📜

3. තිකනිපාතො

1. අපරාසාමාථෙරීගාථා

39.

‘‘පණ්ණවීසතිවස්සානි ¶ , යතො පබ්බජිතාය මෙ;

නාභිජානාමි චිත්තස්ස, සමං ලද්ධං කුදාචනං.

40.

‘‘අලද්ධා චෙතසො සන්තිං, චිත්තෙ අවසවත්තිනී;

තතො සංවෙගමාපාදිං, සරිත්වා ජිනසාසනං.

41.

‘‘බහූහි දුක්ඛධම්මෙහි, අප්පමාදරතාය මෙ;

තණ්හක්ඛයො අනුප්පත්තො, කතං බුද්ධස්ස සාසනං;

අජ්ජ ¶ මෙ සත්තමී රත්ති, යතො තණ්හා විසොසිතා’’ති.

… අපරා සාමා ථෙරී….

2. උත්තමාථෙරීගාථා

42.

‘‘චතුක්ඛත්තුං ¶ පඤ්චක්ඛත්තුං, විහාරා උපනික්ඛමිං;

අලද්ධා චෙතසො සන්තිං, චිත්තෙ අවසවත්තිනී.

43.

‘‘සා ¶ භික්ඛුනිං උපගච්ඡිං, යා මෙ සද්ධායිකා අහු;

සා මෙ ධම්මමදෙසෙසි, ඛන්ධායතනධාතුයො.

44.

‘‘තස්සා ධම්මං සුණිත්වාන, යථා මං අනුසාසි සා;

සත්තාහං එකපල්ලඞ්කෙන, නිසීදිං පීතිසුඛසමප්පිතා [නිසීදිං සුඛසමප්පිතා (සී.)];

අට්ඨමියා පාදෙ පසාරෙසිං, තමොඛන්ධං පදාලියා’’ති.

… උත්තමා ථෙරී….

3. අපරාඋත්තමාථෙරීගාථා

45.

‘‘යෙ ඉමෙ සත්ත බොජ්ඣඞ්ගා, මග්ගා නිබ්බානපත්තියා;

භාවිතා තෙ මයා සබ්බෙ, යථා බුද්ධෙන දෙසිතා.

46.

‘‘සුඤ්ඤතස්සානිමිත්තස්ස, ලාභිනීහං යදිච්ඡකං;

ඔරසා ධීතා බුද්ධස්ස, නිබ්බානාභිරතා සදා.

47.

‘‘සබ්බෙ ¶ කාමා සමුච්ඡින්නා, යෙ දිබ්බා යෙ ච මානුසා;

වික්ඛීණො ජාතිසංසාරො, නත්ථි දානි පුනබ්භවො’’ති.

… අපරා උත්තමා ථෙරී….

4. දන්තිකාථෙරීගාථා

48.

‘‘දිවාවිහාරා නික්ඛම්ම, ගිජ්ඣකූටම්හි පබ්බතෙ;

නාගං ඔගාහමුත්තිණ්ණං, නදීතීරම්හි අද්දසං.

49.

‘‘පුරිසො අඞ්කුසමාදාය, ‘දෙහි පාද’න්ති යාචති;

නාගො පසාරයී පාදං, පුරිසො නාගමාරුහි.

50.

‘‘දිස්වා ¶ අදන්තං දමිතං, මනුස්සානං වසං ගතං;

තතො චිත්තං සමාධෙසිං, ඛලු තාය වනං ගතා’’ති.

… දන්තිකා ථෙරී….

5. උබ්බිරිථෙරීගාථා

51.

‘‘අම්ම ජීවාති වනම්හි කන්දසි, අත්තානං අධිගච්ඡ උබ්බිරි;

චුල්ලාසීතිසහස්සානි [චූළාසීතිසහස්සානි (සී.)], සබ්බා ජීවසනාමිකා;

එතම්හාළාහනෙ දඩ්ඪා, තාසං කමනුසොචසි.

52.

‘‘අබ්බහී ¶ ¶ [අබ්බුතී (ස්යා.), අබ්බුළ්හං (ක.)] වත මෙ සල්ලං, දුද්දසං හදයස්සිතං [හදයනිස්සිතං (සී. ස්යා.)];

යං මෙ සොකපරෙතාය, ධීතුසොකං බ්යපානුදි.

53.

‘‘සාජ්ජ අබ්බූළ්හසල්ලාහං, නිච්ඡාතා පරිනිබ්බුතා;

බුද්ධං ධම්මඤ්ච සඞ්ඝඤ්ච, උපෙමි සරණං මුනි’’න්ති.

… උබ්බිරී ථෙරී….

6. සුක්කාථෙරීගාථා

54.

‘‘කිංමෙ කතා රාජගහෙ මනුස්සා, මධුං පීතාව [මධුපීතාව (සී.)] අච්ඡරෙ;

යෙ සුක්කං න උපාසන්ති, දෙසෙන්තිං බුද්ධසාසනං.

55.

‘‘තඤ්ච අප්පටිවානීයං, අසෙචනකමොජවං;

පිවන්ති මඤ්ඤෙ සප්පඤ්ඤා, වලාහකමිවද්ධගූ.

56.

‘‘සුක්කා ¶ සුක්කෙහි ධම්මෙහි, වීතරාගා සමාහිතා;

ධාරෙති අන්තිමං දෙහං, ජෙත්වා මාරං සවාහන’’න්ති.

… සුක්කා ථෙරී….

7. සෙලාථෙරීගාථා

57.

‘‘නත්ථි නිස්සරණං ලොකෙ, කිං විවෙකෙන කාහසි;

භුඤ්ජාහි ¶ කාමරතියො, මාහු පච්ඡානුතාපිනී’’.

58.

‘‘සත්තිසූලූපමා කාමා, ඛන්ධාසං අධිකුට්ටනා;

යං ත්වං ‘කාමරතිං’ බ්රූසි, ‘අරතී’ දානි සා මම.

59.

‘‘සබ්බත්ථ විහතා නන්දී [නන්දි (සී. ස්යා.)], තමොඛන්ධො පදාලිතො;

එවං ජානාහි පාපිම, නිහතො ත්වමසි අන්තකා’’ති.

… සෙලා ථෙරී….

8. සොමාථෙරීගාථා

60.

‘‘යං තං ඉසීහි පත්තබ්බං, ඨානං දුරභිසම්භවං;

න තං ද්වඞ්ගුලපඤ්ඤාය, සක්කා පප්පොතුමිත්ථියා’’.

61.

‘‘ඉත්ථිභාවො නො කිං කයිරා, චිත්තම්හි සුසමාහිතෙ;

ඤාණම්හි වත්තමානම්හි, සම්මා ධම්මං විපස්සතො.

62.

‘‘සබ්බත්ථ ¶ ¶ විහතා නන්දී, තමොඛන්ධො පදාලිතො;

එවං ජානාහි පාපිම, නිහතො ත්වමසි අන්තකා’’ති.

… සොමා ථෙරී….

තිකනිපාතො නිට්ඨිතො.