අඤ්ඤ > සඞ්ගායන-පුච්ඡ විස්සජ්ජනා > විනයපිටක (පු-වි)

විස්සජ්ජනා – මහාවග්ගෙ භන්තෙ දසඛන්ධකා පරියාපන්නා, සෙය්යථිදං, මහාඛන්ධකො උපොසථක්ඛන්ධකො වස්සූපනායිකක්ඛන්ධකො පවාරණාක්ඛන්ධකො චම්මක්ඛන්ධකො භෙසජ්ජක්ඛන්ධකො කථිනක්ඛන්ධකො චීවරක්ඛන්ධකො චම්පෙය්යක්ඛන්ධකො කොසම්බකක්ඛන්ධකොති.

පුච්ඡා – මහාඛන්ධකෙ ආවුසො බහූ කථායො, කතමා තාසං ආදිකථා.

විස්සජ්ජනා – මහාඛන්ධකෙ භන්තෙ බොධිකථා ආදි.

පුච්ඡා – තස්මාතිහ ¶ ආවුසො තතො පට්ඨාය තං පුච්ඡිස්සාමි, භගවා ආවුසො පඨමාභිසම්බුද්ධකාලෙ කත්ථ කීවචීරං කෙනාකාරෙන විහාසි.

විස්සජ්ජනා – භගවා භන්තෙ පඨමාභිසම්බුද්ධො බොධිරුක්ඛමූලෙ සත්තාහං එකපල්ලඞ්කෙන විහාසි විමුත්තිසුඛං පටිසංවෙදී.

පුච්ඡා – තදා ආවුසො භගවා කීදිසං ධම්මං මනසිකත්වා කීදිසං උදානං උදානෙසි.

විස්සජ්ජනා – තදා භන්තෙ භගවා රත්තියා පඨමං යාමං රත්තියා මජ්ඣිමං යාමං රත්තියා පච්ඡිමං යාමං පටිච්චසමුප්පාදං අනුලොමං පටිලොමං මනසිකත්වා තීණි උදානානි උදානෙසි.

පුච්ඡා – තස්ස ¶ ආවුසො සත්තාහස්ස අච්චයෙන භගවා කත්ථ විහාසි.

විස්සජ්ජනා – තස්ස භන්තෙ සත්තාහස්ස අච්චයෙන භගවා අජපාල නිග්රොධමූලෙ විහාසි, සත්තාහං එකපල්ලඞ්කෙන විහාසි විමුත්තිසුඛං පටිසංවෙදී.

පුච්ඡා – තස්සපි ආවුසො සත්තාහස්ස අච්චයෙන භගවා කත්ථ විහාසි.

විස්සජ්ජනා – තස්ස ¶ භන්තෙ සත්තාහස්ස අච්චයෙන භගවා මුචලින්දමූලෙ සත්තාහං එකපල්ලඞ්කෙන නිසීදි.

පුච්ඡා – තස්සපි ආවුසො සත්තාහස්ස අච්චයෙන භගවා කත්ථ විහාසි.

විස්සජ්ජනා – තස්සපි භන්තෙ සත්තාහස්ස අච්චයෙන භගවා රාජායතනමූලෙ සත්තාහං එකපල්ලඞ්කෙන නිසීදි විමුත්තිසුඛං පටිසංවෙදී.

පුච්ඡා – තස්සපි ¶ ආවුසො සත්තාහස්ස අච්චයෙන භගවා කත්ථ විහාසි.

විස්සජ්ජනා – තස්ස භන්තෙ සත්තාහස්ස අච්චයෙන භගවා පුනදෙව අජපාලනිග්රොධමූලෙ විහාසි.

පුච්ඡා – තස්මිං පන ආවුසො අජපාලනිග්රොධෙ විහරන්තස්ස භගවතො කථං චෙතසො පරිවිතක්කො උදපාදි.

විස්සජ්ජනා – තස්මිං පන භන්තෙ අජපාලනිග්රොධෙ විහරන්තස්ස භගවතො රහොගතස්ස පටිසල්ලීනස්ස ධම්මගම්භීරතාපටිසංයුත්තො චෙතසො පරිවිතක්කො උදපාදි.

අධිගතො ඛො ම්යායං ධම්මො ගම්භීරො දුද්දසො අරනුබොධො සන්තො පණීතො අතක්කාවචරා නිපුණො පණ්ඩිතවෙදනීයො.

ආලයරාමාඛො ¶ පනායං පජා ආලයරතා ආලයසම්මුදිතා,

පුච්ඡා – කථං ආවුසො තදා ධම්මදෙසනාය බ්රහ්මයාචනා ච භගවතො පටිඤ්ඤාච අහොසි.

විස්සජ්ජනා – දෙසෙතු භන්තෙ භගවා ධම්මං, දෙසෙතු සුගතො ධම්මං, සන්ති සත්තා අප්පරජක්ඛජාතිකා අස්සවනතා ධම්මස්ස පරිහායන්ති, භවිස්සන්ති ධම්මස්ස අඤ්ඤාතාරොති ඉති භන්තෙ බ්රහ්මුනො ධම්මදෙසනාය යාචනා අහොසි,

ධම්මං පණීතං මනුජෙසු බ්රහ්මෙ’’ති.

එවං ඛො භන්තෙ භගවතො ධම්මදෙසනාය පටිඤ්ඤා ච අහොසි.

පුච්ඡා – එවං ¶ ඛො ආවුසො භගවා ධම්මදෙසනාය පටිඤ්ඤං කත්වා පඨමං ධම්මං දෙසෙන්තො කත්ථ කීදිසං ධම්මං කස්ස දෙසෙසි.

විස්සජ්ජනා – බාරාණසියං භන්තෙ ඉසිපතනෙ මිගදායෙ පඤ්චවග්ගිය භික්ඛුපමුඛානං බ්රහ්මගණානං ධම්මචක්කපවත්තනසුත්තං දෙසෙසි.

පුච්ඡා – තස්මිං ¶ ඛො පන ආවුසො ධම්මචක්කපවත්තනසුත්තෙ දෙසියමානෙ මනුස්සලොකෙ කස්ස ධම්මාභිසමයො අහොසි.

විස්සජ්ජනා – ආයස්මතො භන්තෙ කොණ්ඩඤ්ඤස්ස ධම්මාභිසමයො අහොසි.

පුච්ඡා – කථං නු ඛො ආවුසො ඉමස්මිං බුද්ධසාසනෙ පඨමං පබ්බජ්ජා ච උපසම්පදා ච අහොසි.

විස්සජ්ජනා – ඉමස්මිං භන්තෙ බුද්ධසාසනෙ පඨමං එහිභික්ඛුපසම්පදා අහොසි.

ලභෙය්යාහං ¶ භන්තෙ භගවතො සන්තිකෙ පබ්බජං, ලභෙය්යං උපසම්පදං.

එහි භික්ඛු ස්වාඛාතො ධම්මො, චර බ්රහ්මචරියං සම්මා දුක්ඛස්ස අන්තකිරියාය.

පුච්ඡා – ඉතරෙසං පන ආවුසො චතුන්නං පඤ්චවග්ගියානං කදා ධම්මාභිසමයො අහොසි.

විස්සජ්ජනා – පාටිපදෙ භන්තෙ දිවසෙ ආයස්මතො වප්පස්ස, දුතියෙ භන්තෙ දිවසෙ ආයස්මතො භද්දියස්ස, තතියෙ භන්තෙ දිවසෙ ආයස්මතො මහානාමස්ස, චතුත්ථෙ භන්තෙ දිවසෙ ආයස්මතො අස්සජිස්ස ධම්මාභිසමයො අහොසි.

පුච්ඡා – සබ්බෙසම්පි ¶ ආවුසො තෙසං පඤ්චවග්ගියානං භික්ඛූනං කදා අරහත්තපත්ති හොති.

විස්සජ්ජනා – සබ්බෙසම්පි භන්තෙ තෙසං පඤ්චවග්ගියානං භික්ඛූනං පක්ඛස්ස පඤ්චමියං අනත්තලක්ඛණසුත්තෙ දෙසියමානෙ අරහත්තපත්ති හොති.

පුච්ඡා – කදා ආවුසො භගවතා භික්ඛූ තත්ථ තත්ථ චාරිකං චරිත්වා ධම්මදෙසනත්ථාය පෙසිතා.

විස්සජ්ජනා – යසප්පමුඛානං භන්තෙ චතුපඤ්ඤාස සහායකානං පබ්බජිතකාලෙ භගවතා භික්ඛූ තත්ථ තත්ථ චාරිකං චරිත්වා ධම්මදෙසනත්ථාය පෙසිතා.

පුච්ඡා – කදා ¶ ආවුසො භගවතා තීහි සරණගමනෙහි පබ්බජ්ජූප සම්පදා අනුඤ්ඤාතො අහොසි.

විස්සජ්ජනා – යසප්පමුඛානං භන්තෙ චතුපඤ්ඤාසාය ගිහි සහායකානං පබ්බජිත්වා තත්ථ තත්ථ චාරිකං චරිත්වා ධම්මදෙසනත්ථාය පෙසිතකාලෙ භගවතා තීහි සරණගමනෙහි පබ්බජ්ජා ච උපසම්පදා ච අනුඤ්ඤාතා.

අනුජානාමි ¶ භික්ඛවෙ තුම්හෙව දානි තාසු තාසු දිසාසු තෙසු තෙසු ජනපදෙසු පබ්බාජෙථ උපසම්පාදෙථ.

පුච්ඡා – භගවතා ආවුසො භික්ඛූනං ආරාමො පටිග්ගණ්හිතුං කත්ථ කිස්මිං වත්ථුස්මිං අනුඤ්ඤාතො.

විස්සජ්ජනා – භගවතා භන්තෙ භික්ඛූනං ආරාමං පටිග්ගණ්හිතුං රාජගහෙ අනුඤ්ඤාතො, රාජා භන්තෙ මාගධො සෙනියො බිම්බිසාරො බුද්ධප්පමුඛස්ස භික්ඛුසඞ්ඝස්ස වෙළුවනං උය්යානං අදාසි, තස්මිං භන්තෙ වත්ථුස්මිං අනුඤ්ඤාතො.

එතාහං ¶ භන්තෙ වෙළුවනං උය්යානං බුද්ධප්පමුඛස්ස භික්ඛුසඞ්ඝස්ස දම්මි –

පුච්ඡා – කථඤ්ච ¶ ආවුසො ද්වින්නං අග්ගසාවකානං පබ්බජ්ජූපසම්පදා අහොසි.

විස්සජ්ජනා – ද්වින්නං භන්තෙ අග්ගසාවකානං එහි භික්ඛුපසම්පදා අහොසි.

විප්පසන්නානි ¶ ඛො තෙ ආවුසො ඉන්ද්රියානි.

කංසි ත්වං ආවුසො උද්දිස්ස පබ්බජිතො.

අත්ථාවුසො මහාසමණො සක්යපුත්තො සක්යකුලා පබ්බජිතො.

කිං වාදී පනායස්මතො සත්ථා කිමක්ඛායී.

යෙ ¶ ධම්මා හෙතුප්පභවා, තෙසං හෙතුං තථාගතො;

ආහ තෙසඤ්ච යො නිරොධො, එවං වාදී මහාසමණො.

එතෙ භික්ඛවෙ ද්වෙ සහායකා ආගච්ඡන්ති කොලිතො උපතිස්සො ච එතං මෙ සාවකයුගං භවිස්සති අග්ගං භද්දයුගං.

ලභෙය්යාම ¶ මයං භන්තෙ භගවතො සන්තිකෙ පබ්බජ්ජං ලභෙය්යාම උපසම්පදං.

එථ භික්ඛවො ස්වාඛාතො ධම්මො, චරථ බ්රහ්මචරියං සම්මා දුක්ඛස්ස අන්තකිරියාය.

පුච්ඡා – උපජ්ඣායො ආවුසො ගණ්හිතුං භගවතා කත්ථ අනුඤ්ඤාතො, කං ආරබ්භ කිස්මිං වත්ථුස්මිං අනුඤ්ඤාතො.

විස්සජ්ජනා – රාජගහෙ භන්තෙ සම්බහුලෙ භික්ඛූ ආරබ්භ අනුඤ්ඤාතො, සම්බහුලා භන්තෙ භික්ඛූ අනුපජ්ඣායකා අනාචරියකා අනොවදියමානා අනනුසාසියමානා දුන්නිවත්ථා දුප්පාරුතා අනොකප්පසම්පන්නා පිණ්ඩාය චරිංසු, තස්මිං භන්තෙ වත්ථුස්මිං අනුඤ්ඤාතො.

පුච්ඡා – උපජ්ඣායම්හි ආවුසො න සම්මාවත්තන්තස්ස දුක්කටං කත්ථ පඤ්ඤත්තං, කං ආරබ්භ කිස්මිං වත්ථුස්මිං පඤ්ඤත්තං.

විස්සජ්ජනා – රාජගහෙ ¶ භන්තෙ සම්බහුලෙ සද්ධිවිහාරිකෙ ආරබ්භ පඤ්ඤත්තං, සම්බහුලා භන්තෙ සද්ධිවිහාරිකා උපජ්ඣායම්හි න සම්මාවත්තිංසු, තස්මිං භන්තෙ වත්ථුස්මිං පඤ්ඤත්තං.

පුච්ඡා – කදා ආවුසො භගවතා තීහි සරණගමනෙහි උපසම්පදං පටික්ඛිපිත්වා ඤාතිචතුත්ථෙන කම්මෙන උපසම්පදා අනුඤ්ඤාතා.

විස්සජ්ජනා – රාධබ්රාහ්මණස්ස භන්තෙ පබ්බජිතකාලෙ භගවතා තීහි සරණගමනෙහි උපසම්පදං පටික්ඛිපිත්වා ඤාත්තිචතුත්ථෙන කම්මෙන උපසම්පදා අනුඤ්ඤාතා.

කොනු ¶ ඛො භික්ඛවෙ තස්ස බ්රාහ්මණස්ස අධිකාරං සරති.

අහං ඛො භන්තෙ තස්ස බ්රාහ්මණස්ස අධිකාරං සරාමි.

සාධු සාධු සාරිපුත්ත, කතඤ්ඤුනො හි සාරිපුත්ත සප්පුරිසා කතවෙදිනො.

කථාහං භන්තෙ තං බ්රාහ්මණං උපසම්පාදෙමි.

යාසා ¶ භික්ඛවෙ මයා තීහි සරණගමනෙහි උපසම්පදාඅනුඤ්ඤාතා, තං අජ්ජතග්ගෙ පටික්ඛිපාමි.

අනුජානාමි භික්ඛවෙ ඤාත්තිචතුත්ථෙන කම්මෙන උපසම්පාදෙතුං.

පුච්ඡා – අයාචිතකං ආවුසො උපසම්පදාපෙක්ඛං උපසම්පාදෙන්තස්ස දුක්කටං භගවතා කත්ථ පඤ්ඤත්තං, කං ආරබ්භ කිස්මිං වත්ථුස්මිං පඤ්ඤත්තං.

විස්සජ්ජනා – රාජගහෙ භන්තෙ අඤ්ඤතරං භික්ඛුං ආරබ්භ පඤ්ඤත්තං, අඤ්ඤතරො භන්තෙ භික්ඛු උපසම්පන්නසමනන්තරං අනාචාරං අචරි, තස්මිං භන්තෙ වත්ථුස්මිං පඤ්ඤත්තං.

පුච්ඡා – චතුන්නං ¶ ආවුසො නිස්සයානං ආචික්ඛණා භගවතා කත්ථ අනුඤ්ඤාතා, කං ආරබ්භ කිස්මිං වත්ථුස්මිං අනුඤ්ඤාතා.

විස්සජ්ජනා – රාජගහෙ භන්තෙ අඤ්ඤතරං භික්ඛුං ආරබ්භ අනුඤ්ඤාතා, අඤ්ඤතරො භන්තෙ භික්ඛු උදරස්ස කාරණා පබ්බජි, තස්මිං භන්තෙ වත්ථුස්මිං අනුඤ්ඤාතා.

එහි ¶ දානි ආවුසො පිණ්ඩාය චරිස්සාම.

කථඤ්හි නාම භික්ඛු එවං ස්වාක්ඛාතෙ ධම්මවිනයෙ උදරස්ස කාරණා පබ්බජිස්සති.

පුච්ඡා – ඌනදසවස්සෙන ¶ ආවුසො උපසම්පාදෙන්තස්ස දුක්කටං භගවතා කත්ථ පඤ්ඤත්තං, කං ආරබ්භ කිස්මිං වත්ථුස්මිං පඤ්ඤත්තං.

විස්සජ්ජනා – රාජගහෙ භන්තෙ ආයස්මන්තං උපසෙනං වඞ්ගන්තපුත්තං ආරබ්භ පඤ්ඤත්තං, ආයස්මා භන්තෙ උපසෙනො වඞ්ගන්තපුත්තො එකවස්සො සද්ධිවිහාරිකං උපසම්පාදෙසි, තස්මිං භන්තෙ වත්ථුස්මිං පඤ්ඤත්තං.

පුච්ඡා – බාලෙන ¶ ආවුසො අබ්යත්තෙන උපසම්පාදෙන්තස්ස දුක්කටං භගවතා කත්ථ පඤ්ඤත්තං, කං ආරබ්භ කිස්මිං වත්ථුස්මිං පඤ්ඤත්තං.

විස්සජ්ජනා – රාජගහෙ භන්තෙ සම්බහුලෙ භික්ඛූ ආරබ්භ පඤ්ඤත්තං, සම්බහුලා භන්තෙ භික්ඛූ ‘‘දසවස්සම්හා දසවස්සම්හා’’ති බාලා අබ්යත්තා උපසම්පාදෙසුං, තස්මිං භන්තෙ වත්ථුස්මිං පඤ්ඤත්තං.

පුච්ඡා – ආචරියො ¶ ආවුසො ගණ්හිතුං භගවතා කත්ථ අනුඤ්ඤාතො, කං ආරබ්භ කිස්මිං වත්ථුස්මිං අනුඤ්ඤාතො.

විස්සජ්ජනා – රාජගහෙ භන්තෙ සම්බහුලෙ භික්ඛූ ආරබ්භ අනුඤ්ඤාතො, සම්බහුලා භන්තෙ භික්ඛූ උපජ්ඣායෙසු පක්කන්තෙසුපි විබ්භන්තෙසුපි කාලඞ්කතෙසුපි පක්ඛසඞ්කන්තෙසුපි අනාචරියකා අනොවදියමානා අනනුසාසියමානා දුන්නිවත්ථා දුප්පාරුතා අනාකප්පසම්පන්නා පිණ්ඩාය චරිංසු, තස්මිං භන්තෙ වත්ථුස්මිං අනුඤ්ඤාතො.

පුච්ඡා – පඤ්චහි ¶ ආවුසො ආබාධෙහි ඵුට්ඨං පබ්බාජෙන්තස්ස දුක්කටං භගවතා කත්ථ පඤ්ඤත්තං, කං ආරබ්භ කිස්මිං වත්ථුස්මිං පඤ්ඤත්තං.

විස්සජ්ජනා – රාජගහෙ භන්තෙ සම්බහුලෙ භික්ඛූ ආරබ්භ පඤ්ඤත්තං, සම්බහුලා භන්තෙ භික්ඛූ පඤ්චහි ආබාධෙහි ඵුට්ඨං පබ්බාජෙසුං, තස්මිං භන්තෙ වත්ථුස්මිං පඤ්ඤත්තං.

සාධු ¶ භන්තෙ අය්යා පඤ්චහි ආබාධෙහි ඵුට්ඨං න පබ්බාජෙය්යුං…

පුච්ඡා – රාජභටං ආවුසො පබ්බාජෙන්තස්ස දුක්කටං භගවතා කත්ථ පඤ්ඤත්තං, කං ආරබ්භ කිස්මිං වත්ථුස්මිං පඤ්ඤත්තං.

විස්සජ්ජනා – රාජගහෙ භන්තෙ සම්බහුලෙ භික්ඛූ ආරබ්භ පඤ්ඤත්තං, සම්බහුලා භන්තෙ භික්ඛූ රාජභටෙ පබ්බාජෙසුං, තස්මිං භන්තෙ වත්ථුස්මිං පඤ්ඤත්තං.

පුච්ඡා – ධජබන්ධං ¶ ආවුසො චොරං පබ්බාජෙන්තස්ස දුක්කටං භගවතා කත්ථ පඤ්ඤත්තං, කං ආරබ්භ කිස්මිං වත්ථුස්මිං පඤ්ඤත්තං.

විස්සජ්ජනා – රාජගහෙයෙව භන්තෙ අඞ්ගුලිමාලං චොරං ආරබ්භ පඤ්ඤත්තං, අඞ්ගුලිමාලො භන්තෙ චොරො භික්ඛූසු පබ්බජිතො හොති, තස්මිං භන්තෙ වත්ථුස්මිං පඤ්ඤත්තං.

පුච්ඡා – කාරභෙදකං ආවුසො චොරං පබ්බාජෙන්තස්ස දුක්කටං භගවතා කත්ථ පඤ්ඤත්තං, කං ආරබ්භ කිස්මිං වත්ථුස්මිං පඤ්ඤත්තං.

විස්සජ්ජනා – රාජගහෙයෙව ¶ භන්තෙ සම්බහුලෙ භික්ඛූ ආරබ්භ පඤ්ඤත්තං, සම්බහුලා භන්තෙ භික්ඛූ කාරභෙදකචොරං පබ්බාජෙසුං, තස්මිං භන්තෙ වත්ථුස්මිං පඤ්ඤත්තං.

පුච්ඡා – ඉණායිකං ආවුසො පබ්බාජෙන්තස්ස දුක්කටං භගවතා කත්ථ පඤ්ඤත්තං, කං ආරබ්භ කිස්මිං වත්ථුස්මිං පඤ්ඤත්තං.

විස්සජ්ජනා – රාජගහෙයෙව භන්තෙ සම්බහුලෙ භික්ඛූ ආරබ්භ පඤ්ඤත්තං, සම්බහුලා භන්තෙ භික්ඛූ ඉණායිකං පබ්බාජෙසුං, තස්මිං භන්තෙ වත්ථුස්මිං පඤ්ඤත්තං.

පුච්ඡා – දාසං ¶ ආවුසො පබ්බජෙන්තස්ස දුක්කටං භගවතා කත්ථ පඤ්ඤත්තං, කං ආරබ්භ කිස්මිං වත්ථුස්මිං පඤ්ඤත්තං.

විස්සජ්ජනා – රාජගහෙයෙව භන්තෙ සම්බහුලෙ භික්ඛූ ආරබ්භ පඤ්ඤත්තං, සම්බහුලා භන්තෙ භික්ඛූ දාසං පබ්බාජෙසුං, තස්මිං භන්තෙ වත්ථුස්මිං පඤ්ඤත්තං.

පුච්ඡා – භණ්ඩුකම්මාය ආවුසො අපලොකනං භගවතා කත්ථ අනුඤ්ඤාතං, කං ආරබ්භ කිස්මිං වත්ථුස්මිං අනුඤ්ඤාතං.

විස්සජ්ජනා – රාජගහෙයෙව භන්තෙ අඤ්ඤතරං කම්මාරභණ්ඩුපුත්තං ආරබ්භ අනුඤ්ඤාතං අඤ්ඤතරො භන්තෙ කම්මාරභණ්ඩුපුත්තො මාතාපිතූහි සද්ධිං භණ්ඩිත්වා භික්ඛූසු පබ්බජිතො හොති, තස්මිං භන්තෙ වත්ථුස්මිං අනුඤ්ඤාතං.

පුච්ඡා – ඌනවීසතිවස්සස්ස ¶ ආවුසො පුග්ගලස්ස උපසම්පදා භගවතා කත්ථ පටික්ඛිත්තා, කං ආරබ්භ කිස්මිං වත්ථුස්මිං පටික්ඛිත්තා.

විස්සජ්ජනා – රාජගහෙ ¶ භන්තෙ සම්බහුලෙ භික්ඛූ ආරබ්භ පටික්ඛිත්තා, සම්බහුලා භන්තෙ භික්ඛූ ඌනවීසතිවස්සං පුග්ගලං උපසම්පාදෙසුං, තස්මිං භන්තෙ වත්ථුස්මිං පටික්ඛිත්තා.

න ¶ භික්ඛවෙ ජානං ඌනවීසතිවස්සො පුග්ගලො උපසම්පාදෙතබ්බො, යොඋපසම්පාදෙය්ය, යථාධම්මො කාරෙතබ්බො.

පුච්ඡා – මාතාපිතූහි ¶ ආවුසො අනනුඤ්ඤාතං පුත්තං පබ්බාජෙන්තස්ස දුක්කටං භගවතා කත්ථ පඤ්ඤත්තං, කිස්මිං වත්ථුස්මිං පඤ්ඤත්තං.

විස්සජ්ජනා – සක්කෙසු භන්තෙ පඤ්ඤත්තං, රාජා භන්තෙ සුද්ධොදනො භගවන්තං උපසඞ්කමිත්වා වරං යාචි, සාධු භන්තෙ අය්යාඅනනුඤ්ඤාතං මාතාපිතූහි පුත්තං පබ්බාජෙය්යුන්ති, තස්මිං භන්තෙ වත්ථුස්මිං පඤ්ඤත්තං.

න ¶ භික්ඛවෙ අනනුඤ්ඤාතො මාතාපිතූහි පුත්තො පබ්බාජෙතබ්බො, යො පබ්බාජෙය්ය, ආපත්තිදුක්කටස්ස.

පුච්ඡා – ථෙය්යසංවාසකස්ස ආවුසො උපසම්පදා භගවතා කත්ථ පටික්ඛිත්තා, කං ආරබ්භ කිස්මිං වත්ථුස්මිං පටික්ඛිත්තා.

විස්සජ්ජනා – සාවත්ථියං භන්තෙ අඤ්ඤතරං පුරාණකුලපුත්තං ආරබ්භ පටික්ඛිත්තා, අඤ්ඤතරො භන්තෙ පුරාණකුලපුත්තො ඛීණ කොලඤ්ඤො සාමං පත්තචීවරං පටියාදෙත්වා කෙසමස්සුං ඔහාරෙත්වා ¶ කාසායානි වත්ථානි අච්ඡාදෙත්වා ආරාමං ගන්ත්වා භික්ඛූහි සද්ධිං සංවසි, භන්තෙ වත්ථුස්මිං පටික්ඛිත්තා.

පුච්ඡා – තිරච්ඡානගතස්ස ¶ ආවුසො උපසම්පදා භගවතා කත්ථ පටික්ඛිත්තා, කං ආරබ්භ කිස්මිං වත්ථුස්මිං පටික්ඛිත්තා.

විස්සජ්ජනා – සාවත්ථියං භන්තෙ අඤ්ඤතරං නාගං ආරබ්භ පටික්ඛිත්තා, අඤ්ඤතරො භන්තෙ නාගො මාණවකවණ්ණෙන භික්ඛූ උපසඞ්කමිත්වා පබ්බජ්ජං යාචි, තං භික්ඛූ පබ්බාජෙසුං උපසම්පාදෙසුං, තස්මිං භන්තෙ වත්ථුස්මිං පටික්ඛිත්තා.

පුච්ඡා – මාතුඝාතකස්ස ¶ ච ආවුසො පිතුඝාතකස්ස ච උපසම්පදා භගවතා කත්ථ පටික්ඛිත්තා, කං ආරබ්භ කිස්මිං වත්ථුස්මිං පටික්ඛිත්තා.

විස්සජ්ජනා – සාවත්ථියංයෙව ¶ භන්තෙ අඤ්ඤතරං මාණවකං ආරබ්භ පටික්ඛිත්තා, අඤ්ඤතරො ච භන්තෙ මාණවකො අඤ්ඤතරො ච මාණවකො මාතරං ජීවිතා වොරොපෙසි පිතරං ජීවිතා වොරොපෙසි, තස්මිං භන්තෙ වත්ථුස්මිං පටික්ඛිත්තා.

මාතුඝාතකො ¶ භික්ඛවෙ අනුපසම්පන්නො නඋපසම්පාදෙතබ්බො, උපසම්පන්නො නාසෙතබ්බො, පිතුඝාතකො භික්ඛවෙ අනුපසම්පන්නො නඋපසම්පාදෙතබ්බො, උපසම්පන්නො නාසෙතබ්බො.

පුච්ඡා – අපත්තචීවරකං වා ආවුසො යාචිතපත්තචීවරකං වා උපසම්පාදෙන්තස්ස දුක්කටං භගවතා කත්ථ පඤ්ඤත්තං, කං ආරබ්භ කිස්මිං වත්ථුස්මිං පඤ්ඤත්තං.

විස්සජ්ජනා – සාවත්ථියං භන්තෙ සම්බහුලෙ භික්ඛූ ආරබ්භ පඤ්ඤත්තං, සම්බහුලා භන්තෙ භික්ඛූ අපත්තචීවරකං උපසම්පාදෙසුං, යාචිතකෙන පත්තචීවරෙන උපසම්පාදෙසුං, තස්මිං භන්තෙ වත්ථුස්මිං පඤ්ඤත්තං.

පුච්ඡා – උපසම්පදං ¶ පුච්ඡිස්සං, සනිදානං සඋද්දෙසං. සමුක්කට්ඨපදානං ආවුසො කති ආපත්තියො.

විස්සජ්ජනා – උපසම්පදං විස්සජ්ජිස්සං, සනිදානං සනිද්දෙසං. සමුක්කට්ඨපදානං භන්තෙ ද්වෙ ආපත්තියො.

පුච්ඡා – චාතුද්දසෙ ¶ ච ආවුසො පන්නරසෙ ච පක්ඛස්ස ච අට්ඨමියා සන්නිපතිත්වා ධම්මං භාසිතුං භගවතා කත්ථ අනුඤ්ඤාතං, කිස්මිං වත්ථුස්මිං අනුඤ්ඤාතං.

විස්සජ්ජනා – රාජගහෙ භන්තෙ සම්බහුලෙ භික්ඛූ ආරබ්භ අනුඤ්ඤාතා, සම්බහුලා භන්තෙ භික්ඛූ චාතුද්දෙස පන්නරසෙ අට්ඨමියා ච පක්ඛස්ස සන්නිපතිත්වා තුණ්හී නිසීදිංසු, තස්මිං භන්තෙ වත්ථුස්මිං අනුඤ්ඤාතා.

අනුජානාමි ¶ භික්ඛවෙ චාතුද්දසෙ පන්නරසෙ අට්ඨමියා ච පක්ඛස්ස සන්නිපතිතුං.

නනු නාම සන්නිපතිතෙහි ධම්මො භාසිතබ්බො.

පුච්ඡා – කදා ආවුසො භික්ඛූනං පාතිමොක්ඛුද්දෙසො භගවතා අනුඤ්ඤාතො.

විස්සජ්ජනා – යදා භන්තෙ භගවතො රහොගතස්ස පටිසල්ලීනස්ස එවං චෙතසො පරිවිතක්කො උදපාදි ‘‘යංනූනාහං යානි මයා භික්ඛූනං පඤ්ඤත්තානි සික්ඛාපදානි, තානි නෙසං පාතිමොක්ඛුද්දෙසං අනුජානෙය්යං, සො නෙසං භවිස්සති උපොසථකම්ම’’න්ති ¶ තදා භන්තෙ භගවතා භික්ඛූනං පාතිමොක්ඛුද්දෙසො අනුඤ්ඤාතො.

පුච්ඡා – සීමං ආවුසො සම්මනිතුං භගවතා කත්ථ අනුඤ්ඤාතං, කිස්මිඤ්ච වත්ථුස්මිං අනුඤ්ඤාතං.

විස්සජ්ජනා – රාජගහෙ භන්තෙ අනුඤ්ඤාතං, රාජගහෙ භන්තෙ භගවති විහරති භික්ඛූනං එතදහොසි ‘‘භගවතා පඤ්ඤත්තං එත්තාවතා සාමග්ගී, යාවතා එකාවාසොති කිත්තාවතානුඛො එකාවාසො හොතී’’ති, තස්මිං භන්තෙ වත්ථුස්මිං අනුඤ්ඤාතං.

පුච්ඡා – කති ¶ ආවුසො උපොසථා දිවසවසෙන ච කාරකපුග්ගලවසෙන ච කාතබ්බාකාරවසෙන ච.

විස්සජ්ජනා – දිවසවසෙන භන්තෙ තයො උපොසථා, පුග්ගලවසෙන ච භන්තෙ තයො උපොසථා, කාතබ්බාකාරවසෙන ච භන්තෙ තයො උපොසථා.

පුච්ඡා – කති ¶ ආවුසො උපොසථකම්මානි තෙසු ච කීදිසං උපොසථකම්මං භගවතා අනුඤ්ඤාතං, කීදිසං අනනුඤ්ඤාතං.

විස්සජ්ජනා – චත්තාරිමානි භන්තෙ උපොසථකම්මානි, අධම්මෙන වග්ගං උපොසථකම්මං, අධම්මෙන සමග්ගං උපොසථකම්මං, ධම්මෙන වග්ගං උපොසථකම්මං, ධම්මෙන සමග්ගං උපොසථකම්මං. තත්ර භන්තෙ යදිදං අධම්මෙන වග්ගං උපොසථකම්මං, අධම්මෙන සමග්ගං උපොසථකම්මං ධම්මෙන වග්ගං උපොසථකම්මං, එවරූපං භන්තෙ උපොසථකම්මං අනනුඤ්ඤාතං, තත්ර භන්තෙ යදිදං ධම්මෙන සමග්ගං උපොසථකම්මං, එවරූපං භන්තෙ උපොසථකම්මං අනුඤ්ඤාතං.

පුච්ඡා – උපොසථං ¶ පුච්ඡිස්සං, සනිදානං සනිද්දෙසං. සමුක්කට්ඨපදානං ආවුසො කති ආපත්තියො.

විස්සජ්ජනා – උපොසථං විස්සජ්ජිස්සං, සනිදානං සනිද්දෙසං. සමුක්කට්ඨපදානං භන්තෙ තිස්සො ආපත්තියො.

පුච්ඡා – වස්සූපනායිකං ආවුසො භගවතා කත්ථ පඤ්ඤත්තං, කං ආරබ්භ කිස්මිං වත්ථුස්මිං පඤ්ඤත්තං.

විස්සජ්ජනා – රාජගහෙ භන්තෙ සම්බහුලා භික්ඛූ ආරබ්භ පඤ්ඤත්තං, සම්බහුලා භන්තෙ භික්ඛූ හෙමන්තම්පි ගිම්හම්පි වස්සම්පි චාරිකං චරිංසු, තස්මිං භන්තෙ වත්ථුස්මිං පඤ්ඤත්තං.

පුච්ඡා – කතිපනාවුසො වස්සූපනායිකා භගවතා අනුඤ්ඤාතා.

විස්සජ්ජනා – ද්වෙමා භන්තෙ වස්සූපනායිකා භගවතා අනුඤ්ඤාතා පුරිමිකා පච්ඡිමිකා, අපරජ්ජුගතාය භන්තෙ ආසළ්හියා පුරිමිකා උපගන්තබ්බා, මාසගතාය භන්තෙ ආසළ්හියා පච්ඡිමිකා උපගන්තබ්බා, ඉමා ඛො භන්තෙ ද්වෙ වස්සූපනායිකා භගවතා අනුඤ්ඤාතා.

පුච්ඡා – වස්සං ¶ ආවුසො උපගන්ත්වා පුරිමං වා තෙමාසං පච්ඡිමං වා තෙමාසං අවසිත්වා චාරිකං පක්කමන්තස්ස දුක්කටං කත්ථ පඤ්ඤත්තං, කං ආරබ්භ කිස්මිං වත්ථුස්මිං පඤ්ඤත්තං.

විස්සජ්ජනා – රාජගහෙ භන්තෙ ඡබ්බග්ගියෙ භික්ඛූ ආරබ්භ පඤ්ඤත්තං, ඡබ්බග්ගියා භන්තෙ භික්ඛූ වස්සං උපගන්ත්වා අන්තරා වස්සං චාරිකං පක්කමිංසු, තස්මිං භන්තෙ වත්ථුස්මිං පඤ්ඤත්තං.

පුච්ඡා – සත්තාහ කරණීයෙන ආවුසො පහිතෙ ගන්තුං භගවතා කත්ථ අනුඤ්ඤාතං, කං ආරබ්භ කිස්මිං වත්ථුස්මිං අනුඤ්ඤාතං.

විස්සජ්ජනා – සාවත්ථියං භන්තෙ සම්බහුලෙ භික්ඛූ ආරබ්භ අනුඤ්ඤාතං, සම්බහුලා භන්තෙ භික්ඛූ උදෙනෙන උපාසකෙන පහිතෙ න ගච්ඡිංසු, තස්මිං භන්තෙ වත්ථුස්මිං අනුඤ්ඤාතං.

පුච්ඡා – සත්තාහකරණීයෙන ¶ ආවුසො සත්තන්නං අපහිතෙපි ගන්තුං භගවතා කත්ථ අනුඤ්ඤාතං, කං ආරබ්භ කිස්මිං වත්ථුස්මිං අනුඤ්ඤාතං.

විස්සජ්ජනා – සාවත්ථියං භන්තෙ අඤ්ඤතරස්ස භික්ඛුනො මාතුගිලාන වත්ථුස්මිං අනුඤ්ඤාතං.

අනුජානාමි ¶ භික්ඛවෙ සත්තන්නං සත්තාහකරණීයෙන අපහිතෙපි ගන්තුං, පගෙව පහිතෙ.

පුච්ඡා – කිස්මිංචි ආවුසො අන්තරායෙ සති අන්තොවස්සං පක්කමිතුං භගවතා කත්ථ අනුඤ්ඤාතං, කං ආරබ්භ කිස්මිං වත්ථුස්මිං අනුඤ්ඤාතං.

විස්සජ්ජනා – සාවත්ථියං භන්තෙ සම්බහුලෙ භික්ඛූ ආරබ්භ අනුඤ්ඤාතං, සම්බහුලා භන්තෙ භික්ඛූ කොසලෙසු ජනපදෙසු වස්සං උපගච්ඡිංසු, තෙ වස්සූපගතා වාළෙහි උබ්බාළ්හා අහෙසුං, තස්මිං භන්තෙ වත්ථුස්මිං අනුඤ්ඤාතං.

පුච්ඡා – රුක්ඛ ¶ සුසිරෙ වා ආවුසො රුක්ඛවිටභියා වා අජ්ඣොකාසෙ වා වස්සං උපගච්ඡන්තස්ස දුක්කටං භගවතා කත්ථ පඤ්ඤත්තං, කං ආරබ්භ කිස්මිං වත්ථුස්මිං පඤ්ඤත්තං.

විස්සජ්ජනා – සාවත්ථියං භන්තෙ සම්බහුලෙ භික්ඛූ ආරබ්භ පඤ්ඤත්තං, සම්බහුලා භන්තෙ භික්ඛූ රුක්ඛසුසිරෙපි රුක්ඛවිටභියාපි අජ්ඣොකාසෙපි වස්සං උපගච්ඡිංසු, තස්මිං භන්තෙ වත්ථුස්මිං පඤ්ඤත්තං.

පුච්ඡා – අසෙනාසනිකෙන ¶ ආවුසො වස්සං උපගච්ඡන්තස්ස දුක්කටං භගවතා කත්ථ පඤ්ඤත්තං, කං ආරබ්භ කිස්මිං වත්ථුස්මිං පඤ්ඤත්තං.

විස්සජ්ජනා – තස්මිංයෙව භන්තෙ සාවත්ථියං සම්බහුලෙ භික්ඛූ ආරබ්භ පඤ්ඤත්තං, සම්බහුලා භන්තෙ භික්ඛූ අසෙනාසනිකා වස්සං උපගච්ඡිංසු, තස්මිං භන්තෙ වත්ථුස්මිං පඤ්ඤත්තං.

පුච්ඡා – ඡවකුටිකාය වා ආවුසො ඡත්තෙ වා චාටියා වා වස්සං උපගච්ඡන්තස්ස දුක්කටං භගවතා කත්ථ පඤ්ඤත්තං, කං ආරබ්භ කිස්මිං වත්ථුස්මිං පඤ්ඤත්තං.

විස්සජ්ජනා – සාවත්ථියංයෙව භන්තෙ සම්බහුලෙ භික්ඛූ ආරබ්භ පඤ්ඤත්තං, සම්බහුලා භන්තෙ භික්ඛූ ඡවකුටිකායපි ඡත්තෙපි චාටියාපි වස්සං උපගච්ඡිංසු, තස්මිං භන්තෙ වත්ථුස්මිං පඤ්ඤත්තං.

පුච්ඡා – පටිස්සවං ¶ ආවුසො විසං වාදෙන්තස්ස දුක්කටං භගවතා කත්ථ පඤ්ඤත්තං, කං ආරබ්භ කිස්මිං වත්ථුස්මිං පඤ්ඤත්තං.

විස්සජ්ජනා – සාවත්ථියං භන්තෙ ආයස්මන්තං උපනන්දං සක්යපුත්තං ආරබ්භ පඤ්ඤත්තං, ආයස්මා භන්තෙ උපනන්දො සක්යපුත්තො රඤ්ඤො පසෙනදිස්ස කොසලස්ස වස්සං වාසං පටිස්සුණිත්වා විසංවාදෙසි, තස්මිං භන්තෙ වත්ථුස්මිං පඤ්ඤත්තං.

පුච්ඡා – වස්සූපනායිකං ¶ පුච්ඡිස්සං, සනිදානං සනිද්දෙසං. සමුක්කට්ඨපදානං ආවුසො කති ආපත්තියො.

විස්සජ්ජනා – වස්සූපනායිකං විස්සජ්ජිස්සං, සනිදානං සනිද්දෙසං. සමුක්කට්ඨපදානං භන්තෙ එකා ආපත්ති.

පුච්ඡා – වස්සං ¶ වුට්ඨානං ආවුසො භික්ඛූනං තීහි ඨානෙහි පවාරිතුං භගවතා කත්ථ පඤ්ඤත්තං, කං ආරබ්භ කිස්මිං වත්ථුස්මිං පඤ්ඤත්තං.

විස්සජ්ජනා – සාවත්ථියං භන්තෙ සම්බහුලෙ භික්ඛූ ආරබ්භ අනුඤ්ඤාතං, සම්බහුලා භන්තෙ භික්ඛූ සන්දිට්ඨා සම්භත්තා අන්තොවස්සං නෙව ආලපිංසු න සල්ලපිංසු, තස්මිං භන්තෙ වත්ථුස්මිං අනුඤ්ඤාතං.

අනුජානාමි ¶ භික්ඛවෙ වස්සං වුට්ඨානං භික්ඛූනං තීහි ඨානෙහි පවාරෙතුං, දිට්ඨෙව වා සුතෙන වා පරිසඞ්කාය වා.

පුච්ඡා – කති ආවුසො පවාරණා දිවසවසෙන ච පුග්ගලවසෙන ච කාතබ්බාකාරවසෙන ච.

විස්සජ්ජනා – දිවසවසෙන භන්තෙ තිස්සො පවාරණා, තථා පුග්ගලවසෙන කාතබ්බාකාරවසෙනච.

පුච්ඡා – කතීනං ¶ ආවුසො සඞ්ඝෙ පවාරෙතුං භගවතා අනුඤ්ඤාතං, කතීනං පනාවුසො අඤ්ඤමඤ්ඤං පවාරෙතුං භගවතා අනුඤ්ඤාතං.

විස්සජ්ජනා – පඤ්චන්නං භන්තෙ භික්ඛූනං සඞ්ඝෙ පවාරෙතුං භගවතා අනුඤ්ඤාතං, චතුන්නං වා භන්තෙ තිණ්ණං වා ද්වින්නං වා අඤ්ඤමඤ්ඤං පවාරෙතුං අනුඤ්ඤාතං.

පුච්ඡා – එකෙන පනාවුසො වස්සංවුට්ඨෙන භික්ඛුනා කථං පටිපජ්ජිතබ්බන්ති භගවතා අනුඤ්ඤාතං.

විස්සජ්ජනා – එකෙන පන භන්තෙ භික්ඛුනා ‘‘අජ්ජ මෙ පවාරණා’’ති අධිට්ඨාතබ්බන්ති භගවතා අනුඤ්ඤාතං.

පුච්ඡා – පවාරණං ¶ පුච්ඡිස්සං, සනිදානං සනිද්දෙසං. සමුක්කට්ඨපදානං ආවුසො කති ආපත්තියො.

විස්සජ්ජනා – පවාරණං විස්සජ්ජිස්සං, සනිදානං සනිද්දෙසං. සමුක්කට්ඨපදානං භන්තෙ තිස්සො ආපත්තියො.

පුච්ඡා – උපාහනං ¶ ආවුසො භගවතා කත්ථ අනුඤ්ඤාතං, කං ආරබ්භ කිස්මිං වත්ථුස්මිං අනුඤ්ඤාතං.

විස්සජ්ජනා – රාජගහෙ භන්තෙ ආයස්මන්තං සොණං ආරබ්භ අනුඤ්ඤාතං, ආයස්මතො භන්තෙ සොණස්ස අච්චාරද්ධවීරියස්ස චඞ්කමතො පාදා භිජ්ජිංසු, චඞ්කමො ලොහිතෙන ඵුටො අහොසි, තස්මිං භන්තෙ වත්ථුස්මිං අනුඤ්ඤාතං.

පුච්ඡා – සබ්බනීලිකා ¶ වා ආවුසො සබ්බපීතිකා වා සබ්බලොහිතිකා වා සබ්බමඤ්ජිට්ඨිකා වා සබ්බකණ්හා වා සබ්බමහාරඞ්ගරත්තා වා සබ්බමහානාමරත්තා ¶ වා උපාහනායො ධාරෙන්තස්ස දුක්කටං භගවතා කත්ථ කං ආරබ්භ කිස්මිං වත්ථුස්මිං පඤ්ඤත්තං.

විස්සජ්ජනා – රාජගහෙ භන්තෙ ඡබ්බග්ගියෙ භික්ඛූ ආරබ්භ පඤ්ඤත්තං, ඡබ්බග්ගියා භන්තෙ භික්ඛූ සබ්බනීලිකායො උපාහනායො ධාරෙසුං, සබ්බපීතිකායො සබ්බලොහිතිකායො සබ්බමඤ්ජිට්ඨිකායො සබ්බකණ්හායො සබ්බමහාරඞ්ගරත්තා සබ්බමහානාමරත්තායොපි උපාහනායො ධාරෙසුං, තස්මිං භන්තෙ වත්ථුස්මිං පඤ්ඤත්තං.

පුච්ඡා – ඛල්ලකබන්ධා ¶ වා ආවුසො පුටබන්ධා වා පාලිගුණ්ඨිමා වා තූලපුණ්ණිකා වා තිත්තිරපත්තිකා වා මෙණ්ඩවිසාණවද්ධිකා වා අජවිසාණවද්ධිකා වා විච්ඡිකාළිකා වා මොරපිඤ්ඡ පරිසිබ්බිකා වා චිත්රා වා උපාහනායො ධාරෙන්තස්ස දුක්කටං භගවතා කත්ථ පඤ්ඤත්තං, කං ආරබ්භ කිස්මිං වත්ථුස්මිං පඤ්ඤත්තං.

විස්සජ්ජනා – රාජගහෙ භන්තෙ ඡබ්බග්ගියෙ භික්ඛූ ආරබ්භ පඤ්ඤත්තං, ඡබ්බග්ගියා භන්තෙ භික්ඛූ ඛල්ලකබන්ධා උපාහනායොපි ධාරෙසුං, පුටබන්ධා උපාහනායොපි ධාරෙසුං, පාලිගුණ්ඨිමා උපාහනායොපි ධාරෙසුං, තූලපුණ්ණිකා උපාහනායොපි ධාරෙසුං, තිත්තිරපත්තිකා උපාහනායොපි ධාරෙසුං, මෙණ්ඩවිසාණවද්ධිකා උපාහනායොපි ධාරෙසුං, අජවිසාණවද්ධිකා උපාහනායොපි ධාරෙසුං, විච්ඡිකාළිකා උපාහනායොපි ධාරෙසුං, මොරපිඤ්ඡ පරිසිබ්බිතා උපාහනායො ධාරෙසුං, චිත්රා උපාහනායොපි ධාරෙසුං, තස්මිං භන්තෙ වත්ථුස්මිං පඤ්ඤත්තං.

පුච්ඡා – කට්ඨපාදුකායො ¶ ආවුසො ධාරෙන්තස්ස දුක්කටං භගවතා කත්ථ කං ආරබ්භ කිස්මිං වත්ථුස්මිං පඤ්ඤත්තං.

විස්සජ්ජනා – රාජගහෙ භන්තෙ ඡබ්බග්ගීයෙව භික්ඛූ ආරබ්භ පඤ්ඤත්තං, ඡබ්බග්ගියා භන්තෙ භික්ඛූ රත්තියා පච්චූසසමයං පච්චුට්ඨාය කට්ඨපාදුකායො අභිරුහිත්වා අජ්ඣොකාසෙ චඞ්කමන්ති උච්චාසද්දා මහාසද්දා ඛටඛටසද්දා අනෙකවිහිතං තිරච්ඡානකථං කථෙන්තා, තස්මිං භන්තෙ වත්ථුස්මිං පඤ්ඤත්තං.

පුච්ඡා – යානෙන ¶ ආවුසො යායන්තස්ස දුක්කටං භගවතා කත්ථ පඤ්ඤත්තං, කං ආරබ්භ කිස්මිං වත්ථුස්මිං පඤ්ඤත්තං.

විස්සජ්ජනා – සාවත්ථියං භන්තෙ ඡබ්බග්ගියෙ භික්ඛූ ආරබ්භ පඤ්ඤත්තං, ඡබ්බග්ගියා භන්තෙ භික්ඛූ යානෙන යායිංසු, තස්මිං භන්තෙ වත්ථුස්මිං පඤ්ඤත්තං.

පුච්ඡා – ගිලානස්ස ¶ ආවුසො යානං භගවතා කත්ථ අනුඤ්ඤාතං, කං ආරබ්භ කිස්මිං වත්ථුස්මිං අනුඤ්ඤාතං.

විස්සජ්ජනා – සාවත්ථියං භන්තෙ අඤ්ඤතරං ගිලානං භික්ඛුං ආරබ්භ අනුඤ්ඤාතං, අඤ්ඤතරො භන්තෙ භික්ඛු කොසලෙසු ජනපදෙ සාවත්ථිං ගච්ඡන්තො භගවන්තං දස්සනාය අන්තරාමග්ගෙ ගිලානො කුක්කුච්චායන්තො යානං නාභිරුහි, තස්මිං භන්තෙ වත්ථුස්මිං අනුඤ්ඤාතං.

පුච්ඡා – උච්චාසයනමහාසයනානි ¶ ආවුසො ධාරෙන්තස්ස දුක්කටං භගවතා කත්ථ පඤ්ඤත්තං, කං ආරබ්භ කිස්මිං වත්ථුස්මිං පඤ්ඤත්තං.

විස්සජ්ජනා – සාවත්ථියං භන්තෙ ඡබ්බග්ගියෙ භික්ඛූ ආරබ්භ පඤ්ඤත්තං, ඡබ්බග්ගියා භන්තෙ භික්ඛූ උච්චාසයනමහාසයනානි ධාරෙසුං, තස්මිං භන්තෙ වත්ථුස්මිං පඤ්ඤත්තං.

පුච්ඡා – ගොචම්මානි ආවුසො ධාරෙන්තස්ස දුක්කටං භගවතා කත්ථ පඤ්ඤත්තං, කං ආරබ්භ කිස්මිං වත්ථුස්මිං පඤ්ඤත්තං.

විස්සජ්ජනා – සාවත්ථියං භන්තෙ අඤ්ඤතරං පාපභික්ඛුං ආරබ්භ පඤ්ඤත්තං, අඤ්ඤතරො භන්තෙ භික්ඛු පාණාතිපාතෙ සමාදපෙසි, තස්මිං භන්තෙ වත්ථුස්මිං පඤ්ඤත්තං.

පුච්ඡා – පච්චන්තිමෙසු ¶ ආවුසො ජනපදෙසු විනයධරපඤ්චමෙන ගණෙන උපසම්පදා ච ගුණඞ්ගුණූපහනඤ්ච ධුවනහානඤ්ච චම්මානි අත්ථරණානි ච නිස්සීමගතානං චීවරදානඤ්චාති ඉමානි පඤ්ච භගවතා කත්ථ අනුඤ්ඤාතානි, කං ආරබ්භ කිස්මිං වත්ථුස්මිං අනුඤ්ඤාතානි.

විස්සජ්ජනා – සාවත්ථියං භන්තෙ ආයස්මන්තං සොණං කුටිකණ්ණං ආරබ්භ අනුඤ්ඤාතා, ආයස්මා භන්තෙ සොණො කුටිකණ්ණො එතානි පඤ්චවත්ථූනි ආයස්මතො මහාකච්චානස්ස වචනෙන භගවන්තං යාචි, තස්මිං භන්තෙ වත්ථුස්මිං අනුඤ්ඤාතා.

පුච්ඡා – චම්මසඤ්ඤුත්තං ¶ පුච්ඡිස්සං, සනිදානං සනිද්දෙසං. සමුක්කට්ඨපදානං ආවුසො කති ආපත්තියො.

විස්සජ්ජනා – චම්මසඤ්ඤුත්තං විස්සජ්ජිස්සං, සනිදානං සනිද්දෙසං. සමුක්කට්ඨපදානං භන්තෙ තිස්සො ආපත්තියො.

පුච්ඡා – පඤ්ච ¶ ආවුසො භෙසජ්ජානි පටිග්ගහෙත්වා කාලෙපි විකාලෙපි පරිභුඤ්ජිතුං භගවතා කත්ථ අනුඤ්ඤාතං, කං ආරබ්භ කිස්මිං වත්ථුස්මිං අනුඤ්ඤාතං.

විස්සජ්ජනා – සාවත්ථියං භන්තෙ සම්බහුලෙ භික්ඛූ ආරබ්භ අනුඤ්ඤාතං, සම්බහුලානං භන්තෙ භික්ඛූනං සාරදිකෙන ආබාධෙන පුට්ඨානං යාගුපි න සම්මා පරිණාමං ගච්ඡි, භත්තම්පි භුත්තං න සම්මා පරිණාමං ගච්ඡි, තෙ තෙන කිසා අහෙසුං ලූඛා දුබ්බණ්ණා උප්පණ්ඩුප්පණ්ඩුකජාතා ධමනිසන්ථතගත්තා, තස්මිං භන්තෙ වත්ථුස්මිං අනුඤ්ඤාතං.

පුච්ඡා – මූලාදිභෙසජ්ජානි ¶ ආවුසො භගවතා කත්ථ අනුඤ්ඤාතානි, කං ආරබ්භ කිස්මිං වත්ථුස්මිං අනුඤ්ඤාතානි.

විස්සජ්ජනා – සාවත්ථියං භන්තෙ සම්බහුලෙ ගිලානෙ භික්ඛූ ආරබ්භ අනුඤ්ඤාතානි, සම්බහුලානං ගිලානානං භික්ඛූනං මූලෙහි භෙසජ්ජෙහි අත්ථො අහොසි, තස්මිං භන්තෙ වත්ථුස්මිං අනුඤ්ඤාතානි.

පුච්ඡා – අන්තොවුට්ඨංවා ආවුසො අන්තොපක්කං වා සාමංපක්කං වා පරිභුඤ්ජන්තස්ස දුක්කටං භගවතා කත්ථ පඤ්ඤත්තං, කං ආරබ්භ කිස්මිං වත්ථුස්මිං පඤ්ඤත්තං.

විස්සජ්ජනා – රාජගහෙ භන්තෙ ආයස්මන්තං ආනන්දං ආරබ්භ පඤ්ඤත්තං, ආයස්මා භන්තෙ ආනන්දො සාමං තිලම්පි තණ්ඩුලම්පි මුග්ගම්පි විඤ්ඤාපෙත්වා අන්තො වාසෙත්වා අන්තො සාමං පචි, තස්මිං භන්තෙ වත්ථුස්මිං පඤ්ඤත්තං.

පුච්ඡා – මනුස්සමංසං ¶ ආවුසො පරිභුඤ්ජන්තස්ස ථුල්ලච්චයඤ්ච අප්පටිවෙක්ඛිත්වා මංසං පරිභුඤ්ජන්තස්ස දුක්කටඤ්ච භගවතා කත්ථ පඤ්ඤත්තං, කං ආරබ්භ කිස්මිං වත්ථුස්මිං පඤ්ඤත්තං.

විස්සජ්ජනා – බාරාණසියං භන්තෙ අඤ්ඤතරං භික්ඛුං ආරබ්භ පඤ්ඤත්තං, අඤ්ඤතරො භන්තෙ භික්ඛු අප්පටිවෙක්ඛිත්වා මනුස්සමංසං භුඤ්ජි, තස්මිං භන්තෙ වත්ථුස්මිං පඤ්ඤත්තං.

න ¶ භික්ඛවෙ මනුස්සමංසං පරිභුඤ්ජිතබ්බං, යො පරිභුඤ්ජෙය්ය, ආපත්ති ථුල්ලච්චයස්ස, න ච භික්ඛවෙ අප්පටිවෙක්ඛිත්වා මංසං පරිභුඤ්ජිතබ්බං, යො පරිභුඤ්ජෙය්ය ආපත්ති දුක්කටස්ස.

පුච්ඡා – හත්ථිමංසං වා ආවුසො අස්සමංසං වා පරිභුඤ්ජන්තස්ස දුක්කටං භගවතා කත්ථ පඤ්ඤත්තං, කං ආරබ්භ කිස්මිං වත්ථුස්මිං පඤ්ඤත්තං.

විස්සජ්ජනා – බාරාණසියං භන්තෙ සම්බහුලෙ භික්ඛූ ආරබ්භ පඤ්ඤත්තං, සම්බහුලා භන්තෙ භික්ඛූ හත්ථිමංසම්පි අස්සමංසම්පි පරිභුඤ්ජිංසු, තස්මිං භන්තෙ වත්ථුස්මිං පඤ්ඤත්තං.

පුච්ඡා – සුනක්ඛමංසං ¶ වා ආවුසො අහිමංසං වා භුඤ්ජන්තස්ස දුක්කටං භගවතා කත්ථ පඤ්ඤත්තං, කං ආරබ්භ කිස්මිං වත්ථුස්මිං පඤ්ඤත්තං.

විස්සජ්ජනා – බාරාණසියං භන්තෙ සම්බහුලෙ භික්ඛූ ආරබ්භ පඤ්ඤත්තං, සම්බහුලා භන්තෙ භික්ඛූ සුනක්ඛමංසම්පි අහිමංසම්පි පරිභුඤ්ජිංසු, තස්මිං භන්තෙ වත්ථුස්මිං පඤ්ඤත්තං.

පුච්ඡා – සීහමංසං ¶ වා ආවුසො බ්යග්ඝමංසං වා දීපිමංසං වා අච්ඡමංසං වා තරච්ඡමංසං වා භුඤ්ජන්තස්ස දුක්කටං භගවතා කත්ථ පඤ්ඤත්තං, කං ආරබ්භ කිස්මිං වත්ථුස්මිං පඤ්ඤත්තං.

විස්සජ්ජනා – බාරාණසියංයෙව භන්තෙ සම්බහුලෙ භික්ඛූ ආරබ්භ පඤ්ඤත්තං, සම්බහුලා භන්තෙ භික්ඛූ සීහමංසම්පි බ්යග්ඝමංසම්පි දීපිමංසම්පි අච්ඡමංසම්පි තරච්ඡමංසම්පි පරිභුඤ්ජිංසු, තස්මිං භන්තෙ වත්ථුස්මිං පඤ්ඤත්තං.

පුච්ඡා – ගිලානස්ස ¶ ආවුසො ගුළං වා අගිලානස්ස ගුළොදකං වා භගවතා කත්ථ අනුඤ්ඤාතං, කං ආරබ්භ කිස්මිං වත්ථුස්මිං අනුඤ්ඤාතං.

විස්සජ්ජනා – රාජගහෙ භන්තෙ සම්බහුලෙ භික්ඛූ ආරබ්භ අනුඤ්ඤාතං, සම්බහුලා භන්තෙ භික්ඛූ ගිලානස්සෙව භගවතා ගුළො අනුඤ්ඤාතො නො අගිලානස්සාති කුක්කුච්චායන්තා ගුළං න භුඤ්ජිංසු, තස්මිං භන්තෙ වත්ථුස්මිං අනුඤ්ඤාතං.

පුච්ඡා – ජානං ¶ ආවුසො උද්දිස්ස කතං මංසං පරිභුඤ්ජන්තස්ස දුක්කටං පඤ්ඤපෙත්වා තිකොටිපරිසුද්ධං මංසං භගවතා කත්ථ අනුඤ්ඤාතං.

විස්සජ්ජනා – වෙසාලියං භන්තෙ සීහස්ස සෙටාපතිනො වත්ථුස්මිං අනුඤ්ඤාතං.

පුච්ඡා – පාථෙය්යං ¶ ආවුසො පරියෙසිතුඤ්ච කප්පියකාරකානං හත්ථෙ උපනික්ඛිත්තහිරඤ්ඤතො නිබ්බත්තං කප්පියපච්චයං සාදිතුඤ්ච භගවතා කත්ථ අනුඤ්ඤාතං, කං ආරබ්භ කිස්මිං වත්ථුස්මිං අනුඤ්ඤාතං.

විස්සජ්ජනා – අන්තරා ¶ ච භන්තෙ භද්දියං අන්තරා ච අඞ්ගුත්තරාපං මෙණ්ඩකං ගහපතිං ආරබ්භ අනුඤ්ඤාතං, මෙණ්ඩකො භන්තෙ ගහපති භගවන්තං යාචි ‘‘සන්ති භන්තෙ මග්ගා කන්තාරා අප්පොදකා අප්පභක්ඛා න සුකරා අපාථෙය්යෙන ගන්තුං, සාධු භන්තෙ භගවා භික්ඛූනං පාථෙය්යං අනුජානාතූ’’ති, තස්මිං භන්තෙ වත්ථුස්මිං අනුඤ්ඤාතං.

පුච්ඡා – අට්ඨ ¶ ආවුසො පානානි භගවතා කත්ථ අනුඤ්ඤාතානි, කං ආරබ්භ කිස්මිං වත්ථුස්මිං අනුඤ්ඤාතානි.

විස්සජ්ජනා – ආපණෙ භන්තෙ සම්බහුලෙ භික්ඛූ ආරබ්භ අනුඤ්ඤාතානි, සම්බහුලා භන්තෙ භික්ඛූ කුක්කුච්චායන්තා පානානි න පටිග්ගණ්හිංසු, තස්මිං භන්තෙ වත්ථුස්මිං අනුඤ්ඤාතානි.

පුච්ඡා – සබ්බඤ්ච ¶ ආවුසො ඩාකං සබ්බඤ්ච පිට්ඨඛාදනීයං භගවතා කත්ථ අනුඤ්ඤාතං, කං ආරබ්භ කිස්මිං වත්ථුස්මිං අනුඤ්ඤාතං.

විස්සජ්ජනා – කුසිනාරායං භන්තෙ සම්බහුලෙ භික්ඛූ ආරබ්භ අනුඤ්ඤාතං, සම්බහුලා භන්තෙ භික්ඛූ කුක්කුච්චායන්තා ඩාකඤ්ච පිට්ඨඛාදනීයඤ්ච න පටිග්ගහෙසුං, තස්මිං භන්තෙ වත්ථුස්මිං අනුඤ්ඤාතං.

පුච්ඡා – අකප්පියං ¶ ආවුසො සමාදපෙන්තස්ස දුක්කටං භගවතා කත්ථ පඤ්ඤත්තං, කං ආරබ්භ කිස්මිං වත්ථුස්මිං පඤ්ඤත්තං.

විස්සජ්ජනා – ආතුමායං භන්තෙ අඤ්ඤතරං වුඩ්ඪපබ්බජිතං ආරබ්භ පඤ්ඤත්තං, අඤ්ඤතරො භන්තෙ වුඩ්ඪපබ්බජිතො අකප්පියෙ සමාදපෙති, තස්මිං භන්තෙ වත්ථුස්මිං පඤ්ඤත්තං.

පුච්ඡා – සඞ්ඝිකානි ¶ වා ආවුසො පුග්ගලිකානි වා බීජානි පුග්ගලිකාය වා සඞ්ඝිකාය වා භූමියා රොපිතානි භාගං දත්වා පරිභුඤ්ජිතුං භගවතා කත්ථ අනුඤ්ඤාතං, කිස්මිං වත්ථුස්මිං අනුඤ්ඤාතං.

විස්සජ්ජනා – සාවත්ථියං භන්තෙ අනුඤ්ඤාතං, සාවත්ථියං භන්තෙ භගවති විහරති සඞ්ඝිකානිපි බීජානි පුග්ගලිකාය භූමියා රොපියිංසු, පුග්ගලිකානිපි බීජානි සඞ්ඝිකාය භූමියා රොපියිංසු, තස්මිං භන්තෙ වත්ථුස්මිං අනුඤ්ඤාතං.

පුච්ඡා – විනයමහාපදෙසසඞ්ඛාතානි ¶ ආවුසො චත්තාරි කප්පියාකප්පියඅනුලොමානි භගවතා කත්ථ පඤ්ඤත්තානි, කං ආරබ්භ කිස්මිං වත්ථුස්මිං පඤ්ඤත්තානි.

විස්සජ්ජනා – සාවත්ථියං භන්තෙ සම්බහුලෙ භික්ඛූ ආරබ්භ පඤ්ඤත්තානි, සම්බහුලානං භන්තෙ භික්ඛූනං කිස්මිඤ්චි කිස්මිඤ්චිඨානෙ කුක්කුච්චං උප්පජ්ජි, තස්මිං භන්තෙ වත්ථුස්මිං පඤ්ඤත්තානි.

පුච්ඡා – යාවකාලිකාදීහි ¶ සංසට්ඨානං ආවුසො යාමකාලිකාදීනං පරිභොගකාලමරියාදං භගවතා කත්ථ පඤ්ඤත්තං, කං ආරබ්භ කිස්මිං වත්ථුස්මිං පඤ්ඤත්තං.

විස්සජ්ජනා – සාවත්ථියං භන්තෙ සම්බහුලෙ භික්ඛූ ආරබ්භ පඤ්ඤත්තං, සම්බහුලානං භන්තෙ භික්ඛූනං එතදහොසි ‘‘කප්පති නුඛො යාවකාලිකෙන යාමකාලිකං සත්තාහකාලිකං යාවජීවිකං, න නුඛො කප්පති. කප්පතිනුඛො යාමකාලිකෙන සත්තාහකාලිකං යාවජීවිකං, න නුඛො කප්පති. කප්පති නුඛො සත්තාහකාලිකෙන යාවජීවිකං, න නුඛො කප්පතී’’ති. තස්මිං භන්තෙ වත්ථුස්මිං පඤ්ඤත්තං.

පුච්ඡා – භෙසජ්ජකං ¶ පුච්ඡිස්සං, සනිදානං සනිද්දෙසං. සමුක්කට්ඨපදානං ආවුසො කති ආපත්තියො.

විස්සජ්ජනා – භෙසජ්ජකං විස්සජ්ජිස්සං සනිදානං සනිද්දෙසං. සමුක්කට්ඨපදානං භන්තෙ තිස්සො ආපත්තියො.

පුච්ඡා – වස්සංවුට්ඨානං ¶ ආවුසො භික්ඛූනං කථිනං අත්ථරිතුං භගවතා කත්ථ අනුඤ්ඤාතං, කං ආරබ්භ කිස්මිං වත්ථුස්මිං අනුඤ්ඤාතං.

විස්සජ්ජනා – සාවත්ථියං භන්තෙ තිංසමත්තෙ පාවෙය්යකෙ භික්ඛූ ආරබ්භ අනුඤ්ඤාතං, තිංසමත්තා භන්තෙ පාවෙය්යකා භික්ඛූ සාවත්ථිං ආගච්ඡන්තා භගවන්තං දස්සනාය උපකට්ඨාය වස්සූපනායිකාය නාසක්ඛිංසු සාවත්ථියං වස්සූපනායිකං සම්භාවෙතුං, තස්මිං භන්තෙ වත්ථුස්මිං අනුඤ්ඤාතං.

පුච්ඡා – කථිනකං ¶ පුච්ඡිස්සං, සනිදානං සනිද්දෙසං. සමුක්කට්ඨපදානං ආවුසො කති ආපත්තියො.

විස්සජ්ජනා – කථිනකං විස්සජ්ජිස්සං, සනිදානං සනිද්දෙසං. සමුක්කට්ඨපදානං භන්තෙ න කතමා ආපත්ති.

පුච්ඡා – ගහපතිචීවරං ¶ ආවුසො සාදියිතුං භගවතා කත්ථ අනුඤ්ඤාතං, කං ආරබ්භ කිස්මිං වත්ථුස්මිං අනුඤ්ඤාතං.

විස්සජ්ජනා – රාජගහෙ භන්තෙ ජීවකං කොමාරභච්චං ආරබ්භ අනුඤ්ඤාතං, ජීවකො භන්තෙ කොමාරභච්චො භික්ඛූනං ගහපතිචීවරං අනුජානිතුං භගවන්තං යාචි, තස්මිං භන්තෙ වත්ථුස්මිං අනුඤ්ඤාතං.

පුච්ඡා – ඡ ¶ ආවුසො රජනානි භගවතා කත්ථ අනුඤ්ඤාතානි, කිස්මිං වත්ථුස්මිං අනුඤ්ඤාතානි.

විස්සජ්ජනා – රාජගහෙ භන්තෙ සම්බහුලෙ භික්ඛූ ආරබ්භ අනුඤ්ඤාතානි, සම්බහුලා භන්තෙ භික්ඛූ ඡකණෙනපි පණ්ඩුමත්තිකායපි චීවරං රජිංසු, චීවරං දුබ්බණ්ණං හොති, තස්මිං භන්තෙ වත්ථුස්මිං අනුඤ්ඤාතානි.

පුච්ඡා – අච්ඡින්නකානි ¶ ආවුසො චීවරානි ධාරෙන්තස්ස දුක්කටං භගවතා කත්ථ පඤ්ඤත්තං, කං ආරබ්භ කිස්මිං වත්ථුස්මිං පඤ්ඤත්තං.

විස්සජ්ජනා – රාජගහෙ භන්තෙ සම්බහුලෙ භික්ඛූ ආරබ්භ පඤ්ඤත්තං, සම්බහුලා භන්තෙ භික්ඛූ අච්ඡින්නකානි චීවරානි ධාරෙසුං දන්තකසාවානි, තස්මිං භන්තෙ වත්ථුස්මිං පඤ්ඤත්තං.

පුච්ඡා – කදා ආවුසො භගවා අනුඤ්ඤාසි ඡින්නකං සඞ්ඝාටිං ඡින්නකං උත්තරාසඞ්ගං ඡින්නකං අන්තරවාසකං.

විස්සජ්ජනා – දක්ඛිණාගිරිතො භන්තෙ පච්ඡාගතකාලෙ භගවා අනුඤ්ඤාසි ඡින්නකං සඞ්ඝාටිං ඡින්නකං උත්තරාසඞ්ගං ඡින්නකං අන්තරවාසකං.

පුච්ඡා – අග්ගළං ¶ ච ආවුසො තුන්නඤ්ච ඔවට්ටිකඤ්ච කණ්ඩුසකඤ්ච දළ්හීකම්මඤ්ච භගවතා කත්ථ අනුඤ්ඤාතං, කං ආරබ්භ කිස්මිං වත්ථුස්මිං අනුඤ්ඤාතං.

විස්සජ්ජනා – බාරාණසියං භන්තෙ අඤ්ඤතරං භික්ඛුං ආරබ්භ අනුඤ්ඤාතං, අඤ්ඤතරො භන්තෙ භික්ඛු අග්ගළං අච්ඡුපෙසි, තස්මිං භන්තෙ වත්ථුස්මිං අනුඤ්ඤාතං.

පුච්ඡා – වස්සිකසාටිකා ¶ ච ආවුසො ආගන්තුකභත්තඤ්ච ගමිකභත්තඤ්ච ගිලානභත්තඤ්ච ගිලානුපට්ඨාකභත්තඤ්ච ගිලානභෙසජ්ජඤ්ච ධුවයාගු ච භික්ඛුනිසඞ්ඝස්ස උදකසාටිකාචාති ඉමා අට්ඨ භගවතා කත්ථ අනුඤ්ඤාතා, කං ආරබ්භ කිස්මිං වත්ථුස්මිං අනුඤ්ඤාතා.

විස්සජ්ජනා – සාවත්ථියං භන්තෙ විසාඛං මිගාරමාතරං ආරබ්භ අනුඤ්ඤාතා, විසාඛා භන්තෙ මිගාරමාතා භගවන්තං අට්ඨවරානි යාචි, තස්මිං භන්තෙ වත්ථුස්මිං අනුඤ්ඤාතා.

පුච්ඡා – භගවතා ¶ ආවුසො මාතාපිතූනං දානං අනුජානිත්වා සද්ධාදෙය්යං විනිපාතෙන්තස්ස දුක්කටං කත්ථ පඤ්ඤත්තං, කං ආරබ්භ කිස්මිං වත්ථුස්මිං පඤ්ඤත්තං.

විස්සජ්ජනා – සාවත්ථියං භන්තෙ අඤ්ඤතරං භික්ඛුං ආරබ්භ පඤ්ඤත්තං, අඤ්ඤතරස්ස භන්තෙ භික්ඛුනො බහුං චීවරං උප්පන්නං අහොසි, සො ච තංචීවරං මාතාපිතූනං දාතුකාමො අහොසි, තස්මිං භන්තෙ වත්ථුස්මිං පඤ්ඤත්තං.

මාතාපිතරොති ¶ ඛො භික්ඛවෙ දදමානෙ කිං වදෙය්යාම, අනුජානාමි භික්ඛවෙ මාතාපිතූනං දාතුං, න ච භික්ඛවෙ සද්ධාදෙය්යං විනිපාතෙතබ්බං, යො විනිපාතෙය්ය ආපත්ති දුක්කටස්ස –

පුච්ඡා – අඤ්ඤත්ර වස්සං වුට්ඨෙන ආවුසො අඤ්ඤත්ර චීවරභාගං සාදියන්තස්ස දුක්කටං භගවතා කත්ථ පඤ්ඤත්තං, කං ආරබ්භ කිස්මිං වත්ථුස්මිං පඤ්ඤත්තං.

විස්සජ්ජනා – සාවත්ථියං භන්තෙ ආයස්මන්තං උපනන්දං සක්යපුත්තං ආරබ්භ පඤ්ඤත්තං, ආයස්මා භන්තෙ උපනන්දො සක්යපුත්තො අඤ්ඤත්ර වස්සං වුට්ඨො අඤ්ඤත්ර චීවරභාගං සාදියි, තස්මිං භන්තෙ වත්ථුස්මිං පඤ්ඤත්තං.

පුච්ඡා – අනාථකං ¶ ආවුසො භික්ඛුං ගිලානං න උපට්ඨහන්තස්ස දුක්කටං භගවතා කත්ථ පඤ්ඤත්තං, කං ආරබ්භ කිස්මිං වත්ථුස්මිං පඤ්ඤත්තං.

විස්සජ්ජනා – සාවත්ථියං භන්තෙ අඤ්ඤතරං භික්ඛුං ආරබ්භ පඤ්ඤත්තං, භගවති භන්තෙ සාවත්ථියං විහරති අඤ්ඤතරස්ස භික්ඛුනො කුච්ඡිවිකාරාබාධො අහොසි, සො සකෙ මුත්තකරීසෙ පලිපන්නො සයි, තස්මිං භන්තෙ වත්ථුස්මිං පඤ්ඤත්තං.

පුච්ඡා – නග්ගියං ¶ ආවුසො තිත්ථියසමාදානං සමාදියන්තස්ස ථුල්ලච්චයං භගවතා කත්ථ පඤ්ඤත්තං, කං ආරබ්භ කිස්මිං වත්ථුස්මිං පඤ්ඤත්තං.

විස්සජ්ජනා – සාවත්ථියං භන්තෙ අඤ්ඤතරං භික්ඛුං ආරබ්භ පඤ්ඤත්තං, අඤ්ඤතරො භන්තෙ භික්ඛු නග්ගියං තිත්ථියසමාදානං සමාදියි, තස්මිං භන්තෙ වත්ථුස්මිං පඤ්ඤත්තං.

පුච්ඡා – සබ්බනීලකානි ¶ වා ආවුසො චීවරානි සබ්බපීතකානි වා සබ්බලොහිතකානි වා සබ්බමඤ්ජිට්ඨකානි වා සබ්බකණ්හානිවාති එවරූපානි චීවරානි ධාරෙන්තස්ස දුක්කටං භගවතා කත්ථ පඤ්ඤත්තං, කං ආරබ්භ කිස්මිං වත්ථුස්මිං පඤ්ඤත්තං.

විස්සජ්ජනා – සාවත්ථියං ¶ භන්තෙ ඡබ්බග්ගියෙ භික්ඛූ ආරබ්භ පඤ්ඤත්තං, ඡබ්බග්ගියා භන්තෙ භික්ඛූ සබ්බනීලකාදීනි චීවරානි ධාරෙසුං, තස්මිං භන්තෙ වත්ථුස්මිං පඤ්ඤත්තං.

පුච්ඡා – කඤ්චුකං ¶ වා ආවුසො වෙඨනං වා ධාරෙන්තස්ස දුක්කටං භගවතා කත්ථ පඤ්ඤත්තං, කං ආරබ්භ කිස්මිං වත්ථුස්මිං පඤ්ඤත්තං.

විස්සජ්ජනා – සාවත්ථියං භන්තෙ ඡබ්බග්ගියෙව භික්ඛූ ආරබ්භ පඤ්ඤත්තං, ඡබ්බග්ගියා භන්තෙ භික්ඛූ කඤ්චුකම්පි ධාරෙසුං වෙඨනම්පි ධාරෙසුං, තස්මිං භන්තෙ වත්ථුස්මිං පඤ්ඤත්තං.

පුච්ඡා – චීවරසඤ්ඤුත්තං පුච්ඡිස්සං, සනිදානං සනිද්දෙසං. සමුක්කට්ඨපදානං ආවුසො කති ආපත්තියො.

විස්සජ්ජනා – චීවරසඤ්ඤුත්තං විස්සජ්ජිස්සං, සනිදානං සනිද්දෙසං. සමුක්කට්ඨපදානං භන්තෙ තිස්සො ආපත්තියො.

පුච්ඡා – සුද්ධං ¶ ආවුසො භික්ඛුං අනාපත්තිකං අවත්ථුස්මිං අකාරණෙ උක්ඛිපන්තස්ස දුක්කටං භගවතා කත්ථ පඤ්ඤත්තං, කං ආරබ්භ කිස්මිං වත්ථුස්මිං පඤ්ඤත්තං.

විස්සජ්ජනා – චම්පායං භන්තෙ සම්බහුලෙ භික්ඛූ ආරබ්භ පඤ්ඤත්තං, භගවති භන්තෙ චම්පායං විහරති සම්බහුලා භික්ඛූ කාසීසු වාසභගාමෙ සුද්ධං කස්සපගොත්තං භික්ඛුං අනාපත්තිකං අවත්ථුස්මිං අකාරණෙ උක්ඛිපිංසු, තස්මිං භන්තෙ වත්ථුස්මිං පඤ්ඤත්තං.

පුච්ඡා – චම්පෙය්යකං ¶ පුච්ඡිස්සං, සනිදානං සනිද්දෙසං. සමුක්කට්ඨපදානං ආවුසො කති ආපත්තියො.

විස්සජ්ජනා – චම්පෙය්යකං විස්සජ්ජිස්සං, සනිදානං සනිද්දෙසං. සමුක්කට්ඨපදානං භන්තෙ එකා ආපත්ති.

පුච්ඡා – භෙදගරුකෙහි ¶ භික්ඛවෙ භික්ඛූහි න සො භික්ඛු ආපත්තියා අදස්සනෙ උක්ඛිපිතබ්බොති ච, භෙදගරුකෙන භික්ඛවෙ භික්ඛුනා පරෙසම්පි සද්ධාය ආපත්තිදෙසෙතබ්බාති ච ආවුසො අයං සාමග්ගිරසඔවාදො භගවතා කත්ථ දින්නො, කං ආරබ්භ කිස්මිං වත්ථුස්මිං දින්නො.

විස්සජ්ජනා – කොසම්බියං භන්තෙ සම්බහුලෙ භික්ඛූ ආරබ්භ දින්නො, භගවති භන්තෙ කොසම්බියං විහරති අඤ්ඤතරො භික්ඛු ආපත්තිං ආපන්නො අහොසි, සො තස්සා ආපත්තියා ආපත්ති දිට්ඨි අහොසි, අඤ්ඤෙ භික්ඛූ තස්සා ආපත්තියා අනාපත්ති දිට්ඨිනො අහෙසුං. සො අපරෙන සමයෙන තස්සා ආපත්තියා අනාපත්තිදිට්ඨි අහොසි, අඤ්ඤෙ භික්ඛූ තස්සා ආපත්තියා ආපත්තිදිට්ඨිනො අහෙසුං. අථ ඛො තෙ භන්තෙ භික්ඛූ සාමග්ගිං ලභිත්වා තං භික්ඛුං ආපත්තියා අදස්සනෙ උක්ඛිපිංසු, තස්මිං භන්තෙ වත්ථුස්මිං දින්නො.

පුච්ඡා – සඞ්ඝභෙදස්ස ¶ ආවුසො මූලභූතෙ භික්ඛුම්හි උක්ඛිත්තකෙ ඔසාරිතෙ තස්ස වත්ථුස්ස වූපසමාය සඞ්ඝසාමග්ගිඤ්ච කාතුං සාමග්ගී උපොසථඤ්ච කාතුං භගවතා කත්ථ අනුඤ්ඤාතං, කං ආරබ්භ කිස්මිං වත්ථුස්මිං අනුඤ්ඤාතං.

විස්සජ්ජනා – සාවත්ථියං භන්තෙ තෙයෙව උක්ඛිත්තකානුවත්තකෙ භික්ඛූ ආරබ්භ අනුඤ්ඤාතං, තෙ භන්තෙ උක්ඛිත්තකානුවත්තකා භික්ඛූ තං උක්ඛිත්තකං භික්ඛුං ඔසාරෙත්වා යෙන උක්ඛෙපකා භික්ඛූ තෙනුපසඞ්කමිංසු උපසඞ්කමිත්වා තෙ උක්ඛෙපකෙ භික්ඛූ එකදවොචුං ‘‘යස්මිං ආවුසො වත්ථුස්මිං අහොසි සඞ්ඝස්ස ¶ භණ්ඩනං කලහො විග්ගහො විවාදො සඞ්ඝභෙදො සඞ්ඝරාජි සඞ්ඝවවත්ථානං සඞ්ඝනානාකරණං, සො එසො භික්ඛුං ආපන්නො ච උක්ඛිත්තො ච පස්සි ච ඔසාරිතො ච, හන්ද මයං ආවුසො තස්ස වත්ථුස්ස වූපසමාය සඞ්ඝසාමග්ගිං කරොමා’’ති, තස්මිං භන්තෙ වත්ථුස්මිං අනුඤ්ඤාතං.

පුච්ඡා – කොසම්බකං ¶ පුච්ඡිස්සං, සනිදානං සනිද්දෙසං. සමුක්කට්ඨපදානං ආවුසො කති ආපත්තියො.

විස්සජ්ජනා – කොසම්බකං විස්සජ්ජිස්සං, සනිදානං සනිද්දෙසං. සමුක්කට්ඨපදානං භන්තෙ එකා ආපත්ති.