📜

(22) 2. පරිසාවග්ගො

1. පරිසාසුත්තවණ්ණනා

211. දුතියස්ස පඨමෙ පරිසං දූසෙන්තීති පරිසදූසනා. පරිසං සොභෙන්තීති පරිසසොභනා.

2. දිට්ඨිසුත්තවණ්ණනා

212. දුතියෙ මනොදුච්චරිතෙ පරියාපන්නාපි මිච්ඡාදිට්ඨි මහාසාවජ්ජතාය විසුං වුත්තා, තස්සා ච පටිපක්ඛවසෙන සම්මාදිට්ඨි.

3. අකතඤ්ඤුතාසුත්තවණ්ණනා

213. තතියෙ අකතඤ්ඤුතා අකතවෙදිතාති අකතඤ්ඤුතාය අකතවෙදිතාය. උභයම්පෙතං අත්ථතො එකමෙව. සුක්කපක්ඛෙපි එසෙව නයො.

4-7. පාණාතිපාතීසුත්තාදිවණ්ණනා

214-217. චතුත්ථං චතුන්නං කම්මකිලෙසානං තප්පටිපක්ඛස්ස ච වසෙන වුත්තං, පඤ්චමං සුක්කපක්ඛානං ආදිතො චතුන්නං මිච්ඡත්තානං වසෙන, ඡට්ඨං අවසෙසානං චතුන්නං, සත්තමං අනරියවොහාරඅරියවොහාරානං. තථා අට්ඨමනවමදසමානි සප්පටිපක්ඛානං අස්සද්ධම්මානං වසෙන වුත්තානි. සබ්බසුත්තෙසු පන සුක්කපක්ඛධම්මා ලොකියලොකුත්තරමිස්සකාව කථිතා. නවසු සුත්තෙසු කිඤ්චාපි ‘‘සග්ගෙ’’ති වුත්තං, තයො පන මග්ගා තීණි ච ඵලානි ලබ්භන්තියෙවාති.

පරිසාවග්ගො දුතියො.