📜

9. පාපවග්ගො

116.

අභිත්ථරෙථ ¶ කල්යාණෙ, පාපා චිත්තං නිවාරයෙ;

දන්ධඤ්හි කරොතො පුඤ්ඤං, පාපස්මිං රමතී මනො.

117.

පාපඤ්චෙ පුරිසො කයිරා, න නං [න තං (සී. පී.)] කයිරා පුනප්පුනං;

න තම්හි ඡන්දං කයිරාථ, දුක්ඛො පාපස්ස උච්චයො.

118.

පුඤ්ඤඤ්චෙ පුරිසො කයිරා, කයිරා නං [කයිරාථෙතං (සී. ස්යා.), කයිරාථෙනං (පී.)] පුනප්පුනං;

තම්හි ඡන්දං කයිරාථ, සුඛො පුඤ්ඤස්ස උච්චයො.

119.

පාපොපි ¶ පස්සති භද්රං, යාව පාපං න පච්චති;

යදා ච පච්චති පාපං, අථ පාපො පාපානි [අථ පාපානි (?)] පස්සති.

120.

භද්රොපි ¶ ¶ පස්සති පාපං, යාව භද්රං න පච්චති;

යදා ච පච්චති භද්රං, අථ භද්රො භද්රානි [අථ භද්රානි (?)] පස්සති.

121.

මාවමඤ්ඤෙථ [මාප්පමඤ්ඤෙථ (සී. ස්යා. පී.)] පාපස්ස, න මන්තං [න මං තං (සී. පී.), න මත්තං (ස්යා.)] ආගමිස්සති;

උදබින්දුනිපාතෙන, උදකුම්භොපි පූරති;

බාලො පූරති [පූරති බාලො (සී. ක.), ආපූරති බාලො (ස්යා.)] පාපස්ස, ථොකං ථොකම්පි [ථොක ථොකම්පි (සී. පී.)] ආචිනං.

122.

මාවමඤ්ඤෙථ පුඤ්ඤස්ස, න මන්තං ආගමිස්සති;

උදබින්දුනිපාතෙන, උදකුම්භොපි පූරති;

ධීරො පූරති පුඤ්ඤස්ස, ථොකං ථොකම්පි ආචිනං.

123.

වාණිජොව භයං මග්ගං, අප්පසත්ථො මහද්ධනො;

විසං ජීවිතුකාමොව, පාපානි පරිවජ්ජයෙ.

124.

පාණිම්හි ¶ චෙ වණො නාස්ස, හරෙය්ය පාණිනා විසං;

නාබ්බණං විසමන්වෙති, නත්ථි පාපං අකුබ්බතො.

125.

යො ¶ අප්පදුට්ඨස්ස නරස්ස දුස්සති, සුද්ධස්ස පොසස්ස අනඞ්ගණස්ස;

තමෙව බාලං පච්චෙති පාපං, සුඛුමො රජො පටිවාතංව ඛිත්තො.

126.

ගබ්භමෙකෙ උප්පජ්ජන්ති, නිරයං පාපකම්මිනො;

සග්ගං සුගතිනො යන්ති, පරිනිබ්බන්ති අනාසවා.

127.

න ¶ අන්තලික්ඛෙ න සමුද්දමජ්ඣෙ, න පබ්බතානං විවරං පවිස්ස [පවිසං (ස්යා.)];

න ¶ විජ්ජතී [න විජ්ජති (ක. සී. පී. ක.)] සො ජගතිප්පදෙසො, යත්ථට්ඨිතො [යත්රට්ඨිතො (ස්යා.)] මුච්චෙය්ය පාපකම්මා.

128.

න අන්තලික්ඛෙ න සමුද්දමජ්ඣෙ, න පබ්බතානං විවරං පවිස්ස;

න විජ්ජතී සො ජගතිප්පදෙසො, යත්ථට්ඨිතං [යත්රට්ඨිතං (ස්යා.)] නප්පසහෙය්ය මච්චු.

පාපවග්ගො නවමො නිට්ඨිතො.