📜

(26) 6. අභිඤ්ඤාවග්ගො

1-3. අභිඤ්ඤාසුත්තාදිවණ්ණනා

254-256. ඡට්ඨස්ස පඨමෙ පච්චනීකසමනතො සමථො, සමාධීති ආහ ‘‘චිත්තෙකග්ගතා’’ති. අනිච්චාදිනා විවිධෙනාකාරෙන දස්සනතො විපස්සනා, සඞ්ඛාරපරිග්ගාහකඤාණං. තෙනාහ ‘‘සඞ්ඛාරපරිග්ගහවිපස්සනාඤාණ’’න්ති.

දුතියෙ අනරියෙහි පරියෙසිතබ්බත්තා අනරියානං පරියෙසනාති අනරියපරියෙසනා. සයං ලාමකතාය අනරියානං පරියෙසනාති වා අනරියපරියෙසනා. ජරාසභාවන්ති ජීරණපකතිකං. තතියං උත්තානමෙව.

අභිඤ්ඤාසුත්තාදිවණ්ණනා නිට්ඨිතා.

4-10. මාලුක්යපුත්තසුත්තාදිවණ්ණනා

257-263. චතුත්ථෙ අපසාදෙතීති නිග්ගණ්හාති. උස්සාදෙතීති පග්ගණ්හාති. අපසාදනාකාරං උස්සාදනාකාරඤ්ච විභාවෙතුං ‘‘කථ’’න්තිආදි ආරද්ධං. පඤ්චමාදීනි උත්තානානෙව. සෙසං සුවිඤ්ඤෙය්යමෙව.

මාලුක්යපුත්තසුත්තාදිවණ්ණනා නිට්ඨිතා.

අභිඤ්ඤාවග්ගවණ්ණනා නිට්ඨිතා.

ඉති මනොරථපූරණියා අඞ්ගුත්තරනිකාය-අට්ඨකථාය

චතුක්කනිපාතවණ්ණනාය අනුත්තානත්ථදීපනා සමත්තා.

දුතියො භාගො නිට්ඨිතො.