📜
7. අරහන්තවග්ගො
ගතද්ධිනො ¶ විසොකස්ස, විප්පමුත්තස්ස සබ්බධි;
සබ්බගන්ථප්පහීනස්ස, පරිළාහො න විජ්ජති.
උය්යුඤ්ජන්ති ¶ සතීමන්තො, න නිකෙතෙ රමන්ති තෙ;
හංසාව පල්ලලං හිත්වා, ඔකමොකං ජහන්ති තෙ.
යෙසං ¶ සන්නිචයො නත්ථි, යෙ පරිඤ්ඤාතභොජනා;
සුඤ්ඤතො අනිමිත්තො ච, විමොක්ඛො යෙසං ගොචරො;
ආකාසෙ ව සකුන්තානං [සකුණානං (ක.)], ගති තෙසං දුරන්නයා.
යස්සාසවා ¶ පරික්ඛීණා, ආහාරෙ ච අනිස්සිතො;
සුඤ්ඤතො අනිමිත්තො ච, විමොක්ඛො යස්ස ගොචරො;
ආකාසෙ ව සකුන්තානං, පදං තස්ස දුරන්නයං.
යස්සින්ද්රියානි සමථඞ්ගතානි [සමථං ගතානි (සී. පී.)], අස්සා යථා සාරථිනා සුදන්තා;
පහීනමානස්ස අනාසවස්ස, දෙවාපි තස්ස පිහයන්ති තාදිනො.
පථවිසමො නො විරුජ්ඣති, ඉන්දඛිලුපමො [ඉන්දඛීලූපමො (සී. ස්යා. ක.)] තාදි සුබ්බතො;
රහදොව අපෙතකද්දමො, සංසාරා න භවන්ති තාදිනො.
සන්තං ¶ තස්ස මනං හොති, සන්තා වාචා ච කම්ම ච;
සම්මදඤ්ඤා විමුත්තස්ස, උපසන්තස්ස තාදිනො.
අස්සද්ධො අකතඤ්ඤූ ච, සන්ධිච්ඡෙදො ච යො නරො;
හතාවකාසො වන්තාසො, ස වෙ උත්තමපොරිසො.
ගාමෙ වා යදි වාරඤ්ඤෙ, නින්නෙ වා යදි වා ථලෙ;
යත්ථ අරහන්තො විහරන්ති, තං භූමිරාමණෙය්යකං.
රමණීයානි ¶ ¶ අරඤ්ඤානි, යත්ථ න රමතී ජනො;
වීතරාගා රමිස්සන්ති, න තෙ කාමගවෙසිනො.
අරහන්තවග්ගො සත්තමො නිට්ඨිතො.