📜

9. සමණවග්ගො

1. භික්ඛුසුත්තං

85. [මහානි. 18; චූළනි. අජිතමාණවපුච්ඡානිද්දෙස 8] ‘‘සත්තන්නං ¶ , භික්ඛවෙ, ධම්මානං භින්නත්තා භික්ඛු හොති. කතමෙසං සත්තන්නං? සක්කායදිට්ඨි භින්නා හොති, විචිකිච්ඡා භින්නා හොති, සීලබ්බතපරාමාසො භින්නො හොති, රාගො භින්නො හොති, දොසො භින්නො හොති, මොහො භින්නො හොති, මානො භින්නො හොති. ඉමෙසං ඛො, භික්ඛවෙ, සත්තන්නං ධම්මානං භින්නත්තා භික්ඛු හොතී’’ති. පඨමං.

2. සමණසුත්තං

86. සත්තන්නං, භික්ඛවෙ, ධම්මානං සමිතත්තා සමණො හොති…පෙ…. දුතියං.

3. බ්රාහ්මණසුත්තං

87. බාහිතත්තා බ්රාහ්මණො හොති…පෙ…. තතියං.

4. සොත්තියසුත්තං

88. නිස්සුතත්තා [නිස්සුත්තත්තා (ස්යා.) ම. නි. 1.434 පස්සිතබ්බං] සොත්තියො [සොත්ථිකො (සී.), සොත්තිකො (ස්යා.)] හොති…පෙ…. චතුත්ථං.

5. න්හාතකසුත්තං

89. න්හාතත්තා ¶ ¶ න්හාතකො [නහාතත්තො නහාතකො (සී. ස්යා.)] හොති…පෙ…. පඤ්චමං.

6. වෙදගූසුත්තං

90. විදිතත්තා ¶ වෙදගූ හොති…පෙ…. ඡට්ඨං.

7. අරියසුත්තං

91. ආරකත්තා ¶ [අරහත්තා (සී.), අරී හතත්තා (ක.) ම. නි. 1.434 පාළි අට්ඨකථාටීකා පස්සිතබ්බා. ස්යාමපොත්ථකෙ පන සකලම්පි ඉදං සත්තමසුත්තං නත්ථි] අරියො හොති…පෙ…. සත්තමං.

8. අරහාසුත්තං

92. ‘‘ආරකත්තා අරහා හොති. කතමෙසං සත්තන්නං? සක්කායදිට්ඨි ආරකා හොති, විචිකිච්ඡා ආරකා හොති, සීලබ්බතපරාමාසො ආරකො හොති, රාගො ආරකො හොති, දොසො ආරකො හොති, මොහො ආරකො හොති, මානො ආරකො හොති. ඉමෙසං ඛො, භික්ඛවෙ, සත්තන්නං ධම්මානං ආරකත්තා අරහා හොතී’’ති. අට්ඨමං.

9. අසද්ධම්මසුත්තං

93. ‘‘සත්තිමෙ, භික්ඛවෙ, අසද්ධම්මා. කතමෙ සත්ත? අස්සද්ධො හොති, අහිරිකො හොති, අනොත්තප්පී හොති, අප්පස්සුතො හොති, කුසීතො හොති, මුට්ඨස්සති හොති, දුප්පඤ්ඤො හොති. ඉමෙ ඛො, භික්ඛවෙ, සත්ත අසද්ධම්මා’’ති. නවමං.

10. සද්ධම්මසුත්තං

94. ‘‘සත්තිමෙ, භික්ඛවෙ, සද්ධම්මා. කතමෙ සත්ත? සද්ධො හොති, හිරීමා හොති, ඔත්තප්පී හොති, බහුස්සුතො හොති, ආරද්ධවීරියො හොති, සතිමා හොති, පඤ්ඤවා හොති. ඉමෙ ඛො, භික්ඛවෙ, සත්ත සද්ධම්මා’’ති. දසමං.

සමණවග්ගො නවමො.

තස්සුද්දානං –

භික්ඛුං ¶ සමණො බ්රාහ්මණො, සොත්තියො චෙව න්හාතකො;

වෙදගූ අරියො අරහා, අසද්ධම්මා ච සද්ධම්මාති.