📜
17. සුපාරිචරියවග්ගො
1. සුපාරිචරියත්ථෙරඅපදානං
‘‘පදුමො ¶ ¶ ¶ නාම නාමෙන, ද්විපදින්දො නරාසභො;
පවනා අභිනික්ඛම්ම, ධම්මං දෙසෙති චක්ඛුමා.
‘‘යක්ඛානං සමයො ආසි, අවිදූරෙ මහෙසිනො;
යෙන කිච්චෙන සම්පත්තා, අජ්ඣාපෙක්ඛිංසු තාවදෙ.
‘‘බුද්ධස්ස ගිරමඤ්ඤාය, අමතස්ස ච දෙසනං;
පසන්නචිත්තො සුමනො, අප්ඵොටෙත්වා උපට්ඨහිං.
‘‘සුචිණ්ණස්ස ඵලං පස්ස, උපට්ඨානස්ස සත්ථුනො;
තිංසකප්පසහස්සෙසු, දුග්ගතිං නුපපජ්ජහං.
‘‘ඌනතිංසෙ කප්පසතෙ, සමලඞ්කතනාමකො;
සත්තරතනසම්පන්නො, චක්කවත්තී මහබ්බලො.
‘‘පටිසම්භිදා චතස්සො, විමොක්ඛාපි ච අට්ඨිමෙ;
ඡළභිඤ්ඤා සච්ඡිකතා, කතං බුද්ධස්ස සාසනං’’.
ඉත්ථං සුදං ආයස්මා සුපාරිචරියො ථෙරො ඉමා ගාථායො අභාසිත්ථාති.
සුපාරිචරියත්ථෙරස්සාපදානං පඨමං.
2. කණවෙරපුප්ඵියත්ථෙරඅපදානං
‘‘සිද්ධත්ථො ¶ ¶ නාම භගවා, ලොකජෙට්ඨො නරාසභො;
පුරක්ඛතො සාවකෙහි, නගරං පටිපජ්ජථ.
‘‘රඤ්ඤො අන්තෙපුරෙ ආසිං, ගොපකො අභිසම්මතො;
පාසාදෙ උපවිට්ඨොහං, අද්දසං ලොකනායකං.
‘‘කණවෙරං ¶ [කරවීරං (සක්කතානුලොමං), කණවීරං (පාකත)] ගහෙත්වාන, භික්ඛුසඞ්ඝෙ සමොකිරිං;
බුද්ධස්ස විසුං කත්වාන, තතො භිය්යො සමොකිරිං.
‘‘චතුන්නවුතිතො ¶ කප්පෙ, යං පුප්ඵමභිපූජයිං [රොපයිං (ස්යා.)];
දුග්ගතිං නාභිජානාමි, බුද්ධපූජායිදං ඵලං.
‘‘සත්තාසීතිම්හිතො කප්පෙ, චතුරාසුං මහිද්ධිකා;
සත්තරතනසම්පන්නා, චක්කවත්තී මහබ්බලා.
‘‘පටිසම්භිදා චතස්සො…පෙ… කතං බුද්ධස්ස සාසනං’’.
ඉත්ථං සුදං ආයස්මා කණවෙරපුප්ඵියො ථෙරො ඉමා ගාථායො අභාසිත්ථාති.
කණවෙරපුප්ඵියත්ථෙරස්සාපදානං දුතියං.
3. ඛජ්ජකදායකත්ථෙරඅපදානං
‘‘තිස්සස්ස ඛො භගවතො, පුබ්බෙ ඵලමදාසහං;
නාළිකෙරඤ්ච පාදාසිං, ඛජ්ජකං අභිසම්මතං.
‘‘බුද්ධස්ස ¶ තමහං දත්වා, තිස්සස්ස තු මහෙසිනො;
මොදාමහං කාමකාමී, උපපජ්ජිං [කාමකාරී, උපපජ්ජං (සී.)] යමිච්ඡකං [සබ්බත්ථපි එවමෙව දිස්සති].
‘‘ද්වෙනවුතෙ ඉතො කප්පෙ, යං දානමදදිං තදා;
දුග්ගතිං නාභිජානාමි, ඵලදානස්සිදං ඵලං.
‘‘ඉතො තෙරසකප්පම්හි, රාජා ඉන්දසමො අහු;
සත්තරතනසම්පන්නො, චක්කවත්තී මහබ්බලො.
‘‘පටිසම්භිදා චතස්සො…පෙ… කතං බුද්ධස්ස සාසනං’’.
ඉත්ථං සුදං ආයස්මා ඛජ්ජකදායකො ථෙරො ඉමා ගාථායො අභාසිත්ථාති.
ඛජ්ජකදායකත්ථෙරස්සාපදානං තතියං.
4. දෙසපූජකත්ථෙරඅපදානං
‘‘අත්ථදස්සී ¶ තු භගවා, ලොකජෙට්ඨො නරාසභො;
අබ්භුග්ගන්ත්වාන වෙහාසං, ගච්ඡතෙ අනිලඤ්ජසෙ.
‘‘යම්හි ¶ ¶ දෙසෙ ඨිතො සත්ථා, අබ්භුග්ගච්ඡි මහාමුනි;
තාහං දෙසං අපූජෙසිං, පසන්නො සෙහි පාණිභි.
‘‘අට්ඨාරසෙ කප්පසතෙ, අද්දසං යං මහාමුනිං;
දුග්ගතිං නාභිජානාමි, දෙසපූජායිදං ඵලං.
‘‘එකාදසෙ ¶ කප්පසතෙ, ගොසුජාතසනාමකො;
සත්තරතනසම්පන්නො, චක්කවත්තී මහබ්බලො.
‘‘පටිසම්භිදා චතස්සො…පෙ… කතං බුද්ධස්ස සාසනං’’.
ඉත්ථං සුදං ආයස්මා දෙසපූජකො ථෙරො ඉමා ගාථායො අභාසිත්ථාති.
දෙසපූජකත්ථෙරස්සාපදානං චතුත්ථං.
5. කණිකාරඡත්තියත්ථෙරඅපදානං
‘‘වෙස්සභූ නාම සම්බුද්ධො, ලොකජෙට්ඨො නරාසභො;
දිවාවිහාරාය මුනි, ඔගාහයි මහාවනං.
‘‘කණිකාරං ඔචිනිත්වා, ඡත්තං කත්වානහං තදා;
පුප්ඵච්ඡදනං කත්වාන, බුද්ධස්ස අභිරොපයිං.
‘‘එකත්තිංසෙ ඉතො කප්පෙ, යං පුප්ඵමභිරොපයිං;
දුග්ගතිං නාභිජානාමි, බුද්ධපූජායිදං ඵලං.
‘‘ඉතො වීසතිකප්පම්හි, සොණ්ණාභා අට්ඨ ඛත්තියා;
සත්තරතනසම්පන්නා, චක්කවත්තී මහබ්බලා.
‘‘පටිසම්භිදා චතස්සො…පෙ… කතං බුද්ධස්ස සාසනං’’.
ඉත්ථං ¶ සුදං ආයස්මා කණිකාරඡත්තියො ථෙරො ඉමා ගාථායො අභාසිත්ථාති.
කණිකාරඡත්තියත්ථෙරස්සාපදානං පඤ්චමං.
6. සප්පිදායකත්ථෙරඅපදානං
‘‘ඵුස්සො ¶ ¶ නාමාසි [නාමාථ (සී.)] භගවා, ආහුතීනං පටිග්ගහො;
ගච්ඡතෙ වීථියං වීරො, නිබ්බාපෙන්තො මහාජනං.
‘‘අනුපුබ්බෙන ¶ භගවා, ආගච්ඡි මම සන්තිකං;
තතො තං [තතොහං (සී. ස්යා.)] පත්තං පග්ගය්හ, සප්පිතෙලමදාසහං.
‘‘ද්වෙනවුතෙ ඉතො කප්පෙ, යං සප්පිමදදිං තදා;
දුග්ගතිං නාභිජානාමි, සප්පිදානස්සිදං ඵලං.
‘‘ඡප්පඤ්ඤාසෙ ඉතො කප්පෙ, එකො ආසි සමොදකො;
සත්තරතනසම්පන්නො, චක්කවත්තී මහබ්බලො.
‘‘පටිසම්භිදා චතස්සො…පෙ… කතං බුද්ධස්ස සාසනං’’.
ඉත්ථං සුදං ආයස්මා සප්පිදායකො ථෙරො ඉමා ගාථායො අභාසිත්ථාති.
සප්පිදායකත්ථෙරස්සාපදානං ඡට්ඨං.
7. යූථිකපුප්ඵියත්ථෙරඅපදානං
‘‘චන්දභාගානදීතීරෙ ¶ , අනුසොතං වජාමහං;
සයම්භුං අද්දසං තත්ථ, සාලරාජංව ඵුල්ලිතං.
‘‘පුප්ඵං යූථිකමාදාය, උපගච්ඡිං මහාමුනිං;
පසන්නචිත්තො සුමනො, බුද්ධස්ස අභිරොපයිං.
‘‘චතුන්නවුතිතො කප්පෙ, යං පුප්ඵමභිරොපයිං;
දුග්ගතිං නාභිජානාමි, බුද්ධපූජායිදං ඵලං.
‘‘සත්තසට්ඨිම්හිතො කප්පෙ, එකො සාමුද්ධරො අහු;
සත්තරතනසම්පන්නො, චක්කවත්තී මහබ්බලො.
‘‘පටිසම්භිදා චතස්සො…පෙ… කතං බුද්ධස්ස සාසනං’’.
ඉත්ථං සුදං ආයස්මා යූථිකපුප්ඵියො ථෙරො ඉමා ගාථායො අභාසිත්ථාති.
යූථිකපුප්ඵියත්ථෙරස්සාපදානං සත්තමං.
8. දුස්සදායකත්ථෙරඅපදානං
‘‘තිවරායං ¶ ¶ පුරෙ රම්මෙ, රාජපුත්තොසහං [රාජපුත්තො අහං (සී. ස්යා.)] තදා;
පණ්ණාකාරං ලභිත්වාන, උපසන්තස්සදාසහං.
‘‘අධිවාසෙසි ¶ ¶ භගවා, වත්ථං [නවං (ක.)] හත්ථෙන ආමසි;
සිද්ධත්ථො අධිවාසෙත්වා, වෙහාසං නභමුග්ගමි.
‘‘බුද්ධස්ස ගච්ඡමානස්ස, දුස්සා ධාවන්ති පච්ඡතො;
තත්ථ චිත්තං පසාදෙසිං, බුද්ධො නො අග්ගපුග්ගලො.
‘‘චතුන්නවුතිතො කප්පෙ, යං දුස්සමදදිං තදා;
දුග්ගතිං නාභිජානාමි, දුස්සදානස්සිදං ඵලං.
‘‘සත්තසට්ඨිම්හිතො කප්පෙ, චක්කවත්තී තදා අහු;
පරිසුද්ධොති නාමෙන, මනුජින්දො මහබ්බලො.
‘‘පටිසම්භිදා චතස්සො…පෙ… කතං බුද්ධස්ස සාසනං’’.
ඉත්ථං සුදං ආයස්මා දුස්සදායකො ථෙරො ඉමා ගාථායො අභාසිත්ථාති.
දුස්සදායකත්ථෙරස්සාපදානං අට්ඨමං.
9. සමාදපකත්ථෙරඅපදානං
‘‘නගරෙ බන්ධුමතියා, මහාපූගගණො අහු;
තෙසාහං පවරො ආසිං, මම බද්ධචරා [පට්ඨචරා (ස්යා.)] ච තෙ.
‘‘සබ්බෙ තෙ සන්නිපාතෙත්වා, පුඤ්ඤකම්මෙ සමාදයිං;
මාළං කස්සාම සඞ්ඝස්ස, පුඤ්ඤක්ඛෙත්තං අනුත්තරං.
‘‘සාධූති ¶ තෙ පටිස්සුත්වා, මම ඡන්දවසානුගා;
නිට්ඨාපෙත්වා ච තං මාළං, විපස්සිස්ස අදම්හසෙ.
‘‘එකනවුතිතො කප්පෙ, යං මාළමදදිං තදා;
දුග්ගතිං නාභිජානාමි, මාළදානස්සිදං ඵලං.
‘‘එකූනසත්තතිකප්පෙ ¶ [එකූනසට්ඨිකප්පම්හි (සී. ස්යා.)],
එකො ආසි ජනාධිපො.
ආදෙය්යො නාම නාමෙන, චක්කවත්තී මහබ්බලො.
‘‘පටිසම්භිදා චතස්සො…පෙ… කතං බුද්ධස්ස සාසනං’’.
ඉත්ථං සුදං ආයස්මා සමාදපකො ථෙරො ඉමා ගාථායො අභාසිත්ථාති.
සමාදපකත්ථෙරස්සාපදානං නවමං.
10. පඤ්චඞ්ගුලියත්ථෙරඅපදානං
‘‘තිස්සො ¶ ¶ නාමාසි භගවා, ලොකජෙට්ඨො නරාසභො;
පවිසති ගන්ධකුටිං, විහාරකුසලො මුනි.
‘‘සුගන්ධමාලමාදාය, අගමාසිං ජිනන්තිකං;
අපසද්දො ච සම්බුද්ධෙ, පඤ්චඞ්ගුලිමදාසහං.
‘‘ද්වෙනවුතෙ ඉතො කප්පෙ, යං ගන්ධමභිරොපයිං;
දුග්ගතිං නාභිජානාමි, පඤ්චඞ්ගුලිස්සිදං [පඤ්චඞ්ගුලියිදං (සී.)] ඵලං.
‘‘ද්වෙසත්තතිම්හිතො ¶ කප්පෙ, රාජා ආසිං සයම්පභො;
සත්තරතනසම්පන්නො, චක්කවත්තී මහබ්බලො.
‘‘පටිසම්භිදා චතස්සො…පෙ… කතං බුද්ධස්ස සාසනං’’.
ඉත්ථං සුදං ආයස්මා පඤ්චඞ්ගුලියො ථෙරො ඉමා ගාථායො අභාසිත්ථාති;
පඤ්චඞ්ගුලියත්ථෙරස්සාපදානං දසමං.
සුපාරිචරියවග්ගො සත්තරසමො.
තස්සුද්දානං –
සුපාරිචරි කණවෙරී, ඛජ්ජකො දෙසපූජකො;
කණිකාරො සප්පිදදො, යූථිකො දුස්සදායකො;
මාළො ච පඤ්චඞ්ගුලිකො, චතුපඤ්ඤාස ගාථකාති.