📜

ධාතුනිධාන කථා

11. එවං නිට්ඨිතෙ ධාතුනිධානෙ යාවතායුකං ඨත්වා ථෙරො පරිනිබ්බුතො, රාජාපි යථාකම්මං ගතො, තෙපි මනුස්සා කාලකතා, අපරභාගෙ පියදාසො කුමාරො ඡත්තං උස්සාපෙත්වා අසොකො නාම ධම්ම රාජා හුත්වා තා ධාතුයො ගහෙත්වා ජම්බුදීපෙ චතුරාසීතියා චෙතිය සහස්සෙසු පතිට්ඨාපෙසි. කථං බිණ්දුසාරස්ස කිර එකසතං පුත්තා අහෙසුං තෙ සබ්බෙ අසොකො අත්තනා සද්ධිං එකමාතිකං තිස්ස කුමාරං ඨපෙත්වා ඝාතෙසි. ඝාතෙන්තො චත්තාරි වස්සානි අනභිසිත්තො රජ්ජං කාරෙත්වා චතුන්නං වස්සානං අච්චයෙන තථාගතස්ස පරිනිබ්බානතො ද්වින්නං වස්සසතානං උපරි අට්ඨාරසමෙ වස්සෙ සකලජම්බුදීපෙ එකරජ්ජාභිසෙකං පාපුණි.

අභිසෙකානුභාවෙන ඉමා රාජිද්ධියො ආගතා මහාපථවියා හෙට්ඨා යොජනප්පමාණෙ ආණා පවත්ති, තථා උපරි ආකාසෙ, අනොතත්තදහතො අට්ඨහි කාජෙහි සොළස පානීයඝටෙ දිවසෙ දිවසෙ දෙවතා ආහරන්ති. යතො සාසනෙ උප්පන්නසද්ධො හුත්වා අට්ඨ ඝටෙ භික්ඛුසඞ්ඝස්ස අදාසි ද්වෙ ඝටෙ සට්ඨිමත්තානං තිපිටක භික්ඛුනං ද්වෙඝටෙ අග්ගමහෙසියා අසණ්ධිමිත්තාය චත්තාරො ඝටෙ අත්තනා පරිභුඤ්ජි. දෙවතා එව හිමවන්තෙ නාගලතා දන්තකට්ඨ නාම අත්ථි සිනිද්ධා මුදුකං රසවන්තං, තං දිවසෙ දිවසෙ ආභිරන්ති යෙන රඤ්ඤො ච අග්ගමහෙසියා ච සොළසන්නං නාටකසහස්සානං සට්ඨිමත්තානං භික්ඛුසහස්සානං දෙවසිකං දන්තපොණකිච්චං නිප්ඵජ්ජි.

දෙවසිකමෙවස්ස දෙවතා අගදාමලකං අගදහරීටකං සුවණ්ණවණ්ණඤ්ච ගණ්ධසම්පන්නං අම්බපක්කං ආහරන්ති තථා ඡද්දන්ත දහතො පඤ්චවණ්ණං නිවාසන පාරුපණං, පීතකවණ්ණං හත්ථපුඤ්ඡනක පට්ටංදිබ්බඤ්චජානකං ආහරන්ති දෙවසිකමෙව පනස්ස අනුලෙපගණ්ධං පාරුපනත්ථාය අසුත්තමයිකං සුමනපුප්ඵපටං මහාරහඤ්ච අඤ්ජනං නාගභවනතො නාගරාජානො ආහරන්ති. ඡද්දන්තදහෙයෙව උට්ඨිතස්ස සාලිනො නව චාහ සහස්සානි දිවසෙ දිවසෙ සුවා ආහරන්ති. මූසිකා නිත්ථුස කණෙ කරොන්ති එකොපි ඛණ්ඩතණ්ඩුලො න හොති. රඤ්ඤො සබ්බට්ඨානෙසු අයමෙව තණ්ඩුලො පරිභොගං ගච්ඡති. මධුමක්ඛිකා මධුං කරොන්ති. කම්මාරසාලාසු අච්ඡා කූටං පහරන්ති. දීපිකා චම්මානි චාලෙන්ති කරවීක සකුණා ආගත්ත්වා මධුරස්සරං විකුජෙන්තා රඤ්ඤො බලිකම්මං කරොන්ති.

ඉමාහි ඉද්ධීහි සමන්නාගතො රාජාඑක දිවසං සුවණ්ණ සඞ්ඛලික බණ්ධනං පෙසෙත්වා චතුන්නං බුද්ධානං අධිගත රූපදස්සනං කප්පායුකං මහාකාළ නාගරාජානං ආනයිත්වා සෙතච්ඡත්තස්ස හෙට්ඨා මහාරහෙ පල්ලඞ්කෙ නිසීදාපෙත්වා අනෙක සතවණ්ණෙහි ජලජ ථලජ පුප්ඵෙහි සුවණ්ණපුප්ඵෙහි ච පූජං කත්වා සබ්බාලඞ්කාර පතිමණ්ඩිතෙහි ච සොළසහි නාටක සහස්සෙහි සමන්තතො පරික්ඛිපිත්වා අනන්තඤාණස්ස තාව මෙ සද්ධම්මවර චක්කවත්තිනො සම්මාසම්බුද්ධස්ස රූපං ඉමෙසං අක්ඛීනං ආපාථං කරොහීති නිබ්බත්තාසීති අනුබ්යඤ්ජන පතිමණ්ඩිතං ද්වත්තිංස මහා පුරිස ලක්ඛණ සස්සිරීකතාය විකසිත කමලුප්ඵල පුණ්ඩරීක පතිමණ්ඩිතමිව සලිලතලං තාරාගණරංසිජාල විසරවිප්ඵුතසොභාසමුජ්ජලමිවගගනතලං නීල-පීත-ලොහිතාදි භෙද විචිත්තවණ්ණරංසි විනද්ධ බ්යාමප්පභා පරික්ඛෙප විලාසිතාය සඤ්ඣප්පභානුරාග ඉණ්දධනු විජ්ජුල්ලතා පරික්ඛිත්තමිව කනකගිරි සිඛරං නානාවිරාග විමලකෙතුමාලා සමුජ්ජලිතචාරුමත්ථකසොභං නයනරසායනමිව බ්රහ්මදෙව-මනුජ නාග-යක්ඛ ගණානං බුද්ධරූපං පස්සන්තො සත්තදිවසං අක්ඛිපූජං නාම අකාසි

රාජා කිර අභිසෙකං පාපුණිත්වා තීණියෙව සංවච්ඡරානි බාහිරක පාසණ්ඩං පරිගණ්හි චතුත්ථෙ සංවච්ඡරෙ බුද්ධසාසනෙ පසීදිනං බ්රාහ්මණ ජාතිය පාසණ්ඩානඤ්ච පණ්ඩරඞ්ග පරිබ්බාජකානඤ්ච සට්ඨිසහස්සමත්තානං නිච්චභත්තං පට්ඨපෙසි.

අසොකො පිතරා පවත්තිතං දානං අත්තනො අන්තෙපුරෙ තථෙව දදමානො එකදිවසං සීහපඤ්ජරෙ ඨිතො උපසම පරිබාහිරෙන ආචාරෙන භුඤ්ජමානෙ අසංයතිණ්ද්රියෙ අවිනිත ඉරියාපථෙ දිස්වා චින්තෙසි ඊදිසං දානං උපපරික්ඛිත්වා යුත්තට්ඨානෙ දාතුං වට්ටතිති එවං චින්තෙත්වා අමච්චෙ ආහ. ගච්ඡථ භණෙ අත්තනො අත්තනො සාධුසම්මතෙ සමණ බ්රාහ්මණෙ අන්තෙපුරං අතිහරථ, දානං දස්සාමාති අමච්චා සාධු දෙවාති රඤ්ඤො පටිස්සුත්වා තෙ තෙ පණ්ඩරඞ්ග පරිබ්බාජකාජීවක නිගණ්ඨාදයො ආනෙත්වා ඉමෙ මහාරාජ අම්හාකං අරහන්තොති ආහංසු.

අථ රාජා අන්තෙපුරෙ උච්චාවචානි ආසනානි පඤ්ඤාපෙත්ව ආගච්ඡන්තූති වත්වා ආගතාගතෙ ආහ අත්තනො අත්තනො අනුරූපෙ ආසනෙ නිසීදථාති එකච්චෙ භද්දපීඨකෙ එකච්චෙ ඵලකපීඨකෙසෙ නිසීදිංසු. තං දිස්වා රාජා නත්ථි එතෙසං අන්තෙසාරොති ඤත්වා තෙසං අනුරූපං ඛාදනීයං භොජනීයං දත්වා උය්යොජෙසි.

එවං ගච්ඡන්තෙ කාලෙ එක දිවසං සීහපඤ්ජරෙ ඨිතො අද්දස නිග්රොධ සාමණෙරං රාජඞ්ගණෙන ගච්ඡන්තං දන්තං ගුත්තං සන්තින්ද්රියං ඉරියාපථ සම්පන්නං. කො පනායං නිග්රොධො නාම, බිණ්දුසාර රඤ්ඤො ජෙට්ඨපුත්තස්ස සුමනරාජ කුමාරස්ස පුත්තො. තත්රායං ආනුපුබ්බී කථා-බිණ්දුසාර රඤ්ඤො කිර දුබ්බලකාලෙයෙව අසොක කුමාරො අත්තනා ලද්ධං උජ්ජෙනිරජ්ජං පහාය ආගන්ත්වා සබ්බං නගරං අත්තනො හත්ථගතං කත්වා සුමන රාජකුමාරං අග්ගහෙසි.

තං දිවසමෙව සුමනස්ස රාජකුමාරස්ස සුමනා නාම දෙවී පරිපුණ්ණගබ්භා අහොසි. සා අඤ්ඤාතකවෙසෙන නික්ඛමිත්වා අවිදූරෙ අඤ්ඤතරං චණ්ඩාලගාමං සන්ධාය ගච්ඡන්ති, ජෙට්ඨක චණ්ඩාලස්ස ගෙහතො අවිදූරෙ එකස්මිං නිග්රොධ රුක්ඛෙ අධිවත්ථාය දෙවතාය ඉතො සුමනෙති වහන්තියා සද්දං සුත්වා තස්සා සමීපං ගතා දෙවතා අත්තනො ආනුභාවෙන එකං සාලං නිම්මිණිත්වා එත්ථ වසාහිති පදාසි. සා තං සාලං පාවිසි. ගතදිවසෙයෙව පුත්තං විජායි.

සා තස්ස නිග්රොධ දෙවතාය පරිග්ගහිතත්තා නිග්රොධොත්වෙව නාමං අකාසි. ජෙට්ඨක චණ්ඩාලො දට්ඨදිවසතොප්පභූති තං අත්තනො සාමිධීතරං විය මඤ්ඤමානො නිබද්ධං වට්ටං පට්ඨපෙසි. රාජධීතා තත්ථ සත්ත වස්සානි වසි. නිග්රොධකුමාරොපි සත්තවස්සිකො ජාතො තදා මහාවරුණත්ථෙරො නාම එකො අරහා දාරකස්ස හෙතුසම්පදං දිස්වා විහරමානො සත්තවස්සිකොදානි දාරකො කාලො නං පබ්බාජෙතුන්ති චින්තෙත්වා රාජධීතයා ආරොචාපෙත්වා නිග්රොධකුමාරං පබ්බාජෙසි. කුමාරො ඛුරග්ගෙයෙව අරහත්තං පාපුණි. සො එකදිවසං පාතොව සරීරං පටිජග්ගිත්වා ආචරියුපජ්ඣානං වත්තං කත්වා පත්තචීවරමාදාය මාතුඋපාසිකාය ගෙහද්වාරං ගච්ඡාමීති නික්ඛමි මාතු නිවෙසනට්ඨානඤ්චස්ස දක්ඛිණද්වාරෙන නගරං පවිසිත්වා නගරමජ්ඣෙන ගන්ත්වා පාචීනද්වාරෙන නික්ඛමිත්වා ගන්තබ්බං හොති තෙන ච සමයෙන අසොකො ධම්මරාජා පාචීන දිසාභිමුඛො සීහපඤ්ජරෙ චඞ්කමති.

තං ඛණංයෙව සිග්රොධො සාමණෙරො රාජඞ්ගණං පාපුණි සන්තින්ද්රියො සන්තමානසො යුගමත්තං පෙක්ඛමානො. තෙන වුත්තං. එකදිවසං සීහපඤ්ජරෙ ඨිතො අද්දස නිග්රොධසාමණෙරං රාජඞ්ගණෙන ගච්ඡන්තං දන්තං ගුත්තං සන්තින්ද්රියං ඉරියාපථ සම්පන්නන්ති. දිස්වා පනස්ස එතදහොසි? අයං ජනො සබ්බොපි වික්ඛිත්තචිත්තොහන්තමගපටිභාගො, අයම්පන දාරකො අවික්ඛිත්තචිත්තො අතිවියස්ස අලොකිත විලොකිතං සම්මිඤ්ජන පසාරණඤ්ච සොභති, අද්ධා එතස්ස අබ්භන්තරෙ ලොකුත්තරධම්මො භවිස්සතීති රඤ්ඤො සහදස්සනෙනෙව සාමණෙරෙ චිත්තං පසීදි. පෙමං සණ්ඨහි කස්මා? පුබ්බෙ කිර පුඤ්ඤ කරණකාලෙ එස රඤ්ඤො ජෙට්ඨභාතා වාණිජකො අහොසි.

අථ රාජා සඤ්ජාතපෙමො සබහුමානො සාමණෙරං පක්කොසථාති අමච්චෙ පෙසෙසි අතිචිරායතීති පුන ද්වෙ තයො පෙසෙසි තුරිතං ආගච්ඡතූති සාමරණෙරො අත්තනො පකතියා එව අගමාසි රාජා පතිරූපාසනං ඤත්වා නිසීදථාති ආහ. ඉතො චිතො ච ඔලොකෙත්වා නත්ථිදානි අඤ්ඤො භික්ඛුති සමුස්සිත සෙතච්ඡත්තං රාජපළ්ලඞ්කං උපසඞ්කමිත්වා පත්තගහණත්ථාය රඤ්ඤො ආකාරං දස්සෙසි. රාජා තං පල්ලඞ්කං සමීපං ගච්ඡන්තං දිස්වා එවං චින්තෙසි. අජ්ජෙවදානි අයං සාමණෙරො ඉමස්ස ගෙහස්ස සාමිකො භවිස්සති. සාමණෙරො රඤ්ඤො හත්ථෙ පත්තං දත්වා පල්ලඞ්කං අභරුහිත්වා නිසීදි.

රාජා අත්තනො අත්ථාය සම්පාදිතං සබ්බං යාගු-කජ්ජක භත්ත විකතිං උපනාමෙසි. සාමණෙරො අත්තනො යාපනමත්තමෙව සම්පටිච්ඡි. භත්තකිච්චාවසානෙ රාජා ආහ සත්ථාරා තුම්හාකං දින්නොවාදං ජානාථාති ජානමි මහාරාජ එකදෙසෙනාති. තාත, මය්හම්පි නං කථෙහීති සාධු මහාරාජාති රඤ්ඤො අනුරූපං ධම්මපදෙ අප්පමාද වග්ගං අනුමොදනත්ථාය අභාසි.

රාජා පන අප්පමාදො අමතපදං, පමාදො මච්චුනො පදන්ති සුත්ව ච, අඤ්ඤාතං තාත පරියොසාපෙහීති ආහ අනුමොදනාවසානෙ ද්වත්තිංස ධුරභත්තානි ලභිත්වා පුන දිවසෙ ද්වත්තිංස භික්ඛු ගහෙත්වා රාජන්තෙපුරං පවිසිත්වා භත්තකිච්චමකාසි රාජා අඤ්ඤෙපි ද්වත්තිංස භික්ඛු තුම්හෙහි සද්ධිංයෙව භික්ඛං ගණ්හන්තූති එතෙනෙව උපායෙන දිවසෙ දිවසෙ වඩ්ඪාපෙන්තෙ සට්ඨි සහස්සානං බ්රාහ්මණ පරිබ්බාජකානං භත්තං උපච්ඡිණ්දිත්වා අන්තො නිවෙසනෙ සට්ඨිසහස්සානං භික්ඛුනං නිච්චභත්තං පට්ඨපෙසි, නිග්රොධත්ථෙර ගතෙනෙව පසාදෙන, නිග්රොධත්ථෙරොපි රාජානං සපරිසං තීසු සරණෙසු පඤ්චසු ච සීලෙසු පතිට්ඨාපෙත්වා බුද්ධසාසනෙ පොථුජ්ජනිකෙන පසාදෙන අචලප්පසාදං කත්වා පතිට්ඨාපෙසි.

පුන රාජ අසොකාරාමං නාම මහාවිහාරං කාරපෙත්වා සට්ඨිසහස්සානං භික්ඛූනං භත්තං පට්ඨපෙසි. සකලජම්බුදීපෙ චතුරාසීතියා නගරසහස්සෙසු චතුරාසීති විහාරසහස්සානි කාරාපෙසි. චතුරාසීති චෙතියසහස්ස පතිමණ්ඩිතානි ධම්මෙනෙව නො අධම්මෙන, එකදිවසං කිර රාජා අසොකාරාමෙ මහාදානං දත්වා සට්ඨිසහස්ස සඞ්ඛස්ස භික්ඛුසඞ්ඝස්ස මජ්ඣෙ නිසජ්ජ සඞ්ඝං චතූහි පව්චයෙහි පවාරෙත්වා ඉමං පඤ්හං පුච්ඡි භන්තෙ භගවතො දෙසිත ධම්මො නාම කිත්තකො හොතීති. මහාරාජ නව අඞ්ගානි, ඛණ්දතො චතුරාසීති ධම්මක්ඛණ්ධ සහස්සානීති.

රාජා ධම්මෙ පසීදිත්වා එකෙකං ධම්මක්ඛණ්ධං එකෙකෙන විහාරෙන පූජෙස්සාමීති එකදිවසමෙව ඡන්නවුති කොටිධනං විස්සජ්ජෙත්වා අමච්චෙ ආණාපෙසි. එථ භණෙ එකෙකස්මිං නගරෙ එකමෙකං විහාරං කාරෙන්තා චතුරාසීතියා නගරසහස්සෙසු චතුරාසීති විහාරසහස්සානි කාරාපෙථාති සයඤ්ච අසොකාරාමෙ අසොක මහාවිහාරත්ථාය කම්මං පට්ඨපෙසි.

සඞ්ඝො ඉණ්දගුත්තත්ථෙරං නාම මහිද්ධියං මහානුභාවං ඛීණාසවං නවකම්මාධිට්ඨායකං අදාසි. ථෙරො යං යං න නිට්ඨාති තං තං අත්තනො ආනුභාවෙන නිට්ඨාපෙසි. එවං තීහි සංවච්ඡරෙහි විහාරකම්මං නිට්ඨාපෙසි. එකදිවසමෙව සබ්බනගරෙහි පණ්ණානි ආගමිංසු අමච්චා රඤ්ඤො ආරොචෙසුං. නිට්ඨිතානි දෙව චතුරාසීති විහාරසහස්සානීති අථ රාජා භික්ඛුසඞ්ඝං උපසඞ්කමිත්වා භන්තෙ මයා චතුරාසීති විහාරසහස්සානි කාරිතානි ධාතුයොකුතො ලභිස්සාමීති පුච පුච්ඡි.

මහාරාජ ධාතුනිධානං නාම අත්ථීති සුණොම. න පන පඤ්ඤායති අසුකාට්ඨානෙති රාජා රාජගහෙ චෙතියං භිණ්දාපෙත්වා ධාතුං අපස්සන්තො පටිපාකතියං කාරෙත්වා භික්ඛු-භික්ඛුනියො-උපාසක-උපාසිකායොති චතස්සො පරිසා ගහෙත්වා වෙසාලිං ගතො. තත්රාපි අලභිත්වා කපිළවත්ථුං, තත්රාපි අලභිත්වා රාමගාමං ගතො, රාමගාමෙ නාගා චෙතියං භිණ්දිතුං න අදංසු. චෙතියෙ නිපතිත කුද්දාලො ඛණ්ඩාඛණ්ඩං හොති එවං තත්රාපි අලභිත්වා අල්ලකප්පං-පාවං-කුසිනාරන්ති සබ්බත්ථ චෙතියාති භිණ්දිත්වා ධාතුං අලභිත්වා පටිපාකතිකානි කත්වා රාජගහං ගන්ත්වා චතස්සො පරිසා සන්නිපාතෙත්වා අත්ථි කෙනචි සුතපුබ්බං අසුකට්ඨානෙ නාම ධාතු නිධානන්ති පුච්ඡි.

තත්ථෙකො විසංවස්ස සතිකො ථෙරො අසුකට්ඨානෙ ධාතුනිධානන්ති න ජානාමි. මය්හං පන පිතාමහත්ථෙරො මයි සත්තවස්සිකකාලෙ මාලාචඞ්ගොටකං ගාහාපෙත්වා එහි සාමණෙර, අසුක ගච්ඡන්තරෙ පාසානථූපො අත්ථි, තත්ථ ගච්ඡාමාති ගන්ත්වා පූජෙත්වා ඉමං ඨානං උපධාරෙතුං වට්ටති සාමණෙරොති ආහ. අහං එත්තකමෙව ජානාමි මහාරාජාති ආහ.

රාජා එතදෙව ඨානන්ති වත්වා ගච්ඡෙ හරාපෙත්වා පාසාණථූපං පංසුඤ්ච අපනෙත්වා හෙට්ඨා සුධාභූමිං අද්දස. තතො සුධඤ්ච ඉට්ඨකායො ච හරාපෙත්වා අනුපුබ්බෙන පරිවෙණා ඔරුය්හ සත්ත රතනවාලිකං අසීති හත්ථානි ච කට්ඨරූපානි සම්පරිවත්තන්තානි අද්දස. සො යක්ඛ දාසකෙ පක්කොසාපෙත්වා බලිකම්මං කාරෙත්වාපි නෙව අන්තං න කොටිං පන්නන්තො දෙවතා නමස්සමානො අහං ඉමා ධාතුයො ගහෙත්වා චතුරාසීතියා විහාරසහස්සෙසු නිදහිත්වා සක්කාරං කරොමි මා දෙවතා අන්තරායං කරෙන්තූති ආහ.

සක්කො දෙවරාජා චාරිකං චරන්තො තං දිස්වා විස්සකම්මං ආමන්තෙත්වා ආහ. තාත, අසොකො ධම්මරාජා ධාතුයො නීහරිස්සාමීති පරිවෙණං ඔතිණ්ණො, ගන්ත්වා කට්ඨරූපානි හාරෙහීති සො පඤ්චචූළගාම දාරකවෙසෙනාගන්ත්වා රඤ්ඤො පුරතො ධනුකහත්ථො ඨත්වා හාරෙමි මහාරාජාති ආහ. හර තාතාති. සරං ගහෙත්වා සන්ධිම්හියෙව විජ්ඣි, සබ්බං විප්පකිරීයිත්ථ.

අථ රාජා ආචිඤ්ජනෙ බද්ධ කුඤ්චික මුද්දිකං ගණ්හි, මණික්ඛණ්ධං පස්සි, අනාගතෙ දළිද්දරාජානො ඉමං මණිං ගහෙත්වා ධාතූනං සක්කාරං කරොන්තූති පන අක්ඛරානි දිස්වා කුජ්ඣිත්වා මාදිසං නාම රාජානං දළිද්දරාජාති චත්තු යුත්තන්ති පුනප්පුන ඝටෙත්වා ද්වාරං විචරිත්වා අන්තොගෙහං පවිට්ඨො. අට්ඨාරස වස්සාධිකානං ද්වින්නං වස්සසතානං උපරි ආරොපිතදීපා තථෙව පජ්ජලන්ති නිලුප්පල පුප්ඵානි තං ඛණං ආහරිත්වා ආරොපිතානි විය, පුප්ඵසණ්ථරො තං ඛණං සන්ථතො විය, ගණ්ධා තං මුහුත්තං පිංසිත්වා ඨපිතා විය.

රාජා සුවණ්ණපට්ටං ගහෙත්වා අනාගතෙ පියදාසොනාම කුමාරො ඡත්තං උස්සාපෙත්වා අසොකො නාම ධම්මරාජා භවිස්සති සො ඉමා ධාතුයො ගහෙත්වා විත්ථාරිකා කරිස්සතීති වාචෙත්වා දිට්ඨො’හං අය්යොන මහාකස්සපත්ථෙරෙනාති වත්වා වාමහත්ථං ආභුජිත්වා දක්ඛිණහත්ථෙන අප්පොඨෙසි.

සො තස්මිං ඨානෙ පරිචරණක ධාතුමත්තකමෙව ඨපෙත්වා සෙසධාතුයො සබ්බා ගහෙත්වා ධාතුඝරං පුබ්බෙ පිහිතනයෙනෙව පිදහිත්වා සබ්බං යථා පකතියාව කාරෙත්වා උපරි පාසාණචෙතියං පතිට්ඨාපෙත්වා චතුරාසීතියා විහාරසහස්සෙසුධාතුයො පතිට්ඨාපෙසි එවං ජම්බුදීපතලෙ අසොකො ධම්මරාජා චතුරාසිති චෙතිය සහස්සානි කාරාපෙසි.

සබ්බෙ ථූපා සබ්බලොකෙකදීපා සබ්බෙසං යෙ සග්ගමොක්ඛාවහා ච, හිත්වා සබ්බං කිච්චමඤ්ඤං ජනෙන වණ්දය්යා තෙ සබ්බථා සබ්බකාලන්ති.