📜
33. උමාපුප්ඵියවග්ගො
1. උමාපුප්ඵියත්ථෙරඅපදානං
‘‘සමාහිතං ¶ ¶ ¶ සමාපන්නං, සිද්ධත්ථමපරාජිතං;
සමාධිනා උපවිට්ඨං, අද්දසාහං නරුත්තමං.
‘‘උමාපුප්ඵං ගහෙත්වාන, බුද්ධස්ස අභිරොපයිං;
සබ්බපුප්ඵා එකසීසා, උද්ධංවණ්ටා අධොමුඛා.
‘‘සුචිත්තා විය තිට්ඨන්තෙ, ආකාසෙ පුප්ඵසන්ථරා;
තෙන චිත්තප්පසාදෙන, තුසිතං උපපජ්ජහං.
‘‘චතුන්නවුතිතො කප්පෙ, යං පුප්ඵමභිපූජයිං;
දුග්ගතිං නාභිජානාමි, බුද්ධපූජායිදං ඵලං.
‘‘පඤ්චපඤ්ඤාසිතො කප්පෙ, එකො ආසිං මහීපති;
සමන්තඡදනො නාම, චක්කවත්තී මහබ්බලො.
‘‘පටිසම්භිදා චතස්සො, විමොක්ඛාපි ච අට්ඨිමෙ;
ඡළභිඤ්ඤා සච්ඡිකතා, කතං බුද්ධස්ස සාසනං.
ඉත්ථං සුදං ආයස්මා උමාපුප්ඵියො ථෙරො ඉමා ගාථායො අභාසිත්ථාති.
උමාපුප්ඵියත්ථෙරස්සාපදානං පඨමං.
2. පුලිනපූජකත්ථෙරඅපදානං
‘‘කකුධං ¶ ¶ විලසන්තංව, නිසභාජානියං යථා;
ඔසධිංව විරොචන්තං, ඔභාසන්තං නරාසභං.
‘‘අඤ්ජලිං පග්ගහෙත්වාන, අවන්දිං සත්ථුනො අහං;
සත්ථාරං පරිවණ්ණෙසිං, සකකම්මෙන තොසයිං [තොසිතො (සී.)].
‘‘සුසුද්ධං ¶ පුලිනං ගය්හ, ගතමග්ගෙ සමොකිරිං;
උච්ඡඞ්ගෙන ගහෙත්වාන, විපස්සිස්ස මහෙසිනො.
‘‘තතො ¶ උපඩ්ඪපුලිනං, විප්පසන්නෙන චෙතසා;
දිවාවිහාරෙ ඔසිඤ්චිං, ද්විපදින්දස්ස තාදිනො.
‘‘එකනවුතිතො කප්පෙ, පුලිනං යමසිඤ්චහං;
දුග්ගතිං නාභිජානාමි, පුලිනස්ස ඉදං ඵලං.
‘‘පටිසම්භිදා චතස්සො…පෙ… කතං බුද්ධස්ස සාසනං’’.
ඉත්ථං සුදං ආයස්මා පුලිනපූජකො ථෙරො ඉමා ගාථායො අභාසිත්ථාති.
පුලිනපූජකත්ථෙරස්සාපදානං දුතියං.
3. හාසජනකත්ථෙරඅපදානං
‘‘දුමග්ගෙ පංසුකූලකං [පංසුකූලිකං (ස්යා. ක.)], ලග්ගං දිස්වාන සත්ථුනො;
අඤ්ජලිං පග්ගහෙත්වාන, භිය්යො උච්චාරිතං මයා.
‘‘දූරතො ¶ පන දිස්වාන [පතිදිස්වාන (සී. ස්යා.)], හාසො මෙ උදපජ්ජථ;
අඤ්ජලිං පග්ගහෙත්වාන, භිය්යො චිත්තං පසාදයිං.
‘‘එකනවුතිතො කප්පෙ, යං සඤ්ඤමලභිං තදා;
දුග්ගතිං නාභිජානාමි, බුද්ධසඤ්ඤායිදං ඵලං.
‘‘පටිසම්භිදා චතස්සො…පෙ… කතං බුද්ධස්ස සාසනං’’.
ඉත්ථං සුදං ආයස්මා හාසජනකො ථෙරො ඉමා ගාථායො අභාසිත්ථාති.
හාසජනකත්ථෙරස්සාපදානං තතියං.
4. යඤ්ඤසාමිකත්ථෙරඅපදානං
‘‘ජාතියා ¶ සත්තවස්සොහං, අහොසිං මන්තපාරගූ;
කුලවත්තං [කුලවංසං (සී. ස්යා.)] අධාරෙසිං, යඤ්ඤො උස්සාහිතො මයා.
‘‘චුල්ලාසීතිසහස්සානි ¶ , පසූ හඤ්ඤන්ති මෙ තදා;
සාරථම්භුපනීතානි [තාරස්මීහි උපනීතානි (ක.), සාරස්මිංහි උපනීතානි (ස්යා.)], යඤ්ඤත්ථාය උපට්ඨිතා.
‘‘උක්කාමුඛපහට්ඨොව ¶ , ඛදිරඞ්ගාරසන්නිභො;
උදයන්තොව සූරියො, පුණ්ණමායෙව [පුණ්ණමාසෙව (සී.)] චන්දිමා.
‘‘සිද්ධත්ථො සබ්බසිද්ධත්ථො, තිලොකමහිතො හිතො;
උපගන්ත්වාන සම්බුද්ධො, ඉදං වචනමබ්රවි.
‘‘‘අහිංසා ¶ සබ්බපාණීනං, කුමාර මම රුච්චති;
ථෙය්යා ච අතිචාරා ච, මජ්ජපානා ච ආරති.
‘‘‘රති ච සමචරියාය, බාහුසච්චං කතඤ්ඤුතා;
දිට්ඨෙ ධම්මෙ පරත්ථ ච, ධම්මා එතෙ පසංසියා.
‘‘‘එතෙ ධම්මෙ භාවයිත්වා, සබ්බසත්තහිතෙ රතො [හිතෙසිතො (ක.)];
බුද්ධෙ චිත්තං පසාදෙත්වා, භාවෙහි මග්ගමුත්තමං’.
‘‘ඉදං වත්වාන සබ්බඤ්ඤූ, ලොකජෙට්ඨො නරාසභො;
මමෙවං අනුසාසිත්වා, වෙහාසං උග්ගතො ගතො.
‘‘පුබ්බෙ චිත්තං විසොධෙත්වා, පච්ඡා චිත්තං පසාදයිං;
තෙන චිත්තප්පසාදෙන, තුසිතං උපපජ්ජහං.
‘‘චතුන්නවුතිතො කප්පෙ, යදා චිත්තං පසාදයිං;
දුග්ගතිං නාභිජානාමි, බුද්ධසඤ්ඤායිදං ඵලං.
‘‘පටිසම්භිදා චතස්සො…පෙ… කතං බුද්ධස්ස සාසනං’’.
ඉත්ථං සුදං ආයස්මා යඤ්ඤසාමිකො ථෙරො ඉමා ගාථායො අභාසිත්ථාති.
යඤ්ඤසාමිකත්ථෙරස්සාපදානං චතුත්ථං.
5. නිමිත්තසඤ්ඤකත්ථෙරඅපදානං
‘‘චන්දභාගානදීතීරෙ ¶ , වසාමි අස්සමෙ අහං;
සුවණ්ණමිගමද්දක්ඛිං, චරන්තං විපිනෙ අහං.
‘‘මිගෙ ¶ ¶ චිත්තං පසාදෙත්වා, ලොකජෙට්ඨං අනුස්සරිං;
තෙන චිත්තප්පසාදෙන, අඤ්ඤෙ බුද්ධෙ අනුස්සරිං.
‘‘අබ්භතීතා ච යෙ බුද්ධා, වත්තමානා අනාගතා;
එවමෙවං විරොචන්ති, මිගරාජාව තෙ තයො.
‘‘චතුන්නවුතිතො ¶ කප්පෙ, යං සඤ්ඤමලභිං තදා;
දුග්ගතිං නාභිජානාමි, බුද්ධසඤ්ඤායිදං ඵලං.
‘‘සත්තවීසෙ ඉතො කප්පෙ, එකො ආසිං මහීපති;
අරඤ්ඤසත්ථො නාමෙන, චක්කවත්තී මහබ්බලො.
‘‘පටිසම්භිදා චතස්සො…පෙ… කතං බුද්ධස්ස සාසනං’’.
ඉත්ථං සුදං ආයස්මා නිමිත්තසඤ්ඤකො ථෙරො ඉමා ගාථායො අභාසිත්ථාති.
නිමිත්තසඤ්ඤකත්ථෙරස්සාපදානං පඤ්චමං.
6. අන්නසංසාවකත්ථෙරඅපදානං
‘‘සුවණ්ණවණ්ණං සම්බුද්ධං, ගච්ඡන්තං අන්තරාපණෙ;
කඤ්චනග්ඝියසඞ්කාසං, බාත්තිංසවරලක්ඛණං.
‘‘සිද්ධත්ථං සබ්බසිද්ධත්ථං, අනෙජං අපරාජිතං;
සම්බුද්ධං අතිනාමෙත්වා, භොජයිං තං මහාමුනිං.
‘‘මුනි ¶ කාරුණිකො ලොකෙ, ඔභාසයි මමං තදා;
බුද්ධෙ චිත්තං පසාදෙත්වා, කප්පං සග්ගම්හි මොදහං.
‘‘චතුන්නවුතිතො කප්පෙ, යං දානමදදිං තදා;
දුග්ගතිං නාභිජානාමි, භික්ඛාදානස්සිදං ඵලං.
‘‘පටිසම්භිදා චතස්සො…පෙ… කතං බුද්ධස්ස සාසනං’’.
ඉත්ථං සුදං ආයස්මා අන්නසංසාවකො ථෙරො ඉමා ගාථායො අභාසිත්ථාති;
අන්නසංසාවකත්ථෙරස්සාපදානං ඡට්ඨං.
7. නිග්ගුණ්ඩිපුප්ඵියත්ථෙරඅපදානං
‘‘යදා ¶ ¶ දෙවො දෙවකායා, චවතෙ ආයුසඞ්ඛයා;
තයො සද්දා නිච්ඡරන්ති, දෙවානං අනුමොදතං.
‘‘‘ඉතො භො සුගතිං ගච්ඡ, මනුස්සානං සහබ්යතං;
මනුස්සභූතො සද්ධම්මෙ, ලභ සද්ධං අනුත්තරං.
‘‘‘සා ¶ තෙ සද්ධා නිවිට්ඨාස්ස, මූලජාතා පතිට්ඨිතා;
යාවජීවං අසංහීරා, සද්ධම්මෙ සුප්පවෙදිතෙ.
‘‘‘කායෙන කුසලං කත්වා, වාචාය කුසලං බහුං;
මනසා කුසලං කත්වා, අබ්යාපජ්ජං නිරූපධිං.
‘‘‘තතො ¶ ඔපධිකං පුඤ්ඤං, කත්වා දානෙන තං බහුං;
අඤ්ඤෙපි මච්චෙ සද්ධම්මෙ, බ්රහ්මචරියෙ නිවෙසය’.
‘‘ඉමාය අනුකම්පාය, දෙවාදෙවං යදා විදූ;
චවන්තං අනුමොදන්ති, එහි දෙව පුනප්පුනං [දෙවපුරං පුන (සී.)].
‘‘සංවෙගො මෙ [සංවිග්ගොහං (ස්යා.)] තදා ආසි, දෙවසඞ්ඝෙ සමාගතෙ;
කංසු නාම අහං යොනිං, ගමිස්සාමි ඉතො චුතො.
‘‘මම සංවෙගමඤ්ඤාය, සමණො භාවිතින්ද්රියො;
මමුද්ධරිතුකාමො සො, ආගච්ඡි මම සන්තිකං.
‘‘සුමනො නාම නාමෙන, පදුමුත්තරසාවකො;
අත්ථධම්මානුසාසිත්වා, සංවෙජෙසි මමං තදා.
ද්වාදසමං භාණවාරං.
‘‘තස්සාහං වචනං සුත්වා, බුද්ධෙ චිත්තං පසාදයිං;
තං ධීරං අභිවාදෙත්වා, තත්ථ කාලංකතො අහං.
‘‘උපපජ්ජිං ස [උපපජ්ජිස්සං (සී.)] තත්ථෙව, සුක්කමූලෙන චොදිතො;
වසන්තො මාතුකුච්ඡිම්හි, පුන ධාරෙති මාතුයා.
‘‘තම්හා කායා චවිත්වාන, තිදසෙ උපපජ්ජහං;
එත්ථන්තරෙ න පස්සාමි, දොමනස්සමහං තදා.
‘‘තාවතිංසා ¶ ¶ චවිත්වාන, මාතුකුච්ඡිං සමොක්කමිං;
නික්ඛමිත්වාන කුච්ඡිම්හා, කණ්හසුක්කං අජානහං.
‘‘ජාතියා ¶ සත්තවස්සොව [ජාතියා සත්තවස්සෙන (ස්යා.)], ආරාමං පාවිසිං අහං;
ගොතමස්ස භගවතො, සක්යපුත්තස්ස තාදිනො.
‘‘විත්ථාරිකෙ [විත්ථාරිතෙ (සී. ක.)] පාවචනෙ, බාහුජඤ්ඤම්හි සාසනෙ;
අද්දසං සාසනකරෙ, භික්ඛවො තත්ථ සත්ථුනො.
‘‘සාවත්ථි ¶ නාම නගරං, රාජා තත්ථාසි කොසලො;
රථෙන නාගයුත්තෙන, උපෙසි බොධිමුත්තමං.
‘‘තස්සාහං නාගං දිස්වාන, පුබ්බකම්මං අනුස්සරිං;
අඤ්ජලිං පග්ගහෙත්වාන, සමයං අගමාසහං.
‘‘ජාතියා සත්තවස්සොව, පබ්බජිං අනගාරියං;
යො සො බුද්ධං උපට්ඨාසි, ආනන්දො නාම සාවකො.
‘‘ගතිමා ධිතිමා චෙව, සතිමා ච බහුස්සුතො;
රඤ්ඤො චිත්තං පසාදෙන්තො, නිය්යාදෙසි මහාජුති.
‘‘තස්සාහං ධම්මං සුත්වාන, පුබ්බකම්මං අනුස්සරිං;
තත්ථෙව ඨිතකො සන්තො, අරහත්තමපාපුණිං.
‘‘එකංසං චීවරං කත්වා, සිරෙ කත්වාන අඤ්ජලිං;
සම්බුද්ධං අභිවාදෙත්වා, ඉමං වාචං උදීරයිං.
‘‘‘පදුමුත්තරබුද්ධස්ස, ද්විපදින්දස්ස සත්ථුනො;
නිග්ගුණ්ඩිපුප්ඵං පග්ගය්හ, සීහාසනෙ ඨපෙසහං.
‘‘‘තෙන කම්මෙන ද්විපදින්ද, ලොකජෙට්ඨ නරාසභ;
පත්තොම්හි අචලං ඨානං, හිත්වා ජයපරාජයං’.
‘‘පඤ්චවීසසහස්සම්හි ¶ , කප්පානං මනුජාධිපා;
අබ්බුදනිරබ්බුදානි, අට්ඨට්ඨාසිංසු ඛත්තියා.
‘‘පටිසම්භිදා චතස්සො…පෙ… කතං බුද්ධස්ස සාසනං’’.
ඉත්ථං සුදං ආයස්මා නිග්ගුණ්ඩිපුප්ඵියො ථෙරො ඉමා ගාථායො අභාසිත්ථාති.
නිග්ගුණ්ඩිපුප්ඵියත්ථෙරස්සාපදානං සත්තමං.
8. සුමනාවෙළියත්ථෙරඅපදානං
‘‘වෙස්සභුස්ස ¶ ¶ භගවතො, ලොකජෙට්ඨස්ස තාදිනො;
සබ්බෙ ජනා සමාගම්ම, මහාපූජං කරොන්ති තෙ.
‘‘සුධාය පිණ්ඩං කත්වාන, ආවෙළං සුමනායහං;
සීහාසනස්ස පුරතො, අභිරොපෙසහං තදා.
‘‘සබ්බෙ ¶ ජනා සමාගම්ම, පෙක්ඛන්ති පුප්ඵමුත්තමං;
කෙනිදං පූජිතං පුප්ඵං, බුද්ධසෙට්ඨස්ස තාදිනො.
‘‘තෙන චිත්තප්පසාදෙන, නිම්මානං උපපජ්ජහං;
අනුභොමි [අනුභොසිං (සී.)] සකං කම්මං, පුබ්බෙ සුකතමත්තනො.
‘‘යං යං යොනුපපජ්ජාමි, දෙවත්තං අථ මානුසං;
සබ්බෙසානං පියො හොමි, පුප්ඵපූජායිදං ඵලං.
‘‘නාභිජානාමි ¶ කායෙන, වාචාය උද චෙතසා;
සංයතානං තපස්සීනං, කතං අක්කොසිතං මයා.
‘‘තෙන සුචරිතෙනාහං, චිත්තස්ස පණිධීහි ච;
සබ්බෙසං පූජිතො හොමි, අනක්කොසස්සිදං ඵලං.
‘‘ඉතො එකාදසෙ කප්පෙ, සහස්සාරොසි ඛත්තියො;
සත්තරතනසම්පන්නො, චක්කවත්තී මහබ්බලො.
‘‘පටිසම්භිදා චතස්සො…පෙ… කතං බුද්ධස්ස සාසනං’’.
ඉත්ථං සුදං ආයස්මා සුමනාවෙළියො ථෙරො ඉමා ගාථායො අභාසිත්ථාති.
සුමනාවෙළියත්ථෙරස්සාපදානං අට්ඨමං.
9. පුප්ඵච්ඡත්තියත්ථෙරඅපදානං
‘‘සිද්ධත්ථස්ස භගවතො, ලොකජෙට්ඨස්ස තාදිනො;
සච්චං පකාසයන්තස්ස, නිබ්බාපෙන්තස්ස පාණිනො.
‘‘ජලජං ¶ ආහරිත්වාන, සතපත්තං මනොරමං;
පුප්ඵස්ස ඡත්තං කත්වාන, බුද්ධස්ස අභිරොපයිං.
‘‘සිද්ධත්ථො ¶ ¶ ච ලොකවිදූ, ආහුතීනං පටිග්ගහො;
භික්ඛුසඞ්ඝෙ ඨිතො සත්ථා, ඉමං ගාථං අභාසථ.
‘‘‘යො මෙ චිත්තං පසාදෙත්වා, පුප්ඵච්ඡත්තං අධාරයිං;
තෙන චිත්තප්පසාදෙන, දුග්ගතිං සො න ගච්ඡති’.
‘‘ඉදං වත්වාන සම්බුද්ධො, සිද්ධත්ථො ලොකනායකො;
උය්යොජෙත්වාන පරිසං, වෙහාසං නභමුග්ගමි.
‘‘වුට්ඨිතෙ ¶ නරදෙවම්හි, සෙතච්ඡත්තම්පි වුට්ඨහි;
පුරතො බුද්ධසෙට්ඨස්ස, ගච්ඡති ඡත්තමුත්තමං.
‘‘චතුන්නවුතිතො කප්පෙ, යං ඡත්තං අභිරොපයිං;
දුග්ගතිං නාභිජානාමි, පුප්ඵච්ඡත්තස්සිදං ඵලං.
‘‘චතුසත්තතිකප්පම්හි, අට්ඨ ජලසිඛා අහූ;
සත්තරතනසම්පන්නා, චක්කවත්තී මහබ්බලා.
‘‘පටිසම්භිදා චතස්සො…පෙ… කතං බුද්ධස්ස සාසනං’’.
ඉත්ථං සුදං ආයස්මා පුප්ඵච්ඡත්තියො ථෙරො ඉමා ගාථායො අභාසිත්ථාති.
පුප්ඵච්ඡත්තියත්ථෙරස්සාපදානං නවමං.
10. සපරිවාරඡත්තදායකත්ථෙරඅපදානං
‘‘පදුමුත්තරො ලොකවිදූ, ආහුතීනං පටිග්ගහො;
ආකාසෙ ජලවුට්ඨීව වස්සතෙ [වස්සති (සී. ස්යා.), වස්සෙති (?)] ධම්මවුට්ඨියා.
‘‘තමද්දසාසිං ¶ සම්බුද්ධං, දෙසෙන්තං අමතං පදං;
සකං චිත්තං පසාදෙත්වා, අගමාසිං සකං ඝරං.
‘‘ඡත්තං අලඞ්කතං ගය්හ, උපගච්ඡිං නරුත්තමං;
හට්ඨො හට්ඨෙන චිත්තෙන, ආකාසෙ උක්ඛිපිං අහං.
‘‘සුසඞ්ගහිතයානංව ¶ , දන්තොව සාවකුත්තමො;
උපගන්ත්වාන සම්බුද්ධං, මත්ථකෙ සම්පතිට්ඨහි.
‘‘අනුකම්පකො කාරුණිකො, බුද්ධො ලොකග්ගනායකො;
භික්ඛුසඞ්ඝෙ නිසීදිත්වා, ඉමා ගාථා අභාසථ.
‘‘‘යෙන ඡත්තමිදං දින්නං, අලඞ්කතං මනොරමං;
තෙන චිත්තප්පසාදෙන, දුග්ගතිං සො න ගච්ඡති.
‘‘‘සත්තක්ඛත්තුඤ්ච ¶ දෙවෙසු, දෙවරජ්ජං කරිස්සති;
බාත්තිංසක්ඛත්තුඤ්ච රාජා, චක්කවත්තී භවිස්සති.
‘‘‘කප්පසතසහස්සම්හි, ඔක්කාකකුලසම්භවො;
ගොතමො නාම ගොත්තෙන, සත්ථා ලොකෙ භවිස්සති.
‘‘‘තස්ස ¶ ධම්මෙසු දායාදො, ඔරසො ධම්මනිම්මිතො;
සබ්බාසවෙ පරිඤ්ඤාය, නිබ්බායිස්සතිනාසවො’.
‘‘බුද්ධස්ස ගිරමඤ්ඤාය, වාචාසභිමුදීරිතං;
පසන්නචිත්තො සුමනො, භිය්යො හාසං ජනෙසහං.
‘‘ජහිත්වා මානුසං යොනිං, දිබ්බං යොනිං [දෙවයොනිං (සී.), දිබ්බයොනිං (ස්යා.)] මජ්ඣගං;
විමානමුත්තමං මය්හං, අබ්භුග්ගතං මනොරමං.
‘‘විමානා ¶ නික්ඛමන්තස්ස, සෙතච්ඡත්තං ධරීයති;
තදා සඤ්ඤං පටිලභිං, පුබ්බකම්මස්සිදං ඵලං.
‘‘දෙවලොකා චවිත්වාන, මනුස්සත්තඤ්ච ආගමිං;
ඡත්තිංසක්ඛත්තුං චක්කවත්තී, සත්තකප්පසතම්හිතො.
‘‘තම්හා කායා චවිත්වාන, ආගච්ඡිං [අගඤ්ඡිං (?)] තිදසං පුරං;
සංසරිත්වානුපුබ්බෙන, මානුසං පුනරාගමිං.
‘‘ඔක්කන්තං මාතුකුච්ඡිං මං, සෙත්තච්ඡත්තං අධාරයුං;
ජාතියා සත්තවස්සොහං, පබ්බජිං අනගාරියං.
‘‘සුනන්දො නාම නාමෙන, බ්රාහ්මණො මන්තපාරගූ;
ඵලිකං ඡත්තමාදාය, සාවකග්ගස්ස සො තදා.
‘‘අනුමොදි ¶ මහාවීරො, සාරිපුත්තො මහාකථී;
සුත්වානුමොදනං තස්ස, පුබ්බකම්මමනුස්සරිං.
‘‘අඤ්ජලිං පග්ගහෙත්වාන, සකං චිත්තං පසාදයිං;
සරිත්වා පුරිමං කම්මං, අරහත්තමපාපුණිං.
‘‘උට්ඨාය ආසනා තම්හා, සිරෙ කත්වාන අඤ්ජලිං;
සම්බුද්ධං අභිවාදෙත්වා, ඉමං වාචං උදීරියිං.
‘‘සතසහස්සිතො කප්පෙ, බුද්ධො ලොකෙ අනුත්තරො;
පදුමුත්තරො ලොකවිදූ, ආහුතීනං පටිග්ගහො.
‘‘තස්ස ඡත්තං මයා දින්නං, විචිත්තං සමලඞ්කතං;
උභො හත්ථෙහි පග්ගණ්හි, සයම්භූ අග්ගපුග්ගලො.
‘‘අහො ¶ ¶ බුද්ධො අහො ධම්මො, අහො නො සත්ථුසම්පදා;
එකච්ඡත්තස්ස දානෙන, දුග්ගතිං නුපපජ්ජහං.
‘‘කිලෙසා ¶ ඣාපිතා මය්හං, භවා සබ්බෙ සමූහතා;
සබ්බාසවෙ පරිඤ්ඤාය, විහරාමි අනාසවො.
‘‘පටිසම්භිදා චතස්සො…පෙ… කතං බුද්ධස්ස සාසනං’’.
ඉත්ථං සුදං ආයස්මා සපරිවාරඡත්තදායකො ථෙරො ඉමා ගාථායො අභාසිත්ථාති.
සපරිවාරඡත්තදායකත්ථෙරස්සාපදානං දසමං.
උමාපුප්ඵියවග්ගො තෙත්තිංසතිමො.
තස්සුද්දානං –
උමාපුප්ඵඤ්ච පුලිනං, හාසො යඤ්ඤො නිමිත්තකො;
සංසාවකො නිග්ගුණ්ඩී ච, සුමනං පුප්ඵඡත්තකො;
සපරිවාරඡත්තො ච, ගාථා සත්තසතුත්තරාති.