📜

(19) 4. අරඤ්ඤවග්ගො

1. ආරඤ්ඤිකසුත්තං

181. ‘‘පඤ්චිමෙ , භික්ඛවෙ, ආරඤ්ඤිකා [ආරඤ්ඤතා (සබ්බත්ථ) පරි. 443 පස්සිතබ්බං]. කතමෙ පඤ්ච? මන්දත්තා මොමූහත්තා ආරඤ්ඤිකො හොති, පාපිච්ඡො ඉච්ඡාපකතො ආරඤ්ඤිකො හොති, උම්මාදා චිත්තක්ඛෙපා ආරඤ්ඤිකො හොති, වණ්ණිතං බුද්ධෙහි බුද්ධසාවකෙහීති ආරඤ්ඤිකො හොති, අප්පිච්ඡතංයෙව නිස්සාය සන්තුට්ඨිංයෙව නිස්සාය සල්ලෙඛංයෙව නිස්සාය පවිවෙකංයෙව නිස්සාය ඉදමත්ථිතංයෙව [ඉදමට්ඨිතංයෙව (සී. පී.)] නිස්සාය ආරඤ්ඤිකො හොති. ඉමෙ ඛො, භික්ඛවෙ, පඤ්ච ආරඤ්ඤිකා. ඉමෙසං ඛො, භික්ඛවෙ, පඤ්චන්නං ආරඤ්ඤිකානං ය්වායං ආරඤ්ඤිකො අප්පිච්ඡතංයෙව නිස්සාය සන්තුට්ඨිංයෙව නිස්සාය සල්ලෙඛංයෙව නිස්සාය පවිවෙකංයෙව නිස්සාය ඉදමත්ථිතංයෙව නිස්සාය ආරඤ්ඤිකො හොති, අයං ඉමෙසං පඤ්චන්නං ආරඤ්ඤිකානං අග්ගො ච සෙට්ඨො ච මොක්ඛො [පාමොක්ඛො (අ. නි. 4.95; 10.91)] ච උත්තමො ච පවරො ච.

‘‘සෙය්යථාපි, භික්ඛවෙ, ගවා ඛීරං, ඛීරම්හා දධි, දධිම්හා නවනීතං, නවනීතම්හා සප්පි, සප්පිම්හා සප්පිමණ්ඩො, සප්පිමණ්ඩො [සප්පිම්හා සප්පිමණ්ඩො (ක.) සං. නි. 3.662] තත්ථ අග්ගමක්ඛායති; එවමෙවං ඛො, භික්ඛවෙ, ඉමෙසං පඤ්චන්නං ආරඤ්ඤිකානං ය්වායං ආරඤ්ඤිකො අප්පිච්ඡතංයෙව නිස්සාය සන්තුට්ඨිංයෙව නිස්සාය සල්ලෙඛංයෙව නිස්සාය පවිවෙකංයෙව නිස්සාය ඉදමත්ථිතංයෙව නිස්සාය ආරඤ්ඤිකො හොති, අයං ඉමෙසං පඤ්චන්නං ආරඤ්ඤිකානං අග්ගො ච සෙට්ඨො ච මොක්ඛො ච උත්තමො ච පවරො චා’’ති. පඨමං.

2. චීවරසුත්තං

182. ‘‘පඤ්චිමෙ , භික්ඛවෙ, පංසුකූලිකා. කතමෙ පඤ්ච? මන්දත්තා මොමූහත්තා පංසුකූලිකො හොති…පෙ… ඉදමත්ථිතංයෙව නිස්සාය පංසුකූලිකො හොති. ඉමෙ ඛො, භික්ඛවෙ, පඤ්ච පංසුකූලිකා’’ති. දුතියං.

3. රුක්ඛමූලිකසුත්තං

183. ‘‘පඤ්චිමෙ, භික්ඛවෙ, රුක්ඛමූලිකා. කතමෙ පඤ්ච? මන්දත්තා මොමූහත්තා රුක්ඛමූලිකො හොති…පෙ… ඉදමත්ථිතංයෙව නිස්සාය රුක්ඛමූලිකො හොති. ඉමෙ ඛො, භික්ඛවෙ, පඤ්ච රුක්ඛමූලිකා’’ති. තතියං.

4. සොසානිකසුත්තං

184. ‘‘පඤ්චිමෙ , භික්ඛවෙ, සොසානිකා. කතමෙ පඤ්ච? මන්දත්තා මොමූහත්තා සොසානිකො හොති…පෙ… ඉදමත්ථිතංයෙව නිස්සාය සොසානිකො හොති. ඉමෙ ඛො, භික්ඛවෙ, පඤ්ච සොසානිකා’’ති. චතුත්ථං.

5. අබ්භොකාසිකසුත්තං

185. ‘‘පඤ්චිමෙ, භික්ඛවෙ, අබ්භොකාසිකා…පෙ…. පඤ්චමං.

6. නෙසජ්ජිකසුත්තං

186. ‘‘පඤ්චිමෙ, භික්ඛවෙ, නෙසජ්ජිකා…පෙ…. ඡට්ඨං.

7. යථාසන්ථතිකසුත්තං

187. ‘‘පඤ්චිමෙ, භික්ඛවෙ, යථාසන්ථතිකා…පෙ…. සත්තමං.

8. එකාසනිකසුත්තං

188. ‘‘පඤ්චිමෙ, භික්ඛවෙ, එකාසනිකා…පෙ…. අට්ඨමං.

9. ඛලුපච්ඡාභත්තිකසුත්තං

189. ‘‘පඤ්චිමෙ , භික්ඛවෙ, ඛලුපච්ඡාභත්තිකා…පෙ…. නවමං.

10. පත්තපිණ්ඩිකසුත්තං

190. ‘‘පඤ්චිමෙ, භික්ඛවෙ, පත්තපිණ්ඩිකා. කතමෙ පඤ්ච? මන්දත්තා මොමූහත්තා පත්තපිණ්ඩිකො හොති, පාපිච්ඡො ඉච්ඡාපකතො පත්තපිණ්ඩිකො හොති, උම්මාදා චිත්තක්ඛෙපා පත්තපිණ්ඩිකො හොති, ‘වණ්ණිතං බුද්ධෙහි බුද්ධසාවකෙහී’ති පත්තපිණ්ඩිකො හොති, අප්පිච්ඡතංයෙව නිස්සාය සන්තුට්ඨිංයෙව නිස්සාය සල්ලෙඛංයෙව නිස්සාය පවිවෙකංයෙව නිස්සාය ඉදමත්ථිතංයෙව නිස්සාය පත්තපිණ්ඩිකො හොති. ඉමෙ ඛො, භික්ඛවෙ, පඤ්ච පත්තපිණ්ඩිකා. ඉමෙසං ඛො, භික්ඛවෙ, පඤ්චන්නං පත්තපිණ්ඩිකානං ය්වායං පත්තපිණ්ඩිකො අප්පිච්ඡතංයෙව නිස්සාය සන්තුට්ඨිංයෙව නිස්සාය සල්ලෙඛංයෙව නිස්සාය පවිවෙකංයෙව නිස්සාය ඉදමත්ථිතංයෙව නිස්සාය පත්තපිණ්ඩිකො හොති, අයං ඉමෙසං පඤ්චන්නං පත්තපිණ්ඩිකානං අග්ගො ච සෙට්ඨො ච මොක්ඛො ච උත්තමො ච පවරො ච.

‘‘සෙය්යථාපි, භික්ඛවෙ, ගවා ඛීරං, ඛීරම්හා දධි, දධිම්හා නවනීතං, නවනීතම්හා සප්පි, සප්පිම්හා සප්පිමණ්ඩො, සප්පිමණ්ඩො තත්ථ අග්ගමක්ඛායති; එවමෙවං ඛො, භික්ඛවෙ, ඉමෙසං පඤ්චන්නං පත්තපිණ්ඩිකානං ය්වායං පත්තපිණ්ඩිකො අප්පිච්ඡතංයෙව නිස්සාය සන්තුට්ඨිංයෙව නිස්සාය සල්ලෙඛංයෙව නිස්සාය පවිවෙකංයෙව නිස්සාය ඉදමත්ථිතංයෙව නිස්සාය පත්තපිණ්ඩිකො හොති, අයං ඉමෙසං පඤ්චන්නං පත්තපිණ්ඩිකානං අග්ගො ච සෙට්ඨො ච මොක්ඛො ච උත්තමො ච පවරො චා’’ති. දසමං.

අරඤ්ඤවග්ගො චතුත්ථො.

තස්සුද්දානං –

අරඤ්ඤං චීවරං රුක්ඛ, සුසානං අබ්භොකාසිකං;

නෙසජ්ජං සන්ථතං එකාසනිකං, ඛලුපච්ඡාපිණ්ඩිකෙන චාති.