📜

නමො තස්ස භගවතො අරහතො සම්මාසම්බුද්ධස්ස.

රසවාහිනී

පණාමාදිකථා

1.

සත්ථුප්පසත්ථචරණං ¶ සරණං ජනානං,

බ්රහ්මාදිමොළි මණිරංසි සමාවහන්තං,

පඞ්කෙරුහාභමුදුකොමලචාරුවණ්ණං;

වන්දාමි චක්කවරලක්ඛණමාදධානං.

2.

සිද්ධං ජිනෙන චිරකාලමතන්දිතෙන,

යං භාවකො සමධිගච්ඡති ඛෙමමග්ගං;

යං කප්පරුක්ඛ රුචිදාන මණිව භාති,

තං ධම්මමග්ග මසමං පණමාමි නිච්චං.

3.

සන්තින්ද්රියං සුගතසූනුවරං විසුද්ධං,

යං දක්ඛිණෙය්යමතදං සුචිපුඤ්ඤඛෙත්තං;

තාණෙසිනං සරණමුජ්ඣිතසබ්බදුක්ඛං,

වන්දාමි සඞ්ඝ මනඝං සිරසා මහග්ඝං.

4.

යම්පත්තමෙත්ථ රතනත්තයථොමනෙන,

පුඤ්ඤෙන තෙන දුරිතං සකලං පණුජ්ජ,

වක්ඛාමහං සුමධුරං රසවාහිනින්තං,

භො භො සුණන්තු සුජනා භිමුදාවහා සා.

5.

තත්ථතත්ථූපපන්නානි, ¶ වත්ථූනි අරහා පුරෙ;

අභාසුං දීපභාසාය, ඨපෙසුං තං පුරාතනා.

6.

මහාවිහාරෙ තඞ්ගුත්ත, වඞ්කපරිවෙණවාසිකො;

රට්ඨපාලොති නාමෙන, සීලාචාර ගුණාකරො.

7.

හිතාය පරිවත්තෙසි, පජානං පාළිභාසතො;

පුනරුත්තාදිදොසෙහි, තමාසි සබ්බමාකුලං;

අනාකුලං කරිස්සාමි, තං සුණාථ සමාහිතා.

8.

විතරාගා පුරෙ වොචුං, යස්මා තස්මා හි භාසිතං;

එතමාදරණීයඤ්හි, සාධු සාධූහි සබ්බදාති.

ජම්බුදීපුප්පත්ති වත්ථූනි.