📜

නමො තස්ස භගවතො අරහතො සම්මාසම්බුද්ධස්ස

ඛුද්දකනිකායෙ

ධම්මපද-අට්ඨකථා

(පඨමො භාගො)

ගන්ථාරම්භකථා

1.

මහාමොහතමොනද්ධෙ ¶ ¶ ¶ , ලොකෙ ලොකන්තදස්සිනා;

යෙන සද්ධම්මපජ්ජොතො, ජාලිතො ජලිතිද්ධිනා.

2.

තස්ස පාදෙ නමස්සිත්වා, සම්බුද්ධස්ස සිරීමතො;

සද්ධම්මඤ්චස්ස පූජෙත්වා, කත්වා සඞ්ඝස්ස චඤ්ජලිං.

3.

තං තං කාරණමාගම්ම, ධම්මාධම්මෙසු කොවිදො;

සම්පත්තසද්ධම්මපදො, සත්ථා ධම්මපදං සුභං.

4.

දෙසෙසි ¶ කරුණාවෙග-සමුස්සාහිතමානසො;

යං වෙ දෙවමනුස්සානං, පීතිපාමොජ්ජවඩ්ඪනං.

5.

පරම්පරාභතා තස්ස, නිපුණා අත්ථවණ්ණනා;

යා තම්බපණ්ණිදීපම්හි, දීපභාසාය සණ්ඨිතා.

6.

න සාධයති සෙසානං, සත්තානං හිතසම්පදං;

අප්පෙව නාම සාධෙය්ය, සබ්බලොකස්ස සා හිතං.

7.

ඉති ආසීසමානෙන, දන්තෙන සමචාරිනා;

කුමාරකස්සපෙනාහං, ථෙරෙන ථිරචෙතසා.

8.

සද්ධම්මට්ඨිතිකාමෙන ¶ , සක්කච්චං අභියාචිතො;

තං භාසං අතිවිත්ථාර-ගතඤ්ච වචනක්කමං.

9.

පහායාරොපයිත්වාන ¶ , තන්තිභාසං මනොරමං;

ගාථානං බ්යඤ්ජනපදං, යං තත්ථ න විභාවිතං.

10.

කෙවලං තං විභාවෙත්වා, සෙසං තමෙව අත්ථතො;

භාසන්තරෙන භාසිස්සං, ආවහන්තො විභාවිනං;

මනසො පීතිපාමොජ්ජං, අත්ථධම්මූපනිස්සිතන්ති.