📜

(13) 3. භයවග්ගො

1. අත්තානුවාදසුත්තවණ්ණනා

121. තතියස්ස පඨමෙ අත්තානං අනුවදන්තස්ස උප්පජ්ජනකභයන්ති අත්තානං අනුවදන්තස්ස පාපකම්මිනො උප්පජ්ජනකභයං. ද්වත්තිංසකම්මකාරණෙ පටිච්ච උප්පජ්ජනකභයන්ති අගාරිකානං වසෙන වුත්තං , අනගාරිකානං පන විනයදණ්ඩං පටිච්ච උප්පජ්ජනකභයම්පි දණ්ඩභයන්තෙව සඞ්ඛං ගච්ඡති. සෙසං සුවිඤ්ඤෙය්යමෙව.

අත්තානුවාදසුත්තවණ්ණනා නිට්ඨිතා.

2. ඌමිභයසුත්තවණ්ණනා

122. දුතියෙ කොධූපායාසස්සෙතං අධිවචනන්ති එත්ථ කුජ්ඣනට්ඨෙන කොධො, ස්වෙව චිත්තස්ස කායස්ස ච අතිප්පමද්දනමථනුප්පාදනෙහි දළ්හආයාසට්ඨෙන උපායාසො. අනෙකවාරං පවත්තිත්වා අත්තනා සමවෙතං සත්තං අජ්ඣොත්ථරිත්වා සීසං උක්ඛිපිතුං අදත්වා ඌමිසදිසතා දට්ඨබ්බා. යථා හි බාහිරං උදකං ඔතිණ්ණො ඌමීසු ඔසීදිත්වා මරති, එවං ඉමස්මිං සාසනෙ කොධූපායාසෙ ඔසීදිත්වා විබ්භමති, තස්මා කොධූපායාසො ‘‘ඌමිභය’’න්ති වුත්තො. ඔදරිකත්තස්සෙතං අධිවචනන්ති යථා හි බාහිරං උදකං ඔතිණ්ණො කුම්භීලෙන ඛාදිතො මරති, එවං ඉමස්මිං සාසනෙ ඔදරිකත්තෙන ඔදරිකභාවෙන ආමිසගෙධෙන මිච්ඡාජීවෙන ජීවිකකප්පනෙන නාසිතසීලාදිගුණතාය ඛාදිතධම්මසරීරො විබ්භමති, තස්මා ඔදරිකත්තං ‘‘කුම්භීලභය’’න්ති වුත්තං.

අනුපට්ඨිතාය සතියාති කායගතං සතිං අනුට්ඨාපෙත්වා. අසංවුතෙහීති අපිහිතෙහි. පඤ්චන්නෙතං කාමගුණානං අධිවචනන්ති යථා හි බාහිරං උදකං ඔතිණ්ණො ආවට්ටෙ නිමුජ්ජිත්වා මරති, එවං ඉමස්මිං සාසනෙ පබ්බජිතො පඤ්චකාමගුණාවට්ටෙ නිමුජ්ජිත්වා විබ්භමති. කාමරාගාභිභූතො හි සත්තො ඉතො ච එත්තො, එත්තො ච ඉතොති එවං මනාපියරූපාදිවිසයසඞ්ඛාතෙ ආවට්ටෙ අත්තානං සංසාරෙත්වා යථා තතො බහිභූතෙ නෙක්ඛම්මෙ චිත්තම්පි න උප්පාදෙති, එවං ආවට්ටෙත්වා බ්යසනාපාදනෙන කාමගුණානං ආවට්ටසදිසතා දට්ඨබ්බා.

අනුද්ධංසෙතීති කිලමෙති විලොලති. රාගානුද්ධංසිතෙනාති රාගෙන අනුද්ධංසිතෙන. මාතුගාමස්සෙතං අධිවචනන්ති. යථා හි බාහිරං උදකං ඔතිණ්ණො චණ්ඩමච්ඡං ආගම්ම ලද්ධප්පහාරො මරති, එවං ඉමස්මිං සාසනෙ මාතුගාමං ආරබ්භ උප්පන්නකාමරාගො විබ්භමති, තස්මා මාතුගාමො ‘‘සුසුකාභය’’න්ති වුත්තො. මාතුගාමො හි යොනිසොමනසිකාරරහිතං අධීරපුරිසං ඉත්ථිකුත්තභූතෙහි අත්තනො හාසභාවවිලාසෙහි අභිභුය්ය ගහෙත්වා ධීරජාතිකම්පි අත්තනො රූපාදීහි සම්පලොභනවසෙන අනවසෙසං අත්තනො උපකාරධම්මෙ සීලාදිකෙ සම්පාදෙතුං අසමත්ථං කරොන්තො අනයබ්යසනං පාපෙති.

ඉමානි පන චත්තාරි භයානි භායිත්වා යථා උදකං අනොරොහන්තස්ස උදකං නිස්සාය උදකපිපාසාවිනයනං සරීරසුද්ධිපරිළාහූපසමො කායඋතුග්ගාහාපනන්ති, එවමාදි ආනිසංසො නත්ථි, එවමෙවං ඉමානි චත්තාරි භයානි භායිත්වා සාසනෙ අපබ්බජන්තස්සපි ඉමං සාසනං නිස්සාය සඞ්ඛෙපතො වට්ටදුක්ඛූපසමො, විත්ථාරතො පන සීලානිසංසාදිවසෙන අනෙකවිධො ආනිසංසො නත්ථි. යථා පන ඉමානි චත්තාරි භයානි අභායිත්වා උදකං ඔරොහන්තස්ස වුත්තප්පකාරො ආනිසංසො හොති, එවං ඉමානි අභායිත්වා සාසනෙ පබ්බජන්තස්සපි වුත්තප්පකාරො ආනිසංසො හොති. මහාධම්මරක්ඛිතත්ථෙරො පනාහ ‘‘චත්තාරි භයානි භායිත්වා උදකං අනොතරන්තො සොතං ඡින්දිත්වා පරතීරං පාපුණිතුං න සක්කොති, අභායිත්වා ඔතරන්තො සක්කොති, එවමෙවං භායිත්වා සාසනෙ අපබ්බජන්තොපි තණ්හාසොතං ඡින්දිත්වා නිබ්බානපාරං දට්ඨුං න සක්කොති, අභායිත්වා පබ්බජන්තො සක්කොතී’’ති.

ඌමිභයසුත්තවණ්ණනා නිට්ඨිතා.

3. පඨමනානාකරණසුත්තවණ්ණනා

123. තතියෙ බ්රහ්මකායිකානං දෙවානන්ති එත්ථ බ්රහ්මානං කායො සමූහොති බ්රහ්මකායො, තප්පරියාපන්නතාය තත්ථ ගතාති බ්රහ්මකායිකා. එතාය ච සබ්බස්සපි බ්රහ්මකායස්ස සමඤ්ඤාය භවිතබ්බං. ආභස්සරානං දෙවානන්තිආදිනා පන දුතියජ්ඣානභූමිකාදීනං උපරි ගහිතත්තා ගොබලීබද්දඤ්ඤායෙන තදවසිට්ඨානං අයං සමඤ්ඤා, තස්මා ‘‘බ්රහ්මකායිකානං දෙවාන’’න්ති පඨමජ්ඣානභූමිකානංයෙව ගහණං වෙදිතබ්බං. සහ බ්යයති ගච්ඡතීති සහබ්යො, සහවත්තනකො. තස්ස භාවො සහබ්යතා, සහපවත්තීති ආහ ‘‘සහභාවං උපගච්ඡතී’’ති. කප්පො ආයුප්පමාණන්ති එත්ථ යදිපි බ්රහ්මපාරිසජ්ජාදීනං ආයුනො අන්තරං අත්ථි, උක්කට්ඨපරිච්ඡෙදෙන පනෙතං වුත්තන්ති දස්සෙන්තො ‘‘පඨමජ්ඣානං අත්ථි හීන’’න්තිආදිමාහ.

ද්වෙ කප්පා ආයුප්පමාණන්ති එත්ථ පන හීනජ්ඣානෙන නිබ්බත්තානං වසෙන අයං පරිච්ඡෙදො කතොති දස්සෙතුං ‘‘දුතියජ්ඣානං වුත්තනයෙනෙව තිවිධං හොතී’’තිආදි ආරද්ධං. චත්තාරො කප්පාති එත්ථ පන උක්කට්ඨපරිච්ඡෙදෙන චතුසට්ඨි කප්පා වත්තබ්බාති දස්සෙන්තො ‘‘යං හෙට්ඨා වුත්තං ‘කප්පො ද්වෙ කප්පා’ති , කම්පි ආහරිත්වා අත්ථො වෙදිතබ්බො’’ති ආහ. කථං පනෙත්ථ අයමත්ථො ලබ්භතීති ආහ ‘‘කප්පොති ච ගුණස්සපි නාම’’න්ති. තත්ථ පඨමං වුත්තො කප්පො, තතො එකෙන ගුණෙන, එකස්මිං වාරෙ ගණනායාති අත්ථො. ද්වෙ කප්පා හොන්තීති එකවාරගණනාය කප්පස්ස ද්විගුණිතත්තා ද්වෙ මහාකප්පා හොන්තීති අත්ථො. දුතියෙනාති දුතියවාරගණනාය. චත්තාරොති දුතියවාරගණනාය ද්වීසු කප්පෙසු ද්විගුණිතෙසු චත්තාරො මහාකප්පා හොන්තීති අත්ථො. පුන තෙ චත්තාරො කප්පාති වුත්තනයෙන ද්වෙ වාරෙ ගුණෙත්වා යෙ චත්තාරො කප්පා දස්සිතා, පුන තෙ චත්තාරො කප්පා චතුග්ගුණා හොන්තීති අත්ථො. ඉදං වුත්තං හොති – ද්වෙ වාරෙ ගුණෙත්වා යෙ චත්තාරො කප්පා දස්සිතා, තෙසු චතුක්ඛත්තුං ගුණිතෙසු චතුසට්ඨි කප්පා සම්පජ්ජන්තීති. තථා හි චත්තාරො එකස්මිං වාරෙ ගුණිතා අට්ඨ හොන්ති, පුන තෙ අට්ඨ දුතියවාරෙ ගුණිතා සොළස හොන්ති, පුන තෙ සොළස තතියවාරෙ ගුණිතා ද්වත්තිංස හොන්ති, පුන තෙ ද්වත්තිංස චතුත්ථවාරෙ ගුණිතා චතුසට්ඨි හොන්ති. තෙනෙවාහ ‘‘ඉමෙහි චතූහි ගුණෙහි ගුණිතා එකෙන ගුණෙන අට්ඨ හොන්තී’’තිආදි. එත්ථ ච හෙට්ඨා උපොසථසුත්තෙ (අ. නි. 3.71) –

‘‘යානි මානුසකානි පඤ්ඤාස වස්සානි, චාතුමහාරාජිකානං දෙවානං එසො එකො රත්තින්දිවො’’ති –

ආදිනා කාමාවචරදෙවානමෙව ආයුප්පමාණං දස්සිතං. හෙට්ඨායෙව –

‘‘තයොමෙ, භික්ඛවෙ, පුග්ගලා සන්තො සංවිජ්ජමානා ලොකස්මිං. කතමෙ තයො? ඉධ, භික්ඛවෙ, එකච්චො පුග්ගලො සබ්බසො රූපසඤ්ඤානං සමතික්කමා…පෙ… ආකාසානඤ්චායතනූපගානං දෙවානං සහබ්යතං උපපජ්ජති. ආකාසානඤ්චායතනූපගානං, භික්ඛවෙ, දෙවානං වීසති කප්පසහස්සානි ආයුප්පමාණ’’න්ති (අ. නි. 3.117) –

ආදිනා අරූපාවචරානංයෙව ආයුප්පමාණං වුත්තං. ඉධ පන රූපාවචරානමෙව ආයුප්පමාණං දස්සිතං. විභඞ්ගපාළියං (විභ. 1022) පන ‘‘මනුස්සානං කිත්තකං ආයුප්පමාණං, වස්සසතං අප්පං වා භිය්යො’’තිආදිනා දෙවමනුස්සානඤ්චෙව රූපාරූපාවචරසත්තානඤ්ච ආයුප්පමාණං දස්සිතං.

තත්ථ සම්මාසම්බුද්ධෙන මනුස්සානං දෙවානඤ්ච ආයුං පරිච්ඡින්දමානෙන චතූසු අපායෙසු භුම්මදෙවෙසු ච ආයු න පරිච්ඡින්නං. තං කස්මාති? නිරයෙ තාව කම්මමෙව පමාණං. යාව කම්මං න ඛීයති, තාව පච්චන්ති. තථා සෙසඅපායෙසු. භුම්මදෙවානම්පි කම්මමෙව පමාණං. තත්ථ නිබ්බත්තා හි කෙචි සත්තාහමත්තං තිට්ඨන්ති, කෙචි අඩ්ඪමාසං, කප්පං තිට්ඨමානාපි අත්ථියෙව. තත්ථ මනුස්සෙසු ගිහිභාවෙ ඨිතායෙව සොතාපන්නාපි හොන්ති, සකදාගාමිඵලං අනාගාමිඵලං අරහත්තම්පි පාපුණන්ති, තෙසු සොතාපන්නාදයො යාවජීවං තිට්ඨන්ති, ඛීණාසවා පන පරිනිබ්බායන්ති වා පබ්බජන්ති වා. කස්මා? අරහත්තං නාම සෙට්ඨගුණං, ගිහිලිඞ්ගං හීනං, තං හීනතාය උත්තමං ගුණං ධාරෙතුං න සක්කොති, තස්මා තෙ පරිනිබ්බාතුකාමා වා හොන්ති පබ්බජිතුකාමා වා. භුම්මදෙවා පන අරහත්තං පත්තාපි යාවජීවං තිට්ඨන්ති, ඡසු කාමාවචරෙසු දෙවෙසු සොතාපන්නසකදාගාමිනො යාවජීවං තිට්ඨන්ති, අනාගාමිනා රූපභවං ගන්තුං වට්ටති ඛීණාසවෙන පරිනිබ්බාතුං. කස්මා? නිලීයනොකාසස්ස අභාවා. රූපාවචරාරූපාවචරෙසු සබ්බෙපි යාවජීවං තිට්ඨන්ති, තත්ථ රූපාවචරෙ නිබ්බත්තා සොතාපන්නසකදාගාමිනො න පුන ඉධාගච්ඡන්ති, තත්ථෙව පරිනිබ්බායන්ති. එතෙ හි ඣානඅනාගාමිනො නාම.

අට්ඨසමාපත්තිලාභීනං පන කිං නියමෙති? පගුණජ්ඣානං. යදෙවස්ස පගුණං හොති, තෙන උපපජ්ජති. සබ්බෙසු පගුණෙසු කිං නියමෙති? නෙවසඤ්ඤානාසඤ්ඤායතනසමාපත්ති. එකංසෙනෙව හි සො නෙවසඤ්ඤානාසඤ්ඤායතනෙ උපපජ්ජති. නවසු බ්රහ්මලොකෙසු නිබ්බත්තඅරියසාවකානං තත්රූපපත්තිපි උපරූපපත්තිපි, න හෙට්ඨූපපත්ති. පුථුජ්ජනානං පන තත්රූපපත්තිපි හොති, උපරූපපත්තිපි, හෙට්ඨූපපත්තිපි. පඤ්චසු සුද්ධාවාසෙසු චතූසු ච අරූපෙසු අරියසාවකානං තත්රූපපත්තිපි හොති උපරූපපත්තිපි. පඨමජ්ඣානභූමියං නිබ්බත්තො අනාගාමී නව බ්රහ්මලොකෙ සොධෙත්වා මත්ථකෙ ඨිතො පරිනිබ්බාති. වෙහප්ඵලං, අකනිට්ඨං, නෙවසඤ්ඤානාසඤ්ඤායතනන්ති ඉමෙ තයො දෙවලොකා සෙට්ඨභවා නාම. ඉමෙසු තීසු ඨානෙසු නිබ්බත්තඅනාගාමිනො නෙව උද්ධං ගච්ඡන්ති, න අධො, තත්ථ තත්ථෙව පරිනිබ්බායන්තීති ඉදං පකිණ්ණකං වෙදිතබ්බං.

පඨමනානාකරණසුත්තවණ්ණනා නිට්ඨිතා.

4-6. දුතියනානාකරණසුත්තාදිවණ්ණනා

124-6. චතුත්ථෙ තෙ ධම්මෙති තෙ ‘‘රූපගත’’න්තිආදිනා නයෙන වුත්තෙ රූපාදයො ධම්මෙ. අනිච්චතොති ඉමිනා නිච්චප්පටික්ඛෙපතො තෙසං අනිච්චතමාහ, තතො එව ච උදයවයවන්තතො විපරිණාමතො තාවකාලිකතො ච තෙ අනිච්චාති ජොතිතං හොති. යඤ්හි නිබ්බත්තං හොති, තං උදයවයපරිච්ඡින්නං . ජරාය මරණෙන ච තදෙව විපරීතං, ඉත්තරක්ඛණමෙව ච හොතීති. දුක්ඛතොති ඉමිනා සුඛප්පටික්ඛෙපතො තෙසං දුක්ඛතමාහ. තතො එව ච අභිණ්හප්පටිපීළනතො දුක්ඛවත්ථුතො ච තෙ දුක්ඛාති ජොතිතං හොති. උදයවයවන්තතාය හි තෙ අභිණ්හප්පටිපීළනතො නිරන්තරදුක්ඛතාය දුක්ඛස්සෙව ච අධිට්ඨානභූතා. පච්චයයාපනීයතාය රොගමූලතාය ච රොගතො. දුක්ඛතාසූලයොගතො කිලෙසාසුචිපග්ඝරණතො උප්පාදජරාභඞ්ගෙහි උද්ධුමාතපරිපක්කපභින්නතො ච ගණ්ඩතො. පීළාජනනතො, අන්තොතුදනතො, දුන්නීහරණතො ච සල්ලතො. අවඩ්ඪිආවහනතො අඝවත්ථුතො ච අඝතො. අසෙරිභාවජනනතො ආබාධපදට්ඨානතාය ච ආබාධතො. අවසවත්තනතො අවිධෙය්යතාය ච පරතො. බ්යාධිජරාමරණෙහි පලුජ්ජනීයතාය පලොකතො. සාමිනිවාසිකාරකවෙදකඅධිට්ඨායකවිරහතො සුඤ්ඤතො. අත්තප්පටික්ඛෙපට්ඨෙන අනත්තතො. රූපාදිධම්මා හි න එත්ථ අත්තා අත්ථීති අනත්තා. එවං සයම්පි අත්තා න හොන්තීති අනත්තා. තෙන අබ්යාපාරතො නිරීහතො තුච්ඡතො අනත්තාති දීපිතං හොති. ලක්ඛණත්තයමෙව සුඛාවබොධනත්ථං එකාදසහි පදෙහි විභජිත්වා ගහිතන්ති දස්සෙතුං ‘‘තත්ථා’’තිආදි වුත්තං. පඤ්චමඡට්ඨානි උත්තානත්ථානෙව.

දුතියනානාකරණසුත්තාදිවණ්ණනා නිට්ඨිතා.

7. පඨමතථාගතඅච්ඡරියසුත්තවණ්ණනා

127. සත්තමෙ වත්තමානසමීපෙ වත්තමානෙ විය වොහරිතබ්බන්ති ‘‘ඔක්කමතී’’ති ආහ ‘‘ඔක්කන්තො හොතීති අත්ථො’’ති. දසසහස්සචක්කවාළපත්ථරණො සමුජ්ජලභාවෙන උළාරො. දෙවානුභාවන්ති දෙවානං පභානුභාවං. දෙවානඤ්හි පභං සො ඔභාසො අධිභවති, න දෙවෙ. තෙනාහ ‘‘දෙවාන’’න්තිආදි. රුක්ඛගච්ඡාදිනා කෙනචි න හඤ්ඤතීති අඝා, අසම්බාධා. තෙනාහ ‘‘නිච්චවිවරා’’ති. අසංවුතාති හෙට්ඨා උපරි කෙනචි අපිහිතා. තෙනාහ ‘‘හෙට්ඨාපි අප්පතිට්ඨා’’ති. තත්ථ පි-සද්දෙන යථා හෙට්ඨා උදකස්ස පිධායිකා සන්ධාරිකා පථවී නත්ථි අසංවුතා ලොකන්තරිකා, එවං උපරිපි චක්කවාළෙසු දෙවවිමානානං අභාවතො අසංවුතා අප්පතිට්ඨාති දස්සෙති. අන්ධකාරො එත්ථ අත්ථීති අන්ධකාරා. චක්ඛුවිඤ්ඤාණං න ජායති ආලොකස්ස අභාවතො, න චක්ඛුනො. තථා හි ‘‘තෙනොභාසෙනඅඤ්ඤමඤ්ඤං සඤ්ජානන්තී’’ති වුත්තං. ජම්බුදීපෙ ඨිතමජ්ඣන්හිකවෙලාය පුබ්බවිදෙහවාසීනං අත්ථඞ්ගමවසෙන උපඩ්ඪං සූරියමණ්ඩලං පඤ්ඤායති, අපරගොයානවාසීනං උග්ගමනවසෙන. එවං සෙසදීපෙසුපීති ආහ ‘‘එකප්පහාරෙනෙව තීසු දීපෙසු පඤ්ඤායන්තී’’ති. ඉතො අඤ්ඤථා ද්වීසු එව දීපෙසු පඤ්ඤායන්ති. එකෙකාය දිසාය නවනවයොජනසතසහස්සානි අන්ධකාරවිධමනම්පි ඉමිනාව නයෙන දට්ඨබ්බං. පභාය නප්පහොන්තීති අත්තනො පභාය ඔභාසිතුං නාභිසම්භුණන්ති. යුගන්ධරපබ්බතමත්ථකසමප්පමාණෙ ආකාසෙ විචරණතො ‘‘චක්කවාළපබ්බතස්ස වෙමජ්ඣෙන චරන්තී’’ති වුත්තං.

බ්යාවටාති ඛාදනත්ථං ගණ්හිතුං උපක්කමන්තා. විපරිවත්තිත්වාති විවට්ටිත්වා. ඡිජ්ජිත්වාති මුච්ඡාපවත්තියා ඨිතට්ඨානතො මුච්චිත්වා, අඞ්ගපච්චඞ්ගඡෙදනවසෙන වා ඡිජ්ජිත්වා. අච්චන්තඛාරෙති ආතපසන්තපාභාවෙන අතිසීතභාවං සන්ධාය අච්චන්තඛාරතා වුත්තා සියා. න හි තං කප්පසණ්ඨානඋදකං සම්පත්තිකරමහාමෙඝවුට්ඨං පථවිසන්ධාරකං කප්පවිනාසකඋදකං විය ඛාරං භවිතුමරහති, තථා සති පථවීපි විලීයෙය්ය, තෙසං වා පාපකම්මඵලෙන පෙතානං පකතිඋදකස්ස පුබ්බඛෙළභාවාපත්ති විය තස්ස උදකස්ස ඛාරභාවාපත්ති හොතීති වුත්තං ‘‘අච්චන්තඛාරෙ උදකෙ’’ති.

පඨමතථාගතඅච්ඡරියසුත්තවණ්ණනා නිට්ඨිතා.

8. දුතියතථාගතඅච්ඡරියසුත්තවණ්ණනා

128. අට්ඨමෙ ආලීයන්ති ආරමිතබ්බට්ඨෙන සෙවීයන්තීති ආලයා, පඤ්ච කාමගුණා. ආරමන්තීති රතිං වින්දන්ති කීළන්ති ලළන්ති. ආලීයන්ති වා අල්ලීයන්තා අභිරමණවසෙන සෙවන්තීති ආලයා, තණ්හාවිචරිතානි. තෙහි ආලයෙහි රමන්තීති ආලයාරාමා. යථෙව හි සුසජ්ජිතං පුප්ඵඵලභරිතරුක්ඛාදිසම්පන්නඋය්යානං පවිට්ඨො රාජා තාය සම්පත්තියා රමති, සම්මුදිතො ආමොදිතප්පමොදිතො හොති, න උක්කණ්ඨෙති, සායම්පි නික්ඛමිතුං න ඉච්ඡති, එවමිමෙහි කාමාලයතණ්හාලයෙහි සත්තා රමන්ති, සංසාරවට්ටෙ පමුදිතා අනුක්කණ්ඨිතා වසන්ති. තෙන තෙසං භගවා දුවිධම්පි ආලයං උය්යානභූමිං විය දස්සෙන්තො ‘‘ආලයාරාමා’’තිආදිමාහ. සෙසමෙත්ථ උත්තානමෙව.

දුතියතථාගතඅච්ඡරියසුත්තවණ්ණනා නිට්ඨිතා.

9-10. ආනන්දඅච්ඡරියසුත්තාදිවණ්ණනා

129-130. නවමෙ පටිසන්ථාරධම්මන්ති පකතිචාරිත්තවසෙන වුත්තං, උපගතානං පන භික්ඛූනං භික්ඛුනීනඤ්ච පුච්ඡාවිස්සජ්ජනවසෙන චෙව චිත්තරුචිවසෙන ච යථාකාලං ධම්මං දෙසෙතියෙව, උපාසකඋපාසිකානං පන උපනිසින්නකකථාවසෙන. දසමං උත්තානමෙව.

ආනන්දඅච්ඡරියසුත්තාදිවණ්ණනා නිට්ඨිතා.

භයවග්ගවණ්ණනා නිට්ඨිතා.