📜

දසථූපකථා

10. එවං පතිට්ඨිතෙසු පන ථූපෙසු මහාකස්සපත්ථෙරො ධාතූනං අන්තරායං දිස්වා අජාතසත්තුං උපසඞ්කමිත්වා මහාරාජ එකං ධාතුනිධානං කාතුං වට්ටතිති ආහ සාධු භන්තෙ නිධානකම්මං තාව මම හොතු, ධාතුයො පන කථං ආහරාපෙමිති. න මහාරාජ ධාතු ආහරණං තුය්හං භාරො, අම්හාකං භාරොති. සාධු භන්තෙ තුම්හෙ ධාතුයො ආහරථ. අහං ධාතුනිධානං කරිස්සාමීති. ථෙරො තෙසං තෙසං රාජකුලානං පරිචරණමත්තකමෙව ඨපෙත්වා සෙසෙධාතුයො ආහරි.

රාමගාමෙ පන ධාතුයො නාගා ගණ්හිංසු තාසං අන්තරායො නත්ථි, අනාගතෙ ලඞ්කාදීපෙ මහාවිහාරෙ මහාචෙතියම්හි නිධියිස්ස නීති. තා න ආහරිත්ථ, සෙසෙහි සත්තහි නගරෙහි ආහරිත්වා රාජගහස්ස පාචීන දක්ඛින දිසාභාගෙ ඨපෙත්වා ඉමස්මිං ඨානෙ යො පාසාණො අත්ථි, සො අන්තරධායතු, පංසු සුවිසුද්ධා හොතු, උදකඤ්ච මා උට්ඨහතූති අධිට්ඨාසි.

රාජා ¶ තං ඨානං ඛණාපෙත්වා තතො උද්ධට පංසුනා ඉට්ඨිකා කාරෙත්වා අසීති මහාසාවකානං ථූපෙ කාරෙති ඉධ රාජා කිං කාරෙහීති පුච්ඡන්තානම්පි මහාසාවකානංචෙතියා නීති වදන්ති න කොචි ධාතුනිධානභාවං ජානාති අසීතිහත්ථගම්භීරෙ පන තස්මිං පදෙසෙ ජාතෙ හෙට්ඨා ලොභසත්ථරං සත්ථරාපෙත්වා තත්ථ ථූපාරාමෙ චෙතිය ඝරප්පමාණං තම්බලොහමයං ගෙහං කාරාපෙත්වා අට්ඨට්ඨ හරි චණ්දනාදිමයෙ කරණ්ඩෙ ච ථූපෙ ච කාරාපෙසි.

අථ ඛො භගවතො ධාතුයො හරිචණ්දන කරණ්ඩෙ පක්ඛිපිත්වා තං හරිචණ්දනං කරණ්ඩං අඤ්ඤස්මිං හරිචණ්දන කරණ්ඩෙ තම්පි අඤ්ඤස්මින්ති එවං අට්ඨ හරිචණ්දන කරණ්ඩෙ එකතො කත්වා එතෙනෙව උපායෙන අට්ඨ කරණ්ඩෙ අට්ඨසු හරිචණ්දන ථූපෙසු අට්ඨ හරිචණ්දනථූපෙ අට්ඨසු ලොහිතචණ්දන කරණ්ඩෙසු, අට්ඨ ලොහිතචණ්දනකරණ්ඩෙ අට්ඨසු ලොහිතචණ්දනථූපෙසු, අට්ඨලොහිත චණ්දනථූපෙ අට්ඨසු දන්තකරණ්ඩෙසු, අට්ඨ දන්තකරණ්ඩෙ අට්ඨසු දන්තථූපෙසු, අට්ඨදන්තථූපෙ අට්ඨසුසබ්බ රතනකරණ්ඩෙසු, අට්ඨ සබ්බ රතනකරණ්ඩෙ අට්ඨසු සබ්බරතනථූපෙසු, අට්ඨ සබ්බරතන ථූපෙ අට්ඨසු සුවණ්ණකරණ්ඩෙසු. අට්ඨසුවණ්ණකරණ්ඩෙ අට්ඨසු සුවණ්ණථූපෙසු, අට්ඨසුවණ්ණථූපෙ අට්ඨසුරජතකරණ්ඩෙසු, අට්ඨ රජතකරණ්ඩෙ අට්ඨසු රජතථූපෙසෙ අට්ඨ රජතථූපෙ අට්ඨසු මණිකරණ්ඩෙසු අට්ඨමණිකරෙණ්ඩඅට්ඨසුවණ්ණථූපෙසු, අට්ඨ මණිථූපෙ අට්ඨසු ලොහිතඞ්ක කරණ්ඩෙසු, අට්ඨලොහිතඞ්ක කරණ්ඩෙ අට්ඨසු ලොහිතඞ්කථූපෙසු, අට්ඨ ලොහිතඞ්කථූපෙ අට්ඨසු මසාරගල්ලථූපෙසු, අට්ඨ මසාරගල්ලථූපෙ අට්ඨසු ඵලික කරණ්ඩෙසු, අට්ඨ ඵළික කරණ්ඩෙ අට්ඨසු ඵළිකථූපෙසු පක්ඛිපි සබ්බ උපරිමං ඵළිකචෙතියං ථූපාරාම චෙතියප්පමාණං අහොසි.

තස්ස උපරිසබ්බරතනමයං ගෙහං කාරෙසි තස්ස උපරි සුවණ්ණමයං, තස්ස උපරි රජතමයං, තස්ස උපරි තම්බලොහමයං ගෙහං කාරෙසි තත්ථ සබ්බරතනමයං වාලුකං ඔකිරිත්වා ජලජ ථලජ පුප්ඵානං සහස්සානි විප්පකිරිත්වා අද්ධච්ඡට්ඨානි ජාතකසතානි ආසීති මහාථෙරෙ සුද්ධොදන මහාරාජානං මහාමායාදෙවිං සත්ත සහජාතෙ සබ්බානෙතානි සුවණ්ණමයානෙව කාරෙසි පඤ්චපඤ්චසතෙ සුවණ්ණරජතමයෙ පුණ්ණඝටෙ ඨපාපෙසි පඤ්චසුවණ්ණධජසතෙ පඤ්චසතෙ සුවණ්ණදීපකෙ ච කාරාපෙත්වා සුගණ්ධතෙලස්ස පූරෙත්වා තෙසු දුකූලවට්ටියො ඨපෙසි.

අථායස්මා මහාකස්සපො මාලා මා මිලායන්තු. ගණ්ධා මා විනස්සන්තු, දීපා මා විජ්ඣායන්තූති අධිට්ඨහිත්වා සුවණ්ණපට්ටඅක්ඛරානි ඡිණ්දාපෙසි. අනාගතෙ පියදාසො නාම කුමාරො ඡත්තං උස්සාපෙත්වා ¶ අසොකො නාම ධම්මරාජා භවිස්සති සො ඉමං ධාතුයො විත්ථාරිකා කරිස්සතීති රාජා සබ්බපසාධනෙහි පූජෙත්වා ආදිතො පට්ඨාය ද්වාරං පිදහන්තො නික්ඛමි තම්බලොහද්වාරං පිදහිත්වා ආවිඤ්ජන රජ්ජුයං කුඤ්චිකමුද්දිකං බණ්ධි තත්ථෙව මහන්තං මණික්ඛණ්ධං ඨපෙසි අනාගතෙ දළිද්දරාජානො ඉමං මණිං ගහෙත්වා ධාතූනං සක්කාරං කරොන්තූති අක්ඛරානි ඡිණ්දාපෙසී.

සක්කො දෙවරාජා විස්සකම්මං ආමන්තෙත්වා’තාත, අජාතසත්තුනා ධාතුනිධානං කතං. එත්ථ ආරක්ඛං ඨපෙහි’ති පහිණි සො ආගන්ත්වා වාළසඞ්ඝාටයන්තං යොජෙසි. කට්ඨරූපකානි තස්මිං ධාතුගබ්භෙ ඵළිකවණ්ණ ඛග්ගෙ ගහෙත්වා වාතසදිසෙන වෙගෙන අනුපරියායන්තං යොජෙත්වා එකාය එව ආණිවා බණ්ධිත්වා සමන්තතො ගිඤ්ජක වසථාකාරෙන සිලාපරික්ඛෙපං කත්වා උපරි එකාය පිදහිත්වා පංසුං පක්ඛිපිත්වා භූමිං සමං කත්වා තස්සුපරි පාසාණථූපං පතිට්ඨාපෙසි.