අඤ්ඤ > සඞ්ගායන-පුච්ඡ විස්සජ්ජනා > විනයපිටක (පු-වි)

විස්සජ්ජනා – සාවත්ථියං භන්තෙ පණ්ඩුකලොහිතකෙ භික්ඛූ ආරබ්භ අනුඤ්ඤාතං, පණ්ඩුකලොහිතකා භන්තෙ භික්ඛූ අත්තනා භණ්ඩනකාරකා කලහකාරකා විවාදකාරකා භස්සකාරකා සඞ්ඝෙ අධිකරණකාරකා, යෙපි චඤ්ඤෙ භික්ඛූ භණ්ඩනකාරකා කලහකාරකා විවාදකාරකා භස්සකාරකා සඞ්ඝෙ අධිකරණකාරකා තෙ උපසඞ්කමිත්වා එවමාහංසු ‘‘මා ඛො තුම්හෙ ආයස්මන්තො එසො අජෙසි, බලවාබලවං පටිමන්තෙථ, තුම්හෙ තෙන පණ්ඩිතතරා ච බ්යත්තතරා ච බහුස්සුතතරා ච අලමත්තතරා ච, මා චස්ස භායිත්ථ, මයම්පි තුම්හාකං පක්ඛා භවිස්සාමා’’ති, තෙන අනුප්පන්නානි චෙව භණ්ඩනානි උප්පජ්ජන්ති, උප්පන්නානි ච භණ්ඩනානි භිය්යොභාවාය වෙපුල්ලාය සංවත්තන්ති. තස්මිං භන්තෙ වත්ථුස්මිං අනුඤ්ඤාතං.

පුච්ඡා – තජ්ජනීයකම්මකතස්ස ¶ ආවුසො භික්ඛුනො කතිසු වත්තෙසු සම්මා වත්තන්තස්ස තං කම්මං පටිප්පස්සම්භෙතුං භගවතා කත්ථ අනුඤ්ඤාතං, කං ආරබ්භ කිස්මිං වත්ථුස්මිං අනුඤ්ඤාතං.

විස්සජ්ජනා – අට්ඨාරසසු ¶ භන්තෙ වත්තෙසු සම්මා වත්තන්තස්ස තජ්ජනීයකම්මකතස්ස භික්ඛුනො තං කම්මං පටිප්පස්සම්භෙතුං භගවතා සාවත්ථියං අනුඤ්ඤාතං, තෙයෙව පණ්ඩුකලොහිතකා භික්ඛූ සඞ්ඝෙන තජ්ජනීයකම්මකතා සම්මා වත්තිත්වා සඞ්ඝං උපසඞ්කමිත්වා යාචිංසු, තස්මිං භන්තෙ වත්ථුස්මිං අනුඤ්ඤාතං.

පුච්ඡා – බාලස්ස ¶ ආවුසො අබ්යත්තස්ස ආපත්තිබහුලස්ස අනපදානස්ස ගිහිසංසට්ඨස්ස අනනුලොමිකෙහි ගිහිසංසග්ගෙහි නියස්සකම්මං කාතුං කත්ථ පඤ්ඤත්තං, කං ආරබ්භ කිස්මිං වත්ථුස්මිං පඤ්ඤත්තං.

විස්සජ්ජනා – සාවත්ථියං භන්තෙ ආයස්මන්තං සෙය්යසකං ආරබ්භ පඤ්ඤත්තං, ආයස්මා භන්තෙ සෙය්යසකො බාලො අහොසි අබ්යත්තො ආපත්තිබහුලො අනපදානො ගිහිසංසට්ඨො විහාසි අනනුලොමිකෙහි ගිහිසංසග්ගෙහි, තස්මිං භන්තෙ වත්ථුස්මිං පඤ්ඤත්තං.

පුච්ඡා – නියස්සකම්මකතස්ස ¶ ආවුසො භික්ඛුනො කතිසු වත්තෙසු සම්මා වත්තන්තස්ස තං කම්මං පටිප්පස්සම්භෙතුං භගවතා අනුඤ්ඤාතං.

විස්සජ්ජනා – අට්ඨාරසසු භන්තෙ වත්තෙසු සම්මා වත්තන්තස්ස නියස්ස කම්මකතස්ස භික්ඛුනො තං කම්මං පටිප්පස්සම්භෙතුං භගවතා අනුඤ්ඤාතං, න උපසම්පාදෙතබ්බං, න නිස්සයො දාතබ්බො, න සාමණෙරො උපට්ඨාපෙතබ්බො, න භික්ඛුනොවාදකසම්මුති සාදිතබ්බා, සම්මතෙනපි භික්ඛුනියො න ඔවදිතබ්බා, එවමාදීසු භන්තෙ අට්ඨාරසසු වත්තෙසු සම්මා වත්තන්තස්ස නියස්සකම්මකතස්ස භික්ඛුනො තං කම්මං පටිප්පස්සම්භෙතුං භගවතා අනුඤ්ඤාතං.

පුච්ඡා – කුලදූසකස්ස ¶ ආවුසො පාපසමාචාරස්ස භික්ඛුනො පබ්බාජනීයකම්මං කාතුං භගවතා කත්ථ අනුඤ්ඤාතං, කං ආරබ්භ කිස්මිං වත්ථුස්මිං අනුඤ්ඤාතං.

විස්සජ්ජනා – සාවත්ථියං භන්තෙ අස්සජිපුනබ්බසුකෙ භික්ඛූ ආරබ්භ අනුඤ්ඤාතං, අස්සජිපුනබ්බසුකා භන්තෙ භික්ඛූ කීටාගිරිස්මිං කුලදූසකා අහෙසුං පාපසමාචාරා, තස්මිං භන්තෙ වත්ථුස්මිං අනුඤ්ඤාතං.

පුච්ඡා – පටිසාරණීයකම්මං ¶ ආවුසො පුච්ඡාමි, සද්ධං ආවුසො පසන්නං ගහපතිං දායකං කාරකං සඞ්ඝුපට්ඨාකං හීනෙන ඛුංසෙන්තස්ස භික්ඛුනො ¶ පටිසාරණීයකම්මං කාතුං භගවතා කත්ථ අනුඤ්ඤාතං, කං ආරබ්භ කිස්මිං වත්ථුස්මිං අනුඤ්ඤාතං.

විස්සජ්ජනා – සාවත්ථියං භන්තෙ ආයස්මන්තං සුධම්මං ආරබ්භ අනුඤ්ඤාතං, භගවති භන්තෙ සාවත්ථියං විහරති ආයස්මා සුධම්මො මච්ඡිකාසණ්ඩෙ චිත්තං ගහපතිං සද්ධං පසන්නං දායකං කාරකං සඞ්ඝුපට්ඨාකං හීනෙන ඛුංසෙසි හීනෙන වම්භෙසි, තස්මිං භන්තෙ වත්ථුස්මිං අනුඤ්ඤාතං.

තෙනහි ¶ භික්ඛවෙ සඞ්ඝො සුධම්මස්ස භික්ඛුනො පටිසාරණීයකම්මං කරොතු ‘‘චිත්තො තෙ ගහපති ඛමාපෙතබ්බො’’ති –

පුච්ඡා – පටිසාරණීයකම්මකතස්ස ¶ ආවුසො භික්ඛුනො අනුදූතං දාතුඤ්ච තෙන අනුදූතෙන සද්ධිං ගන්ත්වා යථාඛුංසිතං ගහපතිං ඛමාපෙතුං ¶ ච භගවතා කත්ථ අනුඤ්ඤාතං, කං ආරබ්භ කිස්මිං වත්ථුස්මිං අනුඤ්ඤාතං.

විස්සජ්ජනා – සාවත්ථියං භන්තෙ ආයස්මන්තංයෙව සුධම්මං ආරබ්භ අනුඤ්ඤාතං, ආයස්මා භන්තෙ සුධම්මො මච්ඡිකාසණ්ඩං ගන්ත්වා මඞ්කුභූතො නාසක්ඛි චිත්තං ගහපතිං ඛමාපෙතුං, තස්මිං භන්තෙ වත්ථුස්මිං අනුඤ්ඤාතං.

පුච්ඡා – පටිසාරණීයකම්මකතස්ස ¶ ආවුසො භික්ඛුනො කතිසු වත්තෙසු සම්මා වත්තන්තස්ස තං කම්මං පටිප්පස්සම්භෙතුං භගවතා අනුඤ්ඤාතං.

විස්සජ්ජනා – අට්ඨාරසසු භන්තෙ වත්තෙසු සම්මා වත්තන්තස්ස පටිසාරණීය කම්මකතස්ස භික්ඛුනො තං කම්මං පටිප්පස්සම්භෙතුං භගවතා අනුඤ්ඤාතං.

පුච්ඡා – ආපත්තිං ¶ ආවුසො ආපජ්ජිත්වා තං ආපත්තිං පස්සිතුං වා පටිකාතුං වා න ඉච්ඡන්තස්ස භික්ඛුනො ආපත්තියා අදස්සනෙ වා අප්පටිකම්මෙ වා උක්ඛෙපනීයකම්මං කාතුං භගවතා කත්ථ පඤ්ඤත්තං, කං ආරබ්භ කිස්මිං වත්ථුස්මිං පඤ්ඤත්තං.

විස්සජ්ජනා – කොසම්බියං භන්තෙ ආයස්මන්තං ඡන්නත්ථෙරං ආරබ්භ පඤ්ඤත්තං, ආයස්මා භන්තෙ ඡන්නො ආපත්තිං ආපජ්ජිත්වා න ඉච්ඡි තං ආපත්තිං පස්සිතුං වා පටිකාතුං වා, තස්මිං භන්තෙ වත්ථුස්මිං පඤ්ඤත්තං.

පුච්ඡා – ආපත්තියා ¶ ආවුසො අදස්සනෙන වා අප්පටිකම්මෙ වා උක්ඛෙපනීය කම්මකතෙන භික්ඛුනා කතිසු වත්තෙසු සම්මා වත්තිතබ්බං.

විස්සජ්ජනා – තෙචත්තාලීසාය භන්තෙ වත්තෙසු සම්මා වත්තිතබ්බං.

පුච්ඡා – උක්ඛෙපනීයකම්මකතස්ස ¶ ආවුසො භික්ඛුනො සම්මා වත්තන්තස්ස තං කම්මං පටිප්පස්සම්භෙතුං භගවතා කත්ථ අනුඤ්ඤාතං, කං ආරබ්භ කිස්මිං වත්ථුස්මිං අනුඤ්ඤාතං.

විස්සජ්ජනා – කොසම්බියං භන්තෙ ආයස්මන්තංයෙව ඡන්නං ආරබ්භ අනුඤ්ඤාතං, ආයස්මා භන්තෙ ඡන්නො සඞ්ඝෙන ආපත්තියා අදස්සනෙ වා අප්පටිකම්මෙ වා උක්ඛෙපනීයකම්මකතො සම්මා වත්තෙසි ලොමංපාතෙසි නෙත්ථාරං වත්තෙසි සඞ්ඝං උපසඞ්කමිත්වා තස්ස කම්මස්ස පටිප්පස්සද්ධියා යාචි, තස්මිං භන්තෙ වත්ථුස්මිං අනුඤ්ඤාතං.

පුච්ඡා – පාපිකං ¶ ආවුසො දිට්ඨිං ගහෙත්වා තං දිට්ඨිං න පටිනිස්සජ්ජන්තස්ස පාපිකාය දිට්ඨියා අප්පටිනිස්සග්ගෙ උක්ඛෙපනීයකම්මං කාතුං භගවතා කත්ථ පඤ්ඤත්තං, කං ආරබ්භ කිස්මිං වත්ථුස්මිං පඤ්ඤත්තං.

විස්සජ්ජනා – සාවත්ථියං භන්තෙ අරිට්ඨං භික්ඛුං ගද්ධබාධිපුබ්බං ආරබ්භ පඤ්ඤත්තං, භගවති භන්තෙ සාවත්ථියං විහරති අරිට්ඨස්ස නාම භික්ඛුනො ගද්ධබාධිපුබ්බස්ස එවරූපං පාපකං දිට්ඨිගතං උප්පන්නං අහොසි ‘‘තථාහං භගවතා ධම්මං දෙසිතං ආජානාමි, යථායෙමෙ අන්තරායිකා ධම්මා වුත්තා භගවතා, තෙ පටිසෙවතො ¶ නාලං අන්තරායායා’’ති, තස්මිං භන්තෙ වත්ථුස්මිං පඤ්ඤත්තං.

පුච්ඡා – පාපිකාය ආවුසො දිට්ඨියා අප්පටිනිස්සග්ගෙ උක්ඛෙපනීයකම්මකතෙන භික්ඛුනා කතිසු වත්තෙසු සම්මා වත්තිතබ්බං.

විස්සජ්ජනා – තෙචත්තාලීසාය ¶ භන්තෙ වත්තෙසු සම්මා වත්තිතබ්බං.

පුච්ඡා – කම්මක්ඛන්ධකං පුච්ඡිස්සං, සනිදානි සනිද්දෙසං. සමුක්කට්ඨපදානං ආවුසො කති ආපත්තියො.

විස්සජ්ජනා – කම්මක්ඛන්ධකං විස්සජ්ජිස්සං, සනිදානං සනිද්දෙසං. සමුක්කට්ඨපදානං භන්තෙ එකා ආපත්ති.

පුච්ඡා – පාරිවාසිකස්ස ¶ ආවුසො පකතත්තානං භික්ඛූනං අභිවාදනාදීනි සාදියන්තස්ස දුක්කටං භගවතා කත්ථ පඤ්ඤත්තං, කං ආරබ්භ කිස්මිං වත්ථුස්මිං පඤ්ඤත්තං.

විස්සජ්ජනා – සාවත්ථියං භන්තෙ පාරිවාසිකෙ භික්ඛූ ආරබ්භ පඤ්ඤත්තං, පාරිවාසිකා භන්තෙ භික්ඛූ සාදියිංසු පකතත්තානං භික්ඛූනං අභිවාදනාදීනි, තස්මිං භන්තෙ වත්ථුස්මිං පඤ්ඤත්තං.

පුච්ඡා – පාරිවාසිකෙන ¶ ආවුසො භික්ඛුනා කතිසු වත්තෙසු සම්මා වත්තිතබ්බං.

විස්සජ්ජනා – පාරිවාසිකෙන භන්තෙ භික්ඛුනා චතුනවුතියා වත්තෙසු සම්මා වත්තිතබ්බං.

පුච්ඡා – පාරිවාසිකං පුච්ඡිස්සං, සනිදානං සනිද්දෙසං. සමුක්කට්ඨපදානං ආවුසො කති ආපත්තියො.

විස්සජ්ජනා – පාරිවාසිකං විස්සජ්ජිස්සං, සනිදානං සනිද්දෙසං. සමුක්කට්ඨපදානං භන්තෙ එකා ආපත්ති.

පුච්ඡා – සමුච්චයං ¶ පුච්ඡිස්සං, සනිදානං සනිද්දෙසං. සමුක්කට්ඨපදානං ආවුසො කති ආපත්තියො.

විස්සජ්ජනා – සමුච්චයං විස්සජ්ජිස්සං, සනිදානං සනිද්දෙසං. සමුක්කට්ඨපදානං භන්තෙ එකා ආපත්ති.

පුච්ඡා – අසම්මුඛීභූතානං ¶ ආවුසො භික්ඛූනං තජ්ජනීයං වා නියස්සං වා පබ්බාජනීයං වා පටිසාරණීයං වා උක්ඛෙපනීයං වා කම්මං කරොන්තස්ස දුක්කටං භගවතා කත්ථ පඤ්ඤත්තං, කං ආරබ්භ කිස්මිං වත්ථුස්මිං පඤ්ඤත්තං.

විස්සජ්ජනා – සාවත්ථියං භන්තෙ ඡබ්බග්ගියෙ භික්ඛූ ආරබ්භ පඤ්ඤත්තං, ඡබ්බග්ගියා භන්තෙ භික්ඛූ අසම්මුඛීභූතානං භික්ඛූනං කම්මං අකංසු තජ්ජනීයම්පි නියස්සම්පි පබ්බාජනීයම්පි පටිසාරණීයම්පි උක්ඛෙපනීයම්පි, තස්මිං භන්තෙ වත්ථුස්මිං පඤ්ඤත්තං.

පුච්ඡා – සතිවෙපුල්ලපත්තස්ස ¶ ආවුසො භික්ඛුනො සතිවිනයං දානං භගවතා කත්ථ අනුඤ්ඤාතං, කං ආරබ්භ කිස්මිං වත්ථුස්මිං අනුඤ්ඤාතං.

විස්සජ්ජනා – රාජගහෙ භන්තෙ මෙත්තියභූමජකෙ භික්ඛූ ආරබ්භ අනුඤ්ඤාතං මෙත්තියභූමජකා භන්තෙ භික්ඛූ ආයස්මන්තං දබ්බං මල්ලපුත්තං අමූලිකාය සීලවිපත්තියා අනුද්ධංසෙසුං, තස්මිං භන්තෙ වත්ථුස්මිං අනුඤ්ඤාතං.

පුච්ඡා – කතිපනාවුසො ¶ එත්ථ ධම්මිකානි සතිවිනයදානානි.

විස්සජ්ජනා – පඤ්චිමානි භන්තෙ ධම්මිකානි සතිවිනයස්ස දානානි, සුද්ධො හොති භික්ඛු අනාපත්තිකො, අනුවදන්ති ච නං, යාචති ච, තස්ස සඞ්ඝො සතිවිනයං දෙති ධම්මෙන සමග්ගෙන, ඉමානි ඛො භන්තෙ පඤ්ච ධම්මිකානි සති විනයස්ස දානානි.

පුච්ඡා – අමූළ්හස්ස ¶ ආවුසො භික්ඛුනො අමූළ්හවිනයං දාතුං භගවතා කත්ථ අනුඤ්ඤාතං, කං ආරබ්භ කිස්මිං වත්ථුස්මිං අනුඤ්ඤාතං.

විස්සජ්ජනා – රාජගහෙ භන්තෙ සම්බහුලෙ භික්ඛූ ආරබ්භ අනුඤ්ඤාතං, සම්බහුලා භන්තෙ භික්ඛූ ගග්ගං භික්ඛුං උම්මත්තකෙන චිත්තවිපරියාසකතෙන ¶ අජ්ඣාචිණ්ණෙන ආපත්තියා චොදෙසුං ‘‘සරතා යස්මා එවරූපිං ආපත්තිං ආපජ්ජිතා’’ති, සො එවං වදෙති ‘‘අහං ඛො ආවුසො උම්මත්තකො අහොසි චිත්තවිපරියාසකතො, තෙන මෙ උම්මත්තකෙන චිත්තවිපරියාසකතෙන බහුං අස්සාමණකං අජ්ඣාචිණ්ණං භාසිතපරික්කන්තං, නාහං තං සරාමි, මූළ්හෙන මෙ එතං කත’’න්ති. එවම්පි නං වුච්චමානා චොදෙන්තෙව ‘‘සරතා යස්මා එවරූපිං ආපත්තිං ආපජ්ජිතා’’ති, තස්මිං භන්තෙ වත්ථුස්මිං අනුඤ්ඤාතං.

පුච්ඡා – කති ¶ ආවුසො අධම්මිකානි අමූළ්හවිනයස්ස දානානි, විභජිත්වා කථෙහි.

විස්සජ්ජනා – තීණි භන්තෙ අධම්මිකානි අමූළ්හවිනයස්ස දානානි, ඉධ භන්තෙ භික්ඛු ආපත්තිං ආපන්නො හොති, තමෙනං චොදෙති සඞ්ඝො වා සම්බහුලා වා එකපුග්ගලො වා ‘‘සරතායස්මා එවරූපිං ආපත්තිං ආපජ්ජිතා’’ති, සො සරමානොව එවං වදෙති ‘‘න ඛො අහං ආවුසො සරාමි එවරූපිං ආපත්තිං ආපජ්ජිතා’’ති. අඤ්ඤො සරමානොව එවං වදෙති ‘‘සරාමි ඛො අහං ආවුසො යථා සුපිනන්තෙනා’’ති. අඤ්ඤො අනුම්මත්තකොව උම්මත්තකාලයං කරොති ‘‘අහම්පි ඛො එවං කරොමි, තුම්හෙපි එවං කරොථ, මය්හම්පි එතං කප්පති, තුම්හාකම්පෙතං කප්පතී’’ති. එසං සඞ්ඝො අමූළ්හවිනයං දෙති, අධම්මිකං භන්තෙ අමූළ්හවිනයස්ස දානං. ඉමානි ඛො භන්තෙ තීණි අධම්මිකානි අමූළ්හවිනයස්ස දානානි.

පුච්ඡා – කති ¶ ආවුසො ධම්මිකානි අමූළ්හවිනයස්ස දානානි, විභජිත්වා කථෙහි.

විස්සජ්ජනා – තීණි භන්තෙ ධම්මිකානි අමූළ්හවිනයස්ස දානානි, ඉධ භන්තෙ භික්ඛු උම්මත්තකො හොති චිත්තවිපරියාසකතො තෙන උම්මත්තකෙන චිත්තවිපරියාසකතෙන බහුං අස්සාමණකං අජ්ඣාචිණ්ණං හොති භාසිතපරික්කන්තං, තමෙනං චොදෙති සඞ්ඝො වා සම්බහුලා වා එකපුග්ගලො වා ‘‘සරතායස්මා එවරූපිං ආපත්තිං ආපජ්ජිතා’’ති, සො අස්සරමානොව එවං වදෙති ‘‘න ඛො අහං ආවුසො සරාමි එවරූපිං ආපත්තිං ආපජ්ජිතා’’ති. අඤ්ඤොපි අස්සරමානොව එවං වදෙති ‘‘සරාමි ඛො අහං ආවුසො යථා සුපිනන්තෙනා’’ති. අඤ්ඤොපි උම්මත්තකොව උම්මත්තකාලයං කරොති ‘‘අහම්පි එවං කරොමි, තුම්හෙපි එවං කරොථ, මය්හම්පි එතං කප්පති, තුම්හාකම්පෙතං කප්පතී’’ති. එසං භන්තෙ තිණ්ණං භික්ඛූනං සඞ්ඝො අමූළ්හවිනයං දෙති, ධම්මිකං භන්තෙ අමූළ්හවිනයස්ස දානං. ඉමානි ඛො භන්තෙ තීණි ධම්මිකානි අමූළ්හවිනයස්ස දානානි.

පුච්ඡා – අප්පටිඤ්ඤාය ¶ ආවුසො භික්ඛූනං තජ්ජනීයාදීනි කම්මානි කරොන්තස්ස දුක්කටං භගවතා කත්ථ පඤ්ඤත්තං, කං ආරබ්භ කිස්මිං වත්ථුස්මිං පඤ්ඤත්තං.

විස්සජ්ජනා – රාජගහෙ ¶ භන්තෙ ඡබ්බග්ගියෙ භික්ඛූ ආරබ්භ පඤ්ඤත්තං, ඡබ්බග්ගියා භන්තෙ භික්ඛූ අප්පටිඤ්ඤාය භික්ඛූනං කම්මානි අකංසු තජ්ජනීයාදීනි, තස්මිං භන්තෙ වත්ථුස්මිං පඤ්ඤත්තං.

පුච්ඡා – කථං ආවුසො අධම්මිකං හොති පටිඤ්ඤාතකරණං.

විස්සජ්ජනා – අඤ්ඤථා භන්තෙ ආපත්තිං ආපජ්ජන්තස්ස අඤ්ඤථා පටිජානන්තස්ස යථා සො පටිජානාති, තථා සඞ්ඝො කාරෙති, එවං ඛො භන්තෙ අධම්මිකං හොති පටිඤ්ඤාතකරණං.

පුච්ඡා – කථං ¶ ආවුසො ධම්මිකං හොති පටිඤ්ඤාතකරණං.

විස්සජ්ජනා – යං භන්තෙ ආපත්තිං ආපජ්ජන්තස්ස තමෙව පටිජානන්තස්ස තෙනෙව සඞ්ඝො කාරෙති, එවං ඛො භන්තෙ ධම්මිකං පටිඤ්ඤාතකරණං.

පුච්ඡා – යෙභුය්යසිකාය ¶ ආවුසො අධිකරණං වූපසමෙතුං භගවතා කත්ථ අනුඤ්ඤාතං, කං ආරබ්භ කිස්මිං වත්ථුස්මිං අනුඤ්ඤාතං.

විස්සජ්ජනා – රාජගහෙ ¶ භන්තෙ සම්බහුලෙ භික්ඛූ ආරබ්භ අනුඤ්ඤාතං, සම්බහුලා භන්තෙ භික්ඛූ භණ්ඩනජාතා කලහජාතා විවාදාපන්නා අඤ්ඤමඤ්ඤං මුඛසත්තීහි විතුදන්තා විහරිංසු, න සක්කොන්ති තං අධිකරණං වූපසමෙතුං, තස්මිං භන්තෙ වත්ථුස්මිං අනුඤ්ඤාතං.

පුච්ඡා – කථං ආවුසො අධිකරණං යෙභුය්යසිකාය වූපසමෙතබ්බං.

විස්සජ්ජනා – පඤ්චහි භන්තෙ අඞ්ගෙහි සමන්නාගතො භික්ඛු සලාකග්ගාහාපකො සම්මන්නිතබ්බො, තෙන භන්තෙ සලාකග්ගාහාපකෙන ¶ සලාකා ගාහාතබ්බා යථා බහුතරා භික්ඛූ ධම්මවාදිනො වදන්ති තථා තං අධිකරණං වූපසමෙතබ්බං, එවං ඛො භන්තෙ යෙභුය්යසිකාය අධිකරණං වූපසමෙතබ්බං.

පුච්ඡා – කති ¶ ආවුසො අධම්මිකා සලාකග්ගාහා.

විස්සජ්ජනා – දස භන්තෙ අධම්මිකා සලාකග්ගාහා, ඔරමත්තකඤ්ච අධිකරණං හොති, න ච ගතිගතං හොති, න ච සරිතසාරිතං හොති, ජානාති ‘අධම්මවාදී බහුතරා’ති, අප්පෙව නාම අධම්මවාදී බහුතරා අස්සූති, ජානාති ‘සඞ්ඝො භිජ්ජිස්සතී’ති, අප්පෙව නාම සඞ්ඝො භිජ්ජෙය්යාති, අධම්මෙන ගණ්හන්ති, වග්ගා ගණ්හන්ති, න ච යථාදිට්ඨියා ගණ්හන්ති, ඉමෙ ඛො භන්තෙ දස අධම්මිකා කලාකග්ගාහා.

පුච්ඡා – කති ¶ ආවුසො ධම්මිකා සලාකග්ගාහා.

විස්සජ්ජනා – දස භන්තෙ ධම්මිකා සලාකග්ගාහා වුත්තවිපරියායෙන.

පුච්ඡා – පාපුස්සන්නස්ස ආවුසො භික්ඛුස්ස තස්ස පාපියසිකා කම්මං කාතුං භගවතා කත්ථ පඤ්ඤත්තං, කං ආරබ්භ කිස්මිං වත්ථුස්මිං පඤ්ඤත්තං.

විස්සජ්ජනා – රාජගහෙ භන්තෙ උපවාළං භික්ඛුං ආරබ්භ පඤ්ඤත්තං, උපවාළො භන්තෙ භික්ඛු සඞ්ඝමජ්ඣෙ ආපත්තියා අනුයුඤ්ජියමානො අවජානිත්වා පටිජානාති, පටිජානිත්වා අවජානාති, අඤ්ඤෙනඤ්ඤං පටිචරති, සම්පජානමුසා භාසති, තස්මිං භන්තෙ වත්ථුස්මිං පඤ්ඤත්තං.

පුච්ඡා – කති ¶ ආවුසො ධම්මිකානි තස්සපාපියසිකා කම්මස්ස කරණානි.

විස්සජ්ජනා – පඤ්චිමානි භන්තෙ ධම්මිකානි තස්සපාපියසිකා කම්මස්ස කරණානි. අසුචි ච හොති, අලජ්ජී ච, සානුවාදො ච, තස්ස සඞ්ඝො තස්සපාපියසිකා කම්මං කරොති ධම්මෙන සමග්ගෙන, ඉමානි ඛො භන්තෙ පඤ්ච ධම්මිකානි තස්ස පාපියසිකා කම්මස්ස කරණානි.

පුච්ඡා – තස්ස ¶ පාපියසිකාකම්මකතෙන ආවුසො භික්ඛුනා කතිසු වත්තෙසු සම්මා වත්තිතබ්බං.

විස්සජ්ජනා – තස්ස පාපියසිකාකම්මකතෙන භන්තෙ භික්ඛුනා අට්ඨාරසසු වත්තෙසු සම්මා වත්තිතබ්බං. න උපසම්පාදෙතබ්බං, න නිස්සයො දාතබ්බො, න සාමණෙරො උපට්ඨාපෙතබ්බො, එවමාදීසු භන්තෙ අට්ඨාරසසු වත්තෙසු සම්මා වත්තිතබ්බං.

පුච්ඡා – කති ¶ ආවුසො අධිකරණානි සමථෙහි වූපසමෙතබ්බානි.

විස්සජ්ජනා – චත්තාරිමානි භන්තෙ අධිකරණානි සමථෙහි වූපසමෙතබ්බානි, විවාදාධිකරණං අනුවාදාධිකරණං ආපත්තාධිකරණං කිච්චාධිකරණං, ඉමානි භන්තෙ චත්තාරි අධිකරණානි සමථෙහි වූපසමෙතබ්බානි.

පුච්ඡා – කිං ¶ ආවුසො විවාදාධිකරණස්ස මූලං.

විස්සජ්ජනා – ඡ භන්තෙ විවාදමූලානි විවාදාධිකරණස්ස මූලං, තීණිපි අකුසලමූලානි විවාදාධිකරණස්ස මූලං, තීණිපි කුසලමූලානි විවාදාධිකරණස්ස මූලං, ඉදං භන්තෙ විවාදාධිකරණස්ස මූලං.

පුච්ඡා – කිං ¶ පනාවුසො අනුවාදාධිකරණස්ස මූලං.

විස්සජ්ජනා – ඡ භන්තෙ අනුවාදමූලානි අනුවාදාධිකරණස්ස මූලං, තීණිපි අකුසලමූලානි අනුවාදාධිකරණස්ස මූලං, තීණිපි කුසලමූලානි අනුවාදාධිකරණස්ස මූලං, කායොපි අනුවාදාධිකරණස්ස මූලං, වාචාපි අනුවාදාධිකරණස්ස මූලං, ඉදං ඛො භන්තෙ අනුවාදාධිකරණස්ස මූලං.

පුච්ඡා – කිං ¶ පනාවුසො ආපත්තාධිකරණස්ස මූලං.

විස්සජ්ජනා – ඡ භන්තෙ ආපත්තිසමුට්ඨානා ආපත්තාධිකරණස්ස මූලං, අත්ති භන්තෙ ආපත්ති කායතො සමුට්ඨාති න වාචතො න චිත්තතො, අත්ථි භන්තෙ ආපත්ති වාචතො සමුට්ඨාති න කායතො න චිත්තතො, අත්ථි භන්තෙ ආපත්ති කායතො ¶ ච වාචතො ච සමුට්ඨාති න චිත්තතො, අත්ථි භන්තෙ ආපත්ති කායතො ච චිත්තතො ච සමුට්ඨාති න වාචතො, අත්ථි භන්තෙ ආපත්ති වාචතො ච චිත්තතො ච සමුට්ඨාති න කායතො, අත්ථි භන්තෙ ආපත්ති කායතො ච වාචතො ච චිත්තතො ච සමුට්ඨාති, ඉමානි භන්තෙ ඡ ආපත්ති සමුට්ඨානානි ආපත්තාධිකරණස්ස මූලං.

පුච්ඡා – කිං ¶ පනාවුසො කිච්චාධිකරණස්ස මූලං.

විස්සජ්ජනා – කිච්චාධිකරණස්ස භන්තෙ එකං මූලං සඞ්ඝො.

පුච්ඡා – සමථං ආවුසො පුච්ඡිස්සං, සනිදානං සනිද්දෙසං. සමුක්කට්ඨපදානං ආවුසො කති ආපත්තියො.

විස්සජ්ජනා – සමථං භන්තෙ විස්සජ්ජිස්සං, සනිදානං සනිද්දෙසං. සමුක්කට්ඨපදානං භන්තෙ ද්වෙ ආපත්තියො.

පුච්ඡා – නහායන්තෙන ¶ ආවුසො භික්ඛුනා රුක්ඛෙ වා ථම්භෙ වා කුට්ටෙ වා කායං උග්ඝංසෙන්තස්ස දුක්කටං භගවතා කත්ථ පඤ්ඤත්තං, කං ආරබ්භ කිස්මිං වත්ථුස්මිං පඤ්ඤත්තං.

විස්සජ්ජනා – රාජගහෙ භන්තෙ ඡබ්බග්ගියෙ භික්ඛූ ආරබ්භ පඤ්ඤත්තං, ඡබ්බග්ගියා භන්තෙ භික්ඛූ නහායමානා රුක්ඛෙපි ථම්භෙපි කුට්ටෙපි කායං උග්ඝංසෙසුං, තස්මිං භන්තෙ වත්ථුස්මිං පඤ්ඤත්තං.

පුච්ඡා – ගන්ධබ්බහත්ථකෙන වා ආවුසො කුරුවින්දකසුත්තියා වා මල්ලකෙන වා නහායන්තස්ස දුක්කටං භගවතා කත්ථ පඤ්ඤත්තං, කං ආරබ්භ කිස්මිං වත්ථුස්මිං පඤ්ඤත්තං.

විස්සජ්ජනා – රාජගහෙ භන්තෙ ඡබ්බග්ගියෙව භික්ඛූ ආරබ්භ පඤ්ඤත්තං, ඡබ්බග්ගියා භන්තෙ භික්ඛූ ගන්ධබ්බහත්ථකෙනපි කුරුවින්දකසුත්තියාපි ¶ මල්ලකෙනපි නහායිංසු, තස්මිං භන්තෙ වත්ථුස්මිං පඤ්ඤත්තං.

පුච්ඡා – පාණිනා ආවුසො පරිකම්මං කාතුං භගවතා කත්ථ අනුඤ්ඤාතං, කං ආරබ්භ කිස්මිං වත්ථුස්මිං අනුඤ්ඤාතං.

විස්සජ්ජනා – රාජගහෙ භන්තෙ සම්බහුලෙ භික්ඛූ ආරබ්භ අනුඤ්ඤාතං, සම්බහුලා භන්තෙ භික්ඛූ පිට්ඨිපරිකම්මං කාතුං කුක්කුච්චායිංසු, තස්මිං භන්තෙ වත්ථුස්මිං අනුඤ්ඤාතං.

පුච්ඡා – වල්ලිකං ¶ වා ආවුසො පාමඞ්ගං වා කණ්ඨසුත්තකං වා කටිසුත්තකං වා ඔවට්ටිකං වා කායුරං වා හත්ථාභරණං වා අඞ්ගුලිමුද්දිකං වා ධාරෙන්තස්ස දුක්කටං භගවතා කත්ථ පඤ්ඤත්තං, කං ආරබ්භ කිස්මිං වත්ථුස්මිං පඤ්ඤත්තං.

විස්සජ්ජනා – රාජගහෙ භන්තෙ ඡබ්බග්ගියෙ භික්ඛූ ආරබ්භ පඤ්ඤත්තං, ඡබ්බග්ගියා භන්තෙ භික්ඛූ වල්ලිකාදීනි ධාරෙසුං, තස්මිං භන්තෙ වත්ථුස්මිං පඤ්ඤත්තං.

පුච්ඡා – දීඝෙ ¶ ආවුසො කෙසෙ ධාරෙන්තස්ස දුක්කටං භගවතා කත්ථ පඤ්ඤත්තං, කං ආරබ්භ කිස්මිං වත්ථුස්මිං පඤ්ඤත්තං.

විස්සජ්ජනා – රාජගහෙ භන්තෙ ඡබ්බග්ගියෙ භික්ඛූ ආරබ්භ පඤ්ඤත්තං, ඡබ්බග්ගියා භන්තෙ භික්ඛූ දීඝෙ කෙසෙ ධාරෙසුං, තස්මිං භන්තෙ වත්ථුස්මිං පඤ්ඤත්තං.

පුච්ඡා – කොච්ඡෙනවා ¶ ආවුසො ඵණකෙනවා හත්ථඵණකෙනවා කෙසෙ ඔසණ්ඨෙන්තස්ස දුක්කටං භගවතා කත්ථ පඤ්ඤත්තං, කං ආරබ්භ කිස්මිං වත්ථුස්මිං පඤ්ඤත්තං.

විස්සජ්ජනා – රාජගහෙ භන්තෙ ඡබ්බග්ගියෙව භික්ඛූ ආරබ්භ පඤ්ඤත්තං, ඡබ්බග්ගියා භන්තෙ භික්ඛූ කොච්ඡාදීහි කෙසෙ ඔසණ්ඨෙසුං, තස්මිං භන්තෙ වත්ථුස්මිං පඤ්ඤත්තං.

පුච්ඡා – ආදාසෙ ¶ වා ආවුසො උදකපත්තෙ වා මුඛනිමිත්තං ඔලොකෙන්තස්ස දුක්කටං භගවතා කත්ථ පඤ්ඤත්තං, කං ආරබ්භ කිස්මිං වත්ථුස්මිං පඤ්ඤත්තං.

විස්සජ්ජනා – රාජගහෙ භන්තෙ ඡබ්බග්ගියෙව භික්ඛූ ආරබ්භ පඤ්ඤත්තං, ඡබ්බග්ගියා භන්තෙ භික්ඛූ ආදාසෙපි උදකපත්තෙපි මුඛනිමිත්තං ඔලොකෙසුං, තස්මිං භන්තෙ වත්ථුස්මිං පඤ්ඤත්තං.

පුච්ඡා – ආබාධපච්චයා ¶ පනාවුසො ආදාසෙ වා උදකපත්තෙ වා මුඛනිමිත්තං ඔලොකෙතුං භගවතා කත්ථ අනුඤ්ඤාතං, කං ආරබ්භ කිස්මිං වත්ථුස්මිං අනුඤ්ඤාතං.

විස්සජ්ජනා – රාජගහෙ භන්තෙ අඤ්ඤතරං භික්ඛුං ආරබ්භ අනුඤ්ඤාතං, භගවති භන්තෙ රාජගහෙ විහරති අඤ්ඤතරස්ස භික්ඛුනො මුඛෙ වණො අහොසි, සො භික්ඛූ එතදවොච ‘‘කීදිසො මෙ ආවුසො වණො’’ති, භික්ඛූ එවමාහංසු ‘‘එදිසො තෙ ආවුසො වණො’’ති, සො න සද්දහති, තස්මිං භන්තෙ වත්ථුස්මිං අනුඤ්ඤාතං.

පුච්ඡා – මුඛාලෙපනාදීනි ¶ ආවුසො කරොන්තස්ස දුක්කටං භගවතා කත්ථ පඤ්ඤත්තං, කං ආරබ්භ කිස්මිං වත්ථුස්මිං පඤ්ඤත්තං.

විස්සජ්ජනා – රාජගහෙ භන්තෙ ඡබ්බග්ගියෙ භික්ඛූ ආරබ්භ පඤ්ඤත්තං, ඡබ්බග්ගියා භන්තෙ භික්ඛූ මුඛාලෙපනාදීනි අකංසු, තස්මිං භන්තෙ වත්ථුස්මිං පඤ්ඤත්තං.

පුච්ඡා – නච්චං ¶ වා ආවුසො ගීතං වා වාදිතං වා දස්සනාය ගච්ඡන්තස්ස දුක්කටං භගවතා කත්ථ පඤ්ඤත්තං, කං ආරබ්භ කිස්මිං වත්ථුස්මිං පඤ්ඤත්තං.

විස්සජ්ජනා – රාජගහෙ භන්තෙ ඡබ්බග්ගියෙ භික්ඛූ ආරබ්භ පඤ්ඤත්තං, ඡබ්බග්ගියා භන්තෙ නච්චම්පි ගීතම්පි වාදිතම්පි දස්සනාය ගච්ඡිංසු, තස්මිං භන්තෙ වත්ථුස්මිං පඤ්ඤත්තං.

පුච්ඡා – කථං ආවුසො නච්චාදීනි පස්සන්තස්ස ආපත්ති හොති, කථං පන අනාපත්ති.

විස්සජ්ජනා – නච්චං වා භන්තෙ ගීතං වා වාදිතං වා දස්සනාය ගච්ඡති ආපත්ති දුක්කටස්ස, යත්ථ ඨිතො පස්සති වා සුණාති වා ආපත්ති දුක්කටස්ස ¶ , දස්සනූපචාරං විජහිත්වා පුනප්පුනං පස්සති ආපත්ති දුක්කටස්ස, ආරාමෙ ඨිතස්ස පස්සතො අනාපත්ති, විහාරතො පන විහාරං පස්සිස්සාමීති ගච්ඡතො ආපත්තියෙව, යත්ථ ඨිතො පස්සති වා සුණාති වා ආපත්ති දුක්කටස්ස, ආසනසාලාය නිසින්නො පස්සති අනාපත්ති, පස්සිස්සාමීති වුට්ඨහිත්වා ගච්ඡති ආපත්ති දුක්කටස්ස, යත්ථ ඨිතො පස්සති වා සුණාති වා ආපත්ති දුක්කටස්ස, පතිපථං ගච්ඡන්තො පස්සති අනාපත්ති, ගීවං පරිවත්තෙත්වා පස්සතො පන ආපත්ති භන්තෙ.

පුච්ඡා – ආයතකෙන ¶ ආවුසො ගීතස්සරෙන ධම්මං ගායන්තස්ස දුක්කටං භගවතා කත්ථ පඤ්ඤත්තං, කං ආරබ්භ කිස්මිං වත්ථුස්මිං පඤ්ඤත්තං.

විස්සජ්ජනා – රාජගහෙ භන්තෙ ඡබ්බග්ගියෙ භික්ඛූ ආරබ්භ පඤ්ඤත්තං, ඡබ්බග්ගියා භන්තෙ භික්ඛූ ආයතකෙන ගීතස්සරෙන ධම්මං ගායිංසු, තස්මිං භන්තෙ වත්ථුස්මිං පඤ්ඤත්තං.

පුච්ඡා – දාරුපත්තං ¶ ආවුසො ධාරෙන්තස්ස දුක්කටං භගවතා කත්ථ පඤ්ඤත්තං, කං ආරබ්භ කිස්මිං වත්ථුස්මිං පඤ්ඤත්තං.

විස්සජ්ජනා – රාජගහෙ භන්තෙ ආයස්මන්තං පිණ්ඩොලභාරද්වාජං ආරබ්භ පඤ්ඤත්තං, ආයස්මා භන්තෙ පිණ්ඩොලභාරද්වාජො ඡවස්ස දාරුපත්තස්ස කාරණා ගිහීනං උත්තරිමනුස්සධම්මං ඉද්ධිපාටිහාරියං දස්සෙති, තස්මිං භන්තෙ වත්ථුස්මිං පඤ්ඤත්තං.

න ¶ ච භික්ඛවෙ දාරුපත්තො ධාරෙතබ්බො, යො ධාරෙය්ය ආපත්ති දුක්කටස්ස –

පුච්ඡා – භගවතා ආවුසො උච්චාවචෙ පත්තෙ පටික්ඛිපිත්වා අයො පත්තො භූමිපත්තොති ඉමෙයෙව ද්වෙ පත්තා කත්ථ අනුඤ්ඤාතා, කං ආරබ්භ කිස්මිං වත්ථුස්මිං අනුඤ්ඤාතා.

විස්සජ්ජනා – රාජගහෙ භන්තෙ ඡබ්බග්ගියෙ භික්ඛූ ආරබ්භ අනුඤ්ඤාතා, ඡබ්බග්ගියා භන්තෙ භික්ඛූ උච්චාවචෙ පත්තෙ ධාරෙසුං සොවණ්ණමයා ¶ රූපියමයා, තස්මිං භන්තෙ වත්ථුස්මිං අනුඤ්ඤාතා.

පුච්ඡා – සොදකං ¶ ආවුසො පත්තං පටිසාමෙන්තස්ස ච ඔතාපෙන්තස්සච උණ්හෙ පත්තං නිදහන්තස්ස ච දුක්කටං භගවතා කත්ථ පඤ්ඤත්තං, කං ආරබ්භ කිස්මිං වත්ථුස්මිං පඤ්ඤත්තං.

විස්සජ්ජනා – රාජගහෙ භන්තෙ සම්බහුලෙ භික්ඛූ ආරබ්භ පඤ්ඤත්තං, සම්බහුලා භන්තෙ භික්ඛූ සොදකං පත්තං පටිසාමෙසුං, ඔතාපෙසුං, උණ්හෙ පත්තං නිදහිංසු, තස්මිං භන්තෙ වත්ථුස්මිං පඤ්ඤත්තං.

පුච්ඡා – ඡවසීසපත්තං ¶ ආවුසො ධාරෙන්තස්ස ච සබ්බපංසුකූලිකස්ස ච දුක්කටං භගවතා කත්ථ පඤ්ඤත්තං, කං ආරබ්භ කිස්මිං වත්ථුස්මිං පඤ්ඤත්තං.

විස්සජ්ජනා – රාජගහෙ භන්තෙ අඤ්ඤතරං භික්ඛුං ආරබ්භ පඤ්ඤත්තං, අඤ්ඤතරො භන්තෙ භික්ඛු සබ්බපංසුකූලිකො අහොසි, සො ඡවසීසස්ස පත්තං ධාරෙසි, අඤ්ඤතරා ඉත්ථී පස්සිත්වා භීතා ¶ විස්සරමකාසි ‘‘අභුං මෙ පිසාචො වතාය’’න්ති, තස්මිං භන්තෙ වත්ථුස්මිං පඤ්ඤත්තං.

පුච්ඡා – චලකානි වා ආවුසො අට්ඨිකානි වා උච්ඡිට්ඨොදකං වා පත්තෙන නීහරන්තස්ස දුක්කටං භගවතා කත්ථ පඤ්ඤත්තං, කං ආරබ්භ කිස්මිං වත්ථුස්මිං පඤ්ඤත්තං.

විස්සජ්ජනා – රාජගහෙ භන්තෙ සම්බහුලෙ භික්ඛූ ආරබ්භ පඤ්ඤත්තං, සම්බහුලා භන්තෙ භික්ඛූ චලකානිපි අට්ඨිකානිපි උච්ඡිට්ඨො දකම්පි පත්තෙන නීහරිංසු, තස්මිං භන්තෙ වත්ථුස්මිං පඤ්ඤත්තං.

පුච්ඡා – උපාහනත්ථවිකා ¶ ආවුසො භගවතා කත්ථ අනුඤ්ඤාතා, කං ආරබ්භ කිස්මිං වත්ථුස්මිං අනුඤ්ඤාතා.

විස්සජ්ජනා – අන්තරා ච භන්තෙ රාජගහං අන්තරා ච වෙසාලිං අඤ්ඤතරං භික්ඛුං ආරබ්භ අනුඤ්ඤාතා, අඤ්ඤතරො භන්තෙ භික්ඛු උපාහනායො කායබන්ධනෙන බන්ධිත්වා ගාමං පිණ්ඩාය පාවිසි, අඤ්ඤතරො උපාසකො තං භික්ඛුං අභිවාදෙන්තො උපාහනායො සීසෙන ඝට්ටෙති, සො භික්ඛු මඞ්කු අහොසි, තස්මිං භන්තෙ වත්ථුස්මිං අනුඤ්ඤාතා.

පුච්ඡා – අද්ධානමග්ගප්පටිපන්නෙන ¶ ආවුසො පරිස්සාවනං යාචියමානෙන න දදන්තස්ස ච අප්පටිස්සාවනකෙන අද්ධානං පටිපජ්ජන්තස්ස ච දුක්කටං භගවතා කත්ථ පඤ්ඤත්තං, කං ආරබ්භ කිස්මිං වත්ථුස්මිං පඤ්ඤත්තං.

විස්සජ්ජනා – අන්තරා ච භන්තෙ රාජගහං අන්තරා ච වෙසාලිං අඤ්ඤතරං භික්ඛුං ආරබ්භ පඤ්ඤත්තං, අඤ්ඤතරො භන්තෙ භික්ඛු පරිස්සාවනං යාචියමානො න අදාසි, තස්මිං භන්තෙ වත්ථුස්මිං පඤ්ඤත්තං.

පුච්ඡා – පුප්ඵාභිකිණ්ණෙ ¶ ආවුසො සයනෙ සයන්තස්ස දුක්කටං භගවතා කත්ථ පඤ්ඤත්තං, කං ආරබ්භ කිස්මිං වත්ථුස්මිං පඤ්ඤත්තං.

විස්සජ්ජනා – වෙසාලියං භන්තෙ ඡබ්බග්ගියෙ භික්ඛූ ආරබ්භ පඤ්ඤත්තං, ඡබ්බග්ගියා භන්තෙ භික්ඛූ පුප්ඵාභිකිණ්ණෙසු සයනෙසු සයිංසු, තස්මිං භන්තෙ වත්ථුස්මිං පඤ්ඤත්තං.

පුච්ඡා – එකභාජනෙ වා ආවුසො භුඤ්ජන්තානං එකථාලකෙ වා පිවන්තානං එකත්ථරණපාවුරණානං වා තුවට්ටානං දුක්කටං භගවතා කත්ථ පඤ්ඤත්තං, කං ආරබ්භ කිස්මිං වත්ථුස්මිං පඤ්ඤත්තං.

විස්සජ්ජනා – වෙසාලියං භන්තෙ ඡබ්බග්ගියෙව භික්ඛූ ආරබ්භ පඤ්ඤත්තං, ඡබ්බග්ගියා භන්තෙ භික්ඛූ එකභාජනෙපි භුඤ්ජිංසු, එකථාලකෙපි ¶ පිවිංසු, එකමඤ්චකෙපි තුවට්ටෙසුං, එකත්ථරණාපි තුවට්ටෙසුං, එකපාවුරණාපි තුවට්ටෙසුං, එකත්ථරණපාවුරණාපි, තස්මිං භන්තෙ වත්ථුස්මිං පඤ්ඤත්තං.

පුච්ඡා – චාමරිබීජනිං ආවුසො පටික්ඛිපිත්වා තිස්සො බීජනියො භගවතා කත්ථ අනුඤ්ඤාතා, කිස්මිඤ්ච වත්ථුස්මිං අනුඤ්ඤාතා.

විස්සජ්ජනා – සාවත්ථියං භන්තෙ අනුඤ්ඤාතා, සාවත්ථියං භන්තෙ භගවති විහරති සඞ්ඝස්ස චාමරිබීජනී උප්පන්නා අහොසි, භගවතො එතමත්ථං ආරොචෙසුං, තස්මිං භන්තෙ වත්ථුස්මිං අනුඤ්ඤාතා.

න ¶ භික්ඛවෙ චාමරිබීජනී ධාරෙතබ්බා, යො ධාරෙය්ය, ආපත්ති දුක්කටස්ස. අනුජානාමි භික්ඛවෙ තිස්සො බීජනියො වාකමයං උසීරමයං මොරපිඤ්ඡා මයං.

පුච්ඡා – දීඝෙ ආවුසො නඛෙ ධාරෙන්තස්ස දුක්කටං භගවතා කත්ථ පඤ්ඤත්තං, කං ආරබ්භ කිස්මිං වත්ථුස්මිං පඤ්ඤත්තං.

විස්සජ්ජනා – සාවත්ථියං ¶ භන්තෙ අඤ්ඤතරං භික්ඛුං ආරබ්භ පඤ්ඤත්තං, අඤ්ඤතරො භන්තෙ භික්ඛු දීඝෙ නඛෙ ධාරෙසි, තස්මිං භන්තෙ වත්ථුස්මිං පඤ්ඤත්තං.

පුච්ඡා – කත්තරිකාය ¶ ආවුසො කෙසෙ ඡෙදාපෙන්තස්ස දුක්කටං භගවතා කත්ථ පඤ්ඤත්තං, කං ආරබ්භ කිස්මිං වත්ථුස්මිං පඤ්ඤත්තං.

විස්සජ්ජනා – සාවත්ථියං භන්තෙ ඡබ්බග්ගියෙ භික්ඛූ ආරබ්භ පඤ්ඤත්තං, ඡබ්බග්ගියා භන්තෙ භික්ඛූ කත්තරිකාය කෙසෙ ඡින්දිංසු, තස්මිං භන්තෙ වත්ථුස්මිං පඤ්ඤත්තං.

පුච්ඡා – දීඝෙ ¶ ආවුසො නාසිකාලොමෙ ධාරෙන්තස්ස දුක්කටං භගවතා කත්ථ පඤ්ඤත්තං, කං ආරබ්භ කිස්මිං වත්ථුස්මිං පඤ්ඤත්තං.

විස්සජ්ජනා – සාවත්ථියං භන්තෙ සම්බහුලෙ භික්ඛූ ආරබ්භ පඤ්ඤත්තං, සම්බහුලා භන්තෙ භික්ඛූ දීඝානි නාසිකාලොමානි ධාරෙසුං, තස්මිං භන්තෙ වත්ථුස්මිං පඤ්ඤත්තං.

පුච්ඡා – උච්චාවචා ආවුසො කණ්ණමලහරණියො පටික්ඛිපිත්වා දස කණ්ණමලහරණියො භගවතා කත්ථ අනුඤ්ඤාතා, කං ආරබ්භ කිස්මිං වත්ථුස්මිං අනුඤ්ඤාතා.

විස්සජ්ජනා – සාවත්ථියං භන්තෙ ඡබ්බග්ගියෙ භික්ඛූ ආරබ්භ අනුඤ්ඤාතා, ඡබ්බග්ගියා භන්තෙ භික්ඛූ උච්චාවචා කණ්ණමලහරණියො ධාරෙසුං ¶ සොවණ්ණමයං රූපියමයං, තස්මිං භන්තෙ වත්ථුස්මිං අනුඤ්ඤාතා.

පුච්ඡා – සඞ්ඝාටිපල්ලත්ථිකාය නිසීදන්තස්ස ආවුසො දුක්කටං භගවතා කත්ථ පඤ්ඤත්තං, කං ආරබ්භ කිස්මිං වත්ථුස්මිං පඤ්ඤත්තං.

විස්සජ්ජනා – සාවත්ථියං භන්තෙ ඡබ්බග්ගියෙ භික්ඛූ ආරබ්භ පඤ්ඤත්තං, ඡබ්බග්ගියා භන්තෙ භික්ඛූ සඞ්ඝාටිපල්ලත්ථිකාය නිසීදිංසු, සඞ්ඝාටියා ¶ පත්තා ලුජ්ජිංසු, තස්මිං භන්තෙ වත්ථුස්මිං පඤ්ඤත්තං.

පුච්ඡා – අකායබන්ධනෙන ආවුසො ගාමං පවිසන්තස්ස දුක්කටං භගවතා කත්ථ පඤ්ඤත්තං, කං ආරබ්භ කිස්මිං වත්ථුස්මිං පඤ්ඤත්තං.

විස්සජ්ජනා – සාවත්ථියං භන්තෙ අඤ්ඤතරං භික්ඛුං ආරබ්භ පඤ්ඤත්තං, අඤ්ඤතරො භන්තෙ භික්ඛු අකායබන්ධනො ගාමං පිණ්ඩාය පාවිසි, තස්මිං භන්තෙ වත්ථුස්මිං පඤ්ඤත්තං.

පුච්ඡා – ගිහිනිවත්ථං ¶ ආවුසො නිවාසෙන්තස්ස ච, ගිහිපාරුතං පාරුපන්තස්ස ච, සංවෙල්ලියං නිවාසෙන්තස්ස ච දුක්කටං භගවතා කත්ථ පඤ්ඤත්තං, කං ආරබ්භ කිස්මිං වත්ථුස්මිං පඤ්ඤත්තං.

විස්සජ්ජනා – සාවත්ථියං භන්තෙ ඡබ්බග්ගියෙ භික්ඛූ ආරබ්භ පඤ්ඤත්තං, ඡබ්බග්ගියා භන්තෙ භික්ඛූ ගිහිනිවත්ථං නිවාසිංසු, ගිහිපාරුතම්පි පාරුපිංසු, සංවෙල්ලියම්පි නිවාසිංසු, තස්මිං භන්තෙ වත්ථුස්මිං පඤ්ඤත්තං.

පුච්ඡා – උභතො ¶ කාජං ආවුසො ධාරෙන්තස්ස දුක්කටං භගවතා කත්ථ පඤ්ඤත්තං, කං ආරබ්භ කිස්මිං වත්ථුස්මිං පඤ්ඤත්තං.

විස්සජ්ජනා – සාවත්ථියං භන්තෙ ඡබ්බග්ගියෙ භික්ඛූ ආරබ්භ පඤ්ඤත්තං, ඡබ්බග්ගියා භන්තෙ භික්ඛූ උභතො කාජං ධාරෙසුං, තස්මිං භන්තෙ වත්ථුස්මිං පඤ්ඤත්තං.

පුච්ඡා – ලොකායතං ¶ ආවුසො පරියාපුණන්තස්ස ච වාචෙන්තස්ස ච දුක්කටං භගවතා කත්ථ පඤ්ඤත්තං, කං ආරබ්භ කිස්මිං වත්ථුස්මිං පඤ්ඤත්තං.

විස්සජ්ජනා – සාවත්ථියං භන්තෙ ඡබ්බග්ගියෙ භික්ඛූ ආරබ්භ පඤ්ඤත්තං, ඡබ්බග්ගියා භන්තෙ භික්ඛූ ලොකායතං පරියාපුණිංසුපි වාචෙසුම්පි, තස්මිං භන්තෙ වත්ථුස්මිං පඤ්ඤත්තං.

පුච්ඡා – තිරච්ඡානවිජ්ජං ¶ ආවුසො පරියාපුණන්තස්ස ච වාචෙන්තස්ස ච දුක්කටං භගවතා කත්ථ පඤ්ඤත්තං, කං ආරබ්භ කිස්මිං වත්ථුස්මිං පඤ්ඤත්තං.

විස්සජ්ජනා – සාවත්ථියං භන්තෙ ඡබ්බග්ගියෙ භික්ඛූ ආරබ්භ පඤ්ඤත්තං, ඡබ්බග්ගියා භන්තෙ භික්ඛූ තිරච්ඡානවිජ්ජං පරියාපුණිංසුපි වාචෙසුම්පි, තස්මිං භන්තෙ වත්ථුස්මිං පඤ්ඤත්තං.

පුච්ඡා – ඛිපිතෙ ආවුසො ‘‘ජීවා’’තිවදන්තස්ස දුක්කටං භගවතා කත්ථ පඤ්ඤත්තං, කං ආරබ්භ කිස්මිං වත්ථුස්මිං පඤ්ඤත්තං.

විස්සජ්ජනා – සාවත්ථියං ¶ භන්තෙ සම්බහුලෙ භික්ඛූ ආරබ්භ පඤ්ඤත්තං, භගවා භන්තෙ මහතියා පරිසාය පරිවුතො ධම්මං දෙසෙන්තො ඛිපි, භික්ඛූ ‘‘ජීවතු භන්තෙ භගවා, ජීවතු සුගතොති’’ උච්චාසද්දං මහාසද්දං අකංසු, තෙන සද්දෙන ධම්මකථා අන්තරා අහොසි, තස්මිං භන්තෙ වත්ථුස්මිං පඤ්ඤත්තං.

පුච්ඡා – ආරාමෙ ආවුසො පස්සාවවච්චානං තහං තහං කරණං පටික්ඛිපිත්වා එකමන්තං කාතුං භගවතා කත්ථ පඤ්ඤත්තං, කං ආරබ්භ කිස්මිං වත්ථුස්මිං පඤ්ඤත්තං.

විස්සජ්ජනා – සාවත්ථියං භන්තෙ සම්බහුලෙ භික්ඛූ ආරබ්භ පඤ්ඤත්තං, සම්බහුලා භන්තෙ භික්ඛූ ආරාමෙ තහං තහං පස්සාවං අකංසු, තහං තහං වච්චං අකංසු, ආරාමො දුස්සි, තස්මිං භන්තෙ වත්ථුස්මිං පඤ්ඤත්තං.

පුච්ඡා – ඛුද්දකවත්ථුං ¶ පුච්ඡිස්සං, සනිදානං සනිද්දෙසං. සමුක්කට්ඨපදානං ආවුසො කති ආපත්තියො.

විස්සජ්ජනා – ඛුද්දකං විස්සජ්ජිස්සං, සනිදානං සනිද්දෙසං. සමුක්කට්ඨපදානං භන්තෙ තිස්සො ආපත්තියො.

පුච්ඡා – පඤ්ච ¶ ආවුසො ලෙණානි භගවතා කත්ථ අනුඤ්ඤාතානි, කං ආරබ්භ කිස්මිං වත්ථුස්මිං අනුඤ්ඤාතානි.

විස්සජ්ජනා – රාජගහෙ භන්තෙ සම්බහුලෙ භික්ඛූ ආරබ්භ අනුඤ්ඤාතානි, සම්බහුලා භන්තෙ භික්ඛූ භගවන්තං උපසඞ්කමිත්වා එතදවොචුං ‘‘රාජගහකො භන්තෙ සෙට්ඨී විහාරෙ කාරාපෙතුකාමො, කථං නු ඛො භන්තෙ පටිපජ්ජිතබ්බ’’න්ති, තස්මිං භන්තෙ වත්ථුස්මිං අනුඤ්ඤාතානි.

පුච්ඡා – කථං ¶ ආවුසො විහාරා පඨමං උප්පන්නා, කථඤ්ච තෙ පතිට්ඨාපි තා.

විස්සජ්ජනා – එකාහෙනෙව ¶ භන්තෙ රාජගහකෙන සෙට්ඨිනා ඡට්ඨිවිහාරා පතිට්ඨාපිතා, තෙ ඉධ භන්තෙ සට්ඨිවිහාරා බුද්ධප්පමුඛස්ස ආගතානාගතස්ස චාතුද්දිසස්ස සඞ්ඝස්ස පතිට්ඨාපිතා.

පුච්ඡා – විහාරෙ ¶ ආවුසො පටිභානකම්මං පටික්ඛිපිත්වා මාලාකම්මාදීනි භගවතා කත්ථ අනුඤ්ඤාතානි, කං ආරබ්භ කිස්මිං වත්ථුස්මිං අනුඤ්ඤාතානි.

විස්සජ්ජනා – රාජගහෙ භන්තෙ ඡබ්බග්ගියෙ භික්ඛූ ආරබ්භ අනුඤ්ඤාතානි. ඡබ්බග්ගියා භන්තෙ භික්ඛූ විහාරෙ පටිභානචිත්තං කාරාපෙසුං ඉත්ථිරූපකං පුරිසරූපකං, තස්මිං භන්තෙ වත්ථුස්මිං අනුඤ්ඤාතානි.

පුච්ඡා – යථාවුඩ්ඪං ¶ ආවුසො අභිවාදනාදීනි ච අග්ගාසනාදීනි ච අනුජානිත්වා සඞ්ඝිකං යථාවුඩ්ඪං පටිබාහන්තස්ස දුක්කටං භගවතා කත්ථ පඤ්ඤත්තං, කං ආරබ්භ කිස්මිං වත්ථුස්මිං පඤ්ඤත්තං.

විස්සජ්ජනා – අන්තරා ච භන්තෙ වෙසාලිං අන්තරා ච සාවත්ථිං ඡබ්බග්ගියානං භික්ඛූනං අන්තෙවාසිකෙ භික්ඛූ ආරබ්භ පඤ්ඤත්තං, ඡබ්බග්ගියානං භන්තෙ භික්ඛූනං අන්තෙවාසිකා භික්ඛූ බුද්ධප්පමුඛස්ස සඞ්ඝස්ස පුරතො පුරතො ගන්ත්වා විහාරෙ පටිග්ගහෙසුං, සෙය්යායො පටිග්ගහෙසුං ‘‘ඉදං අම්හාකං උපජ්ඣායානං භවිස්සති, ඉදං අම්හාකං ආචරියානං භවිස්සති, ඉදං අම්හාකං භවිස්සතී’’ති, තස්මිං භන්තෙ වත්ථුස්මිං පඤ්ඤත්තං.

පුච්ඡා – එකෙන ¶ ආවුසො ද්වෙ පටිබාහන්තස්ස දුක්කටං භගවතා කත්ථ පඤ්ඤත්තං, කං ආරබ්භ කිස්මිං වත්ථුස්මිං පඤ්ඤත්තං.

විස්සජ්ජනා – සාවත්ථියං භන්තෙ ආයස්මන්තං උපනන්දං සක්යපුත්තං ආරබ්භ පඤ්ඤත්තං, ආයස්මා භන්තෙ උපනන්දො සක්යපුත්තො එකො ද්වෙ පටිබාහි, තස්මිං භන්තෙ වත්ථුස්මිං පඤ්ඤත්තං.

පුච්ඡා – නවකෙන ¶ ආවුසො උද්දිසන්තෙන සමකෙ වා ආසනෙ නිසීදිතුං උච්චතරෙ වා ධම්මගාරවෙන, ථෙරෙන පන භික්ඛුනා උද්දිසාපෙන්තෙන සමකෙ වා ආසනෙ නිසීදිතුං නීචතරෙ වා ධම්මගාරවෙන භගවතා කත්ථ අනුඤ්ඤාතං, කං ආරබ්භ කිස්මිං වත්ථුස්මිං අනුඤ්ඤාතං.

විස්සජ්ජනා – සාවත්ථියං භන්තෙ සම්බහුලෙ භික්ඛූ ආරබ්භ අනුඤ්ඤාතං, සම්බහුලා භන්තෙ භික්ඛූ ආයස්මතො උපාලිස්ස සන්තිකෙ විනයං පරියාපුණිංසු, ආයස්මා භන්තෙ උපාලි ඨිතකොව උද්දිසති ථෙරානං භික්ඛූනං ගාරවෙන, තත්ථ භන්තෙ ථෙරා චෙව භික්ඛූ කිලමිංසු ආයස්මා ච උපාලි කිලමි, තස්මිං භන්තෙ වත්ථුස්මිං අනුඤ්ඤාතං.

පුච්ඡා – තිවස්සන්තරෙන ¶ ආවුසො සහ නිසීදිතුං භගවතා කත්ථ අනුඤ්ඤාතං, කං ආරබ්භ කිස්මිං වත්ථුස්මිං අනුඤ්ඤාතං.

විස්සජ්ජනා – සාවත්ථියං භන්තෙ සම්බහුලෙ භික්ඛූ ආරබ්භ අනුඤ්ඤාතං, සම්බහුලානං භන්තෙ භික්ඛූනං එතදහොසි ‘‘කිත්තාවතානු ඛො සමානාසනිකො හොතී’’ති, තස්මිං භන්තෙ වත්ථුස්මිං අනුඤ්ඤාතං.

පුච්ඡා – මඤ්චෙ ¶ ච ආවුසො පීඨෙ ච ද්වින්නංයෙව නිසීදිතුං භගවතා කත්ථ අනුඤ්ඤාතං, කං ආරබ්භ කිස්මිං වත්ථුස්මිං අනුඤ්ඤාතං.

විස්සජ්ජනා – සාවත්ථියං භන්තෙ සම්බහුලෙ සමානාසනිකෙ ආරබ්භ පඤ්ඤත්තං, සම්බහුලා භන්තෙ භික්ඛූ සමානාසනිකා මඤ්චෙ නිසීදිත්වා මඤ්චං භින්දිංසු, පීඨෙ නිසීදිත්වා පීඨං භින්දිංසු, තස්මිං භන්තෙ වත්ථුස්මිං අනුඤ්ඤාතං.

පුච්ඡා – දීඝාසනෙ ¶ පනාවුසො අසමානාසනිකෙහිපි නිසීදිතුං භගවතා කත්ථ අනුඤ්ඤාතං, කං ආරබ්භ කිස්මිං වත්ථුස්මිං අනුඤ්ඤාතං.

විස්සජ්ජනා – සාවත්ථියං භන්තෙ සම්බහුලෙ භික්ඛූ ආරබ්භ අනුඤ්ඤාතං, සම්බහුලා භන්තෙ භික්ඛූ දීඝාසනෙ අසමානාසනිකෙහි සහ නිසීදිතුං කුක්කුච්චායිංසු, තස්මිං භන්තෙ වත්ථුස්මිං අනුඤ්ඤාතං.

පුච්ඡා – පඤ්ච ¶ ආවුසො අවිස්සජ්ජියානි භගවතා කත්ථ පඤ්ඤත්තානි, කං ආරබ්භ කිස්මිං වත්ථුස්මිං පඤ්ඤත්තානි.

විස්සජ්ජනා – සාවත්ථියං භන්තෙ සම්බහුලෙ භික්ඛූ ආරබ්භ පඤ්ඤත්තානි, සම්බහුලා භන්තෙ භික්ඛූ සඞ්ඝිකං සෙනාසනං විස්සජ්ජෙසුං, තස්මිං භන්තෙ වත්ථුස්මිං පඤ්ඤත්තං.

පුච්ඡා – පඤ්ච ¶ ආවුසො අවෙභඞ්ගියානි භගවතා කත්ථ පඤ්ඤත්තානි, කං ආරබ්භ කිස්මිං වත්ථුස්මිං පඤ්ඤත්තානි.

විස්සජ්ජනා – කීටාගිරිස්මිං භන්තෙ අස්සජිපුනබ්බසුකෙ භික්ඛූ ආරබ්භ පඤ්ඤත්තානි, අස්සජිපුනබ්බසුකා භන්තෙ භික්ඛූ සඞ්ඝිකං සෙනාසනං විභජිංසු, තස්මිං භන්තෙ වත්ථුස්මිං පඤ්ඤත්තානි.

පුච්ඡා – අඤ්ඤත්ර ¶ පරිභොගං ආවුසො අඤ්ඤත්ර පරිභුඤ්ජන්තස්ස දුක්කටං භගවතා කත්ථ පඤ්ඤත්තං, කං ආරබ්භ කිස්මිං වත්ථුස්මිං පඤ්ඤත්තං.

විස්සජ්ජනා – ආළවියං භන්තෙ සම්බහුලෙ භික්ඛූ ආරබ්භ පඤ්ඤත්තං, සම්බහුලා භන්තෙ භික්ඛූ අඤ්ඤතරස්ස උපාසකස්ස විහාරපරිභොගං සෙනාසනං අඤ්ඤත්ර පරිභුඤ්ජිංසු, තස්මිං භන්තෙ වත්ථුස්මිං පඤ්ඤත්තං.

පුච්ඡා – අධොතෙහි ච ආවුසො අල්ලෙහි ච පාදෙහි සෙනාසනං අක්කමන්තස්ස ච සඋපාහනෙන සෙනාසනං අක්කමන්තස්ස ච දුක්කටං භගවතා කත්ථ පඤ්ඤත්තං, කං ආරබ්භ කිස්මිං වත්ථුස්මිං පඤ්ඤත්තං.

විස්සජ්ජනා – ආළවියං ¶ භන්තෙ සම්බහුලෙ භික්ඛූ ආරබ්භ පඤ්ඤත්තං, සම්බහුලා භන්තෙ භික්ඛූ අධොතෙහි පාදෙහි සෙනාසනං අක්කමිංසු, අල්ලෙහි ච පාදෙහි සෙනාසනං අක්කමිංසු, සඋපාහනාපි සෙනාසනං අක්කමිංසු, සෙනාසනං දුස්සි, තස්මිං භන්තෙ වත්ථුස්මිං පඤ්ඤත්තං.

පුච්ඡා – පරිකම්මකතාය ආවුසො භූමියා නිට්ඨුභන්තස්ස ච පරිකම්මකතං භිත්තිං අපස්සයන්තස්ස ච දුක්කටං භගවතා කත්ථ පඤ්ඤත්තං, කං ආරබ්භ කිස්මිං වත්ථුස්මිං පඤ්ඤත්තං.

විස්සජ්ජනා – ආළවියං ¶ භන්තෙ සම්බහුලෙව භික්ඛූ ආරබ්භ පඤ්ඤත්තං, සම්බහුලා භන්තෙ භික්ඛූ පරිකම්මකතාය භූමියා නිට්ඨුභිංසු, පරිකම්මකතං භිත්තිං අපස්සයිංසු, තස්මිං භන්තෙ වත්ථුස්මිං පඤ්ඤත්තං.

පුච්ඡා – සෙනාසනක්ඛන්ධකං පුච්ඡිස්සං, සනිදානං සනිද්දෙසං. සමුක්කට්ඨපදානං ආවුසො කති ආපත්තියො.

විස්සජ්ජනා – සෙනාසනක්ඛන්ධකං ¶ විස්සජ්ජිස්සං, සනිදානං සනිද්දෙසං. සමුක්කට්ඨපදානං භන්තෙ තිස්සො ආපත්තියො.

පුච්ඡා – කථං ¶ ආවුසො ඡන්නං සක්යකුමාරානං සහ උපාලිකප්පකෙන පබ්බජ්ජා අහොසි, කථඤ්ච නෙසං විසෙසො උදපාදි.

විස්සජ්ජනා – භගවා භන්තෙ උපාලිං කප්පකං පඨමං පබ්බාජෙසි, පච්ඡා තෙ සක්යකුමාරෙ, අථ භන්තෙ ආයස්මා භද්දියො තෙනෙව අන්තරවස්සෙන තිස්සො විජ්ජා සච්ඡාකාසි, ආයස්මා අනුරුද්ධො දිබ්බචක්ඛුං උප්පාදෙසි, ආයස්මා ආනන්දො සොතාපත්තිඵලං සච්ඡාකාසි, දෙවදත්තො පොථුජ්ජනිකං ඉද්ධිං අභිනිප්ඵාදෙසි. එවං ඛො භන්තෙ ඡන්නං සක්යකුමාරානං උපාලිකප්පකෙන සහ පබ්බජ්ජා අහොසි, එවඤ්ච පන භන්තෙ තෙසං විසෙසාධිගමො අහොසි.

පුච්ඡා – පකාසනීයකම්මං ¶ ආවුසො කාතුං භගවතා කත්ථ පඤ්ඤත්තං, කං ආරබ්භ කිස්මිං වත්ථුස්මිං පඤ්ඤත්තං.

විස්සජ්ජනා – රාජගහෙ භන්තෙ දෙවදත්තං ආරබ්භ පඤ්ඤත්තං, දෙවදත්තො භන්තෙ ‘‘සරාජිකාය මං භගවා පරිසාය ඛෙළාසකවාදෙන අපසාදෙති, සාරිපුත්තමොග්ගල්ලානෙව උක්කංසතී’’ති කුපිතො අනත්තමනො භගවති ආඝාතං බන්ධි, තස්මිං භන්තෙ වත්ථුස්මිං පඤ්ඤත්තං.

පුච්ඡා – දෙවදත්තස්ස ¶ ආවුසො පකාසනීයකම්මං කාරාපෙත්වා කථං භගවා පකාසෙතුං ආණාපෙසි.

විස්සජ්ජනා – භගවා භන්තෙ දෙවදත්තස්ස පකාසනීයකම්මං කාතුං පඤ්ඤපෙත්වා ආයස්මන්තං සාරිපුත්තං ආමන්තෙසි ‘‘තෙන හි ත්වං සාරිපුත්ත දෙවදත්තං රාජගහෙ පකාසෙහී’’ති, එවං ඛො භන්තෙ දෙවදත්තස්ස පකාසනීයකම්මං කත්වා දෙවදත්තං රාජගහෙ පකාසෙතුං භගවා ආණාපෙසි.

පුච්ඡා – කථං ¶ ආවුසො දෙවදත්තෙන දුට්ඨචිත්තෙන වධකචිත්තෙන තථා ගතස්ස රුහිරං උප්පාදෙත්වා පඨමං ආනන්තරියං කම්මං උපචිතං.

විස්සජ්ජනා – භගවා භන්තෙ ගිජ්ඣකූටස්ස පබ්බතස්ස ඡායායං චඞ්කමි, අථ භන්තෙ දෙවදත්තො ගිජ්ඣකූටං පබ්බතං ආරුහිත්වා මහතිං සිලං පවිජ්ඣි ‘‘ඉමාය සමණං ගොතමං ජීවිතා වොරොපෙස්සාමී’’ති, අථ ඛො භන්තෙ ද්වෙ පබ්බතකූටානි සමාගන්ත්වා තං සිලං සම්පටිච්ඡිංසු, තතො පපතිකා උප්පතිත්වා භගවතො පාදෙ රුහිරං උප්පාදෙසි. එවං ඛො භන්තෙ දෙවදත්තෙන දුට්ඨෙන වධකචිත්තෙන තථාගතස්ස රුහිරං උප්පාදෙත්වා පඨමං ආනන්තරියකම්මං උපචිතං.

පුච්ඡා – කුලෙසු ¶ ආවුසො තිකභොජනං භගවතා කත්ථ පඤ්ඤත්තං, කං ආරබ්භ කිස්මිං වත්ථුස්මිං පඤ්ඤත්තං.

විස්සජ්ජනා – රාජගහෙ භන්තෙ දෙවදත්තං ආරබ්භ පඤ්ඤත්තං, දෙවදත්තො භන්තෙ පරිහීනලාභසක්කාරො සපරිසො කුලෙසු විඤ්ඤාපෙත්වා විඤ්ඤාපෙත්වා භුඤ්ජි, තස්මිං භන්තෙ වත්ථුස්මිං පඤ්ඤත්තං.

පුච්ඡා – අලං ¶ දෙවදත්ත, මා තෙ රුච්චි සඞ්ඝභෙදො, ගරුකො ඛො දෙවදත්ත සඞ්ඝභෙදොතිආදිකො ආවුසො ඔවාදො භගවතා කත්ථ දින්නො, කිස්මිං වත්ථුස්මිං දින්නො.

විස්සජ්ජනා – රාජගහෙ භන්තෙ දෙවදත්තං ආරබ්භ දින්නො, දෙවදත්තො භන්තෙ සඞ්ඝභෙදාය පරක්කමි චක්කභෙදාය, තස්මිං භන්තෙ වත්ථුස්මිං දින්නො.

අලං ¶ දෙවදත්ත, මා තෙ රුච්චි සඞ්ඝභෙදො, ගරුකො ඛො දෙවදත්ත සඞ්ඝභෙදො –

පුච්ඡා – ‘‘සුකරං සාධුනා සාධුං, සාධුං පාපෙන දුක්කරං. පාපං පාපෙන සුකරං, පාපමරියෙහි දුක්කර’’න්ති- ආවුසො ¶ ඉදං උදානං භගවතා කත්ථ උදානිතං, කං ආරබ්භ කිස්මිං වත්ථුස්මිං උදානිතං.

විස්සජ්ජනා – රාජගහෙ භන්තෙ දෙවදත්තංයෙව ආරබ්භ උදානිතං, ආයස්මා භන්තෙ ආනන්දො පුබ්බණ්හසමයං නිවාසෙත්වා පත්තචීවරමාදාය රාජගහං පිණ්ඩාය පාවිසි, අථ ඛො භන්තෙ දෙවදත්තො යෙනායස්මා ආනන්දො තෙනුපසඞ්කමි, උපසඞ්කමිත්වා ආයස්මන්තං ආනන්දං එතදවොච ‘‘අජ්ජතග්ගෙ දානාහං ආවුසො ආනන්ද අඤ්ඤත්රෙව භගවතා අඤ්ඤත්රෙව භික්ඛුසඞ්ඝා උපොසථං කරිස්සාමි සඞ්ඝකම්මං කරිස්සාමී’’ති, තස්මිං භන්තෙ වත්ථුස්මිං උදානිතං.

සුකරං සාධුනා සාධුං, සාධුං පාපෙන දුක්කරං;

පාපං පාපෙන සුකරං, පාපමරියෙහි දුක්කරං.

පුච්ඡා – භෙදානුවත්තකානං ¶ ආවුසො භික්ඛූනං ථුල්ලච්චයං භගවතා කත්ථ පඤ්ඤත්තං, කං ආරබ්භ කිස්මිං වත්ථුස්මිං පඤ්ඤත්තං.

විස්සජ්ජනා – රාජගහෙ භන්තෙ සම්බහුලෙ භික්ඛූ ආරබ්භ පඤ්ඤත්තං, ආයස්මා භන්තෙ සාරිපුත්තො භගවන්තං උපසඞ්කමිත්වා එතදවොච ‘‘සාධු භන්තෙ භෙදානුවත්තකා භික්ඛූ පුන උපසම්පජ්ජෙය්යු’’න්ති, තස්මිං භන්තෙ වත්ථුස්මිං පඤ්ඤත්තං.

‘‘සාධු ¶ භන්තෙ භෙදානුවත්තකා භික්ඛූ පුන උපසම්පජ්ජෙය්යු’’න්ති –

පුච්ඡා – කිත්තාවතා ¶ නු ඛො ආවුසො සඞ්ඝරාජි හොති නො ච සඞ්ඝභෙදො, කිත්තාවතා ච පන සඞ්ඝරාජි චෙව හොති සඞ්ඝභෙදො ච.

විස්සජ්ජනා – එකතො භන්තෙ එකො හොති, එකතො ද්වෙ චතුත්ථො අනුස්සාවෙති, සලාකං ගාහෙති ‘‘අයං ධම්මො අයං විනයො ඉදං සත්ථුසාසනං ඉමං ගණ්හථ ඉමං රොචෙථාති’’, එතෙනෙව භන්තෙ නයෙන චතුන්නං වා පඤ්චන්නං වා ඡන්නං වා සත්තන්නං වා අට්ඨන්නං වා සඞ්ඝරාජි හොති, නො ච සඞ්ඝභෙදො, එකතො භන්තෙ චත්තාරො හොන්ති, එකතො චත්තාරො, නවමො අනුස්සාවෙති, සලාකං ගාහෙති ‘‘අයං ධම්මො අයං විනයො ඉදං සත්ථුසාසනං ඉමං ගණ්හථ ඉමං රොචෙථා’’ති, එවං ඛො භන්තෙ සඞ්ඝරාජි චෙව හොති සඞ්ඝභෙදො ච. එවං ඛො භන්තෙ සඞ්ඝරාජි හොති, නො ච සඞ්ඝභෙදො, එවඤ්ච පන භන්තෙ සඞ්ඝරාජි චෙව හොති සඞ්ඝභෙදො ච.

පුච්ඡා – කිත්තාවතා ¶ නු ඛො ආවුසො සඞ්ඝො භින්නො හොති.

විස්සජ්ජනා – ඉධ භන්තෙ භික්ඛූ අධම්මාදිං ධම්මාදීනීති දීපෙන්ති, තෙ ඉමෙහි අට්ඨාරසහි වත්ථූහි අපකස්සන්ති, අවපකස්සන්ති, ආවෙනිං ¶ උපොසථං කරොන්ති, ආවෙනිං පවාරණං කරොන්ති, ආවෙනිං සඞ්ඝකම්මං කරොන්ති, එවං ඛො භන්තෙ සඞ්ඝො භින්නො හොති.

පුච්ඡා – කිත්තාවතා නු ඛො ආවුසො සඞ්ඝො සමග්ගො හොති.

විස්සජ්ජනා – ඉධ භන්තෙ භික්ඛූ අධම්මං අධම්මොති දීපෙන්ති, ධම්මං ධම්මොති දීපෙන්ති, අවිනයං අවිනයොති දීපෙන්ති…පෙ… දුට්ඨුල්ලං ආපත්තිං දුට්ඨුල්ලා ආපත්තීති දීපෙන්ති, අදුට්ඨුල්ලං ආපත්තිං අදුට්ඨුල්ලා ආපත්තීති දීපෙන්ති, තෙ ඉමෙහි අට්ඨාරසහි වත්ථූහි න අපකස්සන්ති, න අවපකස්සන්ති, න ආවෙනිං උපොසථං කරොන්ති, න ආවෙනිං පවාරණං කරොන්ති, න ආවෙනිං සඞ්ඝකම්මං කරොන්ති, එත්තාවතා ඛො භන්තෙ සඞ්ඝො සමග්ගො හොති.

පුච්ඡා – සමග්ගං ¶ ආවුසො සඞ්ඝං භින්දිත්වා කිං සො පසවති.

විස්සජ්ජනා – සමග්ගං ඛො භන්තෙ සඞ්ඝං භින්දිත්වා කප්පට්ඨිතිකං කිබ්බිසං පසවති, කප්පං නිරයම්හි පච්චති.

පුච්ඡා – භින්නං ¶ ඛො ආවුසො සඞ්ඝං සමග්ගං කත්වා කිං සො පසවති.

විස්සජ්ජනා – භින්නං ඛො භන්තෙ සඞ්ඝං සමග්ගං කත්වා බ්රහ්මං පුඤ්ඤං පසවති, කප්පං සග්ගම්හි මොදති.

පුච්ඡා – සඞ්ඝභෙදං ¶ පුච්ඡිස්සං, සනිදානං සනිද්දෙසං. සමුක්කට්ඨපදානං ආවුසො කති ආපත්තියො.

විස්සජ්ජනා – සඞ්ඝභෙදං විස්සජ්ජිස්සං, සනිදානං සනිද්දෙසං. සමුක්කට්ඨපදානං භන්තෙ ද්වෙ ආපත්තියො.

පුච්ඡා – ආගන්තුකානං ¶ ආවුසො භික්ඛූනං වත්තං භගවතා කත්ථ පඤ්ඤත්තං, කං ආරබ්භ කිස්මිං වත්ථුස්මිං පඤ්ඤත්තං.

විස්සජ්ජනා – සාවත්ථියං භන්තෙ සම්බහුලෙ ආගන්තුකෙ භික්ඛූ ආරබ්භ පඤ්ඤත්තං, ආගන්තුකා භන්තෙ භික්ඛූ සඋපාහනාපි ආරාමං පවිසිංසු, ඡත්තපග්ගහිතාපි ආරාමං පවිසිංසු, ඔගුණ්ඨිතාපි ආරාමං පවිසිංසු, සීසෙපි චීවරං කරිත්වා ආරාමං පවිසිංසු, පානීයෙනපි පාදෙ දොවිංසු, වුඩ්ඪතරෙපි ආවාසිකෙ භික්ඛූ නාභිවාදෙසුං, නපි සෙනාසනං පුච්ඡිංසු, තස්මිං භන්තෙ වත්ථුස්මිං ‘‘තෙන හි භික්ඛවෙ ආගන්තුකානං භික්ඛූනං වත්තං පඤ්ඤපෙස්සාමි, යථා ආගන්තුකෙහි භික්ඛූහි සම්මා වත්තිතබ්බං, ආගන්තුකෙන භික්ඛවෙ භික්ඛුනා ඉදානි ආරාමං පවිසිස්සාමීති උපාහනා ඔමුඤ්චිත්වා නීචං කත්වා පප්ඵොටෙත්වා ගහෙත්වා ඡත්තං අපනාමෙත්වා සීසං විවරිත්වා සීසෙ චීවරං ඛන්ධෙ කත්වා සාධුකං අතරමානෙන ආරාමො පවිසිතබ්බො’’ එවමාදිනා භන්තෙ ආගන්තුකානං භික්ඛූනං වත්තං පඤ්ඤත්තං.

පුච්ඡා – ආවාසිකානං ¶ ආවුසො භික්ඛූනං වත්තං භගවතා කත්ථ කං ආරබ්භ කිස්මිං වත්ථුස්මිං පඤ්ඤත්තං, කථඤ්ච පන පඤ්ඤත්තං.

විස්සජ්ජනා – සාවත්ථියං භන්තෙ සම්බහුලෙ ආවාසිකෙ භික්ඛූ ආරබ්භ පඤ්ඤත්තං, සම්බහුලා භන්තෙ ආවාසිකා භික්ඛූ ආගන්තුකෙ භික්ඛූ දිස්වා නෙව ආසනං පඤ්ඤපෙසුං, න පාදොදකං පාදපීඨං පාදකථලිකං උපනික්ඛිපිංසු, න පච්චුග්ගන්ත්වා පත්තචීවරං පටිග්ගහෙසුං, න සෙනාසනං පඤ්ඤපෙසුං, තස්මිං භන්තෙ වත්ථුස්මිං පඤ්ඤත්තං, තස්මිං භන්තෙ වත්ථුස්මිං –

‘‘ආවාසිකෙන භික්ඛවෙ භික්ඛුනා ආගන්තුකං භික්ඛුං වුඩ්ඪතරං දිස්වා ආසනං පඤ්ඤපෙතබ්බං, පාදොදකං පාදපීඨං පාදකථලිකං උපනික්ඛිපිතබ්බං, පච්චුග්ගන්ත්වා පත්තචීවරං පටිග්ගහෙතබ්බං ¶ පානීයෙන පුච්ඡිතබ්බො’’ එවමාදිනා භන්තෙ ආවාසිකානං භික්ඛූනං වත්තං භගවතා පඤ්ඤත්තං.

පුච්ඡා – ගමිකානං ¶ ආවුසො භික්ඛූනං වත්තං භගවතා කත්ථ පඤ්ඤත්තං, කං ආරබ්භ කිස්මිං වත්ථුස්මිං පඤ්ඤත්තං, කථඤ්චපන පඤ්ඤත්තං.

විස්සජ්ජනා – සාවත්ථියං භන්තෙ සම්බහුලෙ ගමිකෙ භික්ඛූ ආරබ්භ පඤ්ඤත්තං, සම්බහුලා භන්තෙ ගමිකා භික්ඛූ දාරුභණ්ඩං මත්තිකාභණ්ඩං අප්පටිසාමෙත්වා ද්වාරවාතපානං විවරිත්වා සෙනාසනං අනාපුච්ඡා පක්කමිංසු, තස්මිං භන්තෙ වත්ථුස්මිං ‘‘ගමිකෙන භික්ඛවෙ භික්ඛුනා දාරුභණ්ඩං පටිසාමෙත්වා ද්වාරවාතපානං ථකෙත්වා සෙනාසනං ආපුච්ඡා පක්කමිතබ්බං’’ එවමාදිනා භන්තෙ ආකාරෙන භගවතා ගමිකානං භික්ඛූනං වත්තං පඤ්ඤත්තං.

පුච්ඡා – භත්තග්ගෙ ¶ ආවුසො අනුමොදිතුං භගවතා කත්ථ අනුඤ්ඤාතං, කං ආරබ්භ කිස්මිං වත්ථුස්මිං අනුඤ්ඤාතං.

විස්සජ්ජනා – සාවත්ථියං ¶ භන්තෙ සම්බහුලෙ භික්ඛූ ආරබ්භ අනුඤ්ඤාතං, සම්බහුලා භන්තෙ භික්ඛූ භත්තග්ගෙ නානුමොදිංසු, තස්මිං භන්තෙ වත්ථුස්මිං අනුඤ්ඤාතං.

පුච්ඡා – භික්ඛූනං ආවුසො භත්තග්ගවත්තං භගවතා කත්ථ පඤ්ඤත්තං, කං ආරබ්භ කිස්මිං වත්ථුස්මිං පඤ්ඤත්තං.

විස්සජ්ජනා – සාවත්ථියං භන්තෙ ඡබ්බග්ගියෙ භික්ඛූ ආරබ්භ පඤ්ඤත්තං, ඡබ්බග්ගියා භන්තෙ භික්ඛූ දුන්නිවත්ථා දුප්පාරුතා අනාකප්පසම්පන්නා භත්තග්ගං ගච්ඡිංසු, තස්මිං භන්තෙ වත්ථුස්මිං ‘‘සචෙ ආරාමෙ කාලො ආරොචිතො හොති, තිමණ්ඩලං පටිච්ඡාදෙන්තෙන පරිමණ්ඩලං නිවාසෙත්වා කායබන්ධනං බන්ධිත්වා සගුණං කත්වා සඞ්ඝාටියො පාරුපිත්වා ගණ්ඨිකං පටිමුඤ්චිත්වා ධොවිත්වා ¶ පත්තං ගහෙත්වා සාධුකං අතරමානෙන ගාමො පවිසිතබ්බො’’ති එවමාදිනා භන්තෙ භත්තග්ගවත්තං පඤ්ඤත්තං.

පුච්ඡා – භික්ඛූනං ¶ ආවුසො සෙනාසනවත්තං භගවතා කත්ථ පඤ්ඤත්තං, කං ආරබ්භ කිස්මිං වත්ථුස්මිං පඤ්ඤත්තං, කථඤ්ච තං පඤ්ඤත්තං.

විස්සජ්ජනා – සාවත්ථියං භන්තෙ ඡබ්බග්ගියෙ භික්ඛූ ආරබ්භ පඤ්ඤත්තං, ඡබ්බග්ගියා භන්තෙ භික්ඛූ භික්ඛූසු අජ්ඣොකාසෙ චීවරං කරොන්තෙසු පටිවාතෙ අඞ්ගණෙ සෙනාසනං පප්ඵොටෙසුං, තස්මිං භන්තෙ වත්ථුස්මිං ‘‘යස්මිං විහාරෙ විහරති, සචෙ සො විහාරො උක්ලාපො හොති, සචෙ උස්සහති සොධෙතබ්බො’’ති එවමාදිනා භන්තෙ භික්ඛූනං සෙනාසනවත්තං භගවතා පඤ්ඤත්තං.

පුච්ඡා – සමාචාරං පුච්ඡිස්සං, සනිදානං සනිද්දෙසං. සමුක්කට්ඨපදානං ආවුසො කති ආපත්තියො.

විස්සජ්ජනා – සමාචාරං විස්සජ්ජිස්සං, සනිදානං සනිද්දෙසං. සමුක්කට්ඨපදානං භන්තෙ එකා ආපත්ති.

පුච්ඡා – සාපත්තිකෙන ¶ ආවුසො පාතිමොක්ඛං සුණන්තස්ස පාතිමොක්ඛං ඨපෙතුං භගවතා කත්ථ පඤ්ඤත්තං, කං ආරබ්භ කිස්මිං වත්ථුස්මිං පඤ්ඤත්තං.

විස්සජ්ජනා – සාවත්ථියං භන්තෙ අඤ්ඤතරං පුග්ගලං දුස්සීලං පාපධම්මං ආරබ්භ පඤ්ඤත්තං, අඤ්ඤතරො භන්තෙ පුග්ගලො දුස්සීලො පාපධම්මො තදහුපොසථෙ සඞ්ඝමජ්ඣෙ නිසින්නො අහොසි, තස්මිං භන්තෙ වත්ථුස්මිං පඤ්ඤත්තං.

පුච්ඡා – ඨපනං ¶ ආවුසො පුච්ඡිස්සං, සනිදානං සනිද්දෙසං. සමුක්කට්ඨපදානං ආවුසො කති ආපත්තියො.

විස්සජ්ජනා – ඨපනං විස්සජ්ජිස්සං, සනිදානං සනිද්දෙසං. සමුක්කට්ඨපදානං භන්තෙ එකා ආපත්ති.

පුච්ඡා – අට්ඨහි ¶ ආවුසො ගරුධම්මෙහි උපසම්පදා භගවතා කත්ථ අනුඤ්ඤාතා, කස්ස අනුඤ්ඤාතා, කිස්මිඤ්ච වත්ථුස්මිං අනුඤ්ඤාතා.

විස්සජ්ජනා – වෙසාලියං භන්තෙ මහාපජාපතියා ගොතමියා අනුඤ්ඤාතා, මහාපජාපති භන්තෙ ගොතමී සූනෙහි පාදෙහි රජොකිණ්ණෙන ගත්තෙන දුක්ඛී දුම්මනා අස්සුමුඛී රුදමානා බහිද්වාරකොට්ඨකෙ අට්ඨාසි, අථ ඛො භන්තෙ ආයස්මා ආනන්දො මහාපජාපතිං ගොතමිං තං කාරණං පුච්ඡිත්වා භගවන්තං චතුක්ඛත්තුං යාචි මාතුගාමස්ස තථාගතප්පවෙදිතෙ ධම්මවිනයෙ ආගාරස්මා අනාගාරියං පබ්බජ්ජං, තස්මිං භන්තෙ වත්ථුස්මිං අනුඤ්ඤාතා.

පුච්ඡා – භික්ඛූහි ¶ ආවුසො භික්ඛුනියො උපසම්පාදෙතුං භගවතා කත්ථ අනුඤ්ඤාතං, කං ආරබ්භ කිස්මිං වත්ථුස්මිං අනුඤ්ඤාතං.

විස්සජ්ජනා – වෙසාලියං භන්තෙ මහාපජාපතිං ගොතමිං ආරබ්භ අනුඤ්ඤාතං, මහාපජාපති භන්තෙ ගොතමී භගවන්තං එතදවොච ‘‘කථාහං භන්තෙ ඉමාසු සාකියානීසු පටිපජ්ජාමී’’ති, තස්මිං භන්තෙ වත්ථුස්මිං අනුඤ්ඤාතං.

පුච්ඡා – එකතො ¶ උපසම්පන්නාය ආවුසො භික්ඛුනිසඞ්ඝෙ විසුද්ධාය භික්ඛුසඞ්ඝෙ උපසම්පාදෙතුං භගවතා කත්ථ අනුඤ්ඤාතං, කං ආරබ්භ කිස්මිං වත්ථුස්මිං අනුඤ්ඤාතං.

විස්සජ්ජනා – සාවත්ථියං භන්තෙ සම්බහුලෙ භික්ඛූ ආරබ්භ අනුඤ්ඤාතං, සම්බහුලා භන්තෙ භික්ඛූ භික්ඛුනීනං අන්තරායිකෙ ධම්මෙ පුච්ඡිංසු, උපසම්පදාපෙක්ඛායො විත්ථායිංසු, මඞ්කූ අහෙසුං, න සක්ඛිංසු විස්සජ්ජෙතුං, තස්මිං භන්තෙ වත්ථුස්මිං අනුඤ්ඤාතං.

පුච්ඡා – භික්ඛුනික්ඛන්ධකං ¶ පුච්ඡිස්සං, සනිදානං සනිද්දෙසං. සමුක්කට්ඨපදානං ආවුසො කති ආපත්තියො.

විස්සජ්ජනා – භික්ඛුනික්ඛන්ධකං විස්සජ්ජිස්සං, සනිදානං සනිද්දෙසං. සමුක්කට්ඨපදානං භන්තෙ ද්වෙ ආපත්තියො.

පුච්ඡා – පඤ්චසතිකං ¶ පුච්ඡිස්සං, සනිදානං සනිද්දෙසං. සමුක්කට්ඨපදානං ආවුසො කති ආපත්තියො.

විස්සජ්ජනා – පඤ්චසතිකං විස්සජ්ජිස්සං, සනිදානං සනිද්දෙසං. සමුක්කට්ඨපදානං භන්තෙ න කතමා ආපත්ති.

පුච්ඡා – සත්තසතිකං ¶ පුච්ඡිස්සං, සනිදානං සනිද්දෙසං. සමුක්කට්ඨපදානං ආවුසො කති ආපත්තියො.

විස්සජ්ජනා – සත්තසතිකං විස්සජ්ජිස්සං, සනිදානං සනිද්දෙසං. සමුක්කට්ඨපදානං භන්තෙ න කතමා ආපත්ති.

විස්සජ්ජනා – භගවතො භන්තෙ වචනං අරහතො සම්මාසම්බුද්ධස්ස.

විස්සජ්ජනා – සෙක්ඛා ච භන්තෙ පුථුජ්ජනකල්යාණකා ච සික්ඛන්ති.

පුච්ඡා – කෙ ¶ ආවුසො සික්ඛිතසික්ඛා.

විස්සජ්ජනා – අරහන්තො භන්තෙ සික්ඛිතසික්ඛා.

විස්සජ්ජනා – සික්ඛාකාමෙසු භන්තෙ ඨිතං.

විස්සජ්ජනා – පරම්පරාය භන්තෙ ආභතං.