📜

3. මාතුගාමසංයුත්තං

1. පඨමපෙය්යාලවග්ගො

1-2. මාතුගාමසුත්තාදිවණ්ණනා

280-281. අගුණඞ්ගෙහීති අගුණකොට්ඨාසෙහි. රූපයතීති රූපං, සරීරරූපං. සරීරරූපං පාසංසං එතස්ස අත්ථීති රූපවා, තප්පටික්ඛෙපෙන න ච රූපවා, සම්පන්නරූපො න හොතීති අත්ථො. ඤාතිකුලතො අඤ්ඤතො වා ආගතාය භොගසම්පදාය අභාවෙන න භොගසම්පන්නො. දුස්සීලොති නිස්සීලො. නිස්සීලතාය එව චස්සා පුබ්බුට්ඨායිතාදිආචාරාභාවො වුත්තො. ආලසියොති ආලසියතාය යුත්තො. පජඤ්චස්ස න ලභතීති පජාභාවසීසෙන තස්සා පරිවාරහානි වුත්තා. පරිවත්තෙතබ්බන්ති පුරිසවසෙන පරිවත්තෙතබ්බං.

මාතුගාමසුත්තාදිවණ්ණනා නිට්ඨිතා.

3. ආවෙණිකදුක්ඛසුත්තවණ්ණනා

282. ආවෙණිතබ්බතො මරියාදාය විසුං අසාධාරණතො පස්සිතබ්බතො ආවෙණිකානි. පටිපච්චෙකෙ පුග්ගලෙ නියුත්තානීති පාටිපුග්ගලිකානි. පරිචාරිකභාවන්ති උපට්ඨායිකභාවං.

ආවෙණිකදුක්ඛසුත්තවණ්ණනා නිට්ඨිතා.

4. තීහිධම්මෙහිසුත්තාදිවණ්ණනා

283-303. මච්ඡෙරමලපරියුට්ඨිතෙනාති මච්ඡරියමලෙන අභිභූතෙන. තෙනාති කස්සචි කිඤ්චි අදානෙන ච. එතං ‘‘මච්ඡෙරමලපරියුට්ඨිතෙනා’’තිආදි වුත්තං. විලොකෙන්තො විචරති ඉස්සාපකතචිත්තතාය. පඤ්චමාදීනි යාව එකාදසමා උත්තානත්ථානෙව.

තීහිධම්මෙහිසුත්තාදිවණ්ණනා නිට්ඨිතා.

3. බලවග්ගො

1. විසාරදසුත්තවණ්ණනා

304. රූපසම්පත්තිරූපබලං තංසමඞ්ගිනො උපත්ථම්භකභාවතො. එස නයො සෙසෙසුපි. බලානි හි සත්තානං වුඩ්ඪියා උපත්ථම්භකපච්චයො හොති, යථා තං ආහාරො. තෙනාහ – ‘‘ඉමානී’’තිආදි.

විසාරදසුත්තවණ්ණනා නිට්ඨිතා.

2-10. පසය්හසුත්තාදිවණ්ණනා

305-313. අභිභවිත්වා සබ්බං අන්තොජනං සාමිකඤ්ච. නාසෙන්තීති නාසනං අදස්සනං නෙන්ති නීහරන්තීති අත්ථො.

පසය්හසුත්තාදිවණ්ණනා නිට්ඨිතා.

මාතුගාමසංයුත්තවණ්ණනා නිට්ඨිතා.