📜

බොධි ආගමනකථා

14. අනුලාදෙවී පඤ්චහි කඤ්ඤාසතෙහි පඤ්චහි අන්තෙපුරිසා සතෙහීති මාතුගාමසහස්සෙන සද්ධිං සඞ්ඝමිත්තත්ථෙරියා සන්තිකෙ පබ්බජිත්වා නචිරස්සෙව සපරිවාරා අරහත්තෙ පතිට්ඨාසි. අරිට්ඨොපි ඛො රඤ්ඤො භාගිනෙය්යො පඤ්චහි පුරිස සතෙහි සද්ධිං ථෙරස්ස සන්තිකෙ පබ්බජිත්වා සපරිවාරො නචිරස්සෙව අරහත්තෙ පතිට්ඨාසි. අථෙකදිවසං රාජා බොධිං වන්දිත්වා ථෙරෙන සද්ධිං ථූපාරාමං ගච්ඡති. තස්ස ලොහපාසාදට්ඨානං සම්පත්තස්ස පුරිසා පුප්ඵානි ආහරිංසු රාජා ථෙරස්ස පුප්ඵානි අදාසි. ථෙරො පුප්ඵෙහි ලොහපාසාදට්ඨානං පූජෙසි පුප්ඵෙසු භූමියා පතිත මත්තෙසු මහාභූමිචාලො අහොසි?

රාජා කස්මා භන්තෙ භූමි චලිතානි පුච්ඡි. ඉමස්මිං මහාරාජ ඔකාසෙ අනාගතෙ සඞ්ඝස්ස උපොසථාගාරං භවිස්සති. තස්සෙතං පුබ්බනිමිත්තන්ති ආහ. පුන තස්ස මහාචෙතියට්ඨානං සම්පත්තස්ස චම්පක පුප්ඵානි අභිහරිංසු. තානිපි රාජා ථෙරස්ස අදාසි. ථෙරො මහාචෙතියට්ඨානං පුප්ඵෙහි පූජෙත්වා වන්දි තාවදෙව මහාපථවී සංකම්පි. රාජා භන්තෙ කස්මා පථවී කම්පිත්ථාති පුච්ඡි. මහාරාජ ඉමස්මිං ඨානෙ අනාගතෙ බුද්ධස්ස භගවතො අසදිසො මහාථූපො භවිස්සති. තස්සෙතං පුබ්බනිමිත්තන්ති ආහ. අහමෙව කරොමි භන්තෙති. අලං මහාරාජ තුම්හාකං අඤ්ඤං බහුං කම්මං අත්ථි. තුම්හාකං පන නන්තා දුට්ඨගාමණී අභයො නාම කාරෙස්සතීති.

අථ රාජා සචෙ භන්තෙ මය්හං නන්තා කරිස්සති. කතංයෙව මයාති ද්වාදසහත්ථං පාසාණත්ථම්හං ආහරාපෙත්වා දෙවානම්පියතිස්ස රඤ්ඤො නත්තා දුට්ඨගාමණි අභයො නාම ඉමස්මිං පදෙසෙ ථූපං කරොතීති අක්ඛරානි ලිඛාපෙත්වා පතිට්ඨාපෙසීති අථ දෙවානම්පියතිස්සරාජා චෙතියපප්පතෙ නිහිතා සම්මාසම්බුද්ධ භුත්ත පත්ත පූරෙත්වා ආහටා ධාතුයොහත්ථික්ඛණ්ධෙන ආහරාපෙත්වා සකලතම්බපණ්ණිදීපෙ ¶ යොජනෙ යොජනෙ ථූපං කාරෙත්වා ධාතුයො පතිට්ඨාපෙසි භගවතො පත්තං පන රාජ ගෙහෙයව ඨපෙත්වා පූජමකාසීති.

නිධාපෙත්වාන සම්බුද්ධ-ධාතුයො පත්තමත්තකා,

කාරාපෙසි මහාරාජ-ථූපෙ යොජන යොජනෙති;