📜

3. රාගපෙය්යාලං

303. ‘‘රාගස්ස ¶ , භික්ඛවෙ, අභිඤ්ඤාය පඤ්ච ධම්මා භාවෙතබ්බා. කතමෙ පඤ්ච? අසුභසඤ්ඤා, මරණසඤ්ඤා, ආදීනවසඤ්ඤා, ආහාරෙ පටිකූලසඤ්ඤා, සබ්බලොකෙ අනභිරතසඤ්ඤා [සබ්බත්ථපි එවමෙව දිස්සති] – රාගස්ස, භික්ඛවෙ, අභිඤ්ඤාය ඉමෙ පඤ්ච ධම්මා භාවෙතබ්බා’’ති.

304. ‘‘රාගස්ස, භික්ඛවෙ, අභිඤ්ඤාය පඤ්ච ධම්මා භාවෙතබ්බා. කතමෙ පඤ්ච? අනිච්චසඤ්ඤා, අනත්තසඤ්ඤා, මරණසඤ්ඤා, ආහාරෙ පටිකූලසඤ්ඤා, සබ්බලොකෙ අනභිරතසඤ්ඤා – රාගස්ස, භික්ඛවෙ, අභිඤ්ඤාය ඉමෙ පඤ්ච ධම්මා භාවෙතබ්බා’’ති.

305. ‘‘රාගස්ස ¶ , භික්ඛවෙ, අභිඤ්ඤාය පඤ්ච ධම්මා භාවෙතබ්බා. කතමෙ පඤ්ච? අනිච්චසඤ්ඤා, අනිච්චෙ දුක්ඛසඤ්ඤා, දුක්ඛෙ අනත්තසඤ්ඤා, පහානසඤ්ඤා, විරාගසඤ්ඤා – රාගස්ස, භික්ඛවෙ, අභිඤ්ඤාය ඉමෙ පඤ්ච ධම්මා භාවෙතබ්බා’’ති.

306. ‘‘රාගස්ස, භික්ඛවෙ, අභිඤ්ඤාය පඤ්ච ධම්මා භාවෙතබ්බා. කතමෙ පඤ්ච? සද්ධින්ද්රියං, වීරියින්ද්රියං, සතින්ද්රියං, සමාධින්ද්රියං, පඤ්ඤින්ද්රියං – රාගස්ස, භික්ඛවෙ, අභිඤ්ඤාය ඉමෙ පඤ්ච ධම්මා භාවෙතබ්බා’’ති.

307. ‘‘රාගස්ස ¶ ¶ , භික්ඛවෙ, අභිඤ්ඤාය පඤ්ච ධම්මා භාවෙතබ්බා. කතමෙ පඤ්ච? සද්ධාබලං, වීරියබලං, සතිබලං, සමාධිබලං, පඤ්ඤාබලං – රාගස්ස, භික්ඛවෙ, අභිඤ්ඤාය ඉමෙ පඤ්ච ධම්මා භාවෙතබ්බා’’ති.

308-1151. ‘‘රාගස්ස, භික්ඛවෙ, පරිඤ්ඤාය… පරික්ඛයාය… පහානාය… ඛයාය… වයාය… විරාගාය… නිරොධාය… චාගාය… පටිනිස්සග්ගාය පඤ්ච ධම්මා භාවෙතබ්බා. දොසස්ස… මොහස්ස… කොධස්ස… උපනාහස්ස… මක්ඛස්ස… පළාසස්ස… ඉස්සාය… මච්ඡරියස්ස… මායාය… සාඨෙය්යස්ස… ථම්භස්ස… සාරම්භස්ස… මානස්ස… අතිමානස්ස ¶ … මදස්ස… පමාදස්ස අභිඤ්ඤාය… පරිඤ්ඤාය… පරික්ඛයාය… පහානාය… ඛයාය… වයාය… විරාගාය… නිරොධාය… චාගාය… පටිනිස්සග්ගාය පඤ්ච ධම්මා භාවෙතබ්බා.

‘‘කතමෙ පඤ්ච? සද්ධාබලං, වීරියබලං, සතිබලං, සමාධිබලං, පඤ්ඤාබලං – පමාදස්ස, භික්ඛවෙ, පටිනිස්සග්ගාය ඉමෙ පඤ්ච ධම්මා භාවෙතබ්බා’’ති.

රාගපෙය්යාලං නිට්ඨිතං.

තස්සුද්දානං –

අභිඤ්ඤාය පරිඤ්ඤාය පරික්ඛයාය,

පහානාය ඛයාය වයෙන ච;

විරාගනිරොධා චාගඤ්ච,

පටිනිස්සග්ගො ඉමෙ දසාති.

පඤ්චකනිපාතො නිට්ඨිතො.

තත්රිදං වග්ගුද්දානං –

සෙඛබලං ¶ බලඤ්චෙව, පඤ්චඞ්ගිකඤ්ච සුමනං;

මුණ්ඩනීවරණඤ්ච සඤ්ඤඤ්ච, යොධාජීවඤ්ච අට්ඨමං;

ථෙරං කකුධඵාසුඤ්ච, අන්ධකවින්දද්වාදසං;

ගිලානරාජතිකණ්ඩං, සද්ධම්මාඝාතුපාසකං;

අරඤ්ඤබ්රාහ්මණඤ්චෙව, කිමිලක්කොසකං තථා;

දීඝාචාරාවාසිකඤ්ච, දුච්චරිතූපසම්පදන්ති.

පඤ්චකනිපාතපාළි නිට්ඨිතා.