📜
15. සුඛවග්ගො
සුසුඛං ¶ වත ජීවාම, වෙරිනෙසු අවෙරිනො;
වෙරිනෙසු මනුස්සෙසු, විහරාම අවෙරිනො.
සුසුඛං ¶ වත ජීවාම, ආතුරෙසු අනාතුරා;
ආතුරෙසු මනුස්සෙසු, විහරාම අනාතුරා.
සුසුඛං වත ජීවාම, උස්සුකෙසු අනුස්සුකා;
උස්සුකෙසු ¶ මනස්සෙසු, විහරාම අනුස්සුකා.
සුසුඛං වත ජීවාම, යෙසං නො නත්ථි කිඤ්චනං;
පීතිභක්ඛා භවිස්සාම, දෙවා ආභස්සරා යථා.
ජයං වෙරං පසවති, දුක්ඛං සෙති පරාජිතො;
උපසන්තො සුඛං සෙති, හිත්වා ජයපරාජයං.
නත්ථි රාගසමො අග්ගි, නත්ථි දොසසමො කලි;
නත්ථි ඛන්ධසමා [ඛන්ධාදිසා (සී. ස්යා. පී. රූපසිද්ධියා සමෙති)] දුක්ඛා, නත්ථි සන්තිපරං සුඛං.
ජිඝච්ඡාපරමා ¶ රොගා, සඞ්ඛාරපරමා [සඞ්කාරා පරමා (බහූසු)] දුඛා;
එතං ඤත්වා යථාභූතං, නිබ්බානං පරමං සුඛං.
ආරොග්යපරමා ලාභා, සන්තුට්ඨිපරමං ධනං;
විස්සාසපරමා ඤාති [විස්සාසපරමො ඤාති (ක. සී.), විස්සාසපරමා ඤාතී (සී. අට්ඨ.), විස්සාසා පරමා ඤාති (ක.)], නිබ්බානං පරමං [නිබ්බාණපරමං (ක. සී.)] සුඛං.
පවිවෙකරසං ¶ පිත්වා [පීත්වා (සී. ස්යා. කං. පී.)], රසං උපසමස්ස ච;
නිද්දරො හොති නිප්පාපො, ධම්මපීතිරසං පිවං.
සාහු ¶ දස්සනමරියානං, සන්නිවාසො සදා සුඛො;
අදස්සනෙන බාලානං, නිච්චමෙව සුඛී සියා.
බාලසඞ්ගතචාරී [බාලසඞ්ගතිචාරී (ක.)] හි, දීඝමද්ධාන සොචති;
දුක්ඛො බාලෙහි සංවාසො, අමිත්තෙනෙව සබ්බදා;
ධීරො ච සුඛසංවාසො, ඤාතීනංව සමාගමො.
තස්මා හි –
ධීරඤ්ච පඤ්ඤඤ්ච බහුස්සුතඤ්ච, ධොරය්හසීලං ¶ වතවන්තමරියං;
තං තාදිසං සප්පුරිසං සුමෙධං, භජෙථ නක්ඛත්තපථංව චන්දිමා [තස්මා හි ධීරං පඤ්ඤඤ්ච, බහුස්සුතඤ්ච ධොරය්හං; සීලං ධුතවතමරියං, තං තාදිසං සප්පුරිසං; සුමෙධං භජෙථ නක්ඛත්තපථංව චන්දිමා; (ක.)].
සුඛවග්ගො පන්නරසමො නිට්ඨිතො.