📜
2. රාධසංයුත්තං
1. පඨමවග්ගො
1. මාරසුත්තවණ්ණනා
160. මාරසද්දොයං ¶ ¶ භාවසාධනොති දස්සෙන්තො ‘‘මාරො වා අස්සාති මරණං වා භවෙය්යා’’ති ආහ. මාරෙතාති මරිතබ්බො මාරං මරණං එතබ්බොති ආහ ‘‘මාරෙතබ්බො’’ති. අනුපාදානිබ්බානත්ථාති ඵලවිමුත්තිසඞ්ඛාතා අරහතො අරහන්තතා නාම යාවදෙව අනුපාදානිබ්බානත්ථා. නිබ්බානබ්භන්තරෙති අනුපාදානිබ්බානාධිගමස්ස අබ්භන්තරෙ තතො ඔරමෙව ඉදං මග්ගං බ්රහ්මචරියං වුස්සති, න තතො පරං. අස්සාති බ්රහ්මචරියස්ස.
මාරසුත්තවණ්ණනා නිට්ඨිතා.
2-10. සත්තසුත්තාදිවණ්ණනා
161-169. ලග්ගපුච්ඡාති ලග්ගනස්ස බජ්ඣනස්ස පුච්ඡා. යදි රූපාදීසු සත්තත්තා සත්තො, ඛීණාසවා කථං සත්තාති? සත්තභූතපුබ්බාති කත්වා. කීළාවිගමන්ති කීළාය අපනයනං ඔරමණං. යන්තරජ්ජු විය භවපබන්ධස්ස නයනතො භවරජ්ජූති තණ්හා වුත්තා.
සත්තසුත්තාදිවණ්ණනා නිට්ඨිතා.
පඨමවග්ගවණ්ණනා නිට්ඨිතා.
2. දුතියවග්ගො
1-12. මාරසුත්තාදිවණ්ණනා
170-181. රූපාදිවිනිමුත්තං ¶ මරණං නාම නත්ථි රූපාදීනංයෙව විභවෙ මරණසමඤ්ඤාති. මරණධම්මො විනාසභාවො.
මාරසුත්තාදිවණ්ණනා නිට්ඨිතා.
දුතියවග්ගවණ්ණනා නිට්ඨිතා.
3-4. ආයාචනවග්ගාදි
1-11. මාරාදිසුත්තඑකාදසකවණ්ණනා
182-205. සුඛුමං ¶ කාරණං උපට්ඨාති, තෙනෙස ථෙරො පටිභානෙය්යකානං එතදග්ගෙ ඨපිතො. විමුත්තිපරිපාචනීයධම්මවසෙනෙව, න පටිවෙධාවහභාවෙන.
මාරාදිසුත්තඑකාදසකවණ්ණනා නිට්ඨිතා.
ආයාචනවග්ගාදිවණ්ණනා නිට්ඨිතා.
සාරත්ථප්පකාසිනියා සංයුත්තනිකාය-අට්ඨකථාය
රාධසංයුත්තවණ්ණනාය ලීනත්ථප්පකාසනා සමත්තා.