📜

9. අසඞ්ඛතසංයුත්තං

1. පඨමවග්ගො

1-11. කායගතාසතිසුත්තාදිවණ්ණනා

366-376. අසඞ්ඛතන්ති න සඞ්ඛතං හෙතුපච්චයෙති. තෙනාහ ‘‘අකත’’න්ති. හිතං එසන්තෙනාති මෙත්තායන්තෙන. අනුකම්පමානෙනාති කරුණායන්තෙන. උපාදායාති ආදියිත්වාති අයමත්ථොතිආහ ‘‘චිත්තෙන පරිග්ගහෙත්වා’’ති. අවිපරීතධම්මදෙසනාති අවිපරීතධම්මස්ස දෙසනා, පටිපත්තිම්පි සාවකා විය ගරුකො භගවා. දායජ්ජං අත්තනො අධිට්ඨිතං නිය්යාතෙති.

භික්ඛාසම්පත්තිකාලාදීනං සත්තන්නං සප්පායානං සම්පත්තියා ලබ්භනකාලෙ. විපත්තිකාලෙ පන එත්ථ වුත්තවිපරියායෙන අත්ථො වෙදිතබ්බො. භාරියන්ති දුක්ඛබහුලතාය දාරුණං. අම්හාකං සන්තිකා ලද්ධබ්බා. තුම්හාකං අනුසාසනීති තුම්හාකං දාතබ්බා අනුසාසනී.

කායගතාසතිසුත්තාදිවණ්ණනා නිට්ඨිතා.

2. දුතියවග්ගො

23-33. අසඞ්ඛතසුත්තාදිවණ්ණනා

377-409. තත්ථ ච නත්ථි එත්ථ තණ්හාසඞ්ඛාතං නතං, නත්ථි එතස්මිං වා අධිගතෙ පුග්ගලභාවොති අනතං. අනාසවන්ති එත්ථාපි එසෙව නයො. සච්චධම්මතාය සච්චං. වට්ටදුක්ඛතො පාරමෙතීති පාරං. සණ්හට්ඨෙනාති සුඛුමට්ඨෙන නිපුණං. තතො එව දුද්දසතාය. අජජ්ජරං නිච්චසභාවත්තා. නත්ථි එතස්ස නිදස්සනන්ති වා අනිදස්සනං. එතස්මිං අධිගතෙ නත්ථි සංසාරෙ. පපඤ්චන්ති වා නිප්පපඤ්චං.

එතස්මිං අධිගතෙ පුග්ගලස්ස මරණං නත්ථීති වා අමතං. අතප්පකට්ඨෙන වා පණීතං. සුඛහෙතුතාය වා සිවං. තණ්හා ඛීයන්ති එත්ථාති තණ්හක්ඛයං.

අඤ්ඤස්ස තාදිසස්ස අභාවතො විම්හාපනීයතාය අභූතමෙවාති. කුතොචි පච්චයතො අනිබ්බත්තමෙව හුත්වා භූතං විජ්ජමානං. තෙනාහ ‘‘අජාතං හුත්වා අත්ථී’’ති. නත්ථි එත්ථ දුක්ඛන්ති නිද්දුක්ඛං, තස්ස භාවො නිද්දුක්ඛත්තං. තස්මා අනීතිකං ඊතිරහිතං. වානං වුච්චති තණ්හා, තදභාවෙන නිබ්බානං. බ්යාබජ්ඣං වුච්චති දුක්ඛං, තදභාවෙන අබ්යාබජ්ඣං. පරමත්ථතො සච්චතො සුද්ධිභාවෙන. කාමා එව පුථුජ්ජනෙහි අල්ලීයිතබ්බතො ආලයා. එස නයො සෙසෙසුපි. පතිට්ඨට්ඨෙනාති පතිට්ඨාභාවෙන වට්ටදුක්ඛතො මුච්චිතුකාමානං දීපසදිසං ඔඝෙහි අනජ්ඣොත්ථරණීයත්තා. අල්ලීයිතබ්බයුත්තට්ඨෙනාති අල්ලීයිතුං අරහභාවතො. තායනට්ඨෙනාති සපරතායනට්ඨෙන. භයසරණට්ඨෙනාති භයස්ස හිංසනට්ඨෙන. සෙට්ඨං උත්තමං. ගතීති ගන්ධබ්බට්ඨානං.

අසඞ්ඛතසුත්තාදිවණ්ණනා නිට්ඨිතා.

අසඞ්ඛතසංයුත්තවණ්ණනා නිට්ඨිතා.