන්තෙ ඡන්නො විහාරවත්ථුං සොධෙන්තො අඤ්ඤතරං චෙතියරුක්ඛං ඡෙදාපෙසි ගාමපූජිතං නිගමපූජිතං නගර පූජිතං ජනපදපූජිතං රට්ඨපූජිතං, තස්මිං භන්තෙ වත්ථුස්මිං පඤ්ඤත්තො.
8-9. දුට්ඨදොස සඞ්ඝාදිසෙස සික්ඛාපුච්ඡා
පුච්ඡා – යං තෙන ආවුසො භගවතා…පෙ… සම්මාසම්බුද්ධෙන භික්ඛුං අමූලකෙන පාරාජිකෙන ධම්මෙන අනුද්ධංසෙන්තස්ස ච, භික්ඛුං අඤ්ඤභාගියස්ස අධිකරණස්ස කිඤ්චිදෙසං ලෙසමත්තං උපාදාය පාරාජිකෙන ධම්මෙන අනුද්ධංසෙන්තස්ස ච සඞ්ඝාදිසෙසො කත්ථ පඤ්ඤත්තො.
විස්සජ්ජනා – රාජගහෙ ¶ භන්තෙ පඤ්ඤත්තො.
පුච්ඡා – කං ආවුසො ආරබ්භ කිස්මිං වත්ථුස්මිං පඤ්ඤත්තො.
විස්සජ්ජනා – මෙත්තියභූමජකා භන්තෙ භික්ඛූ ආරබ්භ පඤ්ඤත්තො, මෙත්තියභූමජකා භන්තෙ භික්ඛූ ආයස්මන්තං දබ්බං මල්ලපුත්තං අමූලකෙන පාරාජිකෙන ධම්මෙන අනුද්ධංසෙසුං, තෙයෙව භන්තෙ මෙත්තියභූමජකා භික්ඛූ ආයස්මන්තං දබ්බං මල්ලපුත්තං අඤ්ඤභාගියස්ස අධිකරණස්ස කිඤ්චිදෙසං ලෙසමත්තං උපාදාය පාරාජිකෙන ධම්මෙන අනුද්ධංසෙසුං, තස්මිං භන්තෙ වත්ථුස්මිං, පඤ්ඤත්තො.
10. සඞ්ඝභෙදක සඞ්ඝාදිසෙස සික්ඛාපුච්ඡා
පුච්ඡා – යං ¶ තෙන ආවුසො භගවතා…පෙ… සම්මාසම්බුද්ධෙන සඞ්ඝභෙදකස්ස භික්ඛුනො යාවතතියං සමනුභාසනාය අප්පටිනිස්සජ්ජන්තස්ස සඞ්ඝාදිසෙසො කත්ථ පඤ්ඤත්තො.
විස්සජ්ජනා – රාජගහෙ භන්තෙ පඤ්ඤත්තො.
පුච්ඡා – කං ¶ ආවුසො ආරබ්භ කිස්මිං වත්ථුස්මිං පඤ්ඤත්ථො.
විස්සජ්ජනා – දෙවදත්තං භන්තෙ ආරබ්භ පඤ්ඤත්තො.
දෙවදත්තො භන්තෙ සමග්ගස්ස සඞ්ඝස්ස භෙදාය පරක්කමි, තස්මිං භන්තෙ වත්ථුස්මිං පඤ්ඤත්තො.
11. භෙදානුවත්තක සික්ඛාපුච්ඡා
පුච්ඡා – යං ¶ තෙන ආවුසො භගවතා…පෙ… සම්මාසම්බුද්ධෙන භෙදානුවත්තකානං භික්ඛූනං යාවතතියං සමනුභාසනාය අප්පටිනිස්සජ්ජන්තානං සඞ්ඝාදිසෙසො කත්ථ පඤ්ඤත්තො.
විස්සජ්ජනා – රාජගහෙ භන්තෙ පඤ්ඤත්තො.
පුච්ඡා – කං ආවුසො ආරබ්භ කිස්මිං වත්ථුස්මිං පඤ්ඤත්තො.
විස්සජ්ජනා – සම්බහුලෙ භන්තෙ භික්ඛූ ආරබ්භ පඤ්ඤත්තො, සම්බහුලා භන්තෙ භික්ඛූ දෙවදත්තස්ස සඞ්ඝාභෙදාය පරක්කමන්තස්ස අනුවත්තකා අහෙසුං වග්ගවාදකා, තස්මිං භන්තෙ වත්ථුස්මිං පඤ්ඤත්තො.
12. දුබ්බච, සඞ්ඝාදිසෙස සික්ඛාපුච්ඡා
පුච්ඡා – යං ¶ තෙන ආවුසො භගවතා…පෙ… සම්මාසම්බුද්ධෙන දුබ්බචස්ස භික්ඛුනො යාවතතියං සමනුභාසනාය අප්පටිනිස්සජ්ජන්තස්ස සඞ්ඝාදිසෙසො කත්ථ පඤ්ඤත්තො.
විස්සජ්ජනා – කොසම්බියං භන්තෙ පඤ්ඤත්තො.
පුච්ඡා – කං ¶ ආවුසො ආරබ්භ කිස්මිං වත්ථුස්මිං පඤ්ඤත්තො.
විස්සජ්ජනා – ආයස්මන්තං භන්තෙ ඡන්නං ආරබ්භ පඤ්ඤත්තො, ආයස්මා භන්තෙ ඡන්නො භික්ඛූහි සහධම්මිකං වුච්චමානො අත්තානං අවචනීයං අකාසි, තස්මිං භන්තෙ වත්ථුස්මිං පඤ්ඤත්තො.
13. කුලදූසක සඞ්ඝාදිසෙස සික්ඛාපුච්ඡා
පුච්ඡා – යං ¶ තෙන ආවුසො භගවතා…පෙ… සම්මාසම්බුද්ධෙන කුලදූසකස්ස භික්ඛුනො යාවතතියං සමනුභාසනාය අප්පටිනිස්සජ්ජන්තස්ස සඞ්ඝාදිසෙසො කත්ථ පඤ්ඤත්තො.
විස්සජ්ජනා – සාවත්ථියං ¶ භන්තෙ පඤ්ඤත්තො.
පුච්ඡා – කං ආරබ්භ ආවුසො කිස්මිං වත්ථුස්මිං පඤ්ඤත්තො.
විස්සජ්ජනා – අස්සජි පුනබ්බසුකෙ භන්තෙ භික්ඛූ ආරබ්භ පඤ්ඤත්තො, අස්සජිපුනබ්බසුකා භන්තෙ භික්ඛූ සඞ්ඝෙන පබ්බාජනීයකම්මකතා ඡන්දගාමිතා දොසගාමිතා මොහගාමිතා භයගාමිතා පාපෙසුං, තස්මිං භන්තෙ වත්ථුස්මිං පඤ්ඤත්තො.
අනියත සික්ඛාපුච්ඡා
පුච්ඡා – යං ¶ තෙන ආවුසො භගවතා…පෙ… සම්මාසම්බුද්ධෙන පඨමො ච අනියතො දුතියො ච අනියතො කත්ථ පඤ්ඤත්තො.
විස්සජ්ජනා – සාවත්ථියං භන්තෙ පඤ්ඤත්තො.
පුච්ඡා – කං ආවුසො ආරබ්භ කිස්මිං වත්ථුස්මිං පඤ්ඤත්තො.
විස්සජ්ජනා – ආයස්මන්තං භන්තෙ උදායිං ආරබ්භ පඤ්ඤත්තො, ආයස්මා භන්තෙ උදායී මාතුගාමෙන සද්ධිං එකොඑකාය රහො පටිච්ඡන්නෙ ආසනෙ අලංකම්මනියෙ නිසජ්ජං කප්පෙසි, තස්මිඤ්ච වත්ථුස්මිං, ආයස්මායෙව භන්තෙ උදායී මාතුගාමෙන සද්ධිං රහො නිසජ්ජං අකාසි, තස්මිඤ්ච භන්තෙ වත්ථුස්මිං පඤ්ඤත්තො.
පුච්ඡා – කස්ස ¶ ආවුසො වචනං.
විස්සජ්ජනා – භගවතො භන්තෙ වචනං අරහතො සම්මාසම්බුද්ධස්ස.
පුච්ඡා – කෙනාවුසො ආභතං.
විස්සජ්ජනා – පරම්පරාය භන්තෙ ආභතං.
පුච්ඡා – අත්ථි නුඛො ආවුසො එත්ථ කොචිපි විරද්ධදොසො.
විස්සජ්ජනා – නත්ථි භන්තෙ.
සංගායනත්ථාය සඞ්ඝස්සඤාපනං
සුණාතු ¶ මෙ භන්තෙ සඞ්ඝො, අහං භන්තෙ ආයස්මන්තං විචිත්තසාරාභිවංසං තිපිටකධර ධම්මභණ්ඩාගාරිකං පඨම දුට්ඨදොස සික්ඛාපදතො පට්ඨාය පුච්ඡිතබ්බානි අනෙකානි ඨානානි පුච්ඡිං, සො ච ආයස්මා පුට්ඨො පුට්ඨො විස්සජ්ජෙති, ඉතිහිදං භන්තෙ සබ්බං සික්ඛාපදං නිම්මලං සුපරිසුද්ධං තස්සෙව භගවතො වචනං අරහතො සම්මාසම්බුද්ධස්ස, තස්මා යථාපුරෙ මහාකස්සපාදයො මහාථෙරවරා පොරාණසංගීතිකාරා බ්රහ්මචරියස්ස චිරට්ඨිතියා බහුජනහිතාය බහුජනසුඛාය ලොකානුකම්පාය අත්ථාය හිතාය සුඛාය දෙවමනුස්සානං සංගායිංසුචෙව අනුසංගායිංසුච, එවමෙව මයම්පි දානි සබ්බෙව ඡට්ඨසංගීති මහාධම්මසභාපරියාපන්නා ඉමානි සික්ඛාපදානි එකතො ගණසජ්ඣායං කත්වා සංගායෙය්යාම.