📜
13. සෙරෙය්යවග්ගො
1. සෙරෙය්යකත්ථෙරඅපදානං
‘‘අජ්ඣායකො ¶ ¶ ¶ මන්තධරො, තිණ්ණං වෙදාන පාරගූ;
අබ්භොකාසෙ ඨිතො සන්තො, අද්දසං ලොකනායකං.
‘‘සීහං යථා වනචරං, බ්යග්ඝරාජංව නිත්තසං;
තිධාපභින්නමාතඞ්ගං, කුඤ්ජරංව මහෙසිනං.
‘‘සෙරෙය්යකං ගහෙත්වාන, ආකාසෙ උක්ඛිපිං [නික්ඛිපිං (ක.)] අහං;
බුද්ධස්ස ආනුභාවෙන, පරිවාරෙන්ති සබ්බසො [සබ්බතො (සී.)].
‘‘අධිට්ඨහි මහාවීරො, සබ්බඤ්ඤූ ලොකනායකො;
සමන්තා පුප්ඵච්ඡදනා, ඔකිරිංසු නරාසභං.
‘‘තතො සා පුප්ඵකඤ්චුකා, අන්තොවණ්ටා බහිමුඛා;
සත්තාහං ඡදනං කත්වා, තතො අන්තරධායථ.
‘‘තඤ්ච අච්ඡරියං දිස්වා, අබ්භුතං ලොමහංසනං;
බුද්ධෙ චිත්තං පසාදෙසිං, සුගතෙ ලොකනායකෙ.
‘‘තෙන චිත්තප්පසාදෙන, සුක්කමූලෙන චොදිතො;
කප්පානං සතසහස්සං, දුග්ගතිං නුපපජ්ජහං.
‘‘පන්නරසසහස්සම්හි ¶ , කප්පානං පඤ්චවීසති;
වීතමලා [චිත්තමාලා (සී.), විලාමාලා (ස්යා.)] සමානා ච, චක්කවත්තී මහබ්බලා.
‘‘පටිසම්භිදා චතස්සො, විමොක්ඛාපි ච අට්ඨිමෙ;
ඡළභිඤ්ඤා සච්ඡිකතා, කතං බුද්ධස්ස සාසනං’’.
ඉත්ථං සුදං ආයස්මා සෙරෙය්යකො ථෙරො ඉමා ගාථායො අභාසිත්ථාති.
සෙරෙය්යකත්ථෙරස්සාපදානං පඨමං.
2. පුප්ඵථූපියත්ථෙරඅපදානං
‘‘හිමවන්තස්සාවිදූරෙ ¶ ¶ , කුක්කුරො නාම [කුක්කුටො නාම (සී.)] පබ්බතො;
වෙමජ්ඣෙ තස්ස වසති, බ්රාහ්මණො මන්තපාරගූ.
‘‘පඤ්ච සිස්සසහස්සානි, පරිවාරෙන්ති මං සදා;
පුබ්බුට්ඨායී ච තෙ ආසුං, මන්තෙසු ච විසාරදා.
‘‘බුද්ධො ¶ ලොකෙ සමුප්පන්නො, තං විජානාථ නො භවං;
අසීතිබ්යඤ්ජනානස්ස, බාත්තිංසවරලක්ඛණා.
‘‘බ්යාමප්පභො ජිනවරො, ආදිච්චොව විරොචති;
සිස්සානං වචනං සුත්වා, බ්රාහ්මණො මන්තපාරගූ.
‘‘අස්සමා අභිනික්ඛම්ම, දිසං පුච්ඡති සිස්සකෙ [බ්රාහ්මණො (ස්යා.)];
යම්හි දෙසෙ මහාවීරො, වසති ලොකනායකො.
‘‘තාහං දිසං නමස්සිස්සං, ජිනං අප්පටිපුග්ගලං;
උදග්ගචිත්තො සුමනො, පූජෙසිං තං තථාගතං.
‘‘එථ ¶ සිස්සා ගමිස්සාම, දක්ඛිස්සාම තථාගතං;
වන්දිත්වා සත්ථුනො පාදෙ, සොස්සාම ජිනසාසනං.
‘‘එකාහං අභිනික්ඛම්ම, බ්යාධිං පටිලභිං අහං;
බ්යාධිනා පීළිතො සන්තො, සාලං වාසයිතුං ගමිං.
‘‘සබ්බෙ සිස්සෙ සමානෙත්වා, අපුච්ඡිං තෙ තථාගතං;
කීදිසං ලොකනාථස්ස, ගුණං පරමබුද්ධිනො.
‘‘තෙ මෙ පුට්ඨා වියාකංසු, යථා දස්සාවිනො තථා;
සක්කච්චං බුද්ධසෙට්ඨං තං, දෙසෙසුං [දස්සෙසුං (සී. ස්යා.)] මම සම්මුඛා.
‘‘තෙසාහං වචනං සුත්වා, සකං චිත්තං පසාදයිං;
පුප්ඵෙහි ථූපං කත්වාන, තත්ථ කාලඞ්කතො අහං.
‘‘තෙ මෙ සරීරං ඣාපෙත්වා, අගමුං බුද්ධසන්තිකං;
අඤ්ජලිං පග්ගහෙත්වාන, සත්ථාරමභිවාදයුං.
‘‘පුප්ඵෙහි ථූපං කත්වාන, සුගතස්ස මහෙසිනො;
කප්පානං සතසහස්සං, දුග්ගතිං නුපපජ්ජහං.
‘‘චත්තාලීසසහස්සම්හි ¶ ¶ , කප්පෙ සොළස ඛත්තියා;
නාමෙනග්ගිසමා නාම, චක්කවත්තී මහබ්බලා.
‘‘වීසකප්පසහස්සම්හි, රාජානො චක්කවත්තිනො;
ඝතාසනසනාමාව, අට්ඨත්තිංස මහීපතී.
‘‘පටිසම්භිදා චතස්සො…පෙ… කතං බුද්ධස්ස සාසනං’’.
ඉත්ථං ¶ සුදං ආයස්මා පුප්ඵථූපියො ථෙරො ඉමා ගාථායො අභාසිත්ථාති.
පුප්ඵථූපියත්ථෙරස්සාපදානං දුතියං.
3. පායසදායකත්ථෙරඅපදානං
‘‘සුවණ්ණවණ්ණො ¶ සම්බුද්ධො, බාත්තිංසවරලක්ඛණො;
පවනා [පධානො (ක.)] අභිනික්ඛන්තො, භික්ඛුසඞ්ඝපුරක්ඛතො [සුවණ්ණවණ්ණං …පෙ… පුරක්ඛතං-එවං දුතියන්තවසෙන සී. ස්යා. පොත්ථකෙසු දිස්සති].
‘‘මහච්චා [සහත්ථා (ස්යා. ක.)] කංසපාතියා, වඩ්ඪෙත්වා පායසං [පායාසං (ස්යා. ක.)] අහං;
ආහුතිං යිට්ඨුකාමො සො, උපනෙසිං බලිං අහං.
‘‘භගවා තම්හි සමයෙ, ලොකජෙට්ඨො නරාසභො;
චඞ්කමං සුසමාරූළ්හො, අම්බරෙ අනිලායනෙ.
‘‘තඤ්ච අච්ඡරියං දිස්වා, අබ්භුතං ලොමහංසනං;
ඨපයිත්වා කංසපාතිං, විපස්සිං අභිවාදයිං.
‘‘තුවං දෙවොසි [බුද්ධොසි (ස්යා.)] සබ්බඤ්ඤූ, සදෙවෙ සහමානුසෙ;
අනුකම්පං උපාදාය, පටිගණ්හ මහාමුනි.
‘‘පටිග්ගහෙසි භගවා, සබ්බඤ්ඤූ ලොකනායකො;
මම සඞ්කප්පමඤ්ඤාය, සත්ථා ලොකෙ මහාමුනි [අනුත්තරො (ස්යා.)].
‘‘එකනවුතිතො කප්පෙ, යං දානමදදිං තදා;
දුග්ගතිං නාභිජානාමි, පායසස්ස [පායාසස්ස (ස්යා. ක.)] ඉදං ඵලං.
‘‘එකතාලීසිතො ¶ කප්පෙ, බුද්ධො නාමාසි ඛත්තියො;
සත්තරතනසම්පන්නො, චක්කවත්තී මහබ්බලො.
‘‘පටිසම්භිදා ¶ චතස්සො…පෙ… කතං බුද්ධස්ස සාසනං’’.
ඉත්ථං සුදං ආයස්මා පායසදායකො [පායාසදායකො (ස්යා. ක.)] ථෙරො ඉමා ගාථායො අභාසිත්ථාති.
පායසදායකත්ථෙරස්සාපදානං තතියං.
4. ගන්ධොදකියත්ථෙරඅපදානං
‘‘නිසජ්ජ ¶ පාසාදවරෙ, විපස්සිං අද්දසං ජිනං;
කකුධං විලසන්තංව, සබ්බඤ්ඤුං තමනාසකං [සබ්බඤ්ඤුත්තමනායකං (ස්යා.), සබ්බඤ්ඤුතමනාසවං (ක.)].
‘‘පාසාදස්සාවිදූරෙ ච, ගච්ඡති ලොකනායකො;
පභා නිද්ධාවතෙ තස්ස, යථා ච සතරංසිනො.
‘‘ගන්ධොදකඤ්ච ¶ පග්ගය්හ, බුද්ධසෙට්ඨං සමොකිරිං;
තෙන චිත්තප්පසාදෙන, තත්ථ කාලඞ්කතො අහං.
‘‘එකනවුතිතො කප්පෙ, යං ගන්ධොදකමාකිරිං;
දුග්ගතිං නාභිජානාමි, බුද්ධපූජායිදං ඵලං.
‘‘එකත්තිංසෙ ඉතො කප්පෙ, සුගන්ධො නාම ඛත්තියො;
සත්තරතනසම්පන්නො, චක්කවත්තී මහබ්බලො.
‘‘පටිසම්භිදා චතස්සො…පෙ… කතං බුද්ධස්ස සාසනං’’.
ඉත්ථං ¶ සුදං ආයස්මා ගන්ධොදකියො ථෙරො ඉමා ගාථායො අභාසිත්ථාති.
ගන්ධොදකියත්ථෙරස්සාපදානං චතුත්ථං.
5. සම්මුඛාථවිකත්ථෙරඅපදානං
‘‘ජායමානෙ විපස්සිම්හි, නිමිත්තං බ්යාකරිං අහං;
‘නිබ්බාපයිඤ්ච [නිබ්බාපයං ච (සී. ස්යා.), නිබ්බාපයන්තො (?)] ජනතං, බුද්ධො ලොකෙ භවිස්සති.
‘‘‘යස්මිඤ්ච ¶ ජායමානස්මිං, දසසහස්සි කම්පති;
සො දානි භගවා සත්ථා, ධම්මං දෙසෙති චක්ඛුමා.
‘‘‘යස්මිඤ්ච ජායමානස්මිං, ආලොකො විපුලො අහු;
සො දානි භගවා සත්ථා, ධම්මං දෙසෙති චක්ඛුමා.
‘‘‘යස්මිඤ්ච ජායමානස්මිං, සරිතායො න සන්දයුං [සන්දිසුං (සී. ස්යා.)];
සො දානි භගවා සත්ථා, ධම්මං දෙසෙති චක්ඛුමා.
‘‘‘යස්මිඤ්ච ජායමානස්මිං, අවීචග්ගි න පජ්ජලි;
සො දානි භගවා සත්ථා, ධම්මං දෙසෙති චක්ඛුමා.
‘‘‘යස්මිඤ්ච ¶ ජායමානස්මිං, පක්ඛිසඞ්ඝො න සංචරි;
සො දානි භගවා සත්ථා, ධම්මං දෙසෙති චක්ඛුමා.
‘‘‘යස්මිඤ්ච ජායමානස්මිං, වාතක්ඛන්ධො න වායති;
සො දානි භගවා සත්ථා, ධම්මං දෙසෙති චක්ඛුමා.
‘‘‘යස්මිඤ්ච ¶ ජායමානස්මිං, සබ්බරතනානි ජොතයුං [ජොතිසුං (සී. ස්යා.)];
සො දානි භගවා සත්ථා, ධම්මං දෙසෙති චක්ඛුමා.
‘‘‘යස්මිඤ්ච ජායමානස්මිං, සත්තාසුං පදවික්කමා;
සො දානි භගවා සත්ථා, ධම්මං දෙසෙති චක්ඛුමා.
‘‘‘ජාතමත්තො ¶ ච සම්බුද්ධො, දිසා සබ්බා විලොකයි;
වාචාසභිමුදීරෙසි, එසා බුද්ධාන ධම්මතා’.
‘‘සංවෙජයිත්වා ජනතං, ථවිත්වා ලොකනායකං;
සම්බුද්ධං අභිවාදෙත්වා, පක්කාමිං පාචිනාමුඛො.
‘‘එකනවුතිතො කප්පෙ, යං බුද්ධමභිථොමයිං;
දුග්ගතිං නාභිජානාමි, ථොමනාය ඉදං ඵලං.
‘‘ඉතො නවුතිකප්පම්හි, සම්මුඛාථවිකව්හයො;
සත්තරතනසම්පන්නො, චක්කවත්තී මහබ්බලො.
‘‘පථවීදුන්දුභි නාම [දුද්දසි නාම (ක.)], එකූනනවුතිම්හිතො;
සත්තරතනසම්පන්නො, චක්කවත්තී මහබ්බලො.
‘‘අට්ඨාසීතිම්හිතො ¶ කප්පෙ, ඔභාසො නාම ඛත්තියො;
සත්තරතනසම්පන්නො, චක්කවත්තී මහබ්බලො.
‘‘සත්තාසීතිම්හිතො කප්පෙ, සරිතච්ඡෙදනව්හයො;
සත්තරතනසම්පන්නො, චක්කවත්තී මහබ්බලො.
‘‘අග්ගිනිබ්බාපනො නාම, කප්පානං ඡළසීතියා;
සත්තරතනසම්පන්නො, චක්කවත්තී මහබ්බලො.
‘‘ගතිපච්ඡෙදනො නාම, කප්පානං පඤ්චසීතියා;
සත්තරතනසම්පන්නො, චක්කවත්තී මහබ්බලො.
‘‘රාජා ¶ වාතසමො නාම, කප්පානං චුල්ලසීතියා;
සත්තරතනසම්පන්නො, චක්කවත්තී මහබ්බලො.
‘‘රතනපජ්ජලො ¶ නාම, කප්පානං තෙඅසීතියා;
සත්තරතනසම්පන්නො, චක්කවත්තී මහබ්බලො.
‘‘පදවික්කමනො නාම, කප්පානං ද්වෙඅසීතියා;
සත්තරතනසම්පන්නො, චක්කවත්තී මහබ්බලො.
‘‘රාජා විලොකනො නාම, කප්පානං එකසීතියා;
සත්තරතනසම්පන්නො, චක්කවත්තී මහබ්බලො.
‘‘ගිරසාරොති නාමෙන, කප්පෙසීතිම්හි ඛත්තියො;
සත්තරතනසම්පන්නො, චක්කවත්තී මහබ්බලො.
‘‘පටිසම්භිදා චතස්සො…පෙ… කතං බුද්ධස්ස සාසනං’’.
ඉත්ථං සුදං ආයස්මා සම්මුඛාථවිකො ථෙරො ඉමා ගාථායො අභාසිත්ථාති.
සම්මුඛාථවිකත්ථෙරස්සාපදානං පඤ්චමං.
6. කුසුමාසනියත්ථෙරඅපදානං
‘‘නගරෙ ¶ ¶ ධඤ්ඤවතියා, අහොසිං බ්රාහ්මණො තදා;
ලක්ඛණෙ ඉතිහාසෙ ච, සනිඝණ්ඩුසකෙටුභෙ.
‘‘පදකො ¶ වෙය්යාකරණො, නිමිත්තකොවිදො අහං;
මන්තෙ ච සිස්සෙ වාචෙසිං, තිණ්ණං වෙදාන පාරගූ.
‘‘පඤ්ච උප්පලහත්ථානි, පිට්ඨියං ඨපිතානි මෙ;
ආහුතිං යිට්ඨුකාමොහං, පිතුමාතුසමාගමෙ.
‘‘තදා විපස්සී භගවා, භික්ඛුසඞ්ඝපුරක්ඛතො;
ඔභාසෙන්තො දිසා සබ්බා, ආගච්ඡති නරාසභො.
‘‘ආසනං පඤ්ඤපෙත්වාන, නිමන්තෙත්වා මහාමුනිං;
සන්ථරිත්වාන තං පුප්ඵං, අභිනෙසිං සකං ඝරං.
‘‘යං මෙ අත්ථි සකෙ ගෙහෙ, ආමිසං පච්චුපට්ඨිතං;
තාහං බුද්ධස්ස පාදාසිං, පසන්නො සෙහි පාණිභි.
‘‘භුත්තාවිං කාලමඤ්ඤාය, පුප්ඵහත්ථමදාසහං;
අනුමොදිත්වාන සබ්බඤ්ඤූ, පක්කාමි උත්තරාමුඛො.
‘‘එකනවුතිතො ¶ කප්පෙ, යං පුප්ඵමදදිං තදා;
දුග්ගතිං නාභිජානාමි, පුප්ඵදානස්සිදං ඵලං.
‘‘අනන්තරං ඉතො කප්පෙ, රාජාහුං වරදස්සනො;
සත්තරතනසම්පන්නො, චක්කවත්තී මහබ්බලො.
‘‘පටිසම්භිදා ¶ චතස්සො…පෙ… කතං බුද්ධස්ස සාසනං’’.
ඉත්ථං සුදං ආයස්මා කුසුමාසනියො ථෙරො ඉමා ගාථායො අභාසිත්ථාති.
කුසුමාසනියත්ථෙරස්සාපදානං ඡට්ඨං.
7. ඵලදායකත්ථෙරඅපදානං
‘‘අජ්ඣායකො මන්තධරො, තිණ්ණං වෙදාන පාරගූ;
හිමවන්තස්සාවිදූරෙ, වසාමි අස්සමෙ අහං.
‘‘අග්ගිහුත්තඤ්ච මෙ අත්ථි, පුණ්ඩරීකඵලානි ච;
පුටකෙ නික්ඛිපිත්වාන, දුමග්ගෙ ලග්ගිතං මයා.
‘‘පදුමුත්තරො ¶ ¶ ලොකවිදූ, ආහුතීනං පටිග්ගහො;
මමුද්ධරිතුකාමො සො, භික්ඛන්තො මමුපාගමි.
‘‘පසන්නචිත්තො සුමනො, ඵලං බුද්ධස්සදාසහං;
විත්තිසඤ්ජනනො මය්හං, දිට්ඨධම්මසුඛාවහො.
‘‘සුවණ්ණවණ්ණො සම්බුද්ධො, ආහුතීනං පටිග්ගහො;
අන්තලික්ඛෙ ඨිතො සත්ථා, ඉමං ගාථං අභාසථ.
‘‘‘ඉමිනා ඵලදානෙන, චෙතනාපණිධීහි ච;
කප්පානං සතසහස්සං, දුග්ගතිං නුපපජ්ජසි’.
‘‘තෙනෙව ¶ සුක්කමූලෙන, අනුභොත්වාන සම්පදා;
පත්තොම්හි අචලං ඨානං, හිත්වා ජයපරාජයං.
‘‘ඉතො සත්තසතෙ කප්පෙ, රාජා ආසිං සුමඞ්ගලො;
සත්තරතනසම්පන්නො චක්කවත්තී මහබ්බලො.
‘‘පටිසම්භිදා ¶ ¶ චතස්සො…පෙ… කතං බුද්ධස්ස සාසනං’’.
ඉත්ථං සුදං ආයස්මා ඵලදායකො ථෙරො ඉමා ගාථායො අභාසිත්ථාති.
ඵලදායකත්ථෙරස්සාපදානං සත්තමං.
8. ඤාණසඤ්ඤිකත්ථෙරඅපදානං
‘‘පබ්බතෙ හිමවන්තම්හි, වසාමි පබ්බතන්තරෙ;
පුලිනං සොභනං දිස්වා, බුද්ධසෙට්ඨං අනුස්සරිං.
‘‘ඤාණෙ උපනිධා නත්ථි, සඞ්ඛාරං [සඞ්ගාමං (සී. ස්යා.), සඞ්ඛාතං (ථෙරගාථා අට්ඨ.)] නත්ථි සත්ථුනො;
සබ්බධම්මං අභිඤ්ඤාය, ඤාණෙන අධිමුච්චති.
‘‘නමො තෙ පුරිසාජඤ්ඤ, නමො තෙ පුරිසුත්තම;
ඤාණෙන තෙ සමො නත්ථි, යාවතා ඤාණමුත්තමං.
‘‘ඤාණෙ චිත්තං පසාදෙත්වා, කප්පං සග්ගම්හි මොදහං;
අවසෙසෙසු කප්පෙසු, කුසලං චරිතං [කරිතං (සී. ස්යා.), කිරියං (ක.)] මයා.
‘‘එකනවුතිතො ¶ ¶ කප්පෙ, යං සඤ්ඤමලභිං තදා;
දුග්ගතිං නාභිජානාමි, ඤාණසඤ්ඤායිදං ඵලං.
‘‘ඉතො සත්තතිකප්පම්හි [තෙසත්තතිකප්පෙ (සී. ස්යා.)], එකො පුලිනපුප්ඵියො;
සත්තරතනසම්පන්නො, චක්කවත්තී මහබ්බලො.
‘‘පටිසම්භිදා චතස්සො…පෙ… කතං බුද්ධස්ස සාසනං’’.
ඉත්ථං සුදං ආයස්මා ඤාණසඤ්ඤිකො ථෙරො ඉමා ගාථායො අභාසිත්ථාති.
ඤාණසඤ්ඤිකත්ථෙරස්සාපදානං අට්ඨමං.
9. ගණ්ඨිපුප්ඵියත්ථෙරඅපදානං
‘‘සුවණ්ණවණ්ණො සම්බුද්ධො, විපස්සී දක්ඛිණාරහො;
පුරක්ඛතො සාවකෙහි, ආරාමා අභිනික්ඛමි.
‘‘දිස්වානහං බුද්ධසෙට්ඨං, සබ්බඤ්ඤුං තමනාසකං;
පසන්නචිත්තො සුමනො, ගණ්ඨිපුප්ඵං [ගතමග්ගං (ස්යා. ක.)] අපූජයිං.
‘‘තෙන ¶ චිත්තප්පසාදෙන, ද්විපදින්දස්ස තාදිනො;
හට්ඨො හට්ඨෙන චිත්තෙන, පුන වන්දිං තථාගතං.
‘‘එකනවුතිතො කප්පෙ, යං පුප්ඵමභිරොපයිං;
දුග්ගතිං නාභිජානාමි, බුද්ධපූජායිදං ඵලං.
‘‘එකතාලීසිතො ¶ කප්පෙ, චරණො නාම ඛත්තියො;
සත්තරතනසම්පන්නො, චක්කවත්තී මහබ්බලො.
‘‘පටිසම්භිදා චතස්සො…පෙ… කතං බුද්ධස්ස සාසනං’’.
ඉත්ථං සුදං ආයස්මා ගණ්ඨිපුප්ඵියො [ගන්ධපුප්ඵියො (ස්යා. ක.)] ථෙරො ඉමා ගාථායො අභාසිත්ථාති.
ගණ්ඨිපුප්ඵියත්ථෙරස්සාපදානං නවමං.
10. පදුමපූජකත්ථෙරඅපදානං
‘‘හිමවන්තස්සාවිදූරෙ ¶ , ගොතමො නාම පබ්බතො;
නානාරුක්ඛෙහි සඤ්ඡන්නො, මහාභූතගණාලයො.
‘‘වෙමජ්ඣම්හි ච තස්සාසි, අස්සමො අභිනිම්මිතො;
පුරක්ඛතො සසිස්සෙහි, වසාමි අස්සමෙ අහං.
‘‘ආයන්තු ¶ මෙ සිස්සගණා, පදුමං ආහරන්තු මෙ;
බුද්ධපූජං කරිස්සාමි, ද්විපදින්දස්ස තාදිනො.
‘‘එවන්ති තෙ පටිස්සුත්වා, පදුමං ආහරිංසු මෙ;
තථා නිමිත්තං කත්වාහං, බුද්ධස්ස අභිරොපයිං.
‘‘සිස්සෙ තදා සමානෙත්වා, සාධුකං අනුසාසහං;
මා ඛො තුම්හෙ පමජ්ජිත්ථ, අප්පමාදො සුඛාවහො.
‘‘එවං ¶ සමනුසාසිත්වා, තෙ සිස්සෙ වචනක්ඛමෙ;
අප්පමාදගුණෙ යුත්තො, තදා කාලඞ්කතො අහං.
‘‘එකනවුතිතො කප්පෙ, යං පුප්ඵමභිරොපයිං;
දුග්ගතිං නාභිජානාමි, බුද්ධපූජායිදං ඵලං.
‘‘එකපඤ්ඤාසකප්පම්හි, රාජා ආසිං ජලුත්තමො;
සත්තරතනසම්පන්නො, චක්කවත්තී මහබ්බලො.
‘‘පටිසම්භිදා ¶ චතස්සො…පෙ… කතං බුද්ධස්ස සාසනං’’.
ඉත්ථං සුදං ආයස්මා පදුමපූජකො ථෙරො ඉමා ගාථායො අභාසිත්ථාති;
පදුමපූජකත්ථෙරස්සාපදානං දසමං.
සෙරෙය්යවග්ගො තෙරසමො.
තස්සුද්දානං –
සෙරෙය්යකො පුප්ඵථූපි, පායසො ගන්ධථොමකො;
ආසනි ඵලසඤ්ඤී ච, ගණ්ඨිපදුමපුප්ඵියො;
පඤ්චුත්තරසතා ගාථා, ගණිතා අත්ථදස්සිභි.