📜

7. තිරොකුට්ටසුත්තං

1.

තිරොකුට්ටෙසු ¶ තිට්ඨන්ති, සන්ධිසිඞ්ඝාටකෙසු ච;

ද්වාරබාහාසු තිට්ඨන්ති, ආගන්ත්වාන සකං ඝරං.

2.

පහූතෙ අන්නපානම්හි, ඛජ්ජභොජ්ජෙ උපට්ඨිතෙ;

න ¶ තෙසං කොචි සරති, සත්තානං කම්මපච්චයා.

3.

එවං දදන්ති ඤාතීනං, යෙ හොන්ති අනුකම්පකා;

සුචිං පණීතං කාලෙන, කප්පියං පානභොජනං;

ඉදං වො ඤාතීනං හොතු, සුඛිතා හොන්තු ඤාතයො.

4.

තෙ ච තත්ථ සමාගන්ත්වා, ඤාතිපෙතා සමාගතා;

පහූතෙ අන්නපානම්හි, සක්කච්චං අනුමොදරෙ.

5.

චිරං ජීවන්තු නො ඤාතී, යෙසං හෙතු ලභාමසෙ;

අම්හාකඤ්ච කතා පූජා, දායකා ච අනිප්ඵලා.

6.

න හි තත්ථ කසි [කසී (සී.)] අත්ථි, ගොරක්ඛෙත්ථ න විජ්ජති;

වණිජ්ජා තාදිසී නත්ථි, හිරඤ්ඤෙන කයොකයං [කයාක්කයං (සී.), කයා කයං (ස්යා.)];

ඉතො දින්නෙන යාපෙන්ති, පෙතා කාලඞ්කතා [කාලකතා (සී. ස්යා. කං.)] තහිං.

7.

උන්නමෙ උදකං වුට්ඨං, යථා නින්නං පවත්තති;

එවමෙව ඉතො දින්නං, පෙතානං උපකප්පති.

8.

යථා වාරිවහා පූරා, පරිපූරෙන්ති සාගරං;

එවමෙව ඉතො දින්නං, පෙතානං උපකප්පති.

9.

අදාසි ¶ ¶ මෙ අකාසි මෙ, ඤාතිමිත්තා [ඤාති මිත්තො (?)] සඛා ච මෙ;

පෙතානං දක්ඛිණං දජ්ජා, පුබ්බෙ කතමනුස්සරං.

10.

න හි රුණ්ණං වා සොකො වා, යා චඤ්ඤා පරිදෙවනා;

න තං පෙතානමත්ථාය, එවං තිට්ඨන්ති ඤාතයො.

11.

අයඤ්ච ඛො දක්ඛිණා දින්නා, සඞ්ඝම්හි සුප්පතිට්ඨිතා;

දීඝරත්තං ¶ හිතායස්ස, ඨානසො උපකප්පති.

12.

සො ඤාතිධම්මො ච අයං නිදස්සිතො, පෙතාන පූජා ච කතා උළාරා;

බලඤ්ච භික්ඛූනමනුප්පදින්නං [… මනුප්පදින්නවා (ක.)], තුම්හෙහි පුඤ්ඤං පසුතං අනප්පකන්ති.

තිරොකුට්ටසුත්තං නිට්ඨිතං.